൩. അനിയതകണ്ഡം

൧. പഠമഅനിയതസിക്ഖാപദം

ഇമേ ഖോ പനായസ്മന്തോ ദ്വേ അനിയതാ ധമ്മാ

ഉദ്ദേസം ആഗച്ഛന്തി.

൪൪൩. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ആയസ്മാ ഉദായീ സാവത്ഥിയം കുലൂപകോ ഹോതി, ബഹുകാനി കുലാനി ഉപസങ്കമതി. തേന ഖോ പന സമയേന ആയസ്മതോ ഉദായിസ്സ ഉപട്ഠാകകുലസ്സ കുമാരികാ അഞ്ഞതരസ്സ കുലസ്സ കുമാരകസ്സ ദിന്നാ ഹോതി. അഥ ഖോ ആയസ്മാ ഉദായീ പുബ്ബണ്ഹസമയം നിവാസേത്വാ പത്തചീവരമാദായ യേന തം കുലം തേനുപസങ്കമി; ഉപസങ്കമിത്വാ മനുസ്സേ പുച്ഛി – ‘‘കഹം ഇത്ഥന്നാമാ’’തി? തേ ഏവമാഹംസു – ‘‘ദിന്നാ, ഭന്തേ, അമുകസ്സ കുലസ്സ കുമാരകസ്സാ’’തി. തമ്പി ഖോ കുലം ആയസ്മതോ ഉദായിസ്സ ഉപട്ഠാകം ഹോതി. അഥ ഖോ ആയസ്മാ ഉദായീ യേന തം കുലം തേനുപസങ്കമി; ഉപസങ്കമിത്വാ മനുസ്സേ പുച്ഛി – ‘‘കഹം ഇത്ഥന്നാമാ’’തി? തേ ഏവമാഹംസു – ‘‘ഏസായ്യ, ഓവരകേ നിസിന്നാ’’തി. അഥ ഖോ ആയസ്മാ ഉദായീ യേന സാ കുമാരികാ തേനുപസങ്കമി; ഉപസങ്കമിത്വാ തസ്സാ കുമാരികായ സദ്ധിം ഏകോ ഏകായ രഹോ പടിച്ഛന്നേ ആസനേ അലംകമ്മനിയേ നിസജ്ജം കപ്പേസി കാലയുത്തം സമുല്ലപന്തോ കാലയുത്തം ധമ്മം ഭണന്തോ.

തേന ഖോ പന സമയേന വിസാഖാ മിഗാരമാതാ ബഹുപുത്താ ഹോതി ബഹുനത്താ അരോഗപുത്താ അരോഗനത്താ അഭിമങ്ഗലസമ്മതാ. മനുസ്സാ യഞ്ഞേസു ഛണേസു ഉസ്സവേസു വിസാഖം മിഗാരമാതരം പഠമം ഭോജേന്തി. അഥ ഖോ വിസാഖാ മിഗാരമാതാ നിമന്തിതാ തം കുലം അഗമാസി. അദ്ദസാ ഖോ വിസാഖാ മിഗാരമാതാ ആയസ്മന്തം ഉദായിം തസ്സാ കുമാരികായ സദ്ധിം ഏകം ഏകായ രഹോ പടിച്ഛന്നേ ആസനേ അലംകമ്മനിയേ നിസിന്നം. ദിസ്വാന ആയസ്മന്തം ഉദായിം ഏതദവോച – ‘‘ഇദം, ഭന്തേ, നച്ഛന്നം നപ്പതിരൂപം യം അയ്യോ മാതുഗാമേന സദ്ധിം ഏകോ ഏകായ രഹോ പടിച്ഛന്നേ ആസനേ അലംകമ്മനിയേ നിസജ്ജം കപ്പേതി. കിഞ്ചാപി, ഭന്തേ, അയ്യോ അനത്ഥികോ തേന ധമ്മേന, അപിച ദുസ്സദ്ധാപയാ അപ്പസന്നാ മനുസ്സാ’’തി. ഏവമ്പി ഖോ ആയസ്മാ ഉദായീ വിസാഖായ മിഗാരമാതുയാ വുച്ചമാനോ നാദിയി. അഥ ഖോ വിസാഖാ മിഗാരമാതാ നിക്ഖമിത്വാ ഭിക്ഖൂനം ഏതമത്ഥം ആരോചേസി. യേ തേ ഭിക്ഖൂ അപ്പിച്ഛാ…പേ… തേ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ആയസ്മാ ഉദായീ മാതുഗാമേന സദ്ധിം ഏകോ ഏകായ രഹോ പടിച്ഛന്നേ ആസനേ അലംകമ്മനിയേ നിസജ്ജം കപ്പേസ്സതീ’’തി! അഥ ഖോ തേ ഭിക്ഖൂ ആയസ്മന്തം ഉദായിം അനേകപരിയായേന വിഗരഹിത്വാ ഭഗവതോ ഏതമത്ഥം ആരോചേസും…പേ… ‘‘സച്ചം കിര ത്വം, ഉദായി, മാതുഗാമേന സദ്ധിം ഏകോ ഏകായ രഹോ പടിച്ഛന്നേ ആസനേ അലംകമ്മനിയേ നിസജ്ജം കപ്പേസീ’’തി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ ത്വം, മോഘപുരിസ, മാതുഗാമേന സദ്ധിം ഏകോ ഏകായ രഹോ പടിച്ഛന്നേ ആസനേ അലംകമ്മനിയേ നിസജ്ജം കപ്പേസ്സസി! നേതം, മോഘപുരിസ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഇമം സിക്ഖാപദം ഉദ്ദിസേയ്യാഥ –

