൮. ദുട്ഠദോസസിക്ഖാപദം

൩൮൦. [ഇദം വത്ഥു ചൂളവ. ൧൮൯] തേന സമയേന ബുദ്ധോ ഭഗവാ രാജഗഹേ വിഹരതി വേളുവനേ കലന്ദകനിവാപേ. തേന ഖോ പന സമയേന ആയസ്മതാ ദബ്ബേന മല്ലപുത്തേന ജാതിയാ സത്തവസ്സേന അരഹത്തം സച്ഛികതം ഹോതി. യം കിഞ്ചി [യഞ്ച കിഞ്ചി (സീ. ക.)] സാവകേന പത്തബ്ബം സബ്ബം തേന അനുപ്പത്തം ഹോതി. നത്ഥി ചസ്സ കിഞ്ചി ഉത്തരി കരണീയം, കതസ്സ വാ പതിചയോ. അഥ ഖോ ആയസ്മതോ ദബ്ബസ്സ മല്ലപുത്തസ്സ രഹോഗതസ്സ പടിസല്ലീനസ്സ ഏവം ചേതസോ പരിവിതക്കോ ഉദപാദി – ‘‘മയാ ഖോ ജാതിയാ സത്തവസ്സേന അരഹത്തം സച്ഛികതം. യം കിഞ്ചി സാവകേന പത്തബ്ബം സബ്ബം മയാ അനുപ്പത്തം. നത്ഥി ച മേ കിഞ്ചി ഉത്തരി കരണീയം, കതസ്സ വാ പതിചയോ. കിന്നു ഖോ അഹം സങ്ഘസ്സ വേയ്യാവച്ചം കരേയ്യ’’ന്തി?

അഥ ഖോ ആയസ്മതോ ദബ്ബസ്സ മല്ലപുത്തസ്സ ഏതദഹോസി – ‘‘യംനൂനാഹം സങ്ഘസ്സ സേനാസനഞ്ച പഞ്ഞപേയ്യം ഭത്താനി ച ഉദ്ദിസേയ്യ’’ന്തി. അഥ ഖോ ആയസ്മാ ദബ്ബോ മല്ലപുത്തോ സായന്ഹസമയം പടിസല്ലാനാ വുട്ഠിതോ യേന ഭഗവാ തേനുപസങ്കമി; ഉപസങ്കമിത്വാ ഭഗവന്തം അഭിവാദേത്വാ ഏകമന്തം നിസീദി. ഏകമന്തം നിസിന്നോ ഖോ ആയസ്മാ ദബ്ബോ മല്ലപുത്തോ ഭഗവന്തം ഏതദവോച – ‘‘ഇധ മയ്ഹം, ഭന്തേ, രഹോഗതസ്സ പടിസല്ലീനസ്സ ഏവം ചേതസോ പരിവിതക്കോ ഉദപാദി മയാ ഖോ ജാതിയാ സത്തവസ്സേന അരഹത്തം സച്ഛികതം, യം കിഞ്ചി സാവകേന പത്തബ്ബം, സബ്ബം മയാ അനുപത്തം, നത്ഥി ച മേ കിഞ്ചി ഉത്തരി കരണീയം, കതസ്സ വാ പതിചയോ, കിം നു ഖോ അഹം സങ്ഘസ്സ വേയ്യാവച്ചം കരേയ്യ’’ന്തി. തസ്സ മയ്ഹം ഭന്തേ, ഏതദഹോസി യംനൂനാഹം ‘‘സങ്ഘസ്സ സേനാസനഞ്ച പഞ്ഞപേയ്യം ഭത്താനി ച ഉദ്ദിസേയ്യന്തി. ഇച്ഛാമഹം, ഭന്തേ, സങ്ഘസ്സ സേനാസനഞ്ച പഞ്ഞപേതും ഭത്താനി ച ഉദ്ദിസിതു’’ന്തി. ‘‘സാധു സാധു, ദബ്ബ. തേന ഹി ത്വം, ദബ്ബ, സങ്ഘസ്സ സേനാസനഞ്ച പഞ്ഞപേഹി ഭത്താനി ച ഉദ്ദിസാ’’തി. ‘‘ഏവം, ഭന്തേ’’തി ഖോ ആയസ്മാ ദബ്ബോ മല്ലപുത്തോ ഭഗവതോ പച്ചസ്സോസി. അഥ ഖോ ഭഗവാ ഏതസ്മിം നിദാനേ ഏതസ്മിം പകരണേ ധമ്മിം കഥം കത്വാ ഭിക്ഖൂ ആമന്തേസി – ‘‘തേന ഹി, ഭിക്ഖവേ, സങ്ഘോ ദബ്ബം മല്ലപുത്തം സേനാസനപഞ്ഞാപകഞ്ച ഭത്തുദ്ദേസകഞ്ച സമ്മന്നതു. ഏവഞ്ച പന, ഭിക്ഖവേ, സമ്മന്നിതബ്ബോ. പഠമം ദബ്ബോ മല്ലപുത്തോ യാചിതബ്ബോ. യാചിത്വാ ബ്യത്തേന ഭിക്ഖുനാ പടിബലേന സങ്ഘോ ഞാപേതബ്ബോ –

൩൮൧. ‘‘സുണാതു മേ, ഭന്തേ, സങ്ഘോ. യദി സങ്ഘസ്സ പത്തകല്ലം സങ്ഘോ ആയസ്മന്തം ദബ്ബം മല്ലപുത്തം സേനാസനപഞ്ഞാപകഞ്ച ഭത്തുദ്ദേസകഞ്ച സമ്മന്നേയ്യ. ഏസാ ഞത്തി.

‘‘സുണാതു മേ, ഭന്തേ, സങ്ഘോ. സങ്ഘോ ആയസ്മന്തം ദബ്ബം മല്ലപുത്തം സേനാസനപഞ്ഞാപകഞ്ച ഭത്തുദ്ദേസകഞ്ച സമ്മന്നതി. യസ്സായസ്മതോ ഖമതി ആയസ്മതോ ദബ്ബസ്സ മല്ലപുത്തസ്സ സേനാസനപഞ്ഞാപകസ്സ ച ഭത്തുദ്ദേസകസ്സ ച സമ്മുതി, സോ തുണ്ഹസ്സ; യസ്സ നക്ഖമതി, സോ ഭാസേയ്യ.

‘‘സമ്മതോ സങ്ഘേന ആയസ്മാ ദബ്ബോ മല്ലപുത്തോ സേനാസനപഞ്ഞാപകോ ച ഭത്തുദ്ദേസകോ ച. ഖമതി സങ്ഘസ്സ, തസ്മാ തുണ്ഹീ, ഏവമേതം ധാരയാമീ’’തി.

