൯. ഉക്ഖിത്തസമ്ഭോഗസിക്ഖാപദം

൪൨൩. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ ജാനം തഥാവാദിനാ അരിട്ഠേന ഭിക്ഖുനാ [ഭിക്ഖുനാ ഗദ്ധബാധിപുബ്ബേന (?)] അകടാനുധമ്മേന തം ദിട്ഠിം അപ്പടിനിസ്സട്ഠേന സദ്ധിം സമ്ഭുഞ്ജന്തിപി സംവസന്തിപി സഹാപി സേയ്യം കപ്പേന്തി. യേ തേ ഭിക്ഖൂ അപ്പിച്ഛാ…പേ… തേ ഉജ്ഝായന്തി ഖിയ്യന്തി വിപാചേന്തി – കഥഞ്ഹി നാമ ഛബ്ബഗ്ഗിയാ ഭിക്ഖൂ ജാനം തഥാവാദിനാ അരിട്ഠേന ഭിക്ഖുനാ [ഭിക്ഖുനാ ഗദ്ധബാധിപുബ്ബേന (?)] അകടാനുധമ്മേന തം ദിട്ഠിം അപ്പടിനിസ്സട്ഠേന സദ്ധിം സമ്ഭുഞ്ജിസ്സന്തിപി സംവസിസ്സന്തിപി സഹാപി സേയ്യം കപ്പേസ്സന്തീതി…പേ… സച്ചം കിര തുമ്ഹേ, ഭിക്ഖവേ, ജാനം തഥാവാദിനാ അരിട്ഠേന ഭിക്ഖുനാ [ഭിക്ഖുനാ ഗദ്ധബാധിപുബ്ബേന (?)] അകടാനുധമ്മേന തം ദിട്ഠിം അപ്പടിനിസ്സട്ഠേന സദ്ധിം സമ്ഭുഞ്ജഥാപി സംവസഥാപി സഹാപി സേയ്യം കപ്പേഥാതി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ തുമ്ഹേ, മോഘപുരിസാ, ജാനം തഥാവാദിനാ അരിട്ഠേന ഭിക്ഖുനാ [ഭിക്ഖുനാ ഗദ്ധബാധിപുബ്ബനേ (?)] അകടാനുധമ്മേന തം ദിട്ഠിം അപ്പടിനിസ്സട്ഠേന സദ്ധിം സമ്ഭുഞ്ജിസ്സഥാപി സംവസിസ്സഥാപി സഹാപി സേയ്യം കപ്പേസ്സഥ! നേതം, മോഘപുരിസാ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഇമം സിക്ഖാപദം ഉദ്ദിസേയ്യാഥ –

൪൨൪. ‘‘യോ പന ഭിക്ഖു ജാനം തഥാവാദിനാ ഭിക്ഖുനാ അകടാനുധമ്മേന തം ദിട്ഠിം അപ്പടിനിസ്സട്ഠേന സദ്ധിം സമ്ഭുഞ്ജേയ്യ വാ സംവസേയ്യ വാ സഹ വാ സേയ്യം കപ്പേയ്യ, പാചിത്തിയ’’ന്തി.

൪൨൫. യോ പനാതി യോ യാദിസോ…പേ… ഭിക്ഖൂതി…പേ… അയം ഇമസ്മിം അത്ഥേ അധിപ്പേതോ ഭിക്ഖൂതി.

ജാനാതി നാമ സാമം വാ ജാനാതി, അഞ്ഞേ വാ തസ്സ ആരോചേന്തി, സോ വാ ആരോചേതി.

തഥാവാദിനാതി – ‘‘തഥാഹം ഭഗവതാ ധമ്മം ദേസിതം ആജാനാമി, യഥാ യേമേ അന്തരായികാ ധമ്മാ വുത്താ ഭഗവതാ, തേ പടിസേവതോ നാലം അന്തരായായാ’’തി ഏവം വാദിനാ.

