൭. വിഹാരകാരസിക്ഖാപദം

൩൬൫. തേന സമയേന ബുദ്ധോ ഭഗവാ കോസമ്ബിയം വിഹരതി ഘോസിതാരാമേ. തേന ഖോ പന സമയേന ആയസ്മതോ ഛന്നസ്സ ഉപട്ഠാകോ ഗഹപതി ആയസ്മന്തം ഛന്നം ഏതദവോച – ‘‘വിഹാരവത്ഥും, ഭന്തേ, ജാനാഹി അയ്യസ്സ വിഹാരം കാരാപേസ്സാമീ’’തി. അഥ ഖോ ആയസ്മാ ഛന്നോ വിഹാരവത്ഥും സോധേന്തോ അഞ്ഞതരം ചേതിയരുക്ഖം ഛേദാപേസി ഗാമപൂജിതം നിഗമപൂജിതം നഗരപൂജിതം ജനപദപൂജിതം രട്ഠപൂജിതം. മനുസ്സാ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ സമണാ സക്യപുത്തിയാ ചേതിയരുക്ഖം ഛേദാപേസ്സന്തി ഗാമപൂജിതം നിഗമപൂജിതം നഗരപൂജിതം ജനപദപൂജിതം രട്ഠപൂജിതം! ഏകിന്ദ്രിയം സമണാ സക്യപുത്തിയാ ജീവം വിഹേഠേന്തീ’’ [വിഹേഠേസ്സന്തി (കത്ഥചി)] തി. അസ്സോസും ഖോ ഭിക്ഖൂ തേസം മനുസ്സാനം ഉജ്ഝായന്താനം ഖിയ്യന്താനം വിപാചേന്താനം. യേ തേ ഭിക്ഖൂ അപ്പിച്ഛാ…പേ… തേ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ആയസ്മാ ഛന്നോ ചേതിയരുക്ഖം ഛേദാപേസ്സതി ഗാമപൂജിതം…പേ… രട്ഠപൂജിത’’ന്തി! അഥ ഖോ തേ ഭിക്ഖൂ ആയസ്മന്തം ഛന്നം അനേകപരിയായേന വിഗരഹിത്വാ ഭഗവതോ ഏതമത്ഥം ആരോചേസും…പേ… ‘‘സച്ചം കിര ത്വം, ഛന്ന, ചേതിയരുക്ഖം ഛേദാപേസി ഗാമപൂജിതം…പേ… രട്ഠപൂജിത’’ന്തി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… ‘‘കഥഞ്ഹി നാമ ത്വം, മോഘപുരിസ, ചേതിയരുക്ഖം ഛേദാപേസ്സസി ഗാമപൂജിതം നിഗമപൂജിതം നഗരപൂജിതം ജനപദപൂജിതം രട്ഠപൂജിതം! ജീവസഞ്ഞിനോ ഹി, മോഘപുരിസ, മനുസ്സാ രുക്ഖസ്മിം. നേതം, മോഘപുരിസ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഇമം സിക്ഖാപദം ഉദ്ദിസേയ്യാഥ –

൩൬൬. ‘‘മഹല്ലകം പന ഭിക്ഖുനാ വിഹാരം കാരയമാനേന സസ്സാമികം അത്തുദ്ദേസം ഭിക്ഖൂ അഭിനേതബ്ബാ വത്ഥുദേസനായ. തേഹി ഭിക്ഖൂഹി വത്ഥു ദേസേതബ്ബം അനാരമ്ഭം സപരിക്കമനം. സാരമ്ഭേ ചേ ഭിക്ഖു വത്ഥുസ്മിം അപരിക്കമനേ മഹല്ലകം വിഹാരം കാരേയ്യ ഭിക്ഖൂ വാ അനഭിനേയ്യ വത്ഥുദേസനായ, സങ്ഘാദിസേസോ’’തി.

൩൬൭. മഹല്ലകോ നാമ വിഹാരോ സസ്സാമികോ വുച്ചതി.

വിഹാരോ നാമ ഉല്ലിത്തോ വാ ഹോതി അവലിത്തോ വാ ഉല്ലിത്താവലിത്തോ വാ.

കാരയമാനേനാതി കരോന്തോ വാ കാരാപേന്തോ വാ.