൩൮൨. സമ്മതോ ച പനായസ്മാ ദബ്ബോ മല്ലപുത്തോ സഭാഗാനം ഭിക്ഖൂനം ഏകജ്ഝം സേനാസനം പഞ്ഞപേതി. യേ തേ ഭിക്ഖൂ സുത്തന്തികാ തേസം ഏകജ്ഝം സേനാസനം പഞ്ഞപേതി – ‘‘തേ അഞ്ഞമഞ്ഞം സുത്തന്തം സങ്ഗായിസ്സന്തീ’’തി. യേ തേ ഭിക്ഖൂ വിനയധരാ തേസം ഏകജ്ഝം സേനാസനം പഞ്ഞപേതി – ‘‘തേ അഞ്ഞമഞ്ഞം വിനയം വിനിച്ഛിനിസ്സന്തീ’’തി [വിനിച്ഛിസ്സന്തീതി (ക.)]. യേ തേ ഭിക്ഖൂ ധമ്മകഥികാ തേസം ഏകജ്ഝം സേനാസനം പഞ്ഞപേതി – ‘‘തേ അഞ്ഞമഞ്ഞം ധമ്മം സാകച്ഛിസ്സന്തീ’’തി. യേ തേ ഭിക്ഖൂ ഝായിനോ തേസം ഏകജ്ഝം സേനാസനം പഞ്ഞപേതി – ‘‘തേ അഞ്ഞമഞ്ഞം ന ബ്യാബാധിസ്സന്തീ’’തി [ന ബ്യാബാഹിസ്സന്തീതി (ക.)]. യേ തേ ഭിക്ഖൂ തിരച്ഛാനകഥികാ കായദള്ഹിബഹുലാ [കായദഡ്ഢിബഹുലാ (സീ.)] വിഹരന്തി തേസമ്പി ഏകജ്ഝം സേനാസനം പഞ്ഞപേതി – ‘‘ഇമായപിമേ ആയസ്മന്തോ രതിയാ അച്ഛിസ്സന്തീ’’തി. യേപി തേ ഭിക്ഖൂ വികാലേ ആഗച്ഛന്തി തേസമ്പി തേജോധാതും സമാപജ്ജിത്വാ തേനേവ ആലോകേന സേനാസനം പഞ്ഞപേതി. അപിസു ഭിക്ഖൂ സഞ്ചിച്ച വികാലേ ആഗച്ഛന്തി – ‘‘മയം ആയസ്മതോ ദബ്ബസ്സ മല്ലപുത്തസ്സ ഇദ്ധിപാടിഹാരിയം പസ്സിസ്സാമാ’’തി.

തേ ആയസ്മന്തം ദബ്ബം മല്ലപുത്തം ഉപസങ്കമിത്വാ ഏവം വദന്തി – ‘‘അമ്ഹാകം, ആവുസോ ദബ്ബ, സേനാസനം പഞ്ഞപേഹീ’’തി. തേ ആയസ്മാ ദബ്ബോ മല്ലപുത്തോ ഏവം വദേതി – ‘‘കത്ഥായസ്മന്താ ഇച്ഛന്തി, കത്ഥ പഞ്ഞപേമീ’’തി? തേ സഞ്ചിച്ച ദൂരേ അപദിസന്തി – ‘‘അമ്ഹാകം, ആവുസോ ദബ്ബ, ഗിജ്ഝകൂടേ പബ്ബതേ സേനാസനം പഞ്ഞപേഹി. അമ്ഹാകം, ആവുസോ, ചോരപപാതേ സേനാസനം പഞ്ഞപേഹി. അമ്ഹാകം, ആവുസോ, ഇസിഗിലിപസ്സേ കാളസിലായം സേനാസനം പഞ്ഞപേഹി. അമ്ഹാകം, ആവുസോ, വേഭാരപസ്സേ സത്തപണ്ണിഗുഹായം സേനാസനം പഞ്ഞപേഹി. അമ്ഹാകം, ആവുസോ, സീതവനേ സപ്പസോണ്ഡികപബ്ഭാരേ സേനാസനം പഞ്ഞപേഹി. അമ്ഹാകം, ആവുസോ, ഗോതമകകന്ദരായം സേനാസനം പഞ്ഞപേഹി. അമ്ഹാകം, ആവുസോ, തിന്ദുകകന്ദരായം സേനാസനം പഞ്ഞപേഹി. അമ്ഹാകം, ആവുസോ, തപോദകന്ദരായം സേനാസനം പഞ്ഞപേഹി. അമ്ഹാകം, ആവുസോ, തപോദാരാമേ സേനാസനം പഞ്ഞപേഹി. അമ്ഹാകം, ആവുസോ, ജീവകമ്ബവനേ സേനാസനം പഞ്ഞപേഹി. അമ്ഹാകം, ആവുസോ, മദ്ദകുച്ഛിസ്മിം മിഗദായേ സേനാസനം പഞ്ഞപേഹീ’’തി.

തേസം ആയസ്മാ ദബ്ബോ മല്ലപുത്തോ തേജോധാതും സമാപജ്ജിത്വാ അങ്ഗുലിയാ ജലമാനായ പുരതോ പുരതോ ഗച്ഛതി. തേപി തേനേവ ആലോകേന ആയസ്മതോ ദബ്ബസ്സ മല്ലപുത്തസ്സ പിട്ഠിതോ പിട്ഠിതോ ഗച്ഛന്തി. തേസം ആയസ്മാ ദബ്ബോ മല്ലപുത്തോ ഏവം സേനാസനം പഞ്ഞപേതി – ‘‘അയം മഞ്ചോ, ഇദം പീഠം, അയം ഭിസി, ഇദം ബിമ്ബോഹനം, ഇദം വച്ചട്ഠാനം, ഇദം പസ്സാവട്ഠാനം, ഇദം പാനീയം, ഇദം പരിഭോജനീയം, അയം കത്തരദണ്ഡോ, ഇദം സങ്ഘസ്സ കതികസണ്ഠാനം, ഇമം കാലം പവിസിതബ്ബം, ഇമം കാലം നിക്ഖമിതബ്ബ’’ന്തി. തേസം ആയസ്മാ ദബ്ബോ മല്ലപുത്തോ ഏവം സേനാസനം പഞ്ഞപേത്വാ പുനദേവ വേളുവനം പച്ചാഗച്ഛതി.

