൧. പഠമപാരാജികം

൬൫൬. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന സാള്ഹോ മിഗാരനത്താ ഭിക്ഖുനിസങ്ഘസ്സ വിഹാരം കത്തുകാമോ ഹോതി. അഥ ഖോ സാള്ഹോ മിഗാരനത്താ ഭിക്ഖുനിയോ ഉപസങ്കമിത്വാ ഏതദവോച – ‘‘ഇച്ഛാമഹം, അയ്യേ, ഭിക്ഖുനിസങ്ഘസ്സ വിഹാരം കാതും. ദേഥ മേ നവകമ്മികം ഭിക്ഖുനി’’ന്തി. തേന ഖോ പന സമയേന ചതസ്സോ ഭഗിനിയോ ഭിക്ഖുനീസു പബ്ബജിതാ ഹോന്തി – നന്ദാ, നന്ദവതീ, സുന്ദരീനന്ദാ, ഥുല്ലനന്ദാതി. താസു സുന്ദരീനന്ദാ ഭിക്ഖുനീ തരുണപബ്ബജിതാ അഭിരൂപാ ഹോതി ദസ്സനീയാ പാസാദികാ പണ്ഡിതാ ബ്യത്താ മേധാവിനീ ദക്ഖാ അനലസാ, തത്രുപായായ വീമംസായ സമന്നാഗതാ, അലം കാതും അലം സംവിധാതും. അഥ ഖോ ഭിക്ഖുനിസങ്ഘോ സുന്ദരീനന്ദം ഭിക്ഖുനിം സമ്മന്നിത്വാ സാള്ഹസ്സ മിഗാരനത്തുനോ നവകമ്മികം അദാസി. തേന ഖോ പന സമയേന സുന്ദരീനന്ദാ ഭിക്ഖുനീ സാള്ഹസ്സ മിഗാരനത്തുനോ നിവേസനം അഭിക്ഖണം ഗച്ഛതി – ‘‘വാസിം ദേഥ, പരസും [ഫരസും (സ്യാ. ക.)] ദേഥ, കുഠാരിം [കുധാരിം (ക.)] ദേഥ, കുദ്ദാലം ദേഥ, നിഖാദനം ദേഥാ’’തി. സാള്ഹോപി മിഗാരനത്താ ഭിക്ഖുനുപസ്സയം അഭിക്ഖണം ഗച്ഛതി കതാകതം ജാനിതും. തേ അഭിണ്ഹദസ്സനേന പടിബദ്ധചിത്താ അഹേസും.

അഥ ഖോ സാള്ഹോ മിഗാരനത്താ സുന്ദരീനന്ദം ഭിക്ഖുനിം ദൂസേതും ഓകാസം അലഭമാനോ ഏതദേവത്ഥായ ഭിക്ഖുനിസങ്ഘസ്സ ഭത്തം അകാസി. അഥ ഖോ സാള്ഹോ മിഗാരനത്താ ഭത്തഗ്ഗേ ആസനം പഞ്ഞപേന്തോ – ‘‘ഏത്തകാ ഭിക്ഖുനിയോ അയ്യായ സുന്ദരീനന്ദായ വുഡ്ഢതരാ’’തി ഏകമന്തം ആസനം പഞ്ഞപേസി ‘‘ഏത്തകാ നവകതരാ’’തി – ഏകമന്തം ആസനം പഞ്ഞപേസി. പടിച്ഛന്നേ ഓകാസേ നികൂടേ സുന്ദരീനന്ദായ ഭിക്ഖുനിയാ ആസനം പഞ്ഞപേസി, യഥാ ഥേരാ ഭിക്ഖുനിയോ ജാനേയ്യും – ‘‘നവകാനം ഭിക്ഖുനീനം സന്തികേ നിസിന്നാ’’തി; നവകാപി ഭിക്ഖുനിയോ ജാനേയ്യും – ‘‘ഥേരാനം ഭിക്ഖുനീനം സന്തികേ നിസിന്നാ’’തി. അഥ ഖോ സാള്ഹോ മിഗാരനത്താ ഭിക്ഖുനിസങ്ഘസ്സ കാലം ആരോചാപേസി – ‘‘കാലോ, അയ്യേ, നിട്ഠിതം ഭത്ത’’ന്തി. സുന്ദരീനന്ദാ ഭിക്ഖുനീ സല്ലക്ഖേത്വാ – ‘‘ന ബഹുകതോ സാള്ഹോ മിഗാരനത്താ ഭിക്ഖുനിസങ്ഘസ്സ ഭത്തം അകാസി; മം സോ ദൂസേതുകാമോ. സചാഹം ഗമിസ്സാമി വിസ്സരോ മേ ഭവിസ്സതീ’’തി, അന്തേവാസിനിം ഭിക്ഖുനിം ആണാപേസി – ‘‘ഗച്ഛ മേ പിണ്ഡപാതം നീഹര. യോ ചേ മം പുച്ഛതി, ‘ഗിലാനാ’തി പടിവേദേഹീ’’തി. ‘‘ഏവം, അയ്യേ’’തി ഖോ സാ ഭിക്ഖുനീ സുന്ദരീനന്ദായ ഭിക്ഖുനിയാ പച്ചസ്സോസി.