൪൪൪. ‘‘യോ പന ഭിക്ഖു മാതുഗാമേന സദ്ധിം ഏകോ ഏകായ രഹോ പടിച്ഛന്നേ ആസനേ അലംകമ്മനിയേ നിസജ്ജം കപ്പേയ്യ, തമേനം സദ്ധേയ്യവചസാ ഉപാസികാ ദിസ്വാ തിണ്ണം ധമ്മാനം അഞ്ഞതരേന വദേയ്യ – പാരാജികേന വാ സങ്ഘാദിസേസേന വാ പാചിത്തിയേന വാ, നിസജ്ജം ഭിക്ഖു പടിജാനമാനോ തിണ്ണം ധമ്മാനം അഞ്ഞതരേന കാരേതബ്ബോ – പാരാജികേന വാ സങ്ഘാദിസേസേന വാ പാചിത്തിയേന വാ യേന വാ സാ സദ്ധേയ്യവചസാ ഉപാസികാ വദേയ്യ, തേന സോ ഭിക്ഖു കാരേതബ്ബോ. അയം ധമ്മോ അനിയതോ’’തി.

൪൪൫. യോ പനാതി യോ യാദിസോ…പേ… ഭിക്ഖൂതി…പേ… അയം ഇമസ്മിം അത്ഥേ അധിപ്പേതോ ഭിക്ഖൂതി.

മാതുഗാമോ നാമ മനുസ്സിത്ഥീ, ന യക്ഖീ ന പേതീ ന തിരച്ഛാനഗതാ. അന്തമസോ തദഹുജാതാപി ദാരികാ, പഗേവ മഹത്തരീ.

സദ്ധിന്തി ഏകതോ.

ഏകോ ഏകായാതി ഭിക്ഖു ചേവ ഹോതി മാതുഗാമോ ച.

രഹോ നാമ ചക്ഖുസ്സ രഹോ, സോതസ്സ രഹോ. ചക്ഖുസ്സ രഹോനാമ ന സക്കാ ഹോതി അക്ഖിം വാ നിഖണീയമാനേ ഭമുകം വാ ഉക്ഖിപീയമാനേ സീസം വാ ഉക്ഖിപീയമാനേ പസ്സിതും. സോതസ്സ രഹോനാമ ന സക്കാ ഹോതി പകതികഥാ സോതും.

പടിച്ഛന്നം നാമ ആസനം കുട്ടേന വാ [കുഡ്ഡേന വാ (സീ. സ്യാ.)] കവാടേന വാ കിലഞ്ജേന വാ സാണിപാകാരേന വാ രുക്ഖേന വാ ഥമ്ഭേന വാ കോത്ഥളിയാ വാ യേന കേനചി പടിച്ഛന്നം ഹോതി.

അലംകമ്മനിയേതി സക്കാ ഹോതി മേഥുനം ധമ്മം പടിസേവിതും.

നിസജ്ജം കപ്പേയ്യാതി മാതുഗാമേ നിസിന്നേ ഭിക്ഖു ഉപനിസിന്നോ വാ ഹോതി ഉപനിപന്നോ വാ. ഭിക്ഖു നിസിന്നേ മാതുഗാമോ ഉപനിസിന്നോ വാ ഹോതി ഉപനിപന്നോ വാ. ഉഭോ വാ നിസിന്നാ ഹോന്തി ഉഭോ വാ നിപന്നാ.

