൬. കുടികാരസിക്ഖാപദം

൩൪൨. തേന സമയേന ബുദ്ധോ ഭഗവാ രാജഗഹേ വിഹരതി വേളുവനേ കലന്ദകനിവാപേ. തേന ഖോ പന സമയേന ആളവകാ ഭിക്ഖൂ സഞ്ഞാചികായോ കുടിയോ കാരാപേന്തി അസ്സാമികായോ അത്തുദ്ദേസികായോ അപ്പമാണികായോ. തായോ ന നിട്ഠാനം ഗച്ഛന്തി. തേ യാചനബഹുലാ വിഞ്ഞത്തിബഹുലാ വിഹരന്തി – ‘‘പുരിസം ദേഥ, പുരിസത്ഥകരം ദേഥ, ഗോണം ദേഥ, സകടം ദേഥ, വാസിം ദേഥ, പരസും ദേഥ, കുഠാരിം ദേഥ, കുദാലം ദേഥ, നിഖാദനം ദേഥ, വല്ലിം ദേഥ, വേളും ദേഥ, മുഞ്ജം ദേഥ, പബ്ബജം ദേഥ, തിണം ദേഥ, മത്തികം ദേഥാ’’തി. മനുസ്സാ ഉപദ്ദുതാ യാചനായ ഉപദ്ദുതാ വിഞ്ഞത്തിയാ ഭിക്ഖൂ ദിസ്വാ ഉബ്ബിജ്ജന്തിപി ഉത്തസന്തിപി പലായന്തിപി അഞ്ഞേനപി ഗച്ഛന്തി അഞ്ഞേനപി മുഖം കരോന്തി ദ്വാരമ്പി ഥകേന്തി, ഗാവിമ്പി ദിസ്വാ പലായന്തി ഭിക്ഖൂതി മഞ്ഞമാനാ.

അഥ ഖോ ആയസ്മാ മഹാകസ്സപോ രാജഗഹേ വസ്സംവുട്ഠോ യേന ആളവീ തേന പക്കാമി. അനുപുബ്ബേന യേന ആളവീ തദവസരി. തത്ര സുദം ആയസ്മാ മഹാകസ്സപോ ആളവിയം വിഹരതി അഗ്ഗാളവേ ചേതിയേ. അഥ ഖോ ആയസ്മാ മഹാകസ്സപോ പുബ്ബണ്ഹസമയം നിവാസേത്വാ പത്തചീവരമാദായ ആളവിം പിണ്ഡായ പാവിസി. മനുസ്സാ ആയസ്മന്തം മഹാകസ്സപം പസ്സിത്വാ ഉബ്ബിജ്ജന്തിപി ഉത്തസന്തിപി പലായന്തിപി അഞ്ഞേനപി ഗച്ഛന്തി അഞ്ഞേനപി മുഖം കരോന്തി ദ്വാരമ്പി ഥകേന്തി. അഥ ഖോ ആയസ്മാ മഹാകസ്സപോ ആളവിയം പിണ്ഡായ ചരിത്വാ പച്ഛാഭത്തം പിണ്ഡപാതപ്പടിക്കന്തോ ഭിക്ഖൂ ആമന്തേസി – ‘‘പുബ്ബായം, ആവുസോ, ആളവീ സുഭിക്ഖാ അഹോസി സുലഭപിണ്ഡാ സുകരാ ഉഞ്ഛേന പഗ്ഗഹേന യാപേതും; ഏതരഹി പനായം ആളവീ ദുബ്ഭിക്ഖാ ദുല്ലഭപിണ്ഡാ, ന സുകരാ ഉഞ്ഛേന പഗ്ഗഹേന യാപേതും. കോ നു ഖോ, ആവുസോ, ഹേതു കോ പച്ചയോ, യേനായം ആളവീ ദുബ്ഭിക്ഖാ ദുല്ലഭപിണ്ഡാ, ന സുകരാ ഉഞ്ഛേന പഗ്ഗഹേന യാപേതു’’ന്തി? അഥ ഖോ തേ ഭിക്ഖൂ ആയസ്മതോ മഹാകസ്സപസ്സ ഏതമത്ഥം ആരോചേസും.

൩൪൩. അഥ ഖോ ഭഗവാ രാജഗഹേ യഥാഭിരന്തം വിഹരിത്വാ യേന ആളവീ തേന ചാരികം പക്കാമി. അനുപുബ്ബേന ചാരികം ചരമാനോ യേന ആളവീ തദവസരി. തത്ര സുദം ഭഗവാ ആളവിയം വിഹരതി അഗ്ഗാളവേ ചേതിയേ. അഥ ഖോ ആയസ്മാ മഹാകസ്സപോ യേന ഭഗവാ തേനുപസങ്കമി; ഉപസങ്കമിത്വാ ഭഗവന്തം അഭിവാദേത്വാ ഏകമന്തം നിസീദി. ഏകമന്തം നിസിന്നോ ഖോ ആയസ്മാ മഹാകസ്സപോ ഭഗവതോ ഏതമത്ഥം ആരോചേസി. അഥ ഖോ ഭഗവാ ഏതസ്മിം നിദാനേ ഏതസ്മിം പകരണേ ഭിക്ഖുസങ്ഘം സന്നിപാതാപേത്വാ ആളവകേ ഭിക്ഖൂ പടിപുച്ഛി – ‘‘സച്ചം കിര തുമ്ഹേ, ഭിക്ഖവേ, സഞ്ഞാചികായോ കുടിയോ കാരാപേഥ അസ്സാമികായോ അത്തുദ്ദേസികായോ അപ്പമാണികായോ. തായോ ന നിട്ഠാനം ഗച്ഛന്തി. തേ തുമ്ഹേ യാചനബഹുലാ വിഞ്ഞത്തിബഹുലാ വിഹരഥ – ‘പുരിസം ദേഥ പുരിസത്ഥകരം ദേഥ…പേ… തിണം ദേഥ മത്തികം ദേഥാ’തി. മനുസ്സാ ഉപദ്ദുതാ യാചനായ ഉപദ്ദുതാ വിഞ്ഞത്തിയാ ഭിക്ഖൂ ദിസ്വാ ഉബ്ബിജ്ജന്തിപി ഉത്തസന്തിപി പലായന്തിപി അഞ്ഞേനപി ഗച്ഛന്തി അഞ്ഞേനപി മുഖം കരോന്തി ദ്വാരമ്പി ഥകേന്തി, ഗാവിമ്പി ദിസ്വാ പലായന്തി ഭിക്ഖൂതി മഞ്ഞമാനാ’’തി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… ‘‘കഥഞ്ഹി നാമ തുമ്ഹേ, മോഘപുരിസാ, സംയാചികായോ കുടിയോ കാരാപേസ്സഥ അസ്സാമികായോ അത്തുദ്ദേസികായോ അപ്പമാണികായോ! തായോ ന നിട്ഠാനം ഗച്ഛന്തി. തേ തുമ്ഹേ യാചനബഹുലാ വിഞ്ഞത്തിബഹുലാ വിഹരിസ്സഥ – ‘പുരിസം ദേഥ പുരിസത്ഥകരം ദേഥ…പേ… തിണം ദേഥ മത്തികം ദേഥാ’തി! നേതം മോഘപുരിസാ, അപ്പസന്നാനം വാ പസാദായ…പേ…’’ വിഗരഹിത്വാ ധമ്മിം കഥം കത്വാ ഭിക്ഖൂ ആമന്തേസി –

൩൪൪. ‘‘ഭൂതപുബ്ബം, ഭിക്ഖവേ, ദ്വേ ഭാതരോ ഇസയോ ഗങ്ഗം നദിം ഉപനിസ്സായ വിഹരിംസു. അഥ ഖോ, ഭിക്ഖവേ, മണികണ്ഠോ നാഗരാജാ ഗങ്ഗം നദിം ഉത്തരിത്വാ യേന കനിട്ഠോ ഇസി തേനുപസങ്കമി; ഉപസങ്കമിത്വാ കനിട്ഠം ഇസിം സത്തക്ഖത്തും ഭോഗേഹി പരിക്ഖിപിത്വാ ഉപരിമുദ്ധനി മഹന്തം ഫണം കരിത്വാ അട്ഠാസി. അഥ ഖോ, ഭിക്ഖവേ, കനിട്ഠോ ഇസി തസ്സ നാഗസ്സ ഭയാ കിസോ അഹോസി ലൂഖോ ദുബ്ബണ്ണോ ഉപ്പണ്ഡുപ്പണ്ഡുകജാതോ ധമനിസന്ഥതഗത്തോ. അദ്ദസ ഖോ, ഭിക്ഖവേ, ജേട്ഠോ ഇസി കനിട്ഠം ഇസിം കിസം ലൂഖം ദുബ്ബണ്ണം ഉപ്പണ്ഡുപ്പണ്ഡുകജാതം ധമനിസന്ഥതഗത്തം. ദിസ്വാന കനിട്ഠം ഇസിം ഏതദവോച – ‘‘കിസ്സ ത്വം, ഭോ, കിസോ ലൂഖോ ദുബ്ബണ്ണോ ഉപ്പണ്ഡുപ്പണ്ഡുകജാതോ ധമനിസന്ഥതഗത്തോ’’തി? ‘‘ഇധ, ഭോ, മണികണ്ഠോ നാഗരാജാ ഗങ്ഗം നദിം ഉത്തരിത്വാ യേനാഹം തേനുപസങ്കമി; ഉപസങ്കമിത്വാ മം സത്തക്ഖത്തും ഭോഗേഹി പരിക്ഖിപിത്വാ ഉപരിമുദ്ധനി മഹന്തം ഫണം കരിത്വാ അട്ഠാസി. തസ്സാഹം, ഭോ, നാഗസ്സ ഭയാ [ഭയാമ്ഹി (സീ.)] കിസോ ലൂഖോ ദുബ്ബണ്ണോ ഉപ്പണ്ഡുപ്പണ്ഡുകജാതോ ധമനിസന്ഥതഗത്തോ’’തി. ‘‘ഇച്ഛസി പന ത്വം, ഭോ, തസ്സ നാഗസ്സ അനാഗമന’’ന്തി? ‘‘ഇച്ഛാമഹം, ഭോ, തസ്സ നാഗസ്സ അനാഗമന’’ന്തി. ‘‘അപി പന ത്വം, ഭോ, തസ്സ നാഗസ്സ കിഞ്ചി പസ്സസീ’’തി? ‘‘പസ്സാമഹം, ഭോ, മണിമസ്സ [മണിസ്സ (സീ. ക.)] കണ്ഠേ പിലന്ധന’’ന്തി. ‘‘തേന ഹി ത്വം, ഭോ, തം നാഗം മണിം യാച – ‘മണിം മേ, ഭോ, ദേഹി; മണിനാ മേ അത്ഥോ’’’തി.

