൨. കായസംസഗ്ഗസിക്ഖാപദം

൨൬൯. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ആയസ്മാ ഉദായീ അരഞ്ഞേ വിഹരതി. തസ്സായസ്മതോ വിഹാരോ അഭിരൂപോ ഹോതി ദസ്സനീയോ പാസാദികോ, മജ്ഝേഗബ്ഭോ, സമന്താപരിയാഗാരോ, സുപഞ്ഞത്തം മഞ്ചപീഠം ഭിസിബിമ്ബോഹനം, പാനീയം പരിഭോജനീയം സുപട്ഠിതം, പരിവേണം സുസമ്മട്ഠം. ബഹൂ മനുസ്സാ ആയസ്മതോ ഉദായിസ്സ വിഹാരപേക്ഖകാ ആഗച്ഛന്തി. അഞ്ഞതരോപി ബ്രാഹ്മണോ സപജാപതികോ യേനായസ്മാ ഉദായീ തേനുപസങ്കമി; ഉപസങ്കമിത്വാ ആയസ്മന്തം ഉദായിം ഏതദവോച – ‘‘ഇച്ഛാമ മയം ഭോതോ ഉദായിസ്സ വിഹാരം പേക്ഖിതു’’ന്തി. ‘‘തേന ഹി, ബ്രാഹ്മണ, പേക്ഖസ്സൂ’’തി, അവാപുരണം [അപാപുരണം (സ്യാ.)] ആദായ ഘടികം ഉഗ്ഘാടേത്വാ കവാടം പണാമേത്വാ വിഹാരം പാവിസി. സോപി ഖോ ബ്രാഹ്മണോ ആയസ്മതോ ഉദായിസ്സ പിട്ഠിതോ പാവിസി. സാപി ഖോ ബ്രാഹ്മണീ തസ്സ ബ്രാഹ്മണസ്സ പിട്ഠിതോ പാവിസി. അഥ ഖോ ആയസ്മാ ഉദായീ ഏകച്ചേ വാതപാനേ വിവരന്തോ ഏകച്ചേ വാതപാനേ ഥകേന്തോ ഗബ്ഭം അനുപരിഗന്ത്വാ പിട്ഠിതോ ആഗന്ത്വാ തസ്സാ ബ്രാഹ്മണിയാ അങ്ഗമങ്ഗാനി പരാമസി. അഥ ഖോ സോ ബ്രാഹ്മണോ ആയസ്മതാ ഉദായിനാ സദ്ധിം പടിസമ്മോദിത്വാ അഗമാസി. അഥ ഖോ സോ ബ്രാഹ്മണോ അത്തമനോ അത്തമനവാചം നിച്ഛാരേസി – ‘‘ഉളാരാ ഇമേ സമണാ സക്യപുത്തിയാ യേ ഇമേ ഏവരൂപേ അരഞ്ഞേ വിഹരന്തി. ഭവമ്പി ഉദായീ ഉളാരോ യോ ഏവരൂപേ അരഞ്ഞേ വിഹരതീ’’തി.

ഏവം വുത്തേ സാ ബ്രാഹ്മണീ തം ബ്രാഹ്മണം ഏതദവോച – ‘‘കുതോ തസ്സ ഉളാരത്തതാ! യഥേവ മേ ത്വം അങ്ഗമങ്ഗാനി പരാമസി ഏവമേവ മേ സമണോ ഉദായീ അങ്ഗമങ്ഗാനി പരാമസീ’’തി. അഥ ഖോ സോ ബ്രാഹ്മണോ ഉജ്ഝായതി ഖിയ്യതി വിപാചേതി – ‘‘അലജ്ജിനോ ഇമേ സമണാ സക്യപുത്തിയാ ദുസ്സീലാ മുസാവാദിനോ. ഇമേ ഹി നാമ ധമ്മചാരിനോ സമചാരിനോ ബ്രഹ്മചാരിനോ സച്ചവാദിനോ സീലവന്തോ കല്യാണധമ്മാ പടിജാനിസ്സന്തി! നത്ഥി ഇമേസം സാമഞ്ഞം നത്ഥി ഇമേസം ബ്രഹ്മഞ്ഞം, നട്ഠം ഇമേസം സാമഞ്ഞം നട്ഠം ഇമേസം ബ്രഹ്മഞ്ഞം, കുതോ ഇമേസം സാമഞ്ഞം കുതോ ഇമേസം ബ്രഹ്മഞ്ഞം, അപഗതാ ഇമേ സാമഞ്ഞാ അപഗതാ ഇമേ ബ്രഹ്മഞ്ഞാ. കഥഞ്ഹി നാമ സമണോ ഉദായീ മമ ഭരിയായ അങ്ഗമങ്ഗാനി പരാമസിസ്സതി! ന ഹി സക്കാ കുലിത്ഥീഹി കുലധീതാഹി കുലകുമാരീഹി കുലസുണ്ഹാഹി കുലദാസീഹി ആരാമം വാ വിഹാരം വാ ഗന്തും. സചേ [സചേ ഹി (സ്യാ.)] കുലിത്ഥിയോ കുലധീതരോ [കുലധീതായോ (സീ. സ്യാ.)] കുലകുമാരിയോ കുലസുണ്ഹായോ കുലദാസിയോ ആരാമം വാ വിഹാരം വാ ഗച്ഛേയ്യും, താപി സമണാ സക്യപുത്തിയാ ദൂസേയ്യു’’ന്തി!

അസ്സോസും ഖോ ഭിക്ഖു തസ്സ ബ്രാഹ്മണസ്സ ഉജ്ഝായന്തസ്സ ഖിയ്യന്തസ്സ വിപാചേന്തസ്സ. യേ തേ ഭിക്ഖൂ അപ്പിച്ഛാ…പേ… തേ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ആയസ്മാ ഉദായീ മാതുഗാമേന സദ്ധിം കായസംസഗ്ഗം സമാപജ്ജിസ്സതീ’’തി! അഥ ഖോ തേ ഭിക്ഖൂ ആയസ്മന്തം ഉദായിം അനേകപരിയായേന വിഗരഹിത്വാ ഭഗവതോ ഏതമത്ഥം ആരോചേസും. അഥ ഖോ ഭഗവാ ഏതസ്മിം നിദാനേ ഏതസ്മിം പകരണേ ഭിക്ഖുസങ്ഘം സന്നിപാതാപേത്വാ ആയസ്മന്തം ഉദായിം പടിപുച്ഛി – ‘‘സച്ചം കിര ത്വം, ഉദായി, മാതുഗാമേന സദ്ധിം കായസംസഗ്ഗം സമാപജ്ജസീ’’തി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ – ‘‘അനനുച്ഛവികം, മോഘപുരിസ, അനനുലോമികം അപ്പതിരൂപം അസ്സാമണകം അകപ്പിയം അകരണീയം. കഥഞ്ഹി നാമ ത്വം, മോഘപുരിസ, മാതുഗാമേന സദ്ധിം കായസംസഗ്ഗം സമാപജ്ജിസ്സസി! നനു മയാ, മോഘപുരിസ, അനേകപരിയായേന വിരാഗായ ധമ്മോ ദേസിതോ നോ സരാഗായ…പേ… കാമപരിളാഹാനം വൂപസമോ അക്ഖാതോ. നേതം, മോഘപുരിസ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഇമം സിക്ഖാപദം ഉദ്ദിസേയ്യാഥ –

