൯. ദുതിയദുട്ഠദോസസിക്ഖാപദം

൩൯൧. തേന സമയേന ബുദ്ധോ ഭഗവാ രാജഗഹേ വിഹരതി വേളുവനേ കലന്ദകനിവാപേ. തേന ഖോ പന സമയേന മേത്തിയഭൂമജകാ ഭിക്ഖൂ ഗിജ്ഝകൂടാ പബ്ബതാ ഓരോഹന്താ അദ്ദസംസു ഛഗലകം [ഛകലകം (സ്യാ.)] അജികായ വിപ്പടിപജ്ജന്തം. ദിസ്വാന ഏവമാഹംസു – ‘‘ഹന്ദ മയം, ആവുസോ, ഇമം ഛഗലകം ദബ്ബം മല്ലപുത്തം നാമ കരോമ. ഇമം അജികം മേത്തിയം നാമ ഭിക്ഖുനിം കരോമ. ഏവം മയം വോഹരിസ്സാമ. പുബ്ബേ മയം, ആവുസോ, ദബ്ബം മല്ലപുത്തം സുതേന അവോചുമ്ഹാ. ഇദാനി പന അമ്ഹേഹി സാമം ദിട്ഠോ മേത്തിയായ ഭിക്ഖുനിയാ വിപ്പടിപജ്ജന്തോ’’തി. തേ തം ഛഗലകം ദബ്ബം മല്ലപുത്തം നാമ അകംസു. തം അജികം മേത്തിയം നാമ ഭിക്ഖുനിം അകംസു. തേ ഭിക്ഖൂനം ആരോചേസും – ‘‘പുബ്ബേ മയം, ആവുസോ, ദബ്ബം മല്ലപുത്തം സുതേന അവോചുമ്ഹാ. ഇദാനി പന അമ്ഹേഹി സാമം ദിട്ഠോ മേത്തിയായ ഭിക്ഖുനിയാ വിപ്പടിപജ്ജന്തോ’’തി. ഭിക്ഖൂ ഏവമാഹംസു – ‘‘മാവുസോ, ഏവം അവചുത്ഥ. നായസ്മാ ദബ്ബോ മല്ലപുത്തോ ഏവം കരിസ്സതീ’’തി.

അഥ ഖോ തേ ഭിക്ഖൂ ഭഗവതോ ഏതമത്ഥം ആരോചേസും. അഥ ഖോ ഭഗവാ ഏതസ്മിം നിദാനേ ഏതസ്മിം പകരണേ ഭിക്ഖുസങ്ഘം സന്നിപാതാപേത്വാ ആയസ്മന്തം ദബ്ബം മല്ലപുത്തം പടിപുച്ഛി – ‘‘സരസി ത്വം, ദബ്ബ, ഏവരൂപം കത്താ യഥയിമേ ഭിക്ഖൂ ആഹംസൂ’’തി? ‘‘യഥാ മം, ഭന്തേ, ഭഗവാ ജാനാതീ’’തി. ദുതിയമ്പി ഖോ ഭഗവാ…പേ… തതിയമ്പി ഖോ ഭഗവാ ആയസ്മന്തം ദബ്ബം മല്ലപുത്തം ഏതദവോച – ‘‘സരസി ത്വം, ദബ്ബ, ഏവരൂപം കത്താ യഥയിമേ ഭിക്ഖൂ ആഹംസൂ’’തി? ‘‘യഥാ മം, ഭന്തേ, ഭഗവാ ജാനാതീ’’തി. ‘‘ന ഖോ, ദബ്ബ, ദബ്ബാ ഏവം നിബ്ബേഠേന്തി. സചേ തയാ കതം കതന്തി വദേഹി, സചേ തയാ അകതം അകതന്തി വദേഹീ’’തി. ‘‘യതോ അഹം, ഭന്തേ, ജാതോ നാഭിജാനാമി സുപിനന്തേനപി മേഥുനധമ്മം പടിസേവിതാ, പഗേവ ജാഗരോ’’തി! അഥ ഖോ ഭഗവാ ഭിക്ഖൂ ആമന്തേസി – ‘‘തേന ഹി, ഭിക്ഖുവേ, ഇമേ ഭിക്ഖൂ അനുയുഞ്ജഥാ’’തി. ഇദം വത്വാ ഭഗവാ ഉട്ഠായാസനാ വിഹാരം പാവിസി.