തേന ഖോ പന സമയേന സാള്ഹോ മിഗാരനത്താ ബഹിദ്വാരകോട്ഠകേ ഠിതോ ഹോതി സുന്ദരീനന്ദം ഭിക്ഖുനിം പടിപുച്ഛന്തോ – ‘‘കഹം, അയ്യേ, അയ്യാ സുന്ദരീനന്ദാ? കഹം, അയ്യേ, അയ്യാ സുന്ദരീനന്ദാ’’തി? ഏവം വുത്തേ സുന്ദരീനന്ദായ ഭിക്ഖുനിയാ അന്തേവാസിനീ ഭിക്ഖുനീ സാള്ഹം മിഗാരനത്താരം ഏതദവോച – ‘‘ഗിലാനാവുസോ; പിണ്ഡപാതം നീഹരിസ്സാമീ’’തി. അഥ ഖോ സാള്ഹോ മിഗാരനത്താ – ‘‘യമ്പാഹം അത്ഥായ [യംപാഹം (സ്യാ.)] ഭിക്ഖുനിസങ്ഘസ്സ ഭത്തം അകാസിം അയ്യായ സുന്ദരീനന്ദായ കാരണാ’’തി മനുസ്സേ ആണാപേത്വാ – ‘‘ഭിക്ഖുനിസങ്ഘം ഭത്തേന പരിവിസഥാ’’തി വത്വാ യേന ഭിക്ഖുനുപസ്സയോ തേനുപസങ്കമി. തേന ഖോ പന സമയേന സുന്ദരീനന്ദാ ഭിക്ഖുനീ ബഹാരാമകോട്ഠകേ ഠിതാ ഹോതി സാള്ഹം മിഗാരനത്താരം പതിമാനേന്തീ. അദ്ദസാ ഖോ സുന്ദരീനന്ദാ ഭിക്ഖുനീ സാള്ഹം മിഗാരനത്താരം ദൂരതോവ ആഗച്ഛന്തം. ദിസ്വാന ഉപസ്സയം പവിസിത്വാ സസീസം പാരുപിത്വാ മഞ്ചകേ നിപജ്ജി. അഥ ഖോ സാള്ഹോ മിഗാരനത്താ യേന സുന്ദരീനന്ദാ ഭിക്ഖുനീ തേനുപസങ്കമി; ഉപസങ്കമിത്വാ സുന്ദരീനന്ദം ഭിക്ഖുനിം ഏതദവോച – ‘‘കിം തേ, അയ്യേ, അഫാസു, കിസ്സ നിപന്നാസീ’’തി? ‘‘ഏവഞ്ഹേതം, ആവുസോ, ഹോതി യാ അനിച്ഛന്തം ഇച്ഛതീ’’തി. ‘‘ക്യാഹം തം, അയ്യേ, ന ഇച്ഛിസ്സാമി? അപി ചാഹം ഓകാസം ന ലഭാമി തം ദൂസേതു’’ന്തി. അവസ്സുതോ അവസ്സുതായ സുന്ദരീനന്ദായ ഭിക്ഖുനിയാ കായസംസഗ്ഗം സമാപജ്ജി.