സസ്സാമികന്തി അഞ്ഞോ കോചി സാമികോ ഹോതി ഇത്ഥീ വാ പുരിസോ വാ ഗഹട്ഠോ വാ പബ്ബജിതോ വാ.

അത്തുദ്ദേസന്തി അത്തനോ അത്ഥായ.

ഭിക്ഖൂ അഭിനേതബ്ബാ വത്ഥുദേസനായാതി തേന വിഹാരകാരകേന ഭിക്ഖുനാ വിഹാരവത്ഥും സോധേത്വാ സങ്ഘം ഉപസങ്കമിത്വാ ഏകംസം ഉത്തരാസങ്ഗം കരിത്വാ വുഡ്ഢാനം ഭിക്ഖൂനം പാദേ വന്ദിത്വാ ഉക്കുടികം നിസീദിത്വാ അഞ്ജലിം പഗ്ഗഹേത്വാ ഏവമസ്സ വചനീയോ – ‘‘അഹം, ഭന്തേ, മഹല്ലകം വിഹാരം കത്തുകാമോ സസ്സാമികം അത്തുദ്ദേസം. സോഹം, ഭന്തേ, സങ്ഘം വിഹാരവത്ഥുഓലോകനം യാചാമീ’’തി. ദുതിയമ്പി യാചിതബ്ബാ. തതിയമ്പി യാചിതബ്ബാ. സചേ സബ്ബോ സങ്ഘോ ഉസ്സഹതി വിഹാരവത്ഥും ഓലോകേതും സബ്ബേന സങ്ഘേന ഓലോകേതബ്ബം. നോ ചേ സബ്ബോ സങ്ഘോ ഉസ്സഹതി വിഹാരവത്ഥും ഓലോകേതും, യേ തത്ഥ ഹോന്തി ഭിക്ഖൂ ബ്യത്താ പടിബലാ സാരമ്ഭം അനാരമ്ഭം സപരിക്കമനം അപരിക്കമനം ജാനിതും തേ യാചിത്വാ സമ്മന്നിതബ്ബാ. ഏവഞ്ച പന, ഭിക്ഖവേ, സമ്മന്നിതബ്ബാ. ബ്യത്തേന ഭിക്ഖുനാ പടിബലേന സങ്ഘോ ഞാപേതബ്ബോ –

൩൬൮. ‘‘സുണാതു മേ, ഭന്തേ, സങ്ഘോ. അയം ഇത്ഥന്നാമോ ഭിക്ഖു മഹല്ലകം വിഹാരം കത്തുകാമോ സസ്സാമികം അത്തുദ്ദേസം. സോ സങ്ഘം വിഹാരവത്ഥുഓലോകനം യാചതി. യദി സങ്ഘസ്സ പത്തകല്ലം, സങ്ഘോ ഇത്ഥന്നാമഞ്ച ഇത്ഥന്നാമഞ്ച ഭിക്ഖു സമ്മന്നേയ്യ ഇത്ഥന്നാമസ്സ ഭിക്ഖുനോ വിഹാരവത്ഥും ഓലോകേതും. ഏസാ ഞത്തി.

‘‘സുണാതു മേ, ഭന്തേ, സങ്ഘോ. അയം ഇത്ഥന്നാമോ ഭിക്ഖു മഹല്ലകം വിഹാരം കത്തുകാമോ സസ്സാമികം അത്തുദ്ദേസം. സോ സങ്ഘം വിഹാരവത്ഥുഓലോകനം യാചതി. സങ്ഘോ ഇത്ഥന്നാമഞ്ച ഇത്ഥന്നാമഞ്ച ഭിക്ഖൂ സമ്മന്നതി ഇത്ഥന്നാമസ്സ ഭിക്ഖുനോ വിഹാരവത്ഥും ഓലോകേതും. യസ്സായസ്മതോ ഖമതി ഇത്ഥന്നാമസ്സ ച ഇത്ഥന്നാമസ്സ ച ഭിക്ഖൂനം സമ്മുതി ഇത്ഥന്നാമസ്സ ഭിക്ഖുനോ വിഹാരവത്ഥും ഓലോകേതും, സോ തുണ്ഹസ്സ; യസ്സ നക്ഖമതി, സോ ഭാസേയ്യ.