സദ്ധേയ്യവചസാ നാമ ആഗതഫലാ അഭിസമേതാവിനീ വിഞ്ഞാതസാസനാ.

ഉപാസികാ നാമ ബുദ്ധം സരണം ഗതാ, ധമ്മം സരണം ഗതാ, സങ്ഘം സരണം ഗതാ.

ദിസ്വാതി പസ്സിത്വാ.

തിണ്ണം ധമ്മാനം അഞ്ഞതരേന വദേയ്യ – പാരാജികേന വാ സങ്ഘാദിസേസേന വാ പാചിത്തിയേന വാ. നിസജ്ജം ഭിക്ഖു പടിജാനമാനോ തിണ്ണം ധമ്മാനം അഞ്ഞതരേന കാരേതബ്ബോ – പാരാജികേന വാ സങ്ഘാദിസേസേന വാ പാചിത്തിയേന വാ. യേന വാ സാ സദ്ധേയ്യവചസാ ഉപാസികാ വദേയ്യ തേന സോ ഭിക്ഖു കാരേതബ്ബോ.

൪൪൬. സാ ചേ ഏവം വദേയ്യ – ‘‘അയ്യോ മയാ ദിട്ഠോ നിസിന്നോ മാതുഗാമസ്സ മേഥുനം ധമ്മം പടിസേവന്തോ’’തി, സോ ച തം പടിജാനാതി, ആപത്തിയാ കാരേതബ്ബോ. സാ ചേ ഏവം വദേയ്യ – ‘‘അയ്യോ മയാ ദിട്ഠോ നിസിന്നോ മാതുഗാമസ്സ മേഥുനം ധമ്മം പടിസേവന്തോ’’തി, സോ ചേ ഏവം വദേയ്യ – ‘‘സച്ചാഹം നിസിന്നോ, നോ ച ഖോ മേഥുനം ധമ്മം പടിസേവി’’ന്തി, നിസജ്ജായ കാരേതബ്ബോ. സാ ചേ ഏവം വദേയ്യ – ‘‘അയ്യോ മയാ ദിട്ഠോ നിസിന്നോ മാതുഗാമസ്സ മേഥുനം ധമ്മം പടിസേവന്തോ’’തി, സോ ചേ ഏവം വദേയ്യ – ‘‘നാഹം നിസിന്നോ, അപിച ഖോ നിപന്നോ’’തി, നിപജ്ജായ കാരേതബ്ബോ. സാ ചേ ഏവം വദേയ്യ – ‘‘അയ്യോ മയാ ദിട്ഠോ നിസിന്നോ മാതുഗാമസ്സ മേഥുനം ധമ്മം പടിസേവന്തോ’’തി, സോ ചേ ഏവം വദേയ്യ – ‘‘നാഹം നിസിന്നോ അപിച ഖോ ഠിതോ’’തി, ന കാരേതബ്ബോ.

൪൪൭. സാ ചേ ഏവം വദേയ്യ – ‘‘അയ്യോ മയാ ദിട്ഠോ നിപന്നോ മാതുഗാമസ്സ മേഥുനം ധമ്മം പടിസേവന്തോ’’തി, സോ ച തം പടിജാനാതി, ആപത്തിയാ കാരേതബ്ബോ. സാ ചേ ഏവം വദേയ്യ – ‘‘അയ്യോ മയാ ദിട്ഠോ നിപന്നോ മാതുഗാമസ്സ മേഥുനം ധമ്മം പടിസേവന്തോ’’തി, സോ ചേ ഏവം വദേയ്യ – ‘‘സച്ചാഹം നിപന്നോ, നോ ച ഖോ മേഥുനം ധമ്മം പടിസേവി’’ന്തി, നിപജ്ജായ കാരേതബ്ബോ. സാ ചേ ഏവം വദേയ്യ – ‘‘അയ്യോ മയാ ദിട്ഠോ നിപന്നോ മാതുഗാമസ്സ മേഥുനം ധമ്മം പടിസേവന്തോ’’തി, സോ ചേ ഏവം വദേയ്യ – ‘‘നാഹം നിപന്നോ, അപിച ഖോ നിസിന്നോ’’തി, നിസജ്ജായ കാരേതബ്ബോ. സാ ചേ ഏവം വദേയ്യ – ‘‘അയ്യോ മയാ ദിട്ഠോ നിപന്നോ മാതുഗാമസ്സ മേഥുനം ധമ്മം പടിസേവന്തോ’’തി, സോ ചേ ഏവം വദേയ്യ – ‘‘നാഹം നിപന്നോ അപിച ഖോ ഠിതോ’’തി, ന കാരേതബ്ബോ.