൩൮൩. തേന ഖോ പന സമയേന മേത്തിയഭൂമജകാ [ഭുമ്മജകാ (സീ. സ്യാ.)] ഭിക്ഖൂ നവകാ ചേവ ഹോന്തി അപ്പപുഞ്ഞാ ച. യാനി സങ്ഘസ്സ ലാമകാനി സേനാസനാനി താനി തേസം പാപുണന്തി ലാമകാനി ച ഭത്താനി. തേന ഖോ പന സമയേന രാജഗഹേ മനുസ്സാ ഇച്ഛന്തി ഥേരാനം ഭിക്ഖൂനം അഭിസങ്ഖാരികം പിണ്ഡപാതം ദാതും സപ്പിമ്പി തേലമ്പി ഉത്തരിഭങ്ഗമ്പി. മേത്തിയഭൂമജകാനം പന ഭിക്ഖൂനം പാകതികം ദേന്തി യഥാരന്ധം കണാജകം ബിലങ്ഗദുതിയം. തേ പച്ഛാഭത്തം പിണ്ഡപാതപ്പടിക്കന്താ ഥേരേ ഭിക്ഖൂ പുച്ഛന്തി – ‘‘തുമ്ഹാകം, ആവുസോ, ഭത്തഗ്ഗേ കിം അഹോസി? തുമ്ഹാകം, ആവുസോ, ഭത്തഗ്ഗേ കിം അഹോസീ’’തി? ഏകച്ചേ ഥേരാ ഏവം വദന്തി – ‘‘അമ്ഹാകം, ആവുസോ, സപ്പി അഹോസി തേലം അഹോസി ഉത്തരിഭങ്ഗം അഹോസീ’’തി. മേത്തിയഭൂമജകാ പന ഭിക്ഖൂ ഏവം വദന്തി – ‘‘അമ്ഹാകം, ആവുസോ, ന കിഞ്ചി അഹോസി, പാകതികം യഥാരന്ധം കണാജകം ബിലങ്ഗദുതിയ’’ന്തി.

തേന ഖോ പന സമയേന കല്യാണഭത്തികോ ഗഹപതി സങ്ഘസ്സ ചതുക്കഭത്തം ദേതി നിച്ചഭത്തം. സോ ഭത്തഗ്ഗേ സപുത്തദാരോ ഉപതിട്ഠിത്വാ പരിവിസതി. അഞ്ഞേ ഓദനേന പുച്ഛന്തി, അഞ്ഞേ സൂപേന പുച്ഛന്തി, അഞ്ഞേ തേലേന പുച്ഛന്തി, അഞ്ഞേ ഉത്തരിഭങ്ഗേന പുച്ഛന്തി. തേന ഖോ പന സമയേന കല്യാണഭത്തികസ്സ ഗഹപതിനോ ഭത്തം സ്വാതനായ മേത്തിയഭൂമജകാനം ഭിക്ഖൂനം ഉദ്ദിട്ഠം ഹോതി. അഥ ഖോ കല്യാണഭത്തികോ ഗഹപതി ആരാമം അഗമാസി കേനചിദേവ കരണീയേന. സോ യേനായസ്മാ ദബ്ബോ മല്ലപുത്തോ തേനുപസങ്കമി; ഉപസങ്കമിത്വാ ആയസ്മന്തം ദബ്ബം മല്ലപുത്തം അഭിവാദേത്വാ ഏകമന്തം നിസീദി. ഏകമന്തം നിസിന്നം ഖോ കല്യാണഭത്തികം ഗഹപതിം ആയസ്മാ ദബ്ബോ മല്ലപുത്തോ ധമ്മിയാ കഥായ സന്ദസ്സേസി സമാദപേസി സമുത്തേജേസി സമ്പഹംസേസി. അഥ ഖോ കല്യാണഭത്തികോ ഗഹപതി ആയസ്മതാ ദബ്ബേന മല്ലപുത്തേന ധമ്മിയാ കഥായ സന്ദസ്സിതോ സമാദപിതോ സമുത്തേജിതോ സമ്പഹംസിതോ ആയസ്മന്തം ദബ്ബം മല്ലപുത്തം ഏതദവോച – ‘‘കസ്സ, ഭന്തേ, അമ്ഹാകം ഘരേ സ്വാതനായ ഭത്തം ഉദ്ദിട്ഠ’’ന്തി? ‘‘മേത്തിയഭൂമജകാനം ഖോ, ഗഹപതി, ഭിക്ഖൂനം തുമ്ഹാകം ഘരേ സ്വാതനായ ഭത്തം ഉദ്ദിട്ഠ’’ന്തി. അഥ ഖോ കല്യാണഭത്തികോ ഗഹപതി അനത്തമനോ അഹോസി – ‘‘കഥഞ്ഹി നാമ പാപഭിക്ഖൂ അമ്ഹാകം ഘരേ ഭുഞ്ജിസ്സന്തീ’’തി! ഘരം ഗന്ത്വാ ദാസിം ആണാപേസി – ‘‘യേ, ജേ, സ്വേ ഭത്തികാ ആഗച്ഛന്തി തേ കോട്ഠകേ ആസനം പഞ്ഞപേത്വാ കണാജകേന ബിലങ്ഗദുതിയേന പരിവിസാ’’തി. ‘‘ഏവം അയ്യാ’’തി ഖോ സാ ദാസീ കല്യാണഭത്തികസ്സ ഗഹപതിനോ പച്ചസ്സോസി.

അഥ ഖോ മേത്തിയഭൂമജകാ ഭിക്ഖൂ – ‘‘ഹിയ്യോ ഖോ, ആവുസോ, അമ്ഹാകം കല്യാണഭത്തികസ്സ ഗഹപതിനോ ഘരേ ഭത്തം ഉദ്ദിട്ഠം, സ്വേ അമ്ഹേ കല്യാണഭത്തികോ ഗഹപതി സപുത്തദാരോ ഉപതിട്ഠിത്വാ പരിവിസിസ്സതി; അഞ്ഞേ ഓദനേന പുച്ഛിസ്സന്തി, അഞ്ഞേ സൂപേന പുച്ഛിസ്സന്തി, അഞ്ഞേ തേലേന പുച്ഛിസ്സന്തി, അഞ്ഞേ ഉത്തരിഭങ്ഗേന പുച്ഛിസ്സന്തീ’’തി. തേ തേനേവ സോമനസ്സേന ന ചിത്തരൂപം രത്തിയാ സുപിംസു. അഥ ഖോ മേത്തിയഭൂമജകാ ഭിക്ഖൂ പുബ്ബണ്ഹസമയം നിവാസേത്വാ പത്തചീവരം ആദായ യേന കല്യാണഭത്തികസ്സ ഗഹപതിനോ നിവേസനം തേനുപസങ്കമിംസു. അദ്ദസാ ഖോ സാ ദാസീ മേത്തിയഭൂമജകേ ഭിക്ഖൂ ദൂരതോവ ആഗച്ഛന്തേ. ദിസ്വാന കോട്ഠകേ ആസനം പഞ്ഞപേത്വാ മേത്തിയഭൂമജകേ ഭിക്ഖൂ ഏതദവോച – ‘‘നിസീദഥ, ഭന്തേ’’തി. അഥ ഖോ മേത്തിയഭൂമജകാനം ഭിക്ഖൂനം ഏതദഹോസി – ‘‘നിസ്സംസയം ഖോ ന താവ ഭത്തം സിദ്ധം ഭവിസ്സതി! യഥാ [യാവ (സീ.)] മയം കോട്ഠകേ നിസീദേയ്യാമാ’’തി [നിസീദാപീയേയ്യാമാതി (സീ.), നിസീദാപീയാമാതി (സ്യാ.)]. അഥ ഖോ സാ ദാസീ കണാജകേന ബിലങ്ഗദുതിയേന ഉപഗച്ഛി – ‘‘ഭുഞ്ജഥ, ഭന്തേ’’തി. ‘‘മയം ഖോ, ഭഗിനി, നിച്ചഭത്തികാ’’തി. ‘‘ജാനാമി അയ്യാ നിച്ചഭത്തികാത്ഥ. അപിചാഹം ഹിയ്യോവ ഗഹപതിനാ ആണത്താ – ‘യേ, ജേ, സ്വേ ഭത്തികാ ആഗച്ഛന്തി തേ കോട്ഠകേ ആസനം പഞ്ഞപേത്വാ കണാജകേന ബിലങ്ഗദുതിയേന പരിവിസാ’തി. ഭുഞ്ജഥ, ഭന്തേ’’തി. അഥ ഖോ മേത്തിയഭൂമജകാ ഭിക്ഖൂ – ‘‘ഹിയ്യോ ഖോ, ആവുസോ, കല്യാണഭത്തികോ ഗഹപതി ആരാമം അഗമാസി ദബ്ബസ്സ മല്ലപുത്തസ്സ സന്തികേ. നിസ്സംസയം ഖോ മയം ദബ്ബേന മല്ലപുത്തേന ഗഹപതിനോ അന്തരേ [സന്തികേ (സ്യാ. കം. ക.)] പരിഭിന്നാ’’തി. തേ തേനേവ ദോമനസ്സേന ന ചിത്തരൂപം ഭുഞ്ജിംസു. അഥ ഖോ മേത്തിയഭൂമജകാ ഭിക്ഖൂ പച്ഛാഭത്തം പിണ്ഡപാതപ്പടിക്കന്താ ആരാമം ഗന്ത്വാ പത്തചീവരം പടിസാമേത്വാ ബഹാരാമകോട്ഠകേ സങ്ഘാടിപല്ലത്ഥികായ നിസീദിംസു തുണ്ഹീഭൂതാ മങ്കുഭൂതാ പത്തക്ഖന്ധാ അധോമുഖാ പജ്ഝായന്താ അപ്പടിഭാനാ.