തേന ഖോ പന സമയേന അഞ്ഞതരാ ഭിക്ഖുനീ ജരാദുബ്ബലാ ചരണഗിലാനാ സുന്ദരീനന്ദായ ഭിക്ഖുനിയാ അവിദൂരേ നിപന്നാ ഹോതി. അദ്ദസാ ഖോ സാ ഭിക്ഖുനീ സാള്ഹം മിഗാരനത്താരം അവസ്സുതം അവസ്സുതായ സുന്ദരീനന്ദായ ഭിക്ഖുനിയാ കായസംസഗ്ഗം സമാപജ്ജന്തം. ദിസ്വാന ഉജ്ഝായതി ഖിയ്യതി വിപാചേതി – ‘‘കഥഞ്ഹി നാമ അയ്യാ സുന്ദരീനന്ദാ അവസ്സുതാ അവസ്സുതസ്സ പുരിസപുഗ്ഗലസ്സ കായസംസഗ്ഗം സാദിയിസ്സതീ’’തി! അഥ ഖോ സാ ഭിക്ഖുനീ ഭിക്ഖുനീനം ഏതമത്ഥം ആരോചേസി. യാ താ ഭിക്ഖുനിയോ അപ്പിച്ഛാ സന്തുട്ഠാ ലജ്ജിനിയോ കുക്കുച്ചികാ സിക്ഖാകാമാ താ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ അയ്യാ സുന്ദരീനന്ദാ അവസ്സുതാ അവസ്സുതസ്സ പുരിസപുഗ്ഗലസ്സ കായസംസഗ്ഗം സാദിയിസ്സതീ’’തി! അഥ ഖോ താ ഭിക്ഖുനിയോ ഭിക്ഖൂനം ഏതമത്ഥം ആരോചേസും. യേ തേ ഭിക്ഖൂ അപ്പിച്ഛാ സന്തുട്ഠാ ലജ്ജിനോ കുക്കുച്ചകാ സിക്ഖാകാമാ തേ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ സുന്ദരീനന്ദാ ഭിക്ഖുനീ അവസ്സുതാ അവസ്സുതസ്സ പുരിസപുഗ്ഗലസ്സ കായസംസഗ്ഗം സാദിയിസ്സതീ’’തി!