അഥ ഖോ, ഭിക്ഖവേ, മണികണ്ഠോ നാഗരാജാ ഗങ്ഗം നദിം ഉത്തരിത്വാ യേന കനിട്ഠോ ഇസി തേനുപസങ്കമി; ഉപസങ്കമിത്വാ ഏകമന്തം അട്ഠാസി. ഏകമന്തം ഠിതം ഖോ, ഭിക്ഖവേ, മണികണ്ഠം നാഗരാജാനം കനിട്ഠോ ഇസി ഏതദവോച – ‘‘മണിം മേ, ഭോ, ദേഹി; മണിനാ മേ അത്ഥോ’’തി. അഥ ഖോ, ഭിക്ഖവേ, മണികണ്ഠോ നാഗരാജാ – ‘ഭിക്ഖു മണിം യാചതി, ഭിക്ഖുസ്സ മണിനാ അത്ഥോ’തി ഖിപ്പഞ്ഞേവ അഗമാസി. ദുതിയമ്പി ഖോ, ഭിക്ഖവേ, മണികണ്ഠോ നാഗരാജാ ഗങ്ഗം നദിം ഉത്തരിത്വാ യേന കനിട്ഠോ ഇസി തേനുപസങ്കമി. അദ്ദസ ഖോ, ഭിക്ഖവേ, കനിട്ഠോ ഇസി മണികണ്ഠം നാഗരാജാനം ദൂരതോവ ആഗച്ഛന്തം. ദിസ്വാന മണികണ്ഠം നാഗരാജാനം ഏതദവോച – ‘‘മണിം മേ, ഭോ, ദേഹി; മണിനാ മേ അത്ഥോ’’തി. അഥ ഖോ, ഭിക്ഖവേ, മണികണ്ഠോ നാഗരാജാ – ‘‘ഭിക്ഖു മണിം യാചതി, ഭിക്ഖുസ്സ മണിനാ അത്ഥോ’’തി തതോവ പടിനിവത്തി. തതിയമ്പി ഖോ, ഭിക്ഖവേ, മണികണ്ഠോ നാഗരാജാ ഗങ്ഗം നദിം ഉത്തരതി. അദ്ദസ ഖോ, ഭിക്ഖവേ, കനിട്ഠോ ഇസി മണികണ്ഠം നാഗരാജാനം ഗങ്ഗം നദിം ഉത്തരന്തം. ദിസ്വാന മണികണ്ഠം നാഗരാജാനം ഏതദവോച – ‘‘മണിം മേ, ഭോ, ദേഹി; മണിനാ മേ അത്ഥോ’’തി. അഥ ഖോ, ഭിക്ഖവേ, മണികണ്ഠോ നാഗരാജാ കനിട്ഠം ഇസിം ഗാഥാഹി അജ്ഝഭാസി –

[ജാ. ൧.൩.൭ മണികണ്ഠജാതകേപി] ‘‘മമന്നപാനം വിപുലം ഉളാരം,

ഉപ്പജ്ജതീമസ്സ മണിസ്സ ഹേതു;

തം തേ ന ദസ്സം അതിയാചകോസി;

ന ചാപി തേ അസ്സമമാഗമിസ്സം.

[ജാ. ൧.൩.൮ മണികണ്ഠജാതകേപി] ‘‘സുസൂ യഥാ സക്ഖരധോതപാണീ;

താസേസി മം സേലമായാചമാനോ;

തം തേ ന ദസ്സം അതിയാചകോസി;

ന ചാപി തേ അസ്സമമാഗമിസ്സ’’ന്തി.

അഥ ഖോ, ഭിക്ഖവേ, മണികണ്ഠോ നാഗരാജാ – ‘‘ഭിക്ഖു മണിം യാചതി, ഭിക്ഖുസ്സ മണിനാ അത്ഥോ’’തി പക്കാമി. തഥാ പക്കന്തോവ [തദാപക്കന്തോവ (ക.)] അഹോസി, ന പുന പച്ചാഗഞ്ഛി. അഥ ഖോ, ഭിക്ഖവേ, കനിട്ഠോ ഇസി തസ്സ നാഗസ്സ ദസ്സനീയസ്സ അദസ്സനേന ഭിയ്യോസോമത്തായ കിസോ അഹോസി ലൂഖോ ദുബ്ബണ്ണോ, ഉപ്പണ്ഡുപ്പണ്ഡുകജാതോ ധമനിസന്ഥതഗത്തോ. അദ്ദസ ഖോ, ഭിക്ഖവേ, ജേട്ഠോ ഇസി കനിട്ഠം ഇസിം ഭിയ്യോസോമത്തായ കിസം ലൂഖം ദുബ്ബണ്ണം ഉപ്പണ്ഡുപ്പണ്ഡുകജാതം ധമനിസന്ഥതഗത്തം. ദിസ്വാന കനിട്ഠം ഇസിം ഏതദവോച – ‘‘കിസ്സ ത്വം, ഭോ, ഭിയ്യോസോമത്തായ കിസോ ലൂഖോ ദുബ്ബണ്ണോ ഉപ്പണ്ഡുപ്പണ്ഡുകജാതോ ധമനിസന്ഥതഗത്തോ’’തി? ‘‘തസ്സാഹം, ഭോ, നാഗസ്സ ദസ്സനീയസ്സ അദസ്സനേന ഭിയ്യോസോമത്തായ കിസോ ലൂഖോ ദുബ്ബണ്ണോ ഉപ്പണ്ഡുപ്പണ്ഡുകജാതോ ധമനിസന്ഥതഗത്തോ’’തി. അഥ ഖോ, ഭിക്ഖവേ, ജേട്ഠോ ഇസി കനിട്ഠം ഇസിം ഗാഥായ അജ്ഝഭാസി –

[ജാ. ൧.൩.൯ മണികണ്ഠജാതകേപി] ‘‘ന തം യാചേ യസ്സ പിയം ജിഗീസേ,

വിദേസ്സോ [ദേസ്സോ (സീ.), ദേസ്സോ ച (സ്യാ.)] ഹോതി അതിയാചനായ;

നാഗോ മണിം യാചിതോ ബ്രാഹ്മണേന;

അദസ്സനഞ്ഞേവ തദജ്ഝഗമാ’’തി.

തേസഞ്ഹി നാമ, ഭിക്ഖവേ, തിരച്ഛാനഗതാനം പാണാനം അമനാപാ ഭവിസ്സതി യാചനാ അമനാപാ വിഞ്ഞത്തി. കിമങ്ഗം [കിമങ്ഗ (സീ.)] പന മനുസ്സഭൂതാനം!

൩൪൫. ‘‘ഭൂതപുബ്ബം, ഭിക്ഖവേ, അഞ്ഞതരോ ഭിക്ഖു ഹിമവന്തപസ്സേ വിഹരതി അഞ്ഞതരസ്മിം വനസണ്ഡേ. തസ്സ ഖോ, ഭിക്ഖവേ, വനസണ്ഡസ്സ അവിദൂരേ മഹന്തം നിന്നം പല്ലലം. അഥ ഖോ,

വാസായ ഉപഗച്ഛതി. അഥ ഖോ, ഭിക്ഖവേ, സോ ഭിക്ഖു തസ്സ സകുണസങ്ഘസ്സ സദ്ദേന ഉബ്ബാള്ഹോ യേനാഹം തേനുപസങ്കമി; ഉപസങ്കമിത്വാ മം അഭിവാദേത്വാ ഏകമന്തം നിസീദി. ഏകമന്തം നിസിന്നം ഖോ അഹം, ഭിക്ഖവേ, തം ഭിക്ഖും ഏതദവോച – ‘കച്ചി, ഭിക്ഖു, ഖമനീയം കച്ചി യാപനീയം കച്ചിസി അപ്പകിലമഥേന അദ്ധാനം ആഗതോ? കുതോ ച ത്വം, ഭിക്ഖു, ആഗച്ഛസീ’തി? ‘ഖമനീയം, ഭഗവാ, യാപനീയം, ഭഗവാ. അപ്പകിലമഥേന ചാഹം, ഭന്തേ, അദ്ധാനം ആഗതോ. അത്ഥി, ഭന്തേ, ഹിമവന്തപസ്സേ മഹാവനസണ്ഡോ. തസ്സ ഖോ പന, ഭന്തേ, വനസണ്ഡസ്സ അവിദൂരേ മഹന്തം നിന്നം പല്ലലം. അഥ ഖോ, ഭന്തേ, മഹാസകുണസങ്ഘോ തസ്മിം പല്ലലേ ദിവസം ഗോചരം ചരിത്വാ സായം തം വനസണ്ഡം വാസായ ഉപഗച്ഛതി. തതോ അഹം, ഭഗവാ, ആഗച്ഛാമി – തസ്സ സകുണസങ്ഘസ്സ സദ്ദേന ഉബ്ബാള്ഹോ’തി. ‘ഇച്ഛസി പന ത്വം, ഭിക്ഖു, തസ്സ സകുണസങ്ഘസ്സ അനാഗമന’ന്തി? ‘ഇച്ഛാമഹം, ഭഗവാ, തസ്സ സകുണസങ്ഘസ്സ അനാഗമന’ന്തി. ‘തേന ഹി ത്വം, ഭിക്ഖു, തത്ഥ ഗന്ത്വാ തം വനസണ്ഡം അജ്ഝോഗാഹേത്വാ രത്തിയാ പഠമം യാമം തിക്ഖത്തും സദ്ദമനുസ്സാവേഹി – സുണന്തു മേ, ഭോന്തോ സകുണാ, യാവതികാ ഇമസ്മിം വനസണ്ഡേ വാസം ഉപഗതാ, പത്തേന മേ അത്ഥോ. ഏകേകം മേ, ഭോന്തോ, പത്തം ദദന്തൂ’തി. രത്തിയാ മജ്ഝിമം യാമം… രത്തിയാ പച്ഛിമം യാമം തിക്ഖത്തും സദ്ദമനുസ്സാവേഹി – ‘സുണന്തു മേ, ഭോന്തോ സകുണാ, യാവതികാ ഇമസ്മിം വനസണ്ഡേ വാസം ഉപഗതാ, പത്തേന മേ അത്ഥോ. ഏകേകം മേ, ഭോന്തോ, പത്തം ദദന്തൂ’തി.