‘‘സമ്മതാ സങ്ഘേന ഇത്ഥന്നാമോ ച ഇത്ഥന്നാമോ ച ഭിക്ഖൂ ഇത്ഥന്നാമസ്സ ഭിക്ഖുനോ വിഹാരവത്ഥും ഓലോകേതും. ഖമതി സങ്ഘസ്സ, തസ്മാ തുണ്ഹീ, ഏവമേതം ധാരയാമീ’’തി.

൩൬൯. തേഹി സമ്മതേഹി ഭിക്ഖൂഹി തത്ഥ ഗന്ത്വാ വിഹാരവത്ഥു ഓലോകേതബ്ബം; സാരമ്ഭം അനാരമ്ഭം സപരിക്കമനം അപരിക്കമനം ജാനിതബ്ബം. സചേ സാരമ്ഭം ഹോതി അപരിക്കമനം, ‘മായിധ കരീ’തി വത്തബ്ബോ. സചേ അനാരമ്ഭം ഹോതി സപരിക്കമനം, സങ്ഘസ്സ ആരോചേതബ്ബം – ‘അനാരമ്ഭം സപരിക്കമന’ന്തി. തേന വിഹാരകാരകേന ഭിക്ഖുനാ സങ്ഘം ഉപസങ്കമിത്വാ ഏകംസം ഉത്തരാസങ്ഗം കരിത്വാ വുഡ്ഢാനം ഭിക്ഖൂനം പാദേ വന്ദിത്വാ ഉക്കുടികം നിസീദിത്വാ അഞ്ജലിം പഗ്ഗഹേത്വാ ഏവമസ്സ വചനീയോ – ‘‘അഹം, ഭന്തേ, മഹല്ലകം വിഹാരം കത്തുകാമോ സസ്സാമികം അത്തുദ്ദേസം. സോഹം, ഭന്തേ, സങ്ഘം വിഹാരവത്ഥുദേസനം യാചാമീ’’തി. ദുതിയമ്പി യാചിതബ്ബാ. തതിയമ്പി യാചിതബ്ബാ. ബ്യത്തേന ഭിക്ഖുനാ പടിബലേന സങ്ഘോ ഞാപേതബ്ബോ –

൩൭൦. ‘‘സുണാതു മേ, ഭന്തേ, സങ്ഘോ. അയം ഇത്ഥന്നാമോ ഭിക്ഖു മഹല്ലകം വിഹാരം കത്തുകാമോ സസ്സാമികം അത്തുദ്ദേസം. സോ സങ്ഘം വിഹാരവത്ഥുദേസനം യാചതി. യദി സങ്ഘസ്സ പത്തകല്ലം, സങ്ഘോ ഇത്ഥന്നാമസ്സ ഭിക്ഖുനോ വിഹാരവത്ഥും ദേസേയ്യ. ഏസാ ഞത്തി.

‘‘സുണാതു മേ, ഭന്തേ, സങ്ഘോ. അയം ഇത്ഥന്നാമോ ഭിക്ഖു മഹല്ലകം വിഹാരം കത്തുകാമോ സസ്സാമികം അത്തുദ്ദേസം. സോ സങ്ഘം വിഹാരവത്ഥുദേസനം യാചതി. സങ്ഘോ ഇത്ഥന്നാമസ്സ ഭിക്ഖുനോ വിഹാരവത്ഥും ദേസേതി. യസ്സായസ്മതോ ഖമതി ഇത്ഥന്നാമസ്സ ഭിക്ഖുനോ വിഹാരവത്ഥുസ്സ ദേസനാ, സോ തുണ്ഹസ്സ; യസ്സ നക്ഖമതി, സോ ഭാസേയ്യ.

‘‘ദേസിതം സങ്ഘേന ഇത്ഥന്നാമസ്സ ഭിക്ഖുനോ വിഹാരവത്ഥും. ഖമതി സങ്ഘസ്സ, തസ്മാ തുണ്ഹീ, ഏവമേതം ധാരയാമീ’’തി.