൪൪൮. സാ ചേ ഏവം വദേയ്യ – ‘‘അയ്യോ മയാ ദിട്ഠോ നിസിന്നോ മാതുഗാമേന സദ്ധിം കായസംസഗ്ഗം സമാപജ്ജന്തോ’’തി, സോ ച തം പടിജാനാതി, ആപത്തിയാ കാരേതബ്ബോ…പേ… സച്ചാഹം നിസിന്നോ നോ ച ഖോ കായസംസഗ്ഗം സമാപജ്ജിന്തി, നിസജ്ജായ കാരേതബ്ബോ…പേ… നാഹം നിസിന്നോ അപിച ഖോ നിപന്നോതി, നിപജ്ജായ കാരേതബ്ബോ…പേ… നാഹം നിസിന്നോ അപിച ഖോ ഠിതോതി, ന കാരേതബ്ബോ.

സാ ചേ ഏവം വദേയ്യ – ‘‘അയ്യോ മയാ ദിട്ഠോ നിപന്നോ മാതുഗാമേന സദ്ധിം കായസംസഗ്ഗം സമാപജ്ജന്തോ’’തി, സോ ച തം പടിജാനാതി, ആപത്തിയാ കാരേതബ്ബോ…പേ… സച്ചാഹം നിപന്നോ, നോ ച ഖോ കായസംസഗ്ഗം സമാപജ്ജിന്തി, നിപജ്ജായ കാരേതബ്ബോ…പേ… നാഹം നിപന്നോ, അപിച ഖോ നിസിന്നോതി, നിസജ്ജായ കാരേതബ്ബോ…പേ… നാഹം നിപന്നോ, അപിച ഖോ ഠിതോതി, ന കാരേതബ്ബോ.

൪൪൯. സാ ചേ ഏവം വദേയ്യ – ‘‘അയ്യോ മയാ ദിട്ഠോ മാതുഗാമേന സദ്ധിം ഏകോ ഏകായ രഹോ പടിച്ഛന്നേ ആസനേ അലംകമ്മനിയേ നിസിന്നോ’’തി, സോ ച തം പടിജാനാതി, നിസജ്ജായ കാരേതബ്ബോ…പേ… നാഹം നിസിന്നോ അപിച ഖോ നിപന്നോതി, നിപജ്ജായ കാരേതബ്ബോ…പേ… നാഹം നിസിന്നോ, അപിച ഖോ ഠിതോതി, ന കാരേതബ്ബോ.

൪൫൦. സാ ചേ ഏവം വദേയ്യ – ‘‘അയ്യോ മയാ ദിട്ഠോ മാതുഗാമേന സദ്ധിം ഏകോ ഏകായ രഹോ പടിച്ഛന്നേ ആസനേ അലംകമ്മനിയേ നിപന്നോ’’തി, സോ ച തം പടിജാനാതി, നിപജ്ജായ കാരേതബ്ബോ…പേ… നാഹം നിപന്നോ, അപിച ഖോ നിസിന്നോതി, നിസജ്ജായ കാരേതബ്ബോ…പേ… നാഹം നിപന്നോ, അപിച ഖോ ഠിതോതി, ന കാരേതബ്ബോ.

അനിയതോതി ന നിയതോ, പാരാജികം വാ സങ്ഘാദിസേസോ വാ പാചിത്തിയം വാ.

൪൫൧. ഗമനം പടിജാനാതി, നിസജ്ജം പടിജാനാതി, ആപത്തിം പടിജാനാതി, ആപത്തിയാ കാരേതബ്ബോ. ഗമനം പടിജാനാതി, നിസജ്ജം ന പടിജാനാതി, ആപത്തിം പടിജാനാതി, ആപത്തിയാ കാരേതബ്ബോ. ഗമനം പടിജാനാതി, നിസജ്ജം പടിജാനാതി, ആപത്തിം ന പടിജാനാതി, നിസജ്ജായ കാരേതബ്ബോ. ഗമനം പടിജാനാതി, നിസജ്ജം ന പടിജാനാതി, ആപത്തിം ന പടിജാനാതി, ന കാരേതബ്ബോ.