അഥ ഖോ മേത്തിയാ ഭിക്ഖുനീ യേന മേത്തിയഭൂമജകാ ഭിക്ഖൂ തേനുപസങ്കമി; ഉപസങ്കമിത്വാ മേത്തിയഭൂമജകേ ഭിക്ഖൂ ഏതദവോച – ‘‘വന്ദാമി, അയ്യാ’’തി. ഏവം വുത്തേ മേത്തിയഭൂമജകാ ഭിക്ഖൂ നാലപിംസു. ദുതിയമ്പി ഖോ…പേ… തതിയമ്പി ഖോ മേത്തിയാ ഭിക്ഖുനീ മേത്തിയഭൂമജകേ ഭിക്ഖൂ ഏതദവോച – ‘‘വന്ദാമി, അയ്യാ’’തി. തതിയമ്പി ഖോ മേത്തിയഭൂമജകാ ഭിക്ഖൂ നാലപിംസു. ‘‘ക്യാഹം അയ്യാനം അപരജ്ഝാമി? കിസ്സ മം അയ്യാ നാലപന്തീ’’തി? ‘‘തഥാ ഹി പന ത്വം, ഭഗിനി, അമ്ഹേ ദബ്ബേന മല്ലപുത്തേന വിഹേഠീയമാനേ അജ്ഝുപേക്ഖസീ’’തി? ‘‘ക്യാഹം, അയ്യാ, കരോമീ’’തി? ‘‘സചേ ഖോ ത്വം, ഭഗിനി, ഇച്ഛേയ്യാസി അജ്ജേവ ഭഗവാ ദബ്ബം മല്ലപുത്തം നാസാപേയ്യാ’’തി. ‘‘ക്യാഹം, അയ്യാ, കരോമി, കിം മയാ സക്കാ കാതു’’ന്തി? ‘‘ഏഹി ത്വം, ഭഗിനി, യേന ഭഗവാ തേനുപസങ്കമ; ഉപസങ്കമിത്വാ ഭഗവന്തം ഏവം വദേഹി – ‘ഇദം, ഭന്തേ, നച്ഛന്നം നപ്പതിരൂപം. യായം, ഭന്തേ, ദിസാ അഭയാ അനീതികാ അനുപദ്ദവാ സായം ദിസാ സഭയാ സഈതികാ സഉപദ്ദവാ. യതോ നിവാതം തതോ സവാതം [പവാതം (സീ. സ്യാ.)]. ഉദകം മഞ്ഞേ ആദിത്തം. അയ്യേനമ്ഹി ദബ്ബേന മല്ലപുത്തേന ദൂസിതാ’’’തി. ‘‘ഏവം, അയ്യാ’’തി ഖോ മേത്തിയാ ഭിക്ഖുനീ മേത്തിയഭൂമജകാനം ഭിക്ഖൂനം പടിസ്സുത്വാ യേന ഭഗവാ തേനുപസങ്കമി; ഉപസങ്കമിത്വാ ഭഗവന്തം അഭിവാദേത്വാ ഏകമന്തം അട്ഠാസി. ഏകമന്തം ഠിതാ ഖോ മേത്തിയാ ഭിക്ഖുനീ ഭഗവന്തം ഏതദവോച – ‘‘ഇദം, ഭന്തേ, നച്ഛന്നം നപ്പതിരൂപം. യായം, ഭന്തേ, ദിസാ അഭയാ അനീതികാ അനുപദ്ദവാ സായം ദിസാ സഭയാ സഈതികാ സഉപദ്ദവാ. യതോ നിവാതം തതോ സവാതം. ഉദകം മഞ്ഞേ ആദിത്തം! അയ്യേനമ്ഹി ദബ്ബേന മല്ലപുത്തേന ദൂസിതാ’’തി.

൩൮൪. അഥ ഖോ ഭഗവാ ഏതസ്മിം നിദാനേ ഏതസ്മിം പകരണേ ഭിക്ഖുസങ്ഘം സന്നിപാതാപേത്വാ ആയസ്മന്തം ദബ്ബം മല്ലപുത്തം പടിപുച്ഛി – ‘‘സരസി ത്വം, ദബ്ബ, ഏവരൂപം കത്താ യഥായം ഭിക്ഖുനീ ആഹാ’’തി? ‘‘യഥാ മം, ഭന്തേ, ഭഗവാ ജാനാതീ’’തി. ദുതിയമ്പി ഖോ ഭഗവാ…പേ… തതിയമ്പി ഖോ ഭഗവാ ആയസ്മന്തം ദബ്ബം മല്ലപുത്തം ഏതദവോച – ‘‘സരസി ത്വം, ദബ്ബ, ഏവരൂപം കത്താ യഥായം ഭിക്ഖുനീ ആഹാ’’തി? ‘‘യഥാ മം, ഭന്തേ, ഭഗവാ ജാനാതീ’’തി. ‘‘ന ഖോ, ദബ്ബ, ദബ്ബാ ഏവം നിബ്ബേഠേന്തി. സചേ തയാ കതം കതന്തി വദേഹി, സചേ തയാ അകതം അകതന്തി വദേഹീ’’തി. ‘‘യതോ അഹം, ഭന്തേ, ജാതോ നാഭിജാനാമി സുപിനന്തേനപി മേഥുനം ധമ്മം പടിസേവിതാ, പഗേവ ജാഗരോ’’തി! അഥ ഖോ ഭഗവാ ഭിക്ഖൂ ആമന്തേസി – ‘‘തേന ഹി, ഭിക്ഖവേ, മേത്തിയം ഭിക്ഖുനിം നാസേഥ. ഇമേ ച ഭിക്ഖൂ അനുയുഞ്ജഥാ’’തി. ഇദം വത്വാ ഭഗവാ ഉട്ഠായാസനാ വിഹാരം പാവിസി.

