൩. തതിയപാരാജികം

൬൬൮. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഥുല്ലനന്ദാ ഭിക്ഖുനീ സമഗ്ഗേന സങ്ഘേന ഉക്ഖിത്തം അരിട്ഠം ഭിക്ഖും ഗദ്ധബാധിപുബ്ബം അനുവത്തതി. യാ താ ഭിക്ഖുനിയോ അപ്പിച്ഛാ…പേ… താ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ അയ്യാ ഥുല്ലനന്ദാ ഭിക്ഖുനീ സമഗ്ഗേന സങ്ഘേന ഉക്ഖിത്തം അരിട്ഠം ഭിക്ഖും ഗദ്ധബാധിപുബ്ബം അനുവത്തിസ്സതീ’’തി…പേ… സച്ചം കിര, ഭിക്ഖവേ, ഥുല്ലനന്ദാ ഭിക്ഖുനീ സമഗ്ഗേന സങ്ഘേന ഉക്ഖിത്തം അരിട്ഠം ഭിക്ഖും ഗദ്ധബാധിപുബ്ബം അനുവത്തതീതി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ, ഭിക്ഖവേ, ഥുല്ലനന്ദാ ഭിക്ഖുനീ സമഗ്ഗേന സങ്ഘേന ഉക്ഖിത്തം അരിട്ഠം ഭിക്ഖും ഗദ്ധബാധിപുബ്ബം അനുവത്തിസ്സതി! നേതം, ഭിക്ഖവേ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഭിക്ഖുനിയോ ഇമം സിക്ഖാപദം ഉദ്ദിസന്തു –

൬൬൯. ‘‘യാ പന ഭിക്ഖുനീ സമഗ്ഗേന സങ്ഘേന ഉക്ഖിത്തം ഭിക്ഖും ധമ്മേന വിനയേന സത്ഥുസാസനേന അനാദരം അപ്പടികാരം അകതസഹായം തമനുവത്തേയ്യ, സാ ഭിക്ഖുനീ ഭിക്ഖുനീഹി ഏവമസ്സ വചനീയാ – ‘ഏസോ ഖോ, അയ്യേ, ഭിക്ഖു സമഗ്ഗേന സങ്ഘേന ഉക്ഖിത്തോ ധമ്മേന വിനയേന സത്ഥുസാസനേന അനാദരോ അപ്പടികാരോ അകതസഹായോ, മായ്യേ, ഏതം ഭിക്ഖും അനുവത്തീ’തി. ഏവഞ്ച സാ ഭിക്ഖുനീ ഭിക്ഖുനീഹി വുച്ചമാനാ തഥേവ പഗ്ഗണ്ഹേയ്യ, സാ ഭിക്ഖുനീ ഭിക്ഖുനീഹി യാവതതിയം സമനുഭാസിതബ്ബാ തസ്സ പടിനിസ്സഗ്ഗായ. യാവതതിയം ചേ സമനുഭാസിയമാനാ തം പടിനിസ്സജ്ജേയ്യ, ഇച്ചേതം കുസലം. നോ ചേ പടിനിസ്സജ്ജേയ്യ, അയമ്പി പാരാജികാ ഹോതി അസംവാസാ ഉക്ഖിത്താനുവത്തികാ’’തി.

൬൭൦. യാ പനാതി യാ യാദിസാ…പേ… ഭിക്ഖുനീതി…പേ… അയം ഇമസ്മിം അത്ഥേ അധിപ്പേതാ ഭിക്ഖുനീതി.

സമഗ്ഗോ നാമ സങ്ഘോ സമാനസംവാസകോ സമാനസീമായം ഠിതോ.

ഉക്ഖിത്തോ നാമ ആപത്തിയാ അദസ്സനേ വാ അപ്പടികമ്മേ വാ അപ്പടിനിസ്സഗ്ഗേ വാ [അദസ്സനേന വാ അപ്പടികമ്മേന വാ അപ്പടിനിസ്സഗ്ഗേന വാ (ക.), അദസ്സനേ വാ അപ്പടികമ്മേ വാ പാപികായ ദിട്ഠിയാ അപ്പടിനിസ്സഗ്ഗേ വാ (?)] ഉക്ഖിത്തോ.

