൨. അന്ധകാരവഗ്ഗോ

൧. പഠമസിക്ഖാപദം

൮൩൮. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഭദ്ദായ കാപിലാനിയാ അന്തേവാസിനിയാ ഭിക്ഖുനിയാ ഞാതകോ പുരിസോ ഗാമകാ സാവത്ഥിം അഗമാസി കേനചിദേവ കരണീയേന. അഥ ഖോ സാ ഭിക്ഖുനീ തേന പുരിസേന സദ്ധിം രത്തന്ധകാരേ അപ്പദീപേ ഏകേനേകാ സന്തിട്ഠതിപി സല്ലപതിപി. യാ താ ഭിക്ഖുനിയോ അപ്പിച്ഛാ…പേ… താ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ഭിക്ഖുനീ രത്തന്ധകാരേ അപ്പദീപേ പുരിസേന സദ്ധിം ഏകേനേകാ സന്തിട്ഠിസ്സതിപി സല്ലപിസ്സതിപീ’’തി…പേ… സച്ചം കിര, ഭിക്ഖവേ, ഭിക്ഖുനീ രത്തന്ധകാരേ അപ്പദീപേ പുരിസേന സദ്ധിം ഏകേനേകാ സന്തിട്ഠതിപി സല്ലപതിപീതി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ, ഭിക്ഖവേ, ഭിക്ഖുനീ രത്തന്ധകാരേ അപ്പദീപേ പുരിസേന സദ്ധിം ഏകേനേകാ സന്തിട്ഠിസ്സതിപി സല്ലപിസ്സതിപി! നേതം, ഭിക്ഖവേ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഭിക്ഖുനിയോ ഇമം സിക്ഖാപദം ഉദ്ദിസന്തു –

൮൩൯. ‘‘യാ പന ഭിക്ഖുനീ രത്തന്ധകാരേ അപ്പദീപേ പുരിസേന സദ്ധിം ഏകേനേകാ സന്തിട്ഠേയ്യ വാ സല്ലപേയ്യ വാ, പാചിത്തിയ’’ന്തി.

൮൪൦. യാ പനാതി യാ യാദിസാ…പേ… ഭിക്ഖുനീതി…പേ… അയം ഇമസ്മിം അത്ഥേ അധിപ്പേതാ ഭിക്ഖുനീതി.

രത്തന്ധകാരേതി ഓഗ്ഗതേ സൂരിയേ. അപ്പദീപേതി അനാലോകേ.

പുരിസോ നാമ മനുസ്സപുരിസോ ന യക്ഖോ ന പേതോ ന തിരച്ഛാനഗതോ വിഞ്ഞൂ പടിബലോ സന്തിട്ഠിതും സല്ലപിതും.

സദ്ധിന്തി ഏകതോ. ഏകേനേകാതി പുരിസോ ചേവ ഹോതി ഭിക്ഖുനീ ച.

സന്തിട്ഠേയ്യ വാതി പുരിസസ്സ ഹത്ഥപാസേ തിട്ഠതി, ആപത്തി പാചിത്തിയസ്സ.

സല്ലപേയ്യ വാതി പുരിസസ്സ ഹത്ഥപാസേ ഠിതാ സല്ലപതി, ആപത്തി പാചിത്തിയസ്സ.

ഹത്ഥപാസം വിജഹിത്വാ സന്തിട്ഠതി വാ സല്ലപതി വാ, ആപത്തി ദുക്കടസ്സ. യക്ഖേന വാ പേതേന വാ പണ്ഡകേന വാ തിരച്ഛാനഗതമനുസ്സവിഗ്ഗഹേന വാ സദ്ധിം സന്തിട്ഠതി വാ സല്ലപതി വാ, ആപത്തി ദുക്കടസ്സ.

൮൪൧. അനാപത്തി യോ കോചി വിഞ്ഞൂ ദുതിയോ [യാ കാചി വിഞ്ഞൂ ദുതിയാ (സ്യാ.)] ഹോതി, അരഹോപേക്ഖാ, അഞ്ഞവിഹിതാ സന്തിട്ഠതി വാ സല്ലപതി വാ, ഉമ്മത്തികായ, ആദികമ്മികായാതി.

പഠമസിക്ഖാപദം നിട്ഠിതം.

൨. ദുതിയസിക്ഖാപദം

൮൪൨. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഭദ്ദായ കാപിലാനിയാ അന്തേവാസിനിയാ ഭിക്ഖുനിയാ ഞാതകോ പുരിസോ ഗാമകാ സാവത്ഥിം അഗമാസി കേനചിദേവ കരണീയേന. അഥ ഖോ സാ ഭിക്ഖുനീ – ‘‘ഭഗവതാ പടിക്ഖിത്തം രത്തന്ധകാരേ അപ്പദീപേ പുരിസേന സദ്ധിം ഏകേനേകാ സന്തിട്ഠിതും സല്ലപിതു’’ന്തി തേനേവ പുരിസേന സദ്ധിം പടിച്ഛന്നേ ഓകാസേ ഏകേനേകാ സന്തിട്ഠതിപി സല്ലപതിപി. യാ താ ഭിക്ഖുനിയോ അപ്പിച്ഛാ…പേ… താ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ഭിക്ഖുനീ പടിച്ഛന്നേ ഓകാസേ പുരിസേന സദ്ധിം ഏകേനേകാ സന്തിട്ഠിസ്സതിപി സല്ലപിസ്സതിപീ’’തി…പേ… സച്ചം കിര, ഭിക്ഖവേ, ഭിക്ഖുനീ പടിച്ഛന്നേ ഓകാസേ പുരിസേന സദ്ധിം ഏകേനേകാ സന്തിട്ഠതിപി സല്ലപതിപീതി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ, ഭിക്ഖവേ, ഭിക്ഖുനീ പടിച്ഛന്നേ ഓകാസേ പുരിസേന സദ്ധിം ഏകേനേകാ സന്തിട്ഠിസ്സതിപി സല്ലപിസ്സതിപി! നേതം, ഭിക്ഖവേ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഭിക്ഖുനിയോ ഇമം സിക്ഖാപദം ഉദ്ദിസന്തു –

൮൪൩. ‘‘യാ പന ഭിക്ഖുനീ പടിച്ഛന്നേ ഓകാസേ പുരിസേന സദ്ധിം ഏകേനേകാ സന്തിട്ഠേയ്യ വാ സല്ലപേയ്യ വാ, പാചിത്തിയ’’ന്തി.

