൨. സപ്പാണകസിക്ഖാപദം

൩൮൭. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ ജാനം സപ്പാണകം ഉദകം പരിഭുഞ്ജന്തി. യേ തേ ഭിക്ഖൂ അപ്പിച്ഛാ…പേ… തേ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ഛബ്ബഗ്ഗിയാ ഭിക്ഖൂ ജാനം സപ്പാണകം ഉദകം പരിഭുഞ്ജിസ്സന്തീ’’തി…പേ… സച്ചം കിര തുമ്ഹേ, ഭിക്ഖവേ, ജാനം സപ്പാണകം ഉദകം പരിഭുഞ്ജഥാതി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ തുമ്ഹേ, മോഘപുരിസാ, ജാനം സപ്പാണകം ഉദകം പരിഭുഞ്ജിസ്സഥ! നേതം, മോഘപുരിസാ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഇമം സിക്ഖാപദം ഉദ്ദിസേയ്യാഥ –

൩൮൮. ‘‘യോ പന ഭിക്ഖു ജാനം സപ്പാണകം ഉദകം പരിഭുഞ്ജേയ്യ, പാചിത്തിയ’’ന്തി.

൩൮൯. യോ പനാതി യോ യാദിസോ…പേ… ഭിക്ഖൂതി…പേ… അയം ഇമസ്മിം അത്ഥേ അധിപ്പേതോ ഭിക്ഖൂതി.

ജാനാതി നാമ സാമം വാ ജാനാതി, അഞ്ഞേ വാ തസ്സ ആരോചേന്തി. ‘‘സപ്പാണക’’ന്തി ജാനന്തോ, ‘‘പരിഭോഗേന മരിസ്സന്തീ’’തി ജാനന്തോ പരിഭുഞ്ജതി, ആപത്തി പാചിത്തിയസ്സ.

൩൯൦. സപ്പാണകേ സപ്പാണകസഞ്ഞീ പരിഭുഞ്ജതി, ആപത്തി പാചിത്തിയസ്സ. സപ്പാണകേ വേമതികോ പരിഭുഞ്ജതി, ആപത്തി ദുക്കടസ്സ. സപ്പാണകേ അപ്പാണകസഞ്ഞീ പരിഭുഞ്ജതി, അനാപത്തി. അപ്പാണകേ സപ്പാണകസഞ്ഞീ, ആപത്തി ദുക്കടസ്സ. അപ്പാണകേ വേമതികോ, ആപത്തി ദുക്കടസ്സ. അപ്പാണകേ അപ്പാണകസഞ്ഞീ, അനാപത്തി.

൩൯൧. അനാപത്തി ‘‘സപ്പാണക’’ന്തി അജാനന്തോ, ‘‘അപ്പാണക’’ന്തി ജാനന്തോ, ‘‘പരിഭോഗേന ന മരിസ്സന്തീ’’തി ജാനന്തോ പരിഭുഞ്ജതി, ഉമ്മത്തകസ്സ, ആദികമ്മികസ്സാതി.

സപ്പാണകസിക്ഖാപദം നിട്ഠിതം ദുതിയം.