അഥ ഖോ തേ ഭിക്ഖൂ മേത്തിയഭൂമജകേ ഭിക്ഖൂ അനുയുഞ്ജിംസു. തേ ഭിക്ഖൂഹി അനുയുഞ്ജീയമാനാ ഭിക്ഖൂനം ഏതമത്ഥം ആരോചേസും – ‘‘കിം പന തുമ്ഹേ, ആവുസോ, ആയസ്മന്തം ദബ്ബം മല്ലപുത്തം അഞ്ഞഭാഗിയസ്സ അധികരണസ്സ കിഞ്ചിദേസം ലേസമത്തം ഉപാദായ പാരാജികേന ധമ്മേന അനുദ്ധംസേഥാ’’തി? ‘‘ഏവമാവുസോ’’തി. യേ തേ ഭിക്ഖൂ അപ്പിച്ഛാ…പേ… തേ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ മേത്തിയഭൂമജകാ ഭിക്ഖൂ ആയസ്മന്തം ദബ്ബം മല്ലപുത്തം അഞ്ഞഭാഗിയസ്സ അധികരണസ്സ കിഞ്ചി ദേസം ലേസമത്തം ഉപാദായ പാരാജികേന ധമ്മേന അനുദ്ധംസേസ്സന്തീ’’തി! അഥ ഖോ തേ ഭിക്ഖൂ മേത്തിയഭൂമജകേ ഭിക്ഖൂ അനേകപരിയായേന വിഗരഹിത്വാ ഭഗവതോ ഏതമത്ഥം ആരോചേസും…പേ… ‘‘സച്ചം കിര തുമ്ഹേ, ഭിക്ഖവേ, ദബ്ബം മല്ലപുത്തം അഞ്ഞഭാഗിയസ്സ അധികരണസ്സ കിഞ്ചി ദേസം ലേസമത്തം ഉപാദായ പാരാജികേന ധമ്മേന അനുദ്ധംസേഥാ’’തി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… ‘‘കഥഞ്ഹി നാമ തുമ്ഹേ, മോഘപുരിസാ, ദബ്ബം മല്ലപുത്തം അഞ്ഞഭാഗിയസ്സ അധികരണസ്സ കിഞ്ചി ദേസം ലേസമത്തം ഉപാദായ പാരാജികേന ധമ്മേന അനുദ്ധംസേസ്സഥ! നേതം, മോഘപുരിസാ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഇമം സിക്ഖാപദം ഉദ്ദിസേയ്യാഥ –

൩൯൨. ‘‘യോ പന ഭിക്ഖു ഭിക്ഖും ദുട്ഠോ ദോസോ അപ്പതീതോ അഞ്ഞഭാഗിയസ്സ അധികരണസ്സ കിഞ്ചിദേസം ലേസമത്തം ഉപാദായ പാരാജികേന ധമ്മേന അനുദ്ധംസേയ്യ – ‘അപ്പേവ നാമ നം ഇമമ്ഹാ ബ്രഹ്മചരിയാ ചാവേയ്യ’ന്തി. തതോ അപരേന സമയേന സമനുഗ്ഗാഹീയമാനോ വാ അസമനുഗ്ഗാഹീയമാനോ വാ അഞ്ഞഭാഗിയഞ്ചേവ തം അധികരണം ഹോതി കോചിദേസോ ലേസമത്തോ ഉപാദിന്നോ, ഭിക്ഖു ച ദോസം പതിട്ഠാതി, സങ്ഘാദിസേസോ’’തി.

൩൯൩. യോ പനാതി യോ യാദിസോ…പേ… ഭിക്ഖൂതി…പേ… അയം ഇമസ്മിം അത്ഥേ അധിപ്പേതോ ഭിക്ഖൂതി.