൩൭൧. സാരമ്ഭം നാമ കിപില്ലികാനം വാ ആസയോ ഹോതി, ഉപചികാനം വാ ആസയോ ഹോതി, ഉന്ദൂരാനം വാ…പേ… അഹീനം വാ വിച്ഛികാനം വാ സതപദീനം വാ ഹത്ഥീനം വാ അസ്സാനം വാ സീഹാനം വാ ബ്യഗ്ഘാനം വാ ദീപീനം വാ അച്ഛാനം വാ തരച്ഛാനം വാ ആസയോ ഹോതി, യേസം കേസഞ്ചി തിരച്ഛാനഗതാനം പാണാനം ആസയോ ഹോതി, പുബ്ബണ്ണനിസ്സിതം വാ ഹോതി, അപരണ്ണനിസ്സിതം വാ ഹോതി, അബ്ഭാഘാതനിസ്സിതം വാ ഹോതി, ആഘാതനനിസ്സിതം വാ ഹോതി, സുസാനനിസ്സിതം വാ ഹോതി, ഉയ്യാനനിസ്സിതം വാ ഹോതി, രാജവത്ഥുനിസ്സിതം വാ ഹോതി, ഹത്ഥിസാലാനിസ്സിതം വാ ഹോതി, അസ്സസാലാനിസ്സിതം വാ ഹോതി, ബന്ധനാഗാരനിസ്സിതം വാ ഹോതി, പാനാഗാരനിസ്സിതം വാ ഹോതി, സൂനനിസ്സിതം വാ ഹോതി, രച്ഛാനിസ്സിതം വാ ഹോതി, ചച്ചരനിസ്സിതം വാ ഹോതി, സഭാനിസ്സിതം വാ ഹോതി, സംസരണനിസ്സിതം വാ ഹോതി. ഏതം സാരമ്ഭം നാമ.

അപരിക്കമനം നാമ ന സക്കാ ഹോതി യഥായുത്തേന സകടേന അനുപരിഗന്തും, സമന്താ നിസ്സേണിയാ അനുപരിഗന്തും. ഏതം അപരിക്കമനം നാമ.

അനാരമ്ഭം നാമ ന കിപില്ലികാനം വാ ആസയോ ഹോതി…പേ… ന സംസരണനിസ്സിതം വാ ഹോതി. ഏതം അനാരമ്ഭം നാമ.

സപരിക്കമനം നാമ സക്കാ ഹോതി യഥായുത്തേന സകടേന അനുപരിഗന്തും, സമന്താ നിസ്സേണിയാ അനുപരിഗന്തും. ഏതം സപരിക്കമനം നാമ.

മഹല്ലകോ നാമ വിഹാരോ സസ്സാമികോ വുച്ചതി.

വിഹാരോ നാമ ഉല്ലിത്തോ വാ ഹോതി അവലിത്തോ വാ ഉല്ലിത്താവലിത്തോ വാ.

കാരേയ്യാതി കരോതി വാ കാരാപേതി വാ.

ഭിക്ഖൂ വാ അനഭിനേയ്യ വത്ഥുദേസനായാതി ഞത്തിദുതിയേന കമ്മേന വിഹാരവത്ഥും ന ദേസാപേത്വാ കരോതി വാ കാരാപേതി വാ, പയോഗേ ദുക്കടം. ഏകം പിണ്ഡം അനാഗതേ, ആപത്തി ഥുല്ലച്ചയസ്സ. തസ്മിം പിണ്ഡേ ആഗതേ, ആപത്തി സങ്ഘാദിസേസസ്സ.

സങ്ഘാദിസേസോതി…പേ… തേനപി വുച്ചതി – ‘സങ്ഘാദിസേസോ’തി.

൩൭൨. ഭിക്ഖു വിഹാരം കരോതി അദേസിതവത്ഥുകം സാരമ്ഭം അപരിക്കമനം, ആപത്തി സങ്ഘാദിസേസേന ദ്വിന്നം ദുക്കടാനം. ഭിക്ഖു വിഹാരം കരോതി അദേസിതവത്ഥുകം സാരമ്ഭം സപരിക്കമനം, ആപത്തി സങ്ഘാദിസേസേന ദുക്കടസ്സ. ഭിക്ഖു വിഹാരം കരോതി അദേസിതവത്ഥുകം അനാരമ്ഭം അപരിക്കമനം, ആപത്തി സങ്ഘാദിസേസേന ദുക്കടസ്സ. ഭിക്ഖു വിഹാരം കരോതി അദേസിതവത്ഥുകം അനാരമ്ഭം സപരിക്കമനം, ആപത്തി സങ്ഘാദിസേസസ്സ.

