൮. ഭൂതാരോചനസിക്ഖാപദം

൬൭. [പാരാ. ൧൯൩] തേന സമയേന ബുദ്ധോ ഭഗവാ വേസാലിയം വിഹരതി മഹാവനേ കൂടാഗാരസാലായം. തേന ഖോ പന സമയേന സമ്ബഹുലാ സന്ദിട്ഠാ സമ്ഭത്താ ഭിക്ഖൂ വഗ്ഗുമുദായ നദിയാ തീരേ വസ്സം ഉപഗച്ഛിംസു. തേന ഖോ പന സമയേന വജ്ജീ ദുബ്ഭിക്ഖാ ഹോതി – ദ്വീഹിതികാ സേതട്ഠികാ സലാകാവുത്താ, ന സുകരാ ഉഞ്ഛേന പഗ്ഗഹേന യാപേതും. അഥ ഖോ തേസം ഭിക്ഖൂനം ഏതദഹോസി – ‘‘ഏതരഹി ഖോ വജ്ജീ ദുബ്ഭിക്ഖാ – ദ്വീഹിതികാ സേതട്ഠികാ സലാകാവുത്താ, ന സുകരാ ഉഞ്ഛേന പഗ്ഗഹേന യാപേതും. കേന നു ഖോ മയം ഉപായേന സമഗ്ഗാ സമ്മോദമാനാ അവിവദമാനാ ഫാസുകം വസ്സം വസേയ്യാമ, ന ച പിണ്ഡകേന കിലമേയ്യാമാ’’തി? ഏകച്ചേ ഏവമാഹംസു – ‘‘ഹന്ദ മയം, ആവുസോ, ഗിഹീനം കമ്മന്തം അധിട്ഠേമ. ഏവം തേ അമ്ഹാകം ദാതും മഞ്ഞിസ്സന്തി. ഏവം മയം സമഗ്ഗാ സമ്മോദമാനാ അവിവദമാനാ ഫാസുകം വസ്സം വസിസ്സാമ, ന ച പിണ്ഡകേന കിലമിസ്സാമാ’’തി. ഏകച്ചേ ഏവമാഹംസു – ‘‘അലം, ആവുസോ, കിം ഗിഹീനം കമ്മന്തം അധിട്ഠിതേന? ഹന്ദ മയം, ആവുസോ, ഗിഹീനം ദൂതേയ്യം ഹരാമ. ഏവം തേ അമ്ഹാകം ദാതും മഞ്ഞിസ്സന്തി. ഏവം മയം സമഗ്ഗാ സമ്മോദമാനാ അവിവദമാനാ ഫാസുകം വസ്സം വസിസ്സാമ, ന ച പിണ്ഡകേന കിലമിസ്സാമാ’’തി. ഏകച്ചേ ഏവമാഹംസു – ‘‘അലം, ആവുസോ; കിം ഗിഹീനം കമ്മന്തം അധിട്ഠിതേന! കിം ഗിഹീനം ദൂതേയ്യം ഹടേന! ഹന്ദ മയം, ആവുസോ, ഗിഹീനം അഞ്ഞമഞ്ഞസ്സ ഉത്തരിമനുസ്സധമ്മസ്സ വണ്ണം ഭാസിസ്സാമ – ‘അസുകോ ഭിക്ഖു പഠമസ്സ ഝാനസ്സ ലാഭീ, അസുകോ ഭിക്ഖു ദുതിയസ്സ ഝാനസ്സ ലാഭീ, അസുകോ ഭിക്ഖു തതിയസ്സ ഝാനസ്സ ലാഭീ, അസുകോ ഭിക്ഖു ചതുത്ഥസ്സ ഝാനസ്സ ലാഭീ, അസുകോ ഭിക്ഖു സോതാപന്നോ, അസുകോ ഭിക്ഖു സകദാഗാമീ, അസുകോ ഭിക്ഖു അനാഗാമീ, അസുകോ ഭിക്ഖു അരഹാ, അസുകോ ഭിക്ഖു തേവിജ്ജോ, അസുകോ ഭിക്ഖു ഛളഭിഞ്ഞോതി. ഏവം തേ അമ്ഹാകം ദാതും മഞ്ഞിസ്സന്തി. ഏവം മയം സമഗ്ഗാ സമ്മോദമാനാ അവിവദമാനാ ഫാസുകം വസ്സം വസിസ്സാമ, ന ച പിണ്ഡകേന കിലമിസ്സാമാ’’തി. ഏസോ യേവ ഖോ, ആവുസോ, സേയ്യോ, യോ അമ്ഹാകം ഗിഹീനം അഞ്ഞമഞ്ഞസ്സ ഉത്തരിമനുസ്സധമ്മസ്സ വണ്ണോ ഭാസിതോ’’തി.

അഥ ഖോ തേ ഭിക്ഖൂ ഗിഹീനം അഞ്ഞമഞ്ഞസ്സ ഉത്തരിമനുസ്സധമ്മസ്സ വണ്ണം ഭാസിംസു – ‘‘അസുകോ ഭിക്ഖു പഠമസ്സ ഝാനസ്സ ലാഭീ…പേ… അസുകോ ഭിക്ഖു ഛളഭിഞ്ഞോ’’തി. അഥ ഖോ തേ മനുസ്സാ – ‘‘ലാഭാ വത നോ, സുലദ്ധം വത നോ, യേസം നോ ഏവരൂപാ ഭിക്ഖൂ വസ്സം ഉപഗതാ, ന വത നോ ഇതോ പുബ്ബേ ഏവരൂപാ ഭിക്ഖൂ വസ്സം ഉപഗതാ, യഥയിമേ ഭിക്ഖൂ സീലവന്തോ കല്യാണധമ്മാ’’തി. തേ ന താദിസാനി ഭോജനാനി അത്തനാ ഭുഞ്ജന്തി, മാതാപിതൂനം ദേന്തി പുത്തദാരസ്സ ദേന്തി ദാസകമ്മകരപോരിസസ്സ ദേന്തി മിത്താമച്ചാനം ദേന്തി ഞാതിസാലോഹിതാനം ദേന്തി യാദിസാനി ഭിക്ഖൂനം ദേന്തി. ന താദിസാനി ഖാദനീയാനി സായനീയാനി പാനാനി അത്തനാ ഖാദന്തി സായന്തി പിവന്തി [അത്തനാ പിവന്തി (സ്യാ. ക.)] മാതാപിതൂനം ദേന്തി പുത്തദാരസ്സ ദേന്തി ദാസകമ്മകരപോരിസസ്സ ദേന്തി മിത്താമച്ചാനം ദേന്തി ഞാതിസാലോഹിതാനം ദേന്തി, യാദിസാനി ഭിക്ഖൂനം ദേന്തി. അഥ ഖോ തേ ഭിക്ഖൂ വണ്ണവാ അഹേസും പീണിന്ദ്രിയാ പസന്നമുഖവണ്ണാ വിപ്പസന്നഛവിവണ്ണാ.