അഥ ഖോ തേ ഭിക്ഖൂ സുന്ദരീനന്ദം ഭിക്ഖുനിം അനേകപരിയായേന വിഗരഹിത്വാ ഭഗവതോ ഏതമത്ഥം ആരോചേസും. അഥ ഖോ ഭഗവാ ഏതസ്മിം നിദാനേ ഏതസ്മിം പകരണേ ഭിക്ഖുസങ്ഘം സന്നിപാതാപേത്വാ ഭിക്ഖൂ പടിപുച്ഛി – ‘‘സച്ചം കിര, ഭിക്ഖവേ, സുന്ദരീനന്ദാ ഭിക്ഖുനീ അവസ്സുതാ അവസ്സുതസ്സ പുരിസപുഗ്ഗലസ്സ കായസംസഗ്ഗം സാദിയതീ’’തി [സാദിയീതി (ക.)]? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ – ‘‘അനനുച്ഛവികം, ഭിക്ഖവേ, സുന്ദരീനന്ദായ ഭിക്ഖുനിയാ അനനുലോമികം അപ്പതിരൂപം അസ്സാമണകം അകപ്പിയം അകരണീയം. കഥഞ്ഹി നാമ, ഭിക്ഖവേ, സുന്ദരീനന്ദാ ഭിക്ഖുനീ അവസ്സുതാ അവസ്സുതസ്സ പുരിസപുഗ്ഗലസ്സ കായസംസഗ്ഗം സാദിയിസ്സതി! നേതം, ഭിക്ഖവേ, അപ്പസന്നാനം വാ പസാദായ പസന്നാനം വാ ഭിയ്യോഭാവായ. അഥ ഖ്വേതം, ഭിക്ഖവേ, അപ്പസന്നാനഞ്ചേവ അപ്പസാദായ പസന്നാനഞ്ച ഏകച്ചാനം അഞ്ഞഥത്തായാ’’തി. അഥ ഖോ ഭഗവാ സുന്ദരീനന്ദം ഭിക്ഖുനിം അനേകപരിയായേന വിഗരഹിത്വാ ദുബ്ഭരതായ ദുപ്പോസതായ മഹിച്ഛതായ അസന്തുട്ഠിതായ [അസന്തുട്ഠതായ (സ്യാ.), അസന്തുട്ഠിയാ (ക.)] സങ്ഗണികായ കോസജ്ജസ്സ അവണ്ണം ഭാസിത്വാ, അനേകപരിയായേന സുഭരതായ സുപോസതായ അപ്പിച്ഛസ്സ സന്തുട്ഠസ്സ [സന്തുട്ഠിയാ (ക.)] സല്ലേഖസ്സ ധുതസ്സ പാസാദികസ്സ അപചയസ്സ വീരിയാരമ്ഭസ്സ വണ്ണം ഭാസിത്വാ, ഭിക്ഖൂനം തദനുച്ഛവികം തദനുലോമികം ധമ്മിം കഥം കത്വാ ഭിക്ഖൂ ആമന്തേസി – ‘‘തേന ഹി, ഭിക്ഖവേ, ഭിക്ഖുനീനം സിക്ഖാപദം പഞ്ഞപേസ്സാമി ദസ അത്ഥവസേ പടിച്ച – സങ്ഘസുട്ഠുതായ, സങ്ഘഫാസുതായ, ദുമ്മങ്കൂനം ഭിക്ഖുനീനം നിഗ്ഗഹായ, പേസലാനം ഭിക്ഖുനീനം ഫാസുവിഹാരായ, ദിട്ഠധമ്മികാനം ആസവാനം സംവരായ, സമ്പരായികാനം ആസവാനം പടിഘാതായ, അപ്പസന്നാനം പസാദായ, പസന്നാനം ഭിയ്യോഭാവായ, സദ്ധമ്മട്ഠിതിയാ വിനയാനുഗ്ഗഹായ. ഏവഞ്ച പന, ഭിക്ഖവേ, ഭിക്ഖുനിയോ ഇമം സിക്ഖാപദം ഉദ്ദിസന്തു –

൬൫൭. ‘‘യാ പന ഭിക്ഖുനീ അവസ്സുതാ അവസ്സുതസ്സ പുരിസപുഗ്ഗലസ്സ അധക്ഖകം ഉബ്ഭജാണുമണ്ഡലം ആമസനം വാ പരാമസനം വാ ഗഹണം വാ ഛുപനം വാ പടിപീളനം വാ സാദിയേയ്യ, അയമ്പി പാരാജികാ ഹോതി അസംവാസാ ഉബ്ഭജാണുമണ്ഡലികാ’’തി.

൬൫൮. യാ പനാതി യാ യാദിസാ യഥായുത്താ യഥാജച്ചാ യഥാനാമാ യഥാഗോത്താ യഥാസീലാ യഥാവിഹാരിനീ യഥാഗോചരാ ഥേരാ വാ നവാ വാ മജ്ഝിമാ വാ, ഏസാ വുച്ചതി യാ പനാതി.