ഭിക്ഖുന്തി അഞ്ഞം ഭിക്ഖും.

ദുട്ഠോ ദോസോതി കുപിതോ അനത്തമനോ അനഭിരദ്ധോ ആഹതചിത്തോ ഖിലജാതോ.

അപ്പതീതോതി തേന ച കോപേന, തേന ച ദോസേന, തായ ച അനത്തമനതായ, തായ ച അനഭിരദ്ധിയാ അപ്പതീതോ ഹോതി.

അഞ്ഞഭാഗിയസ്സ അധികരണസ്സാതി ആപത്തഞ്ഞഭാഗിയം വാ ഹോതി അധികരണഞ്ഞഭാഗിയം വാ. കഥം അധികരണം അധികരണസ്സ അഞ്ഞഭാഗിയം? വിവാദാധികരണം അനുവാദാധികരണസ്സ ആപത്താധികരണസ്സ കിച്ചാധികരണസ്സ അഞ്ഞഭാഗിയം. അനുവാദാധികരണം ആപത്താധികരണസ്സ കിച്ചാധികരണസ്സ വിവാദാധികരണസ്സ അഞ്ഞഭാഗിയം. ആപത്താധികരണം കിച്ചാധികരണസ്സ വിവാദാധികരണസ്സ അനുവാദാധികരണസ്സ അഞ്ഞഭാഗിയം. കിച്ചാധികരണം വിവാദാധികരണസ്സ അനുവാദാധികരണസ്സ ആപത്താധികരണസ്സ അഞ്ഞഭാഗിയം. ഏവം അധികരണം അധികരണസ്സ അഞ്ഞഭാഗിയം.

കഥം അധികരണം അധികരണസ്സ തബ്ഭാഗിയം? വിവാദാധികരണം വിവാദാധികരണസ്സ തബ്ഭാഗിയം. അനുവാദാധികരണം അനുവാദാധികരണസ്സ തബ്ഭാഗിയം. ആപത്താധികരണം ആപത്താധികരണസ്സ സിയാ തബ്ഭാഗിയം സിയാ അഞ്ഞഭാഗിയം.

കഥം ആപത്താധികരണം ആപത്താധികരണസ്സ അഞ്ഞഭാഗിയം? മേഥുനധമ്മപാരാജികാപത്തി അദിന്നാദാനപാരാജികാപത്തിയാ മനുസ്സവിഗ്ഗഹപാരാജികാപത്തിയാ ഉത്തരിമനുസ്സധമ്മപാരാജികാപത്തിയാ അഞ്ഞഭാഗിയാ. അദിന്നാദാനപാരാജികാപത്തി മനുസ്സവിഗ്ഗഹപാരാജികാപത്തിയാ ഉത്തരിമനുസ്സധമ്മപാരാജികാപത്തിയാ മേഥുനധമ്മപാരാജികാപത്തിയാ അഞ്ഞഭാഗിയാ. മനുസ്സവിഗ്ഗഹപാരാജികാപത്തി ഉത്തരിമനുസ്സധമ്മപാരാജികാപത്തിയാ മേഥുനധമ്മപാരാജികാപത്തിയാ അദിന്നാദാനപാരാജികാപത്തിയാ അഞ്ഞഭാഗിയാ. ഉത്തരിമനുസ്സധമ്മപാരാജികാപത്തി മേഥുനധമ്മപാരാജികാപത്തിയാ അദിന്നാദാനപാരാജികാപത്തിയാ മനുസ്സവിഗ്ഗഹപാരാജികാപത്തിയാ അഞ്ഞഭാഗിയാ. ഏവം ആപത്താധികരണം ആപത്താധികരണസ്സ അഞ്ഞഭാഗിയം.