ഭിക്ഖു വിഹാരം കരോതി ദേസിതവത്ഥുകം സാരമ്ഭം അപരിക്കമനം, ആപത്തി ദ്വിന്നം ദുക്കടാനം. ഭിക്ഖു വിഹാരം കരോതി ദേസിതവത്ഥുകം സാരമ്ഭം സപരിക്കമനം, ആപത്തി ദുക്കടസ്സ. ഭിക്ഖു വിഹാരം കരോതി ദേസിതവത്ഥുകം അനാരമ്ഭം അപരിക്കമനം, ആപത്തി ദുക്കടസ്സ. ഭിക്ഖു വിഹാരം കരോതി ദേസിതവത്ഥുകം അനാരമ്ഭം സപരിക്കമനം, അനാപത്തി.

൩൭൩. ഭിക്ഖു സമാദിസതി – ‘‘വിഹാരം മേ കരോഥാ’’തി. തസ്സ വിഹാരം കരോന്തി അദേസിതവത്ഥുകം സാരമ്ഭം അപരിക്കമനം, ആപത്തി സങ്ഘാദിസേസേന ദ്വിന്നം ദുക്കടാനം…പേ… സാരമ്ഭം സപരിക്കമനം, ആപത്തി സങ്ഘാദിസേസേന ദുക്കടസ്സ…പേ… അനാരമ്ഭം അപരിക്കമനം, ആപത്തി സങ്ഘാദിസേസേന ദുക്കടസ്സ…പേ… അനാരമ്ഭം സപരിക്കമനം, ആപത്തി സങ്ഘാദിസേസസ്സ.

ഭിക്ഖു സമാദിസതി – ‘‘വിഹാരം മേ കരോഥാ’’തി. തസ്സ വിഹാരം കരോന്തി ദേസിതവത്ഥുകം സാരമ്ഭം അപരിക്കമനം, ആപത്തി ദ്വിന്നം ദുക്കടാനം…പേ… സാരമ്ഭം സപരിക്കമനം, ആപത്തി ദുക്കടസ്സ…പേ… അനാരമ്ഭം അപരിക്കമനം, ആപത്തി ദുക്കടസ്സ…പേ… അനാരമ്ഭം സപരിക്കമനം, അനാപത്തി.

൩൭൪. ഭിക്ഖു സമാദിസിത്വാ പക്കമതി – ‘‘വിഹാരം മേ കരോഥാ’’തി. ന ച സമാദിസതി – ‘‘ദേസിതവത്ഥുകോ ച ഹോതു അനാരമ്ഭോ ച സപരിക്കമനോ ചാ’’തി. തസ്സ വിഹാരം കരോന്തി അദേസിതവത്ഥുകം സാരമ്ഭം അപരിക്കമനം, ആപത്തി സങ്ഘാദിസേസേന ദ്വിന്നം ദുക്കടാനം…പേ… സാരമ്ഭം സപരിക്കമനം, ആപത്തി സങ്ഘാദിസേസേന ദുക്കടസ്സ…പേ… അനാരമ്ഭം അപരിക്കമനം, ആപത്തി സങ്ഘാദിസേസേന ദുക്കടസ്സ…പേ… അനാരമ്ഭം സപരിക്കമനം, ആപത്തി സങ്ഘാദിസേസസ്സ.

ഭിക്ഖു സമാദിസിത്വാ പക്കമതി – ‘‘വിഹാരം മേ കരോഥാ’’തി. ന ച സമാദിസതി – ‘‘ദേസിതവത്ഥുകോ ച ഹോതു അനാരമ്ഭോ ച സപരിക്കമനോ ചാ’’തി. തസ്സ വിഹാരം കരോന്തി ദേസിതവത്ഥുകം സാരമ്ഭം അപരിക്കമനം, ആപത്തി ദ്വിന്നം ദുക്കടാനം…പേ… സാരമ്ഭം സപരിക്കമനം, ആപത്തി ദുക്കടസ്സ…പേ… അനാരമ്ഭം അപരിക്കമനം, ആപത്തി ദുക്കടസ്സ…പേ… അനാരമ്ഭം സപരിക്കമനം, അനാപത്തി.

