൯. നവമസങ്ഘാദിസേസസിക്ഖാപദം

൭൨൧. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഥുല്ലനന്ദായ ഭിക്ഖുനിയാ അന്തേവാസികാ ഭിക്ഖുനിയോ സംസട്ഠാ വിഹരന്തി പാപാചാരാ പാപസദ്ദാ പാപസിലോകാ, ഭിക്ഖുനിസങ്ഘസ്സ വിഹേസികാ, അഞ്ഞമഞ്ഞിസ്സാ വജ്ജപ്പടിച്ഛാദികാ. യാ താ ഭിക്ഖുനിയോ അപ്പിച്ഛാ…പേ… താ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ഭിക്ഖുനിയോ സംസട്ഠാ വിഹരിസ്സന്തി പാപാചാരാ പാപസദ്ദാ പാപസിലോകാ ഭിക്ഖുനിസങ്ഘസ്സ വിഹേസികാ അഞ്ഞമഞ്ഞിസ്സാ വജ്ജപ്പടിച്ഛാദികാ’’തി…പേ… സച്ചം കിര, ഭിക്ഖവേ, ഭിക്ഖുനിയോ സംസട്ഠാ വിഹരന്തി പാപാചാരാ പാപസദ്ദാ പാപസിലോകാ ഭിക്ഖുനിസങ്ഘസ്സ വിഹേസികാ അഞ്ഞമഞ്ഞിസ്സാ വജ്ജപ്പടിച്ഛാദികാതി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ, ഭിക്ഖവേ, ഭിക്ഖുനിയോ സംസട്ഠാ വിഹരിസ്സന്തി പാപാചാരാ പാപസദ്ദാ പാപസിലോകാ, ഭിക്ഖുനിസങ്ഘസ്സ വിഹേസികാ, അഞ്ഞമഞ്ഞിസ്സാ വജ്ജപ്പടിച്ഛാദികാ! നേതം, ഭിക്ഖവേ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഭിക്ഖുനിയോ ഇമം സിക്ഖാപദം ഉദ്ദിസന്തു –

൭൨൨. ‘‘ഭിക്ഖുനിയോ പനേവ സംസട്ഠാ വിഹരന്തി പാപാചാരാ പാപസദ്ദാ പാപസിലോകാ, ഭിക്ഖുനിസങ്ഘസ്സ വിഹേസികാ, അഞ്ഞമഞ്ഞിസ്സാ വജ്ജപ്പടിച്ഛാദികാ. താ ഭിക്ഖുനിയോ ഭിക്ഖുനീഹി ഏവമസ്സു വചനീയാ – ‘ഭഗിനിയോ ഖോ സംസട്ഠാ വിഹരന്തി പാപാചാരാ പാപസദ്ദാ പാപസിലോകാ, ഭിക്ഖുനിസങ്ഘസ്സ വിഹേസികാ അഞ്ഞമഞ്ഞിസ്സാ വജ്ജപ്പടിച്ഛാദികാ. വിവിച്ചഥായ്യേ. വിവേകഞ്ഞേവ ഭഗിനീനം സങ്ഘോ വണ്ണേതീ’തി. ഏവഞ്ച താ ഭിക്ഖുനിയോ ഭിക്ഖുനീഹി വുച്ചമാനാ തഥേവ പഗ്ഗണ്ഹേയ്യും, താ ഭിക്ഖുനിയോ ഭിക്ഖുനീഹി യാവതതിയം സമനുഭാസിതബ്ബാ തസ്സ പടിനിസ്സഗ്ഗായ. യാവതതിയഞ്ചേ സമനുഭാസീയമാനാ തം പടിനിസ്സജ്ജേയ്യും, ഇച്ചേതം കുസലം; നോ ചേ പടിനിസ്സജ്ജേയ്യും, ഇമാപി ഭിക്ഖുനിയോ യാവതതിയകം ധമ്മം ആപന്നാ നിസ്സാരണീയം സങ്ഘാദിസേസ’’ന്തി.

൭൨൩. ഭിക്ഖുനിയോ പനേവാതി ഉപസമ്പന്നായോ വുച്ചന്തി.

സംസട്ഠാ വിഹരന്തീതി സംസട്ഠാ നാമ അനനുലോമികേന കായികവാചസികേന സംസട്ഠാ വിഹരന്തി.

പാപാചാരാതി പാപകേന ആചാരേന സമന്നാഗതാ.

