൫. പഞ്ചമസിക്ഖാപദം

൧൦൯൦. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഭിക്ഖുനിയോ ഊനദ്വാദസവസ്സം ഗിഹിഗതം വുട്ഠാപേന്തി. താ അക്ഖമാ ഹോന്തി സീതസ്സ ഉണ്ഹസ്സ ജിഘച്ഛായ പിപാസായ ഡംസമകസവാതാതപസരീസപസമ്ഫസ്സാനം ദുരുത്താനം ദുരാഗതാനം വചനപഥാനം. ഉപ്പന്നാനം സാരീരികാനം വേദനാനം ദുക്ഖാനം തിബ്ബാനം ഖരാനം കടുകാനം അസാതാനം അമനാപാനം പാണഹരാനം അനധിവാസകജാതികാ ഹോന്തി. യാ താ ഭിക്ഖുനിയോ അപ്പിച്ഛാ…പേ… താ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ഭിക്ഖുനിയോ ഊനദ്വാദസവസ്സം ഗിഹിഗതം വുട്ഠാപേസ്സന്തീ’’തി…പേ… സച്ചം കിര, ഭിക്ഖവേ, ഭിക്ഖുനിയോ ഊനദ്വാദസവസ്സം ഗിഹിഗതം വുട്ഠാപേന്തീതി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ, ഭിക്ഖവേ, ഭിക്ഖുനിയോ ഊനദ്വാദസവസ്സം ഗിഹിഗതം വുട്ഠാപേസ്സന്തി! ഊനദ്വാദസവസ്സാ [ഊനദ്വാദസവസ്സാഹി (ക.)], ഭിക്ഖവേ, ഗിഹിഗതാ അക്ഖമാ ഹോതി സീതസ്സ ഉണ്ഹസ്സ ജിഘച്ഛായ പിപാസായ ഡംസമകസവാതാതപസരീസപസമ്ഫസ്സാനം ദുരുത്താനം ദുരാഗതാനം വചനപഥാനം. ഉപ്പന്നാനം സാരീരികാനം വേദനാനം ദുക്ഖാനം തിബ്ബാനം ഖരാനം കടുകാനം അസാതാനം അമനാപാനം പാണഹരാനം അനധിവാസകജാതികാ ഹോതി. ദ്വാദസവസ്സാവ [ദ്വാദസവസ്സാ ച (സ്യാ. ക.)] ഖോ, ഭിക്ഖവേ, ഗിഹിഗതാ ഖമാ ഹോതി സീതസ്സ ഉണ്ഹസ്സ ജിഘച്ഛായ പിപാസായ ഡംസമകസവാതാതപസരീസപസമ്ഫസ്സാനം ദുരുത്താനം ദുരാഗതാനം വചനപഥാനം. ഉപ്പന്നാനം സാരീരികാനം വേദനാനം ദുക്ഖാനം തിബ്ബാനം ഖരാനം കടുകാനം അസാതാനം അമനാപാനം പാണഹരാനം അധിവാസകജാതികാ ഹോതി. നേതം, ഭിക്ഖവേ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഭിക്ഖുനിയോ ഇമം സിക്ഖാപദം ഉദ്ദിസന്തു –

൧൦൯൧. ‘‘യാ പന ഭിക്ഖുനീ ഊനദ്വാദസവസ്സം ഗിഹിഗതം വുട്ഠാപേയ്യ, പാചിത്തിയ’’ന്തി.

൧൦൯൨. യാ പനാതി യാ യാദിസാ…പേ… ഭിക്ഖുനീതി…പേ… അയം ഇമസ്മിം അത്ഥേ അധിപ്പേതാ ഭിക്ഖുനീതി.

ഊനദ്വാദസവസ്സാ നാമ അപ്പത്തദ്വാദസവസ്സാ. ഗിഹിഗതാ നാമ പുരിസന്തരഗതാ വുച്ചതി. വുട്ഠാപേയ്യാതി ഉപസമ്പാദേയ്യ.

‘‘വുട്ഠാപേസ്സാമീ’’തി ഗണം വാ ആചരിനിം വാ പത്തം വാ ചീവരം വാ പരിയേസതി, സീമം വാ സമ്മന്നതി, ആപത്തി ദുക്കടസ്സ. ഞത്തിയാ ദുക്കടം. ദ്വീഹി കമ്മവാചാഹി ദുക്കടാ. കമ്മവാചാപരിയോസാനേ ഉപജ്ഝായായ ആപത്തി പാചിത്തിയസ്സ. ഗണസ്സ ച ആചരിനിയാ ച ആപത്തി ദുക്കടസ്സ.

൧൦൯൩. ഊനദ്വാദസവസ്സായ ഊനദ്വാദസവസ്സസഞ്ഞാ വുട്ഠാപേതി, ആപത്തി പാചിത്തിയസ്സ. ഊനദ്വാദസവസ്സായ വേമതികാ വുട്ഠാപേതി, ആപത്തി ദുക്കടസ്സ. ഊനദ്വാദസവസ്സായ പരിപുണ്ണസഞ്ഞാ വുട്ഠാപേതി, അനാപത്തി.

പരിപുണ്ണദ്വാദസവസ്സായ ഊനദ്വാദസവസ്സസഞ്ഞാ, ആപത്തി ദുക്കടസ്സ. പരിപുണ്ണദ്വാദസവസ്സായ വേമതികാ, ആപത്തി ദുക്കടസ്സ. പരിപുണ്ണദ്വാദസവസ്സായ പരിപുണ്ണസഞ്ഞാ, അനാപത്തി.

൧൦൯൪. അനാപത്തി ഊനദ്വാദസവസ്സം പരിപുണ്ണസഞ്ഞാ വുട്ഠാപേതി, പരിപുണ്ണദ്വാദസവസ്സം പരിപുണ്ണസഞ്ഞാ വുട്ഠാപേതി, ഉമ്മത്തികായ, ആദികമ്മികായാതി.

പഞ്ചമസിക്ഖാപദം നിട്ഠിതം.