൭. സത്തമസിക്ഖാപദം

൧൨൦൬. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഭിക്ഖുനിയോ ഭിക്ഖുനിയാ ഉമ്മദ്ദാപേന്തിപി പരിമദ്ദാപേന്തിപി. മനുസ്സാ വിഹാരചാരികം ആഹിണ്ഡന്താ പസ്സിത്വാ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ഭിക്ഖുനിയോ ഭിക്ഖുനിയാ ഉമ്മദ്ദാപേസ്സന്തിപി പരിമദ്ദാപേസ്സന്തിപി സേയ്യഥാപി ഗിഹിനിയോ കാമഭോഗിനിയോ’’തി! അസ്സോസും ഖോ ഭിക്ഖുനിയോ തേസം മനുസ്സാനം ഉജ്ഝായന്താനം ഖിയ്യന്താനം വിപാചേന്താനം. യാ താ ഭിക്ഖുനിയോ അപ്പിച്ഛാ…പേ… താ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ഭിക്ഖുനിയോ ഭിക്ഖുനിയാ ഉമ്മദ്ദാപേസ്സന്തിപി പരിമദ്ദാപേസ്സന്തിപീ’’തി…പേ… സച്ചം കിര, ഭിക്ഖവേ, ഭിക്ഖുനിയോ ഭിക്ഖുനിയാ ഉമ്മദ്ദാപേന്തിപി പരിമദ്ദാപേന്തിപീതി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ, ഭിക്ഖവേ, ഭിക്ഖുനിയോ ഭിക്ഖുനിയാ ഉമ്മദ്ദാപേസ്സന്തിപി പരിമദ്ദാപേസ്സന്തിപി! നേതം, ഭിക്ഖവേ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഭിക്ഖുനിയോ ഇമം സിക്ഖാപദം ഉദ്ദിസന്തു –

൧൨൦൭. ‘‘യാ പന ഭിക്ഖുനീ ഭിക്ഖുനിയാ ഉമ്മദ്ദാപേയ്യ വാ പരിമദ്ദാപേയ്യ വാ, പാചിത്തിയ’’ന്തി.

൧൨൦൮. യാ പനാതി യാ യാദിസാ…പേ… ഭിക്ഖുനീതി…പേ… അയം ഇമസ്മിം അത്ഥേ അധിപ്പേതാ ഭിക്ഖുനീതി.

ഭിക്ഖുനിയാതി അഞ്ഞായ ഭിക്ഖുനിയാ. ഉമ്മദ്ദാപേയ്യ വാതി ഉമ്മദ്ദാപേതി [ഉബ്ബട്ടാപേതി (സീ.)], ആപത്തി പാചിത്തിയസ്സ. പരിമദ്ദാപേയ്യ വാതി സമ്ബാഹാപേതി, ആപത്തി പാചിത്തിയസ്സ.

൧൨൦൯. അനാപത്തി ഗിലാനായ, ആപദാസു, ഉമ്മത്തികായ, ആദികമ്മികായാതി.

സത്തമസിക്ഖാപദം നിട്ഠിതം.