ഗമനം ന പടിജാനാതി, നിസജ്ജം പടിജാനാതി, ആപത്തിം പടിജാനാതി, ആപത്തിയാ

കാരേതബ്ബോ. ഗമനം ന പടിജാനാതി, നിസജ്ജം ന പടിജാനാതി, ആപത്തിം പടിജാനാതി, ആപത്തിയാ കാരേതബ്ബോ. ഗമനം ന പടിജാനാതി, നിസജ്ജം പടിജാനാതി, ആപത്തിം ന പടിജാനാതി, നിസജ്ജായ കാരേതബ്ബോ. ഗമനം ന പടിജാനാതി, നിസജ്ജം ന പടിജാനാതി, ആപത്തിം ന പടിജാനാതി, ന കാരേതബ്ബോതി.

പഠമോ അനിയതോ നിട്ഠിതോ.

൨. ദുതിയഅനിയതസിക്ഖാപദം

൪൫൨. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ആയസ്മാ ഉദായീ – ‘‘ഭഗവതാ പടിക്ഖിത്തം മാതുഗാമേന സദ്ധിം ഏകോ ഏകായ രഹോ പടിച്ഛന്നേ ആസനേ അലംകമ്മനിയേ നിസജ്ജം കപ്പേതു’’ന്തി തസ്സായേവ കുമാരികായ സദ്ധിം ഏകോ ഏകായ രഹോ നിസജ്ജം കപ്പേസി കാലയുത്തം സമുല്ലപന്തോ കാലയുത്തം ധമ്മം ഭണന്തോ. ദുതിയമ്പി ഖോ വിസാഖാ മിഗാരമാതാ നിമന്തിതാ തം കുലം അഗമാസി. അദ്ദസാ ഖോ വിസാഖാ മിഗാരമാതാ ആയസ്മന്തം ഉദായിം തസ്സായേവ കുമാരികായ സദ്ധിം ഏകം ഏകായ രഹോ നിസിന്നം. ദിസ്വാന ആയസ്മന്തം ഉദായിം ഏതദവോച – ‘‘ഇദം, ഭന്തേ, നച്ഛന്നം നപ്പതിരൂപം യം അയ്യോ മാതുഗാമേന സദ്ധിം ഏകോ ഏകായ രഹോ നിസജ്ജം കപ്പേതി. കിഞ്ചാപി, ഭന്തേ, അയ്യോ അനത്ഥികോ തേന ധമ്മേന, അപിച ദുസ്സദ്ധാപയാ അപ്പസന്നാ മനുസ്സാ’’തി. ഏവമ്പി ഖോ ആയസ്മാ ഉദായീ വിസാഖായ മിഗാരമാതുയാ വുച്ചമാനോ നാദിയി. അഥ ഖോ വിസാഖാ മിഗാരമാതാ നിക്ഖമിത്വാ ഭിക്ഖൂനം ഏതമത്ഥം ആരോചേസി. യേ തേ ഭിക്ഖൂ അപ്പിച്ഛാ…പേ… തേ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ആയസ്മാ ഉദായീ മാതുഗാമേന സദ്ധിം ഏകോ ഏകായ രഹോ നിസജ്ജം കപ്പേസ്സതീ’’തി! അഥ ഖോ തേ ഭിക്ഖൂ ആയസ്മന്തം ഉദായിം അനേകപരിയായേന വിഗരഹിത്വാ ഭഗവതോ ഏതമത്ഥം ആരോചേസും …പേ… ‘‘സച്ചം കിര ത്വം, ഉദായി, മാതുഗാമേന സദ്ധിം ഏകോ ഏകായ രഹോ നിസജ്ജം കപ്പേസീ’’തി? ‘‘സച്ചം ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ ത്വം, മോഘപുരിസ, മാതുഗാമേന സദ്ധിം ഏകോ ഏകായ രഹോ നിസജ്ജം കപ്പേസ്സസി! നേതം, മോഘപുരിസ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഇമം സിക്ഖാപദം ഉദ്ദിസേയ്യാഥ –