കഥം ആപത്താധികരണം ആപത്താധികരണസ്സ തബ്ഭാഗിയം? മേഥുനധമ്മപാരാജികാപത്തി മേഥുനധമ്മപാരാജികാപത്തിയാ തബ്ഭാഗിയാ. അദിന്നാദാനപാരാജികാപത്തി അദിന്നാദാനപാരാജികാപത്തിയാ തബ്ഭാഗിയാ. മനുസ്സവിഗ്ഗഹപാരാജികാപത്തി മനുസ്സവിഗ്ഗഹപാരാജികാപത്തിയാ തബ്ഭാഗിയാ. ഉത്തരിമനുസ്സധമ്മപാരാജികാപത്തി ഉത്തരിമനുസ്സധമ്മപാരാജികാപത്തിയാ തബ്ഭാഗിയാ. ഏവം ആപത്താധികരണം ആപത്താധികരണസ്സ തബ്ഭാഗിയം.

കിച്ചാധികരണം കിച്ചാധികരണസ്സ തബ്ഭാഗിയം. ഏവം അധികരണം അധികരണസ്സ തബ്ഭാഗിയം.

൩൯൪. കിഞ്ചി ദേസം ലേസമത്തം ഉപാദായാതി ലേസോ നാമ ദസ ലേസാ – ജാതിലേസോ, നാമലേസോ, ഗോത്തലേസോ, ലിങ്ഗലേസോ, ആപത്തിലേസോ, പത്തലേസോ, ചീവരലേസോ, ഉപജ്ഝായലേസോ, ആചരിയലേസോ, സേനാസനലേസോ.

൩൯൫. ജാതിലേസോ നാമ ഖത്തിയോ ദിട്ഠോ ഹോതി പാരാജികം ധമ്മം അജ്ഝാപജ്ജന്തോ. അഞ്ഞം ഖത്തിയം പസ്സിത്വാ ചോദേതി – ‘‘ഖത്തിയോ മയാ ദിട്ഠോ [ഏത്ഥ ‘‘പാരാജികം ധമ്മം അജ്ഝാപജ്ജന്തോ’’തി പാഠോ ഊനോ മഞ്ഞേ, അട്ഠകഥായം ഹി ‘‘ഖത്തിയോ മയാ ദിട്ഠോ പാരാജികം ധമ്മം അജ്ഝാപജ്ജന്തോ’’തി ദിസ്സതി]. പാരാജികം ധമ്മം അജ്ഝാപന്നോസി, അസ്സമണോസി, അസക്യപുത്തിയോസി, നത്ഥി തയാ സദ്ധിം ഉപോസഥോ വാ പവാരണാ വാ സങ്ഘകമ്മം വാ’’തി, ആപത്തി വാചായ, വാചായ സങ്ഘാദിസേസസ്സ.

ബ്രാഹ്മണോ ദിട്ഠോ ഹോതി…പേ… വേസ്സോ ദിട്ഠോ ഹോതി…പേ… സുദ്ദോ ദിട്ഠോ ഹോതി പാരാജികം ധമ്മം അജ്ഝാപജ്ജന്തോ. അഞ്ഞം സുദ്ദം പസ്സിത്വാ ചോദേതി – ‘‘സുദ്ദോ മയാ ദിട്ഠോ. പാരാജികം ധമ്മം അജ്ഝാപന്നോസി, അസ്സമണോസി, അസക്യപുത്തിയോസി’’…പേ… ആപത്തി വാചായ, വാചായ സങ്ഘാദിസേസസ്സ.

൩൯൬. നാമലേസോ നാമ ബുദ്ധരക്ഖിതോ ദിട്ഠോ ഹോതി…പേ… ധമ്മരക്ഖിതോ ദിട്ഠോ ഹോതി…പേ… സങ്ഘരക്ഖിതോ ദിട്ഠോ ഹോതി പാരാജികം ധമ്മം അജ്ഝാപജ്ജന്തോ. അഞ്ഞം സങ്ഘരക്ഖിതം പസ്സിത്വാ ചോദേതി – ‘‘സങ്ഘരക്ഖിതോ മയാ ദിട്ഠോ. പാരാജികം ധമ്മം അജ്ഝാപന്നോസി, അസ്സമണോസി, അസക്യപുത്തിയോസി’’…പേ… ആപത്തി വാചായ, വാചായ സങ്ഘാദിസേസസ്സ.

