൨൭൦. തസ്സുദ്ദാനം

ചമ്പായം ഭഗവാ ആസി, വത്ഥു വാസഭഗാമകേ;

ആഗന്തുകാനമുസ്സുക്കം, അകാസി ഇച്ഛിതബ്ബകേ [ഇച്ഛിതബ്ബകോ (ക.)].

പകതഞ്ഞുനോതി ഞത്വാ, ഉസ്സുക്കം ന കരീ തദാ;

ഉക്ഖിത്തോ ന കരോതീതി, സാഗമാ ജിനസന്തികേ.

അധമ്മേന വഗ്ഗകമ്മം, സമഗ്ഗം അധമ്മേന ച;

ധമ്മേന വഗ്ഗകമ്മഞ്ച, പതിരൂപകേന വഗ്ഗികം.

പതിരൂപകേന സമഗ്ഗം, ഏകോ ഉക്ഖിപതേകകം;

ഏകോ ച ദ്വേ സമ്ബഹുലേ, സങ്ഘം ഉക്ഖിപതേകകോ.

ദുവേപി സമ്ബഹുലാപി, സങ്ഘോ സങ്ഘഞ്ച ഉക്ഖിപി;

സബ്ബഞ്ഞുപവരോ സുത്വാ, അധമ്മന്തി പടിക്ഖിപി.

ഞത്തിവിപന്നം യം കമ്മം, സമ്പന്നം അനുസാവനം;

അനുസ്സാവനവിപന്നം, സമ്പന്നം ഞത്തിയാ ച യം.

ഉഭയേന വിപന്നഞ്ച, അഞ്ഞത്ര ധമ്മമേവ ച;

വിനയാ സത്ഥു പടികുട്ഠം, കുപ്പം അട്ഠാനാരഹികം.

അധമ്മവഗ്ഗം സമഗ്ഗം, ധമ്മ പതിരൂപാനി യേ ദുവേ;

ധമ്മേനേവ ച സാമഗ്ഗിം, അനുഞ്ഞാസി തഥാഗതോ.

ചതുവഗ്ഗോ പഞ്ചവഗ്ഗോ, ദസവഗ്ഗോ ച വീസതി;

പരോവീസതിവഗ്ഗോ ച [അതിരേകവീസതിവഗ്ഗോ (സ്യാ.)], സങ്ഘോ പഞ്ചവിധോ തഥാ.

ഠപേത്വാ ഉപസമ്പദം, യഞ്ച കമ്മം പവാരണം;

അബ്ഭാനകമ്മേന സഹ, ചതുവഗ്ഗേഹി കമ്മികോ.

ദുവേ കമ്മേ ഠപേത്വാന, മജ്ഝദേസൂപസമ്പദം;

അബ്ഭാനം പഞ്ചവഗ്ഗികോ, സബ്ബകമ്മേസു കമ്മികോ.

അബ്ഭാനേകം ഠപേത്വാന, യേ ഭിക്ഖൂ ദസവഗ്ഗികാ;

സബ്ബകമ്മകരോ സങ്ഘോ, വീസോ സബ്ബത്ഥ കമ്മികോ.

ഭിക്ഖുനീ സിക്ഖമാനാ, ച സാമണേരോ സാമണേരീ;

പച്ചക്ഖാതന്തിമവത്ഥൂ, ഉക്ഖിത്താപത്തിദസ്സനേ.

അപ്പടികമ്മേ ദിട്ഠിയാ, പണ്ഡകോ ഥേയ്യസംവാസകം;

തിത്ഥിയാ തിരച്ഛാനഗതം, മാതു പിതു ച ഘാതകം.

അരഹം ഭിക്ഖുനീദൂസി, ഭേദകം ലോഹിതുപ്പാദം;

ബ്യഞ്ജനം നാനാസംവാസം, നാനാസീമായ ഇദ്ധിയാ.

യസ്സ സങ്ഘോ കരേ കമ്മം, ഹോന്തേതേ ചതുവീസതി;

സമ്ബുദ്ധേന പടിക്ഖിത്താ, ന ഹേതേ ഗണപൂരകാ.

പാരിവാസികചതുത്ഥോ, പരിവാസം ദദേയ്യ വാ;

മൂലാ മാനത്തമബ്ഭേയ്യ, അകമ്മം ന ച കരണം.

മൂലാ അരഹമാനത്താ, അബ്ഭാനാരഹമേവ ച;

ന കമ്മകാരകാ പഞ്ച, സമ്ബുദ്ധേന പകാസിതാ.

ഭിക്ഖുനീ സിക്ഖമാനാ ച, സാമണേരോ സാമണേരികാ;

പച്ചക്ഖന്തിമഉമ്മത്താ, ഖിത്താവേദനദസ്സനേ.

അപ്പടികമ്മേ ദിട്ഠിയാ, പണ്ഡകാപി ച ബ്യഞ്ജനാ [ഇതോ പരം സ്യാമമൂലേ ദിയഡ്ഢഗാഥാഹി അഭബ്ബപുഗ്ഗലാ സമത്തം ദസ്സിതാ];

നാനാസംവാസകാ സീമാ, വേഹാസം യസ്സ കമ്മ ച.

അട്ഠാരസന്നമേതേസം, പടിക്കോസം ന രുഹതി;

ഭിക്ഖുസ്സ പകതത്തസ്സ, രുഹതി പടിക്കോസനാ.

സുദ്ധസ്സ ദുന്നിസാരിതോ, ബാലോ ഹി സുനിസ്സാരിതോ;

പണ്ഡകോ ഥേയ്യസംവാസോ, പക്കന്തോ തിരച്ഛാനഗതോ.