൮൪൪. യാ പനാതി യാ യാദിസാ…പേ… ഭിക്ഖുനീതി…പേ… അയം ഇമസ്മിം അത്ഥേ അധിപ്പേതാ ഭിക്ഖുനീതി.

പടിച്ഛന്നോ നാമ ഓകാസോ കുട്ടേന വാ കവാടേന വാ കിലഞ്ജേന വാ സാണിപാകാരേന വാ രുക്ഖേന വാ ഥമ്ഭേന വാ കോത്ഥളിയാ വാ യേന കേനചി പടിച്ഛന്നോ ഹോതി.

പുരിസോ നാമ മനുസ്സപുരിസോ ന യക്ഖോ ന പേതോ ന തിരച്ഛാനഗതോ വിഞ്ഞൂ പടിബലോ സന്തിട്ഠിതും സല്ലപിതും.

സദ്ധിന്തി ഏകതോ. ഏകേനേകാതി പുരിസോ ചേവ ഹോതി ഭിക്ഖുനീ ച.

സന്തിട്ഠേയ്യ വാതി പുരിസസ്സ ഹത്ഥപാസേ തിട്ഠതി, ആപത്തി പാചിത്തിയസ്സ.

സല്ലപേയ്യ വാതി പുരിസസ്സ ഹത്ഥപാസേ ഠിതാ സല്ലപതി, ആപത്തി പാചിത്തിയസ്സ.

ഹത്ഥപാസം വിജഹിത്വാ സന്തിട്ഠതി വാ സല്ലപതി വാ, ആപത്തി ദുക്കടസ്സ. യക്ഖേന വാ പേതേന വാ പണ്ഡകേന വാ തിരച്ഛാനഗതമനുസ്സവിഗ്ഗഹേന വാ സദ്ധിം സന്തിട്ഠതി വാ സല്ലപതി വാ, ആപത്തി ദുക്കടസ്സ.

൮൪൫. അനാപത്തി യോ കോചി വിഞ്ഞൂ ദുതിയോ ഹോതി, അരഹോപേക്ഖാ, അഞ്ഞവിഹിതാ സന്തിട്ഠതി വാ സല്ലപതി വാ, ഉമ്മത്തികായ, ആദികമ്മികായാതി.

ദുതിയസിക്ഖാപദം നിട്ഠിതം.

൩. തതിയസിക്ഖാപദം

൮൪൬. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഭദ്ദായ കാപിലാനിയാ അന്തേവാസിനിയാ ഭിക്ഖുനിയാ ഞാതകോ പുരിസോ ഗാമകാ സാവത്ഥിം അഗമാസി കേനചിദേവ കരണീയേന. അഥ ഖോ സാ ഭിക്ഖുനീ – ‘‘ഭഗവതാ പടിക്ഖിത്തം പടിച്ഛന്നേ ഓകാസേ പുരിസേന സദ്ധിം ഏകേനേകാ സന്തിട്ഠിതും സല്ലപിതു’’ന്തി തേനേവ പുരിസേന സദ്ധിം അജ്ഝോകാസേ ഏകേനേകാ സന്തിട്ഠതിപി സല്ലപതിപി. യാ താ ഭിക്ഖുനിയോ അപ്പിച്ഛാ…പേ… താ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ഭിക്ഖുനീ അജ്ഝോകാസേ പുരിസേന സദ്ധിം ഏകേനേകാ സന്തിട്ഠിസ്സതിപി സല്ലപിസ്സതിപീ’’തി…പേ… സച്ചം കിര, ഭിക്ഖവേ, ഭിക്ഖുനീ അജ്ഝോകാസേ പുരിസേന സദ്ധിം ഏകേനേകാ സന്തിട്ഠതിപി സല്ലപതിപീതി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ, ഭിക്ഖവേ, ഭിക്ഖുനീ അജ്ഝോകാസേ പുരിസേന സദ്ധിം ഏകേനേകാ സന്തിട്ഠിസ്സതിപി സല്ലപിസ്സതിപി! നേതം, ഭിക്ഖവേ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഭിക്ഖുനിയോ ഇമം സിക്ഖാപദം ഉദ്ദിസന്തു –

൮൪൭. ‘‘യാ പന ഭിക്ഖുനീ അജ്ഝോകാസേ പുരിസേന സദ്ധിം ഏകേനേകാ സന്തിട്ഠേയ്യ വാ സല്ലപേയ്യ വാ, പാചിത്തിയ’’ന്തി.

൮൪൮. യാ പനാതി യാ യാദിസാ…പേ… ഭിക്ഖുനീതി…പേ… അയം ഇമസ്മിം അത്ഥേ അധിപ്പേതാ ഭിക്ഖുനീതി.

അജ്ഝോകാസോ നാമ അപ്പടിച്ഛന്നോ ഹോതി കുട്ടേന വാ കവാടേന വാ കിലഞ്ജേന വാ സാണിപാകാരേന വാ രുക്ഖേന വാ ഥമ്ഭേന വാ കോത്ഥളിയാ വാ, യേന കേനചി അപ്പടിച്ഛന്നോ ഹോതി.

പുരിസോ നാമ മനുസ്സപുരിസോ, ന യക്ഖോ ന പേതോ ന തിരച്ഛാനഗതോ, വിഞ്ഞൂ പടിബലോ സന്തിട്ഠിതും സല്ലപിതും.

സദ്ധിന്തി ഏകതോ. ഏകേനേകാതി പുരിസോ ചേവ ഹോതി ഭിക്ഖുനീ ച.

സന്തിട്ഠേയ്യ വാതി പുരിസസ്സ ഹത്ഥപാസേ തിട്ഠതി, ആപത്തി പാചിത്തിയസ്സ.