൬൮. ആചിണ്ണം ഖോ പനേതം വസ്സംവുട്ഠാനം ഭിക്ഖൂനം ഭഗവന്തം ദസ്സനായ ഉപസങ്കമിതും. അഥ ഖോ തേ ഭിക്ഖൂ വസ്സംവുട്ഠാ തേമാസച്ചയേന സേനാസനം സംസാമേത്വാ പത്തചീവരമാദായ യേന വേസാലീ തേന പക്കമിംസു. അനുപുബ്ബേന യേന വേസാലീ മഹാവനം കൂടാഗാരസാലാ യേന ഭഗവാ തേനുപസങ്കമിംസു; ഉപസങ്കമിത്വാ ഭഗവന്തം അഭിവാദേത്വാ ഏകമന്തം നിസീദിംസു. തേന ഖോ പന സമയേന ദിസാസു വസ്സംവുട്ഠാ ഭിക്ഖൂ കിസാ ഹോന്തി ലൂഖാ ദുബ്ബണ്ണാ ഉപ്പണ്ഡുപ്പണ്ഡുകജാതാ ധമനിസന്ഥതഗത്താ. വഗ്ഗുമുദാതീരിയാ പന ഭിക്ഖൂ വണ്ണവാ ഹോന്തി പീണിന്ദ്രിയാ പസന്നമുഖവണ്ണാ വിപ്പസന്നഛവിവണ്ണാ. ആചിണ്ണം ഖോ പനേതം ബുദ്ധാനം ഭഗവന്താനം ആഗന്തുകേഹി ഭിക്ഖൂഹി സദ്ധിം പടിസമ്മോദിതും. അഥ ഖോ ഭഗവാ വഗ്ഗുമുദാതീരിയേ ഭിക്ഖൂ ഏതദവോച – ‘‘കച്ചി, ഭിക്ഖവേ, ഖമനീയം, കച്ചി യാപനീയം, കച്ചി സമഗ്ഗാ സമ്മോദമാനാ അവിവദമാനാ ഫാസുകം വസ്സം വസിത്ഥ, ന ച പിണ്ഡകേന കിലമിത്ഥാ’’തി? ‘‘ഖമനീയം ഭഗവാ, യാപനീയം ഭഗവാ. സമഗ്ഗാ ച മയം, ഭന്തേ, സമ്മോദമാനാ അവിവദമാനാ ഫാസുകം വസ്സം വസിമ്ഹാ, ന ച പിണ്ഡകേന കിലമിമ്ഹാ’’തി. ജാനന്താപി തഥാഗതാ പുച്ഛന്തി, ജാനന്താപി ന പുച്ഛന്തി. കാലം വിദിത്വാ പുച്ഛന്തി, കാലം വിദിത്വാ ന പുച്ഛന്തി. അത്ഥസഞ്ഹിതം തഥാഗതാ പുച്ഛന്തി, നോ അനത്ഥസഞ്ഹിതം. അനത്ഥസഞ്ഹിതേ സേതുഘാതോ തഥാഗതാനം. ദ്വീഹാകാരേഹി ബുദ്ധാ ഭഗവന്തോ ഭിക്ഖൂ പടിപുച്ഛന്തി – ധമ്മം വാ ദേസേസ്സാമ, സാവകാനം വാ സിക്ഖാപദം പഞ്ഞപേസ്സാമാതി.

അഥ ഖോ ഭഗവാ വഗ്ഗുമുദാതീരിയേ ഭിക്ഖൂ ഏതദവോച – ‘‘യഥാ കഥം പന തുമ്ഹേ, ഭിക്ഖവേ, സമഗ്ഗാ സമ്മോദമാനാ അവിവദമാനാ ഫാസുകം വസ്സം വസിത്ഥ, ന ച പിണ്ഡകേന കിലമിത്ഥാ’’തി? അഥ ഖോ തേ ഭിക്ഖൂ ഭഗവതോ ഏതമത്ഥം ആരോചേസും. ‘‘കച്ചി പന വോ, ഭിക്ഖവേ, ഭൂത’’ന്തി? ‘‘ഭൂതം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ തുമ്ഹേ, ഭിക്ഖവേ, ഉദരസ്സ കാരണാ ഗിഹീനം അഞ്ഞമഞ്ഞസ്സ ഉത്തരിമനുസ്സധമ്മസ്സ വണ്ണം ഭാസിസ്സഥ! നേതം, ഭിക്ഖവേ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഇമം സിക്ഖാപദം ഉദ്ദിസേയ്യാഥ –

൬൯. ‘‘യോ പന ഭിക്ഖു അനുപസമ്പന്നസ്സ ഉത്തരിമനുസ്സധമ്മം ആരോചേയ്യ ഭൂതസ്മിം, പാചിത്തിയ’’ന്തി.

൭൦. യോ പനാതി യോ യാദിസോ…പേ… ഭിക്ഖൂതി…പേ… അയം ഇമസ്മിം അത്ഥേ അധിപ്പേതോ ഭിക്ഖൂതി.

അനുപസമ്പന്നോ നാമ ഭിക്ഖുഞ്ച ഭിക്ഖുനിഞ്ച ഠപേത്വാ, അവസേസോ അനുപസമ്പന്നോ നാമ.

[പാരാ. ൧൯൮] ഉത്തരിമനുസ്സധമ്മോ നാമ ഝാനം, വിമോക്ഖോ, സമാധി, സമാപത്തി, ഞാണദസ്സനം, മഗ്ഗഭാവനാ, ഫലസച്ഛികിരിയാ, കിലേസപ്പഹാനം, വിനീവരണതാ ചിത്തസ്സ, സുഞ്ഞാഗാരേ അഭിരതി.

[പാരാ. ൧൯൯] ഝാനന്തി പഠമം ഝാനം, ദുതിയം ഝാനം, തതിയം ഝാനം, ചതുത്ഥം ഝാനം.

[പാരാ. ൧൯൯] വിമോക്ഖോതി സുഞ്ഞതോ വിമോക്ഖോ, അനിമിത്തോ വിമോക്ഖോ, അപ്പണിഹിതോ വിമോക്ഖോ.