൩൭൫. ഭിക്ഖു സമാദിസിത്വാ പക്കമതി – ‘‘വിഹാരം മേ കരോഥാ’’തി. സമാദിസതി ച – ‘‘ദേസിതവത്ഥുകോ ച ഹോതു അനാരമ്ഭോ ച സപരിക്കമനോ ചാ’’തി. തസ്സ വിഹാരം കരോന്തി അദേസിതവത്ഥുകം സാരമ്ഭം അപരിക്കമനം. സോ സുണാതി – ‘‘വിഹാരോ കിര മേ കയിരതി അദേസിതവത്ഥുകോ സാരമ്ഭോ അപരിക്കമനോ’’തി. തേന ഭിക്ഖുനാ സാമം വാ ഗന്തബ്ബം ദൂതോ വാ പാഹേതബ്ബോ – ‘‘ദേസിതവത്ഥുകോ ച ഹോതു അനാരമ്ഭോ ച സപരിക്കമനോ ചാ’’തി …പേ… ‘‘ദേസിതവത്ഥുകോ ച ഹോതു അനാരമ്ഭോ ചാ’’തി…പേ… ‘‘ദേസിതവത്ഥുകോ ച ഹോതു സപരിക്കമനോ ചാ’’തി …പേ… ‘‘ദേസിതവത്ഥുകോ ഹോതൂ’’തി. നോ ചേ സാമം വാ ഗച്ഛേയ്യ ദൂതം വാ പഹിണേയ്യ, ആപത്തി ദുക്കടസ്സ.

ഭിക്ഖു സമാദിസിത്വാ പക്കമതി – ‘‘വിഹാരം മേ കരോഥാ’’തി. സമാദിസതി ച – ‘‘ദേസിതവത്ഥുകോ ച ഹോതു അനാരമ്ഭോ ച സപരിക്കമനോ ചാ’’തി. തസ്സ വിഹാരം കരോന്തി ദേസിതവത്ഥുകം സാരമ്ഭം അപരിക്കമനം. സോ സുണാതി – ‘‘വിഹാരോ കിര മേ കയിരതി ദേസിതവത്ഥുകോ സാരമ്ഭോ അപരിക്കമനോ’’തി. തേന ഭിക്ഖുനാ സാമം വാ ഗന്തബ്ബം ദൂതോ വാ പാഹേതബ്ബോ – ‘‘അനാരമ്ഭോ ച ഹോതു സപരിക്കമനോ ചാ’’തി…പേ… ‘‘അനാരമ്ഭോ ഹോതൂ’’തി ‘‘സപരിക്കമനോ ഹോതൂ’’തി, അനാപത്തി.

൩൭൬. ഭിക്ഖു സമാദിസിത്വാ പക്കമതി – ‘‘വിഹാരം മേ കരോഥാ’’തി. സമാദിസതി ച – ‘‘ദേസിതവത്ഥുകോ ച ഹോതു അനാരമ്ഭോ ച സപരിക്കമനോ ചാ’’തി. തസ്സ വിഹാരം കരോന്തി അദേസിതവത്ഥുകം സാരമ്ഭം അപരിക്കമനം, ആപത്തി കാരുകാനം തിണ്ണം ദുക്കടാനം…പേ… സാരമ്ഭം സപരിക്കമനം, ആപത്തി കാരുകാനം ദ്വിന്നം ദുക്കടാനം…പേ… അനാരമ്ഭം അപരിക്കമനം, ആപത്തി കാരുകാനം ദ്വിന്നം ദുക്കടാനം…പേ… അനാരമ്ഭം സപരിക്കമനം, ആപത്തി കാരുകാനം ദുക്കടസ്സ.