സല്ലപേയ്യ വാതി പുരിസസ്സ ഹത്ഥപാസേ ഠിതാ സല്ലപതി, ആപത്തി പാചിത്തിയസ്സ.

ഹത്ഥപാസം വിജഹിത്വാ സന്തിട്ഠതി വാ സല്ലപതി വാ, ആപത്തി ദുക്കടസ്സ. യക്ഖേന വാ പേതേന വാ പണ്ഡകേന വാ തിരച്ഛാഗതമനുസ്സവിഗ്ഗഹേന വാ സദ്ധിം സന്തിട്ഠതി വാ സല്ലപതി വാ, ആപത്തി ദുക്കടസ്സ.

൮൪൯. അനാപത്തി യോ കോചി വിഞ്ഞൂ ദുതിയോ ഹോതി, അരഹോപേക്ഖാ, അഞ്ഞവിഹിതാ സന്തിട്ഠതി വാ സല്ലപതി വാ, ഉമ്മത്തികായ, ആദികമ്മികായാതി.

തതിയസിക്ഖാപദം നിട്ഠിതം.

൪. ചതുത്ഥസിക്ഖാപദം

൮൫൦. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഥുല്ലനന്ദാ ഭിക്ഖുനീ രഥികായപി ബ്യൂഹേപി സിങ്ഘാടകേപി പുരിസേന സദ്ധിം ഏകേനേകാ സന്തിട്ഠതിപി സല്ലപതിപി നികണ്ണികമ്പി ജപ്പേതി ദുതിയികമ്പി ഭിക്ഖുനിം ഉയ്യോജേതി. യാ താ ഭിക്ഖുനിയോ അപ്പിച്ഛാ…പേ… താ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ അയ്യാ ഥുല്ലനന്ദാ രഥികായപി ബ്യൂഹേപി സിങ്ഘാടകേപി പുരിസേന സദ്ധിം ഏകേനേകാ സന്തിട്ഠിസ്സതിപി സല്ലപിസ്സതിപി നികണ്ണികമ്പി ജപ്പിസ്സതി ദുതിയികമ്പി ഭിക്ഖുനിം ഉയ്യോജേസ്സതീ’’തി…പേ… സച്ചം കിര, ഭിക്ഖവേ, ഥുല്ലനന്ദാ ഭിക്ഖുനീ രഥികായപി ബ്യൂഹേപി സിങ്ഘാടകേപി പുരിസേന സദ്ധിം ഏകേനേകാ സന്തിട്ഠതിപി സല്ലപതിപി നികണ്ണികമ്പി ജപ്പേതി ദുതിയികമ്പി ഭിക്ഖുനിം ഉയ്യോജേതീതി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ, ഭിക്ഖവേ, ഥുല്ലനന്ദാ ഭിക്ഖുനീ രഥികായപി ബ്യൂഹേപി സിങ്ഘാടകേപി പുരിസേന സദ്ധിം ഏകേനേകാ സന്തിട്ഠിസ്സതിപി സല്ലപിസ്സതിപി നികണ്ണികമ്പി ജപ്പിസ്സതി ദുതിയികമ്പി ഭിക്ഖുനിം ഉയ്യോജേസ്സതി! നേതം, ഭിക്ഖവേ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഭിക്ഖുനിയോ ഇമം സിക്ഖാപദം ഉദ്ദിസന്തു –

൮൫൧. ‘‘യാ പന ഭിക്ഖുനീ രഥികായ വാ ബ്യൂഹേ വാ സിങ്ഘാടകേ വാ പുരിസേന സദ്ധിം ഏകേനേകാ സന്തിട്ഠേയ്യ വാ സല്ലപേയ്യ വാ നികണ്ണികം വാ ജപ്പേയ്യ ദുതിയികം വാ ഭിക്ഖുനിം ഉയ്യോജേയ്യ, പാചിത്തിയ’’ന്തി.

൮൫൨. യാ പനാതി യാ യാദിസാ…പേ… ഭിക്ഖുനീതി…പേ… അയം ഇമസ്മിം അത്ഥേ അധിപ്പേതാ ഭിക്ഖുനീതി.

രഥികാ നാമ രച്ഛാ വുച്ചതി. ബ്യൂഹം നാമ യേനേവ പവിസന്തി തേനേവ നിക്ഖമന്തി. സിങ്ഘാടകോ നാമ ചച്ചരം വുച്ചതി.

പുരിസോ നാമ മനുസ്സപുരിസോ ന യക്ഖോ ന പേതോ ന തിരച്ഛാനഗതോ വിഞ്ഞൂ പടിബലോ സന്തിട്ഠിതും സല്ലപിതും.

സദ്ധിന്തി ഏകതോ. ഏകേനേകാതി പുരിസോ ചേവ ഹോതി ഭിക്ഖുനീ ച.

സന്തിട്ഠേയ്യ വാതി പുരിസസ്സ ഹത്ഥപാസേ തിട്ഠതി, ആപത്തി പാചിത്തിയസ്സ.

സല്ലപേയ്യ വാതി പുരിസസ്സ ഹത്ഥപാസേ ഠിതാ സല്ലപതി, ആപത്തി പാചിത്തിയസ്സ.

നികണ്ണികം വാ ജപ്പേയ്യാതി പുരിസസ്സ ഉപകണ്ണകേ ആരോചേതി, ആപത്തി പാചിത്തിയസ്സ.

ദുതിയികം വാ ഭിക്ഖുനിം ഉയ്യോജേയ്യാതി അനാചാരം ആചരിതുകാമാ ദുതിയികമ്പി ഭിക്ഖുനിം ഉയ്യോജേതി, ആപത്തി ദുക്കടസ്സ. ദസ്സനൂപചാരം വാ സവനൂപചാരം വാ വിജഹന്തിയാ ആപത്തി ദുക്കടസ്സ. വിജഹിതേ ആപത്തി പാചിത്തിയസ്സ.