[പാരാ. ൧൯൯] സമാധീതി സുഞ്ഞതോ സമാധി, അനിമിത്തോ സമാധി, അപ്പണിഹിതോ സമാധി.

[പാരാ. ൧൯൯] സമാപത്തീതി സുഞ്ഞതാ സമാപത്തി, അനിമിത്താ സമാപത്തി, അപ്പണിഹിതാ സമാപത്തി.

[പാരാ. ൧൯൯] ഞാണദസ്സനന്തി തിസ്സോ വിജ്ജാ.

[പാരാ. ൧൯൯] മഗ്ഗഭാവനാതി ചത്താരോ സതിപട്ഠാനാ, ചത്താരോ സമ്മപ്പധാനാ, ചത്താരോ ഇദ്ധിപാദാ, പഞ്ചിന്ദ്രിയാനി, പഞ്ച ബലാനി, സത്ത ബോജ്ഝങ്ഗാ, അരിയോ അട്ഠങ്ഗികോ മഗ്ഗോ.

[പാരാ. ൧൯൯] ഫലസച്ഛികിരിയാതി സോതാപത്തിഫലസ്സ സച്ഛികിരിയാ, സകദാഗാമിഫലസ്സ സച്ഛികിരിയാ, അനാഗാമിഫലസ്സ സച്ഛികിരിയാ, അരഹത്തസ്സ [അരഹത്തഫലസ്സ (സ്യാ.)] സച്ഛികിരിയാ.

[പാരാ. ൧൯൯] കിലേസപ്പഹാനന്തി രാഗസ്സ പഹാനം, ദോസസ്സ പഹാനം, മോഹസ്സ പഹാനം.

[പാരാ. ൧൯൯] വിനീവരണതാ ചിത്തസ്സാതി രാഗാ ചിത്തം വിനീവരണതാ, ദോസാ ചിത്തം വിനീവരണതാ, മോഹാ ചിത്തം വിനീവരണതാ.

[പാരാ. ൧൯൯] സുഞ്ഞാഗാരേ അഭിരതീതി പഠമേന ഝാനേന സുഞ്ഞാഗാരേ അഭിരതി, ദുതിയേന ഝാനേന സുഞ്ഞാഗാരേ അഭിരതി, തതിയേന ഝാനേന സുഞ്ഞാഗാരേ അഭിരതി, ചതുത്ഥേന ഝാനേന സുഞ്ഞാഗാരേ അഭിരതി.

൭൧. ആരോചേയ്യാതി അനുപസമ്പന്നസ്സ – ‘‘പഠമം ഝാനം സമാപജ്ജി’’ന്തി ഭണന്തസ്സ ആപത്തി പാചിത്തിയസ്സ.

ആരോചേയ്യാതി അനുപസമ്പന്നസ്സ – ‘‘പഠമം ഝാനം സമാപജ്ജാമീ’’തി ഭണന്തസ്സ ആപത്തി പാചിത്തിയസ്സ.

ആരോചേയ്യാതി അനുപസമ്പന്നസ്സ – ‘‘പഠമം ഝാനം സമാപന്നോ’’തി ഭണന്തസ്സ ആപത്തി പാചിത്തിയസ്സ.

ആരോചേയ്യാതി അനുപസമ്പന്നസ്സ – ‘‘പഠമസ്സ ഝാനസ്സ ലാഭിമ്ഹീ’’തി ഭണന്തസ്സ ആപത്തി പാചിത്തിയസ്സ.

ആരോചേയ്യാതി അനുപസമ്പന്നസ്സ – ‘‘പഠമസ്സ ഝാനസ്സ വസിമ്ഹീ’’തി ഭണന്തസ്സ ആപത്തി പാചിത്തിയസ്സ.

ആരോചേയ്യാതി അനുപസമ്പന്നസ്സ – ‘‘പഠമം ഝാനം സച്ഛികതം മയാ’’തി ഭണന്തസ്സ ആപത്തി പാചിത്തിയസ്സ.

ആരോചേയ്യാതി അനുപസമ്പന്നസ്സ – ‘‘ദുതിയം ഝാനം… തതിയം ഝാനം… ചതുത്ഥം ഝാനം സമാപജ്ജിം, സമാപജ്ജാമി, സമാപന്നോ; ചതുത്ഥസ്സ ഝാനസ്സ ലാഭിമ്ഹി, വസിമ്ഹി; ചതുത്ഥം ഝാനം സച്ഛികതം മയാ’’തി ഭണന്തസ്സ ആപത്തി പാചിത്തിയസ്സ.

ആരോചേയ്യാതി അനുപസമ്പന്നസ്സ – ‘‘സുഞ്ഞതം വിമോക്ഖം… അനിമിത്തം വിമോക്ഖം… അപ്പണിഹിതം വിമോക്ഖം… സുഞ്ഞതം സമാധിം… അനിമിത്തം സമാധിം… അപ്പണിഹിതം സമാധിം സമാപജ്ജിം, സമാപജ്ജാമി, സമാപന്നോ; അപ്പണിഹിതസ്സ സമാധിസ്സ ലാഭിമ്ഹി, വസിമ്ഹി; അപ്പണിഹിതോ സമാധി സച്ഛികതോ മയാ’’തി ഭണന്തസ്സ ആപത്തി പാചിത്തിയസ്സ.

ആരോചേയ്യാതി അനുപസമ്പന്നസ്സ – ‘‘സുഞ്ഞതം സമാപത്തിം… അനിമിത്തം സമാപത്തിം… അപ്പണിഹിതം സമാപത്തിം സമാപജ്ജിം, സമാപജ്ജാമി, സമാപന്നോ; അപ്പണിഹിതായ സമാപത്തിയാ ലാഭിമ്ഹി, വസിമ്ഹി; അപ്പണിഹിതാ സമാപത്തി സച്ഛികതാ മയാ’’തി ഭണന്തസ്സ ആപത്തി പാചിത്തിയസ്സ.

ആരോചേയ്യാതി അനുപസമ്പന്നസ്സ – ‘‘തിസ്സോ വിജ്ജാ സമാപജ്ജിം, സമാപജ്ജാമി, സമാപന്നോ; തിസ്സന്നം വിജ്ജാനം ലാഭിമ്ഹി, വസിമ്ഹി; തിസ്സോ വിജ്ജാ സച്ഛികതാ മയാ’’തി ഭണന്തസ്സ ആപത്തി പാചിത്തിയസ്സ.