൨൭൦. ‘‘യോ പന ഭിക്ഖു ഓതിണ്ണോ വിപരിണതേന ചിത്തേന മാതുഗാമേന സദ്ധിം കായസംസഗ്ഗം സമാപജ്ജേയ്യ ഹത്ഥഗ്ഗാഹം വാ വേണിഗ്ഗാഹം വാ അഞ്ഞതരസ്സ വാ അഞ്ഞതരസ്സ വാ അങ്ഗസ്സ പരാമസനം, സങ്ഘാദിസേസോ’’തി.

൨൭൧. യോ പനാതി യോ യാദിസോ…പേ… ഭിക്ഖൂതി…പേ… അയം ഇമസ്മിം അത്ഥേ അധിപ്പേതോ ഭിക്ഖൂതി.

ഓതിണ്ണോ നാമ സാരത്തോ അപേക്ഖവാ പടിബദ്ധചിത്തോ.

വിപരിണതന്തി രത്തമ്പി ചിത്തം വിപരിണതം. ദുട്ഠമ്പി ചിത്തം വിപരിണതം. മൂള്ഹമ്പി ചിത്തം വിപരിണതം. അപിച, രത്തം ചിത്തം ഇമസ്മിം അത്ഥേ അധിപ്പേതം വിപരിണതന്തി.

മാതുഗാമോ നാമ മനുസ്സിത്ഥീ, ന യക്ഖീ ന പേതീ, ന തിരച്ഛാനഗതാ. അന്തമസോ തദഹുജാതാപി ദാരികാ, പഗേവ മഹത്തരീ.

സദ്ധിന്തി ഏകതോ.

കായസംസഗ്ഗം സമാപജ്ജേയ്യാതി അജ്ഝാചാരോ വുച്ചതി.

ഹത്ഥോ നാമ കപ്പരം ഉപാദായം യാവ അഗ്ഗനഖാ.

വേണീ നാമ സുദ്ധകേസാ വാ, സുത്തമിസ്സാ വാ, മാലാമിസ്സാ വാ, ഹിരഞ്ഞമിസ്സാ വാ, സുവണ്ണമിസ്സാ വാ, മുത്താമിസ്സാ വാ, മണിമിസ്സാ വാ.

അങ്ഗം നാമ ഹത്ഥഞ്ച വേണിഞ്ച ഠപേത്വാ അവസേസം അങ്ഗം നാമ.

൨൭൨. ആമസനാ, പരാമസനാ, ഓമസനാ, ഉമ്മസനാ, ഓലങ്ഘനാ, ഉല്ലങ്ഘനാ, ആകഡ്ഢനാ, പതികഡ്ഢനാ, അഭിനിഗ്ഗണ്ഹനാ, അഭിനിപ്പീളനാ, ഗഹണം, ഛുപനം.

ആമസനാ നാമ ആമട്ഠമത്താ.

പരാമസനാ നാമ ഇതോചിതോ ച സംചോപനാ.

ഓമസനാ നാമ ഹേട്ഠാ ഓരോപനാ.

ഉമ്മസനാ നാമ ഉദ്ധം ഉച്ചാരണാ.

ഓലങ്ഘനാ നാമ ഹേട്ഠാ ഓനമനാ.

ഉല്ലങ്ഘനാ നാമ ഉദ്ധം ഉച്ചാരണാ.

ആകഡ്ഢനാ നാമ ആവിഞ്ഛനാ [ആവിഞ്ജനാ (സീ. സ്യാ.)].

പതികഡ്ഢനാ നാമ പതിപ്പണാമനാ.

അഭിനിഗ്ഗണ്ഹനാ നാമ അങ്ഗം ഗഹേത്വാ നിപ്പീളനാ.

അഭിനിപ്പീളനാ നാമ കേനചി സഹ നിപ്പീളനാ.

ഗഹണം നാമ ഗഹിതമത്തം.

ഛുപനം നാമ ഫുട്ഠമത്തം.

സങ്ഘാദിസേസോതി…പേ… തേനപി വുച്ചതി സങ്ഘാദിസേസോതി.

൨൭൩. ഇത്ഥീ ച ഹോതി ഇത്ഥിസഞ്ഞീ സാരത്തോ ച ഭിക്ഖു ച. നം ഇത്ഥിയാ കായേന കായം ആമസതി പരാമസതി ഓമസതി ഉമ്മസതി ഓലങ്ഘേതി ഉല്ലങ്ഘേതി ആകഡ്ഢതി പതികഡ്ഢതി അഭിനിഗ്ഗണ്ഹാതി അഭിനിപ്പീളേതി ഗണ്ഹാതി ഛുപതി, ആപത്തി സങ്ഘാദിസേസസ്സ.

ഇത്ഥീ ച ഹോതി വേമതികോ സാരത്തോ ച. ഭിക്ഖു ച നം ഇത്ഥിയാ കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ഥുല്ലച്ചയസ്സ.

ഇത്ഥീ ച ഹോതി പണ്ഡകസഞ്ഞീ സാരത്തോ ച. ഭിക്ഖു ച നം ഇത്ഥിയാ കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ഥുല്ലച്ചയസ്സ.

ഇത്ഥീ ച ഹോതി പുരിസസഞ്ഞീ സാരത്തോ ച. ഭിക്ഖു ച നം ഇത്ഥിയാ കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ഥുല്ലച്ചയസ്സ.

ഇത്ഥീ ച ഹോതി തിരച്ഛാനഗതസഞ്ഞീ സാരത്തോ ച. ഭിക്ഖു ച നം ഇത്ഥിയാ കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ഥുല്ലച്ചയസ്സ.

പണ്ഡകോ ച ഹോതി പണ്ഡകസഞ്ഞീ സാരത്തോ ച. ഭിക്ഖു ച നം പണ്ഡകസ്സ കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ഥുല്ലച്ചയസ്സ.

പണ്ഡകോ ച ഹോതി വേമതികോ സാരത്തോ ച. ഭിക്ഖു ച നം പണ്ഡകസ്സ കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ദുക്കടസ്സ.

പണ്ഡകോ ച ഹോതി പുരിസസഞ്ഞീ സാരത്തോ ച. ഭിക്ഖു ച നം പണ്ഡകസ്സ കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ദുക്കടസ്സ.

