൧. പഠമപാടിദേസനീയസിക്ഖാപദം

ഇമേ ഖോ പനായസ്മന്തോ ചത്താരോ പാടിദേസനീയാ

ധമ്മാ ഉദ്ദേസം ആഗച്ഛന്തി.

൫൫൨. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന അഞ്ഞതരാ ഭിക്ഖുനീ സാവത്ഥിയം പിണ്ഡായ ചരിത്വാ പടിക്കമനകാലേ അഞ്ഞതരം ഭിക്ഖും പസ്സിത്വാ ഏതദവോച – ‘‘ഹന്ദായ്യ, ഭിക്ഖം പടിഗ്ഗണ്ഹാ’’തി. ‘‘സുട്ഠു, ഭഗിനീ’’തി സബ്ബേവ അഗ്ഗഹേസി. സാ ഉപകട്ഠേ കാലേ നാസക്ഖി പിണ്ഡായ ചരിതും, ഛിന്നഭത്താ അഹോസി. അഥ ഖോ സാ ഭിക്ഖുനീ ദുതിയമ്പി ദിവസം…പേ… തതിയമ്പി ദിവസം സാവത്ഥിയം പിണ്ഡായ ചരിത്വാ പടിക്കമനകാലേ തം ഭിക്ഖും പസ്സിത്വാ ഏതദവോച – ‘‘ഹന്ദായ്യ, ഭിക്ഖം പടിഗ്ഗണ്ഹാ’’തി. ‘‘സുട്ഠു, ഭഗിനീ’’തി സബ്ബേവ അഗ്ഗഹേസി. സാ ഉപകട്ഠേ കാലേ നാസക്ഖി പിണ്ഡായ ചരിതും, ഛിന്നഭത്താ അഹോസി. അഥ ഖോ സാ ഭിക്ഖുനീ ചതുത്ഥേ ദിവസേ രഥികായ പവേധേന്തീ ഗച്ഛതി. സേട്ഠി ഗഹപതി രഥേന പടിപഥം ആഗച്ഛന്തോ തം ഭിക്ഖുനിം ഏതദവോച – ‘‘അപേഹായ്യേ’’തി. സാ വോക്കമന്തീ തത്ഥേവ പരിപതി. സേട്ഠി ഗഹപതി തം ഭിക്ഖുനിം ഖമാപേസി – ‘‘ഖമാഹായ്യേ, മയാസി പാതിതാ’’തി. ‘‘നാഹം, ഗഹപതി, തയാ പാതിതാ. അപിച, അഹമേവ ദുബ്ബലാ’’തി. ‘‘കിസ്സ പന ത്വം, അയ്യേ, ദുബ്ബലാ’’തി? അഥ ഖോ സാ ഭിക്ഖുനീ സേട്ഠിസ്സ ഗഹപതിസ്സ ഏതമത്ഥം ആരോചേസി. സേട്ഠി ഗഹപതി തം ഭിക്ഖുനിം ഘരം നേത്വാ ഭോജേത്വാ ഉജ്ഝായതി ഖിയ്യതി വിപാചേതി – ‘‘കഥഞ്ഹി നാമ ഭദന്താ ഭിക്ഖുനിയാ ഹത്ഥതോ ആമിസം പടിഗ്ഗഹേസ്സന്തി! കിച്ഛലാഭോ മാതുഗാമോ’’തി!

അസ്സോസും ഖോ ഭിക്ഖൂ തസ്സ സേട്ഠിസ്സ ഗഹപതിസ്സ ഉജ്ഝായന്തസ്സ ഖിയ്യന്തസ്സ വിപാചേന്തസ്സ. യേ തേ ഭിക്ഖൂ അപ്പിച്ഛാ…പേ… തേ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ഭിക്ഖു ഭിക്ഖുനിയാ ഹത്ഥതോ ആമിസം പടിഗ്ഗഹേസ്സതീ’’തി …പേ… സച്ചം കിര ത്വം, ഭിക്ഖു, ഭിക്ഖുനിയാ ഹത്ഥതോ ആമിസം പടിഗ്ഗഹേസീതി? ‘‘സച്ചം, ഭഗവാ’’തി. ‘‘ഞാതികാ തേ, ഭിക്ഖു, അഞ്ഞാതികാ’’തി? ‘‘അഞ്ഞാതികാ, ഭഗവാ’’തി. ‘‘അഞ്ഞാതകോ, മോഘപുരിസ, അഞ്ഞാതികായ ന ജാനാതി പതിരൂപം വാ അപ്പതിരൂപം വാ സന്തം വാ അസന്തം വാ. കഥഞ്ഹി നാമ ത്വം, മോഘപുരിസ, അഞ്ഞാതികായ ഭിക്ഖുനിയാ ഹത്ഥതോ ആമിസം പടിഗ്ഗഹേസ്സസി! നേതം, മോഘപുരിസ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഇമം സിക്ഖാപദം ഉദ്ദിസേയ്യാഥ –

൫൫൩. ‘‘യോ പന ഭിക്ഖു അഞ്ഞാതികായ ഭിക്ഖുനിയാ അന്തരഘരം പവിട്ഠായ ഹത്ഥതോ ഖാദനീയം വാ ഭോജനീയം വാ സഹത്ഥാ പടിഗ്ഗഹേത്വാ ഖാദേയ്യ വാ ഭുഞ്ജേയ്യ വാ, പടിദേസേതബ്ബം തേന ഭിക്ഖുനാ – ‘ഗാരയ്ഹം, ആവുസോ, ധമ്മം ആപജ്ജിം അസപ്പായം പാടിദേസനീയം, തം പടിദേസേമീ’’’തി.