ആരോചേയ്യാതി അനുപസമ്പന്നസ്സ – ‘‘ചത്താരോ സതിപട്ഠാനേ… ചത്താരോ സമ്മപ്പധാനേ… ചത്താരോ ഇദ്ധിപാദേ സമാപജ്ജിം, സമാപജ്ജാമി, സമാപന്നോ; ചതുന്നം ഇദ്ധിപാദാനം ലാഭിമ്ഹി, വസിമ്ഹി; ചത്താരോ ഇദ്ധിപാദാ സച്ഛികതാ മയാ’’തി ഭണന്തസ്സ ആപത്തി പാചിത്തിയസ്സ.

ആരോചേയ്യാതി അനുപസമ്പന്നസ്സ – ‘‘പഞ്ചിന്ദ്രിയാനി… പഞ്ച ബലാനി സമാപജ്ജിം, സമാപജ്ജാമി, സമാപന്നോ; പഞ്ചന്നം ബലാനം ലാഭിമ്ഹി, വസിമ്ഹി; പഞ്ച ബലാനി സച്ഛികതാനി മയാ’’തി ഭണന്തസ്സ ആപത്തി പാചിത്തിയസ്സ.

ആരോചേയ്യാതി അനുപസമ്പന്നസ്സ – ‘‘സത്ത ബോജ്ഝങ്ഗേ സമാപജ്ജിം, സമാപജ്ജാമി, സമാപന്നോ; സത്തന്നം ബോജ്ഝങ്ഗാനം ലാഭിമ്ഹി, വസിമ്ഹി; സത്ത ബോജ്ഝങ്ഗാ സച്ഛികതാ മയാ’’തി ഭണന്തസ്സ ആപത്തി പാചിത്തിയസ്സ.

ആരോചേയ്യാതി അനുപസമ്പന്നസ്സ – ‘‘അരിയം അട്ഠങ്ഗികം മഗ്ഗം സമാപജ്ജിം, സമാപജ്ജാമി, സമാപന്നോ; അരിയസ്സ അട്ഠങ്ഗികസ്സ മഗ്ഗസ്സ ലാഭിമ്ഹി, വസിമ്ഹി; അരിയോ അട്ഠങ്ഗികോ മഗ്ഗോ സച്ഛികതോ മയാ’’തി ഭണന്തസ്സ ആപത്തി പാചിത്തിയസ്സ.

ആരോചേയ്യാതി അനുപസമ്പന്നസ്സ – ‘‘സോതാപത്തിഫലം… സകദാഗാമിഫലം… അനാഗാമിഫലം… അരഹത്തം സമാപജ്ജിം, സമാപജ്ജാമി, സമാപന്നോ; അരഹത്തസ്സ ലാഭിമ്ഹി, വസിമ്ഹി; അരഹത്തം [അരഹത്തഫലം (സ്യാ.)] സച്ഛികതം മയാ’’തി ഭണന്തസ്സ ആപത്തി പാചിത്തിയസ്സ.

ആരോചേയ്യാതി അനുപസമ്പന്നസ്സ – ‘‘രാഗോ മേ ചത്തോ… ദോസോ മേ ചത്തോ… മോഹോ മേ ചത്തോ, വന്തോ, മുത്തോ, പഹീനോ, പടിനിസ്സട്ഠോ, ഉക്ഖേടിതോ, സമുക്ഖേടിതോ’’തി ഭണന്തസ്സ ആപത്തി പാചിത്തിയസ്സ.

ആരോചേയ്യാതി അനുപസമ്പന്നസ്സ – ‘‘രാഗാ മേ ചിത്തം വിനീവരണം… ദോസാ മേ ചിത്ത വിനീവരണം… മോഹാ മേ ചിത്തം വിനീവരണ’’ന്തി ഭണന്തസ്സ ആപത്തി പാചിത്തിയസ്സ.

ആരോചേയ്യാതി അനുപസമ്പന്നസ്സ – ‘‘സുഞ്ഞാഗാരേ പഠമം ഝാനം… ദുതിയം ഝാനം… തതിയം ഝാനം… ചതുത്ഥം ഝാനം സമാപജ്ജിം, സമാപജ്ജാമി, സമാപന്നോ; സുഞ്ഞാഗാരേ ചതുത്ഥസ്സ ഝാനസ്സ ലാഭിമ്ഹി, വസിമ്ഹി; സുഞ്ഞാഗാരേ ചതുത്ഥം ഝാനം സച്ഛികതം മയാ’’തി ഭണന്തസ്സ ആപത്തി പാചിത്തിയസ്സ.

൭൨. ആരോചേയ്യാതി അനുപസമ്പന്നസ്സ – ‘‘പഠമഞ്ച ഝാനം ദുതിയഞ്ച ഝാനം സമാപജ്ജിം, സമാപജ്ജാമി, സമാപന്നോ; പഠമസ്സ ച ഝാനസ്സ ദുതിയസ്സ ച ഝാനസ്സ ലാഭിമ്ഹി, വസിമ്ഹി; പഠമഞ്ച ഝാനം ദുതിയഞ്ച ഝാനം സച്ഛികതം മയാ’’തി ഭണന്തസ്സ ആപത്തി പാചിത്തിയസ്സ.

ആരോചേയ്യാതി അനുപസമ്പന്നസ്സ – ‘‘പഠമഞ്ച ഝാനം തതിയഞ്ച ഝാനം… പഠമഞ്ച ഝാനം ചതുത്ഥഞ്ച ഝാനം സമാപജ്ജിം, സമാപജ്ജാമി, സമാപന്നോ; പഠമസ്സ ച ഝാനസ്സ ചതുത്ഥസ്സ ച ഝാനസ്സ ലാഭിമ്ഹി, വസിമ്ഹി; പഠമഞ്ച ഝാനം ചതുത്ഥഞ്ച ഝാനം സച്ഛികതം മയാ’’തി ഭണന്തസ്സ ആപത്തി പാചിത്തിയസ്സ.

ആരോചേയ്യാതി അനുപസമ്പന്നസ്സ – ‘‘പഠമഞ്ച ഝാനം സുഞ്ഞതഞ്ച വിമോക്ഖം… അനിമിത്തഞ്ച വിമോക്ഖം… അപ്പണിഹിതഞ്ച വിമോക്ഖം… സുഞ്ഞതഞ്ച സമാധിം… അനിമിത്തഞ്ച സമാധിം… അപ്പണിഹിതഞ്ച സമാധിം സമാപജ്ജിം, സമാപജ്ജാമി, സമാപന്നോ; പഠമസ്സ ച ഝാനസ്സ അപ്പണിഹിതസ്സ ച സമാധിസ്സ ലാഭിമ്ഹി, വസിമ്ഹി; പഠമഞ്ച ഝാനം അപ്പണിഹിതോ ച സമാധി സച്ഛികതോ മയാ’’തി ഭണന്തസ്സ ആപത്തി പാചിത്തിയസ്സ.