പണ്ഡകോ ച ഹോതി തിരച്ഛാനഗതസഞ്ഞീ സാരത്തോ ച. ഭിക്ഖു ച നം പണ്ഡകസ്സ കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ദുക്കടസ്സ.

പണ്ഡകോ ച ഹോതി ഇത്ഥിസഞ്ഞീ സാരത്തോ ച. ഭിക്ഖു ച നം പണ്ഡകസ്സ കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ദുക്കടസ്സ.

പുരിസോ ച ഹോതി പുരിസസഞ്ഞീ സാരത്തോ ച. ഭിക്ഖു ച നം പുരിസസ്സ കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ദുക്കടസ്സ.

പുരിസോ ച ഹോതി വേമതികോ…പേ… പുരിസോ ച ഹോതി തിരച്ഛാനഗതസഞ്ഞീ… പുരിസോ ച ഹോതി ഇത്ഥിസഞ്ഞീ… പുരിസോ ച ഹോതി പണ്ഡകസഞ്ഞീ സാരത്തോ ച. ഭിക്ഖു ച നം പുരിസസ്സ കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ദുക്കടസ്സ.

തിരച്ഛാനഗതോ ച ഹോതി തിരച്ഛാനഗതസഞ്ഞീ സാരത്തോ ച. ഭിക്ഖു ച നം തിരച്ഛാനഗതസ്സ കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ദുക്കടസ്സ.

തിരച്ഛാനഗതോ ച ഹോതി വേമതികോ…പേ… തിരച്ഛാനഗതോ ച ഹോതി ഇത്ഥിസഞ്ഞീ… തിരച്ഛാനഗതോ ച ഹോതി പണ്ഡകസഞ്ഞീ… തിരച്ഛാനഗതോ ച ഹോതി. പുരിസസഞ്ഞീ സാരത്തോ ച. ഭിക്ഖു ച നം തിരച്ഛാനഗതസ്സ കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ദുക്കടസ്സ.

ഏകമൂലകം നിട്ഠിതം.

൨൭൪. ദ്വേ ഇത്ഥിയോ ദ്വിന്നം ഇത്ഥീനം ഇത്ഥിസഞ്ഞീ സാരത്തോ ച. ഭിക്ഖു ച നം ദ്വിന്നം ഇത്ഥീനം കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ദ്വിന്നം സങ്ഘാദിസേസാനം.

ദ്വേ ഇത്ഥിയോ ദ്വിന്നം ഇത്ഥീനം വേമതികോ സാരത്തോ ച. ഭിക്ഖു ച നം ദ്വിന്നം ഇത്ഥീനം കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ദ്വിന്നം ഥുല്ലച്ചയാനം.

ദ്വേ ഇത്ഥിയോ ദ്വിന്നം ഇത്ഥീനം പണ്ഡകസഞ്ഞീ…പേ… പുരിസസഞ്ഞീ… തിരച്ഛാനഗതസഞ്ഞീ സാരത്തോ ച. ഭിക്ഖു ച ദ്വിന്നം ഇത്ഥീനം കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ദ്വിന്നം ഥുല്ലച്ചയാനം.

ദ്വേ പണ്ഡകാ ദ്വിന്നം പണ്ഡകാനം പണ്ഡകസഞ്ഞീ സാരത്തോ ച ഭിക്ഖു ച നം ദ്വിന്നം പണ്ഡകാനം കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ദ്വിന്നം ഥുല്ലച്ചയാനം.

ദ്വേ പണ്ഡകാ ദ്വിന്നം പണ്ഡകാനം വേമതികോ…പേ… പുരിസസഞ്ഞീ… തിരച്ഛാനഗതസഞ്ഞീ… ഇത്ഥിസഞ്ഞീ സാരത്തോ ച. ഭിക്ഖു ച നം ദ്വിന്നം പണ്ഡകാനം കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ദ്വിന്നം ദുക്കടാനം.

ദ്വേ പുരിസാ ദ്വിന്നം പുരിസാനം പുരിസസഞ്ഞീ സാരത്തോ ച ഭിക്ഖു ച നം ദ്വിന്നം പുരിസാനം കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ദ്വിന്നം ദുക്കടാനം.

ദ്വേ പുരിസാ ദ്വിന്നം പുരിസാനം വേമതികോ…പേ… തിരച്ഛാനഗതസഞ്ഞീ… ഇത്ഥിസഞ്ഞീ… പണ്ഡകസഞ്ഞീ സാരത്തോ ച. ഭിക്ഖു ച നം ദ്വിന്നം പുരിസാനം കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ദ്വിന്നം ദുക്കടാനം.

ദ്വേ തിരച്ഛാനഗതാ ദ്വിന്നം തിരച്ഛാനഗതാനം തിരച്ഛാനഗതസഞ്ഞീ സാരത്തോ ച. ഭിക്ഖു ച നം ദ്വിന്നം തിരച്ഛാനഗതാനം കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ദ്വിന്നം ദുക്കടാനം.

ദ്വേ തിരച്ഛാനഗതാ ദ്വിന്നം തിരച്ഛാനഗതാനം വേമതികോ…പേ… ഇത്ഥിസഞ്ഞീ… പണ്ഡകസഞ്ഞീ … പുരിസസഞ്ഞീ സാരത്തോ ച. ഭിക്ഖു ച നം ദ്വിന്നം തിരച്ഛാനഗതാനം കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ദ്വിന്നം ദുക്കടാനം.

൨൭൫. ഇത്ഥീ ച പണ്ഡകോ ച ഉഭിന്നം ഇത്ഥിസഞ്ഞീ സാരത്തോ ച. ഭിക്ഖു ച നം ഉഭിന്നം കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി സങ്ഘാദിസേസേന ദുക്കടസ്സ.

ഇത്ഥീ ച പണ്ഡകോ ച ഉഭിന്നം വേമതികോ സാരത്തോ ച. ഭിക്ഖു ച നം ഉഭിന്നം കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ഥുല്ലച്ചയേന ദുക്കടസ്സ.

ഇത്ഥീ ച പണ്ഡകോ ച ഉഭിന്നം പണ്ഡകസഞ്ഞീ സാരത്തോ ച. ഭിക്ഖു ച നം ഉഭിന്നം കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ദ്വിന്നം ഥുല്ലച്ചയാനം.

ഇത്ഥീ ച പണ്ഡകോ ച ഉഭിന്നം പുരിസസഞ്ഞീ സാരത്തോ ച. ഭിക്ഖു ച നം ഉഭിന്നം കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ഥുല്ലച്ചയേന ദുക്കടസ്സ.

ഇത്ഥീ ച പണ്ഡകോ ച ഉഭിന്നം തിരച്ഛാനഗതസഞ്ഞീ സാരത്തോ ച. ഭിക്ഖു ച നം ഉഭിന്നം കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ഥുല്ലച്ചയേന ദുക്കടസ്സ.