ഹത്ഥപാസം വിജഹിത്വാ സന്തിട്ഠതി വാ സല്ലപതി വാ ആപത്തി ദുക്കടസ്സ. യക്ഖേന വാ പേതേന വാ പണ്ഡകേന വാ തിരച്ഛാനഗതമനുസ്സവിഗ്ഗഹേന വാ സദ്ധിം സന്തിട്ഠതി വാ സല്ലപതി വാ, ആപത്തി ദുക്കടസ്സ.

൮൫൩. അനാപത്തി യോ കോചി വിഞ്ഞൂ ദുതിയോ ഹോതി, അരഹോപേക്ഖാ, അഞ്ഞവിഹിതാ സന്തിട്ഠതി വാ സല്ലപതി വാ, ന അനാചാരം ആചരിതുകാമാ, സതി കരണീയേ ദുതിയികം ഭിക്ഖുനിം ഉയ്യോജേതി, ഉമ്മത്തികായ, ആദികമ്മികായാതി.

ചതുത്ഥസിക്ഖാപദം നിട്ഠിതം.

൫. പഞ്ചമസിക്ഖാപദം

൮൫൪. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന അഞ്ഞതരാ ഭിക്ഖുനീ അഞ്ഞതരസ്സ കുലസ്സ കുലൂപികാ ഹോതി നിച്ചഭത്തികാ. അഥ ഖോ സാ ഭിക്ഖുനീ പുബ്ബണ്ഹസമയം നിവാസേത്വാ പത്തചീവരമാദായ യേന തം കുലം തേനുപസങ്കമി; ഉപസങ്കമിത്വാ ആസനേ നിസീദിത്വാ സാമികേ അനാപുച്ഛാ പക്കാമി. തസ്സ കുലസ്സ ദാസീ ഘരം സമ്മജ്ജന്തീ തം ആസനം ഭാജനന്തരികായ പക്ഖിപി. മനുസ്സാ തം ആസനം അപസ്സന്താ തം ഭിക്ഖുനിം ഏതദവോചും – ‘‘കഹം തം, അയ്യേ, ആസന’’ന്തി? ‘‘നാഹം തം, ആവുസോ, ആസനം പസ്സാമീ’’തി. ‘‘ദേഥായ്യേ, തം ആസന’’ന്തി പരിഭാസിത്വാ നിച്ചഭത്തം പച്ഛിന്ദിംസു. അഥ ഖോ തേ മനുസ്സാ ഘരം സോധേന്താ തം ആസനം ഭാജനന്തരികായ പസ്സിത്വാ തം ഭിക്ഖുനിം ഖമാപേത്വാ നിച്ചഭത്തം പട്ഠപേസും. അഥ ഖോ സാ ഭിക്ഖുനീ ഭിക്ഖുനീനം ഏതമത്ഥം ആരോചേസി. യാ താ ഭിക്ഖുനിയോ അപ്പിച്ഛാ…പേ… താ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ഭിക്ഖുനീ പുരേഭത്തം കുലാനി ഉപസങ്കമിത്വാ ആസനേ നിസീദിത്വാ സാമികേ അനാപുച്ഛാ പക്കമിസ്സതീ’’തി…പേ… സച്ചം കിര, ഭിക്ഖവേ, ഭിക്ഖുനീ പുരേഭത്തം കുലാനി ഉപസങ്കമിത്വാ ആസനേ നിസീദിത്വാ സാമികേ അനാപുച്ഛാ പക്കമതീതി [പക്കമീതി (ക.)]? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ, ഭിക്ഖവേ ഭിക്ഖുനീ പുരേഭത്തം കുലാനി ഉപസങ്കമിത്വാ ആസനേ നിസീദിത്വാ സാമികേ അനാപുച്ഛാ പക്കമിസ്സതി! നേതം, ഭിക്ഖവേ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഭിക്ഖുനിയോ ഇമം സിക്ഖാപദം ഉദ്ദിസന്തു –

൮൫൫. ‘‘യാ പന ഭിക്ഖുനീ പുരേഭത്തം കുലാനി ഉപസങ്കമിത്വാ ആസനേ നിസീദിത്വാ സാമികേ അനാപുച്ഛാ പക്കമേയ്യ, പാചിത്തിയ’’ന്തി.

൮൫൬. യാ പനാതി യാ യാദിസാ…പേ… ഭിക്ഖുനീതി…പേ… അയം ഇമസ്മിം അത്ഥേ അധിപ്പേതാ ഭിക്ഖുനീതി.

പുരേഭത്തം നാമ അരുണുഗ്ഗമനം ഉപാദായ യാവ മജ്ഝന്ഹികാ.

കുലം നാമ ചത്താരി കുലാനി – ഖത്തിയകുലം, ബ്രാഹ്മണകുലം, വേസ്സകുലം, സുദ്ദകുലം. ഉപസങ്കമിത്വാതി തത്ഥ ഗന്ത്വാ.

ആസനം നാമ പല്ലങ്കസ്സ ഓകാസോ വുച്ചതി. നിസീദിത്വാതി തസ്മിം നിസീദിത്വാ.

സാമികേ അനാപുച്ഛാ പക്കമേയ്യാതി യോ തസ്മിം കുലേ മനുസ്സോ വിഞ്ഞൂ തം അനാപുച്ഛാ അനോവസ്സകം അതിക്കാമേന്തിയാ ആപത്തി പാചിത്തിയസ്സ. അജ്ഝോകാസേ ഉപചാരം അതിക്കാമേന്തിയാ ആപത്തി പാചിത്തിയസ്സ.

൮൫൭. അനാപുച്ഛിതേ അനാപുച്ഛിതസഞ്ഞാ പക്കമതി, ആപത്തി പാചിത്തിയസ്സ. അനാപുച്ഛിതേ വേമതികാ പക്കമതി, ആപത്തി പാചിത്തിയസ്സ. അനാപുച്ഛിതേ ആപുച്ഛിതസഞ്ഞാ പക്കമതി, ആപത്തി പാചിത്തിയസ്സ.

പല്ലങ്കസ്സ അനോകാസേ ആപത്തി ദുക്കടസ്സ. ആപുച്ഛിതേ അനാപുച്ഛിതസഞ്ഞാ, ആപത്തി ദുക്കടസ്സ. ആപുച്ഛിതേ വേമതികാ, ആപത്തി ദുക്കടസ്സ. ആപുച്ഛിതേ ആപുച്ഛിതസഞ്ഞാ, അനാപത്തി.

൮൫൮. അനാപത്തി ആപുച്ഛാ ഗച്ഛതി, അസംഹാരിമേ, ഗിലാനായ, ആപദാസു, ഉമ്മത്തികായ, ആദികമ്മികായാതി.

പഞ്ചമസിക്ഖാപദം നിട്ഠിതം.

൬. ഛട്ഠസിക്ഖാപദം

൮൫൯. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഥുല്ലനന്ദാ ഭിക്ഖുനീ പച്ഛാഭത്തം കുലാനി ഉപസങ്കമിത്വാ സാമികേ അനാപുച്ഛാ ആസനേ അഭിനിസീദതിപി അഭിനിപജ്ജതിപി. മനുസ്സാ ഥുല്ലനന്ദം ഭിക്ഖുനിം ഹിരീയമാനാ ആസനേ നേവ അഭിനിസീദന്തി ന അഭിനിപജ്ജന്തി. മനുസ്സാ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ അയ്യാ ഥുല്ലനന്ദാ പച്ഛാഭത്തം കുലാനി ഉപസങ്കമിത്വാ സാമികേ അനാപുച്ഛാ ആസനേ അഭിനിസീദിസ്സതിപി അഭിനിപജ്ജിസ്സതിപീ’’തി! അസ്സോസും ഖോ ഭിക്ഖുനിയോ തേസം മനുസ്സാനം ഉജ്ഝായന്താനം ഖിയ്യന്താനം വിപാചേന്താനം. യാ താ ഭിക്ഖുനിയോ അപ്പിച്ഛാ…പേ… താ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ അയ്യാ ഥുല്ലനന്ദാ പച്ഛാഭത്തം കുലാനി ഉപസങ്കമിത്വാ സാമികേ അനാപുച്ഛാ ആസനേ അഭിനിസീദിസ്സതിപി അഭിനിപജ്ജിസ്സതിപീ’’തി…പേ… സച്ചം കിര, ഭിക്ഖവേ, ഥുല്ലനന്ദാ ഭിക്ഖുനീ പച്ഛാഭത്തം കുലാനി ഉപസങ്കമിത്വാ സാമികേ അനാപുച്ഛാ ആസനേ അഭിനിസീദതിപി അഭിനിപജ്ജതിപീതി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ, ഭിക്ഖവേ, ഥുല്ലനന്ദാ ഭിക്ഖുനീ പച്ഛാഭത്തം കുലാനി ഉപസങ്കമിത്വാ സാമികേ അനാപുച്ഛാ ആസനേ അഭിനിസീദിസ്സതിപി അഭിനിപജ്ജിസ്സതിപി! നേതം, ഭിക്ഖവേ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഭിക്ഖുനിയോ ഇമം സിക്ഖാപദം ഉദ്ദിസന്തു –

൮൬൦. ‘‘യാ പന ഭിക്ഖുനീ പച്ഛാഭത്തം കുലാനി ഉപസങ്കമിത്വാ സാമികേ അനാപുച്ഛാ ആസനേ അഭിനിസീദേയ്യ വാ അഭിനിപജ്ജേയ്യ വാ, പാചിത്തിയ’’ന്തി.

൮൬൧. യാ പനാതി യാ യാദിസാ…പേ… ഭിക്ഖുനീതി…പേ… അയം ഇമസ്മിം അത്ഥേ അധിപ്പേതാ ഭിക്ഖുനീതി.

പച്ഛാഭത്തം നാമ മജ്ഝന്ഹികേ വീതിവത്തേ യാവ അത്ഥങ്ഗതേ സൂരിയേ.

കുലം നാമ ചത്താരി കുലാനി – ഖത്തിയകുലം, ബ്രാഹ്മണകുലം, വേസ്സകുലം, സുദ്ദകുലം. ഉപസങ്കമിത്വാതി തത്ഥ ഗന്ത്വാ.

സാമികേ അനാപുച്ഛാതി യോ തസ്മിം കുലേ മനുസ്സോ സാമികോ ദാതും, തം അനാപുച്ഛാ.

ആസനം നാമ പല്ലങ്കസ്സ ഓകാസോ വുച്ചതി.

അഭിനിസീദേയ്യാതി തസ്മിം അഭിനിസീദതി, ആപത്തി പാചിത്തിയസ്സ.

അഭിനിപജ്ജേയ്യാതി തസ്മിം അഭിനിപജ്ജതി, ആപത്തി പാചിത്തിയസ്സ.

൮൬൨. അനാപുച്ഛിതേ അനാപുച്ഛിതസഞ്ഞാ ആസനേ അഭിനിസീദതി വാ അഭിനിപജ്ജതി വാ, ആപത്തി പാചിത്തിയസ്സ. അനാപുച്ഛിതേ വേമതികാ ആസനേ അഭിനിസീദതി വാ അഭിനിപജ്ജതി വാ, ആപത്തി പാചിത്തിയസ്സ. അനാപുച്ഛിതേ ആപുച്ഛിതസഞ്ഞാ ആസനേ അഭിനിസീദതി വാ അഭിനിപജ്ജതി വാ, ആപത്തി പാചിത്തിയസ്സ.

പല്ലങ്കസ്സ അനോകാസേ ആപത്തി ദുക്കടസ്സ. ആപുച്ഛിതേ അനാപുച്ഛിതസഞ്ഞാ, ആപത്തി ദുക്കടസ്സ. ആപുച്ഛിതേ വേമതികാ, ആപത്തി ദുക്കടസ്സ. ആപുച്ഛിതേ ആപുച്ഛിതസഞ്ഞാ, അനാപത്തി.