‘‘അഥ ഖോ, ഭിക്ഖവേ, സോ ഭിക്ഖു തത്ഥ ഗന്ത്വാ തം വനസണ്ഡം അജ്ഝോഗാഹേത്വാ രത്തിയാ പഠമം യാമം തിക്ഖത്തും സദ്ദമനുസ്സാവേസി – ‘സുണന്തു മേ, ഭോന്തോ സകുണാ, യാവതികാ ഇമസ്മിം വനസണ്ഡേ വാസം ഉപഗതാ, പത്തേന മേ അത്ഥോ. ഏകേകം മേ, ഭോന്തോ, പത്തം ദദന്തൂ’തി. രത്തിയാ മജ്ഝിമ യാമം… രത്തിയാ പച്ഛിമം യാമം തിക്ഖത്തും സദ്ദമനുസ്സാവേസി – ‘സുണന്തു മേ, ഭോന്തോ സകുണാ, യാവതികാ ഇമസ്മിം വനസണ്ഡേ വാസം ഉപഗതാ, പത്തേന മേ അത്ഥോ. ഏകേകം മേ, ഭോന്തോ, പത്തം ദദന്തൂ’തി. അഥ ഖോ, ഭിക്ഖവേ, സോ സകുണസങ്ഘോ – ‘ഭിക്ഖു പത്തം യാചതി ഭിക്ഖുസ്സ പത്തേന അത്ഥോ’തി തമ്ഹാ വനസണ്ഡാ പക്കാമി. തഥാ പക്കന്തോവ അഹോസി ന പുന പച്ചാഗഞ്ഛി. തേസഞ്ഹി നാമ, ഭിക്ഖവേ, തിരച്ഛാനഗതാനം പാണാനം അമനാപാ ഭവിസ്സതി യാചനാ അമനാപാ വിഞ്ഞത്തി. കിമങ്ഗം പന മനുസ്സഭൂതാനം’’!

൩൪൬. ‘‘ഭൂതപുബ്ബം, ഭിക്ഖവേ, രട്ഠപാലസ്സ കുലപുത്തസ്സ പിതാ രട്ഠപാലം കുലപുത്തം ഗാഥായ അജ്ഝഭാസി –

‘അപാഹം തേ ന ജാനാമി, രട്ഠപാല ബഹൂ ജനാ;

[ജാ. ൧.൭.൫൪] തേ മം സങ്ഗമ്മ യാചന്തി, കസ്മാ മം ത്വം ന യാചസീ’തി.

[ജാ. ൧.൭.൫൫] ‘യാചകോ അപ്പിയോ ഹോതി, യാചം അദദമപ്പിയോ;

തസ്മാഹം തം ന യാചാമി, മാ മേ വിദേസ്സനാ അഹൂ’തി.

‘‘സോ ഹി നാമ, ഭിക്ഖവേ, രട്ഠപാലോ കുലപുത്തോ സകം പിതരം ഏവം വക്ഖതി. കിമങ്ഗം പന ജനോ ജനം!

൩൪൭. ‘‘ഗിഹീനം, ഭിക്ഖവേ, ദുസ്സംഹരാനി ഭോഗാനി സമ്ഭതാനിപി ദുരക്ഖിയാനി. തത്ഥ നാമ തുമ്ഹേ, മോഘപുരിസാ, ഏവം ദുസ്സംഹരേസു ഭോഗേസു സമ്ഭതേസുപി ദുരക്ഖിയേസു യാചനബഹുലാ വിഞ്ഞത്തിബഹുലാ വിഹരിസ്സഥ – ‘പുരിസം ദേഥ, പുരിസത്ഥകരം ദേഥ, ഗോണം ദേഥ, സകടം ദേഥ, വാസിം ദേഥ, പരസും ദേഥ, കുഠാരിം ദേഥ, കുദാലം ദേഥ, നിഖാദനം ദേഥ, വല്ലിം ദേഥ, വേളും ദേഥ, മുഞ്ജം ദേഥ, പബ്ബജം ദേഥ, തിണം ദേഥ, മത്തികം ദേഥാ’’തി! നേതം, മോഘപുരിസാ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഇമം സിക്ഖാപദം ഉദ്ദിസേയ്യാഥ –

൩൪൮. ‘‘സഞ്ഞാചികായ പന ഭിക്ഖുനാ കുടിം കാരയമാനേന അസ്സാമികം അത്തുദ്ദേസം പമാണികാ കാരേതബ്ബാ. തത്രിദം പമാണം – ദീഘസോ ദ്വാദസ വിദത്ഥിയോ, സുഗതവിദത്ഥിയാ; തിരിയം സത്തന്തരാ. ഭിക്ഖൂ അഭിനേതബ്ബാ വത്ഥുദേസനായ. തേഹി ഭിക്ഖൂഹി വത്ഥു ദേസേതബ്ബം – അനാരമ്ഭം [അനാരബ്ഭം (ക.)] സപരിക്കമനം. സാരമ്ഭേ [സാരബ്ഭേ (ക.)] ചേ ഭിക്ഖു വത്ഥുസ്മിം അപരിക്കമനേ സഞ്ഞാചികായ കുടിം കാരേയ്യ, ഭിക്ഖൂ വാ അനഭിനേയ്യ വത്ഥുദേസനായ, പമാണം വാ അതിക്കാമേയ്യ, സങ്ഘാദിസേസോ’’തി.

൩൪൯. സഞ്ഞാചികാ നാമ സയം യാചിത്വാ പുരിസമ്പി പുരിസത്ഥകരമ്പി ഗോണമ്പി സകടമ്പി വാസിമ്പി പരസുമ്പി കുഠാരിമ്പി കുദാലമ്പി നിഖാദനമ്പി വല്ലിമ്പി വേളുമ്പി മുഞ്ജമ്പി പബ്ബജമ്പി തിണമ്പി മത്തികമ്പി.

കുടി നാമ ഉല്ലിത്താ വാ ഹോതി അവലിത്താ വാ ഉല്ലിത്താവലിത്താ വാ.

കാരയമാനേനാതി കരോന്തോ വാ കാരാപേന്തോ വാ.

അസ്സാമികന്തി ന അഞ്ഞോ കോചി സാമികോ ഹോതി, ഇത്ഥീ വാ പുരിസോ വാ ഗഹട്ഠോ വാ പബ്ബജിതോ വാ.

അത്തുദ്ദേസന്തി അത്തനോ അത്ഥായ.

പമാണികാ കാരേതബ്ബാ. തത്രിദം പമാണം – ദീഘസോ ദ്വാദസ വിദത്ഥിയോ, സുഗതവിദത്ഥിയാതി ബാഹിരിമേന മാനേന.

തിരിയം സത്തന്തരാതി അബ്ഭന്തരിമേന മാനേന.

ഭിക്ഖൂ അഭിനേതബ്ബാ വത്ഥുദേസനായാതി തേന കുടികാരകേന ഭിക്ഖുനാ കുടിവത്ഥും സോധേത്വാ സങ്ഘം ഉപസങ്കമിത്വാ ഏകംസം ഉത്തരാസങ്ഗം കരിത്വാ വുഡ്ഢാനം ഭിക്ഖൂനം പാദേ വന്ദിത്വാ ഉക്കുടികം നിസീദിത്വാ അഞ്ജലിം പഗ്ഗഹേത്വാ ഏവമസ്സ വചനീയോ – ‘‘അഹം, ഭന്തേ, സഞ്ഞാചികായ കുടിം കത്തുകാമോ അസ്സാമികം അത്തുദ്ദേസം. സോഹം, ഭന്തേ, സങ്ഘം കുടിവത്ഥുഓലോകനം യാചാമീ’’തി. ദുതിയമ്പി യാചിതബ്ബാ. തതിയമ്പി യാചിതബ്ബാ. സചേ സബ്ബോ സങ്ഘോ ഉസ്സഹതി കുടിവത്ഥും ഓലോകേതും, സബ്ബേന സങ്ഘേന ഓലോകേതബ്ബം. നോ ചേ സബ്ബോ സങ്ഘോ ഉസ്സഹതി കുടിവത്ഥും ഓലോകേതും, യേ തത്ഥ ഹോന്തി ഭിക്ഖൂ ബ്യത്താ പടിബലാ സാരമ്ഭം അനാരമ്ഭം സപരിക്കമനം അപരിക്കമനം ജാനിതും തേ യാചിത്വാ സമ്മന്നിതബ്ബാ. ഏവഞ്ച പന, ഭിക്ഖവേ, സമ്മന്നിതബ്ബാ. ബ്യത്തേന ഭിക്ഖുനാ പടിബലേന സങ്ഘോ ഞാപേതബ്ബോ –

൩൫൦. ‘‘സുണാതു മേ, ഭന്തേ, സങ്ഘോ. അയം ഇത്ഥന്നാമോ ഭിക്ഖു സഞ്ഞാചികായ കുടിം കത്തുകാമോ അസ്സാമികം അത്തുദ്ദേസം. സോ സങ്ഘം കുടിവത്ഥുഓലോകനം യാചതി. യദി സങ്ഘസ്സ പത്തകല്ലം, സങ്ഘോ ഇത്ഥന്നാമഞ്ച ഇത്ഥന്നാമഞ്ച ഭിക്ഖൂ സമ്മന്നേയ്യ ഇത്ഥന്നാമസ്സ ഭിക്ഖുനോ കുടിവത്ഥും ഓലോകേതും. ഏസാ ഞത്തി.

‘‘സുണാതു മേ, ഭന്തേ, സങ്ഘോ. അയം ഇത്ഥന്നാമോ ഭിക്ഖു സഞ്ഞാചികായ കുടിം കത്തുകാമോ അസ്സാമികം അത്തുദ്ദേസം. സോ സങ്ഘം കുടിവത്ഥുഓലോകനം യാചതി. സങ്ഘോ ഇത്ഥന്നാമഞ്ച ഇത്ഥന്നാമഞ്ച ഭിക്ഖൂ സമ്മന്നതി ഇത്ഥന്നാമസ്സ ഭിക്ഖുനോ കുടിവത്ഥും ഓലോകേതും. യസ്സായസ്മതോ ഖമതി ഇത്ഥന്നാമസ്സ ച ഇത്ഥന്നാമസ്സ ച ഭിക്ഖൂനം സമ്മുതി [സമ്മതി (സ്യാ.)] ഇത്ഥന്നാമസ്സ ഭിക്ഖുനോ കുടിവത്ഥും ഓലോകേതും, സോ തുണ്ഹസ്സ; യസ്സ നക്ഖമതി, സോ ഭാസേയ്യ.

