൨. ദുതിയപാരാജികം

൬൬൪. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന സുന്ദരീനന്ദാ ഭിക്ഖുനീ സാള്ഹേന മിഗാരനത്തുനാ ഗബ്ഭിനീ ഹോതി. യാവ ഗബ്ഭോ തരുണോ അഹോസി താവ ഛാദേസി. പരിപക്കേ ഗബ്ഭേ വിബ്ഭമിത്വാ വിജായി. ഭിക്ഖുനിയോ ഥുല്ലനന്ദം ഭിക്ഖുനിം ഏതദവോചും – ‘‘സുന്ദരീനന്ദാ ഖോ, അയ്യേ, അചിരവിബ്ഭന്താ വിജാതാ. കച്ചി നോ സാ ഭിക്ഖുനീയേവ സമാനാ ഗബ്ഭിനീ’’തി? ‘‘ഏവം, അയ്യേ’’തി. ‘‘കിസ്സ പന ത്വം, അയ്യേ, ജാനം പാരാജികം ധമ്മം അജ്ഝാപന്നം ഭിക്ഖുനിം നേവത്തനാ പടിചോദേസി ന ഗണസ്സ ആരോചേസീ’’തി? ‘‘യോ ഏതിസ്സാ അവണ്ണോ മയ്ഹേസോ അവണ്ണോ, യാ ഏതിസ്സാ അകിത്തി മയ്ഹേസാ അകിത്തി, യോ ഏതിസ്സാ അയസോ മയ്ഹേസോ അയസോ, യോ ഏതിസ്സാ അലാഭോ മയ്ഹേസോ അലാഭോ. ക്യാഹം, അയ്യേ, അത്തനോ അവണ്ണം അത്തനോ അകിത്തിം അത്തനോ അയസം അത്തനോ അലാഭം പരേസം ആരോചേസ്സാമീ’’തി? യാ താ ഭിക്ഖുനിയോ അപ്പിച്ഛാ…പേ… താ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ അയ്യാ ഥുല്ലനന്ദാ ജാനം പാരാജികം ധമ്മം അജ്ഝാപന്നം ഭിക്ഖുനിം നേവത്തനാ പടിചോദേസ്സതി ന ഗണസ്സ ആരോചേസ്സതീ’’തി! അഥ ഖോ താ ഭിക്ഖുനിയോ ഭിക്ഖൂനം ഏതമത്ഥം ആരോചേസും. ഭിക്ഖൂ [യേ തേ ഭിക്ഖൂ…പേ… (?)] ഭഗവതോ ഏതമത്ഥം ആരോചേസും. അഥ ഖോ ഭഗവാ ഏതസ്മിം നിദാനേ ഏതസ്മിം പകരണേ ഭിക്ഖുസങ്ഘം സന്നിപാതാപേത്വാ ഭിക്ഖൂ പടിപുച്ഛി – ‘‘സച്ചം കിര, ഭിക്ഖവേ, ഥുല്ലനന്ദാ ഭിക്ഖുനീ ജാനം പാരാജികം ധമ്മം അജ്ഝാപന്നം ഭിക്ഖുനിം നേവത്തനാ പടിചോദേതി [പടിചോദേസി… ആരോചേസീതി (ക.)] ന ഗണസ്സ ആരോചേതീ’’തി [പടിചോദേസി… ആരോചേസീതി (ക.)]? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ, ഭിക്ഖവേ, ഥുല്ലനന്ദാ ഭിക്ഖുനീ ജാനം പാരാജികം ധമ്മം അജ്ഝാപന്നം ഭിക്ഖുനിം നേവത്തനാ പടിചോദേസ്സതി ന ഗണസ്സ ആരോചേസ്സതി! നേതം, ഭിക്ഖവേ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഭിക്ഖുനിയോ ഇമം സിക്ഖാപദം ഉദ്ദിസന്തു –

൬൬൫. ‘‘യാ പന ഭിക്ഖുനീ ജാനം പാരാജികം ധമ്മം അജ്ഝാപന്നം ഭിക്ഖുനിം നേവത്തനാ പടിചോദേയ്യ ന ഗണസ്സ ആരോചേയ്യ, യദാ ച സാ ഠിതാ വാ അസ്സ ചുതാ വാ നാസിതാ വാ അവസ്സടാ വാ, സാ പച്ഛാ ഏവം വദേയ്യ – ‘പുബ്ബേവാഹം, അയ്യേ, അഞ്ഞാസിം ഏതം ഭിക്ഖുനിം ഏവരൂപാ ച ഏവരൂപാ ച സാ ഭഗിനീതി, നോ ച ഖോ അത്തനാ പടിചോദേസ്സം ന ഗണസ്സ ആരോചേസ്സ’ന്തി, അയമ്പി പാരാജികാ ഹോതി അസംവാസാ വജ്ജപ്പടിച്ഛാദികാ’’തി.