ആരോചേയ്യാതി അനുപസമ്പന്നസ്സ – ‘‘പഠമഞ്ച ഝാനം സുഞ്ഞതഞ്ച സമാപത്തിം… അനിമിത്തഞ്ച സമാപത്തിം… അപ്പണിഹിതഞ്ച സമാപത്തിം സമാപജ്ജിം, സമാപജ്ജാമി, സമാപന്നോ; പഠമസ്സ ച ഝാനസ്സ അപ്പണിഹിതായ ച സമാപത്തിയാ ലാഭിമ്ഹി, വസിമ്ഹി; പഠമഞ്ച ഝാനം അപ്പണിഹിതാ ച സമാപത്തി സച്ഛികതാ മയാ’’തി ഭണന്തസ്സ ആപത്തി പാചിത്തിയസ്സ.

ആരോചേയ്യാതി അനുപസമ്പന്നസ്സ – ‘‘പഠമഞ്ച ഝാനം തിസ്സോ ച വിജ്ജാ സമാപജ്ജിം, സമാപജ്ജാമി, സമാപന്നോ; പഠമസ്സ ച ഝാനസ്സ തിസ്സന്നഞ്ച വിജ്ജാനം ലാഭിമ്ഹി, വസിമ്ഹി; പഠമഞ്ച ഝാനം തിസ്സോ ച വിജ്ജാ സച്ഛികതാ മയാ’’തി ഭണന്തസ്സ ആപത്തി പാചിത്തിയസ്സ.

ആരോചേയ്യാതി അനുപസമ്പന്നസ്സ – ‘‘പഠമഞ്ച ഝാനം ചത്താരോ ച സതിപട്ഠാനേ…പേ… ചത്താരോ ച സമ്മപ്പധാനേ… ചത്താരോ ച ഇദ്ധിപാദേ സമാപജ്ജിം, സമാപജ്ജാമി, സമാപന്നോ; പഠമസ്സ ച ഝാനസ്സ ചതുന്നഞ്ച ഇദ്ധിപാദാനം ലാഭിമ്ഹി, വസിമ്ഹി; പഠമഞ്ച ഝാനം ചത്താരോ ച ഇദ്ധിപാദാ സച്ഛികതാ മയാ’’തി ഭണന്തസ്സ ആപത്തി പാചിത്തിയസ്സ.

ആരോചേയ്യാതി അനുപസമ്പന്നസ്സ – ‘‘പഠമഞ്ച ഝാനം, പഞ്ച ച ഇന്ദ്രിയാനി… പഞ്ച ച ബലാനി സമാപജ്ജിം, സമാപജ്ജാമി, സമാപന്നോ; പഠമസ്സ ച ഝാനസ്സ പഞ്ചന്നഞ്ച ബലാനം ലാഭിമ്ഹി, വസിമ്ഹി; പഠമഞ്ച ഝാനം പഞ്ച ച ബലാനി സച്ഛികതാനി മയാ’’തി ഭണന്തസ്സ ആപത്തി പാചിത്തിയസ്സ.

ആരോചേയ്യാതി അനുപസമ്പന്നസ്സ – ‘‘പഠമഞ്ച ഝാനം സത്ത ച ബോജ്ഝങ്ഗേ സമാപജ്ജിം, സമാപജ്ജാമി, സമാപന്നോ; പഠമസ്സ ച ഝാനസ്സ സത്തന്നഞ്ച ബോജ്ഝങ്ഗാനം ലാഭിമ്ഹി, വസിമ്ഹി; പഠമഞ്ച ഝാനം സത്ത ച ബോജ്ഝങ്ഗാ സച്ഛികതാ മയാ’’തി ഭണന്തസ്സ ആപത്തി പാചിത്തിയസ്സ.

ആരോചേയ്യാതി അനുപസമ്പന്നസ്സ – ‘‘പഠമഞ്ച ഝാനം അരിയഞ്ച അട്ഠങ്ഗികം മഗ്ഗം സമാപജ്ജിം, സമാപജ്ജാമി, സമാപന്നോ; പഠമസ്സ ച ഝാനസ്സ അരിയസ്സ ച അട്ഠങ്ഗികസ്സ മഗ്ഗസ്സ ലാഭിമ്ഹി, വസിമ്ഹി; പഠമഞ്ച ഝാനം അരിയോ ച അട്ഠങ്ഗികോ മഗ്ഗോ സച്ഛികതോ മയാ’’തി ഭണന്തസ്സ ആപത്തി പാചിത്തിയസ്സ.

ആരോചേയ്യാതി അനുപസമ്പന്നസ്സ – ‘‘പഠമഞ്ച ഝാനം സോതാപത്തിഫലഞ്ച… സകദാഗാമിഫലഞ്ച… അനാഗാമിഫലഞ്ച… അരഹത്തഞ്ച [അരഹത്തഫലഞ്ച (സ്യാ.)] സമാപജ്ജിം, സമാപജ്ജാമി, സമാപന്നോ; പഠമസ്സ ച ഝാനസ്സ അരഹത്തസ്സ [അരഹത്തഫലസ്സ (സ്യാ.)] ച ലാഭിമ്ഹി, വസിമ്ഹി; പഠമഞ്ച ഝാനം അരഹത്തഞ്ച സച്ഛികതം മയാ’’തി ഭണന്തസ്സ ആപത്തി പാചിത്തിയസ്സ.

ആരോചേയ്യാതി അനുപസമ്പന്നസ്സ – ‘‘പഠമഞ്ച ഝാനം സമാപജ്ജിം, സമാപജ്ജാമി, സമാപന്നോ… രാഗോ ച മേ ചത്തോ… ദോസോ ച മേ ചത്തോ… മോഹോ ച മേ ചത്തോ, വന്തോ, മുത്തോ, പഹീനോ, പടിനിസ്സട്ഠോ, ഉക്ഖേടിതോ, സമുക്ഖേടിതോ’’തി ഭണന്തസ്സ ആപത്തി പാചിത്തിയസ്സ.

ആരോചേയ്യാതി അനുപസമ്പന്നസ്സ – ‘‘പഠമഞ്ച ഝാനം സമാപജ്ജിം, സമാപജ്ജാമി, സമാപന്നോ… രാഗാ ച മേ ചിത്തം വിനീവരണം… ദോസാ ച മേ ചിത്തം വിനീവരണം… മോഹാ ച മേ ചിത്തം വിനീവരണ’’ന്തി ഭണന്തസ്സ ആപത്തി പാചിത്തിയസ്സ.