‘‘സമ്മതാ സങ്ഘേന ഇത്ഥന്നാമോ ച ഇത്ഥന്നാമോ ച ഭിക്ഖൂ ഇത്ഥന്നാമസ്സ ഭിക്ഖുനോ കുടിവത്ഥും ഓലോകേതും. ഖമതി സങ്ഘസ്സ, തസ്മാ തുണ്ഹീ, ഏവമേതം ധാരയാമീ’’തി.

൩൫൧. തേഹി സമ്മതേഹി ഭിക്ഖൂഹി തത്ഥ ഗന്ത്വാ കുടിവത്ഥു ഓലോകേതബ്ബം, സാരമ്ഭം അനാരമ്ഭം സപരിക്കമനം അപരിക്കമനം ജാനിതബ്ബം. സചേ സാരമ്ഭം ഹോതി അപരിക്കമനം, ‘മാ ഇധ കരീ’തി വത്തബ്ബോ. സചേ അനാരമ്ഭം ഹോതി സപരിക്കമനം, സങ്ഘസ്സ ആരോചേതബ്ബം – ‘അനാരമ്ഭം സപരിക്കമന’ന്തി. തേന കുടികാരകേന ഭിക്ഖുനാ സങ്ഘം ഉപസങ്കമിത്വാ ഏകംസം ഉത്തരാസങ്ഗം കരിത്വാ വുഡ്ഢാനം ഭിക്ഖൂനം പാദേ വന്ദിത്വാ ഉക്കുടികം നിസീദിത്വാ അഞ്ജലിം പഗ്ഗഹേത്വാ ഏവമസ്സ വചനീയോ – ‘‘അഹം, ഭന്തേ, സഞ്ഞാചികായ കുടിം കത്തുകാമോ അസ്സാമികം അത്തുദ്ദേസം. സോഹം, ഭന്തേ, സങ്ഘം കുടിവത്ഥുദേസനം യാചാമീ’’തി. ദുതിയമ്പി യാചിതബ്ബാ. തതിയമ്പി യാചിതബ്ബാ. ബ്യത്തേന ഭിക്ഖുനാ പടിബലേന സങ്ഘോ ഞാപേതബ്ബോ –

൩൫൨. ‘‘സുണാതു മേ, ഭന്തേ, സങ്ഘോ. അയം ഇത്ഥന്നാമോ ഭിക്ഖു സഞ്ഞാചികായ കുടിം കത്തുകാമോ അസ്സാമികം അത്തുദ്ദേസം. സോ സങ്ഘം കുടിവത്ഥുദേസനം യാചതി. യദി സങ്ഘസ്സ പത്തകല്ലം, സങ്ഘോ ഇത്ഥന്നാമസ്സ ഭിക്ഖുനോ കുടിവത്ഥും ദേസേയ്യ. ഏസാ ഞത്തി.

‘‘സുണാതു മേ, ഭന്തേ, സങ്ഘോ. അയം ഇത്ഥന്നാമോ ഭിക്ഖു സഞ്ഞാചികായ കുടിം കത്തുകാമോ അസ്സാമികം അത്തുദ്ദേസം. സോ സങ്ഘം കുടിവത്ഥുദേസനം യാചതി. സങ്ഘോ ഇത്ഥന്നാമസ്സ ഭിക്ഖുനോ കുടിവത്ഥും ദേസേതി. യസ്സായസ്മതോ ഖമതി ഇത്ഥന്നാമസ്സ ഭിക്ഖുനോ കുടിവത്ഥുസ്സ ദേസനാ, സോ തുണ്ഹസ്സ; യസ്സ നക്ഖമതി, സോ ഭാസേയ്യ.

‘‘ദേസിതം സങ്ഘേന ഇത്ഥന്നാമസ്സ ഭിക്ഖുനോ കുടിവത്ഥു. ഖമതി സങ്ഘസ്സ, തസ്മാ തുണ്ഹീ, ഏവമേതം ധാരയാമീ’’തി.

൩൫൩. സാരമ്ഭം നാമ കിപില്ലികാനം വാ ആസയോ ഹോതി, ഉപചികാനം വാ ആസയോ ഹോതി, ഉന്ദുരാനം വാ ആസയോ ഹോതി, അഹീനം വാ ആസയോ ഹോതി, വിച്ഛികാനം വാ ആസയോ ഹോതി, സതപദീനം വാ ആസയോ ഹോതി, ഹത്ഥീനം വാ ആസയോ ഹോതി, അസ്സാനം വാ ആസയോ ഹോതി, സീഹാനം വാ ആസയോ ഹോതി, ബ്യഗ്ഘാനം വാ ആസയോ ഹോതി, ദീപീനം വാ ആസയോ ഹോതി, അച്ഛാനം വാ ആസയോ ഹോതി, തരച്ഛാനം വാ ആസയോ ഹോതി, യേസം കേസഞ്ചി തിരച്ഛാനഗതാനം പാണാനം ആസയോ ഹോതി, പുബ്ബണ്ണനിസ്സിതം വാ ഹോതി, അപരണ്ണനിസ്സിതം വാ ഹോതി, അബ്ഭാഘാതനിസ്സിതം വാ ഹോതി, ആഘാതനനിസ്സിതം വാ ഹോതി, സുസാനനിസ്സിതം വാ ഹോതി, ഉയ്യാനനിസ്സിതം വാ ഹോതി, രാജവത്ഥുനിസ്സിതം വാ ഹോതി, ഹത്ഥിസാലാനിസ്സിതം വാ ഹോതി, അസ്സസാലാനിസ്സിതം വാ ഹോതി, ബന്ധനാഗാരനിസ്സിതം വാ ഹോതി, പാനാഗാരനിസ്സിതം വാ ഹോതി, സൂനനിസ്സിതം വാ ഹോതി, രച്ഛാനിസ്സിതം വാ ഹോതി, ചച്ചരനിസ്സിതം വാ ഹോതി, സഭാനിസ്സിതം വാ ഹോതി, സംസരണനിസ്സിതം വാ [സഞ്ചരണനിസ്സിതം വാ (ക.)] ഹോതി. ഏതം സാരമ്ഭം നാമ.

അപരിക്കമനം നാമ ന സക്കാ ഹോതി യഥായുത്തേന സകടേന അനുപരിഗന്തും സമന്താ നിസ്സേണിയാ അനുപരിഗന്തും. ഏതം അപരിക്കമനം നാമ.

അനാരമ്ഭം നാമ ന കിപില്ലികാനം വാ ആസയോ ഹോതി, ന ഉപചികാനം വാ ആസയോ ഹോതി, ന ഉന്ദുരാനം വാ ആസയോ ഹോതി, ന അഹീനം വാ ആസയോ ഹോതി, ന വിച്ഛികാനം വാ ആസയോ ഹോതി, ന സതപദീനം വാ ആസയോ ഹോതി…പേ… ന സംസരണനിസ്സിതം വാ ഹോതി. ഏതം അനാരമ്ഭം നാമ.

സപരിക്കമനം നാമ സക്കാ ഹോതി യഥായുത്തേന സകടേന അനുപരിഗന്തും, സമന്താ നിസ്സേണിയാ അനുപരിഗന്തും. ഏതം സപരിക്കമനം നാമ.

സഞ്ഞാചികാ നാമ സയം യാചിത്വാ പുരിസമ്പി പുരിസത്ഥകരമ്പി…പേ… മത്തികമ്പി.

കുടി നാമ ഉല്ലിത്താ വാ ഹോതി വാ അവലിത്താ വാ ഉല്ലിത്താവലിത്താ വാ.

കാരേയ്യാതി കരോതി വാ കാരാപേതി വാ.

ഭിക്ഖൂ വാ അനഭിനേയ്യ, വത്ഥുദേസനായ പമാണം വാ അതിക്കാമേയ്യാതി ഞത്തിദുതിയേന കമ്മേന കുടിവത്ഥും ന ദേസാപേത്വാ, ആയാമതോ വാ വിത്ഥാരതോ വാ അന്തമസോ കേസഗ്ഗമത്തമ്പി അതിക്കാമേത്വാ കരോതി വാ കാരാപേതി വാ, പയോഗേ പയോഗേ ദുക്കടം. ഏകം പിണ്ഡം അനാഗതേ ആപത്തി ഥുല്ലച്ചയസ്സ. തസ്മിം പിണ്ഡേ ആഗതേ ആപത്തി സങ്ഘാദിസേസസ്സ.

സങ്ഘാദിസേസോതി…പേ… തേനപി വുച്ചതി സങ്ഘാദിസേസോതി.

൩൫൪. ഭിക്ഖു കുടിം കരോതി അദേസിതവത്ഥുകം സാരമ്ഭം അപരിക്കമനം, ആപത്തി സങ്ഘാദിസേസേന ദ്വിന്നം ദുക്കടാനം. ഭിക്ഖു കുടിം കരോതി അദേസിതവത്ഥുകം സാരമ്ഭം സപരിക്കമനം, ആപത്തി സങ്ഘാദിസേസേന ദുക്കടസ്സ. ഭിക്ഖു കുടിം കരോതി അദേസിതവത്ഥുകം അനാരമ്ഭം അപരിക്കമനം, ആപത്തി സങ്ഘാദിസേസേന ദുക്കടസ്സ. ഭിക്ഖു കുടിം കരോതി അദേസിതവത്ഥുകം അനാരമ്ഭം സപരിക്കമനം, ആപത്തി സങ്ഘാദിസേസസ്സ.

൩൫൫. ഭിക്ഖു കുടിം കരോതി ദേസിതവത്ഥുകം സാരമ്ഭം അപരിക്കമനം, ആപത്തി ദ്വിന്നം ദുക്കടാനം. ഭിക്ഖു കുടിം കരോതി ദേസിതവത്ഥുകം സാരമ്ഭം സപരിക്കമനം, ആപത്തി ദുക്കടസ്സ. ഭിക്ഖു കുടിം കരോതി ദേസിതവത്ഥുകം അനാരമ്ഭം അപരിക്കമനം, ആപത്തി ദുക്കടസ്സ. ഭിക്ഖു കുടിം കരോതി ദേസിതവത്ഥുകം അനാരമ്ഭം സപരിക്കമനം, അനാപത്തി.