൮൬൩. അനാപത്തി ആപുച്ഛാ ആസനേ അഭിനിസീദതി വാ അഭിനിപജ്ജതി വാ, ധുവപഞ്ഞത്തേ, ഗിലാനായ, ആപദാസു, ഉമ്മത്തികായ, ആദികമ്മികായാതി.

ഛട്ഠസിക്ഖാപദം നിട്ഠിതം.

൭. സത്തമസിക്ഖാപദം

൮൬൪. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന സമ്ബഹുലാ ഭിക്ഖുനിയോ കോസലേസു ജനപദേ സാവത്ഥിം ഗച്ഛന്തിയോ സായം അഞ്ഞതരം ഗാമം ഉപഗന്ത്വാ അഞ്ഞതരം ബ്രാഹ്മണകുലം ഉപസങ്കമിത്വാ ഓകാസം യാചിംസു. അഥ ഖോ സാ ബ്രാഹ്മണീ താ ഭിക്ഖുനിയോ ഏതദവോച – ‘‘ആഗമേഥ, അയ്യേ, യാവ ബ്രാഹ്മണോ ആഗച്ഛതീ’’തി. ഭിക്ഖുനിയോ – ‘‘യാവ ബ്രാഹ്മണോ ആഗച്ഛതീ’’തി സേയ്യം സന്ഥരിത്വാ ഏകച്ചാ നിസീദിംസു ഏകച്ചാ നിപജ്ജിംസു. അഥ ഖോ സോ ബ്രാഹ്മണോ രത്തിം ആഗന്ത്വാ തം ബ്രാഹ്മണിം ഏതദവോച – ‘‘കാ ഇമാ’’തി? ‘‘ഭിക്ഖുനിയോ, അയ്യാ’’തി. ‘‘നിക്കഡ്ഢഥ ഇമാ മുണ്ഡാ ബന്ധകിനിയോ’’തി, ഘരതോ നിക്കഡ്ഢാപേസി. അഥ ഖോ താ ഭിക്ഖുനിയോ സാവത്ഥിം ഗന്ത്വാ ഭിക്ഖുനീനം ഏതമത്ഥം ആരോചേസും. യാ താ ഭിക്ഖുനിയോ അപ്പിച്ഛാ…പേ… താ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ഭിക്ഖുനിയോ വികാലേ കുലാനി ഉപസങ്കമിത്വാ സാമികേ അനാപുച്ഛാ സേയ്യം സന്ഥരിത്വാ അഭിനിസീദിസ്സന്തിപി അഭിനിപജ്ജിസ്സന്തിപീ’’തി…പേ… സച്ചം കിര, ഭിക്ഖവേ, ഭിക്ഖുനിയോ വികാലേ കുലാനി ഉപസങ്കമിത്വാ സാമികേ അനാപുച്ഛാ സേയ്യം സന്ഥരിത്വാ അഭിനിസീദന്തിപി അഭിനിപജ്ജന്തിപീതി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ, ഭിക്ഖവേ, ഭിക്ഖുനിയോ വികാലേ കുലാനി ഉപസങ്കമിത്വാ സാമികേ അനാപുച്ഛാ സേയ്യം സന്ഥരിത്വാ അഭിനിസീദിസ്സന്തിപി അഭിനിപജ്ജിസ്സന്തിപി! നേതം, ഭിക്ഖവേ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഭിക്ഖുനിയോ ഇമം സിക്ഖാപദം ഉദ്ദിസന്തു –

൮൬൫. ‘‘യാ പന ഭിക്ഖുനീ വികാലേ കുലാനി ഉപസങ്കമിത്വാ സാമികേ അനാപുച്ഛാ സേയ്യം സന്ഥരിത്വാ വാ സന്ഥരാപേത്വാ വാ അഭിനിസീദേയ്യ വാ അഭിനിപജ്ജേയ്യ വാ, പാചിത്തിയ’’ന്തി.

൮൬൬. യാ പനാതി യാ യാദിസാ…പേ… ഭിക്ഖുനീതി…പേ… അയം ഇമസ്മിം അത്ഥേ അധിപ്പേതാ ഭിക്ഖുനീതി.

വികാലോ നാമ അത്ഥങ്ഗതേ സൂരിയേ യാവ അരുണുഗ്ഗമനാ.

കുലം നാമ ചത്താരി കുലാനി – ഖത്തിയകുലം, ബ്രാഹ്മണകുലം, വേസ്സകുലം സുദ്ദകുലം. ഉപസങ്കമിത്വാതി തത്ഥ ഗന്ത്വാ.

സാമികേ അനാപുച്ഛാതി യോ തസ്മിം കുലേ മനുസ്സോ സാമികോ ദാതും, തം അനാപുച്ഛാ.

സേയ്യം നാമ അന്തമസോ പണ്ണസന്ഥാരോപി. സന്ഥരിത്വാതി സയം സന്ഥരിത്വാ. സന്ഥരാപേത്വാതി അഞ്ഞം സന്ഥരാപേത്വാ. അഭിനിസീദേയ്യാതി തസ്മിം അഭിനിസീദതി, ആപത്തി പാചിത്തിയസ്സ. അഭിനിപജ്ജേയ്യാതി തസ്മിം അഭിനിപജ്ജതി, ആപത്തി പാചിത്തിയസ്സ.

൮൬൭. അനാപുച്ഛിതേ അനാപുച്ഛിതസഞ്ഞാ സേയ്യം സന്ഥരിത്വാ വാ സന്ഥരാപേത്വാ വാ അഭിനിസീദതി വാ അഭിനിപജ്ജതി വാ, ആപത്തി പാചിത്തിയസ്സ. അനാപുച്ഛിതേ വേമതികാ സേയ്യം സന്ഥരിത്വാ വാ സന്ഥരാപേത്വാ വാ അഭിനിസീദതി വാ അഭിനിപജ്ജതി വാ, ആപത്തി പാചിത്തിയസ്സ. അനാപുച്ഛിതേ ആപുച്ഛിതസഞ്ഞാ സേയ്യം സന്ഥരിത്വാ വാ സന്ഥരാപേത്വാ വാ അഭിനിസീദതി വാ അഭിനിപജ്ജതി വാ, ആപത്തി പാചിത്തിയസ്സ.