ധമ്മേന വിനയേനാതി യേന ധമ്മേന യേന വിനയേന.

സത്ഥുസാസനേനാതി ജിനസാസനേന ബുദ്ധസാസനേന.

അനാദരോ നാമ സങ്ഘം വാ ഗണം വാ പുഗ്ഗലം വാ കമ്മം വാ നാദിയതി.

അപ്പടികാരോ നാമ ഉക്ഖിത്തോ അനോസാരിതോ.

അകതസഹായോ നാമ സമാനസംവാസകാ ഭിക്ഖൂ വുച്ചന്തി സഹായാ. സോ തേഹി സദ്ധിം നത്ഥി, തേന വുച്ചതി അകതസഹായോതി.

തമനുവത്തേയ്യാതി യംദിട്ഠികോ സോ ഹോതി യംഖന്തികോ യംരുചികോ, സാപി തംദിട്ഠികാ ഹോതി തംഖന്തികാ തംരുചികാ.

സാ ഭിക്ഖുനീതി യാ സാ ഉക്ഖിത്താനുവത്തികാ ഭിക്ഖുനീ.

ഭിക്ഖുനീഹീതി അഞ്ഞാഹി ഭിക്ഖുനീഹി. യാ പസ്സന്തി യാ സുണന്തി താഹി വത്തബ്ബാ – ‘‘ഏസോ ഖോ, അയ്യേ, ഭിക്ഖു സമഗ്ഗേന സങ്ഘേന ഉക്ഖിത്തോ ധമ്മേന വിനയേന സത്ഥുസാസനേന അനാദരോ അപ്പടികാരോ അകതസഹായോ. മായ്യേ, ഏതം ഭിക്ഖും അനുവത്തീ’’തി. ദുതിയമ്പി വത്തബ്ബാ. തതിയമ്പി വത്തബ്ബാ. സചേ പടിനിസ്സജ്ജതി, ഇച്ചേതം കുസലം; നോ ചേ പടിനിസ്സജ്ജതി, ആപത്തി ദുക്കടസ്സ. സുത്വാ ന വദന്തി, ആപത്തി ദുക്കടസ്സ. സാ ഭിക്ഖുനീ സങ്ഘമജ്ഝമ്പി ആകഡ്ഢിത്വാ വത്തബ്ബാ – ‘‘ഏസോ ഖോ, അയ്യേ, ഭിക്ഖു സമഗ്ഗേന സങ്ഘേന ഉക്ഖിത്തോ ധമ്മേന വിനയേന സത്ഥുസാസനേന അനാദരോ അപ്പടികാരോ അകതസഹായോ. മായ്യേ, ഏതം ഭിക്ഖും അനുവത്തീ’’തി. ദുതിയമ്പി വത്തബ്ബാ. തതിയമ്പി വത്തബ്ബാ. സചേ പടിനിസ്സജ്ജതി, ഇച്ചേതം കുസലം. നോ ചേ പടിനിസ്സജ്ജതി, ആപത്തി ദുക്കടസ്സ. സാ ഭിക്ഖുനീ സമനുഭാസിതബ്ബാ. ഏവഞ്ച പന, ഭിക്ഖവേ, സമനുഭാസിതബ്ബാ. ബ്യത്തായ ഭിക്ഖുനിയാ പടിബലായ സങ്ഘോ ഞാപേതബ്ബോ –

൬൭൧. ‘‘സുണാതു മേ, അയ്യേ, സങ്ഘോ. അയം ഇത്ഥന്നാമാ ഭിക്ഖുനീ സമഗ്ഗേന സങ്ഘേന ഉക്ഖിത്തം ഭിക്ഖും ധമ്മേന വിനയേന സത്ഥുസാസനേന അനാദരം അപ്പടികാരം അകതസഹായം തമനുവത്തതി, സാ തം വത്ഥും ന പടിനിസ്സജ്ജതി. യദി സങ്ഘസ്സ പത്തകല്ലം, സങ്ഘോ ഇത്ഥന്നാമം ഭിക്ഖുനിം സമനുഭാസേയ്യ തസ്സ വത്ഥുസ്സ പടിനിസ്സഗ്ഗായ. ഏസാ ഞത്തി.

