൧൦. രഹോനിസജ്ജസിക്ഖാപദം
൧൯൮. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ആയസ്മതോ ഉദായിസ്സ പുരാണദുതിയികാ ഭിക്ഖുനീസു പബ്ബജിതാ ഹോതി. സാ ആയസ്മതോ ഉദായിസ്സ സന്തികേ അഭിക്ഖണം ആഗച്ഛതി, ആയസ്മാപി ഉദായീ തസ്സാ ഭിക്ഖുനിയാ സന്തികേ അഭിക്ഖണം ഗച്ഛതി. തേന ഖോ പന സമയേന ആയസ്മാ ഉദായീ തസ്സാ ഭിക്ഖുനിയാ സദ്ധിം ഏകോ ഏകായ രഹോ നിസജ്ജം കപ്പേസി. യേ തേ ഭിക്ഖൂ അപ്പിച്ഛാ…പേ… തേ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ആയസ്മാ ഉദായീ ഭിക്ഖുനിയാ സദ്ധിം ഏകോ ഏകായ രഹോ നിസജ്ജം കപ്പേസ്സതീ’’തി…പേ… സച്ചം കിര ത്വം, ഉദായി, ഭിക്ഖുനിയാ സദ്ധിം ഏകോ ഏകായ രഹോ നിസജ്ജം കപ്പേസീതി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ ത്വം, മോഘപുരിസ, ഭിക്ഖുനിയാ സദ്ധിം ഏകോ ഏകായ രഹോ നിസജ്ജം കപ്പേസ്സസി! നേതം, മോഘപുരിസ അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഇമം സിക്ഖാപദം ഉദ്ദിസേയ്യാഥ –
൧൯൯. ‘‘യോ പന ഭിക്ഖു ഭിക്ഖുനിയാ സദ്ധിം ഏകോ ഏകായ രഹോ നിസജ്ജം കപ്പേയ്യ, പാചിത്തിയ’’ന്തി.
൨൦൦. യോ പനാതി യോ യാദിസോ…പേ… ഭിക്ഖൂതി…പേ… അയം ഇമസ്മിം അത്ഥേ അധിപ്പേതോ ഭിക്ഖൂതി.
ഭിക്ഖുനീ നാമ ഉഭതോസങ്ഘേ ഉപസമ്പന്നാ.
സദ്ധിന്തി ഏകതോ.
ഏകോ ഏകായാതി ഭിക്ഖു ചേവ ഹോതി ഭിക്ഖുനീ ച.
[പാചി. ൨൮൬, ൨൯൧; പാരാ. ൪൪൫,൪൫൪] രഹോ നാമ ചക്ഖുസ്സ രഹോ സോതസ്സ രഹോ. ചക്ഖുസ്സ രഹോ നാമ ന സക്കാ ഹോതി അക്ഖിം വാ നിഖണീയമാനേ ഭമുകം വാ ഉക്ഖിപീയമാനേ സീസം വാ ഉക്ഖിപീയമാനേ പസ്സിതും. സോതസ്സ രഹോ നാമ ന സക്കാ ഹോതി പകതികഥാ സോതും.
നിസജ്ജം കപ്പേയ്യാതി ഭിക്ഖുനിയാ നിസിന്നായ ഭിക്ഖു ഉപനിസിന്നോ വാ ഹോതി ഉപനിപന്നോ വാ, ആപത്തി പാചിത്തിയസ്സ.
ഭിക്ഖു നിസിന്നേ ഭിക്ഖുനീ ഉപനിസിന്നാ വാ ഹോതി ഉപനിപന്നാ വാ, ആപത്തി പാചിത്തിയസ്സ. ഉഭോ വാ നിസിന്നാ ഹോന്തി ഉഭോ വാ നിപന്നാ, ആപത്തി പാചിത്തിയസ്സ.
൨൦൧. രഹോ രഹോസഞ്ഞീ ഏകോ ഏകായ നിസജ്ജം കപ്പേതി, ആപത്തി പാചിത്തിയസ്സ. രഹോ വേമതികോ ഏകോ ഏകായ നിസജ്ജം കപ്പേതി, ആപത്തി പാചിത്തിയസ്സ. രഹോ അരഹോസഞ്ഞീ ഏകോ ഏകായ നിസജ്ജം കപ്പേതി, ആപത്തി പാചിത്തിയസ്സ.
അരഹോ രഹോസഞ്ഞീ, ആപത്തി ദുക്കടസ്സ. അരഹോ വേമതികോ, ആപത്തി ദുക്കടസ്സ. അരഹോ അരഹോസഞ്ഞീ, അനാപത്തി.
൨൦൨. അനാപത്തി യോ കോചി വിഞ്ഞൂ ദുതിയോ ഹോതി, തിട്ഠതി ന നിസീദതി, അരഹോപേക്ഖോ, അഞ്ഞവിഹിതോ നിസീദതി, ഉമ്മത്തകസ്സ, ആദികമ്മികസ്സാതി.
രഹോനിസജ്ജസിക്ഖാപദം നിട്ഠിതം ദസമം.
ഓവാദവഗ്ഗോ തതിയോ.
തസ്സുദ്ദാനം –
അസമ്മതഅത്ഥങ്ഗതൂ, പസ്സയാമിസദാനേന;
സിബ്ബതി അദ്ധാനം നാവം ഭുഞ്ജേയ്യ, ഏകോ ഏകായ തേ ദസാതി.