ഭിക്ഖു കുടിം കരോതി പമാണാതിക്കന്തം സാരമ്ഭം അപരിക്കമനം, ആപത്തി സങ്ഘാദിസേസേന ദ്വിന്നം ദുക്കടാനം. ഭിക്ഖു കുടിം കരോതി പമാണാതിക്കന്തം സാരമ്ഭം സപരിക്കമനം, ആപത്തി സങ്ഘാദിസേസേന ദുക്കടസ്സ. ഭിക്ഖു കുടിം കരോതി പമാണാതിക്കന്തം അനാരമ്ഭം അപരിക്കമനം, ആപത്തി സങ്ഘാദിസേസേന ദുക്കടസ്സ. ഭിക്ഖു കുടിം കരോതി പമാണാതിക്കന്തം അനാരമ്ഭം സപരിക്കമനം, ആപത്തി സങ്ഘാദിസേസസ്സ.

ഭിക്ഖു കുടിം കരോതി പമാണികം സാരമ്ഭം അപരിക്കമനം, ആപത്തി ദ്വിന്നം ദുക്കടാനം. ഭിക്ഖു കുടിം കരോതി പമാണികം സാരമ്ഭം സപരിക്കമനം, ആപത്തി ദുക്കടസ്സ. ഭിക്ഖു കുടിം കരോതി പമാണികം അനാരമ്ഭം അപരിക്കമനം, ആപത്തി ദുക്കടസ്സ. ഭിക്ഖു കുടിം കരോതി പമാണികം അനാരമ്ഭം സപരിക്കമനം, അനാപത്തി.

ഭിക്ഖു കുടിം കരോതി അദേസിതവത്ഥുകം പമാണാതിക്കന്തം സാരമ്ഭം അപരിക്കമനം, ആപത്തി ദ്വിന്നം സങ്ഘാദിസേസേന ദ്വിന്നം ദുക്കടാനം. ഭിക്ഖു കുടിം കരോതി അദേസിതവത്ഥുകം പമാണാതിക്കന്തം സാരമ്ഭം സപരിക്കമനം, ആപത്തി ദ്വിന്നം സങ്ഘാദിസേസേന ദുക്കടസ്സ. ഭിക്ഖു കുടിം കരോതി അദേസിതവത്ഥുകം പമാണാതിക്കന്തം അനാരമ്ഭം അപരിക്കമനം, ആപത്തി ദ്വിന്നം സങ്ഘാദിസേസേന ദുക്കടസ്സ. ഭിക്ഖു കുടിം കരോതി അദേസിതവത്ഥുകം പമാണാതിക്കന്തം അനാരമ്ഭം സപരിക്കമനം, ആപത്തി ദ്വിന്നം സങ്ഘാദിസേസാനം.

ഭിക്ഖു കുടിം കരോതി ദേസിതവത്ഥുകം പമാണികം സാരമ്ഭം അപരിക്കമനം, ആപത്തി ദ്വിന്നം ദുക്കടാനം. ഭിക്ഖു കുടിം കരോതി ദേസിതവത്ഥുകം പമാണികം സാരമ്ഭം സപരിക്കമനം, ആപത്തി ദുക്കടസ്സ. ഭിക്ഖു കുടിം കരോതി ദേസിതവത്ഥുകം പമാണികം അനാരമ്ഭം അപരിക്കമനം, ആപത്തി ദുക്കടസ്സ. ഭിക്ഖു കുടിം കരോതി ദേസിതവത്ഥുകം പമാണികം അനാരമ്ഭം സപരിക്കമനം, അനാപത്തി.

൩൫൬. ഭിക്ഖു സമാദിസതി – ‘‘കുടിം മേ കരോഥാ’’തി. തസ്സ കുടിം കരോന്തി അദേസിതവത്ഥുകം സാരമ്ഭം അപരിക്കമനം, ആപത്തി സങ്ഘാദിസേസേന ദ്വിന്നം ദുക്കടാനം…പേ… സാരമ്ഭം സപരിക്കമനം, ആപത്തി സങ്ഘാദിസേസേന ദുക്കടസ്സ…പേ… അനാരമ്ഭം അപരിക്കമനം, ആപത്തി സങ്ഘാദിസേസേന ദുക്കടസ്സ…പേ… അനാരമ്ഭം സപരിക്കമനം, ആപത്തി സങ്ഘാദിസേസസ്സ.

ഭിക്ഖു സമാദിസതി – ‘‘കുടിം മേ കരോഥാ’’തി. തസ്സ കുടിം കരോന്തി ദേസിതവത്ഥുകം സാരമ്ഭം അപരിക്കമനം, ആപത്തി ദ്വിന്നം ദുക്കടാനം…പേ… സാരമ്ഭം സപരിക്കമനം, ആപത്തി ദുക്കടസ്സ…പേ… അനാരമ്ഭം അപരിക്കമനം, ആപത്തി ദുക്കടസ്സ…പേ… അനാരമ്ഭം സപരിക്കമനം, അനാപത്തി.

ഭിക്ഖു സമാദിസതി – ‘‘കുടിം മേ കരോഥാ’’തി. തസ്സ കുടിം കരോന്തി പമാണാതിക്കന്തം സാരമ്ഭം അപരിക്കമനം, ആപത്തി സങ്ഘാദിസേസേന ദ്വിന്നം ദുക്കടാനം…പേ… സാരമ്ഭം സപരിക്കമനം, ആപത്തി സങ്ഘാദിസേസേന ദുക്കടസ്സ…പേ… അനാരമ്ഭം അപരിക്കമനം, ആപത്തി സങ്ഘാദിസേസേന ദുക്കടസ്സ…പേ… അനാരമ്ഭം സപരിക്കമനം, ആപത്തി സങ്ഘാദിസേസസ്സ.

ഭിക്ഖു സമാദിസതി – ‘‘കുടിം മേ കരോഥാ’’തി. തസ്സ കുടിം കരോന്തി പമാണികം സാരമ്ഭം അപരിക്കമനം, ആപത്തി ദ്വിന്നം ദുക്കടാനം…പേ… സാരമ്ഭം സപരിക്കമനം, ആപത്തി ദുക്കടസ്സ…പേ… അനാരമ്ഭം അപരിക്കമനം, ആപത്തി ദുക്കടസ്സ…പേ… അനാരമ്ഭം സപരിക്കമനം, അനാപത്തി.

ഭിക്ഖു സമാദിസതി – ‘‘കുടിം മേ കരോഥാ’’തി. തസ്സ കുടിം കരോന്തി അദേസിതവത്ഥുകം പമാണാതിക്കന്തം സാരമ്ഭം അപരിക്കമനം, ആപത്തി ദ്വിന്നം സങ്ഘാദിസേസേന ദ്വിന്നം ദുക്കടാനം…പേ… സാരമ്ഭം സപരിക്കമനം, ആപത്തി ദ്വിന്നം സങ്ഘാദിസേസേന ദുക്കടസ്സ…പേ… അനാരമ്ഭം അപരിക്കമനം, ആപത്തി ദ്വിന്നം സങ്ഘാദിസേസേന ദുക്കടസ്സ…പേ… അനാരമ്ഭം സപരിക്കമനം, ആപത്തി ദ്വിന്നം സങ്ഘാദിസേസാനം.

ഭിക്ഖു സമാദിസതി – ‘‘കുടിം മേ കരോഥാ’’തി. തസ്സ കുടിം കരോന്തി ദേസിതവത്ഥുകം പമാണികം സാരമ്ഭം അപരിക്കമനം, ആപത്തി ദ്വിന്നം ദുക്കടാനം…പേ… സാരമ്ഭം സപരിക്കമനം, ആപത്തി ദുക്കടസ്സ…പേ… അനാരമ്ഭം അപരിക്കമനം, ആപത്തി ദുക്കടസ്സ…പേ… അനാരമ്ഭം സപരിക്കമനം, അനാപത്തി.

൩൫൭. ഭിക്ഖു സമാദിസിത്വാ പക്കമതി – ‘‘കുടിം മേ കരോഥാ’’തി. ന ച സമാദിസതി – ‘‘ദേസിതവത്ഥുകാ ച ഹോതു അനാരമ്ഭാ ച സപരിക്കമനാ ചാ’’തി. തസ്സ കുടിം കരോന്തി അദേസിതവത്ഥുകം സാരമ്ഭം അപരിക്കമനം, ആപത്തി സങ്ഘാദിസേസേന ദ്വിന്നം ദുക്കടാനം…പേ… സാരമ്ഭം സപരിക്കമനം, ആപത്തി സങ്ഘാദിസേസേന ദുക്കടസ്സ…പേ… അനാരമ്ഭം അപരിക്കമനം, ആപത്തി സങ്ഘാദിസേസേന ദുക്കടസ്സ…പേ… അനാരമ്ഭം സപരിക്കമനം, ആപത്തി സങ്ഘാദിസേസസ്സ.

ഭിക്ഖു സമാദിസിത്വാ പക്കമതി – ‘‘കുടിം മേ കരോഥാ’’തി. ന ച സമാദിസതി – ‘‘ദേസിതവത്ഥുകാ ച ഹോതു അനാരമ്ഭാ ച സപരിക്കമനാ ചാ’’തി. തസ്സ കുടിം കരോന്തി ദേസിതവത്ഥുകം സാരമ്ഭം അപരിക്കമനം, ആപത്തി ദ്വിന്നം ദുക്കടാനം…പേ… സാരമ്ഭം സപരിക്കമനം, ആപത്തി ദുക്കടസ്സ…പേ… അനാരമ്ഭം അപരിക്കമനം, ആപത്തി ദുക്കടസ്സ…പേ… അനാരമ്ഭം സപരിക്കമനം, അനാപത്തി.