൩൯൭. ഗോത്തലേസോ നാമ ഗോതമോ ദിട്ഠോ ഹോതി…പേ… മോഗ്ഗല്ലാനോ ദിട്ഠോ ഹോതി…പേ… കച്ചായനോ ദിട്ഠോ ഹോതി…പേ… വാസിട്ഠോ ദിട്ഠോ ഹോതി പാരാജികം ധമ്മം അജ്ഝാപജ്ജന്തോ. അഞ്ഞം വാസിട്ഠം പസ്സിത്വാ ചോദേതി – ‘‘വാസിട്ഠോ മയാ ദിട്ഠോ. പാരാജികം ധമ്മം അജ്ഝാപന്നോസി, അസ്സമണോസി, അസക്യപുത്തിയോസി’’…പേ… ആപത്തി വാചായ, വാചായ സങ്ഘാദിസേസസ്സ.

൩൯൮. ലിങ്ഗലേസോ നാമ ദീഘോ ദിട്ഠോ ഹോതി…പേ… രസ്സോ ദിട്ഠോ ഹോതി…പേ… കണ്ഹോ ദിട്ഠോ ഹോതി…പേ… ഓദാതോ ദിട്ഠോ ഹോതി പാരാജികം ധമ്മം അജ്ഝാപജ്ജന്തോ. അഞ്ഞം ഓദാതം പസ്സിത്വാ ചോദേതി – ‘‘ഓദാതോ മയാ ദിട്ഠോ. പാരാജികം ധമ്മം അജ്ഝാപന്നോസി, അസ്സമണോസി, അസക്യപുത്തിയോസി’’…പേ… ആപത്തി വാചായ, വാചായ സങ്ഘാദിസേസസ്സ.

൩൯൯. ആപത്തിലേസോ നാമ ലഹുകം ആപത്തിം ആപജ്ജന്തോ ദിട്ഠോ ഹോതി. തഞ്ചേ പാരാജികേന ചോദേതി – ‘‘അസ്സമണോസി, അസക്യപുത്തിയോസി…പേ… ആപത്തി വാചായ, വാചായ സങ്ഘാദിസേസസ്സ.

൪൦൦. പത്തലേസോ നാമ ലോഹപത്തധരോ ദിട്ഠോ ഹോതി…പേ… സാടകപത്തധരോ ദിട്ഠോ ഹോതി…പേ… സുമ്ഭകപത്തധരോ ദിട്ഠോ ഹോതി പാരാജികം ധമ്മം അജ്ഝാപജ്ജന്തോ. അഞ്ഞം സുമ്ഭകപത്തധരം പസ്സിത്വാ ചോദേതി – ‘‘സുമ്ഭകപത്തധരോ മയാ ദിട്ഠോ. പാരാജികം ധമ്മം അജ്ഝാപന്നോസി, അസ്സമണോസി, അസക്യപുത്തിയോസി’’…പേ… ആപത്തി വാചായ, വാചായ സങ്ഘാദിസേസസ്സ.

൪൦൧. ചീവരലേസോ നാമ പംസുകൂലികോ ദിട്ഠോ ഹോതി…പേ… ഗഹപതിചീവരധരോ ദിട്ഠോ ഹോതി പാരാജികം ധമ്മം അജ്ഝാപജ്ജന്തോ. അഞ്ഞം ഗഹപതിചീവരധരം പസ്സിത്വാ ചോദേതി – ‘‘ഗഹപതിചീവരധരോ മയാ ദിട്ഠോ. പാരാജികം ധമ്മം അജ്ഝാപന്നോസി, അസ്സമണോസി, അസക്യപുത്തിയോസി’’…പേ… ആപത്തി വാചായ, വാചായ സങ്ഘാദിസേസസ്സ.