ഇത്ഥീ ച പുരിസോ ച ഉഭിന്നം ഇത്ഥിസഞ്ഞീ സാരത്തോ ച. ഭിക്ഖു ച നം ഉഭിന്നം കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി സങ്ഘാദിസേസേന ദുക്കടസ്സ.

ഇത്ഥീ ച പുരിസോ ച ഉഭിന്നം വേമതികോ…പേ… പണ്ഡകസഞ്ഞീ… പുരിസസഞ്ഞീ… തിരച്ഛാനഗതസഞ്ഞീ സാരത്തോ ച. ഭിക്ഖു ച നം ഉഭിന്നം കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ഥുല്ലച്ചയേന ദുക്കടസ്സ.

ഇത്ഥീ ച തിരച്ഛാനഗതോ ച ഉഭിന്നം ഇത്ഥിസഞ്ഞീ സാരത്തോ ച. ഭിക്ഖു ച നം ഉഭിന്നം കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി സങ്ഘാദിസേസേന ദുക്കടസ്സ.

ഇത്ഥീ ച തിരച്ഛാനഗതോ ച ഉഭിന്നം വേമതികോ…പേ… പണ്ഡകസഞ്ഞീ… പുരിസസഞ്ഞീ … തിരച്ഛാനഗതസഞ്ഞീ സാരത്തോ ച. ഭിക്ഖു ച നം ഉഭിന്നം കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ഥുല്ലച്ചയേന ദുക്കടസ്സ.

പണ്ഡകോ ച പുരിസോ ച ഉഭിന്നം പണ്ഡകസഞ്ഞീ സാരത്തോ ച. ഭിക്ഖു ച നം ഉഭിന്നം കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ഥുല്ലച്ചയേന ദുക്കടസ്സ.

പണ്ഡകോ ച പുരിസോ ച ഉഭിന്നം വേമതികോ…പേ… പുരിസസഞ്ഞീ… തിരച്ഛാനഗതസഞ്ഞീ… ഇത്ഥിസഞ്ഞീ സാരത്തോ ച. ഭിക്ഖു ച നം ഉഭിന്നം കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ദ്വിന്നം ദുക്കടാനം.

പണ്ഡകോ ച തിരച്ഛാനഗതോ ച ഉഭിന്നം പണ്ഡകസഞ്ഞീ സാരത്തോ ച. ഭിക്ഖു ച നം ഉഭിന്നം കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ഥുല്ലച്ചയേന ദുക്കടസ്സ.

പണ്ഡകോ ച തിരച്ഛാനഗതോ ച ഉഭിന്നം വേമതികോ…പേ… പുരിസസഞ്ഞീ… തിരച്ഛാനഗതസഞ്ഞീ… ഇത്ഥിസഞ്ഞീ സാരത്തോ ച. ഭിക്ഖു ച നം ഉഭിന്നം കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ദ്വിന്നം ദുക്കടാനം.

പുരിസോ ച തിരച്ഛാനഗതോ ച ഉഭിന്നം പുരിസസഞ്ഞീ സാരത്തോ ച. ഭിക്ഖു ച നം ഉഭിന്നം കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ദ്വിന്നം ദുക്കടാനം.

പുരിസോ ച തിരച്ഛാനഗതോ ച ഉഭിന്നം വേമതികോ…പേ… തിരച്ഛാനഗതസഞ്ഞീ… ഇത്ഥിസഞ്ഞീ… പണ്ഡകസഞ്ഞീ സാരത്തോ ച. ഭിക്ഖു ച നം ഉഭിന്നം കായേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ദ്വിന്നം ദുക്കടാനം.

ദുമൂലകം നിട്ഠിതം.

൨൭൬. ഇത്ഥീ ച ഹോതി ഇത്ഥിസഞ്ഞീ സാരത്തോ ച. ഭിക്ഖു ച നം ഇത്ഥിയാ കായേന കായപടിബദ്ധം ആമസതി പരാമസതി…പേ… ഗണ്ഹാതി ഛുപതി, ആപത്തി ഥുല്ലച്ചയസ്സ…പേ….

ദ്വേ ഇത്ഥിയോ ദ്വിന്നം ഇത്ഥീനം ഇത്ഥിസഞ്ഞീ സാരത്തോ ച. ഭിക്ഖു ച നം ദ്വിന്നം ഇത്ഥീനം കായേന കായപടിബദ്ധം ആമസതി പരാമസതി…പേ… ഗണ്ഹാതി ഛുപതി, ആപത്തി ദ്വിന്നം ഥുല്ലച്ചയാനം …പേ….

ഇത്ഥീ ച പണ്ഡകോ ച ഉഭിന്നം ഇത്ഥിസഞ്ഞീ സാരത്തോ ച. ഭിക്ഖു ച നം ഉഭിന്നം കായേന കായപടിബദ്ധം ആമസതി പരാമസതി…പേ… ഗണ്ഹാതി ഛുപതി, ആപത്തി ഥുല്ലച്ചയേന ദുക്കടസ്സ…പേ….

ഇത്ഥീ ച ഹോതി ഇത്ഥിസഞ്ഞീ സാരത്തോ ച. ഭിക്ഖു ച നം ഇത്ഥിയാ കായപടിബദ്ധേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ഥുല്ലച്ചയസ്സ…പേ….

ദ്വേ ഇത്ഥിയോ ദ്വിന്നം ഇത്ഥീനം ഇത്ഥിസഞ്ഞീ സാരത്തോ ച. ഭിക്ഖു ച നം ദ്വിന്നം ഇത്ഥീനം കായപടിബദ്ധേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ദ്വിന്നം ഥുല്ലച്ചയാനം…പേ….

ഇത്ഥീ ച പണ്ഡകോ ച ഉഭിന്നം ഇത്ഥിസഞ്ഞീ സാരത്തോ ച. ഭിക്ഖു ച നം ഉഭിന്നം കായപടിബദ്ധേന കായം ആമസതി പരാമസതി…പേ… ഗണ്ഹാതി ഛുപതി, ആപത്തി ഥുല്ലച്ചയേന ദുക്കടസ്സ…പേ….

ഇത്ഥീ ച ഹോതി ഇത്ഥിസഞ്ഞീ സാരത്തോ ച. ഭിക്ഖു ച നം ഇത്ഥിയാ കായപടിബദ്ധേന കായപടിബദ്ധം ആമസതി പരാമസതി…പേ… ഗണ്ഹാതി ഛുപതി, ആപത്തി ദുക്കടസ്സ…പേ….