അഥ ഖോ തേ ഭിക്ഖൂ മേത്തിയം ഭിക്ഖുനിം നാസേസും. അഥ ഖോ മേത്തിയഭൂമജകാ ഭിക്ഖൂ തേ ഭിക്ഖൂ ഏതദവോചും – ‘‘മാവുസോ, മേത്തിയം ഭിക്ഖുനിം നാസേഥ. ന സാ കിഞ്ചി അപരജ്ഝതി. അമ്ഹേഹി സാ ഉസ്സാഹിതാ കുപിതേഹി അനത്തമനേഹി ചാവനാധിപ്പായേഹീ’’തി. ‘‘കിം പന തുമ്ഹേ, ആവുസോ, ആയസ്മന്തം ദബ്ബം മല്ലപുത്തം അമൂലകേന പാരാജികേന ധമ്മേന അനുദ്ധംസേഥാ’’തി? ‘‘ഏവമാവുസോ’’തി. യേ തേ ഭിക്ഖൂ അപ്പിച്ഛാ…പേ… തേ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ മേത്തിയഭൂമജകാ ഭിക്ഖൂ ആയസ്മന്തം ദബ്ബം മല്ലപുത്തം അമൂലകേന പാരാജികേന ധമ്മേന അനുദ്ധംസേസ്സന്തീ’’തി! അഥ ഖോ തേ ഭിക്ഖൂ മേത്തിയഭൂമജകേ ഭിക്ഖൂ അനേകപരിയായേന വിഗരഹിത്വാ ഭഗവതോ ഏതമത്ഥം ആരോചേസും…പേ… ‘‘സച്ചം കിര തുമ്ഹേ, ഭിക്ഖവേ, ദബ്ബം മല്ലപുത്തം അമൂലകേന പാരാജികേന ധമ്മേന അനുദ്ധംസേഥാ’’തി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… ‘‘കഥഞ്ഹി നാമ തുമ്ഹേ, മോഘപുരിസാ, ദബ്ബം മല്ലപുത്തം അമൂലകേന പാരാജികേന ധമ്മേന അനുദ്ധംസേസ്സഥ! നേതം, മോഘപുരിസാ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഇമം സിക്ഖാപദം ഉദ്ദിസേയ്യാഥ –

൩൮൫. യോ പന ഭിക്ഖു ഭിക്ഖും ദുട്ഠോ ദോസോ അപ്പതീതോ അമൂലകേന പാരാജികേന ധമ്മേന അനുദ്ധംസേയ്യ – ‘അപ്പേവ നാമ നം ഇമമ്ഹാ ബ്രഹ്മചരിയാ ചാവേയ്യ’ന്തി, തതോ അപരേന സമയേന സമനുഗ്ഗാഹീയമാനോ വാ അസമനുഗ്ഗാഹീയമാനോ വാ അമൂലകഞ്ചേവ തം അധികരണം ഹോതി ഭിക്ഖു ച ദോസം പതിട്ഠാതി, സങ്ഘാദിസേസോ’’തി.

൩൮൬. യോ പനാതി യോ യാദിസോ…പേ… ഭിക്ഖൂതി…പേ… അയം ഇമസ്മിം അത്ഥേ അധിപ്പേതോ ഭിക്ഖൂതി.

ഭിക്ഖുന്തി അഞ്ഞം ഭിക്ഖും.

ദുട്ഠോ ദോസോതി കുപിതോ അനത്തമനോ അനഭിരദ്ധോ ആഹതചിത്തോ ഖിലജാതോ.

അപ്പതീതോതി തേന ച കോപേന തേന ച ദോസേന തായ ച അനത്തമനതായ തായ ച അനഭിരദ്ധിയാ അപ്പതീതോ ഹോതി.

അമൂലകം നാമ അദിട്ഠം അസുതം അപരിസങ്കിതം.

പാരാജികേന ധമ്മേനാതി ചതുന്നം അഞ്ഞതരേന.

അനുദ്ധംസേയ്യാതി ചോദേതി വാ ചോദാപേതി വാ.

അപ്പേവ നാമ നം ഇമമ്ഹാ ബ്രഹ്മചരിയാ ചാവേയ്യന്തി ഭിക്ഖുഭാവാ ചാവേയ്യം, സമണധമ്മാ ചാവേയ്യം, സീലക്ഖന്ധാ ചാവേയ്യം, തപോഗുണാ ചാവേയ്യം.

തതോ അപരേന സമയേനാതി യസ്മിം ഖണേ അനുദ്ധംസിതോ ഹോതി തം ഖണം തം ലയം തം മുഹുത്തം വീതിവത്തേ.

സമനുഗ്ഗാഹീയമാനോതി യേന വത്ഥുനാ അനുദ്ധംസിതോ ഹോതി തസ്മിം വത്ഥുസ്മിം സമനുഗ്ഗാഹീയമാനോ.

അസമനുഗ്ഗാഹീയമാനോതി ന കേനചി വുച്ചമാനോ.

അധികരണം നാമ ചത്താരി അധികരണാനി – വിവാദാധികരണം, അനുവാദാധികരണം, ആപത്താധികരണം, കിച്ചാധികരണം.

ഭിക്ഖു ച ദോസം പതിട്ഠാതീതി തുച്ഛകം മയാ ഭണിതം, മുസാ മയാ ഭണിതം, അഭൂതം മയാ ഭണിതം, അജാനന്തേന മയാ ഭണിതം.

സങ്ഘാദിസേസോതി…പേ… തേനപി വുച്ചതി സങ്ഘാദിസേസോതി.

൩൮൭. അദിട്ഠസ്സ ഹോതി പാരാജികം ധമ്മം അജ്ഝാപജ്ജന്തോ. തഞ്ചേ ചോദേതി – ‘‘ദിട്ഠോ മയാ, പാരാജികം ധമ്മം അജ്ഝാപന്നോസി, അസ്സമണോസി, അസക്യപുത്തിയോസി, നത്ഥി തയാ സദ്ധിം ഉപോസഥോ വാ പവാരണാ വാ സങ്ഘകമ്മം വാ’’തി, ആപത്തി വാചായ, വാചായ സങ്ഘാദിസേസസ്സ.

