൩. തതിയസിക്ഖാപദം

൧൧൯൦. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന അഞ്ഞതരാ ഭിക്ഖുനീ അഞ്ഞതരിസ്സാ ഇത്ഥിയാ കുലൂപികാ ഹോതി. അഥ ഖോ സാ ഇത്ഥീ തം ഭിക്ഖുനിം ഏതദവോച – ‘‘ഹന്ദായ്യേ, ഇമം സങ്ഘാണിം അമുകായ നാമ ഇത്ഥിയാ ദേഹീ’’തി. അഥ ഖോ സാ ഭിക്ഖുനീ – ‘‘സചാഹം പത്തേന ആദായ ഗച്ഛാമി വിസ്സരോ മേ ഭവിസ്സതീ’’തി പടിമുഞ്ചിത്വാ അഗമാസി. തസ്സാ രഥികായ സുത്തകേ ഛിന്നേ വിപ്പകിരിയിംസു. മനുസ്സാ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ഭിക്ഖുനിയോ സങ്ഘാണിം ധാരേസ്സന്തി, സേയ്യഥാപി ഗിഹിനിയോ കാമഭോഗിനിയോ’’തി! അസ്സോസും ഖോ ഭിക്ഖുനിയോ തേസം മനുസ്സാനം ഉജ്ഝായന്താനം ഖിയ്യന്താനം വിപാചേന്താനം. യാ താ ഭിക്ഖുനിയോ അപ്പിച്ഛാ…പേ. … താ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ഭിക്ഖുനീ സങ്ഘാണിം ധാരേസ്സതീ’’തി…പേ… സച്ചം കിര, ഭിക്ഖവേ, ഭിക്ഖുനീ സങ്ഘാണിം ധാരേതീ’’തി [ധാരേസീതി (ക.)]? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ, ഭിക്ഖവേ, ഭിക്ഖുനീ സങ്ഘാണിം ധാരേസ്സതി! നേതം, ഭിക്ഖവേ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഭിക്ഖുനിയോ ഇമം സിക്ഖാപദം ഉദ്ദിസന്തു –

൧൧൯൧. ‘‘യാ പന ഭിക്ഖുനീ സങ്ഘാണിം ധാരേയ്യ, പാചിത്തിയ’’ന്തി.

൧൧൯൨. യാ പനാതി യാ യാദിസാ…പേ… ഭിക്ഖുനീതി…പേ… അയം ഇമസ്മിം അത്ഥേ അധിപ്പേതാ ഭിക്ഖുനീതി.

സങ്ഘാണി നാമ യാ കാചി കടൂപഗാ.

ധാരേയ്യാതി സകിമ്പി ധാരേതി, ആപത്തി പാചിത്തിയസ്സ.

൧൧൯൩. അനാപത്തി ആബാധപ്പച്ചയാ, കടിസുത്തകം ധാരേതി, ഉമ്മത്തികായ, ആദികമ്മികായാതി.

തതിയസിക്ഖാപദം നിട്ഠിതം.