ഭിക്ഖുനീതി ഭിക്ഖികാതി ഭിക്ഖുനീ; ഭിക്ഖാചരിയം അജ്ഝുപഗതാതി ഭിക്ഖുനീ; ഭിന്നപടധരാതി ഭിക്ഖുനീ; സമഞ്ഞായ ഭിക്ഖുനീ; പടിഞ്ഞായ ഭിക്ഖുനീ; ഏഹി ഭിക്ഖുനീതി ഭിക്ഖുനീ; തീഹി സരണഗമനേഹി ഉപസമ്പന്നാതി ഭിക്ഖുനീ; ഭദ്രാ ഭിക്ഖുനീ; സാരാ ഭിക്ഖുനീ; സേഖാ ഭിക്ഖുനീ; അസേഖാ ഭിക്ഖുനീ; സമഗ്ഗേന ഉഭതോസങ്ഘേന ഞത്തിചതുത്ഥേന കമ്മേന അകുപ്പേന ഠാനാരഹേന ഉപസമ്പന്നാതി ഭിക്ഖുനീ. തത്ര യായം ഭിക്ഖുനീ സമഗ്ഗേന ഉഭതോസങ്ഘേന ഞത്തിചതുത്ഥേന കമ്മേന അകുപ്പേന ഠാനാരഹേന ഉപസമ്പന്നാ, അയം ഇമസ്മിം അത്ഥേ അധിപ്പേതാ ഭിക്ഖുനീതി.

അവസ്സുതാ നാമ സാരത്താ അപേക്ഖവതീ പടിബദ്ധചിത്താ.

അവസ്സുതോ നാമ സാരത്തോ അപേക്ഖവാ പടിബദ്ധചിത്തോ.

പുരിസപുഗ്ഗലോ നാമ മനുസ്സപുരിസോ ന യക്ഖോ ന പേതോ ന തിരച്ഛാനഗതോ വിഞ്ഞൂ പടിബലോ കായസംസഗ്ഗം സമാപജ്ജിതും.

അധക്ഖകന്തി ഹേട്ഠക്ഖകം.

ഉബ്ഭജാണുമണ്ഡലന്തി ഉപരിജാണുമണ്ഡലം.

ആമസനം നാമ ആമട്ഠമത്തം.

പരാമസനം നാമ ഇതോചിതോ ച സഞ്ചോപനം.

ഗഹണം നാമ ഗഹിതമത്തം.

ഛുപനം നാമ ഫുട്ഠമത്തം.

പടിപീളനം വാ സാദിയേയ്യാതി അങ്ഗം ഗഹേത്വാ നിപ്പീളനം സാദിയതി.

അയമ്പീതി പുരിമായോ ഉപാദായ വുച്ചതി.

പാരാജികാ ഹോതീതി സേയ്യഥാപി നാമ പുരിസോ സീസച്ഛിന്നോ അഭബ്ബോ തേന സരീരബന്ധനേന ജീവിതും, ഏവമേവ ഭിക്ഖുനീ അവസ്സുതാ അവസ്സുതസ്സ പുരിസപുഗ്ഗലസ്സ അധക്ഖകം ഉബ്ഭജാണുമണ്ഡലം ആമസനം വാ പരാമസനം വാ ഗഹണം വാ ഛുപനം വാ പടിപീളനം വാ സാദിയന്തീ അസ്സമണീ ഹോതി അസക്യധീതാ. തേന വുച്ചതി പാരാജികാ ഹോതീതി.

അസംവാസാതി സംവാസോ നാമ ഏകകമ്മം ഏകുദ്ദേസോ സമസിക്ഖതാ, ഏസോ സംവാസോ നാമ. സോ തായ സദ്ധിം നത്ഥി, തേന വുച്ചതി അസംവാസാതി.

൬൫൯. ഉഭതോഅവസ്സുതേ അധക്ഖകം ഉബ്ഭജാണുമണ്ഡലം കായേന കായം ആമസതി, ആപത്തി പാരാജികസ്സ. കായേന കായപടിബദ്ധം ആമസതി, ആപത്തി ഥുല്ലച്ചയസ്സ. കായപടിബദ്ധേന കായം ആമസതി, ആപത്തി ഥുല്ലച്ചയസ്സ. കായപടിബദ്ധേന കായപടിബദ്ധം ആമസതി, ആപത്തി ദുക്കടസ്സ.

