൧൧. ഏകാദസമസിക്ഖാപദം

൧൨൧൪. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഭിക്ഖുനിയോ ഭിക്ഖുസ്സ പുരതോ അനാപുച്ഛാ ആസനേ നിസീദന്തി. ഭിക്ഖൂ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ഭിക്ഖുനിയോ ഭിക്ഖുസ്സ പുരതോ അനാപുച്ഛാ ആസനേ നിസീദിസ്സന്തീ’’തി…പേ… സച്ചം കിര, ഭിക്ഖവേ, ഭിക്ഖുനിയോ ഭിക്ഖുസ്സ പുരതോ അനാപുച്ഛാ ആസനേ നിസീദന്തീതി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ, ഭിക്ഖവേ, ഭിക്ഖുനിയോ ഭിക്ഖുസ്സ പുരതോ അനാപുച്ഛാ ആസനേ നിസീദിസ്സന്തി! നേതം, ഭിക്ഖവേ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഭിക്ഖുനിയോ ഇമം സിക്ഖാപദം ഉദ്ദിസന്തു –

൧൨൧൫. ‘‘യാ പന ഭിക്ഖുനീ ഭിക്ഖുസ്സ പുരതോ അനാപുച്ഛാ ആസനേ നിസീദേയ്യ, പാചിത്തിയ’’ന്തി.

൧൨൧൬. യാ പനാതി യാ യാദിസാ…പേ… ഭിക്ഖുനീതി…പേ… അയം ഇമസ്മിം അത്ഥേ അധിപ്പേതാ ഭിക്ഖുനീതി.

ഭിക്ഖുസ്സ പുരതോതി ഉപസമ്പന്നസ്സ പുരതോ. അനാപുച്ഛാതി അനപലോകേത്വാ. ആസനേ നിസീദേയ്യാതി അന്തമസോ ഛമായപി നിസീദതി, ആപത്തി പാചിത്തിയസ്സ.

൧൨൧൭. അനാപുച്ഛിതേ അനാപുച്ഛിതസഞ്ഞാ ആസനേ നിസീദതി, ആപത്തി പാചിത്തിയസ്സ. അനാപുച്ഛിതേ വേമതികാ ആസനേ നിസീദതി, ആപത്തി പാചിത്തിയസ്സ. അനാപുച്ഛിതേ ആപുച്ഛിതസഞ്ഞാ ആസനേ നിസീദതി, ആപത്തി പാചിത്തിയസ്സ.

ആപുച്ഛിതേ അനാപുച്ഛിതസഞ്ഞാ, ആപത്തി ദുക്കടസ്സ. ആപുച്ഛിതേ വേമതികാ, ആപത്തി ദുക്കടസ്സ. ആപുച്ഛിതേ ആപുച്ഛിതസഞ്ഞാ, അനാപത്തി.

൧൨൧൮. അനാപത്തി ആപുച്ഛാ ആസനേ നിസീദതി, ഗിലാനായ, ആപദാസു, ഉമ്മത്തികായ, ആദികമ്മികായാതി.

ഏകാദസമസിക്ഖാപദം നിട്ഠിതം.