ആപുച്ഛിതേ അനാപുച്ഛിതസഞ്ഞാ, ആപത്തി ദുക്കടസ്സ. ആപുച്ഛിതേ വേമതികാ, ആപത്തി ദുക്കടസ്സ. ആപുച്ഛിതേ ആപുച്ഛിതസഞ്ഞാ, അനാപത്തി.

൮൬൮. അനാപത്തി ആപുച്ഛാ സേയ്യം സന്ഥരിത്വാ വാ സന്ഥരാപേത്വാ വാ അഭിനിസീദതി വാ അഭിനിപജ്ജതി വാ, ഗിലാനായ, ആപദാസു, ഉമ്മത്തികായ, ആദികമ്മികായാതി.

സത്തമസിക്ഖാപദം നിട്ഠിതം.

൮. അട്ഠമസിക്ഖാപദം

൮൬൯. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഭദ്ദായ കാപിലാനിയാ അന്തേവാസിനീ ഭിക്ഖുനീ ഭദ്ദം കാപിലാനിം സക്കച്ചം ഉപട്ഠേതി. ഭദ്ദാ കാപിലാനീ ഭിക്ഖുനിയോ ഏതദവോച – ‘‘അയം മം, അയ്യേ, ഭിക്ഖുനീ സക്കചം ഉപട്ഠേതി, ഇമിസ്സാഹം ചീവരം ദസ്സാമീ’’തി. അഥ ഖോ സാ ഭിക്ഖുനീ ദുഗ്ഗഹിതേന ദൂപധാരിതേന പരം ഉജ്ഝാപേസി – ‘‘അഹം കിരായ്യേ, അയ്യം ന സക്കച്ചം ഉപട്ഠേമി, ന കിര മേ അയ്യാ ചീവരം ദസ്സതീ’’തി. യാ താ ഭിക്ഖുനിയോ അപ്പിച്ഛാ…പേ… താ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ഭിക്ഖുനീ ദുഗ്ഗഹിതേന ദൂപധാരിതേന പരം ഉജ്ഝാപേസ്സതീ’’തി…പേ… സച്ചം കിര, ഭിക്ഖവേ, ഭിക്ഖുനീ ദുഗ്ഗഹിതേന ദൂപധാരിതേന പരം ഉജ്ഝാപേതീതി [ഉജ്ഝാപേസീതി (ക.)]? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ, ഭിക്ഖവേ, ഭിക്ഖുനീ ദുഗ്ഗഹിതേന ദൂപധാരിതേന പരം ഉജ്ഝാപേസ്സതി! നേതം, ഭിക്ഖവേ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഭിക്ഖുനിയോ ഇമം സിക്ഖാപദം ഉദ്ദിസന്തു –

൮൭൦. ‘‘യാ പന ഭിക്ഖുനീ ദുഗ്ഗഹിതേന ദൂപധാരിതേന പരം ഉജ്ഝാപേയ്യ, പാചിത്തിയ’’ന്തി.

൮൭൧. യാ പനാതി യാ യാദിസാ…പേ… ഭിക്ഖുനീതി…പേ… അയം ഇമസ്മിം അത്ഥേ അധിപ്പേതാ ഭിക്ഖുനീതി.

ദുഗ്ഗഹിതേനാതി അഞ്ഞഥാ ഗഹിതേന [ഉഗ്ഗഹിതേന (ക.)].

ദൂപധാരിതേനാതി അഞ്ഞഥാ ഉപധാരിതേന.

പരന്തി ഉപസമ്പന്നം ഉജ്ഝാപേതി, ആപത്തി പാചിത്തിയസ്സ.

൮൭൨. ഉപസമ്പന്നായ ഉപസമ്പന്നസഞ്ഞാ ഉജ്ഝാപേതി, ആപത്തി പാചിത്തിയസ്സ. ഉപസമ്പന്നായ വേമതികാ ഉജ്ഝാപേതി, ആപത്തി പാചിത്തിയസ്സ. ഉപസമ്പന്നായ അനുപസമ്പന്നസഞ്ഞാ ഉജ്ഝാപേതി, ആപത്തി പാചിത്തിയസ്സ.

അനുപസമ്പന്നം ഉജ്ഝാപേതി, ആപത്തി ദുക്കടസ്സ. അനുപസമ്പന്നായ ഉപസമ്പന്നസഞ്ഞാ, ആപത്തി ദുക്കടസ്സ. അനുപസമ്പന്നായ വേമതികാ, ആപത്തി ദുക്കടസ്സ. അനുപസമ്പന്നായ അനുപസമ്പന്നസഞ്ഞാ, ആപത്തി ദുക്കടസ്സ.

൮൭൩. അനാപത്തി ഉമ്മത്തികായ, ആദികമ്മികായാതി.

അട്ഠമസിക്ഖാപദം നിട്ഠിതം.