ദ്വേ ഇത്ഥിയോ ദ്വിന്നം ഇത്ഥീനം ഇത്ഥിസഞ്ഞീ സാരത്തോ ച. ഭിക്ഖു ച നം ദ്വിന്നം ഇത്ഥീനം കായപടിബദ്ധേന കായപടിബദ്ധം ആമസതി പരാമസതി…പേ… ഗണ്ഹാതി ഛുപതി, ആപത്തി ദ്വിന്നം ദുക്കടാനം…പേ….

ഇത്ഥീ ച പണ്ഡകോ ച ഉഭിന്നം ഇത്ഥിസഞ്ഞീ സാരത്തോ ച. ഭിക്ഖു ച നം ഉഭിന്നം കായപടിബദ്ധേന കായപടിബദ്ധം ആമസതി പരാമസതി…പേ… ഗണ്ഹാതി ഛുപതി, ആപത്തി ദ്വിന്നം ദുക്കടാനം…പേ….

ഇത്ഥീ ച ഹോതി ഇത്ഥിസഞ്ഞീ സാരത്തോ ച. ഭിക്ഖു ച നം ഇത്ഥിയാ നിസ്സഗ്ഗിയേന കായം ആമസതി ആപത്തി ദുക്കടസ്സ…പേ….

ദ്വേ ഇത്ഥിയോ ദ്വിന്നം ഇത്ഥീനം ഇത്ഥിസഞ്ഞീ സാരത്തോ ച. ഭിക്ഖു ച നം ദ്വിന്നം ഇത്ഥീനം നിസ്സഗ്ഗിയേന കായം ആമസതി, ആപത്തി ദ്വിന്നം ദുക്കടാനം…പേ….

ഇത്ഥീ ച പണ്ഡകോ ച ഉഭിന്നം ഇത്ഥിസഞ്ഞീ സാരത്തോ ച. ഭിക്ഖു ച നം ഉഭിന്നം നിസ്സഗ്ഗിയേന കായം ആമസതി, ആപത്തി ദ്വിന്നം ദുക്കടാനം…പേ….

ഇത്ഥീ ച ഹോതി ഇത്ഥിസഞ്ഞീ സാരത്തോ ച. ഭിക്ഖു ച നം ഇത്ഥിയാ നിസ്സഗ്ഗിയേന കായപടിബദ്ധം ആമസതി, ആപത്തി ദുക്കടസ്സ…പേ….

ദ്വേ ഇത്ഥിയോ ദ്വിന്നം ഇത്ഥീനം ഇത്ഥിസഞ്ഞീ സാരത്തോ ച. ഭിക്ഖു ച നം ദ്വിന്നം ഇത്ഥീനം നിസ്സഗ്ഗിയേന കായപടിബദ്ധം ആമസതി, ആപത്തി ദ്വിന്നം ദുക്കടാനം…പേ….

ഇത്ഥീ ച പണ്ഡകോ ച ഉഭിന്നം ഇത്ഥിസഞ്ഞീ സാരത്തോ ച. ഭിക്ഖു ച നം ഉഭിന്നം നിസ്സഗ്ഗിയേന കായപടിബദ്ധം ആമസതി, ആപത്തി ദ്വിന്നം ദുക്കടാനം…പേ….

ഇത്ഥീ ച ഹോതി ഇത്ഥിസഞ്ഞീ സാരത്തോ ച. ഭിക്ഖു ച നം ഇത്ഥിയാ നിസ്സഗ്ഗിയേന നിസ്സഗ്ഗിയം ആമസതി, ആപത്തി ദുക്കടസ്സ…പേ….

ദ്വേ ഇത്ഥിയോ ദ്വിന്നം ഇത്ഥീനം ഇത്ഥിസഞ്ഞീ സാരത്തോ ച. ഭിക്ഖു ച നം ദ്വിന്നം ഇത്ഥീനം നിസ്സഗ്ഗിയേന നിസ്സഗ്ഗിയം ആമസതി, ആപത്തി ദ്വിന്നം ദുക്കടാനം…പേ….

ഇത്ഥീ ച പണ്ഡകോ ച ഉഭിന്നം ഇത്ഥിസഞ്ഞീ സാരത്തോ ച. ഭിക്ഖു ച നം ഉഭിന്നം നിസ്സഗ്ഗിയേന നിസ്സഗ്ഗിയം ആമസതി, ആപത്തി ദ്വിന്നം ദുക്കടാനം…പേ….

ഭിക്ഖുപേയ്യാലോ നിട്ഠിതോ.

൨൭൭. ഇത്ഥീ ച ഹോതി ഇത്ഥിസഞ്ഞീ സാരത്തോ ച. ഇത്ഥീ ച നം ഭിക്ഖുസ്സ കായേന കായം ആമസതി പരാമസതി ഓമസതി ഉമ്മസതി ഓലങ്ഘേതി ഉല്ലങ്ഘേതി ആകഡ്ഢതി പതികഡ്ഢതി അഭിനിഗ്ഗണ്ഹാതി അഭിനിപ്പീളേതി ഗണ്ഹാതി ഛുപതി, സേവനാധിപ്പായോ കായേന വായമതി ഫസ്സം പടിവിജാനാതി, ആപത്തി സങ്ഘാദിസേസസ്സ…പേ….

ദ്വേ ഇത്ഥിയോ ദ്വിന്നം ഇത്ഥീനം ഇത്ഥിസഞ്ഞീ സാരത്തോ ച. ഇത്ഥിയോ ച നം ഭിക്ഖുസ്സ കായേന കായം ആമസന്തി പരാമസന്തി ഓമസന്തി ഉമ്മസന്തി ഓലങ്ഘേന്തി ഉല്ലങ്ഘേന്തി ആകഡ്ഢന്തി പതികഡ്ഢന്തി അഭിനിഗ്ഗണ്ഹന്തി അഭിനിപ്പീളേന്തി ഗണ്ഹന്തി ഛുപന്തി, സേവനാധിപ്പായോ കായേന വായമതി ഫസ്സം പടിവിജാനാതി, ആപത്തി ദ്വിന്നം സങ്ഘാദിസേസാനം…പേ….

ഇത്ഥീ ച പണ്ഡകോ ച ഉഭിന്നം ഇത്ഥിസഞ്ഞീ സാരത്തോ ച. ഉഭോ ച നം ഭിക്ഖുസ്സ കായേന കായം ആമസന്തി പരാമസന്തി…പേ… ഗണ്ഹന്തി ഛുപന്തി, സേവനാധിപ്പായോ കായേന വായമതി ഫസ്സം പടിവിജാനാതി, ആപത്തി സങ്ഘാദിസേസേന ദുക്കടസ്സ…പേ….

ഇത്ഥീ ച ഹോതി ഇത്ഥിസഞ്ഞീ സാരത്തോ ച. ഇത്ഥീ ച നം ഭിക്ഖുസ്സ കായേന കായപടിബദ്ധം ആമസതി പരാമസതി…പേ… ഗണ്ഹാതി ഛുപതി, സേവനാധിപ്പായോ കായേന വായമതി ഫസ്സം പടിവിജാനാതി, ആപത്തി ഥുല്ലച്ചയസ്സ…പേ….