൪൫൩. ‘‘ന ഹേവ ഖോ പന പടിച്ഛന്നം ആസനം ഹോതി നാലം കമ്മനിയം, അലഞ്ച ഖോ ഹോതി മാതുഗാമം ദുട്ഠുല്ലാഹി വാചാഹി ഓഭാസിതും. യോ പന ഭിക്ഖു തഥാരൂപേ ആസനേ മാതുഗാമേന സദ്ധിം ഏകോ ഏകായ രഹോ നിസജ്ജം കപ്പേയ്യ, തമേനം സദ്ധേയ്യവചസാ ഉപാസികാ ദിസ്വാ ദ്വിന്നം ധമ്മാനം അഞ്ഞതരേന വദേയ്യ – സങ്ഘാദിസേസേന വാ പാചിത്തിയേന വാ. നിസജ്ജം ഭിക്ഖു പടിജാനമാനോ ദ്വിന്നം ധമ്മാനം അഞ്ഞതരേന കാരേതബ്ബോ – സങ്ഘാദിസേസേന വാ പാചിത്തിയേന വാ. യേന വാ സാ സദ്ധേയ്യവചസാ ഉപാസികാ വദേയ്യ തേന സോ ഭിക്ഖു കാരേതബ്ബോ. അയമ്പി ധമ്മോ അനിയതോ’’തി.

൪൫൪. ന ഹേവ ഖോ പന പടിച്ഛന്നം ആസനം ഹോതീതി അപ്പടിച്ഛന്നം ഹോതി കുട്ടേന വാ കവാടേന വാ കിലഞ്ജേന വാ സാണിപാകാരേന വാ രുക്ഖേന വാ ഥമ്ഭേന വാ കോത്ഥളിയാ വാ യേന കേനചി അപ്പടിച്ഛന്നം ഹോതി.

നാലം കമ്മനിയന്തി ന സക്കാ ഹോതി മേഥുനം ധമ്മം പടിസേവിതും.

അലഞ്ച ഖോ ഹോതി മാതുഗാമം ദുട്ഠുല്ലാഹി വാചാഹി ഓഭാസിതുന്തി സക്കാ ഹോതി മാതുഗാമം ദുട്ഠുല്ലാഹി വാചാഹി ഓഭാസിതും.

യോ പനാതി യോ യാദിസോ…പേ… ഭിക്ഖൂതി…പേ… അയം ഇമസ്മിം അത്ഥേ അധിപ്പേതോ ഭിക്ഖൂതി.

തഥാരൂപേ ആസനേതി ഏവരൂപേ ആസനേ.

മാതുഗാമോ നാമ മനുസ്സിത്ഥീ, ന യക്ഖീ ന പേതീ ന തിരച്ഛാനഗതാ, വിഞ്ഞൂ പടിബലാ സുഭാസിതദുബ്ഭാസിതം ദുട്ഠുല്ലാദുട്ഠുല്ലം ആജാനിതും.

സദ്ധിന്തി ഏകതോ.

ഏകോ ഏകായാതി ഭിക്ഖു ചേവ ഹോതി മാതുഗാമോ ച.

രഹോ നാമ ചക്ഖുസ്സ രഹോ, സോതസ്സ രഹോ. ചക്ഖുസ്സ രഹോ നാമ ന സക്കാ ഹോതി അക്ഖിം വാ നിഖണീയമാനേ ഭമുകം വാ ഉക്ഖിപീയമാനേ സീസം വാ ഉക്ഖിപീയമാനേ പസ്സിതും. സോതസ്സ രഹോ നാമ ന സക്കാ ഹോതി പകതികഥാ സോതും.

നിസജ്ജം കപ്പേയ്യാതി മാതുഗാമേ നിസിന്നേ ഭിക്ഖു ഉപനിസിന്നോ വാ ഹോതി ഉപനിപന്നോ വാ. ഭിക്ഖു നിസിന്നേ മാതുഗാമോ ഉപനിസിന്നോ വാ ഹോതി ഉപനിപന്നോ വാ. ഉഭോ വാ നിസിന്നാ ഹോന്തി ഉഭോ വാ നിപന്നാ.

സദ്ധേയ്യവചസാ നാമ ആഗതഫലാ അഭിസമേതാവിനീ വിഞ്ഞാതസാസനാ.

ഉപാസികാ നാമ ബുദ്ധം സരണം ഗതാ, ധമ്മം സരണം ഗതാ, സങ്ഘം സരണം ഗതാ.

ദിസ്വാതി പസ്സിത്വാ.

