൮. അച്ചേകചീവരസിക്ഖാപദം

൬൪൬. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന അഞ്ഞതരോ മഹാമത്തോ പവാസം ഗച്ഛന്തോ ഭിക്ഖൂനം സന്തികേ ദൂതം പാഹേസി – ‘‘ആഗച്ഛന്തു ഭദന്താ വസ്സാവാസികം ദസ്സാമീ’’തി. ഭിക്ഖൂ – ‘വസ്സംവുട്ഠാനം ഭഗവതാ വസ്സാവാസികം അനുഞ്ഞാത’ന്തി, കുക്കുച്ചായന്താ നാഗമംസു. അഥ ഖോ സോ മഹാമത്തോ ഉജ്ഝായതി ഖിയ്യതി വിപാചേതി – ‘‘കഥഞ്ഹി നാമ ഭദന്താ മയാ ദൂതേ പഹിതേ നാഗച്ഛിസ്സന്തി! അഹഞ്ഹി സേനായ ഗച്ഛാമി. ദുജ്ജാനം ജീവിതം ദുജ്ജാനം മരണ’’ന്തി. അസ്സോസും ഖോ ഭിക്ഖൂ തസ്സ മഹാമത്തസ്സ ഉജ്ഝായന്തസ്സ ഖിയ്യന്തസ്സ വിപാചേന്തസ്സ. അഥ ഖോ തേ ഭിക്ഖൂ ഭഗവതോ ഏതമത്ഥം ആരോചേസും. അഥ ഖോ ഭഗവാ ഏതസ്മിം നിദാനേ ഏതസ്മിം പകരണേ ധമ്മിം കഥം കത്വാ ഭിക്ഖൂ ആമന്തേസി – ‘‘അനുജാനാമി, ഭിക്ഖവേ, അച്ചേകചീവരം പടിഗ്ഗഹേത്വാ നിക്ഖിപിതു’’ന്തി.

൬൪൭. തേന ഖോ പന സമയേന ഭിക്ഖൂ – ‘‘ഭഗവതാ അനുഞ്ഞാതം അച്ചേകചീവരം പടിഗ്ഗഹേത്വാ നിക്ഖിപിതു’’ന്തി, അച്ചേകചീവരാനി പടിഗ്ഗഹേത്വാ ചീവരകാലസമയം അതിക്കാമേന്തി. താനി ചീവരാനി ചീവരവംസേ ഭണ്ഡികാബദ്ധാനി തിട്ഠന്തി. അദ്ദസ ഖോ ആയസ്മാ ആനന്ദോ സേനാസനചാരികം ആഹിണ്ഡന്തോ താനി ചീവരാനി ചീവരവംസേ ഭണ്ഡികാബദ്ധാനി. തിട്ഠന്തേ ദിസ്വാ ഭിക്ഖൂ ഏതദവോച – ‘‘കസ്സിമാനി, ആവുസോ, ചീവരാനി ചീവരവംസേ ഭണ്ഡികാബദ്ധാനി തിട്ഠന്തീ’’തി? ‘‘അമ്ഹാകം, ആവുസോ, അച്ചേകചീവരാനീ’’തി. ‘‘കീവചിരം പനാവുസോ, ഇമാനി ചീവരാനി നിക്ഖിത്താനീ’’തി? അഥ ഖോ തേ ഭിക്ഖൂ ആയസ്മതോ ആനന്ദസ്സ യഥാനിക്ഖിത്തം ആരോചേസും. ആയസ്മാ ആനന്ദോ ഉജ്ഝായതി ഖിയ്യതി വിപാചേതി – ‘‘കഥഞ്ഹി നാമ ഭിക്ഖൂ അച്ചേകചീവരം പടിഗ്ഗഹേത്വാ ചീവരകാലസമയം അതിക്കാമേസ്സന്തീ’’തി! അഥ ഖോ ആയസ്മാ ആനന്ദോ തേ ഭിക്ഖൂ അനേകപരിയായേന വിഗരഹിത്വാ ഭഗവതോ ഏതമത്ഥം ആരോചേസി…പേ… – ‘‘സച്ചം കിര, ഭിക്ഖവേ, ഭിക്ഖൂ അച്ചേകചീവരം പടിഗ്ഗഹേത്വാ ചീവരകാലസമയം അതിക്കാമേന്തീ’’തി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ തേ, ഭിക്ഖവേ, മോഘപുരിസാ അച്ചേകചീവരം പടിഗ്ഗഹേത്വാ ചീവരകാലസമയം അതിക്കാമേസ്സന്തി! നേതം, ഭിക്ഖവേ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഇമം സിക്ഖാപദം ഉദ്ദിസേയ്യാഥ –

൬൪൮. ‘‘ദസാഹാനാഗതം കത്തികതേമാസികപുണ്ണമം ഭിക്ഖുനോ പനേവ അച്ചേകചീവരം ഉപ്പജ്ജേയ്യ, അച്ചേകം മഞ്ഞമാനേന ഭിക്ഖുനാ പടിഗ്ഗഹേതബ്ബം, പടിഗ്ഗഹേത്വാ യാവ ചീവരകാലസമയം നിക്ഖിപിതബ്ബം. തതോ ചേ ഉത്തരി നിക്ഖിപേയ്യ, നിസ്സഗ്ഗിയം പാചിത്തിയ’’ന്തി.