൫൫൪. യോ പനാതി യോ യാദിസോ…പേ… ഭിക്ഖൂതി…പേ… അയം ഇമസ്മിം അത്ഥേ അധിപ്പേതോ ഭിക്ഖൂതി.

അഞ്ഞാതികാ നാമ മാതിതോ വാ. പിതിതോ വാ യാവ സത്തമാ പിതാമഹയുഗാ അസമ്ബദ്ധാ.

ഭിക്ഖുനീ നാമ ഉഭതോസങ്ഘേ ഉപസമ്പന്നാ.

അന്തരഘരം നാമ രഥികാ ബ്യൂഹം സിങ്ഘാടകം ഘരം.

ഖാദനീയം നാമ പഞ്ച ഭോജനാനി – യാമകാലികം സത്താഹകാലികം യാവജീവികം ഠപേത്വാ അവസേസം ഖാദനീയം നാമ.

ഭോജനീയം നാമ പഞ്ച ഭോജനാനി – ഓദനോ, കുമ്മാസോ, സത്തു, മച്ഛോ, മംസം. ‘‘ഖാദിസ്സാമി ഭുഞ്ജിസ്സാമീ’’തി പടിഗ്ഗണ്ഹാതി, ആപത്തി ദുക്കടസ്സ. അജ്ഝോഹാരേ അജ്ഝോഹാരേ ആപത്തി പാടിദേസനീയസ്സ.

൫൫൫. അഞ്ഞാതികായ അഞ്ഞാതികസഞ്ഞീ അന്തരഘരം പവിട്ഠായ ഹത്ഥതോ ഖാദനീയം വാ ഭോജനീയം വാ സഹത്ഥാ പടിഗ്ഗഹേത്വാ ഖാദതി വാ ഭുഞ്ജതി വാ, ആപത്തി പാടിദേസനീയസ്സ. അഞ്ഞാതികായ വേമതികോ അന്തരഘരം പവിട്ഠായ ഹത്ഥതോ ഖാദനീയം വാ ഭോജനീയം വാ സഹത്ഥാ പടിഗ്ഗഹേത്വാ ഖാദതി വാ ഭുഞ്ജതി വാ, ആപത്തി പാടിദേസനീയസ്സ. അഞ്ഞാതികായ ഞാതികസഞ്ഞീ അന്തരഘരം പവിട്ഠായ ഹത്ഥതോ ഖാദനീയം വാ ഭോജനീയം വാ സഹത്ഥാ പടിഗ്ഗഹേത്വാ ഖാദതി വാ ഭുഞ്ജതി വാ, ആപത്തി പാടിദേസനീയസ്സ.

യാമകാലികം സത്താഹകാലികം യാവജീവികം ആഹാരത്ഥായ പടിഗ്ഗണ്ഹാതി, ആപത്തി ദുക്കടസ്സ. അജ്ഝോഹാരേ അജ്ഝോഹാരേ ആപത്തി ദുക്കടസ്സ. ഏകതോഉപസമ്പന്നായ ഹത്ഥതോ ഖാദനീയം വാ ഭോജനീയം വാ – ‘‘ഖാദിസ്സാമി ഭുഞ്ജിസ്സാമീ’’തി പടിഗ്ഗണ്ഹാതി, ആപത്തി ദുക്കടസ്സ. അജ്ഝോഹാരേ അജ്ഝോഹാരേ ആപത്തി ദുക്കടസ്സ. ഞാതികായ അഞ്ഞാതികസഞ്ഞീ, ആപത്തി ദുക്കടസ്സ. ഞാതികായ വേമതികോ, ആപത്തി ദുക്കടസ്സ. ഞാതികായ ഞാതികസഞ്ഞീ, അനാപത്തി.

൫൫൬. അനാപത്തി ഞാതികായ, ദാപേതി ന ദേതി, ഉപനിക്ഖിപിത്വാ ദേതി അന്തരാരാമേ, ഭിക്ഖുനുപസ്സയേ, തിത്ഥിയസേയ്യായ, പടിക്കമനേ, ഗാമതോ നീഹരിത്വാ ദേതി, യാമകാലികം സത്താഹകാലികം യാവജീവികം ‘‘സതി പച്ചയേ പരിഭുഞ്ജാ’’തി ദേതി, സിക്ഖമാനായ, സാമണേരിയാ, ഉമ്മത്തകസ്സ, ആദികമ്മികസ്സാതി.

പഠമപാടിദേസനീയസിക്ഖാപദം നിട്ഠിതം.