നിസ്സഗ്ഗിയേന കായം ആമസതി, ആപത്തി ദുക്കടസ്സ. നിസ്സഗ്ഗിയേന കായപടിബദ്ധം ആമസതി, ആപത്തി ദുക്കടസ്സ. നിസ്സഗ്ഗിയേന നിസ്സഗ്ഗിയം ആമസതി, ആപത്തി ദുക്കടസ്സ.

ഉബ്ഭക്ഖകം അധോജാണുമണ്ഡലം കായേന കായം ആമസതി, ആപത്തി ഥുല്ലച്ചയസ്സ. കായേന കായപടിബദ്ധം ആമസതി, ആപത്തി ദുക്കടസ്സ. കായപടിബദ്ധേന കായം ആമസതി, ആപത്തി ദുക്കടസ്സ. കായപടിബദ്ധേന കായപടിബദ്ധം ആമസതി, ആപത്തി ദുക്കടസ്സ.

നിസ്സഗ്ഗിയേന കായം ആമസതി, ആപത്തി ദുക്കടസ്സ. നിസ്സഗ്ഗിയേന കായപടിബദ്ധം ആമസതി, ആപത്തി ദുക്കടസ്സ. നിസ്സഗ്ഗിയേന നിസ്സഗ്ഗിയം ആമസതി, ആപത്തി ദുക്കടസ്സ.

൬൬൦. ഏകതോഅവസ്സുതേ അധക്ഖകം ഉബ്ഭജാണുമണ്ഡലം കായേന കായം ആമസതി, ആപത്തി ഥുല്ലച്ചയസ്സ. കായേന കായപടിബദ്ധം ആമസതി, ആപത്തി ദുക്കടസ്സ. കായപടിബദ്ധേന കായം ആമസതി, ആപത്തി ദുക്കടസ്സ. കായപടിബദ്ധേന കായപടിബദ്ധം ആമസതി, ആപത്തി ദുക്കടസ്സ.

നിസ്സഗ്ഗിയേന കായം ആമസതി, ആപത്തി ദുക്കടസ്സ. നിസ്സഗ്ഗിയേന കായപടിബദ്ധം ആമസതി, ആപത്തി ദുക്കടസ്സ. നിസ്സഗ്ഗിയേന നിസ്സഗ്ഗിയം ആമസതി, ആപത്തി ദുക്കടസ്സ.

ഉബ്ഭക്ഖകം അധോജാണുമണ്ഡലം കായേന കായം ആമസതി, ആപത്തി ദുക്കടസ്സ. കായേന കായപടിബദ്ധം ആമസതി, ആപത്തി ദുക്കടസ്സ. കായപടിബദ്ധേന കായം ആമസതി, ആപത്തി ദുക്കടസ്സ. കായപടിബദ്ധേന കായപടിബദ്ധം ആമസതി, ആപത്തി ദുക്കടസ്സ.

നിസ്സഗ്ഗിയേന കായം ആമസതി, ആപത്തി ദുക്കടസ്സ. നിസ്സഗ്ഗിയേന കായപടിബദ്ധം ആമസതി, ആപത്തി ദുക്കടസ്സ. നിസ്സഗ്ഗിയേന നിസ്സഗ്ഗിയം ആമസതി, ആപത്തി ദുക്കടസ്സ.

൬൬൧. ഉഭതോഅവസ്സുതേ യക്ഖസ്സ വാ പേതസ്സ വാ പണ്ഡകസ്സ വാ തിരച്ഛാനഗതമനുസ്സവിഗ്ഗഹസ്സ വാ അധക്ഖകം ഉബ്ഭജാണുമണ്ഡലം കായേന കായം ആമസതി, ആപത്തി ഥുല്ലച്ചയസ്സ. കായേന കായപടിബദ്ധം ആമസതി, ആപത്തി ദുക്കടസ്സ. കായപടിബദ്ധേന കായം ആമസതി, ആപത്തി ദുക്കടസ്സ. കായപടിബദ്ധേന കായപടിബദ്ധം ആമസതി, ആപത്തി ദുക്കടസ്സ.