ഭിക്ഖു സമാദിസിത്വാ പക്കമതി – ‘‘കുടിം മേ കരോഥാ’’തി. ന ച സമാദിസതി – ‘‘പമാണികാ ച ഹോതു അനാരമ്ഭാ ച സപരിക്കമനാ ചാ’’തി. തസ്സ കുടിം കരോന്തി പമാണാതിക്കന്തം സാരമ്ഭം അപരിക്കമനം, ആപത്തി സങ്ഘാദിസേസേന ദ്വിന്നം ദുക്കടാനം…പേ… സാരമ്ഭം സപരിക്കമനം, ആപത്തി സങ്ഘാദിസേസേന ദുക്കടസ്സ…പേ… അനാരമ്ഭം അപരിക്കമനം, ആപത്തി സങ്ഘാദിസേസേന ദുക്കടസ്സ…പേ… അനാരമ്ഭം സപരിക്കമനം, ആപത്തി സങ്ഘാദിസേസസ്സ.

ഭിക്ഖു സമാദിസിത്വാ പക്കമതി – ‘‘കുടിം മേ കരോഥാ’’തി. ന ച സമാദിസതി – ‘‘പമാണികാ ച ഹോതു അനാരമ്ഭാ ച സപരിക്കമനാ ചാ’’തി. തസ്സ കുടിം കരോന്തി പമാണികം സാരമ്ഭം അപരിക്കമനം, ആപത്തി ദ്വിന്നം ദുക്കടാനം…പേ… സാരമ്ഭം സപരിക്കമനം, ആപത്തി ദുക്കടസ്സ…പേ… അനാരമ്ഭം അപരിക്കമനം, ആപത്തി ദുക്കടസ്സ…പേ… അനാരമ്ഭം സപരിക്കമനം, അനാപത്തി.

ഭിക്ഖു സമാദിസിത്വാ പക്കമതി – ‘‘കുടിം മേ കരോഥാ’’തി. ന ച സമാദിസതി – ‘‘ദേസിതവത്ഥുകാ ച ഹോതു പമാണികാ ച അനാരമ്ഭാ ച സപരിക്കമനാ ചാ’’തി. തസ്സ കുടിം കരോന്തി അദേസിതവത്ഥുകം പമാണാതിക്കന്തം സാരമ്ഭം അപരിക്കമനം, ആപത്തി ദ്വിന്നം സങ്ഘാദിസേസേന ദ്വിന്നം ദുക്കടാനം…പേ… സാരമ്ഭം സപരിക്കമനം, ആപത്തി ദ്വിന്നം സങ്ഘാദിസേസേന ദുക്കടസ്സ…പേ… അനാരമ്ഭം അപരിക്കമനം, ആപത്തി ദ്വിന്നം സങ്ഘാദിസേസേന ദുക്കടസ്സ …പേ… അനാരമ്ഭം സപരിക്കമനം, ആപത്തി ദ്വിന്നം സങ്ഘാദിസേസാനം.

ഭിക്ഖു സമാദിസിത്വാ പക്കമതി – ‘‘കുടിം മേ കരോഥാ’’തി. ന ച സമാദിസതി – ‘‘ദേസിതവത്ഥുകാ ച ഹോതു പമാണികാ ച അനാരമ്ഭാ ച സപരിക്കമനാ ചാ’’തി. തസ്സ കുടിം കരോന്തി ദേസിതവത്ഥുകം പമാണികം സാരമ്ഭം അപരിക്കമനം, ആപത്തി ദ്വിന്നം ദുക്കടാനം…പേ… സാരമ്ഭം സപരിക്കമനം, ആപത്തി ദുക്കടസ്സ…പേ… അനാരമ്ഭം അപരിക്കമനം, ആപത്തി ദുക്കടസ്സ…പേ… അനാരമ്ഭം സപരിക്കമനം, അനാപത്തി.

൩൫൮. ഭിക്ഖു സമാദിസിത്വാ പക്കമതി – ‘‘കുടിം മേ കരോഥാ’’തി. സമാദിസതി ച – ‘‘ദേസിതവത്ഥുകാ ച ഹോതു അനാരമ്ഭാ ച സപരിക്കമനാ ചാ’’തി. തസ്സ കുടിം കരോന്തി അദേസിതവത്ഥുകം സാരമ്ഭം അപരിക്കമനം. സോ സുണാതി – ‘‘കുടി കിര മേ കയിരതി അദേസിതവത്ഥുകാ സാരമ്ഭാ അപരിക്കമനാ’’തി. തേന ഭിക്ഖുനാ സാമം വാ ഗന്തബ്ബം ദൂതോ വാ പാഹേതബ്ബോ – ‘‘ദേസിതവത്ഥുകാ ച ഹോതു അനാരമ്ഭാ ച സപരിക്കമനാ ചാ’’തി. നോ ചേ സാമം വാ ഗച്ഛേയ്യ ദൂതം വാ പഹിണേയ്യ, ആപത്തി ദുക്കടസ്സ.

ഭിക്ഖു സമാദിസിത്വാ പക്കമതി – ‘‘കുടിം മേ കരോഥാ’’തി. സമാദിസതി ച – ‘‘ദേസിതവത്ഥുകാ ച ഹോതു അനാരമ്ഭാ ച സപരിക്കമനാ ചാ’’തി. തസ്സ കുടിം കരോന്തി അദേസിതവത്ഥുകം സാരമ്ഭം സപരിക്കമനം. സോ സുണാതി – ‘‘കുടി കിര മേ കയിരതി അദേസിതവത്ഥുകാ സാരമ്ഭാ സപരിക്കമനാ’’തി. തേന ഭിക്ഖുനാ സാമം വാ ഗന്തബ്ബം ദൂതോ വാ പാഹേതബ്ബോ – ‘‘ദേസിതവത്ഥുകാ ച ഹോതു അനാരമ്ഭാ ചാ’’തി. നോ ചേ സാമം വാ ഗച്ഛേയ്യ ദൂതം വാ പഹിണേയ്യ, ആപത്തി ദുക്കടസ്സ.

ഭിക്ഖു സമാദിസിത്വാ പക്കമതി – ‘‘കുടിം മേ കരോഥാ’’തി. സമാദിസതി ച – ‘‘ദേസിതവത്ഥുകാ ച ഹോതു അനാരമ്ഭാ ച സപരിക്കമനാ ചാ’’തി. തസ്സ കുടിം കരോന്തി അദേസിതവത്ഥുകം അനാരമ്ഭം അപരിക്കമനം. സോ സുണാതി – ‘‘കുടി കിര മേ കയിരതി അദേസിതവത്ഥുകാ അനാരമ്ഭാ അപരിക്കമനാ’’തി. തേന ഭിക്ഖുനാ സാമം വാ ഗന്തബ്ബം ദൂതോ വാ പാഹേതബ്ബോ – ‘‘ദേസിതവത്ഥുകാ ച ഹോതു സപരിക്കമനാ ചാ’’തി. നോ ചേ സാമം വാ ഗച്ഛേയ്യ ദൂതം വാ പഹിണേയ്യ, ആപത്തി ദുക്കടസ്സ.

ഭിക്ഖു സമാദിസിത്വാ പക്കമതി – ‘‘കുടിം മേ കരോഥാ’’തി. സമാദിസതി ച – ‘‘ദേസിതവത്ഥുകാ ച ഹോതു അനാരമ്ഭാ ച സപരിക്കമനാ ചാ’’തി. തസ്സ കുടിം കരോന്തി അദേസിതവത്ഥുകം അനാരമ്ഭം സപരിക്കമനം. സോ സുണാതി – ‘‘കുടി കിര മേ കയിരതി അദേസിതവത്ഥുകാ അനാരമ്ഭാ സപരിക്കമനാ’’തി. തേന ഭിക്ഖുനാ സാമം വാ ഗന്തബ്ബം ദൂതോ വാ പാഹേതബ്ബോ – ‘‘ദേസിതവത്ഥുകാ ഹോതൂ’’തി. നോ ചേ സാമം വാ ഗച്ഛേയ്യ ദൂതം വാ പഹിണേയ്യ, ആപത്തി ദുക്കടസ്സ.

ഭിക്ഖു സമാദിസിത്വാ പക്കമതി – ‘‘കുടിം മേ കരോഥാ’’തി. സമാദിസതി ച – ‘‘ദേസിതവത്ഥുകാ ച ഹോതു അനാരമ്ഭാ ച സപരിക്കമനാ ചാ’’തി. തസ്സ കുടിം കരോന്തി ദേസിതവത്ഥുകം സാരമ്ഭം അപരിക്കമനം. സോ സുണാതി – ‘‘കുടി കിര മേ കയിരതി ദേസിതവത്ഥുകാ സാരമ്ഭാ അപരിക്കമനാ’’തി. തേന ഭിക്ഖുനാ സാമം വാ ഗന്തബ്ബം ദൂതോ വാ പാഹേതബ്ബോ – ‘‘അനാരമ്ഭാ ച ഹോതു സപരിക്കമനാ ചാ’’തി. നോ ചേ സാമം വാ ഗച്ഛേയ്യ ദൂതം വാ പഹിണേയ്യ, ആപത്തി ദുക്കടസ്സ.

ഭിക്ഖു സമാദിസിത്വാ പക്കമതി – ‘‘കുടിം മേ കരോഥാ’’തി. സമാദിസതി ച – ‘‘ദേസിതവത്ഥുകാ ച ഹോതു അനാരമ്ഭാ ച സപരിക്കമനാ ചാ’’തി. തസ്സ കുടിം കരോന്തി ദേസിതവത്ഥുകം സാരമ്ഭം സപരിക്കമനം. സോ സുണാതി – ‘‘കുടി കിര മേ കയിരതി ദേസിതവത്ഥുകാ സാരമ്ഭാ സപരിക്കമനാ’’തി. തേന ഭിക്ഖുനാ സാമം വാ ഗന്തബ്ബം ദൂതോ വാ പാഹേതബ്ബോ – ‘‘അനാരമ്ഭാ ഹോതൂ’’തി. നോ ചേ സാമം വാ ഗച്ഛേയ്യ ദൂതം വാ പഹിണേയ്യ, ആപത്തി ദുക്കടസ്സ.

ഭിക്ഖു സമാദിസിത്വാ പക്കമതി – ‘‘കുടിം മേ കരോഥാ’’തി. സമാദിസതി ച – ‘‘ദേസിതവത്ഥുകാ ച ഹോതു അനാരമ്ഭാ ച സപരിക്കമനാ ചാ’’തി. തസ്സ കുടിം കരോന്തി ദേസിതവത്ഥുകം അനാരമ്ഭം അപരിക്കമനം. സോ സുണാതി – ‘‘കുടി കിര മേ കയിരതി ദേസിതവത്ഥുകാ അനാരമ്ഭാ അപരിക്കമനാ’’തി. തേന ഭിക്ഖുനാ സാമം വാ ഗന്തബ്ബം ദൂതോ വാ പാഹേതബ്ബോ – ‘‘സപരിക്കമനാ ഹോതൂ’’തി. നോ ചേ സാമം വാ ഗച്ഛേയ്യ ദൂതം വാ പഹിണേയ്യ, ആപത്തി ദുക്കടസ്സ.