ദ്വേ ഇത്ഥിയോ ദ്വിന്നം ഇത്ഥീനം ഇത്ഥിസഞ്ഞീ സാരത്തോ ച. ഇത്ഥിയോ ച നം ഭിക്ഖുസ്സ കായേന കായപടിബദ്ധം ആമസന്തി പരാമസന്തി…പേ… ഗണ്ഹന്തി ഛുപന്തി, സേവനാധിപ്പായോ കായേന വായമതി ഫസ്സം പടിവിജാനാതി, ആപത്തി ദ്വിന്നം ഥുല്ലച്ചയാനം…പേ….

ഇത്ഥീ ച പണ്ഡകോ ച ഉഭിന്നം ഇത്ഥിസഞ്ഞീ സാരത്തോ ച. ഉഭോ ച നം ഭിക്ഖുസ്സ കായേന കായപടിബദ്ധം ആമസന്തി പരാമസന്തി…പേ… ഗണ്ഹന്തി ഛുപന്തി, സേവനാധിപ്പായോ കായേന വായമതി ഫസ്സം പടിവിജാനാതി, ആപത്തി ഥുല്ലച്ചയേന ദുക്കടസ്സ…പേ….

ഇത്ഥീ ച ഹോതി ഇത്ഥിസഞ്ഞീ സാരത്തോ ച. ഇത്ഥീ ച നം ഭിക്ഖുസ്സ കായപടിബദ്ധേന കായം ആമസതി പരാമസതി…പേ… ഗണ്ഹാതി ഛുപതി സേവനാധിപ്പായോ കായേന വായമതി ഫസ്സം പടിവിജാനാതി, ആപത്തി ഥുല്ലച്ചയസ്സ…പേ….

ദ്വേ ഇത്ഥിയോ ദ്വിന്നം ഇത്ഥീനം ഇത്ഥിസഞ്ഞീ സാരത്തോ ച. ഇത്ഥിയോ ച നം ഭിക്ഖുസ്സ കായപടിബദ്ധേന കായം ആമസന്തി പരാമസന്തി…പേ… ഗണ്ഹന്തി ഛുപന്തി, സേവനാധിപ്പായോ കായേന വായമതി ഫസ്സം പടിവിജാനാതി, ആപത്തി ദ്വിന്നം ഥുല്ലച്ചയാനം…പേ….

ഇത്ഥീ ച പണ്ഡകോ ച ഉഭിന്നം ഇത്ഥിസഞ്ഞീ സാരത്തോ ച. ഉഭോ ച നം ഭിക്ഖുസ്സ കായപടിബദ്ധേന കായം ആമസന്തി പരാമസന്തി…പേ… ഗണ്ഹന്തി ഛുപന്തി, സേവനാധിപ്പായോ കായേന വായമതി ഫസ്സം പടിവിജാനാതി, ആപത്തി ഥുല്ലച്ചയേന ദുക്കടസ്സ…പേ….

൨൭൮. ഇത്ഥീ ച ഹോതി ഇത്ഥിസഞ്ഞീ സാരത്തോ ച. ഇത്ഥീ ച നം ഭിക്ഖുസ്സ കായപടിബദ്ധേന കായപടിബദ്ധം ആമസതി പരാമസതി…പേ… ഗണ്ഹാതി ഛുപതി, സേവനാധിപ്പായോ കായേന വായമതി ഫസ്സം പടിവിജാനാതി, ആപത്തി ദുക്കടസ്സ…പേ….

ദ്വേ ഇത്ഥിയോ ദ്വിന്നം ഇത്ഥീനം ഇത്ഥിസഞ്ഞീ സാരത്തോ ച. ഇത്ഥിയോ ച നം ഭിക്ഖുസ്സ കായപടിബദ്ധേന കായപടിബദ്ധം ആമസന്തി പരാമസന്തി…പേ… ഗണ്ഹന്തി ഛുപന്തി, സേവനാധിപ്പായോ കായേന വായമതി ഫസ്സം പടിവിജാനാതി, ആപത്തി ദ്വിന്നം ദുക്കടാനം…പേ….

ഇത്ഥീ ച പണ്ഡകോ ച ഉഭിന്നം ഇത്ഥിസഞ്ഞീ സാരത്തോ ച. ഉഭോ ച നം ഭിക്ഖുസ്സ കായപടിബദ്ധേന കായപടിബദ്ധം ആമസന്തി പരാമസന്തി…പേ… ഗണ്ഹന്തി ഛുപന്തി, സേവനാധിപ്പായോ കായേന വായമതി ഫസ്സം പടിവിജാനാതി, ആപത്തി ദ്വിന്നം ദുക്കടാനം…പേ….

ഇത്ഥീ ച ഹോതി ഇത്ഥിസഞ്ഞീ സാരത്തോ ച. ഇത്ഥീ ച നം ഭിക്ഖുസ്സ നിസ്സഗ്ഗിയേന കായം ആമസതി. സേവനാധിപ്പായോ കായേന വായമതി ഫസ്സം പടിവിജാനാതി, ആപത്തി ദുക്കടസ്സ…പേ….

ദ്വേ ഇത്ഥിയോ ദ്വിന്നം ഇത്ഥീനം ഇത്ഥിസഞ്ഞീ സാരത്തോ ച. ഇത്ഥിയോ ച നം ഭിക്ഖുസ്സ നിസ്സഗ്ഗിയേന കായം ആമസന്തി. സേവനാധിപ്പായോ കായേന വായമതി ഫസ്സം പടിവിജാനാതി, ആപത്തി ദ്വിന്നം ദുക്കടാനം…പേ….

ഇത്ഥീ ച പണ്ഡകോ ച ഉഭിന്നം ഇത്ഥിസഞ്ഞീ സാരത്തോ ച. ഉഭോ ച നം ഭിക്ഖുസ്സ നിസ്സഗ്ഗിയേന കായം ആമസന്തി. സേവനാധിപ്പായോ കായേന വായമതി ഫസ്സം പടിവിജാനാതി, ആപത്തി ദ്വിന്നം ദുക്കടാനം…പേ….

ഇത്ഥീ ച ഹോതി ഇത്ഥിസഞ്ഞീ സാരത്തോ ച. ഇത്ഥീ ച നം ഭിക്ഖുസ്സ നിസ്സഗ്ഗിയേന കായപടിബദ്ധം ആമസതി. സേവനാധിപ്പായോ കായേന വായമതി ഫസ്സം പടിവിജാനാതി, ആപത്തി ദുക്കടസ്സ…പേ….

