൯. ചമ്പേയ്യക്ഖന്ധകോ

൨൩൪. കസ്സപഗോത്തഭിക്ഖുവത്ഥു

൩൮൦. തേന സമയേന ബുദ്ധോ ഭഗവാ ചമ്പായം വിഹരതി ഗഗ്ഗരായ പോക്ഖരണിയാ തീരേ. തേന ഖോ പന സമയേന കാസീസു ജനപദേ വാസഭഗാമോ നാമ ഹോതി. തത്ഥ കസ്സപഗോത്തോ നാമ ഭിക്ഖു ആവാസികോ ഹോതി തന്തിബദ്ധോ ഉസ്സുക്കം ആപന്നോ – കിന്തി അനാഗതാ ച പേസലാ ഭിക്ഖൂ ആഗച്ഛേയ്യും, ആഗതാ ച പേസലാ ഭിക്ഖൂ ഫാസു വിഹരേയ്യും, അയഞ്ച ആവാസോ വുദ്ധിം വിരുള്ഹിം വേപുല്ലം ആപജ്ജേയ്യാതി. തേന ഖോ പന സമയേന സമ്ബഹുലാ ഭിക്ഖൂ കാസീസു ചാരികം ചരമാനാ യേന വാസഭഗാമോ തദവസരും. അദ്ദസാ ഖോ കസ്സപഗോത്തോ ഭിക്ഖു തേ ഭിക്ഖൂ ദൂരതോവ ആഗച്ഛന്തേ, ദിസ്വാന ആസനം പഞ്ഞപേസി, പാദോദകം പാദപീഠം പാദകഥലികം ഉപനിക്ഖിപി, പച്ചുഗ്ഗന്ത്വാ പത്തചീവരം പടിഗ്ഗഹേസി, പാനീയേന ആപുച്ഛി, നഹാനേ ഉസ്സുക്കം അകാസി, ഉസ്സുക്കമ്പി അകാസി യാഗുയാ ഖാദനീയേ ഭത്തസ്മിം. അഥ ഖോ തേസം ആഗന്തുകാനം ഭിക്ഖൂനം ഏതദഹോസി – ‘‘ഭദ്ദകോ ഖോ അയം, ആവുസോ, ആവാസികോ ഭിക്ഖു നഹാനേ ഉസ്സുക്കം കരോതി, ഉസ്സുക്കമ്പി കരോതി യാഗുയാ ഖാദനീയേ ഭത്തസ്മിം. ഹന്ദ, മയം, ആവുസോ, ഇധേവ വാസഭഗാമേ നിവാസം കപ്പേമാ’’തി. അഥ ഖോ തേ ആഗന്തുകാ ഭിക്ഖൂ തത്ഥേവ വാസഭഗാമേ നിവാസം കപ്പേസും.

അഥ ഖോ കസ്സപഗോത്തസ്സ ഭിക്ഖുനോ ഏതദഹോസി – ‘‘യോ ഖോ ഇമേസം ആഗന്തുകാനം ഭിക്ഖൂനം ആഗന്തുകകിലമഥോ സോ പടിപ്പസ്സദ്ധോ. യേപിമേ ഗോചരേ അപ്പകതഞ്ഞുനോ തേദാനിമേ ഗോചരേ പകതഞ്ഞുനോ. ദുക്കരം ഖോ പന പരകുലേസു യാവജീവം ഉസ്സുക്കം കാതും, വിഞ്ഞത്തി ച മനുസ്സാനം അമനാപാ. യംനൂനാഹം ന ഉസ്സുക്കം കരേയ്യം യാഗുയാ ഖാദനീയേ ഭത്തസ്മി’’ന്തി. സോ ന ഉസ്സുക്കം അകാസി യാഗുയാ ഖാദനീയേ ഭത്തസ്മിം. അഥ ഖോ തേസം ആഗന്തുകാനം ഭിക്ഖൂനം ഏതദഹോസി – ‘‘പുബ്ബേ ഖ്വായം, ആവുസോ, ആവാസികോ ഭിക്ഖു നഹാനേ ഉസ്സുക്കം അകാസി, ഉസ്സുക്കമ്പി അകാസി യാഗുയാ ഖാദനീയേ ഭത്തസ്മിം. സോദാനായം ന ഉസ്സുക്കം കരോതി യാഗുയാ ഖാദനീയേ ഭത്തസ്മിം. ദുട്ഠോദാനായം, ആവുസോ, ആവാസികോ ഭിക്ഖു. ഹന്ദ, മയം, ആവുസോ, ആവാസികം [ഇമം ആവാസികം (സ്യാ.)] ഭിക്ഖും ഉക്ഖിപാമാ’’തി. അഥ ഖോ തേ ആഗന്തുകാ ഭിക്ഖൂ സന്നിപതിത്വാ കസ്സപഗോത്തം ഭിക്ഖും ഏതദവോചും – ‘‘പുബ്ബേ ഖോ ത്വം, ആവുസോ, നഹാനേ ഉസ്സുക്കം കരോസി, ഉസ്സുക്കമ്പി കരോസി യാഗുയാ ഖാദനീയേ ഭത്തസ്മിം. സോദാനി ത്വം ന ഉസ്സുക്കം കരോസി യാഗുയാ ഖാദനീയേ ഭത്തസ്മിം. ആപത്തിം ത്വം, ആവുസോ, ആപന്നോ. പസ്സസേതം ആപത്തി’’ന്തി? ‘‘നത്ഥി മേ, ആവുസോ, ആപത്തി, യമഹം പസ്സേയ്യ’’ന്തി. അഥ ഖോ തേ ആഗന്തുകാ ഭിക്ഖൂ കസ്സപഗോത്തം ഭിക്ഖും ആപത്തിയാ അദസ്സനേ ഉക്ഖിപിംസു.