ദ്വിന്നം ധമ്മാനം അഞ്ഞതരേന വദേയ്യ സങ്ഘാദിസേസേന വാ പാചിത്തിയേന വാ. നിസജ്ജം ഭിക്ഖു പടിജാനമാനോ ദ്വിന്നം ധമ്മാനം അഞ്ഞതരേന കാരേതബ്ബോ – സങ്ഘാദിസേസേന വാ പാചിത്തിയേന വാ. യേന വാ സാ സദ്ധേയ്യവചസാ ഉപാസികാ വദേയ്യ, തേന സോ ഭിക്ഖു കാരേതബ്ബോ.

൪൫൫. സാ ചേ ഏവം വദേയ്യ – ‘‘അയ്യോ മയാ ദിട്ഠോ നിസിന്നോ മാതുഗാമേന സദ്ധിം കായസംസഗ്ഗം സമാപജ്ജന്തോ’’തി, സോ ച തം പടിജാനാതി, ആപത്തിയാ കാരേതബ്ബോ. സാ ചേ ഏവം വദേയ്യ – ‘‘അയ്യോ മയാ ദിട്ഠോ നിസിന്നോ മാതുഗാമേന സദ്ധിം കായസംസഗ്ഗം സമാപജ്ജന്തോ’’തി, സോ ചേ ഏവം വദേയ്യ – ‘‘സച്ചാഹം നിസിന്നോ, നോ ച ഖോ കായസംസഗ്ഗം സമാപജ്ജി’’ന്തി, നിസജ്ജായ കാരേതബ്ബോ…പേ… നാഹം നിസിന്നോ, അപിച ഖോ നിപന്നോതി, നിപജ്ജായ കാരേതബ്ബോ…പേ… നാഹം നിസിന്നോ, അപിച ഖോ ഠിതോതി, ന കാരേതബ്ബോ.

സാ ചേ ഏവം വദേയ്യ – ‘‘അയ്യോ മയാ ദിട്ഠോ നിപന്നോ മാതുഗാമേന സദ്ധിം കായസംസഗ്ഗം സമാപജ്ജന്തോ’’തി, സോ ച തം പടിജാനാതി, ആപത്തിയാ കാരേതബ്ബോ…പേ… സച്ചാഹം നിപന്നോ, നോ ച ഖോ കായസംസഗ്ഗം സമാപജ്ജിന്തി, നിപജ്ജായ കാരേതബ്ബോ…പേ… നാഹം നിപന്നോ, അപിച ഖോ നിസിന്നോതി, നിസജ്ജായ കാരേതബ്ബോ …പേ… നാഹം നിപന്നോ, അപിച ഖോ ഠിതോതി, ന കാരേതബ്ബോ.

സാ ചേ ഏവം വദേയ്യ – ‘‘അയ്യസ്സ മയാ സുതം നിസിന്നസ്സ മാതുഗാമം ദുട്ഠുല്ലാഹി വാചാഹി ഓഭാസന്തസ്സാ’’തി, സോ ച തം പടിജാനാതി, ആപത്തിയാ കാരേതബ്ബോ. സാ ചേ ഏവം വദേയ്യ – ‘‘അയ്യസ്സ മയാ സുതം നിസിന്നസ്സ മാതുഗാമം ദുട്ഠുല്ലാഹി വാചാഹി ഓഭാസന്തസ്സാ’’തി, സോ ചേ ഏവം വദേയ്യ – ‘‘സച്ചാഹം നിസിന്നോ, നോ ച ഖോ ദുട്ഠുല്ലാഹി വാചാഹി ഓഭാസി’’ന്തി, നിസജ്ജായ കാരേതബ്ബോ…പേ… നാഹം നിസിന്നോ, അപിച ഖോ നിപന്നോതി, നിപജ്ജായ കാരേതബ്ബോ…പേ… നാഹം നിസിന്നോ, അപിച ഖോ ഠിതോതി, ന കാരേതബ്ബോ.

സാ ചേ ഏവം വദേയ്യ – ‘‘അയ്യസ്സ മയാ സുതം നിപന്നസ്സ മാതുഗാമം ദുട്ഠുല്ലാഹി വാചാഹി ഓഭാസന്തസ്സാ’’തി, സോ ച തം പടിജാനാതി, ആപത്തിയാ കാരേതബ്ബോ…പേ… സച്ചാഹം നിപന്നോ നോ ച ഖോ ദുട്ഠുല്ലാഹി വാചാഹി ഓഭാസിന്തി, നിപജ്ജായ കാരേതബ്ബോ…പേ… നാഹം നിപന്നോ, അപിച ഖോ നിസിന്നോതി, നിസജ്ജായ കാരേതബ്ബോ…പേ… നാഹം നിപന്നോ, അപിച ഖോ ഠിതോതി, ന കാരേതബ്ബോ.

