൧. പഠമസിക്ഖാപദം

൧൧൭൮. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖുനിയോ ഛത്തുപാഹനം ധാരേന്തി. മനുസ്സാ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ഭിക്ഖുനിയോ ഛത്തുപാഹനം ധാരേസ്സന്തി, സേയ്യഥാപി ഗിഹിനിയോ കാമഭോഗിനിയോ’’തി! അസ്സോസും ഖോ ഭിക്ഖുനിയോ തേസം മനുസ്സാനം ഉജ്ഝായന്താനം ഖിയ്യന്താനം വിപാചേന്താനം. യാ താ ഭിക്ഖുനിയോ അപ്പിച്ഛാ…പേ… താ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ഛബ്ബഗ്ഗിയാ ഭിക്ഖുനിയോ ഛത്തുപാഹനം ധാരേസ്സന്തീ’’തി…പേ… സച്ചം കിര, ഭിക്ഖവേ, ഛബ്ബഗ്ഗിയാ ഭിക്ഖുനിയോ ഛത്തുപാഹനം ധാരേന്തീതി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ, ഭിക്ഖവേ, ഛബ്ബഗ്ഗിയാ ഭിക്ഖുനിയോ ഛത്തുപാഹനം ധാരേസ്സന്തി! നേതം, ഭിക്ഖവേ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഭിക്ഖുനിയോ ഇമം സിക്ഖാപദം ഉദ്ദിസന്തു –

‘‘യാ പന ഭിക്ഖുനീ ഛത്തുപാഹനം ധാരേയ്യ, പാചിത്തിയ’’ന്തി.

ഏവഞ്ചിദം ഭഗവതാ ഭിക്ഖുനീനം സിക്ഖാപദം പഞ്ഞത്തം ഹോതി.

൧൧൭൯. തേന ഖോ പന സമയേന അഞ്ഞതരാ ഭിക്ഖുനീ ഗിലാനാ ഹോതി. തസ്സാ വിനാ ഛത്തുപാഹനം ന ഫാസു ഹോതി…പേ… ഭഗവതോ ഏതമത്ഥം ആരോചേസും…പേ… അനുജാനാമി, ഭിക്ഖവേ, ഗിലാനായ ഭിക്ഖുനിയാ ഛത്തുപാഹനം. ഏവഞ്ച പന, ഭിക്ഖവേ, ഭിക്ഖുനിയോ ഇമം സിക്ഖാപദം ഉദ്ദിസന്തു –

൧൧൮൦. ‘‘യാ പന ഭിക്ഖുനീ അഗിലാനാ ഛത്തുപാഹനം ധാരേയ്യ, പാചിത്തിയ’’ന്തി.

൧൧൮൧. യാ പനാതി യാ യാദിസാ…പേ… ഭിക്ഖുനീതി…പേ… അയം ഇമസ്മിം അത്ഥേ അധിപ്പേതാ ഭിക്ഖുനീതി.

അഗിലാനാ നാമ യസ്സാ വിനാ ഛത്തുപാഹനം ഫാസു ഹോതി.

ഗിലാനാ നാമ യസ്സാ വിനാ ഛത്തുപാഹനം ന ഫാസു ഹോതി.

ഛത്തം നാമ തീണി ഛത്താനി – സേതച്ഛത്തം, കിലഞ്ജച്ഛത്തം, പണ്ണച്ഛത്തം മണ്ഡലബദ്ധം സലാകബദ്ധം. ധാരേയ്യാതി സകിമ്പി ധാരേതി, ആപത്തി പാചിത്തിയസ്സ.

൧൧൮൨. അഗിലാനാ അഗിലാനസഞ്ഞാ ഛത്തുപാഹനം ധാരേതി, ആപത്തി പാചിത്തിയസ്സ. അഗിലാനാ വേമതികാ ഛത്തുപാഹനം ധാരേതി, ആപത്തി പാചിത്തിയസ്സ. അഗിലാനാ ഗിലാനസഞ്ഞാ ഛത്തുപാഹനം ധാരേതി, ആപത്തി പാചിത്തിയസ്സ.

ഛത്തം ധാരേതി ന ഉപാഹനം, ആപത്തി ദുക്കടസ്സ. ഉപാഹനം ധാരേതി ന ഛത്തം, ആപത്തി ദുക്കടസ്സ. ഗിലാനാ അഗിലാനസഞ്ഞാ, ആപത്തി ദുക്കടസ്സ. ഗിലാനാ വേമതികാ, ആപത്തി ദുക്കടസ്സ. ഗിലാനാ ഗിലാനസഞ്ഞാ, അനാപത്തി.

൧൧൮൩. അനാപത്തി ഗിലാനായ, ആരാമേ ആരാമൂപചാരേ ധാരേതി, ആപദാസു, ഉമ്മത്തികായ, ആദികമ്മികായാതി.

പഠമസിക്ഖാപദം നിട്ഠിതം.