ഭിക്ഖു സമാദിസിത്വാ പക്കമതി – ‘‘കുടിം മേ കരോഥാ’’തി. സമാദിസതി ച – ‘‘ദേസിതവത്ഥുകാ ച ഹോതു അനാരമ്ഭാ ച സപരിക്കമനാ ചാ’’തി. തസ്സ കുടിം കരോന്തി ദേസിതവത്ഥുകം അനാരമ്ഭം സപരിക്കമനം, അനാപത്തി.

൩൫൯. ഭിക്ഖു സമാദിസിത്വാ പക്കമതി – ‘‘കുടിം മേ കരോഥാ’’തി. സമാദിസതി ച – ‘‘പമാണികാ ച ഹോതു അനാരമ്ഭാ ച സപരിക്കമനാ ചാ’’തി. തസ്സ കുടിം കരോന്തി പമാണാതിക്കന്തം സാരമ്ഭം അപരിക്കമനം. സോ സുണാതി – ‘‘കുടി കിര മേ കയിരതി പമാണാതിക്കന്താ സാരമ്ഭാ അപരിക്കമനാ’’തി. തേന ഭിക്ഖുനാ സാമം വാ ഗന്തബ്ബം ദൂതോ വാ പാഹേതബ്ബോ – ‘‘പമാണികാ ച ഹോതു അനാരമ്ഭാ ച സപരിക്കമനാ ചാ’’തി…പേ… ‘‘പമാണികാ ച ഹോതു അനാരമ്ഭാ ചാ’’തി…പേ… ‘‘പമാണികാ ച ഹോതു സപരിക്കമനാ ചാ’’തി…പേ… ‘‘പമാണികാ ഹോതൂ’’തി. നോ ചേ സാമം വാ ഗച്ഛേയ്യ ദൂതം വാ പഹിണേയ്യ, ആപത്തി ദുക്കടസ്സ.

ഭിക്ഖു സമാദിസിത്വാ പക്കമതി – ‘‘കുടിം മേ കരോഥാ’’തി. സമാദിസതി ച – ‘‘പമാണികാ ച ഹോതു അനാരമ്ഭാ ച സപരിക്കമനാ ചാ’’തി. തസ്സ കുടിം കരോന്തി പമാണികം സാരമ്ഭം അപരിക്കമനം. സോ സുണാതി – ‘‘കുടി കിര മേ കയിരതി പമാണികാ സാരമ്ഭാ അപരിക്കമനാ’’തി. തേന ഭിക്ഖുനാ സാമം വാ ഗന്തബ്ബം ദൂതോ വാ പാഹേതബ്ബോ – ‘‘അനാരമ്ഭാ ച ഹോതു സപരിക്കമനാ ചാ’’തി…പേ… ‘‘അനാരമ്ഭാ ഹോതൂ’’തി…പേ… ‘‘സപരിക്കമനാ ഹോതൂ’’തി…പേ… അനാപത്തി.

൩൬൦. ഭിക്ഖു സമാദിസിത്വാ പക്കമതി – ‘‘കുടിം മേ കരോഥാ’’തി. സമാദിസതി ച – ‘‘ദേസിതവത്ഥുകാ ച ഹോതു പമാണികാ ച അനാരമ്ഭാ ച സപരിക്കമനാ ചാ’’തി. തസ്സ കുടിം കരോന്തി അദേസിതവത്ഥുകം പമാണാതിക്കന്തം സാരമ്ഭം അപരിക്കമനം. സോ സുണാതി – ‘‘കുടി കിര മേ കയിരതി അദേസിതവത്ഥുകാ പമാണാതിക്കന്താ സാരമ്ഭാ അപരിക്കമനാ’’തി. തേന ഭിക്ഖുനാ സാമം വാ ഗന്തബ്ബം ദൂതോ വാ പാഹേതബ്ബോ – ‘‘ദേസിതവത്ഥുകാ ച ഹോതു പമാണികാ ച അനാരമ്ഭാ ച സപരിക്കമനാ ചാ’’തി…പേ… ‘‘ദേസിതവത്ഥുകാ ച ഹോതു പമാണികാ ച അനാരമ്ഭാ ചാ’’തി…പേ… ‘‘ദേസിതവത്ഥുകാ ച ഹോതു പമാണികാ ച സപരിക്കമനാ ചാ’’തി…പേ… ‘‘ദേസിതവത്ഥുകാ ച ഹോതു പമാണികാ ചാ’’തി. നോ ചേ സാമം വാ ഗച്ഛേയ്യ ദൂതം വാ പഹിണേയ്യ, ആപത്തി ദുക്കടസ്സ.

ഭിക്ഖു സമാദിസിത്വാ പക്കമതി – ‘‘കുടിം മേ കരോഥാ’’തി. സമാദിസതി ച – ‘‘ദേസിതവത്ഥുകാ ച ഹോതു പമാണികാ ച അനാരമ്ഭാ ച സപരിക്കമനാ ചാ’’തി. തസ്സ കുടിം കരോന്തി ദേസിതവത്ഥുകം പമാണികം സാരമ്ഭം അപരിക്കമനം. സോ സുണാതി – ‘‘കുടി കിര മേ കയിരതി ദേസിതവത്ഥുകാ പമാണികാ സാരമ്ഭാ അപരിക്കമനാ’’തി. തേന ഭിക്ഖുനാ സാമം വാ ഗന്തബ്ബം ദൂതോ വാ പാഹേതബ്ബോ – ‘‘അനാരമ്ഭാ ച ഹോതു സപരിക്കമനാ ചാ’’തി…പേ… ‘‘അനാരമ്ഭാ ഹോതൂ’’തി…പേ… ‘‘സപരിക്കമനാ ഹോതൂ’’തി…പേ… അനാപത്തി.

ഭിക്ഖു സമാദിസിത്വാ പക്കമതി – ‘‘കുടിം മേ കരോഥാ’’തി. സമാദിസതി ച – ‘‘ദേസിതവത്ഥുകാ ച ഹോതു അനാരമ്ഭാ ച സപരിക്കമനാ ചാ’’തി. തസ്സ കുടിം കരോന്തി അദേസിതവത്ഥുകം സാരമ്ഭം അപരിക്കമനം, ആപത്തി കാരുകാനം തിണ്ണം ദുക്കടാനം…പേ… സാരമ്ഭം സപരിക്കമനം, ആപത്തി കാരുകാനം ദ്വിന്നം ദുക്കടാനം…പേ… അനാരമ്ഭം അപരിക്കമനം, ആപത്തി കാരുകാനം ദ്വിന്നം ദുക്കടാനം…പേ… അനാരമ്ഭം സപരിക്കമനം, ആപത്തി കാരുകാനം ദുക്കടസ്സ.

ഭിക്ഖു സമാദിസിത്വാ പക്കമതി – ‘‘കുടിം മേ കരോഥാ’’തി. സമാദിസതി ച – ‘‘ദേസിതവത്ഥുകാ ച ഹോതു അനാരമ്ഭാ ച സപരിക്കമനാ ചാ’’തി. തസ്സ കുടിം കരോന്തി ദേസിതവത്ഥുകം സാരമ്ഭം അപരിക്കമനം, ആപത്തി കാരുകാനം ദ്വിന്നം ദുക്കാടനം…പേ… സാരമ്ഭം സപരിക്കമനം, ആപത്തി കാരുകാനം ദുക്കടസ്സ…പേ… അനാരമ്ഭം അപരിക്കമനം, ആപത്തി കാരുകാനം ദുക്കടസ്സ…പേ… അനാരമ്ഭം സപരിക്കമനം, അനാപത്തി.

ഭിക്ഖു സമാദിസിത്വാ പക്കമതി – ‘‘കുടിം മേ കരോഥാ’’തി. സമാദിസതി ച – ‘‘പമാണികാ ച ഹോതു അനാരമ്ഭാ ച സപരിക്കമനാ ചാ’’തി. തസ്സ കുടിം കരോന്തി പമാണാതിക്കന്തം സാരമ്ഭം അപരിക്കമനം, ആപത്തി കാരുകാനം തിണ്ണം ദുക്കടാനം…പേ… സാരമ്ഭം സപരിക്കമനം, ആപത്തി കാരുകാനം ദ്വിന്നം ദുക്കടാനം…പേ… അനാരമ്ഭം അപരിക്കമനം, ആപത്തി കാരുകാനം ദ്വിന്നം ദുക്കടാനം…പേ… അനാരമ്ഭം സപരിക്കമനം ആപത്തി കാരുകാനം ദുക്കടസ്സ.

ഭിക്ഖു സമാദിസിത്വാ പക്കമതി – ‘‘കുടിം മേ കരോഥാ’’തി. സമാദിസതി ച – ‘‘പമാണികാ ച ഹോതു അനാരമ്ഭാ ച സപരിക്കമനാ ചാ’’തി. തസ്സ കുടിം കരോന്തി പമാണികം സാരമ്ഭം അപരിക്കമനം, ആപത്തി കാരുകാനം ദ്വിന്നം ദുക്കടാനം…പേ… സാരമ്ഭം സപരിക്കമനം, ആപത്തി കാരുകാനം ദുക്കടസ്സ…പേ… അനാരമ്ഭം അപരിക്കമനം, ആപത്തി കാരുകാനം ദുക്കടസ്സ…പേ… അനാരമ്ഭം സപരിക്കമനം, അനാപത്തി.

ഭിക്ഖു സമാദിസിത്വാ പക്കമതി – ‘‘കുടിം മേ കരോഥാ’’തി. സമാദിസതി ച – ‘‘ദേസിതവത്ഥുകാ ച ഹോതു പമാണികാ ച അനാരമ്ഭാ ച സപരിക്കമനാ ചാ’’തി. തസ്സ കുടിം കരോന്തി അദേസിതവത്ഥുകം പമാണാതിക്കന്തം സാരമ്ഭം അപരിക്കമനം, ആപത്തി കാരുകാനം ചതുന്നം ദുക്കടാനം…പേ… സാരമ്ഭം സപരിക്കമനം, ആപത്തി കാരുകാനം തിണ്ണം ദുക്കടാനം…പേ… അനാരമ്ഭം അപരിക്കമനം, ആപത്തി കാരുകാനം തിണ്ണം ദുക്കടാനം…പേ… അനാരമ്ഭം സപരിക്കമനം, ആപത്തി കാരുകാനം ദ്വിന്നം ദുക്കടാനം.