൪൦൨. ഉപജ്ഝായലേസോ നാമ ഇത്ഥന്നാമസ്സ സദ്ധിവിഹാരികോ ദിട്ഠോ ഹോതി പാരാജികം ധമ്മം അജ്ഝാപജ്ജന്തോ. അഞ്ഞം ഇത്ഥന്നാമസ്സ സദ്ധിവിഹാരികം പസ്സിത്വാ ചോദേതി – ‘‘ഇത്ഥന്നാമസ്സ സദ്ധിവിഹാരികോ മയാ ദിട്ഠോ. പാരാജികം ധമ്മം അജ്ഝാപന്നോസി, അസ്സമണോസി, അസക്യപുത്തിയോസി’’…പേ… ആപത്തി വാചായ, വാചായ സങ്ഘാദിസേസസ്സ.

൪൦൩. ആചരിയലേസോ നാമ ഇത്ഥന്നാമസ്സ അന്തേവാസികോ ദിട്ഠോ ഹോതി പാരാജികം ധമ്മം അജ്ഝാപജ്ജന്തോ. അഞ്ഞം ഇത്ഥന്നാമസ്സ അന്തേവാസികം പസ്സിത്വാ ചോദേതി – ‘‘ഇത്ഥന്നാമസ്സ അന്തേവാസികോ മയാ ദിട്ഠോ. പാരാജികം ധമ്മം അജ്ഝാപന്നോസി, അസ്സമണോസി, അസക്യപുത്തിയോസി’’…പേ… ആപത്തി വാചായ, വാചായ സങ്ഘാദിസേസസ്സ.

൪൦൪. സേനാസനലേസോ നാമ ഇത്ഥന്നാമസേനാസനവാസികോ ദിട്ഠോ ഹോതി പാരാജികം ധമ്മം അജ്ഝാപജ്ജന്തോ. അഞ്ഞം ഇത്ഥന്നാമസേനാസനവാസികം പസ്സിത്വാ ചോദേതി – ‘‘ഇത്ഥന്നാമസേനാസനവാസികോ മയാ ദിട്ഠോ. പാരാജികം ധമ്മം അജ്ഝാപന്നോസി, അസ്സമണോസി, അസക്യപുത്തിയോസി, നത്ഥി തയാ സദ്ധിം ഉപോസഥോ വാ പവാരണാ വാ സങ്ഘകമ്മം വാ’’തി, ആപത്തി വാചായ, വാചായ സങ്ഘാദിസേസസ്സ.

൪൦൫. പാരാജികേന ധമ്മേനാതി ചതുന്നം അഞ്ഞതരേന.

അനുദ്ധംസേയ്യാതി ചോദേതി വാ ചോദാപേതി വാ.

അപ്പേവ നാമ നം ഇമമ്ഹാ ബ്രഹ്മചരിയാചാവേയ്യന്തി ഭിക്ഖുഭാവാ ചാവേയ്യം, സമണധമ്മാ ചാവേയ്യം, സീലക്ഖന്ധാ ചാവേയ്യം, തപോഗുണാ ചാവേയ്യം.

തതോ അപരേന സമയേനാതി യസ്മിം ഖണേ അനുദ്ധംസിതോ ഹോതി, തം ഖണം തം ലയം തം മുഹുത്തം വീതിവത്തേ.

സമനുഗ്ഗാഹീയമാനോതി യേന വത്ഥുനാ അനുദ്ധംസിതോ ഹോതി തസ്മിം വത്ഥുസ്മിം സമനുഗ്ഗാഹീയമാനോ.

അസമനുഗ്ഗാഹീയമാനോതി ന കേനചി വുച്ചമാനോ.

അധികരണം നാമ ചത്താരി അധികരണാനി – വിവാദാധികരണം, അനുവാദാധികരണം, ആപത്താധികരണം, കിച്ചാധികരണം.

കോചി ദേസോ ലേസമത്തോ ഉപാദിന്നോതി തേസം ദസന്നം ലേസാനം അഞ്ഞതരോ ലേസോ ഉപാദിന്നോ ഹോതി.

ഭിക്ഖു ച ദോസം പതിട്ഠാതീതി തുച്ഛകം മയാ ഭണിതം, മുസാ മയാ ഭണിതം, അഭൂതം മയാ ഭണിതം, അജാനന്തേന മയാ ഭണിതം.

സങ്ഘാദിസേസോതി …പേ… തേനപി വുച്ചതി സങ്ഘാദിസേസോതി.