ദ്വേ ഇത്ഥിയോ ദ്വിന്നം ഇത്ഥീനം ഇത്ഥിസഞ്ഞീ സാരത്തോ ച. ഇത്ഥിയോ ച നം ഭിക്ഖുസ്സ നിസ്സഗ്ഗിയേന കായപടിബദ്ധം ആമസന്തി. സേവനാധിപ്പായോ കായേന വായമതി ഫസ്സം പടിവിജാനാതി, ആപത്തി ദ്വിന്നം ദുക്കടാനം…പേ….

ഇത്ഥീ ച പണ്ഡകോ ച ഉഭിന്നം ഇത്ഥിസഞ്ഞീ സാരത്തോ ച. ഉഭോ ച നം ഭിക്ഖുസ്സ നിസ്സഗ്ഗിയേന കായപടിബദ്ധം ആമസന്തി. സേവനാധിപ്പായോ കായേന വായമതി ഫസ്സം പടിവിജാനാതി, ആപത്തി ദ്വിന്നം ദുക്കടാനം…പേ….

ഇത്ഥീ ച ഹോതി ഇത്ഥിസഞ്ഞീ സാരത്തോ ച. ഇത്ഥീ ച നം ഭിക്ഖുസ്സ നിസ്സഗ്ഗിയേന നിസ്സഗ്ഗിയം ആമസതി. സേവനാധിപ്പായോ കായേന വായമതി, ന ച ഫസ്സം പടിവിജാനാതി, ആപത്തി ദുക്കടസ്സ…പേ….

ദ്വേ ഇത്ഥിയോ ദ്വിന്നം ഇത്ഥീനം ഇത്ഥിസഞ്ഞീ സാരത്തോ ച. ഇത്ഥിയോ ച നം ഭിക്ഖുസ്സ നിസ്സഗ്ഗിയേന നിസ്സഗ്ഗിയം ആമസന്തി. സേവനാധിപ്പായോ കായേന വായമതി, ന ച ഫസ്സം പടിവിജാനാതി, ആപത്തി ദ്വിന്നം ദുക്കടാനം…പേ….

ഇത്ഥീ ച പണ്ഡകോ ച ഉഭിന്നം ഇത്ഥിസഞ്ഞീ സാരത്തോ ച. ഉഭോ ച നം ഭിക്ഖുസ്സ നിസ്സഗ്ഗിയേന നിസ്സഗ്ഗിയം ആമസന്തി. സേവനാധിപ്പായോ കായേന വായമതി, ന ച ഫസ്സം പടിവിജാനാതി, ആപത്തി ദ്വിന്നം ദുക്കടാനം…പേ….

൨൭൯. സേവനാധിപ്പായോ കായേന വായമതി ഫസ്സം പടിവിജാനാതി, ആപത്തി സങ്ഘാദിസേസസ്സ.

സേവനാധിപ്പായോ കായേന വായമതി, ന ച ഫസ്സം പടിവിജാനാതി, ആപത്തി ദുക്കടസ്സ.

സേവനാധിപ്പായോ ന ച കായേന വായമതി, ഫസ്സം പടിവിജാനാതി, അനാപത്തി.

സേവനാധിപ്പായോ ന ച കായേന വായമതി, ന ച ഫസ്സം പടിവിജാനാതി, അനാപത്തി.

മോക്ഖാധിപ്പായോ കായേന വായമതി, ഫസ്സം പടിവിജാനാതി, അനാപത്തി.

മോക്ഖാധിപ്പായോ കായേന വായമതി, ന ച ഫസ്സം പടിവിജാനാതി, അനാപത്തി.

മോക്ഖാധിപ്പായോ ന ച കായേന വായമതി, ഫസ്സം പടിവിജാനാതി, അനാപത്തി.

മോക്ഖാധിപ്പായോ ന ച കായേന വായമതി, ന ച ഫസ്സം പടിവിജാനാതി, അനാപത്തി.

൨൮൦. അനാപത്തി അസഞ്ചിച്ച, അസതിയാ, അജാനന്തസ്സ, അസാദിയന്തസ്സ, ഉമ്മത്തകസ്സ, ഖിത്തചിത്തസ്സ, വേദനാട്ടസ്സ, ആദികമ്മികസ്സാതി.

വിനീതവത്ഥുഉദ്ദാനഗാഥാ

മാതാ ധീതാ ഭഗിനീ ച, ജായാ യക്ഖീ ച പണ്ഡകോ;

സുത്താ മതാ തിരച്ഛാനാ, ദാരുധിതലികായ ച.

സമ്പീളേ സങ്കമോ മഗ്ഗോ, രുക്ഖോ നാവാ ച രജ്ജു ച;

ദണ്ഡോ പത്തം പണാമേസി, വന്ദേ വായമി നച്ഛുപേതി.

വിനീതവത്ഥു

൨൮൧. തേന ഖോ പന സമയേന അഞ്ഞതരോ ഭിക്ഖു മാതുയാ മാതുപേമേന ആമസി. തസ്സ കുക്കുച്ചം അഹോസി – ‘‘ഭഗവതാ സിക്ഖാപദം പഞ്ഞത്തം, കച്ചി നു ഖോ അഹം സങ്ഘാദിസേസം ആപത്തിം ആപന്നോ’’തി? ഭഗവതോ ഏതമത്ഥം ആരോചേസി. ‘‘അനാപത്തി, ഭിക്ഖു, സങ്ഘാദിസേസസ്സ; ആപത്തി ദുക്കടസ്സാ’’തി.

തേന ഖോ പന സമയേന അഞ്ഞതരോ ഭിക്ഖു ധീതുയാ ധീതുപേമേന ആമസി…പേ… ഭഗിനിയാ ഭഗിനിപേമേന ആമസി. തസ്സ കുക്കുച്ചം അഹോസി…പേ… ‘‘അനാപത്തി, ഭിക്ഖു, സങ്ഘാദിസേസസ്സ; ആപത്തി ദുക്കടസ്സാ’’തി.

തേന ഖോ പന സമയേന അഞ്ഞതരോ ഭിക്ഖു പുരാണദുതിയികായ കായസംസഗ്ഗം സമാപജ്ജി. തസ്സ കുക്കുച്ചം അഹോസി…പേ… ‘‘ആപത്തിം ത്വം, ഭിക്ഖു, ആപന്നോ സങ്ഘാദിസേസ’’ന്തി.

തേന ഖോ പന സമയേന അഞ്ഞതരോ ഭിക്ഖു യക്ഖിനിയാ കായസംസഗ്ഗം സമാപജ്ജി. തസ്സ കുക്കുച്ചം അഹോസി…പേ… ‘‘അനാപത്തി, ഭിക്ഖു, സങ്ഘാദിസേസസ്സ; ആപത്തി ഥുല്ലച്ചയസ്സാ’’തി.

തേന ഖോ പന സമയേന അഞ്ഞതരോ ഭിക്ഖു പണ്ഡകസ്സ കായസംസഗ്ഗം സമാപജ്ജി. തസ്സ കുക്കുച്ചം അഹോസി…പേ… ‘‘അനാപത്തി, ഭിക്ഖു, സങ്ഘാദിസേസസ്സ; ആപത്തി ഥുല്ലച്ചയസ്സാ’’തി.