പാപസദ്ദാതി പാപകേന കിത്തിസദ്ദേന അബ്ഭുഗ്ഗതാ.

പാപസിലോകാതി പാപകേന മിച്ഛാജീവേന ജീവിതം കപ്പേന്തി.

ഭിക്ഖുനിസങ്ഘസ്സ വിഹേസികാതി അഞ്ഞമഞ്ഞിസ്സാ കമ്മേ കരീയമാനേ പടിക്കോസന്തി.

അഞ്ഞമഞ്ഞിസ്സാ വജ്ജപ്പടിച്ഛാദികാതി അഞ്ഞമഞ്ഞം വജ്ജം പടിച്ഛാദേന്തി.

താ ഭിക്ഖുനിയോതി യാ താ സംസട്ഠാ ഭിക്ഖുനിയോ.

ഭിക്ഖുനീഹീതി അഞ്ഞാഹി ഭിക്ഖുനീഹി.

യാ പസ്സന്തി യാ സുണന്തി താഹി വത്തബ്ബാ – ‘‘ഭഗിനിയോ ഖോ സംസട്ഠാ വിഹരന്തി പാപാചാരാ പാപസദ്ദാ പാപസിലോകാ, ഭിക്ഖുനിസങ്ഘസ്സ വിഹേസികാ, അഞ്ഞമഞ്ഞിസ്സാ വജ്ജപ്പടിച്ഛാദികാ. വിവിച്ചഥായ്യേ. വിവേകഞ്ഞേവ ഭഗിനീനം സങ്ഘോ വണ്ണേതീ’’തി. ദുതിയമ്പി വത്തബ്ബാ. തതിയമ്പി വത്തബ്ബാ. സചേ പടിനിസ്സജ്ജന്തി, ഇച്ചേതം കുസലം; നോ ചേ പടിനിസ്സജ്ജന്തി, ആപത്തി ദുക്കടസ്സ. സുത്വാ ന വദന്തി, ആപത്തി ദുക്കടസ്സ. താ ഭിക്ഖുനിയോ സങ്ഘമജ്ഝമ്പി ആകഡ്ഢിത്വാ വത്തബ്ബാ – ‘‘ഭഗിനിയോ ഖോ സംസട്ഠാ വിഹരന്തി പാപാചാരാ പാപസദ്ദാ പാപസിലോകാ, ഭിക്ഖുനിസങ്ഘസ്സ വിഹേസികാ, അഞ്ഞമഞ്ഞിസ്സാ വജ്ജപ്പടിച്ഛാദികാ. വിവിച്ചഥായ്യേ. വിവേകഞ്ഞേവ ഭഗിനീനം സങ്ഘോ വണ്ണേതീ’’തി. ദുതിയമ്പി വത്തബ്ബാ. തതിയമ്പി വത്തബ്ബാ. സചേ പടിനിസ്സജ്ജന്തി, ഇച്ചേതം കുസലം; നോ ചേ പടിനിസ്സജ്ജന്തി, ആപത്തി ദുക്കടസ്സ. താ ഭിക്ഖുനിയോ സമനുഭാസിതബ്ബാ. ഏവഞ്ച പന, ഭിക്ഖവേ, സമനുഭാസിതബ്ബാ. ബ്യത്തായ ഭിക്ഖുനിയാ പടിബലായ സങ്ഘോ ഞാപേതബ്ബോ –

൭൨൪. ‘‘സുണാതു മേ, അയ്യേ, സങ്ഘോ. ഇത്ഥന്നാമാ ച ഇത്ഥന്നാമാ ച ഭിക്ഖുനിയോ സംസട്ഠാ വിഹരന്തി പാപാചാരാ പാപസദ്ദാ പാപസിലോകാ, ഭിക്ഖുനിസങ്ഘസ്സ വിഹേസികാ, അഞ്ഞമഞ്ഞിസ്സാ വജ്ജപ്പടിച്ഛാദികാ. താ തം വത്ഥും ന പടിനിസ്സജ്ജന്തി. യദി സങ്ഘസ്സ പത്തകല്ലം, സങ്ഘോ ഇത്ഥന്നാമഞ്ച ഇത്ഥന്നാമഞ്ച ഭിക്ഖുനിയോ സമനുഭാസേയ്യ തസ്സ വത്ഥുസ്സ പടിനിസ്സഗ്ഗായ. ഏസാ ഞത്തി.

‘‘സുണാതു മേ, അയ്യേ, സങ്ഘോ. ഇത്ഥന്നാമാ ച ഇത്ഥന്നാമാ ച ഭിക്ഖുനിയോ സംസട്ഠാ വിഹരന്തി പാപാചാരാ പാപസദ്ദാ പാപസിലോകാ, ഭിക്ഖുനിസങ്ഘസ്സ വിഹേസികാ, അഞ്ഞമഞ്ഞിസ്സാ വജ്ജപ്പടിച്ഛാദികാ. താ തം വത്ഥും ന പടിനിസ്സജ്ജന്തി. സങ്ഘോ ഇത്ഥന്നാമഞ്ച ഇത്ഥന്നാമഞ്ച ഭിക്ഖുനിയോ സമനുഭാസതി തസ്സ വത്ഥുസ്സ പടിനിസ്സഗ്ഗായ. യസ്സാ അയ്യായ ഖമതി ഇത്ഥന്നാമായ ച ഇത്ഥന്നാമായ ച ഭിക്ഖുനീനം സമനുഭാസനാ തസ്സ വത്ഥുസ്സ പടിനിസ്സഗ്ഗായ, സാ തുണ്ഹസ്സ; യസ്സാ നക്ഖമതി, സാ ഭാസേയ്യ.

‘‘ദുതിയമ്പി ഏതമത്ഥം വദാമി…പേ… തതിയമ്പി ഏതമത്ഥം വദാമി…പേ….

‘‘സമനുഭട്ഠാ സങ്ഘേന, ഇത്ഥന്നാമാ ച ഇത്ഥന്നാമാ ച ഭിക്ഖുനിയോ തസ്സ വത്ഥുസ്സ പടിനിസ്സഗ്ഗായ. ഖമതി സങ്ഘസ്സ, തസ്മാ തുണ്ഹീ, ഏവമേതം ധാരയാമീ’’തി.

ഞത്തിയാ ദുക്കടം, ദ്വീഹി കമ്മവാചാഹി ഥുല്ലച്ചയാ, കമ്മവാചാപരിയോസാനേ ആപത്തി സങ്ഘാദിസേസസ്സ. സങ്ഘാദിസേസം അജ്ഝാപജ്ജന്തീനം ഞത്തിയാ ദുക്കടം ദ്വീഹി കമ്മവാചാഹി ഥുല്ലച്ചയാ പടിപ്പസ്സമ്ഭന്തി. ദ്വേ തിസ്സോ ഏകതോ സമനുഭാസിതബ്ബാ. തതുത്തരി ന സമനുഭാസിതബ്ബാ.

ഇമാപി ഭിക്ഖുനിയോതി പുരിമായോ ഉപാദായ വുച്ചന്തി.

യാവതതിയകന്തി യാവതതിയം സമനുഭാസനായ ആപജ്ജന്തി, ന സഹ വത്ഥുജ്ഝാചാരാ.

നിസ്സാരണീയന്തി സങ്ഘമ്ഹാ നിസ്സാരീയതി.

സങ്ഘാദിസേസോതി…പേ… തേനപി വുച്ചതി സങ്ഘാദിസേസോതി.

൭൨൫. ധമ്മകമ്മേ ധമ്മകമ്മസഞ്ഞാ ന പടിനിസ്സജ്ജന്തി, ആപത്തി സങ്ഘാദിസേസസ്സ. ധമ്മകമ്മേ വേമതികാ ന പടിനിസ്സജ്ജന്തി, ആപത്തി സങ്ഘാദിസേസസ്സ. ധമ്മകമ്മേ അധമ്മകമ്മസഞ്ഞാ ന പടിനിസ്സജ്ജന്തി, ആപത്തി സങ്ഘാദിസേസസ്സ.

അധമ്മകമ്മേ ധമ്മകമ്മസഞ്ഞാ, ആപത്തി ദുക്കടസ്സ. അധമ്മകമ്മേ വേമതികാ, ആപത്തി ദുക്കടസ്സ. അധമ്മകമ്മേ അധമ്മകമ്മസഞ്ഞാ, ആപത്തി ദുക്കടസ്സ.

൭൨൬. അനാപത്തി അസമനുഭാസന്തീനം, പടിനിസ്സജ്ജന്തീനം, ഉമ്മത്തികാനം, ആദികമ്മികാനന്തി.

നവമസങ്ഘാദിസേസസിക്ഖാപദം നിട്ഠിതം.