൪൦൬. ഭിക്ഖു സങ്ഘാദിസേസം അജ്ഝാപജ്ജന്തോ ദിട്ഠോ ഹോതി, സങ്ഘാദിസേസേ സങ്ഘാദിസേസദിട്ഠി ഹോതി. തഞ്ചേ പാരാജികേന ചോദേതി – ‘‘അസ്സമണോസി, അസക്യപുത്തിയോസി, നത്ഥി തയാ സദ്ധിം ഉപോസഥോ വാ പവാരണാ വാ സങ്ഘകമ്മം വാ’’തി, ഏവമ്പി ആപത്തഞ്ഞഭാഗിയം ഹോതി ലേസോ ച ഉപാദിന്നോ, ആപത്തി വാചായ, വാചായ സങ്ഘാദിസേസസ്സ.

ഭിക്ഖു സങ്ഘാദിസേസം അജ്ഝാപജ്ജന്തോ ദിട്ഠോ ഹോതി, സങ്ഘാദിസേസേ ഥുല്ലച്ചയദിട്ഠി ഹോതി…പേ… പാചിത്തിയദിട്ഠി ഹോതി… പാടിദേസനീയദിട്ഠി ഹോതി… ദുക്കടദിട്ഠി ഹോതി… ദുബ്ഭാസിതദിട്ഠി ഹോതി. തഞ്ചേ പാരാജികേന ചോദേതി – ‘‘അസ്സമണോസി’’…പേ… ഏവമ്പി ആപത്തഞ്ഞഭാഗിയം ഹോതി ലേസോ ച ഉപാദിന്നോ, ആപത്തി വാചായ, വാചായ സങ്ഘാദിസേസസ്സ.

ഭിക്ഖു ഥുല്ലച്ചയം അജ്ഝാപജ്ജന്തോ ദിട്ഠോ ഹോതി ഥുല്ലച്ചയേ ഥുല്ലച്ചയദിട്ഠി ഹോതി…പേ… ഥുല്ലച്ചയേ പാചിത്തിയദിട്ഠി ഹോതി… പാടിദേസനീയദിട്ഠി ഹോതി… ദുക്കടദിട്ഠി ഹോതി… ദുബ്ഭാസിതദിട്ഠി ഹോതി… സങ്ഘാദിസേസദിട്ഠി ഹോതി. തഞ്ചേ പാരാജികേന ചോദേതി – ‘‘അസ്സമണോസി’’ …പേ… ഏവമ്പി ആപത്തഞ്ഞഭാഗിയം ഹോതി ലേസോ ച ഉപാദിന്നോ, ആപത്തി വാചായ, വാചായ സങ്ഘാദിസേസസ്സ.

ഭിക്ഖു പാചിത്തിയം…പേ… പാടിദേസനീയം… ദുക്കടം… ദുബ്ഭാസിതം അജ്ഝാപജ്ജന്തോ ദിട്ഠോ ഹോതി, ദുബ്ഭാസിതേ ദുബ്ഭാസിതദിട്ഠി ഹോതി…പേ… ദുബ്ഭാസിതേ സങ്ഘാദിസേസദിട്ഠി ഹോതി… ഥുല്ലച്ചയദിട്ഠി ഹോതി… പാചിത്തിയദിട്ഠി ഹോതി… പാടിദേസനീയദിട്ഠി ഹോതി… ദുക്കടദിട്ഠി ഹോതി. തഞ്ചേ പാരാജികേന ചോദേതി – ‘‘അസ്സമണോസി, അസക്യപുത്തിയോസി, നത്ഥി തയാ സദ്ധിം ഉപോസഥോ വാ പവാരണാ വാ സങ്ഘകമ്മം വാ’’തി, ഏവമ്പി ആപത്തഞ്ഞഭാഗിയം ഹോതി ലേസോ ച ഉപാദിന്നോ, ആപത്തി വാചായ, വാചായ സങ്ഘാദിസേസസ്സ.

ഏകേകം മൂലം കാതുന ചക്കം ബന്ധിതബ്ബം.

