൧. സഞ്ചിച്ചസിക്ഖാപദം

൩൮൨. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ആയസ്മാ ഉദായീ ഇസ്സാസോ ഹോതി, കാകാ ചസ്സ അമനാപാ ഹോന്തി. സോ കാകേ വിജ്ഝിത്വാ വിജ്ഝിത്വാ സീസം ഛിന്ദിത്വാ സൂലേ പടിപാടിയാ ഠപേസി. ഭിക്ഖൂ ഏവമാഹംസു – ‘‘കേനിമേ, ആവുസോ, കാകാ ജീവിതാ വോരോപിതാ’’തി? ‘‘മയാ, ആവുസോ. അമനാപാ മേ കാകാ’’തി. യേ തേ ഭിക്ഖൂ അപ്പിച്ഛാ…പേ… തേ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ആയസ്മാ ഉദായീ സഞ്ചിച്ച പാണം ജീവിതാ വോരോപേസ്സതീ’’തി…പേ… സച്ചം കിര ത്വം, ഉദായി, സഞ്ചിച്ച പാണം ജീവിതാ വോരോപേസീതി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ ത്വം, മോഘപുരിസ, സഞ്ചിച്ച പാണം ജീവിതാ വോരോപേസ്സസി! നേതം, മോഘപുരിസ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഇമം സിക്ഖാപദം ഉദ്ദിസേയ്യാഥ –

൩൮൩. ‘‘യോ പന ഭിക്ഖു സഞ്ചിച്ച പാണം ജീവിതാ വോരോപേയ്യ, പാചിത്തിയ’’ന്തി.

൩൮൪. യോ പനാതി യോ യാദിസോ…പേ… ഭിക്ഖൂതി…പേ… അയം ഇമസ്മിം അത്ഥേ അധിപ്പേതോ ഭിക്ഖൂതി.

സഞ്ചിച്ചാതി ജാനന്തോ സഞ്ജാനന്തോ ചേച്ച അഭിവിതരിത്വാ വീതിക്കമോ.

പാണോ നാമ തിരച്ഛാനഗതപാണോ വുച്ചതി.

ജീവിതാ വോരോപേയ്യാതി ജീവിതിന്ദ്രിയം ഉപച്ഛിന്ദതി ഉപരോധേതി സന്തതിം വികോപേതി, ആപത്തി പാചിത്തിയസ്സ.

൩൮൫. പാണേ പാണസഞ്ഞീ ജീവിതാ വോരോപേതി, ആപത്തി പാചിത്തിയസ്സ. പാണേ വേമതികോ ജീവിതാ വോരോപേതി, ആപത്തി ദുക്കടസ്സ. പാണേ അപ്പാണസഞ്ഞീ ജീവിതാ വോരോപേതി, അനാപത്തി. അപ്പാണേ പാണസഞ്ഞീ, ആപത്തി ദുക്കടസ്സ. അപ്പാണേ വേമിതകോ, ആപത്തി ദുക്കടസ്സ. അപ്പാണേ അപ്പാണസഞ്ഞീ, അനാപത്തി.

൩൮൬. അനാപത്തി അസഞ്ചിച്ച, അസ്സതിയാ, അജാനന്തസ്സ, നമരണാധിപ്പായസ്സ, ഉമ്മത്തകസ്സ, ആദികമ്മികസ്സാതി.

സഞ്ചിച്ചസിക്ഖാപദം നിട്ഠിതം പഠമം.