൧൦. ചീവരഅപനിധാനസിക്ഖാപദം

൩൭൭. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന സത്തരസവഗ്ഗിയാ ഭിക്ഖൂ അസന്നിഹിതപരിക്ഖാരാ ഹോന്തി. ഛബ്ബഗ്ഗിയാ ഭിക്ഖൂ സത്തരസവഗ്ഗിയാനം ഭിക്ഖൂനം പത്തമ്പി ചീവരമ്പി അപനിധേന്തി. സത്തരസവഗ്ഗിയാ ഭിക്ഖൂ ഛബ്ബഗ്ഗിയേ ഭിക്ഖൂ ഏതദവോചും – ‘‘ദേഥാവുസോ, അമ്ഹാകം പത്തമ്പി ചീവരമ്പീ’’തി. ഛബ്ബഗ്ഗിയാ ഭിക്ഖൂ ഹസന്തി, തേ രോദന്തി. ഭിക്ഖൂ ഏവമാഹംസു – ‘‘കിസ്സ തുമ്ഹേ, ആവുസോ, രോദഥാ’’തി? ‘‘ഇമേ, ആവുസോ, ഛബ്ബഗ്ഗിയാ ഭിക്ഖൂ അമ്ഹാകം പത്തമ്പി ചീവരമ്പി അപനിധേന്തീ’’തി. യേ തേ ഭിക്ഖൂ അപ്പിച്ഛാ…പേ… തേ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ഛബ്ബഗ്ഗിയാ ഭിക്ഖൂ ഭിക്ഖൂനം പത്തമ്പി ചീവരമ്പി അപനിധേസ്സന്തീ’’തി…പേ… സച്ചം കിര തുമ്ഹേ, ഭിക്ഖവേ, ഭിക്ഖൂനം പത്തമ്പി ചീവരമ്പി അപനിധേഥാതി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ തുമ്ഹേ, മോഘപുരിസാ, ഭിക്ഖൂനം പത്തമ്പി ചീവരമ്പി അപനിധേസ്സഥ! നേതം, മോഘപുരിസാ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഇമം സിക്ഖാപദം ഉദ്ദിസേയ്യാഥ –

൩൭൮. ‘‘യോ പന ഭിക്ഖു ഭിക്ഖുസ്സ പത്തം വാ ചീവരം വാ നിസീദനം വാ സൂചിഘരം വാ കായബന്ധനം വാ അപനിധേയ്യ വാ അപനിധാപേയ്യ വാ, അന്തമസോ ഹസാപേക്ഖോപി, പാചിത്തിയ’’ന്തി.

൩൭൯. യോ പനാതി യോ യാദിസോ…പേ… ഭിക്ഖൂതി…പേ… അയം ഇമസ്മിം അത്ഥേ അധിപ്പേതോ ഭിക്ഖൂതി.

ഭിക്ഖുസ്സാതി അഞ്ഞസ്സ ഭിക്ഖുസ്സ.

പത്തോ നാമ ദ്വേ പത്താ – അയോപത്തോ, മത്തികാപത്തോ.

ചീവരം നാമ ഛന്നം ചീവരാനം അഞ്ഞതരം ചീവരം, വികപ്പനുപഗം പച്ഛിമം.

നിസീദനം നാമ സദസം വുച്ചതി.

സൂചിഘരം നാമ സസൂചികം വാ അസൂചികം വാ.

കായബന്ധനം നാമ ദ്വേ കായബന്ധനാനി – പട്ടികാ, സൂകരന്തകം.

അപനിധേയ്യ വാതി സയം അപനിധേതി, ആപത്തി പാചിത്തിയസ്സ.

അപനിധാപേയ്യ വാതി അഞ്ഞം ആണാപേസി, ആപത്തി പാചിത്തിയസ്സ. അപനിധാപേയ്യ വാ തി അയ്യം ആണാപേതി, ആപത്തി പാചിത്തിയസ്സ. സകിം ആണത്തോ ബഹുകമ്പി അപനിധേതി, ആപത്തി പാചിത്തിയസ്സ.

അന്തമസോ ഹസാപേക്ഖോപീതി കീളാധിപ്പായോ.

൩൮൦. ഉപസമ്പന്നേ ഉപസമ്പന്നസഞ്ഞീ പത്തം വാ ചീവരം വാ നിസീദനം വാ സൂചിഘരം വാ കായബന്ധനം വാ അപനിധേതി വാ അപനിധാപേതി വാ, അന്തമസോ ഹസാപേക്ഖോപി, ആപത്തി പാചിത്തിയസ്സ. ഉപസമ്പന്നേ വേമതികോ…പേ… ഉപസമ്പന്നേ അനുപസമ്പന്നസഞ്ഞീ പത്തം വാ ചീവരം വാ നിസീദനം വാ സൂചിഘരം വാ കായബന്ധനം വാ അപനിധേതി വാ അപനിധാപേതി വാ, അന്തമസോ ഹസാപേക്ഖോപി, ആപത്തി പാചിത്തിയസ്സ.

അഞ്ഞം പരിക്ഖാരം അപനിധേതി വാ അപനിധാപേതി വാ, അന്തമസോ ഹസാപേക്ഖോപി, ആപത്തി ദുക്കടസ്സ. അനുപസമ്പന്നസ്സ പത്തം വാ ചീവരം വാ അഞ്ഞം വാ പരിക്ഖാരം അപനിധേതി വാ അപനിധാപേതി വാ, അന്തമസോ ഹസാപേക്ഖോപി, ആപത്തി ദുക്കടസ്സ. അനുപസമ്പന്നേ ഉപസമ്പന്നസഞ്ഞീ, ആപത്തി ദുക്കടസ്സ. അനുപസമ്പന്നേ വേമതികോ, ആപത്തി ദുക്കടസ്സ. അനുപസമ്പന്നേ അനുപസമ്പന്നസഞ്ഞീ, ആപത്തി ദുക്കടസ്സ.

൩൮൧. അനാപത്തി നഹസാധിപ്പായോ, ദുന്നിക്ഖിത്തം പടിസാമേതി, ‘‘ധമ്മിം കഥം കത്വാ ദസ്സാമീ’’തി പടിസാമേതി, ഉമ്മത്തകസ്സ, ആദികമ്മികസ്സാതി.

ചീവരഅപനിധാനസിക്ഖാപദം നിട്ഠിതം ദസമം.

സുരാപാനവഗ്ഗോ ഛട്ഠോ.

തസ്സുദ്ദാനം –

സുരാ അങ്ഗുലി ഹാസോ ച [തോയഞ്ച (ഇതിപി)], അനാദരിയഞ്ച ഭിംസനം;

ജോതിനഹാനദുബ്ബണ്ണം, സാമം അപനിധേന ചാതി.