൨. ദുതിയപാടിദേസനീയസിക്ഖാപദം

൫൫൭. തേന സമയേന ബുദ്ധോ ഭഗവാ രാജഗഹേ വിഹരതി വേളുവനേ കലന്ദകനിവാപേ. തേന ഖോ പന സമയേന ഭിക്ഖൂ കുലേസു നിമന്തിതാ ഭുഞ്ജന്തി. ഛബ്ബഗ്ഗിയാ ഭിക്ഖുനിയോ ഛബ്ബഗ്ഗിയാനം ഭിക്ഖൂനം വോസാസന്തിയോ ഠിതാ ഹോന്തി – ‘‘ഇധ സൂപം ദേഥ, ഇധ ഓദനം ദേഥാ’’തി. ഛബ്ബഗ്ഗിയാ ഭിക്ഖൂ യാവദത്ഥം ഭുഞ്ജന്തി. അഞ്ഞേ ഭിക്ഖൂ ന ചിത്തരൂപം ഭുഞ്ജന്തി. യേ തേ ഭിക്ഖൂ അപ്പിച്ഛാ…പേ… തേ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ഛബ്ബഗ്ഗിയാ ഭിക്ഖൂ ഭിക്ഖുനിയോ വോസാസന്തിയോ ന നിവാരേസ്സന്തീ’’തി…പേ… സച്ചം കിര തുമ്ഹേ, ഭിക്ഖവേ, ഭിക്ഖുനിയോ വോസാസന്തിയോ ന നിവാരേഥാതി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ …പേ… കഥഞ്ഹി നാമ തുമ്ഹേ, മോഘപുരിസാ, ഭിക്ഖുനിയോ വോസാസന്തിയോ ന നിവാരേസ്സഥ! നേതം, മോഘപുരിസാ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഇമം സിക്ഖാപദം ഉദ്ദിസേയ്യാഥ –

൫൫൮. ‘‘ഭിക്ഖൂ പനേവ കുലേസു നിമന്തിതാ ഭുഞ്ജന്തി, തത്ര ചേ സാ [തത്ര ചേ (സ്യാ.)] ഭിക്ഖുനീ വോസാസമാനരൂപാ ഠിതാ ഹോതി – ‘ഇധ സൂപം ദേഥ, ഇധ ഓദനം ദേഥാ’തി, തേഹി ഭിക്ഖൂഹി സാ ഭിക്ഖുനീ അപസാദേതബ്ബാ – ‘അപസക്ക താവ, ഭഗിനി, യാവ ഭിക്ഖൂ ഭുഞ്ജന്തീ’തി. ഏകസ്സ ചേപി [ഏകസ്സപി ചേ (സീ. സ്യാ.)] ഭിക്ഖുനോ ന പടിഭാസേയ്യ തം ഭിക്ഖുനിം അപസാദേതും – ‘അപസക്ക താവ, ഭഗിനി, യാവ ഭിക്ഖൂ ഭുഞ്ജന്തീ’തി പടിദേസേതബ്ബം തേഹി ഭിക്ഖൂഹി – ‘ഗാരയ്ഹം, ആവുസോ, ധമ്മം ആപജ്ജിമ്ഹാ അസപ്പായം പാടിദേസനീയം, തം പടിദേസേമാ’’’തി.

൫൫൯. ഭിക്ഖൂ പനേവ കുലേസു നിമന്തിതാ ഭുഞ്ജന്തീതി കുലം നാമ ചത്താരി കുലാനി – ഖത്തിയകുലം, ബ്രാഹ്മണകുലം, വേസ്സകുലം, സുദ്ദകുലം.

നിമന്തിതാ ഭുഞ്ജന്തീതി പഞ്ചന്നം ഭോജനാനം അഞ്ഞതരേന ഭോജനേന നിമന്തിതാ ഭുഞ്ജന്തി.

ഭിക്ഖുനീ നാമ ഉഭതോസങ്ഘേ ഉപസമ്പന്നാ.

വോസാസന്തീ നാമ യഥാമിത്തതാ യഥാസന്ദിട്ഠതാ യഥാസമ്ഭത്തതാ യഥാസമാനുപജ്ഝായകതാ യഥാസമാനാചരിയകതാ – ‘‘ഇധ സൂപം ദേഥ, ഇധ ഓദനം ദേഥാ’’തി. ഏസാ വോസാസന്തീ നാമ.

തേഹി ഭിക്ഖൂഹീതി ഭുഞ്ജമാനേഹി ഭിക്ഖൂഹി.

സാ ഭിക്ഖുനീതി യാ സാ വോസാസന്തീ ഭിക്ഖുനീ.

തേഹി ഭിക്ഖൂഹി സാ ഭിക്ഖുനീ അപസാദേതബ്ബാ – ‘‘അപസക്ക താവ, ഭഗിനി, യാവ ഭിക്ഖൂ ഭുഞ്ജന്തീ’’തി. ഏകസ്സ ചേപി [ഏകസ്സപി ചേ (സീ. സ്യാ.)] ഭിക്ഖുനോ അനപസാദിതോ [അനപസാദിതേ (സീ. സ്യാ.)] – ‘‘ഖാദിസ്സാമി ഭുഞ്ജിസ്സാമീ’’തി പടിഗ്ഗണ്ഹാതി, ആപത്തി ദുക്കടസ്സ. അജ്ഝോഹാരേ അജ്ഝോഹാരേ ആപത്തി പാടിദേസനീയസ്സ.

൫൬൦. ഉപസമ്പന്നായ ഉപസമ്പന്നസഞ്ഞീ വോസാസന്തിയാ ന നിവാരേതി, ആപത്തി പാടിദേസനീയസ്സ. ഉപസമ്പന്നായ വേമതികോ വോസാസന്തിയാ ന നിവാരേതി, ആപത്തി പാടിദേസനീയസ്സ. ഉപസമ്പന്നായ അനുപസമ്പന്നസഞ്ഞീ വോസാസന്തിയാ ന നിവാരേതി, ആപത്തി പാടിദേസനീയസ്സ.

ഏകതോഉപസമ്പന്നായ വോസാസന്തിയാ ന നിവാരേതി, ആപത്തി ദുക്കടസ്സ. അനുപസമ്പന്നായ ഉപസമ്പന്നസഞ്ഞീ, ആപത്തി ദുക്കടസ്സ. അനുപസമ്പന്നായ വേമതികോ, ആപത്തി ദുക്കടസ്സ. അനുപസമ്പന്നായ അനുപസമ്പന്നസഞ്ഞീ, അനാപത്തി.

൫൬൧. അനാപത്തി അത്തനോ ഭത്തം ദാപേതി ന ദേതി, അഞ്ഞേസം ഭത്തം ദേതി ന ദാപേതി, യം ന ദിന്നം തം ദാപേതി, യത്ഥ ന ദിന്നം തത്ഥ ദാപേതി, സബ്ബേസം സമകം ദാപേതി, സിക്ഖമാനാ വോസാസതി, സാമണേരീ വോസാസതി, പഞ്ച ഭോജനാനി ഠപേത്വാ സബ്ബത്ഥ, അനാപത്തി, ഉമ്മത്തകസ്സ, ആദികമ്മികസ്സാതി.

ദുതിയപാടിദേസനീയസിക്ഖാപദം നിട്ഠിതം.