൪൫൬. സാ ചേ ഏവം വദേയ്യ – ‘‘അയ്യോ മയാ ദിട്ഠോ മാതുഗാമേന സദ്ധിം ഏകോ ഏകായ രഹോ നിസിന്നോ’’തി, സോ ച തം പടിജാനാതി, നിസജ്ജായ കാരേതബ്ബോ…പേ… നാഹം നിസിന്നോ, അപിച ഖോ നിപന്നോതി, നിപജ്ജായ കാരേതബ്ബോ…പേ… നാഹം നിസിന്നോ, അപിച ഖോ ഠിതോതി, ന കാരേതബ്ബോ.

സാ ചേ ഏവം വദേയ്യ – ‘‘അയ്യോ മയാ ദിട്ഠോ മാതുഗാമേന സദ്ധിം ഏകോ ഏകായ രഹോ നിപന്നോ’’തി, സോ ച തം പടിജാനാതി, നിപജ്ജായ കാരേതബ്ബോ…പേ… നാഹം നിപന്നോ, അപിച ഖോ നിസിന്നോതി, നിസജ്ജായ കാരേതബ്ബോ…പേ… നാഹം നിപന്നോ, അപിച ഖോ ഠിതോതി, ന കാരേതബ്ബോ.

അയമ്പീതി പുരിമം ഉപാദായ വുച്ചതി.

അനിയതോതി ന നിയതോ, സങ്ഘാദിസേസോ വാ പാചിത്തിയം വാ.

൪൫൭. ഗമനം പടിജാനാതി നിസജ്ജം പടിജാനാതി ആപത്തിം പടിജാനാതി, ആപത്തിയാ കാരേതബ്ബോ. ഗമനം പടിജാനാതി നിസജ്ജം ന പടിജാനാതി ആപത്തിം പടിജാനാതി, ആപത്തിയാ കാരേതബ്ബോ. ഗമനം പടിജാനാതി നിസജ്ജം പടിജാനാതി ആപത്തിം ന പടിജാനാതി, നിസജ്ജായ കാരേതബ്ബോ. ഗമനം പടിജാനാതി നിസജ്ജം ന പടിജാനാതി ആപത്തിം ന പടിജാനാതി, ന കാരേതബ്ബോ.

ഗമനം ന പടിജാനാതി നിസജ്ജം പടിജാനാതി ആപത്തിം പടിജാനാതി, ആപത്തിയാ കാരേതബ്ബോ. ഗമനം ന പടിജാനാതി നിസജ്ജം ന പടിജാനാതി ആപത്തിം പടിജാനാതി, ആപത്തിയാ കാരേതബ്ബോ. ഗമനം ന പടിജാനാതി നിസജ്ജം പടിജാനാതി ആപത്തിം ന പടിജാനാതി, നിസജ്ജായ കാരേതബ്ബോ. ഗമനം ന പടിജാനാതി നിസജ്ജം ന പടിജാനാതി ആപത്തിം ന പടിജാനാതി, ന കാരേതബ്ബോതി.

ദുതിയോ അനിയതോ നിട്ഠിതോ.

൪൫൮. ഉദ്ദിട്ഠാ ഖോ ആയസ്മന്തോ ദ്വേ അനിയതാ ധമ്മാ. തത്ഥായസ്മന്തേ പുച്ഛാമി – ‘‘കച്ചിത്ഥ പരിസുദ്ധാ’’? ദുതിയമ്പി പുച്ഛാമി – ‘‘കച്ചിത്ഥ പരിസുദ്ധാ’’? തതിയമ്പി പുച്ഛാമി – ‘‘കച്ചിത്ഥ പരിസുദ്ധാ’’? പരിസുദ്ധേത്ഥായസ്മന്തോ; തസ്മാ തുണ്ഹീ, ഏവമേതം ധാരയാമീതി.

തസ്സുദ്ദാനം –

അലം കമ്മനിയഞ്ചേവ, തഥേവ ച നഹേവ ഖോ;

അനിയതാ സുപഞ്ഞത്താ, ബുദ്ധസേട്ഠേന താദിനാതി.

അനിയതകണ്ഡം നിട്ഠിതം.