അസുതസ്സ ഹോതി – ‘‘പാരാജികം ധമ്മം അജ്ഝാപന്നോ’’തി. തഞ്ചേ ചോദേതി – ‘‘സുതോ മയാ, പാരാജികം ധമ്മം അജ്ഝാപന്നോസി, അസ്സമണോസി, അസക്യപുത്തിയോസി, നത്ഥി തയാ സദ്ധിം ഉപോസഥോ വാ പവാരണാ വാ സങ്ഘകമ്മം വാ’’തി, ആപത്തി വാചായ, വാചായ സങ്ഘാദിസേസസ്സ.

അപരിസങ്കിതസ്സ ഹോതി – ‘‘പാരാജികം ധമ്മം അജ്ഝാപന്നോ’’തി. തഞ്ചേ ചോദേതി – ‘‘പരിസങ്കിതോ മയാ, പാരാജികം ധമ്മം അജ്ഝാപന്നോസി, അസ്സമണോസി, അസക്യപുത്തിയോസി, നത്ഥി തയാ സദ്ധിം ഉപോസഥോ വാ പവാരണാ വാ സങ്ഘകമ്മം വാ’’തി, ആപത്തി വാചായ, വാചായ സങ്ഘാദിസേസസ്സ.

അദിട്ഠസ്സ ഹോതി പാരാജികം ധമ്മം അജ്ഝാപജ്ജന്തോ. തഞ്ചേ ചോദേതി – ‘‘ദിട്ഠോ മയാ സുതോ ച, പാരാജികം ധമ്മം അജ്ഝാപന്നോസി, അസ്സമണോസി’’…പേ… ആപത്തി വാചായ, വാചായ സങ്ഘാദിസേസസ്സ.

അദിട്ഠസ്സ ഹോതി പാരാജികം ധമ്മം അജ്ഝാപജ്ജന്തോ. തഞ്ചേ ചോദേതി – ‘‘ദിട്ഠോ മയാ പരിസങ്കിതോ ച, പാരാജികം ധമ്മം അജ്ഝാപന്നോസി, അസ്സമണോസി’’…പേ… ആപത്തി വാചായ, വാചായ സങ്ഘാദിസേസസ്സ.

അദിട്ഠസ്സ ഹോതി പാരാജികം ധമ്മം അജ്ഝാപജ്ജന്തോ. തഞ്ചേ ചോദേതി – ‘‘ദിട്ഠോ മയാ സുതോ ച പരിസങ്കിതോ ച, പാരാജികം ധമ്മം അജ്ഝാപന്നോസി, അസ്സമണോസി’’…പേ… ആപത്തി വാചായ, വാചായ സങ്ഘാദിസേസസ്സ.

അസുതസ്സ ഹോതി – ‘‘പാരാജികം ധമ്മം അജ്ഝാപന്നോ’’തി. തഞ്ചേ ചോദേതി – ‘‘സുതോ മയാ പരിസങ്കിതോ ച…പേ… സുതോ മയാ ദിട്ഠോ ച…പേ… സുതോ മയാ പരിസങ്കിതോ ച ദിട്ഠോ ച, പാരാജികം ധമ്മം അജ്ഝാപന്നോസി, അസ്സമണോസി’’…പേ… ആപത്തി വാചായ, വാചായ സങ്ഘാദിസേസസ്സ.

അപരിസങ്കിതസ്സ ഹോതി – ‘‘പാരാജികം ധമ്മം അജ്ഝാപന്നോ’’തി. തഞ്ചേ ചോദേതി – ‘‘പരിസങ്കിതോ മയാ ദിട്ഠോ ച…പേ… പരിസങ്കിതോ മയാ സുതോ ച…പേ… പരിസങ്കിതോ മയാ ദിട്ഠോ ച സുതോ ച, പാരാജികം ധമ്മം അജ്ഝാപന്നോസി, അസ്സമണോസി’’…പേ… ആപത്തി വാചായ, വാചായ സങ്ഘാദിസേസസ്സ.

ദിട്ഠസ്സ ഹോതി പാരാജികം ധമ്മം അജ്ഝാപജ്ജന്തോ. തഞ്ചേ ചോദേതി – ‘‘സുതോ മയാ പാരാജികം ധമ്മം അജ്ഝാപന്നോസി, അസ്സമണോസി’’…പേ… ആപത്തി വാചായ, വാചായ സങ്ഘാദിസേസസ്സ.

ദിട്ഠസ്സ ഹോതി പാരാജികം ധമ്മം അജ്ഝാപജ്ജന്തോ. തഞ്ചേ ചോദേതി – ‘‘പരിസങ്കിതോ മയാ, പാരാജികം ധമ്മം അജ്ഝാപന്നോസി’’…പേ… ‘‘സുതോ മയാ പരിസങ്കിതോ ച, പാരാജികം ധമ്മം അജ്ഝാപന്നോസി, അസ്സമണോസി’’…പേ… ആപത്തി വാചായ, വാചായ സങ്ഘാദിസേസസ്സ.

സുതസ്സ ഹോതി – ‘‘പാരാജികം ധമ്മം അജ്ഝാപന്നോ’’തി. തഞ്ചേ ചോദേതി – ‘‘പരിസങ്കിതോ മയാ, പാരാജികം ധമ്മം അജ്ഝാപന്നോസി…പേ… ദിട്ഠോ മയാ, പാരാജികം ധമ്മം അജ്ഝാപന്നോസി…പേ… പരിസങ്കിതോ മയാ ദിട്ഠോ ച, പാരാജികം ധമ്മം അജ്ഝാപന്നോസി, അസ്സമണോസി’’…പേ… ആപത്തി വാചായ, വാചായ സങ്ഘാദിസേസസ്സ.

പരിസങ്കിതസ്സ ഹോതി – ‘‘പാരാജികം ധമ്മം അജ്ഝാപന്നോ’’തി. തഞ്ചേ ചോദേതി – ‘‘ദിട്ഠോ മയാ, പാരാജികം ധമ്മം അജ്ഝാപന്നോസി…പേ… സുതോ മയാ, പാരാജികം ധമ്മം അജ്ഝാപന്നോസി…പേ… ദിട്ഠോ മയാ സുതോ ച, പാരാജികം ധമ്മം അജ്ഝാപന്നോസി, അസ്സമണോസി, അസക്യപുത്തിയോസി’’…പേ… ആപത്തി വാചായ, വാചായ സങ്ഘാദിസേസസ്സ.