൭൩. ആരോചേയ്യാതി അനുപസമ്പന്നസ്സ – ‘‘ദുതിയഞ്ച ഝാനം തതിയഞ്ച ഝാനം… ദുതിയഞ്ച ഝാനം ചതുത്ഥഞ്ച ഝാനം സമാപജ്ജിം, സമാപജ്ജാമി, സമാപന്നോ; ദുതിയസ്സ ച ഝാനസ്സ ചതുത്ഥസ്സ ച ഝാനസ്സ ലാഭിമ്ഹി, വസിമ്ഹി; ദുതിയഞ്ച ഝാനം ചതുത്ഥഞ്ച ഝാനം സച്ഛികതം മയാ’’തി ഭണന്തസ്സ ആപത്തി പാചിത്തിയസ്സ.

ആരോചേയ്യാതി അനുപസമ്പന്നസ്സ – ‘‘ദുതിയഞ്ച ഝാനം സുഞ്ഞതഞ്ച വിമോക്ഖം…പേ… മോഹാ ച മേ ചിത്തം വിനീവരണ’’ന്തി ഭണന്തസ്സ ആപത്തി പാചിത്തിയസ്സ.

ആരോചേയ്യാതി അനുപസമ്പന്നസ്സ – ‘‘ദുതിയഞ്ച ഝാനം പഠമഞ്ച ഝാനം സമാപജ്ജിം, സമാപജ്ജാമി, സമാപന്നോ; ദുതിയസ്സ ച ഝാനസ്സ പഠമസ്സ ച ഝാനസ്സ ലാഭിമ്ഹി, വസിമ്ഹി; ദുതിയഞ്ച ഝാനം പഠമഞ്ച ഝാനം സച്ഛികതം മയാ’’തി ഭണന്തസ്സ ആപത്തി പാചിത്തിയസ്സ…പേ….

മൂലം സംഖിത്തം.

ആരോചേയ്യാതി അനുപസമ്പന്നസ്സ – ‘‘മോഹാ ച മേ ചിത്തം വിനീവരണം, പഠമഞ്ച ഝാനം സമാപജ്ജിം, സമാപജ്ജാമി, സമാപന്നോ; മോഹാ ച മേ ചിത്തം വിനീവരണം, പഠമസ്സ ച ഝാനസ്സ ലാഭിമ്ഹി, വസിമ്ഹി; മോഹാ ച മേ ചിത്തം വിനീവരണം, പഠമഞ്ച ഝാനം സച്ഛികതം മയാ’’തി ഭണന്തസ്സ ആപത്തി പാചിത്തിയസ്സ…പേ….

ആരോചേയ്യാതി അനുപസമ്പന്നസ്സ – ‘‘മോഹാ ച മേ ചിത്തം വിനീവരണം, ദോസാ ച മേ ചിത്തം വിനീവരണ’’ന്തി ഭണന്തസ്സ ആപത്തി പാചിത്തിയസ്സ…പേ….

ആരോചേയ്യാതി അനുപസമ്പന്നസ്സ – ‘‘പഠമഞ്ച ഝാനം ദുതിയഞ്ച ഝാനം തതിയഞ്ച ഝാനം ചതുത്ഥഞ്ച ഝാനം സുഞ്ഞതഞ്ച വിമോക്ഖം അനിമിത്തഞ്ച വിമോക്ഖം അപ്പണിഹിതഞ്ച വിമോക്ഖം സുഞ്ഞതഞ്ച സമാധിം അനിമിത്തഞ്ച സമാധിം അപ്പണിഹിതഞ്ച സമാധിം സുഞ്ഞതഞ്ച സമാപത്തിം അനിമിത്തഞ്ച സമാപത്തിം അപ്പണിഹിതഞ്ച സമാപത്തിം തിസ്സോ ച വിജ്ജാ ചത്താരോ ച സതിപട്ഠാനേ ചത്താരോ ച സമ്മപ്പധാനേ ചത്താരോ ച ഇദ്ധിപാദേ പഞ്ച ച ഇന്ദ്രിയാനി പഞ്ച ച ബലാനി സത്ത ച ബോജ്ഝങ്ഗേ അരിയഞ്ച അട്ഠങ്ഗികം മഗ്ഗം സോതാപത്തിഫലഞ്ച സകദാഗാമിഫലഞ്ച അനാഗാമിഫലഞ്ച അരഹത്തഞ്ച [അരഹത്തഫലഞ്ച (സ്യാ.)] സമാപജ്ജിം…പേ… രാഗോ ച മേ ചത്തോ, ദോസോ ച മേ ചത്തോ, മോഹോ ച മേ ചത്തോ, വന്തോ, മുത്തോ, പഹീനോ, പടിനിസ്സട്ഠോ, ഉക്ഖേടിതോ സമുക്ഖേടിതോ, രാഗാ ച മേ ചിത്തം വിനീവരണം, ദോസാ ച മേ ചിത്തം വിനീവരണം, മോഹാ ച മേ ചിത്തം വിനീവരണ’’ന്തി ഭണന്തസ്സ ആപത്തി പാചിത്തിയസ്സ.

൭൪. ആരോചേയ്യാതി അനുപസമ്പന്നസ്സ – ‘‘പഠമം ഝാനം സമാപജ്ജി’’ന്തി വത്തുകാമോ ‘‘ദുതിയം ഝാനം സമാപജ്ജി’’ന്തി ഭണന്തസ്സ പടിവിജാനന്തസ്സ ആപത്തി പാചിത്തിയസ്സ, ന പടിവിജാനന്തസ്സ ആപത്തി ദുക്കടസ്സ.

