൯. ദുട്ഠുല്ലാരോചനസിക്ഖാപദം

൭൮. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ആയസ്മാ ഉപനന്ദോ സക്യപുത്തോ ഛബ്ബഗ്ഗിയേഹി ഭിക്ഖൂഹി സദ്ധിം ഭണ്ഡനകതോ ഹോതി. സോ സഞ്ചേതനികം സുക്കവിസ്സട്ഠിം ആപത്തിം ആപജ്ജിത്വാ സങ്ഘം തസ്സാ ആപത്തിയാ പരിവാസം യാചി. തസ്സ സങ്ഘോ തസ്സാ ആപത്തിയാ പരിവാസം അദാസി. തേന ഖോ പന സമയേന സാവത്ഥിയം അഞ്ഞതരസ്സ പൂഗസ്സ സങ്ഘഭത്തം ഹോതി. സോ പരിവസന്തോ ഭത്തഗ്ഗേ ആസനപരിയന്തേ നിസീദി. ഛബ്ബഗ്ഗിയാ ഭിക്ഖൂ തേ ഉപാസകേ ഏതദവോചും – ‘‘ഏസോ, ആവുസോ, ആയസ്മാ ഉപനന്ദോ സക്യപുത്തോ തുമ്ഹാകം സമ്ഭാവിതോ കുലൂപകോ; യേനേവ ഹത്ഥേന സദ്ധാദേയ്യം ഭുഞ്ജതി തേനേവ ഹത്ഥേന ഉപക്കമിത്വാ അസുചിം മോചേസി. സോ സഞ്ചേതനികം സുക്കവിസ്സട്ഠിം ആപത്തിം ആപജ്ജിത്വാ സങ്ഘം തസ്സാ ആപത്തിയാ പരിവാസം യാചി. തസ്സ സങ്ഘോ തസ്സാ ആപത്തിയാ പരിവാസം അദാസി. സോ പരിവസന്തോ ആസനപരിയന്തേ നിസിന്നോ’’തി. യേ തേ ഭിക്ഖൂ അപ്പിച്ഛാ…പേ… തേ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ഛബ്ബഗ്ഗിയാ ഭിക്ഖൂ ഭിക്ഖുസ്സ ദുട്ഠുല്ലം ആപത്തിം അനുപസമ്പന്നസ്സ ആരോചേസ്സന്തീ’’തി…പേ… ‘‘സച്ചം കിര തുമ്ഹേ, ഭിക്ഖവേ, ഭിക്ഖുസ്സ ദുട്ഠുല്ലം ആപത്തിം അനുപസമ്പന്നസ്സ ആരോചേഥാ’’തി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ തുമ്ഹേ, മോഘപുരിസാ, ഭിക്ഖുസ്സ ദുട്ഠുല്ലം ആപത്തിം അനുപസമ്പന്നസ്സ ആരോചേസ്സഥ! നേതം, മോഘപുരിസാ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഇമം സിക്ഖാപദം ഉദ്ദിസേയ്യാഥ –

൭൯. ‘‘യോ പന ഭിക്ഖു ഭിക്ഖുസ്സ ദുട്ഠുല്ലം ആപത്തിം അനുപസമ്പന്നസ്സ ആരോചേയ്യ, അഞ്ഞത്ര ഭിക്ഖുസമ്മുതിയാ [ഭിക്ഖുസമ്മതിയാ (സ്യാ.)], പാചിത്തിയ’’ന്തി.

൮൦. യോ പനാതി യോ യാദിസോ…പേ… ഭിക്ഖൂതി…പേ… അയം ഇമസ്മിം അത്ഥേ അധിപ്പേതോ ഭിക്ഖൂതി.

ഭിക്ഖുസ്സാതി അഞ്ഞസ്സ ഭിക്ഖുസ്സ.

ദുട്ഠുല്ലാ നാമ ആപത്തി – ചത്താരി ച പാരാജികാനി, തേരസ ച സങ്ഘാദിസേസാ.

അനുപസമ്പന്നോ നാമ ഭിക്ഖുഞ്ച ഭിക്ഖുനിഞ്ച ഠപേത്വാ അവസേസോ അനുപസമ്പന്നോ നാമ.

ആരോചേയ്യാതി ആരോചേയ്യ ഇത്ഥിയാ വാ പുരിസസ്സ വാ ഗഹട്ഠസ്സ വാ പബ്ബജിതസ്സ വാ.

അഞ്ഞത്ര ഭിക്ഖുസമ്മുതിയാതി ഠപേത്വാ ഭിക്ഖുസമ്മുതിം.

അത്ഥി ഭിക്ഖുസമ്മുതി ആപത്തിപരിയന്താ, ന കുലപരിയന്താ. അത്ഥി ഭിക്ഖുസമ്മുതി കുലപരിയന്താ, ന ആപത്തിപരിയന്താ, അത്ഥി ഭിക്ഖുസമ്മുതി ആപത്തിപരിയന്താ ച കുലപരിയന്താ ച, അത്ഥി ഭിക്ഖുസമ്മുതി നേവ ആപത്തിപരിയന്താ ന കുലപരിയന്താ.