ദിട്ഠസ്സ ഹോതി പാരാജികം ധമ്മം അജ്ഝാപജ്ജന്തോ. ദിട്ഠേ വേമതികോ ദിട്ഠം നോ കപ്പേതി ദിട്ഠം നസ്സരതി ദിട്ഠം പമുട്ഠോ ഹോതി…പേ… സുതേ വേമതികോ സുതം നോ കപ്പേതി സുതം നസ്സരതി സുതം പമുട്ഠോ ഹോതി…പേ… പരിസങ്കിതേ വേമതികോ പരിസങ്കിതം നോ കപ്പേതി പരിസങ്കിതം നസ്സരതി പരിസങ്കിതം പമുട്ഠോ ഹോതി. തഞ്ചേ ചോദേതി – ‘‘പരിസങ്കിതോ മയാ ദിട്ഠോ ച…പേ… പരിസങ്കിതോ മയാ സുതോ ച…പേ… പരിസങ്കിതോ മയാ ദിട്ഠോ ച സുതോ ച, പാരാജികം ധമ്മം അജ്ഝാപന്നോസി, അസ്സമണോസി, അസക്യപുത്തിയോസി, നത്ഥി തയാ സദ്ധിം ഉപോസഥോ വാ പവാരണാ വാ സങ്ഘകമ്മം വാ’’തി, ആപത്തി വാചായ, വാചായ സങ്ഘാദിസേസസ്സ.

൩൮൮. അദിട്ഠസ്സ ഹോതി പാരാജികം ധമ്മം അജ്ഝാപജ്ജന്തോ. തഞ്ചേ ചോദാപേതി – ‘‘ദിട്ഠോസി, പാരാജികം ധമ്മം അജ്ഝാപന്നോസി, അസ്സമണോസി, അസക്യപുത്തിയോസി, നത്ഥി തയാ സദ്ധിം ഉപോസഥോ വാ പവാരണാ വാ സങ്ഘകമ്മം വാ’’തി, ആപത്തി വാചായ, വാചായ സങ്ഘാദിസേസസ്സ.

അസുതസ്സ ഹോതി – ‘‘പാരാജികം ധമ്മം അജ്ഝാപന്നോ’’തി…പേ… അപരിസങ്കിതസ്സ ഹോതി – ‘‘പാരാജികം ധമ്മം അജ്ഝാപന്നോ’’തി. തഞ്ചേ ചോദാപേതി – ‘‘പരിസങ്കിതോസി, പാരാജികം ധമ്മം അജ്ഝാപന്നോസി’’…പേ… ആപത്തി വാചായ, വാചായ സങ്ഘാദിസേസസ്സ.

അദിട്ഠസ്സ ഹോതി പാരാജികം ധമ്മം അജ്ഝാപജ്ജന്തോ. തഞ്ചേ ചോദാപേതി – ‘‘ദിട്ഠോസി സുതോസി…പേ… ദിട്ഠോസി പരിസങ്കിതോസി…പേ… ദിട്ഠോസി സുതോസി പരിസങ്കിതോസി, പാരാജികം ധമ്മം അജ്ഝാപന്നോസി’’…പേ… അസുതസ്സ ഹോതി – ‘‘പാരാജികം ധമ്മം അജ്ഝാപന്നോ’’തി…പേ… അപരിസങ്കിതസ്സ ഹോതി – ‘‘പാരാജികം ധമ്മം അജ്ഝാപന്നോ’’തി. തഞ്ചേ ചോദാപേതി – ‘‘പരിസങ്കിതോസി, ദിട്ഠോസി…പേ… പരിസങ്കിതോസി, സുതോസി…പേ… പരിസങ്കിതോസി, ദിട്ഠോസി, സുതോസി, പാരാജികം ധമ്മം അജ്ഝാപന്നോസി, അസ്സമണോസി’’…പേ… ആപത്തി വാചായ, വാചായ സങ്ഘാദിസേസസ്സ.

ദിട്ഠസ്സ ഹോതി പാരാജികം ധമ്മം അജ്ഝാപജ്ജന്തോ. തഞ്ചേ ചോദാപേതി – ‘‘സുതോസി’’…പേ… തഞ്ചേ ചോദാപേതി – ‘‘പരിസങ്കിതോസി’’…പേ… തഞ്ചേ ചോദാപേതി – ‘‘സുതോസി, പരിസങ്കിതോസി, പാരാജികം ധമ്മം അജ്ഝാപന്നോസി, അസ്സമണോസി’’…പേ… ആപത്തി വാചായ, വാചായ സങ്ഘാദിസേസസ്സ.

സുതസ്സ ഹോതി – ‘‘പാരാജികം ധമ്മം അജ്ഝാപന്നോ’’തി…പേ… പരിസങ്കിതസ്സ ഹോതി – ‘‘പാരാജികം ധമ്മം അജ്ഝാപന്നോ’’തി. തഞ്ചേ ‘‘ദിട്ഠോസി’’…പേ… തഞ്ചേ ചോദാപേതി – ‘‘സുതോസി’’…പേ… തഞ്ചേ ചോദാപേതി – ‘‘ദിട്ഠോസി, സുതോസി, പാരാജികം ധമ്മം അജ്ഝാപന്നോസി, അസ്സമണോസി’’…പേ… ആപത്തി വാചായ, വാചായ സങ്ഘാദിസേസസ്സ.

ദിട്ഠസ്സ ഹോതി പാരാജികം ധമ്മം അജ്ഝാപജ്ജന്തോ. ദിട്ഠേ വേമതികോ ദിട്ഠം നോ കപ്പേതി ദിട്ഠം നസ്സരതി ദിട്ഠം പമുട്ഠോ ഹോതി…പേ… സുതേ വേമതികോ സുതം നോ കപ്പേതി സുതം നസ്സരതി സുതം പമുട്ഠോ ഹോതി…പേ… പരിസങ്കിതേ വേമതികോ പരിസങ്കിതം നോ കപ്പേതി പരിസങ്കിതം നസ്സരതി പരിസങ്കിതം പമുട്ഠോ ഹോതി. തഞ്ചേ ചോദാപേതി – ‘‘പരിസങ്കിതോസി, ദിട്ഠോസി’’…പേ… പരിസങ്കിതം പമുട്ഠോ ഹോതി, തഞ്ചേ ചോദാപേതി – ‘‘പരിസങ്കിതോസി സുതോസി’’…പേ… പരിസങ്കിതം പമുട്ഠോ ഹോതി, തഞ്ചേ ചോദാപേതി – ‘‘പരിസങ്കിതോസി, ദിട്ഠോസി, സുതോസി, പാരാജികം ധമ്മം അജ്ഝാപന്നോസി, അസ്സമണോസി, അസക്യപുത്തിയോസി, നത്ഥി തയാ സദ്ധിം ഉപോസഥോ വാ പവാരണാ വാ സങ്ഘകമ്മം വാ’’തി, ആപത്തി വാചായ, വാചായ സങ്ഘാദിസേസസ്സ.

൩൮൯. അസുദ്ധേ സുദ്ധദിട്ഠി, സുദ്ധേ അസുദ്ധദിട്ഠി, അസുദ്ധേ അസുദ്ധദിട്ഠി, സുദ്ധേ സുദ്ധദിട്ഠി.