മാതു പിതു അരഹന്ത, ദൂസകോ സങ്ഘഭേദകോ;

ലോഹിതുപ്പാദകോ ചേവ, ഉഭതോബ്യഞ്ജനോ ച യോ.

ഏകാദസന്നം ഏതേസം, ഓസാരണം ന യുജ്ജതി;

ഹത്ഥപാദം തദുഭയം, കണ്ണനാസം തദൂഭയം.

അങ്ഗുലി അളകണ്ഡരം, ഫണം ഖുജ്ജോ ച വാമനോ;

ഗണ്ഡീ ലക്ഖണകസാ, ച ലിഖിതകോ ച സീപദീ.

പാപാ പരിസകാണോ ച, കുണീ ഖഞ്ജോ ഹതോപി ച;

ഇരിയാപഥദുബ്ബലോ, അന്ധോ മൂഗോ ച ബധിരോ.

അന്ധമൂഗന്ധബധിരോ മൂഗബധിരമേവ ച;

അന്ധമൂഗബധിരോ ച, ദ്വത്തിംസേതേ അനൂനകാ.

തേസം ഓസാരണം ഹോതി, സമ്ബുദ്ധേന പകാസിതം;

ദട്ഠബ്ബാ പടികാതബ്ബാ, നിസ്സജ്ജേതാ ന വിജ്ജതി.

തസ്സ ഉക്ഖേപനാ കമ്മാ, സത്ത ഹോന്തി അധമ്മികാ;

ആപന്നം അനുവത്തന്തം, സത്ത തേപി അധമ്മികാ.

ആപന്നം നാനുവത്തന്തം, സത്ത കമ്മാ സുധമ്മികാ;

സമ്മുഖാ പടിപുച്ഛാ ച, പടിഞ്ഞായ ച കാരണാ.

സതി അമൂള്ഹപാപികാ, തജ്ജനീനിയസ്സേന ച;

പബ്ബാജനീയ പടിസാരോ, ഉക്ഖേപപരിവാസ ച.

മൂലാ മാനത്തഅബ്ഭാനാ, തഥേവ ഉപസമ്പദാ;

അഞ്ഞം കരേയ്യ അഞ്ഞസ്സ, സോളസേതേ അധമ്മികാ.

തം തം കരേയ്യ തം തസ്സ, സോളസേതേ സുധമ്മികാ;

പച്ചാരോപേയ്യ അഞ്ഞഞ്ഞം, സോളസേതേ അധമ്മികാ.

ദ്വേ ദ്വേ തമ്മൂലകം തസ്സ [ദ്വേ ദ്വേ മൂലാ കതാ കസ്സ (സ്യാ.), ദോദോതമൂലകന്തസ്സ (ക.)], തേപി സോളസ ധമ്മികാ;

ഏകേകമൂലകം ചക്കം, ‘‘അധമ്മ’’ന്തി ജിനോബ്രവി.

അകാസി തജ്ജനീയം കമ്മം, സങ്ഘോ ഭണ്ഡനകാരകോ;

അധമ്മേന വഗ്ഗകമ്മം, അഞ്ഞം ആവാസം ഗച്ഛി സോ.

തത്ഥാധമ്മേന സമഗ്ഗാ, തസ്സ തജ്ജനീയം കരും;

അഞ്ഞത്ഥ വഗ്ഗാധമ്മേന, തസ്സ തജ്ജനീയം കരും.

പതിരൂപേന വഗ്ഗാപി, സമഗ്ഗാപി തഥാ കരും;

അധമ്മേന സമഗ്ഗാ ച, ധമ്മേന വഗ്ഗമേവ ച.

പതിരൂപകേന വഗ്ഗാ ച, സമഗ്ഗാ ച ഇമേ പദാ;

ഏകേകമൂലകം കത്വാ, ചക്കം ബന്ധേ വിചക്ഖണോ.

ബാലാ ബ്യത്തസ്സ നിയസ്സം, പബ്ബാജേ കുലദൂസകം;

പടിസാരണീയം കമ്മം, കരേ അക്കോസകസ്സ ച.

അദസ്സനാപ്പടികമ്മേ, യോ ച ദിട്ഠിം ന നിസ്സജ്ജേ;

തേസം ഉക്ഖേപനീയകമ്മം, സത്ഥവാഹേന ഭാസിതം.

ഉപരി നയകമ്മാനം [ഉപവിനയകമ്മാനം (സ്യാ.), ഉക്ഖേപനീയകമ്മാനം (ക.)] പഞ്ഞോ തജ്ജനീയം നയേ;

തേസംയേവ അനുലോമം, സമ്മാ വത്തതി യാചിതേ [യാചതി (സ്യാ.), യാചിതോ (സീ.)].

പസ്സദ്ധി തേസം കമ്മാനം, ഹേട്ഠാ കമ്മനയേന ച;

തസ്മിം തസ്മിം തു കമ്മേസു, തത്രട്ഠോ ച വിവദതി.

അകതം ദുക്കടഞ്ചേവ, പുനകാതബ്ബകന്തി ച;

കമ്മേ പസ്സദ്ധിയാ ചാപി, തേ ഭിക്ഖൂ ധമ്മവാദിനോ.

വിപത്തിബ്യാധിതേ ദിസ്വാ, കമ്മപ്പത്തേ മഹാമുനി;

പടിപ്പസ്സദ്ധിമക്ഖാസി, സല്ലകത്തോവ ഓസധന്തി.

ഇമമ്ഹി ഖന്ധകേ വത്ഥൂനി ഛത്തിംസാതി.

ചമ്പേയ്യക്ഖന്ധകോ നിട്ഠിതോ.