‘‘സുണാതു മേ, അയ്യേ, സങ്ഘോ. അയം ഇത്ഥന്നാമാ ഭിക്ഖുനീ സമഗ്ഗേന സങ്ഘേന ഉക്ഖിത്തം ഭിക്ഖും ധമ്മേന വിനയേന സത്ഥുസാസനേന അനാദരം അപ്പടികാരം അകതസഹായം തമനുവത്തതി. സാ തം വത്ഥും ന പടിനിസ്സജ്ജതി. സങ്ഘോ ഇത്ഥന്നാമം ഭിക്ഖുനിം സമനുഭാസതി തസ്സ വത്ഥുസ്സ പടിനിസ്സഗ്ഗായ. യസ്സാ അയ്യായ ഖമതി ഇത്ഥന്നാമായ ഭിക്ഖുനിയാ സമനുഭാസനാ തസ്സ വത്ഥുസ്സ പടിനിസ്സഗ്ഗായ, സാ തുണ്ഹസ്സ; യസ്സാ നക്ഖമതി, സാ ഭാസേയ്യ.

‘‘ദുതിയമ്പി ഏതമത്ഥം വദാമി…പേ… തതിയമ്പി ഏതമത്ഥം വദാമി…പേ….

‘‘സമനുഭട്ഠാ സങ്ഘേന ഇത്ഥന്നാമാ ഭിക്ഖുനീ തസ്സ വത്ഥുസ്സ പടിനിസ്സഗ്ഗായ. ഖമതി സങ്ഘസ്സ, തസ്മാ തുണ്ഹീ, ഏവമേതം ധാരയാമീ’’തി.

ഞത്തിയാ ദുക്കടം, ദ്വീഹി കമ്മവാചാഹി ഥുല്ലച്ചയാ, കമ്മവാചാ പരിയോസാനേ ആപത്തി പാരാജികസ്സ.

അയമ്പീതി പുരിമായോ ഉപാദായ വുച്ചതി.

പാരാജികാ ഹോതീതി സേയ്യഥാപി നാമ പുഥുസിലാ ദ്വേധാ ഭിന്നാ അപ്പടിസന്ധികാ ഹോതി, ഏവമേവ ഭിക്ഖുനീ യാവതതിയം സമനുഭാസനായ ന പടിനിസ്സജ്ജന്തീ അസ്സമണീ ഹോതി അസക്യധീതാ. തേന വുച്ചതി പാരാജികാ ഹോതീതി.

അസംവാസാതി സംവാസോ നാമ ഏകകമ്മം ഏകുദ്ദേസോ സമസിക്ഖതാ. ഏസോ സംവാസോ നാമ. സോ തായ സദ്ധിം നത്ഥി. തേന വുച്ചതി അസംവാസാതി.

൬൭൨. ധമ്മകമ്മേ ധമ്മകമ്മസഞ്ഞാ ന പടിനിസ്സജ്ജതി, ആപത്തി പാരാജികസ്സ. ധമ്മകമ്മേ വേമതികാ ന പടിനിസ്സജ്ജതി, ആപത്തി പാരാജികസ്സ. ധമ്മകമ്മേ അധമ്മകമ്മസഞ്ഞാ ന പടിനിസ്സജ്ജതി, ആപത്തി പാരാജികസ്സ.

അധമ്മകമ്മേ ധമ്മകമ്മസഞ്ഞാ, ആപത്തി ദുക്കടസ്സ. അധമ്മകമ്മേ വേമതികാ, ആപത്തി ദുക്കടസ്സ. അധമ്മകമ്മേ അധമ്മകമ്മസഞ്ഞാ, ആപത്തി ദുക്കടസ്സ.

൬൭൩. അനാപത്തി അസമനുഭാസന്തിയാ, പടിനിസ്സജ്ജന്തിയാ, ഉമ്മത്തികായ…പേ… ആദികമ്മികായാതി.

തതിയപാരാജികം സമത്തം.