അസുദ്ധോ ഹോതി പുഗ്ഗലോ അഞ്ഞതരം പാരാജികം ധമ്മം അജ്ഝാപന്നോ. തഞ്ചേ സുദ്ധദിട്ഠി സമാനോ അനോകാസം കാരാപേത്വാ ചാവനാധിപ്പായോ വദേതി, ആപത്തി സങ്ഘാദിസേസേന ദുക്കടസ്സ.

അസുദ്ധോ ഹോതി പുഗ്ഗലോ അഞ്ഞതരം പാരാജികം ധമ്മം അജ്ഝാപന്നോ. തഞ്ചേ സുദ്ധദിട്ഠി സമാനോ ഓകാസം കാരാപേത്വാ ചാവനാധിപ്പായോ വദേതി, ആപത്തി സങ്ഘാദിസേസസ്സ.

അസുദ്ധോ ഹോതി പുഗ്ഗലോ അഞ്ഞതരം പാരാജികം ധമ്മം അജ്ഝാപന്നോ. തഞ്ചേ സുദ്ധദിട്ഠി സമാനോ അനോകാസം കാരാപേത്വാ അക്കോസാധിപ്പായോ വദേതി, ആപത്തി ഓമസവാദേന ദുക്കടസ്സ.

അസുദ്ധോ ഹോതി പുഗ്ഗലോ അഞ്ഞതരം പാരാജികം ധമ്മം അജ്ഝാപന്നോ. തഞ്ചേ സുദ്ധദിട്ഠി സമാനോ ഓകാസം കാരാപേത്വാ അക്കോസാധിപ്പായോ വദേതി, ആപത്തി ഓമസവാദസ്സ.

സുദ്ധോ ഹോതി പുഗ്ഗലോ അഞ്ഞതരം പാരാജികം ധമ്മം അനജ്ഝാപന്നോ. തഞ്ചേ അസുദ്ധദിട്ഠി സമാനോ അനോകാസം കാരാപേത്വാ ചാവനാധിപ്പായോ വദേതി, ആപത്തി ദുക്കടസ്സ.

സുദ്ധോ ഹോതി പുഗ്ഗലോ അഞ്ഞതരം പാരാജികം ധമ്മം അനജ്ഝാപന്നോ. തഞ്ചേ അസുദ്ധദിട്ഠി സമാനോ ഓകാസം കാരാപേത്വാ ചാവനാധിപ്പായോ വദേതി, അനാപത്തി.

സുദ്ധോ ഹോതി പുഗ്ഗലോ അഞ്ഞതരം പാരാജികം ധമ്മം അനജ്ഝാപന്നോ. തഞ്ചേ അസുദ്ധദിട്ഠി സമാനോ അനോകാസം കാരാപേത്വാ അക്കോസാധിപ്പായോ വദേതി, ആപത്തി ഓമസവാദേന ദുക്കടസ്സ.

സുദ്ധോ ഹോതി പുഗ്ഗലോ അഞ്ഞതരം പാരാജികം ധമ്മം അനജ്ഝാപന്നോ. തഞ്ചേ അസുദ്ധദിട്ഠി സമാനോ ഓകാസം കാരാപേത്വാ അക്കോസാധിപ്പായോ വദേതി, ആപത്തി ഓമസവാദസ്സ.

അസുദ്ധോ ഹോതി പുഗ്ഗലോ അഞ്ഞതരം പാരാജികം ധമ്മം അജ്ഝാപന്നോ. തഞ്ചേ അസുദ്ധദിട്ഠി സമാനോ അനോകാസം കാരാപേത്വാ ചാവനാധിപ്പായോ വദേതി, ആപത്തി ദുക്കടസ്സ.

അസുദ്ധോ ഹോതി പുഗ്ഗലോ അഞ്ഞതരം പാരാജികം ധമ്മം അജ്ഝാപന്നോ. തഞ്ചേ അസുദ്ധദിട്ഠി സമാനോ ഓകാസം കാരാപേത്വാ ചാവനാധിപ്പായോ വദേതി, അനാപത്തി.

അസുദ്ധോ ഹോതി പുഗ്ഗലോ അഞ്ഞതരം പാരാജികം ധമ്മം അജ്ഝാപന്നോ. തഞ്ചേ അസുദ്ധദിട്ഠി സമാനോ അനോകാസം കാരാപേത്വാ അക്കോസാധിപ്പായോ വദേതി, ആപത്തി ഓമസവാദേന ദുക്കടസ്സ.

അസുദ്ധോ ഹോതി പുഗ്ഗലോ അഞ്ഞതരം പാരാജികം ധമ്മം അജ്ഝാപന്നോ. തഞ്ചേ അസുദ്ധദിട്ഠി സമാനോ ഓകാസം കാരാപേത്വാ അക്കോസാധിപ്പായോ വദേതി, ആപത്തി ഓമസവാദസ്സ.

സുദ്ധോ ഹോതി പുഗ്ഗലോ അഞ്ഞതരം പാരാജികം ധമ്മം അനജ്ഝാപന്നോ. തഞ്ചേ സുദ്ധദിട്ഠി സമാനോ അനോകാസം കാരാപേത്വാ ചാവനാധിപ്പായോ വദേതി, ആപത്തി സങ്ഘാദിസേസേന ദുക്കടസ്സ.

സുദ്ധോ ഹോതി പുഗ്ഗലോ അഞ്ഞതരം പാരാജികം ധമ്മം അനജ്ഝാപന്നോ. തഞ്ചേ സുദ്ധദിട്ഠി സമാനോ ഓകാസം കാരാപേത്വാ ചാവനാധിപ്പായോ വദേതി, ആപത്തി സങ്ഘാദിസേസസ്സ.

സുദ്ധോ ഹോതി പുഗ്ഗലോ അഞ്ഞതരം പാരാജികം ധമ്മം അനജ്ഝാപന്നോ. തഞ്ചേ സുദ്ധദിട്ഠി സമാനോ അനോകാസം കാരാപേത്വാ അക്കോസാധിപ്പായോ വദേതി, ആപത്തി ഓമസവാദേന ദുക്കടസ്സ.

സുദ്ധോ ഹോതി പുഗ്ഗലോ അഞ്ഞതരം പാരാജികം ധമ്മം അനജ്ഝാപന്നോ തഞ്ചേ സുദ്ധദിട്ഠി സമാനോ ഓകാസം കാരാപേത്വാ അക്കോസാധിപ്പായോ വദേതി, ആപത്തി ഓമസവാദസ്സ.

൩൯൦. അനാപത്തി സുദ്ധേ അസുദ്ധദിട്ഠിസ്സ, അസുദ്ധേ അസുദ്ധദിട്ഠിസ്സ, ഉമ്മത്തകസ്സ, ആദികമ്മികസ്സാതി.

ദുട്ഠദോസസിക്ഖാപദം നിട്ഠിതം അട്ഠമം.