അഥ ഖോ കസ്സപഗോത്തസ്സ ഭിക്ഖുനോ ഏതദഹോസി – ‘‘അഹം ഖോ ഏതം ന ജാനാമി ‘ആപത്തി വാ ഏസാ അനാപത്തി വാ, ആപന്നോ ചമ്ഹി [വമ്ഹി (?)] അനാപന്നോ വാ, ഉക്ഖിത്തോ ചമ്ഹി അനുക്ഖിത്തോ വാ, ധമ്മികേന വാ അധമ്മികേന വാ, കുപ്പേന വാ അകുപ്പേന വാ, ഠാനാരഹേന വാ അട്ഠാനാരഹേന വാ’. യംനൂനാഹം ചമ്പം ഗന്ത്വാ ഭഗവന്തം ഏതമത്ഥം പുച്ഛേയ്യ’’ന്തി. അഥ ഖോ കസ്സപഗോത്തോ ഭിക്ഖു സേനാസനം സംസാമേത്വാ പത്തചീവരമാദായ യേന ചമ്പാ തേന പക്കാമി. അനുപുബ്ബേന യേന ചമ്പാ യേന ഭഗവാ തേനുപസങ്കമി, ഉപസങ്കമിത്വാ ഭഗവന്തം അഭിവാദേത്വാ ഏകമന്തം നിസീദി. ആചിണ്ണം ഖോ പനേതം ബുദ്ധാനം ഭഗവന്താനം ആഗന്തുകേഹി ഭിക്ഖൂഹി സദ്ധിം പടിസമ്മോദിതും. അഥ ഖോ ഭഗവാ കസ്സപഗോത്തം ഭിക്ഖും ഏതദവോച – ‘‘കച്ചി, ഭിക്ഖു, ഖമനീയം, കച്ചി യാപനീയം, കച്ചി അപ്പകിലമഥേന അദ്ധാനം ആഗതോ, കുതോ ച ത്വം, ഭിക്ഖു, ആഗച്ഛസീ’’തി? ‘‘ഖമനീയം, ഭഗവാ; യാപനീയം, ഭഗവാ; അപ്പകിലമഥേന ചാഹം, ഭന്തേ, അദ്ധാനം ആഗതോ. അത്ഥി, ഭന്തേ, കാസീസു ജനപദേ വാസഭഗാമോ നാമ. തത്ഥാഹം, ഭഗവാ, ആവാസികോ തന്തിബദ്ധോ ഉസ്സുക്കം ആപന്നോ – ‘കിന്തി അനാഗതാ ച പേസലാ ഭിക്ഖൂ ആഗച്ഛേയ്യും, ആഗതാ ച പേസലാ ഭിക്ഖൂ ഫാസു വിഹരേയ്യും, അയഞ്ച ആവാസോ വുദ്ധിം വിരുള്ഹിം വേപുല്ലം ആപജ്ജേയ്യാ’തി. അഥ ഖോ, ഭന്തേ, സമ്ബഹുലാ ഭിക്ഖൂ കാസീസു ചാരികം ചരമാനാ യേന വാസഭഗാമോ തദവസരും. അദ്ദസം ഖോ അഹം, ഭന്തേ, തേ ഭിക്ഖൂ ദൂരതോവ ആഗച്ഛന്തേ, ദിസ്വാന ആസനം പഞ്ഞപേസിം, പാദോദകം പാദപീഠം പാദകഥലികം ഉപനിക്ഖിപിം, പച്ചുഗ്ഗന്ത്വാ പത്തചീവരം പടിഗ്ഗഹേസിം, പാനീയേന അപുച്ഛിം, നഹാനേ ഉസ്സുക്കം അകാസിം, ഉസ്സുക്കമ്പി അകാസിം യാഗുയാ ഖാദനീയേ ഭത്തസ്മിം. അഥ ഖോ തേസം, ഭന്തേ, ആഗന്തുകാനം ഭിക്ഖൂനം ഏതദഹോസി – ‘ഭദ്ദകോ ഖോ അയം ആവുസോ ആവാസികോ ഭിക്ഖു നഹാനേ ഉസ്സുക്കം കരോതി, ഉസ്സുക്കമ്പി കരോതി യാഗുയാ ഖാദനീയേ ഭത്തസ്മിം. ഹന്ദ, മയം, ആവുസോ, ഇധേവ വാസഭഗാമേ നിവാസം കപ്പേമാ’തി. അഥ ഖോ തേ, ഭന്തേ, ആഗന്തുകാ ഭിക്ഖൂ തത്ഥേവ വാസഭഗാമേ നിവാസം കപ്പേസും. തസ്സ മയ്ഹം, ഭന്തേ, ഏതദഹോസി – ‘യോ ഖോ ഇമേസം ആഗന്തുകാനം ഭിക്ഖൂനം ആഗന്തുകകിലമഥോ സോ പടിപ്പസ്സദ്ധോ. യേപിമേ ഗോചരേ അപ്പകതഞ്ഞുനോ തേദാനിമേ ഗോചരേ പകതഞ്ഞുനോ. ദുക്കരം ഖോ പന പരകുലേസു യാവജീവം ഉസ്സുക്കം കാതും, വിഞ്ഞത്തി ച മനുസ്സാനം അമനാപാ. യംനൂനാഹം ന ഉസ്സുക്കം കരേയ്യം യാഗുയാ ഖാദനീയേ ഭത്തസ്മി’ന്തി. സോ ഖോ അഹം, ഭന്തേ, ന ഉസ്സുക്കം അകാസിം യാഗുയാ ഖാദനീയേ ഭത്തസ്മിം. അഥ ഖോ തേസം, ഭന്തേ, ആഗന്തുകാനം ഭിക്ഖൂനം ഏതദഹോസി – ‘പുബ്ബേ ഖ്വായം, ആവുസോ, ആവാസികോ ഭിക്ഖു നഹാനേ ഉസ്സുക്കം കരോതി, ഉസ്സുക്കമ്പി കരോതി യാഗുയാ ഖാദനീയേ ഭത്തസ്മിം. സോദാനായം ന ഉസ്സുക്കം കരോതി യാഗുയാ ഖാദനീയേ ഭത്തസ്മിം. ദുട്ഠോദാനായം, ആവുസോ, ആവാസികോ ഭിക്ഖു. ഹന്ദ, മയം, ആവുസോ, ആവാസികം ഭിക്ഖും ഉക്ഖിപാമാ’തി. അഥ ഖോ തേ, ഭന്തേ, ആഗന്തുകാ ഭിക്ഖൂ സന്നിപതിത്വാ മം ഏതദവോചും – ‘പുബ്ബേ ഖോ ത്വം, ആവുസോ, നഹാനേ ഉസ്സുക്കം കരോസി, ഉസ്സുക്കമ്പി കരോസി യാഗുയാ ഖാദനീയേ ഭത്തസ്മിം. സോദാനി ത്വം ന ഉസ്സുക്കം കരോസി യാഗുയാ ഖാദനീയേ ഭത്തസ്മിം. ആപത്തിം ത്വം, ആവുസോ, ആപന്നോ. പസ്സസേതം ആപത്തി’ന്തി? ‘നത്ഥി മേ, ആവുസോ, ആപത്തി യമഹം പസ്സേയ്യ’ന്തി. അഥ ഖോ തേ, ഭന്തേ, ആഗന്തുകാ ഭിക്ഖൂ മം ആപത്തിയാ അദസ്സനേ ഉക്ഖിപിംസു. തസ്സ മയ്ഹം, ഭന്തേ, ഏതദഹോസി – ‘അഹം ഖോ ഏതം ന ജാനാമി ‘ആപത്തി വാ ഏസാ അനാപത്തി വാ, ആപന്നോ ചമ്ഹി അനാപന്നോ വാ, ഉക്ഖിത്തോ ചമ്ഹി അനുക്ഖിത്തോ വാ, ധമ്മികേന വാ അധമ്മികേന വാ, കുപ്പേന വാ അകുപ്പേന വാ, ഠാനാരഹേന വാ അട്ഠാനാരഹേന വാ’. യംനൂനാഹം ചമ്പം ഗന്ത്വാ ഭഗവന്തം ഏതമത്ഥം പുച്ഛേയ്യ’ന്തി. തതോ അഹം, ഭഗവാ, ആഗച്ഛാമീ’’തി. ‘‘അനാപത്തി ഏസാ, ഭിക്ഖു, നേസാ ആപത്തി. അനാപന്നോസി, നസി ആപന്നോ. അനുക്ഖിത്തോസി, നസി ഉക്ഖിത്തോ. അധമ്മികേനാസി കമ്മേന ഉക്ഖിത്തോ കുപ്പേന അട്ഠാനാരഹേന. ഗച്ഛ ത്വം, ഭിക്ഖു, തത്ഥേവ വാസഭഗാമേ നിവാസം കപ്പേഹീ’’തി. ‘‘ഏവം, ഭന്തേ’’തി ഖോ കസ്സപഗോത്തോ ഭിക്ഖു ഭഗവതോ പടിസ്സുണിത്വാ ഉട്ഠായാസനാ ഭഗവന്തം അഭിവാദേത്വാ പദക്ഖിണം കത്വാ യേന വാസഭഗാമോ തേന പക്കാമി.