തേന ഖോ പന സമയേന അഞ്ഞതരോ ഭിക്ഖു സുത്തിത്ഥിയാ കായസംസഗ്ഗം സമാപജ്ജി. തസ്സ കുക്കുച്ചം അഹോസി…പേ… ‘‘ആപത്തിം ത്വം, ഭിക്ഖു, ആപന്നോ സങ്ഘാദിസേസ’’ന്തി.

തേന ഖോ പന സമയേന അഞ്ഞതരോ ഭിക്ഖു മതിത്ഥിയാ കായസംസഗ്ഗം സമാപജ്ജി. തസ്സ കുക്കുച്ചം അഹോസി…പേ… ‘‘അനാപത്തി, ഭിക്ഖു, സങ്ഘാദിസേസസ്സ; ആപത്തി ഥുല്ലച്ചയസ്സാ’’തി.

തേന ഖോ പന സമയേന അഞ്ഞതരോ ഭിക്ഖു തിരച്ഛാനഗതിത്ഥിയാ കായസംസഗ്ഗം സമാപജ്ജി. തസ്സ കുക്കുച്ചം അഹോസി…പേ… ‘‘അനാപത്തി, ഭിക്ഖു, സങ്ഘാദിസേസസ്സ; ആപത്തി ദുക്കടസ്സാ’’തി.

തേന ഖോ പന സമയേന അഞ്ഞതരോ ഭിക്ഖു ദാരുധീതലികായ കായസംസഗ്ഗം സമാപജ്ജി. തസ്സ കുക്കുച്ചം അഹോസി…പേ… ‘‘അനാപത്തി, ഭിക്ഖു, സങ്ഘാദിസേസസ്സ; ആപത്തി ദുക്കടസ്സാ’’തി.

൨൮൨. തേന ഖോ പന സമയേന സമ്ബഹുലാ ഇത്ഥിയോ അഞ്ഞതരം ഭിക്ഖും സമ്പീളേത്വാ ബാഹാപരമ്പരായ ആനേസും. തസ്സ കുക്കുച്ചം അഹോസി…പേ… ‘‘സാദിയി ത്വം, ഭിക്ഖൂ’’തി? ‘‘നാഹം, ഭഗവാ, സാദിയി’’ന്തി. ‘‘അനാപത്തി, ഭിക്ഖൂ, അസാദിയന്തസ്സാ’’തി.

തേന ഖോ പന സമയേന അഞ്ഞതരോ ഭിക്ഖു ഇത്ഥിയാ അഭിരൂള്ഹം സങ്കമം സാരത്തോ സഞ്ചാലേസി. തസ്സ കുക്കുച്ചം അഹോസി…പേ… ‘‘അനാപത്തി, ഭിക്ഖു, സങ്ഘാദിസേസസ്സ; ആപത്തി ദുക്കടസ്സാ’’തി.

തേന ഖോ പന സമയേന അഞ്ഞതരോ ഭിക്ഖു ഇത്ഥിം പടിപഥേ പസ്സിത്വാ സാരത്തോ അംസകൂടേന പഹാരം അദാസി. തസ്സ കുക്കുച്ചം അഹോസി…പേ… ‘‘ആപത്തിം ത്വം, ഭിക്ഖു, ആപന്നോ സങ്ഘാദിസേസ’’ന്തി.

തേന ഖോ പന സമയേന അഞ്ഞതരോ ഭിക്ഖു ഇത്ഥിയാ അഭിരൂള്ഹം രുക്ഖം സാരത്തോ സഞ്ചാലേസി. തസ്സ കുക്കുച്ചം അഹോസി…പേ… ‘‘അനാപത്തി, ഭിക്ഖു, സങ്ഘാദിസേസസ്സ; ആപത്തി ദുക്കടസ്സാ’’തി.

തേന ഖോ പന സമയേന അഞ്ഞതരോ ഭിക്ഖു ഇത്ഥിയാ അഭിരൂള്ഹം നാവം സാരത്തോ സഞ്ചാലേസി. തസ്സ കുക്കുച്ചം അഹോസി…പേ… ‘‘അനാപത്തി, ഭിക്ഖു, സങ്ഘാദിസേസസ്സ; ആപത്തി ദുക്കടസ്സാ’’തി.

തേന ഖോ പന സമയേന അഞ്ഞതരോ ഭിക്ഖു ഇത്ഥിയാ ഗഹിതം രജ്ജും സാരത്തോ ആവിഞ്ഛി [ആവിഞ്ജി (സീ. സ്യാ.)]. തസ്സ കുക്കുച്ചം അഹോസി…പേ… ‘‘അനാപത്തി, ഭിക്ഖു, സങ്ഘാദിസേസസ്സ; ആപത്തി ഥുല്ലച്ചയസ്സാ’’തി.

തേന ഖോ പന സമയേന അഞ്ഞതരോ ഭിക്ഖു ഇത്ഥിയാ ഗഹിതം ദണ്ഡം സാരത്തോ ആവിഞ്ഛി. തസ്സ കുക്കുച്ചം അഹോസി…പേ… ‘‘അനാപത്തി, ഭിക്ഖു, സങ്ഘാദിസേസസ്സ; ആപത്തി ഥുല്ലച്ചയസ്സാ’’തി.

തേന ഖോ പന സമയേന അഞ്ഞതരോ ഭിക്ഖു സാരത്തോ ഇത്ഥിം പത്തേന പണാമേസി. തസ്സ കുക്കുച്ചം അഹോസി…പേ… ‘‘അനാപത്തി, ഭിക്ഖു, സങ്ഘാദിസേസസ്സ; ആപത്തി ഥുല്ലച്ചയസ്സാ’’തി.

തേന ഖോ പന സമയേന അഞ്ഞതരോ ഭിക്ഖു ഇത്ഥിയാ വന്ദന്തിയാ സാരത്തോ പാദം ഉച്ചാരേസി. തസ്സ കുക്കുച്ചം അഹോസി…പേ… ‘‘ആപത്തിം ത്വം, ഭിക്ഖു, ആപന്നോ സങ്ഘാദിസേസ’’ന്തി.

തേന ഖോ പന സമയേന അഞ്ഞതരോ ഭിക്ഖു ഇത്ഥിം ഗഹേസ്സാമീതി വായമിത്വാ ന ഛുപി.

തസ്സ കുക്കുച്ചം അഹോസി…പേ… ‘‘അനാപത്തി, ഭിക്ഖു, സങ്ഘാദിസേസസ്സ; ആപത്തി ദുക്കടസ്സാ’’തി.

കായസംസഗ്ഗസിക്ഖാപദം നിട്ഠിതം ദുതിയം.