ഭിക്ഖു സമാദിസിത്വാ പക്കമതി – ‘‘വിഹാരം മേ കരോഥാ’’തി. സമാദിസതി ച – ‘‘ദേസിതവത്ഥുകോ ച ഹോതു അനാരമ്ഭോ ച സപരിക്കമനോ ചാ’’തി. തസ്സ വിഹാരം കരോന്തി ദേസിതവത്ഥുകം സാരമ്ഭം അപരിക്കമനം, ആപത്തി കാരുകാനം ദ്വിന്നം ദുക്കടാനം…പേ… സാരമ്ഭം സപരിക്കമനം, ആപത്തി കാരുകാനം ദുക്കടസ്സ…പേ… അനാരമ്ഭം അപരിക്കമനം, ആപത്തി കാരുകാനം ദുക്കടസ്സ…പേ… അനാരമ്ഭം സപരിക്കമനം, അനാപത്തി.

൩൭൭. ഭിക്ഖു സമാദിസിത്വാ പക്കമതി – ‘‘വിഹാരം മേ കരോഥാ’’തി. തസ്സ വിഹാരം കരോന്തി അദേസിതവത്ഥുകം സാരമ്ഭം അപരിക്കമനം. സോ ചേ വിപ്പകതേ ആഗച്ഛതി, തേന ഭിക്ഖുനാ സോ വിഹാരോ അഞ്ഞസ്സ വാ ദാതബ്ബോ ഭിന്ദിത്വാ വാ പുന കാതബ്ബോ. നോ ചേ അഞ്ഞസ്സ വാ ദദേയ്യ ഭിന്ദിത്വാ വാ പുന കാരേയ്യ, ആപത്തി സങ്ഘാദിസേസേന ദ്വിന്നം ദുക്കടാനം…പേ… സാരമ്ഭം സപരിക്കമനം, ആപത്തി സങ്ഘാദിസേസേന ദുക്കടസ്സ…പേ… അനാരമ്ഭം അപരിക്കമനം, ആപത്തി സങ്ഘാദിസേസേന ദുക്കടസ്സ…പേ… അനാരമ്ഭം സപരിക്കമനം, ആപത്തി സങ്ഘാദിസേസസ്സ.

ഭിക്ഖു സമാദിസിത്വാ പക്കമതി – ‘‘വിഹാരം മേ കരോഥാ’’തി. തസ്സ വിഹാരം കരോന്തി ദേസിതവത്ഥുകം സാരമ്ഭം അപരിക്കമനം. സോ ചേ വിപ്പകതേ ആഗച്ഛതി, തേന ഭിക്ഖുനാ സോ വിഹാരോ അഞ്ഞസ്സ വാ ദാതബ്ബോ ഭിന്ദിത്വാ വാ പുന കാതബ്ബോ. നോ ചേ അഞ്ഞസ്സ വാ ദദേയ്യ ഭിന്ദിത്വാ വാ പുന കാരേയ്യ, ആപത്തി ദ്വിന്നം ദുക്കടാനം…പേ… സാരമ്ഭം സപരിക്കമനം, ആപത്തി ദുക്കടസ്സ…പേ… അനാരമ്ഭം അപരിക്കമനം, ആപത്തി ദുക്കടസ്സ…പേ… അനാരമ്ഭം സപരിക്കമനം, അനാപത്തി.

൩൭൮. അത്തനാ വിപ്പകതം അത്തനാ പരിയോസാപേതി, ആപത്തി സങ്ഘാദിസേസസ്സ.

അത്തനാ വിപ്പകതം പരേഹി പരിയോസാപേതി, ആപത്തി സങ്ഘാദിസേസസ്സ.

പരേഹി വിപ്പകതം അത്തനാ പരിയോസാപേതി, ആപത്തി സങ്ഘാദിസേസസ്സ.

പരേഹി വിപ്പകതം പരേഹി പരിയോസാപേതി, ആപത്തി സങ്ഘാദിസേസസ്സ.

൩൭൯. അനാപത്തി ലേണേ ഗുഹായ തിണകുടികായ അഞ്ഞസ്സത്ഥായ വാസാഗാരം ഠപേത്വാ സബ്ബത്ഥ. അനാപത്തി ഉമ്മത്തകസ്സ, ആദികമ്മികസ്സാതി.

വിഹാരകാരസിക്ഖാപദം നിട്ഠിതം സത്തമം.