ആരോചേയ്യാതി അനുപസമ്പന്നസ്സ – ‘‘പഠമം ഝാനം സമാപജ്ജി’’ന്തി വത്തുകാമോ ‘‘തതിയം ഝാനം…പേ… ചതുത്ഥം ഝാനം, സുഞ്ഞതം വിമോക്ഖം, അനിമിത്തം വിമോക്ഖം, അപ്പണിഹിതം വിമോക്ഖം, സുഞ്ഞതം സമാധിം, അനിമിത്തം സമാധിം, അപ്പണിഹിതം സമാധിം, സുഞ്ഞതം സമാപത്തിം, അനിമിത്തം സമാപത്തിം, അപ്പണിഹിതം സമാപത്തിം, തിസ്സോ വിജ്ജാ, ചത്താരോ സതിപട്ഠാനേ, ചത്താരോ സമ്മപ്പധാനേ, ചത്താരോ ഇദ്ധിപാദേ, പഞ്ചിന്ദ്രിയാനി, പഞ്ച ബലാനി, സത്ത ബോജ്ഝങ്ഗേ, അരിയം അട്ഠങ്ഗികം മഗ്ഗം, സോതാപത്തിഫലം, സകദാഗാമിഫലം, അനാഗാമിഫലം, അരഹത്തം [അരഹത്തഫലം (സ്യാ.)] സമാപജ്ജിം…പേ… രാഗോ മേ ചത്തോ, ദോസോ മേ ചത്തോ, മോഹോ മേ ചത്തോ, വന്തോ, മുത്തോ, പഹീനോ; പടിനിസ്സട്ഠോ, ഉക്ഖേടിതോ, സമുക്ഖേടിതോ; രാഗാ മേ ചിത്തം വിനീവരണം, ദോസാ മേ ചിത്തം വിനീവരണം, മോഹാ മേ ചിത്തം വിനീവരണ’’ന്തി ഭണന്തസ്സ പടിവിജാനന്തസ്സ ആപത്തി പാചിത്തിയസ്സ, ന പടിവിജാനന്തസ്സ ആപത്തി ദുക്കടസ്സ.

ആരോചേയ്യാതി അനുപസമ്പന്നസ്സ – ‘‘ദുതിയം ഝാനം സമാപജ്ജി’’ന്തി വത്തുകാമോ…പേ… ‘‘മോഹാ മേ ചിത്തം വിനീവരണ’’ന്തി ഭണന്തസ്സ പടിവിജാനന്തസ്സ ആപത്തി പാചിത്തിയസ്സ, ന പടിവിജാനന്തസ്സ ആപത്തി ദുക്കടസ്സ…പേ….

ആരോചേയ്യാതി അനുപസമ്പന്നസ്സ – ‘‘ദുതിയം ഝാനം സമാപജ്ജി’’ന്തി വത്തുകാമോ – ‘‘പഠമം ഝാനം സമാപജ്ജി’’ന്തി ഭണന്തസ്സ പടിവിജാനന്തസ്സ ആപത്തി പാചിത്തിയസ്സ, ന പടിവിജാനന്തസ്സ ആപത്തി ദുക്കടസ്സ…പേ….

മൂലം സംഖിത്തം.

ആരോചേയ്യാതി അനുപസമ്പന്നസ്സ – ‘‘മോഹാ മേ ചിത്തം വിനീവരണ’’ന്തി വത്തുകാമോ – ‘‘പഠമം ഝാനം സമാപജ്ജി’’ന്തി ഭണന്തസ്സ പടിവിജാനന്തസ്സ ആപത്തി പാചിത്തിയസ്സ, ന പടിവിജാനന്തസ്സ ആപത്തി ദുക്കടസ്സ…പേ….

ആരോചേയ്യാതി അനുപസമ്പന്നസ്സ – ‘‘മോഹാ മേ ചിത്തം വിനീവരണ’’ന്തി വത്തുകാമോ – ‘‘ദോസാ മേ ചിത്തം വിനീവരണ’’ന്തി ഭണന്തസ്സ പടിവിജാനന്തസ്സ ആപത്തി പാചിത്തിയസ്സ, ന പടിവിജാനന്തസ്സ ആപത്തി ദുക്കടസ്സ…പേ….

ആരോചേയ്യാതി അനുപസമ്പന്നസ്സ – ‘‘പഠമഞ്ച ഝാനം ദുതിയഞ്ച ഝാനം തതിയഞ്ച ഝാനം ചതുത്ഥഞ്ച ഝാനം …പേ… ദോസാ ച മേ ചിത്തം വിനീവരണ’’ന്തി വത്തുകാമോ – ‘‘മോഹാ മേ ചിത്തം വിനീവരണ’’ന്തി ഭണന്തസ്സ പടിവിജാനന്തസ്സ ആപത്തി പാചിത്തിയസ്സ, ന പടിവിജാനന്തസ്സ ആപത്തി ദുക്കടസ്സ.

ആരോചേയ്യാതി അനുപസമ്പന്നസ്സ – ‘‘ദുതിയഞ്ച ഝാനം തതിയഞ്ച ഝാനം ചതുത്ഥഞ്ച ഝാനം…പേ… മോഹാ ച മേ ചിത്തം വിനീവരണ’’ന്തി വത്തുകാമോ – ‘‘പഠമം ഝാനം സമാപജ്ജി’’ന്തി ഭണന്തസ്സ പടിവിജാനന്തസ്സ ആപത്തി പാചിത്തിയസ്സ, ന പടിവിജാനന്തസ്സ ആപത്തി ദുക്കടസ്സ…പേ….

൭൫. ആരോചേയ്യാതി അനുപസമ്പന്നസ്സ – ‘‘യോ തേ വിഹാരേ വസി സോ ഭിക്ഖു പഠമം ഝാനം സമാപജ്ജി, സമാപജ്ജതി, സമാപന്നോ; സോ ഭിക്ഖു പഠമസ്സ ഝാനസ്സ ലാഭീ, വസീ; തേന ഭിക്ഖുനാ പഠമം ഝാനം സച്ഛികത’’ന്തി ഭണന്തസ്സ ആപത്തി ദുക്കടസ്സ.

ആരോചേയ്യാതി അനുപസമ്പന്നസ്സ – ‘‘യോ തേ വിഹാരേ വസി സോ ഭിക്ഖു ദുതിയം ഝാനം…പേ… തതിയം ഝാനം ചതുത്ഥം ഝാനം സമാപജ്ജി, സമാപജ്ജതി, സമാപന്നോ; സോ ഭിക്ഖു ചതുത്ഥസ്സ ഝാനസ്സ ലാഭീ, വസീ; തേന ഭിക്ഖുനാ ചതുത്ഥം ഝാനം സച്ഛികത’’ന്തി ഭണന്തസ്സ ആപത്തി ദുക്കടസ്സ.

ആരോചേയ്യാതി അനുപസമ്പന്നസ്സ – ‘‘യോ തേ വിഹാരേ വസി സോ ഭിക്ഖു സുഞ്ഞതം വിമോക്ഖം…പേ… അനിമിത്തം വിമോക്ഖം അപ്പണിഹിതം വിമോക്ഖം സുഞ്ഞതം സമാധിം അനിമിത്തം സമാധിം അപ്പണിഹിതം സമാധിം സമാപജ്ജി, സമാപജ്ജതി, സമാപന്നോ; സോ ഭിക്ഖു അപ്പണിഹിതസ്സ സമാധിസ്സ ലാഭീ, വസീ; തേന ഭിക്ഖുനാ അപ്പണിഹിതോ സമാധി സച്ഛികതോ’’തി ഭണന്തസ്സ ആപത്തി ദുക്കടസ്സ.