൪൦൭. ഭിക്ഖു സങ്ഘാദിസേസം അജ്ഝാപജ്ജന്തോ ദിട്ഠോ ഹോതി സങ്ഘാദിസേസേ സങ്ഘാദിസേസദിട്ഠി ഹോതി. തഞ്ചേ പാരാജികേന ചോദാപേതി – ‘‘അസ്സമണോസി’’…പേ… ഏവമ്പി ആപത്തഞ്ഞഭാഗിയം ഹോതി ലേസോ ച ഉപാദിന്നോ, ആപത്തി വാചായ, വാചായ സങ്ഘാദിസേസസ്സ.

ഭിക്ഖു സങ്ഘാദിസേസം അജ്ഝാപജ്ജന്തോ ദിട്ഠോ ഹോതി, സങ്ഘാദിസേസേ ഥുല്ലച്ചയദിട്ഠി ഹോതി…പേ… പാചിത്തിയദിട്ഠി ഹോതി… പാടിദേസനീയദിട്ഠി ഹോതി… ദുക്കടദിട്ഠി ഹോതി… ദുബ്ഭാസിതദിട്ഠി ഹോതി. തഞ്ചേ പാരാജികേന ചോദാപേതി – ‘‘അസ്സമണോസി’’…പേ… ഏവമ്പി ആപത്തഞ്ഞഭാഗിയം ഹോതി ലേസോ ച ഉപാദിന്നോ, ആപത്തി വാചായ, വാചായ സങ്ഘാദിസേസസ്സ.

ഭിക്ഖു ഥുല്ലച്ചയം അജ്ഝാപജ്ജന്തോ ദിട്ഠോ ഹോതി ഥുല്ലച്ചയേ ഥുല്ലച്ചയദിട്ഠി ഹോതി…പേ… ഥുല്ലച്ചയേ പാചിത്തിയദിട്ഠി ഹോതി… പാടിദേസനീയദിട്ഠി ഹോതി… ദുക്കടദിട്ഠി ഹോതി… ദുബ്ഭാസിതദിട്ഠി ഹോതി… സങ്ഘാദിസേസദിട്ഠി ഹോതി. തഞ്ചേ പാരാജികേന ചോദാപേതി – ‘‘അസ്സമണോസി’’…പേ… ഏവമ്പി ആപത്തഞ്ഞഭാഗിയം ഹോതി ലേസോ ച ഉപാദിന്നോ, ആപത്തി വാചായ, വാചായ സങ്ഘാദിസേസസ്സ.

ഭിക്ഖു പാചിത്തിയം…പേ… പാടിദേസനീയം… ദുക്കടം… ദുബ്ഭാസിതം അജ്ഝാപജ്ജന്തോ ദിട്ഠോ ഹോതി ദുബ്ഭാസിതേ ദുബ്ഭാസിതദിട്ഠി ഹോതി…പേ… ദുബ്ഭാസിതേ സങ്ഘാദിസേസദിട്ഠി ഹോതി… ഥുല്ലച്ചയദിട്ഠി ഹോതി… പാചിത്തിയദിട്ഠി ഹോതി… പാടിദേസനീയദിട്ഠി ഹോതി… ദുക്കടദിട്ഠി ഹോതി. തഞ്ചേ പാരാജികേന ചോദാപേതി – ‘‘അസ്സമണോസി, അസക്യപുത്തിയോസി, നത്ഥി തയാ സദ്ധിം ഉപോസഥോ വാ പവാരണാ വാ സങ്ഘകമ്മം വാ’’തി, ഏവമ്പി ആപത്തഞ്ഞഭാഗിയം ഹോതി ലേസോ ച ഉപാദിന്നോ, ആപത്തി വാചായ, വാചായ സങ്ഘാദിസേസസ്സ.

൪൦൮. അനാപത്തി തഥാസഞ്ഞീ ചോദേതി വാ ചോദാപേതി വാ, ഉമ്മത്തകസ്സ, ആദികമ്മികസ്സാതി.

ദുതിയദുട്ഠദോസസിക്ഖാപദം നിട്ഠിതം നവമം.