൬൪൯. ദസാഹാനാഗതന്തി ദസാഹാനാഗതായ പവാരണായ.

കത്തികതേമാസികപുണ്ണമന്തി പവാരണാ കത്തികാ വുച്ചതി.

അച്ചേകചീവരം നാമ സേനായ വാ ഗന്തുകാമോ ഹോതി, പവാസം വാ ഗന്തുകാമോ ഹോതി, ഗിലാനോ വാ ഹോതി, ഗബ്ഭിനീ വാ ഹോതി, അസ്സദ്ധസ്സ വാ സദ്ധാ ഉപ്പന്നാ ഹോതി, അപ്പസന്നസ്സ വാ പസാദോ ഉപ്പന്നോ ഹോതി, സോ ചേ ഭിക്ഖൂനം സന്തികേ ദൂതം പഹിണേയ്യ – ‘‘ആഗച്ഛന്തു ഭദന്താ വസ്സാവാസികം ദസ്സാമീ’’തി, ഏതം അച്ചേകചീവരം നാമ.

അച്ചേകം മഞ്ഞമാനേന ഭിക്ഖുനാ പടിഗ്ഗഹേതബ്ബം പടിഗ്ഗഹേത്വാ യാവ ചീവരകാലസമയം നിക്ഖിപിതബ്ബന്തി സഞ്ഞാണം കത്വാ നിക്ഖിപിതബ്ബം – ‘‘ഇദം അച്ചേകചീവര’’ന്തി.

ചീവരകാലസമയോ നാമ അനത്ഥതേ കഥിനേ വസ്സാനസ്സ പച്ഛിമോ മാസോ, അത്ഥതേ കഥിനേ പഞ്ചമാസാ.

തതോ ചേ ഉത്തരി നിക്ഖിപേയ്യാതി അനത്ഥതേ കഥിനേ വസ്സാനസ്സ പച്ഛിമം ദിവസം അതിക്കാമേതി, നിസ്സഗ്ഗിയം പാചിത്തിയം [നിസ്സഗ്ഗിയം ഹോതി (സ്യാ.)]. അത്ഥതേ കഥിനേ കഥിനുദ്ധാരദിവസം അതിക്കാമേതി, നിസ്സഗ്ഗിയം ഹോതി. നിസ്സജ്ജിതബ്ബം സങ്ഘസ്സ വാ ഗണസ്സ വാ പുഗ്ഗലസ്സ വാ. ഏവഞ്ച പന, ഭിക്ഖവേ, നിസ്സജ്ജിതബ്ബം…പേ… ഇദം മേ, ഭന്തേ, അച്ചേകചീവരം ചീവരകാലസമയം അതിക്കാമിതം നിസ്സഗ്ഗിയം. ഇമാഹം സങ്ഘസ്സ നിസ്സജ്ജാമീതി…പേ… ദദേയ്യാതി…പേ… ദദേയ്യുന്തി…പേ… ആയസ്മതോ ദമ്മീതി.

൬൫൦. അച്ചേകചീവരേ അച്ചേകചീവരസഞ്ഞീ ചീവരകാലസമയം അതിക്കാമേതി, നിസ്സഗ്ഗിയം പാചിത്തിയം. അച്ചേകചീവരേ വേമതികോ ചീവരകാലസമയം അതിക്കാമേതി, നിസ്സഗ്ഗിയം പാചിത്തിയം. അച്ചേകചീവരേ അനച്ചേകചീവരസഞ്ഞീ ചീവരകാലസമയം അതിക്കാമേതി, നിസ്സഗ്ഗിയം പാചിത്തിയം. അനധിട്ഠിതേ അധിട്ഠിതസഞ്ഞീ …പേ… അവികപ്പിതേ വികപ്പിതസഞ്ഞീ… അവിസ്സജ്ജിതേ വിസ്സജ്ജിതസഞ്ഞീ… അനട്ഠേ നട്ഠസഞ്ഞീ… അവിനട്ഠേ വിനട്ഠസഞ്ഞീ… അദഡ്ഢേ ദഡ്ഢസഞ്ഞീ… അവിലുത്തേ വിലുത്തസഞ്ഞീ ചീവരകാലസമയം അതിക്കാമേതി, നിസ്സഗ്ഗിയം പാചിത്തിയം.

നിസ്സഗ്ഗിയം ചീവരം അനിസ്സജ്ജിത്വാ പരിഭുഞ്ജതി, ആപത്തി ദുക്കടസ്സ. അനച്ചേകചീവരേ അച്ചേകചീവരസഞ്ഞീ, ആപത്തി ദുക്കടസ്സ. അനച്ചേകചീവരേ വേമതികോ, ആപത്തി ദുക്കടസ്സ. അനച്ചേകചീവരേ അനച്ചേകചീവരസഞ്ഞീ, അനാപത്തി.

൬൫൧. അനാപത്തി – അന്തോസമയേ അധിട്ഠേതി, വികപ്പേതി, വിസ്സജ്ജേതി, നസ്സതി, വിനസ്സതി, ഡയ്ഹതി, അച്ഛിന്ദിത്വാ ഗണ്ഹന്തി, വിസ്സാസം ഗണ്ഹന്തി, ഉമ്മത്തകസ്സ, ആദികമ്മികസ്സാതി.

അച്ചേകചീവരസിക്ഖാപദം നിട്ഠിതം അട്ഠമം.