൯. നവമസിക്ഖാപദം

൮൭൪. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഭിക്ഖുനിയോ അത്തനോ ഭണ്ഡകം അപസ്സന്തിയോ ചണ്ഡകാളിം ഭിക്ഖുനിം ഏതദവോചും – ‘‘അപായ്യേ, അമ്ഹാകം, ഭണ്ഡകം പസ്സേയ്യാസീ’’തി? ചണ്ഡകാളീ ഭിക്ഖുനീ ഉജ്ഝായതി ഖിയ്യതി വിപാചേതി – ‘‘അഹമേവ നൂന ചോരീ, അഹമേവ നൂന അലജ്ജിനീ, യാ അയ്യായോ അത്തനോ ഭണ്ഡകം അപസ്സന്തിയോ താ മം ഏവമാഹംസു – ‘അപായ്യേ, അമ്ഹാകം ഭണ്ഡകം പസ്സേയ്യാസീ’തി? സചാഹം, അയ്യേ, തുമ്ഹാകം ഭണ്ഡകം ഗണ്ഹാമി, അസ്സമണീ ഹോമി, ബ്രഹ്മചരിയാ ചവാമി, നിരയം ഉപപജ്ജാമി; യാ പന മം അഭൂതേന ഏവമാഹ സാപി അസ്സമണീ ഹോതു, ബ്രഹ്മചരിയാ ചവതു, നിരയം ഉപപജ്ജതൂ’’തി. യാ താ ഭിക്ഖുനിയോ അപ്പിച്ഛാ…പേ… താ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ അയ്യാ ചണ്ഡകാളീ അത്താനമ്പി പരമ്പി നിരയേനപി ബ്രഹ്മചരിയേനപി അഭിസപിസ്സതീ’’തി…പേ… സച്ചം കിര, ഭിക്ഖവേ, ചണ്ഡകാളീ ഭിക്ഖുനീ അത്താനമ്പി പരമ്പി നിരയേനപി ബ്രഹ്മചരിയേനപി അഭിസപതീതി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ, ഭിക്ഖവേ, ചണ്ഡകാളീ ഭിക്ഖുനീ അത്താനമ്പി പരമ്പി നിരയേനപി ബ്രഹ്മചരിയേനപി അഭിസപിസ്സതി! നേതം, ഭിക്ഖവേ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഭിക്ഖുനിയോ ഇമം സിക്ഖാപദം ഉദ്ദിസന്തു –

൮൭൫. ‘‘യാ പന ഭിക്ഖുനീ അത്താനം വാ പരം വാ നിരയേന വാ ബ്രഹ്മചരിയേന വാ അഭിസപേയ്യ, പാചിത്തിയ്യ’’ന്തി.

൮൭൬. യാ പനാതി യാ യാദിസാ…പേ… ഭിക്ഖുനീതി…പേ… അയം ഇമസ്മിം അത്ഥേ അധിപ്പേതാ ഭിക്ഖുനീതി.

അത്താനന്തി പച്ചത്തം. പരന്തി ഉപസമ്പന്നം. നിരയേന വാ ബ്രഹ്മചരിയേന വാ അഭിസപതി, ആപത്തി പാചിത്തിയസ്സ.

൮൭൭. ഉപസമ്പന്നായ ഉപസമ്പന്നസഞ്ഞാ നിരയേന വാ ബ്രഹ്മചരിയേന വാ അഭിസപതി, ആപത്തി പാചിത്തിയസ്സ. ഉപസമ്പന്നായ വേമതികാ നിരയേന വാ ബ്രഹ്മചരിയേന വാ അഭിസപതി, ആപത്തി പാചിത്തിയസ്സ. ഉപസമ്പന്നായ അനുപസമ്പന്നസഞ്ഞാ നിരയേന വാ ബ്രഹ്മചരിയേന വാ അഭിസപതി, ആപത്തി പാചിത്തിയസ്സ.

തിരച്ഛാനയോനിയാ വാ പേത്തിവിസയേന വാ മനുസ്സദോഭഗ്ഗേന വാ അഭിസപതി, ആപത്തി ദുക്കടസ്സ. അനുപസമ്പന്നം അഭിസപതി, ആപത്തി ദുക്കടസ്സ. അനുപസമ്പന്നായ ഉപസമ്പന്നസഞ്ഞാ, ആപത്തി ദുക്കടസ്സ. അനുപസമ്പന്നായ വേമതികാ, ആപത്തി ദുക്കടസ്സ. അനുപസമ്പന്നായ അനുപസമ്പന്നസഞ്ഞാ, ആപത്തി ദുക്കടസ്സ.

൮൭൮. അനാപത്തി അത്ഥപുരേക്ഖാരായ, ധമ്മപുരേക്ഖാരായ, അനുസാസനിപുരേക്ഖാരായ, ഉമ്മത്തികായ, ആദികമ്മികായാതി.

നവമസിക്ഖാപദം നിട്ഠിതം.

൧൦. ദസമസിക്ഖാപദം

൮൭൯. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ചണ്ഡകാളീ ഭിക്ഖുനീ ഭിക്ഖുനീഹി സദ്ധിം ഭണ്ഡിത്വാ അത്താനം വധിത്വാ വധിത്വാ രോദതി. യാ താ ഭിക്ഖുനിയോ അപ്പിച്ഛാ…പേ… താ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ അയ്യാ ചണ്ഡകാളീ അത്താനം വധിത്വാ വധിത്വാ രോദിസ്സതീ’’തി…പേ… സച്ചം കിര, ഭിക്ഖവേ, ചണ്ഡകാളീ ഭിക്ഖുനീ അത്താനം വധിത്വാ വധിത്വാ രോദതീതി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ, ഭിക്ഖവേ, ചണ്ഡകാളീ ഭിക്ഖുനീ അത്താനം വധിത്വാ വധിത്വാ രോദിസ്സതി! നേതം, ഭിക്ഖവേ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഭിക്ഖുനിയോ ഇമം സിക്ഖാപദം ഉദ്ദിസന്തു –

൮൮൦. ‘‘യാ പന ഭിക്ഖുനീ അത്താനം വധിത്വാ വധിത്വാ രോദേയ്യ, പാചിത്തിയ’’ന്തി.

൮൮൧. യാ പനാതി യാ യാദിസാ…പേ… ഭിക്ഖുനീതി…പേ… അയം ഇമസ്മിം അത്ഥേ അധിപ്പേതാ ഭിക്ഖുനീതി.

അത്താനന്തി പച്ചത്തം. വധിത്വാ വധിത്വാ രോദതി, ആപത്തി പാചിത്തിയസ്സ. വധതി ന രോദതി, ആപത്തി ദുക്കടസ്സ. രോദതി ന വധതി, ആപത്തി ദുക്കടസ്സ.

൮൮൨. അനാപത്തി ഞാതിബ്യസനേന വാ ഭോഗബ്യസനേന വാ രോഗബ്യസനേന വാ ഫുട്ഠാ രോദതി ന വധതി, ഉമ്മത്തികായ, ആദികമ്മികായാതി.

ദസമസിക്ഖാപദം നിട്ഠിതം.

അന്ധകാരവഗ്ഗോ ദുതിയോ.