൩൮൧. അഥ ഖോ തേസം ആഗന്തുകാനം ഭിക്ഖൂനം അഹുദേവ കുക്കുച്ചം, അഹു വിപ്പടിസാരോ – ‘‘അലാഭാ വത നോ, ന വത നോ ലാഭാ, ദുല്ലദ്ധം വത നോ, ന വത നോ സുലദ്ധം, യേ മയം സുദ്ധം ഭിക്ഖും അനാപത്തികം അവത്ഥുസ്മിം അകാരണേ ഉക്ഖിപിമ്ഹാ. ഹന്ദ, മയം, ആവുസോ, ചമ്പം ഗന്ത്വാ ഭഗവതോ സന്തികേ അച്ചയം അച്ചയതോ ദേസേമാ’’തി. അഥ ഖോ തേ ആഗന്തുകാ ഭിക്ഖൂ സേനാസനം സംസാമേത്വാ പത്തചീവരമാദായ യേന ചമ്പാ തേന പക്കമിംസു. അനുപുബ്ബേന യേന ചമ്പാ യേന ഭഗവാ തേനുപസങ്കമിംസു, ഉപസങ്കമിത്വാ ഭഗവന്തം അഭിവാദേത്വാ ഏകമന്തം നിസീദിംസു. ആചിണ്ണം ഖോ പനേതം ബുദ്ധാനം ഭഗവന്താനം ആഗന്തുകേഹി ഭിക്ഖൂഹി സദ്ധിം പടിസമ്മോദിതും. അഥ ഖോ ഭഗവാ തേ ഭിക്ഖൂ ഏതദവോച – ‘‘കച്ചി, ഭിക്ഖവേ, ഖമനീയം, കച്ചി യാപനീയം, കച്ചിത്ഥ അപ്പകിലമഥേന അദ്ധാനം ആഗതാ, കുതോ ച തുമ്ഹേ, ഭിക്ഖവേ, ആഗച്ഛഥാ’’തി? ‘‘ഖമനീയം, ഭഗവാ; യാപനീയം, ഭഗവാ; അപ്പകിലമഥേന ച മയം, ഭന്തേ, അദ്ധാനം ആഗതാ. അത്ഥി, ഭന്തേ, കാസീസു ജനപദേ വാസഭഗാമോ നാമ. തതോ മയം, ഭഗവാ, ആഗച്ഛാമാ’’തി. ‘‘തുമ്ഹേ, ഭിക്ഖവേ, ആവാസികം ഭിക്ഖും ഉക്ഖിപിത്ഥാ’’തി? ‘‘ഏവം, ഭന്തേ’’തി. ‘‘കിസ്മിം, ഭിക്ഖവേ, വത്ഥുസ്മിം കാരണേ’’തി? ‘‘അവത്ഥുസ്മിം, ഭഗവാ, അകാരണേ’’തി. വിഗരഹി ബുദ്ധോ ഭഗവാ – ‘‘അനനുച്ഛവികം, മോഘപുരിസാ, അനനുലോമികം അപ്പതിരൂപം അസ്സാമണകം അകപ്പിയം അകരണീയം. കഥഞ്ഹി നാമ തുമ്ഹേ, മോഘപുരിസാ, സുദ്ധം ഭിക്ഖും അനാപത്തികം അവത്ഥുസ്മിം അകാരണേ ