൧൦. ദസമസങ്ഘാദിസേസസിക്ഖാപദം

൭൨൭. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഥുല്ലനന്ദാ ഭിക്ഖുനീസങ്ഘേന സമനുഭട്ഠാ ഭിക്ഖുനിയോ ഏവം വദേതി – ‘‘സംസട്ഠാവ അയ്യേ, തുമ്ഹേ വിഹരഥ. മാ തുമ്ഹേ നാനാ വിഹരിത്ഥ. സന്തി സങ്ഘേ അഞ്ഞാപി ഭിക്ഖുനിയോ ഏവാചാരാ ഏവംസദ്ദാ ഏവംസിലോകാ, ഭിക്ഖുനിസങ്ഘസ്സ വിഹേസികാ, അഞ്ഞമഞ്ഞിസ്സാ വജ്ജപ്പടിച്ഛാദികാ. താ സങ്ഘോ ന കിഞ്ചി ആഹ. തുമ്ഹഞ്ഞേവ [തുമ്ഹേയേവ (സ്യാ.)] സങ്ഘോ ഉഞ്ഞായ പരിഭവേന അക്ഖന്തിയാ വേഭസ്സിയാ [വേഭസ്സാ (സീ. സ്യാ.)] ദുബ്ബല്യാ ഏവമാഹ – ‘ഭഗിനിയോ ഖോ സംസട്ഠാ വിഹരന്തി പാപാചാരാ പാപസദ്ദാ പാപസിലോകാ, ഭിക്ഖുനിസങ്ഘസ്സ വിഹേസികാ, അഞ്ഞമഞ്ഞിസ്സാ വജ്ജപ്പടിച്ഛാദികാ. വിവിച്ചഥായ്യേ. വിവേകഞ്ഞേവ ഭഗിനീനം സങ്ഘോ വണ്ണേതീ’’’തി. യാ താ ഭിക്ഖുനിയോ അപ്പിച്ഛാ…പേ… താ ഉജ്ഝായന്തി ഖിയ്യന്തി വിപാചേന്തി – കഥഞ്ഹി നാമ അയ്യാ ഥുല്ലനന്ദാ ഭിക്ഖുനീ സങ്ഘേന സമനുഭട്ഠാ ഭിക്ഖുനിയോ ഏവം വക്ഖതി – സംസട്ഠാവ അയ്യേ, തുമ്ഹേ വിഹരഥ. മാ തുമ്ഹേ നാനാ വിഹരിത്ഥ. സന്തി സങ്ഘേ അഞ്ഞാപി ഭിക്ഖുനിയോ…പേ… വിവിച്ചഥായ്യേ. വിവേകഞ്ഞേവ ഭഗിനീനം സങ്ഘോ വണ്ണേതീതി…പേ… സച്ചം കിര, ഭിക്ഖവേ, ഥുല്ലനന്ദാ ഭിക്ഖുനീ സങ്ഘേന സമനുഭട്ഠാ ഭിക്ഖുനിയോ ഏവം വദേതി – സംസട്ഠാവ അയ്യേ തുമ്ഹേ വിഹരഥ. മാ തുമ്ഹേ നാനാ വിഹരിത്ഥ. സന്തി സങ്ഘേ അഞ്ഞാപി ഭിക്ഖുനിയോ ഏവാചാരാ ഏവംസദ്ദാ ഏവംസിലോകാ, ഭിക്ഖുനിസങ്ഘസ്സ വിഹേസികാ, അഞ്ഞമഞ്ഞിസ്സാ വജ്ജപ്പടിച്ഛാദികാ. താ സങ്ഘോ ന കിഞ്ചി ആഹ. തുമ്ഹഞ്ഞേവ സങ്ഘോ ഉഞ്ഞായ പരിഭവേന അക്ഖന്തിയാ വേഭസ്സിയാ ദുബ്ബല്യാ ഏവമാഹ – ഭഗിനിയോ ഖോ സംസട്ഠാ വിഹരന്തി പാപാചാരാ പാപസദ്ദാ പാപസിലോകാ, ഭിക്ഖുനിസങ്ഘസ്സ വിഹേസികാ, അഞ്ഞമഞ്ഞിസ്സാ വജ്ജപ്പടിച്ഛാദികാ. വിവിച്ചഥായ്യേ. വിവേകഞ്ഞേവ ഭഗിനീനം സങ്ഘോ വണ്ണേതീതി? ‘‘സച്ചം ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ, ഭിക്ഖവേ, ഥുല്ലനന്ദാ ഭിക്ഖുനീ സങ്ഘേന സമനുഭട്ഠാ ഭിക്ഖുനിയോ ഏവം വക്ഖതി – സംസട്ഠാവ അയ്യേ, തുമ്ഹേ വിഹരഥ. മാ തുമ്ഹേ നാനാ വിഹരിത്ഥ. സന്തി സങ്ഘേ അഞ്ഞാപി ഭിക്ഖുനിയോ…പേ… വിവിച്ചഥായ്യേ. വിവേകഞ്ഞേവ ഭഗിനീനം സങ്ഘോ വണ്ണേതീതി! നേതം, ഭിക്ഖവേ, അപ്പസന്നാനം വാ പസാദായ…പേ… ഏവഞ്ച പന ഭിക്ഖവേ, ഭിക്ഖുനിയോ ഇമം സിക്ഖാപദം ഉദ്ദിസന്തു –

൭൨൮. ‘‘യാ പന ഭിക്ഖുനീ ഏവം വദേയ്യ – ‘സംസട്ഠാവ അയ്യേ, തുമ്ഹേ വിഹരഥ. മാ തുമ്ഹേ നാനാ വിഹരിത്ഥ. സന്തി സങ്ഘേ അഞ്ഞാപി ഭിക്ഖുനിയോ ഏവാചാരാ ഏവംസദ്ദാ ഏവംസിലോകാ, ഭിക്ഖുനിസങ്ഘസ്സ വിഹേസികാ, അഞ്ഞമഞ്ഞിസ്സാ വജ്ജപ്പടിച്ഛാദികാ. താ സങ്ഘോ ന കിഞ്ചി ആഹ. തുമ്ഹഞ്ഞേവ സങ്ഘോ ഉഞ്ഞായ പരിഭവേന അക്ഖന്തിയാ വേഭസ്സിയാ ദുബ്ബല്യാ ഏവമാഹ – ഭഗിനിയോ ഖോ സംസട്ഠാ വിഹരന്തി പാപാചാരാ പാപസദ്ദാ പാപസിലോകാ, ഭിക്ഖുനിസങ്ഘസ്സ വിഹേസികാ, അഞ്ഞമഞ്ഞിസ്സാ വജ്ജപ്പടിച്ഛാദികാ. വിവിച്ചഥായ്യേ. വിവേകഞ്ഞേവ ഭഗിനീനം സങ്ഘോ വണ്ണേതീ’തി. സാ ഭിക്ഖുനീ ഭിക്ഖുനീഹി ഏവമസ്സ വചനീയാ – ‘മാ, അയ്യേ, ഏവം അവച – സംസട്ഠാവ അയ്യേ, തുമ്ഹേ വിഹരഥ. മാ തുമ്ഹേ നാനാ വിഹരിത്ഥ. സന്തി സങ്ഘേ അഞ്ഞാപി ഭിക്ഖുനിയോ ഏവാചാരാ ഏവംസദ്ദാ ഏവംസിലോകാ, ഭിക്ഖുനിസങ്ഘസ്സ വിഹേസികാ, അഞ്ഞമഞ്ഞിസ്സാ വജ്ജപ്പടിച്ഛാദികാ. താ സങ്ഘോ ന കിഞ്ചി ആഹ. തുമ്ഹഞ്ഞേവ സങ്ഘോ ഉഞ്ഞായ പരിഭവേന അക്ഖന്തിയാ വേഭസ്സിയാ ദുബ്ബല്യാ ഏവമാഹ – ഭഗിനിയോ ഖോ സംസട്ഠാ വിഹരന്തി പാപാചാരാ പാപസദ്ദാ പാപസിലോകാ, ഭിക്ഖുനിസങ്ഘസ്സ വിഹേസികാ, അഞ്ഞമഞ്ഞിസ്സാ വജ്ജപ്പടിച്ഛാദികാ. വിവിച്ചഥായ്യേ. വിവേകഞ്ഞേവ ഭഗിനീനം സങ്ഘോ വണ്ണേതീ’തി. ഏവഞ്ച സാ ഭിക്ഖുനീ ഭിക്ഖുനീഹി വുച്ചമാനാ തഥേവ പഗ്ഗണ്ഹേയ്യ, സാ ഭിക്ഖുനീ ഭിക്ഖുനീഹി യാവതതിയം സമനുഭാസിതബ്ബാ തസ്സ പടിനിസ്സഗ്ഗായ. യാവതതിയഞ്ചേ സമനുഭാസീയമാനാ തം പടിനിസ്സജ്ജേയ്യ, ഇച്ചേതം കുസലം; നോ ചേ പടിനിസ്സജ്ജേയ്യ, അയമ്പി ഭിക്ഖുനീ യാവതതിയകം ധമ്മം ആപന്നാ നിസ്സാരണീയം സങ്ഘാദിസേസ’’ന്തി.

൭൨൯. യാ പനാതി യാ യാദിസാ…പേ… ഭിക്ഖുനീതി…പേ… അയം ഇമസ്മിം അത്ഥേ അധിപ്പേതാ ഭിക്ഖുനീതി.

ഏവം വദേയ്യാതി – ‘‘സംസട്ഠാവ അയ്യേ, തുമ്ഹേ വിഹരഥ. മാ തുമ്ഹേ നാനാ വിഹരിത്ഥ. സന്തി സങ്ഘേ അഞ്ഞാപി ഭിക്ഖുനിയോ ഏവാചാരാ ഏവംസദ്ദാ ഏവംസിലോകാ, ഭിക്ഖുനിസങ്ഘസ്സ വിഹേസികാ, അഞ്ഞമഞ്ഞിസ്സാ വജ്ജപ്പടിച്ഛാദികാ. താ സങ്ഘോ ന കിഞ്ചി ആഹ’’.

തുമ്ഹഞ്ഞേവ സങ്ഘോ ഉഞ്ഞായാതി അവഞ്ഞായ.

പരിഭവേനാതി പാരിഭബ്യതാ.

അക്ഖന്തിയാതി കോപേന.

വേഭസ്സിയാതി വിഭസ്സീകതാ [വിഭസ്സികതായ (സീ.)].

ദുബ്ബല്യാതി അപക്ഖതാ.

ഏവമാഹ – ‘‘ഭഗിനിയോ ഖോ സംസട്ഠാ വിഹരന്തി പാപാചാരാ പാപസദ്ദാ പാപസിലോകാ, ഭിക്ഖുനിസങ്ഘസ്സ വിഹേസികാ, അഞ്ഞമഞ്ഞിസ്സാ വജ്ജപ്പടിച്ഛാദികാ. വിചിച്ചഥായ്യേ. വിവേകഞ്ഞേവ ഭഗിനീനം സങ്ഘോ വണ്ണേതീ’’തി.

സാ ഭിക്ഖുനീതി യാ സാ ഏവംവാദിനീ ഭിക്ഖുനീ.

ഭിക്ഖുനീഹീതി അഞ്ഞാഹി ഭിക്ഖുനീഹി.

യാ പസ്സന്തി യാ സുണന്തി താഹി വത്തബ്ബാ – ‘‘മായ്യേ, ഏവം അവച – ‘സംസട്ഠാവ അയ്യേ, തുമ്ഹേ വിഹരഥ. മാ തുമ്ഹേ നാനാ വിഹരിത്ഥ. സന്തി സങ്ഘേ അഞ്ഞാപി ഭിക്ഖുനിയോ…പേ… വിവിച്ചഥായ്യേ. വിവേകഞ്ഞേവ ഭഗിനീനം സങ്ഘോ വണ്ണേതീ’’തി. ദുതിയമ്പി വത്തബ്ബാ. തതിയമ്പി വത്തബ്ബാ. സചേ പടിനിസ്സജ്ജതി, ഇച്ചേതം കുസലം; നോ ചേ പടിനിസ്സജ്ജതി, ആപത്തി ദുക്കടസ്സ. സുത്വാ ന വദന്തി, ആപത്തി ദുക്കടസ്സ. സാ ഭിക്ഖുനീ സങ്ഘമജ്ഝമ്പി ആകഡ്ഢിത്വാ വത്തബ്ബാ – ‘‘മായ്യേ, ഏവം അവച – ‘സംസട്ഠാവ അയ്യേ, തുമ്ഹേ വിഹരഥ. മാ തുമ്ഹേ നാനാ വിഹരിത്ഥ. സന്തി സങ്ഘേ അഞ്ഞാപി ഭിക്ഖുനിയോ…പേ… വിവിച്ചഥായ്യേ. വിവേകഞ്ഞേവ ഭഗിനീനം സങ്ഘോ വണ്ണേതീ’’’തി. ദുതിയമ്പി വത്തബ്ബാ. തതിയമ്പി വത്തബ്ബാ. സചേ പടിനിസ്സജ്ജതി, ഇച്ചേതം കുസലം; നോ ചേ പടിനിസ്സജ്ജതി, ആപത്തി ദുക്കടസ്സ. സാ ഭിക്ഖുനീ സമനുഭാസിതബ്ബാ. ഏവഞ്ച പന, ഭിക്ഖവേ, സമനുഭാസിതബ്ബാ. ബ്യത്തായ ഭിക്ഖുനിയാ പടിബലായ സങ്ഘോ ഞാപേതബ്ബോ –

൭൩൦. ‘‘സുണാതു മേ, അയ്യേ, സങ്ഘോ. അയം ഇത്ഥന്നാമാ ഭിക്ഖുനീ സങ്ഘേന സമനുഭട്ഠാ ഭിക്ഖുനിയോ ഏവം വദേതി – ‘സംസട്ഠാവ അയ്യേ, തുമ്ഹേ വിഹരഥ. മാ തുമ്ഹേ നാനാ വിഹരിത്ഥ. സന്തി സങ്ഘേ അഞ്ഞാപി ഭിക്ഖുനിയോ ഏവാചാരാ ഏവംസദ്ദാ ഏവംസിലോകാ, ഭിക്ഖുനിസങ്ഘസ്സ വിഹേസികാ, അഞ്ഞമഞ്ഞിസ്സാ വജ്ജപ്പടിച്ഛാദികാ. താ സങ്ഘോ ന കിഞ്ചി ആഹ. തുമ്ഹഞ്ഞേവ സങ്ഘോ ഉഞ്ഞായ പരിഭവേന അക്ഖന്തിയാ വേഭസ്സിയാ ദുബ്ബല്യാ ഏവമാഹ – ഭഗിനിയോ ഖോ സംസട്ഠാ വിഹരന്തി പാപാചാരാ പാപസദ്ദാ പാപസിലോകാ, ഭിക്ഖുനിസങ്ഘസ്സ വിഹേസികാ അഞ്ഞമഞ്ഞിസ്സാ വജ്ജപ്പടിച്ഛാദികാ. വിവിച്ചഥായ്യേ. വിവേകഞ്ഞേവ ഭഗിനീനം സങ്ഘോ വണ്ണേതീ’തി. സാ തം വത്ഥും ന പടിനിസ്സജ്ജതി. യദി സങ്ഘസ്സ പത്തകല്ലം, സങ്ഘോ ഇത്ഥന്നാമം ഭിക്ഖുനിം സമനുഭാസേയ്യ തസ്സ വത്ഥുസ്സ പടിനിസ്സഗ്ഗായ. ഏസാ ഞത്തി.

‘‘സുണാതു മേ, അയ്യേ, സങ്ഘോ. അയം ഇത്ഥന്നാമാ ഭിക്ഖുനീ സങ്ഘേന സമനുഭട്ഠാ ഭിക്ഖുനിയോ ഏവം വദേതി – ‘സംസട്ഠാവ അയ്യേ, തുമ്ഹേ വിഹരഥ. മാ തുമ്ഹേ നാനാ വിഹരിത്ഥ. സന്തി സങ്ഘേ അഞ്ഞാപി ഭിക്ഖുനിയോ ഏവാചാരാ ഏവംസദ്ദാ ഏവംസിലോകാ, ഭിക്ഖുനിസങ്ഘസ്സ വിഹേസികാ, അഞ്ഞമഞ്ഞിസ്സാ വജ്ജപ്പടിച്ഛാദികാ. താ സങ്ഘോ ന കിഞ്ചി ആഹ. തുമ്ഹഞ്ഞേവ സങ്ഘോ ഉഞ്ഞായ പരിഭവേന അക്ഖന്തിയാ വേഭസ്സിയാ ദുബ്ബല്യാ ഏവമാഹ – ഭഗിനിയോ ഖോ സംസട്ഠാ വിഹരന്തി പാപാചാരാ പാപസദ്ദാ പാപസിലോകാ, ഭിക്ഖുനിസങ്ഘസ്സ വിഹേസികാ, അഞ്ഞമഞ്ഞിസ്സാ വജ്ജപ്പടിച്ഛാദികാ. വിവിച്ചഥായ്യേ. വിവേകഞ്ഞേവ ഭഗിനീനം സങ്ഘോ വണ്ണേതീ’തി. സാ തം വത്ഥും ന പടിനിസ്സജ്ജതി. സങ്ഘോ ഇത്ഥന്നാമം ഭിക്ഖുനിം സമനുഭാസതി തസ്സ വത്ഥുസ്സ പടിനിസ്സഗ്ഗായ. യസ്സാ അയ്യായ ഖമതി ഇത്ഥന്നാമായ ഭിക്ഖുനിയാ സമനുഭാസനാ തസ്സ വത്ഥുസ്സ പടിനിസ്സഗ്ഗായ, സാ തുണ്ഹസ്സ; യസ്സാ നക്ഖമതി, സാ ഭാസേയ്യ.

‘‘ദുതിയമ്പി ഏതമത്ഥം വദാമി…പേ… തതിയമ്പി ഏതമത്ഥം വദാമി…പേ….

‘‘സമനുഭട്ഠാ സങ്ഘേന ഇത്ഥന്നാമാ ഭിക്ഖുനീ തസ്സ വത്ഥുസ്സ പടിനിസ്സഗ്ഗായ. ഖമതി സങ്ഘസ്സ, തസ്മാ തുണ്ഹീ, ഏവമേതം ധാരയാമീ’’തി.

ഞത്തിയാ ദുക്കടം, ദ്വീഹി കമ്മവാചാഹി ഥുല്ലച്ചയാ, കമ്മവാചാപരിയോസാനേ ആപത്തി സങ്ഘാദിസേസസ്സ. സങ്ഘാദിസേസം അജ്ഝാപജ്ജന്തിയാ ഞത്തിയാ ദുക്കടം, ദ്വീഹി കമ്മവാചാഹി ഥുല്ലച്ചയാ പടിപ്പസ്സമ്ഭന്തി.

അയമ്പീതി പുരിമായോ ഉപാദായ വുച്ചതി.

യാവതതിയകന്തി യാവതതിയം സമനുഭാസനായ ആപജ്ജതി, ന സഹവത്ഥുജ്ഝാചാരാ.

നിസ്സാരണീയന്തി സങ്ഘമ്ഹാ നിസ്സാരീയതി.

സങ്ഘാദിസേസോതി സങ്ഘോവ തസ്സാ ആപത്തിയാ മാനത്തം ദേതി, മൂലായ പടികസ്സതി, അബ്ഭേതി, ന സമ്ബഹുലാ ന ഏകാ ഭിക്ഖുനീ. തേന വുച്ചതി ‘‘സങ്ഘാദിസേസോ’’തി. തസ്സേവ ആപത്തിനികായസ്സ നാമകമ്മം അധിവചനം, തേനപി വുച്ചതി ‘‘സങ്ഘാദിസേസോ’’തി.

൭൩൧. ധമ്മകമ്മേ ധമ്മകമ്മസഞ്ഞാ ന പടിനിസ്സജ്ജതി, ആപത്തി സങ്ഘാദിസേസസ്സ. ധമ്മകമ്മേ വേമതികാ ന പടിനിസ്സജ്ജതി, ആപത്തി സങ്ഘാദിസേസസ്സ. ധമ്മകമ്മേ അധമ്മകമ്മസഞ്ഞാ ന പടിനിസ്സജ്ജതി, ആപത്തി സങ്ഘാദിസേസസ്സ.

അധമ്മകമ്മേ ധമ്മകമ്മസഞ്ഞാ, ആപത്തി ദുക്കടസ്സ. അധമ്മകമ്മേ വേമതികാ, ആപത്തി ദുക്കടസ്സ. അധമ്മകമ്മേ അധമ്മകമ്മസഞ്ഞാ, ആപത്തി ദുക്കടസ്സ.

൭൩൨. അനാപത്തി അസമനുഭാസന്തിയാ, പടിനിസ്സജ്ജന്തിയാ, ഉമ്മത്തികായ, ആദികമ്മികായാതി.

ദസമസങ്ഘാദിസേസസിക്ഖാപദം നിട്ഠിതം.

ഉദ്ദിട്ഠാ ഖോ, അയ്യായോ, സത്തരസ സങ്ഘാദിസേസാ ധമ്മാ – നവ പഠമാപത്തികാ, അട്ഠ യാവതതിയകാ. യേസം ഭിക്ഖുനീ അഞ്ഞതരം വാ അഞ്ഞതരം വാ ആപജ്ജതി, തായ ഭിക്ഖുനിയാ ഉഭതോസങ്ഘേ പക്ഖമാനത്തം ചരിതബ്ബം. ചിണ്ണമാനത്താ ഭിക്ഖുനീ യത്ഥ സിയാ വീസതിഗണോ ഭിക്ഖുനിസങ്ഘോ തത്ഥ (സാ ഭിക്ഖുനീ) [( ) (കത്ഥപി നത്ഥി)] അബ്ഭേതബ്ബാ. ഏകായപി ചേ ഊനോ വീസതിഗണോ ഭിക്ഖുനിസങ്ഘോ തം ഭിക്ഖുനിം അബ്ഭേയ്യ. സാ ച ഭിക്ഖുനീ അനബ്ഭിതാ, താ ച ഭിക്ഖുനിയോ ഗാരയ്ഹാ, അയം തത്ഥ സാമീചി.

തത്ഥായ്യായോ പുച്ഛാമി – ‘‘കച്ചിത്ഥ പരിസുദ്ധാ’’? ദുതിയമ്പി പുച്ഛാമി – ‘‘കച്ചിത്ഥ പരിസുദ്ധാ’’? തതിയമ്പി പുച്ഛാമി – ‘‘കച്ചിത്ഥ പരിസുദ്ധാ’’? പരിസുദ്ധേത്ഥായ്യായോ, തസ്മാ തുണ്ഹീ, ഏവമേതം ധാരയാമീതി.

സത്തരസകം നിട്ഠിതം.

ഭിക്ഖുനിവിഭങ്ഗേ സങ്ഘാദിസേസകണ്ഡം നിട്ഠിതം.