അകടാനുധമ്മോ നാമ ഉക്ഖിത്തോ അനോസാരിതോ.

തം ദിട്ഠിം അപ്പടിനിസ്സട്ഠേന സദ്ധിന്തി ഏതം ദിട്ഠിം അപ്പടിനിസ്സട്ഠേന സദ്ധിം.

സമ്ഭുഞ്ജേയ്യ വാതി സമ്ഭോഗോ നാമ ദ്വേ സമ്ഭോഗാ – ആമിസസമ്ഭോഗോ ച ധമ്മസമ്ഭോഗോ ച. ആമിസസമ്ഭോഗോ നാമ ആമിസം ദേതി വാ പടിഗ്ഗണ്ഹാതി വാ, ആപത്തി പാചിത്തിയസ്സ. ധമ്മസമ്ഭോഗോ നാമ ഉദ്ദിസതി വാ ഉദ്ദിസാപേതി വാ, പദേന ഉദ്ദിസതി വാ ഉദ്ദിസാപേതി വാ, പദേ പദേ ആപത്തി പാചിത്തിയസ്സ. അക്ഖരായ ഉദ്ദിസതി വാ ഉദ്ദിസാപേതി വാ, അക്ഖരക്ഖരായ ആപത്തി പാചിത്തിയസ്സ.

സംവസേയ്യ വാതി ഉക്ഖിത്തകേന സദ്ധിം ഉപോസഥം വാ പവാരണം വാ സങ്ഘകമ്മം വാ കരോതി, ആപത്തി പാചിത്തിയസ്സ.

സഹ വാ സേയ്യം കപ്പേയ്യാതി ഏകച്ഛന്നേ ഉക്ഖിത്തകേ നിപന്നേ ഭിക്ഖു നിപജ്ജതി, ആപത്തി പാചിത്തിയസ്സ. ഭിക്ഖു നിപന്നേ ഉക്ഖിത്തകോ നിപജ്ജതി, ആപത്തി പാചിത്തിയസ്സ. ഉഭോ വാ നിപജ്ജന്തി, ആപത്തി പാചിത്തിയസ്സ. ഉട്ഠഹിത്വാ പുനപ്പുനം നിപജ്ജന്തി, ആപത്തി പാചിത്തിയസ്സ.

൪൨൬. ഉക്ഖിത്തകേ ഉക്ഖിത്തകസഞ്ഞീ സമ്ഭുഞ്ജതി വാ സംവസതി വാ സഹ വാ സേയ്യം കപ്പേതി, ആപത്തി പാചിത്തിയസ്സ. ഉക്ഖിത്തകേ വേമതികോ സമ്ഭുഞ്ജതി വാ സംവസതി വാ സഹ വാ സേയ്യം കപ്പേതി, ആപത്തി ദുക്കടസ്സ. ഉക്ഖിത്തകേ അനുക്ഖിത്തകസഞ്ഞീ സമ്ഭുഞ്ജതി വാ സംവസതി വാ സഹ വാ സേയ്യം കപ്പേതി, അനാപത്തി. അനുക്ഖിത്തകേ ഉക്ഖിത്തകസഞ്ഞീ, ആപത്തി ദുക്കടസ്സ. അനുക്ഖിത്തകേ വേമതികോ, ആപത്തി ദുക്കടസ്സ. അനുക്ഖിത്തകേ അനുക്ഖിത്തകസഞ്ഞീ, അനാപത്തി.

൪൨൭. അനാപത്തി അനുക്ഖിത്തോതി ജാനാതി, ഉക്ഖിത്തോ ഓസാരിതോതി ജാനാതി, ഉക്ഖിത്തോ തം ദിട്ഠിം പടിനിസ്സട്ഠോതി ജാനാതി, ഉമ്മത്തകസ്സ, ആദികമ്മികസ്സാതി.

ഉക്ഖിത്തസമ്ഭോഗസിക്ഖാപദം നിട്ഠിതം നവമം.