ഭിക്ഖു സമാദിസിത്വാ പക്കമതി – ‘‘കുടിം മേ കരോഥാ’’തി. സമാദിസതി ച – ‘‘ദേസിതവത്ഥുകാ ച ഹോതു പമാണികാ ച അനാരമ്ഭാ ച സപരിക്കമനാ ചാ’’തി. തസ്സ കുടിം കരോന്തി ദേസിതവത്ഥുകം പമാണികം സാരമ്ഭം അപരിക്കമനം, ആപത്തി കാരുകാനം ദ്വിന്നം ദുക്കടാനം…പേ… സാരമ്ഭം സപരിക്കമനം, ആപത്തി കാരുകാനം ദുക്കടസ്സ…പേ… അനാരമ്ഭം അപരിക്കമനം, ആപത്തി കാരുകാനം ദുക്കടസ്സ…പേ… അനാരമ്ഭം സപരിക്കമനം, അനാപത്തി.

൩൬൧. ഭിക്ഖു സമാദിസിത്വാ പക്കമതി – ‘‘കുടിം മേ കരോഥാ’’തി. തസ്സ കുടിം കരോന്തി അദേസിതവത്ഥുകം സാരമ്ഭം അപരിക്കമനം. സോ ചേ വിപ്പകതേ ആഗച്ഛതി, തേന ഭിക്ഖുനാ സാ കുടി അഞ്ഞസ്സ വാ ദാതബ്ബാ ഭിന്ദിത്വാ വാ പുന കാതബ്ബാ. നോ ചേ അഞ്ഞസ്സ വാ ദദേയ്യ ഭിന്ദിത്വാ വാ പുന കാരേയ്യ, ആപത്തി സങ്ഘാദിസേസേന ദ്വിന്നം ദുക്കടാനം.

ഭിക്ഖു സമാദിസിത്വാ പക്കമതി – ‘‘കുടിം മേ കരോഥാ’’തി. തസ്സ കുടിം കരോന്തി അദേസിതവത്ഥുകം സാരമ്ഭം സപരിക്കമനം. സോ ചേ വിപ്പകതേ ആഗച്ഛതി, തേന ഭിക്ഖുനാ സാ കുടി അഞ്ഞസ്സ വാ ദാതബ്ബാ ഭിന്ദിത്വാ വാ പുന കാതബ്ബാ. നോ ചേ അഞ്ഞസ്സ വാ ദദേയ്യ ഭിന്ദിത്വാ വാ പുന കാരേയ്യ, ആപത്തി സങ്ഘാദിസേസേന ദുക്കടസ്സ…പേ… അനാരമ്ഭം അപരിക്കമനം…പേ… ആപത്തി സങ്ഘാദിസേസേന ദുക്കടസ്സ…പേ… അനാരമ്ഭം സപരിക്കമനം…പേ… ആപത്തി സങ്ഘാദിസേസസ്സ.

ഭിക്ഖു സമാദിസിത്വാ പക്കമതി – ‘‘കുടിം മേ കരോഥാ’’തി. തസ്സ കുടിം കരോന്തി ദേസിതവത്ഥുകം സാരമ്ഭം അപരിക്കമനം. സോ ചേ വിപ്പകതേ ആഗച്ഛതി, തേന ഭിക്ഖുനാ സാ കുടി അഞ്ഞസ്സ വാ ദാതബ്ബാ ഭിന്ദിത്വാ വാ പുന കാതബ്ബാ. നോ ചേ അഞ്ഞസ്സ വാ ദദേയ്യ ഭിന്ദിത്വാ വാ പുന കാരേയ്യ, ആപത്തി ദ്വിന്നം ദുക്കടാനം…പേ… സാരമ്ഭം സപരിക്കമനം, ആപത്തി ദുക്കടസ്സ…പേ… അനാരമ്ഭം അപരിക്കമനം, ആപത്തി ദുക്കടസ്സ…പേ… അനാരമ്ഭം സപരിക്കമനം, അനാപത്തി.

൩൬൨. ഭിക്ഖു സമാദിസിത്വാ പക്കമതി – ‘‘കുടിം മേ കരോഥാ’’തി. തസ്സ കുടിം കരോന്തി പമാണാതിക്കന്തം സാരമ്ഭം അപരിക്കമനം. സോ ചേ വിപ്പകതേ ആഗച്ഛതി, തേന ഭിക്ഖുനാ സാ കുടി അഞ്ഞസ്സ വാ ദാതബ്ബാ ഭിന്ദിത്വാ വാ പുന കാതബ്ബാ. നോ ചേ അഞ്ഞസ്സ വാ ദദേയ്യ ഭിന്ദിത്വാ വാ പുന കാരേയ്യ, ആപത്തി സങ്ഘാദിസേസേന ദ്വിന്നം ദുക്കടാനം…പേ… സാരമ്ഭം സപരിക്കമനം, ആപത്തി സങ്ഘാദിസേസേന ദുക്കടസ്സ…പേ… അനാരമ്ഭം അപരിക്കമനം, ആപത്തി സങ്ഘാദിസേസേന ദുക്കടസ്സ…പേ… അനാരമ്ഭം സപരിക്കമനം, ആപത്തി സങ്ഘാദിസേസസ്സ.

ഭിക്ഖു സമാദിസിത്വാ പക്കമതി – ‘‘കുടിം മേ കരോഥാ’’തി. തസ്സ കുടിം കരോന്തി പമാണികം സാരമ്ഭം അപരിക്കമനം. സോ ചേ വിപ്പകതേ ആഗച്ഛതി, തേന ഭിക്ഖുനാ സാ കുടി അഞ്ഞസ്സ വാ ദാതബ്ബാ ഭിന്ദിത്വാ വാ പുന കാതബ്ബാ. നോ ചേ അഞ്ഞസ്സ വാ ദദേയ്യ ഭിന്ദിത്വാ വാ പുന കാരേയ്യ, ആപത്തി ദ്വിന്നം ദുക്കടാനം…പേ… സാരമ്ഭം സപരിക്കമനം, ആപത്തി ദുക്കടസ്സ…പേ… അനാരമ്ഭം അപരിക്കമനം, ആപത്തി ദുക്കടസ്സ…പേ… അനാരമ്ഭം സപരിക്കമനം, അനാപത്തി.

ഭിക്ഖു സമാദിസിത്വാ പക്കമതി – ‘‘കുടിം മേ കരോഥാ’’തി. തസ്സ കുടിം കരോന്തി അദേസിതവത്ഥുകം പമാണാതിക്കന്തം സാരമ്ഭം അപരിക്കമനം. സോ ചേ വിപ്പകതേ ആഗച്ഛതി, തേന ഭിക്ഖുനാ സാ കുടി അഞ്ഞസ്സ വാ ദാതബ്ബാ ഭിന്ദിത്വാ വാ പുന കാതബ്ബാ. നോ ചേ അഞ്ഞസ്സ വാ ദദേയ്യ ഭിന്ദിത്വാ വാ പുന കാരേയ്യ, ആപത്തി ദ്വിന്നം സങ്ഘാദിസേസേന ദ്വിന്നം ദുക്കടാനം…പേ… സാരമ്ഭം സപരിക്കമനം, ആപത്തി ദ്വിന്നം സങ്ഘാദിസേസേന ദുക്കടസ്സ…പേ… അനാരമ്ഭം അപരിക്കമനം, ആപത്തി ദ്വിന്നം സങ്ഘാദിസേസേന ദുക്കടസ്സ…പേ… അനാരമ്ഭം സപരിക്കമനം, ആപത്തി ദ്വിന്നം സങ്ഘാദിസേസാനം.

ഭിക്ഖു സമാദിസിത്വാ പക്കമതി – ‘‘കുടിം മേ കരോഥാ’’തി. തസ്സ കുടിം കരോന്തി ദേസിതവത്ഥുകം പമാണികം സാരമ്ഭം അപരിക്കമനം. സോ ചേ വിപ്പകതേ ആഗച്ഛതി, തേന ഭിക്ഖുനാ സാ കുടി അഞ്ഞസ്സ വാ ദാതബ്ബാ ഭിന്ദിത്വാ വാ പുന കാതബ്ബാ. നോ ചേ അഞ്ഞസ്സ വാ ദദേയ്യ ഭിന്ദിത്വാ വാ പുന കാരേയ്യ, ആപത്തി ദ്വിന്നം ദുക്കാടാനം…പേ… സാരമ്ഭം സപരിക്കമനം, ആപത്തി ദുക്കടസ്സ…പേ… അനാരമ്ഭം അപരിക്കമനം, ആപത്തി ദുക്കടസ്സ.

ഭിക്ഖു സമാദിസിത്വാ പക്കമതി – ‘‘കുടിം മേ കരോഥാ’’തി. തസ്സ കുടിം കരോന്തി ദേസിതവത്ഥുകം പമാണികം അനാരമ്ഭം സപരിക്കമനം, അനാപത്തി.

൩൬൩. അത്തനാ വിപ്പകതം അത്തനാ പരിയോസാപേതി, ആപത്തി സങ്ഘാദിസേസസ്സ.

അത്തനാ വിപ്പകതം പരേഹി പരിയോസാപേതി [പരിയോസാവാപേതി (ക.)], ആപത്തി സങ്ഘാദിസേസസ്സ.

പരേഹി വിപ്പകതം അത്തനാ പരിയോസാപേതി, ആപത്തി സങ്ഘാദിസേസസ്സ.

പരേഹി വിപ്പകതം പരേഹി പരിയോസാപേതി [പരിയോസാവാപേതി (ക.)], ആപത്തി സങ്ഘാദിസേസസ്സ.

൩൬൪. അനാപത്തി ലേണേ ഗുഹായ തിണകുടികായ അഞ്ഞസ്സത്ഥായ വാസാഗാരം ഠപേത്വാ സബ്ബത്ഥ, അനാപത്തി ഉമ്മത്തകസ്സ ആദികമ്മികസ്സാതി.

കുടികാരസിക്ഖാപദം നിട്ഠിതം ഛട്ഠം.