ആപത്തിപരിയന്താ നാമ ആപത്തിയോ പരിഗ്ഗഹിതായോ ഹോന്തി – ‘‘ഏത്തകാഹി ആപത്തീഹി ആരോചേതബ്ബോ’’തി.

കുലപരിയന്താ നാമ കുലാനി പരിഗ്ഗഹിതാനി ഹോന്തി – ‘‘ഏത്തകേസു കുലേസു ആരോചേതബ്ബോ’’തി. ആപത്തിപരിയന്താ ച കുലപരിയന്താ ച നാമ ആപത്തിയോ ച പരിഗ്ഗഹിതായോ ഹോന്തി, കുലാനി ച പരിഗ്ഗഹിതാനി ഹോന്തി – ‘‘ഏത്തകാഹി ആപത്തീഹി ഏത്തകേസു കുലേസു ആരോചേതബ്ബോ’’തി. നേവ ആപത്തിപരിയന്താ ന കുലപരിയന്താ നാമ ആപത്തിയോ ച അപരിഗ്ഗഹിതായോ ഹോന്തി, കുലാനി ച അപരിഗ്ഗഹിതാനി ഹോന്തി – ‘‘ഏത്തകാഹി ആപത്തീഹി ഏത്തകേസു കുലേസു ആരോചേതബ്ബോ’’തി.

൮൧. ആപത്തിപരിയന്തേ യാ ആപത്തിയോ പരിഗ്ഗഹിതായോ ഹോന്തി, താ ആപത്തിയോ ഠപേത്വാ അഞ്ഞാഹി ആപത്തീഹി ആരോചേതി, ആപത്തി പാചിത്തിയസ്സ.

കുലപരിയന്തേ യാനി കുലാനി പരിഗ്ഗഹിതാനി ഹോന്തി, താനി കുലാനി ഠപേത്വാ അഞ്ഞേസു കുലേസു ആരോചേതി, ആപത്തി പാചിത്തിയസ്സ.

ആപത്തിപരിയന്തേ ച കുലപരിയന്തേ ച യാ ആപത്തിയോ പരിഗ്ഗഹിതായോ ഹോന്തി, താ ആപത്തിയോ ഠപേത്വാ യാനി കുലാനി പരിഗ്ഗഹിതാനി ഹോന്തി, താനി കുലാനി ഠപേത്വാ അഞ്ഞാഹി ആപത്തീഹി അഞ്ഞേസു കുലേസു ആരോചേതി, ആപത്തി പാചിത്തിയസ്സ.

നേവ ആപത്തിപരിയന്തേ ന കുലപരിയന്തേ, അനാപത്തി.

൮൨. ദുട്ഠുല്ലായ ആപത്തിയാ ദുട്ഠുല്ലാപത്തിസഞ്ഞീ അനുപസമ്പന്നസ്സ ആരോചേതി, അഞ്ഞത്ര ഭിക്ഖുസമ്മുതിയാ, ആപത്തി പാചിത്തിയസ്സ.

ദുട്ഠുല്ലായ ആപത്തിയാ വേമതികോ അനുപസമ്പന്നസ്സ ആരോചേതി, അഞ്ഞത്ര ഭിക്ഖുസമ്മുതിയാ, ആപത്തി പാചിത്തിയസ്സ.

ദുട്ഠുല്ലായ ആപത്തിയാ അദുട്ഠുല്ലാപത്തിസഞ്ഞീ അനുപസമ്പന്നസ്സ ആരോചേതി, അഞ്ഞത്ര ഭിക്ഖുസമ്മുതിയാ, ആപത്തി പാചിത്തിയസ്സ.

അദുട്ഠുല്ലം ആപത്തിം ആരോചേതി, ആപത്തി ദുക്കടസ്സ.

അനുപസമ്പന്നസ്സ ദുട്ഠുല്ലം വാ അദുട്ഠുല്ലം വാ അജ്ഝാചാരം ആരോചേതി, ആപത്തി ദുക്കടസ്സ.

അദുട്ഠുല്ലായ ആപത്തിയാ ദുട്ഠുല്ലാപത്തിസഞ്ഞീ, ആപത്തി ദുക്കടസ്സ.

അദുട്ഠുല്ലായ ആപത്തിയാ വേമതികോ, ആപത്തി ദുക്കടസ്സ.

അദുട്ഠുല്ലായ ആപത്തിയാ അദുട്ഠുല്ലാപത്തിസഞ്ഞീ, ആപത്തി ദുക്കടസ്സ.

൮൩. അനാപത്തി വത്ഥും ആരോചേതി നോ ആപത്തിം, ആപത്തിം ആരോചേതി നോ വത്ഥും, ഭിക്ഖുസമ്മുതിയാ, ഉമ്മത്തകസ്സ, ആദികമ്മികസ്സാതി.

ദുട്ഠുല്ലാരോചനസിക്ഖാപദം നിട്ഠിതം നവമം.