൬൬൬. യാ പനാതി യാ യാദിസാ…പേ… ഭിക്ഖുനീതി…പേ… അയം ഇമസ്മിം അത്ഥേ അധിപ്പേതാ ഭിക്ഖുനീതി.

ജാനാതി നാമ സാമം വാ ജാനാതി, അഞ്ഞേ വാ തസ്സാ ആരോചേന്തി, സാ വാ ആരോചേതി.

പാരാജികം ധമ്മം അജ്ഝാപന്നന്തി അട്ഠന്നം പാരാജികാനം അഞ്ഞതരം പാരാജികം അജ്ഝാപന്നം.

നേവത്തനാ പടിചോദേയ്യാതി ന സയം ചോദേയ്യ.

ന ഗണസ്സ ആരോചേയ്യാതി ന അഞ്ഞാസം ഭിക്ഖുനീനം ആരോചേയ്യ.

യദാ ച സാ ഠിതാ വാ അസ്സ ചുതാ വാതി ഠിതാ നാമ സലിങ്ഗേ ഠിതാ വുച്ചതി. ചുതാ നാമ കാലങ്കതാ വുച്ചതി. നാസിതാ നാമ സയം വാ വിബ്ഭന്താ ഹോതി അഞ്ഞേഹി വാ നാസിതാ. അവസ്സടാ നാമ തിത്ഥായതനം സങ്കന്താ വുച്ചതി. സാ പച്ഛാ ഏവം വദേയ്യ – ‘‘പുബ്ബേവാഹം, അയ്യേ, അഞ്ഞാസിം ഏതം ഭിക്ഖുനിം ഏവരൂപാ ച ഏവരൂപാ ച സാ ഭഗിനീ’’തി.

നോ ച ഖോ അത്തനാ പടിചോദേസ്സന്തി സയം വാ ന ചോദേസ്സം.

ന ഗണസ്സ ആരോചേസ്സന്തി ന അഞ്ഞാസം ഭിക്ഖുനീനം ആരോചേസ്സം.

അയമ്പീതി പുരിമായോ ഉപാദായ വുച്ചതി.

പാരാജികാ ഹോതീതി സേയ്യഥാപി നാമ പണ്ഡുപലാസോ ബന്ധനാ പമുത്തോ അഭബ്ബോ ഹരിതത്ഥായ, ഏവമേവ ഭിക്ഖുനീ ജാനം പാരാജികം ധമ്മം അജ്ഝാപന്നം ഭിക്ഖുനിം നേവത്തനാ പടിചോദേസ്സാമി ന ഗണസ്സ ആരോചേസ്സാമീതി ധുരം നിക്ഖിത്തമത്തേ അസ്സമണീ ഹോതി അസക്യധീതാ. തേന വുച്ചതി പാരാജികാ ഹോതീതി.

അസംവാസാതി സംവാസോ നാമ ഏകകമ്മം ഏകുദ്ദേസോ സമസിക്ഖതാ. ഏസോ സംവാസോ നാമ. സോ തായ സദ്ധിം നത്ഥി. തേന വുച്ചതി അസംവാസാതി.

൬൬൭. അനാപത്തി ‘‘സങ്ഘസ്സ ഭണ്ഡനം വാ കലഹോ വാ വിഗ്ഗഹോ വാ വിവാദോ വാ ഭവിസ്സതീ’’തി നാരോചേതി, ‘‘സങ്ഘഭേദോ വാ സങ്ഘരാജി വാ ഭവിസ്സതീ’’തി നാരോചേതി, ‘‘അയം കക്ഖളാ ഫരുസാ ജീവിതന്തരായം വാ ബ്രഹ്മചരിയന്തരായം വാ കരിസ്സതീ’’തി നാരോചേതി, അഞ്ഞാ പതിരൂപാ ഭിക്ഖുനിയോ അപസ്സന്തീ നാരോചേതി, നച്ഛാദേതുകാമാ നാരോചേതി, പഞ്ഞായിസ്സതി സകേന കമ്മേനാതി നാരോചേതി, ഉമ്മത്തികായ…പേ… ആദികമ്മികായാതി.

ദുതിയപാരാജികം സമത്തം.