നിസ്സഗ്ഗിയേന കായം ആമസതി, ആപത്തി ദുക്കടസ്സ. നിസ്സഗ്ഗിയേന കായപടിബദ്ധം ആമസതി, ആപത്തി ദുക്കടസ്സ. നിസ്സഗ്ഗിയേന നിസ്സഗ്ഗിയം ആമസതി, ആപത്തി ദുക്കടസ്സ.

ഉബ്ഭക്ഖകം അധോജാണുമണ്ഡലം കായേന കായം ആമസതി, ആപത്തി ദുക്കടസ്സ. കായേന കായപടിബദ്ധം ആമസതി, ആപത്തി ദുക്കടസ്സ. കായപടിബദ്ധേന കായം ആമസതി, ആപത്തി ദുക്കടസ്സ. കായപടിബദ്ധേന കായപടിബദ്ധം ആമസതി, ആപത്തി ദുക്കടസ്സ.

നിസ്സഗ്ഗിയേന കായം ആമസതി, ആപത്തി ദുക്കടസ്സ. നിസ്സഗ്ഗിയേന കായപടിബദ്ധം ആമസതി, ആപത്തി ദുക്കടസ്സ. നിസ്സഗ്ഗിയേന നിസ്സഗ്ഗിയം ആമസതി, ആപത്തി ദുക്കടസ്സ.

൬൬൨. ഏകതോഅവസ്സുതേ അധക്ഖകം ഉബ്ഭജാണുമണ്ഡലം കായേന കായം ആമസതി, ആപത്തി ദുക്കടസ്സ. കായേന കായപടിബദ്ധം ആമസതി, ആപത്തി ദുക്കടസ്സ. കായപടിബദ്ധേന കായം ആമസതി, ആപത്തി ദുക്കടസ്സ. കായപടിബദ്ധേന കായപടിബദ്ധം ആമസതി, ആപത്തി ദുക്കടസ്സ.

നിസ്സഗ്ഗിയേന കായം ആമസതി, ആപത്തി ദുക്കടസ്സ. നിസ്സഗ്ഗിയേന കായപടിബദ്ധം ആമസതി, ആപത്തി ദുക്കടസ്സ. നിസ്സഗ്ഗിയേന നിസ്സഗ്ഗിയം ആമസതി, ആപത്തി ദുക്കടസ്സ.

ഉബ്ഭക്ഖകം അധോജാണുമണ്ഡലം കായേന കായം ആമസതി, ആപത്തി ദുക്കടസ്സ. കായേന കായപടിബദ്ധം ആമസതി, ആപത്തി ദുക്കടസ്സ. കായപടിബദ്ധേന കായം ആമസതി, ആപത്തി ദുക്കടസ്സ. കായപടിബദ്ധേന കായപടിബദ്ധം ആമസതി, ആപത്തി ദുക്കടസ്സ.

നിസ്സഗ്ഗിയേന കായം ആമസതി, ആപത്തി ദുക്കടസ്സ. നിസ്സഗ്ഗിയേന കായപടിബദ്ധം ആമസതി, ആപത്തി ദുക്കടസ്സ. നിസ്സഗ്ഗിയേന നിസ്സഗ്ഗിയം ആമസതി, ആപത്തി ദുക്കടസ്സ.

൬൬൩. അനാപത്തി അസഞ്ചിച്ച, അസ്സതിയാ, അജാനന്തിയാ, അസാദിയന്തിയാ, ഉമ്മത്തികായ, ഖിത്തചിത്തായ, വേദനാട്ടായ, ആദികമ്മികായാതി.

പഠമപാരാജികം സമത്തം [ഭിക്ഖുനിവിഭങ്ഗേ സിക്ഖാപദഗണനാ ഭിക്ഖൂഹി§അസാധാരണവസേന പകാസിതാതി വേദിതബ്ബാ].