ആരോചേയ്യാതി അനുപസമ്പന്നസ്സ – ‘‘യോ തേ വിഹാരേ വസി സോ ഭിക്ഖു സുഞ്ഞതം സമാപത്തിം…പേ… അനിമിത്തം സമാപത്തിം അപ്പണിഹിതം സമാപത്തിം സമാപജ്ജി, സമാപജ്ജതി, സമാപന്നോ; അപ്പണിഹിതായ സമാപത്തിയാ ലാഭീ, വസീ; തേന ഭിക്ഖുനാ അപ്പണിഹിതാ സമാപത്തി സച്ഛികതാ’’തി ഭണന്തസ്സ ആപത്തി ദുക്കടസ്സ.

ആരോചേയ്യാതി അനുപസമ്പന്നസ്സ – ‘‘യോ തേ വിഹാരേ വസി സോ ഭിക്ഖു തിസ്സോ വിജ്ജാ …പേ… ചത്താരോ സതിപട്ഠാനേ, ചത്താരോ സമ്മപ്പധാനേ, ചത്താരോ ഇദ്ധിപാദേ, പഞ്ചിന്ദ്രിയാനി, പഞ്ച ബലാനി, സത്ത ബോഝങ്ഗേ, അരിയം അട്ഠങ്ഗികം മഗ്ഗം, സോതാപത്തിഫലം, സകദാഗാമിഫലം, അനാഗാമിഫലം, അരഹത്തം [അരഹത്തഫലം (സ്യാ.)] സമാപജ്ജി…പേ… സമാപജ്ജതി, സമാപന്നോ…പേ… തസ്സ ഭിക്ഖുനോ രാഗോ ചത്തോ, ദോസോ ചത്തോ, മോഹോ ചത്തോ, വന്തോ, മുത്തോ, പഹീനോ, പടിനിസ്സട്ഠോ, ഉക്ഖേടിതോ, സമുക്ഖേടിതോ; തസ്സ ഭിക്ഖുനോ രാഗാ ചിത്തം വിനീവരണം, ദോസാ ചിത്തം വിനീവരണം, മോഹാ ചിത്തം വിനീവരണ’’ന്തി ഭണന്തസ്സ ആപത്തി ദുക്കടസ്സ.

ആരോചേയ്യാതി അനുപസമ്പന്നസ്സ – ‘‘യോ തേ വിഹാരേ വസി സോ ഭിക്ഖു സുഞ്ഞാഗാരേ പഠമം ഝാനം…പേ… ദുതിയം ഝാനം തതിയം ഝാനം ചതുത്ഥം ഝാനം സമാപജ്ജി, സമാപജ്ജതി, സമാപന്നോ; സോ ഭിക്ഖു സുഞ്ഞാഗാരേ ചതുത്ഥസ്സ ഝാനസ്സ ലാഭീ, വസീ; തേന ഭിക്ഖുനാ സുഞ്ഞാഗാരേ ചതുത്ഥം ഝാനം സച്ഛികത’’ന്തി ഭണന്തസ്സ ആപത്തി ദുക്കടസ്സ.

ആരോചേയ്യാതി അനുപസമ്പന്നസ്സ – ‘‘യോ തേ ചീവരം പരിഭുഞ്ജി, യോ തേ പിണ്ഡപാതം പരിഭുഞ്ജി, യോ തേ സേനാസനം പരിഭുഞ്ജി, യോ തേ ഗിലാനപ്പച്ചയഭേസജ്ജപരിക്ഖാരം പരിഭുഞ്ജി സോ ഭിക്ഖു സുഞ്ഞാഗാരേ ചതുത്ഥം ഝാനം സമാപജ്ജി, സമാപജ്ജതി, സമാപന്നോ; സോ ഭിക്ഖു സുഞ്ഞാഗാരേ ചതുത്ഥസ്സ ഝാനസ്സ ലാഭീ, വസീ; തേന ഭിക്ഖുനാ സുഞ്ഞാഗാരേ ചതുത്ഥം ഝാനം സച്ഛികത’’ന്തി ഭണന്തസ്സ ആപത്തി ദുക്കടസ്സ.

൭൬. ആരോചേയ്യാതി അനുപസമ്പന്നസ്സ – ‘‘യേന തേ വിഹാരോ പരിഭുത്തോ…പേ… യേന തേ ചീവരം പരിഭുത്തം, യേന തേ പിണ്ഡപാതോ പരിഭുത്തോ, യേന തേ സേനാസനം പരിഭുത്തം, യേന തേ ഗിലാനപ്പച്ചയഭേസജ്ജപരിക്ഖാരോ പരിഭുത്തോ സോ ഭിക്ഖു സുഞ്ഞാഗാരേ ചതുത്ഥം ഝാനം സമാപജ്ജി, സമാപജ്ജതി, സമാപന്നോ; സോ ഭിക്ഖു സുഞ്ഞാഗാരേ ചതുത്ഥസ്സ ഝാനസ്സ ലാഭീ, വസീ; തേന ഭിക്ഖുനാ സുഞ്ഞാഗാരേ ചതുത്ഥം ഝാനം സച്ഛികത’’ന്തി ഭണന്തസ്സ ആപത്തി ദുക്കടസ്സ.

ആരോചേയ്യാതി അനുപസമ്പന്നസ്സ – ‘‘യം ത്വം ആഗമ്മ വിഹാരം അദാസി…പേ… ചീവരം അദാസി, പിണ്ഡപാതം അദാസി, സേനാസനം അദാസി, ഗിലാനപ്പച്ചയഭേസജ്ജപരിക്ഖാരം അദാസി സോ ഭിക്ഖു സുഞ്ഞാഗാരേ ചതുത്ഥം ഝാനം സമാപജ്ജി, സമാപജ്ജതി, സമാപന്നോ; സോ ഭിക്ഖു സുഞ്ഞാഗാരേ ചതുത്ഥസ്സ ഝാനസ്സ ലാഭീ, വസീ; തേന ഭിക്ഖുനാ സുഞ്ഞാഗാരേ ചതുത്ഥം ഝാനം സച്ഛികത’’ന്തി ഭണന്തസ്സ ആപത്തി ദുക്കടസ്സ.

൭൭. അനാപത്തി ഉപസമ്പന്നസ്സ, ഭൂതം ആരോചേതി, ആദികമ്മികസ്സാതി.

ഭൂതാരോചനസിക്ഖാപദം നിട്ഠിതം അട്ഠമം.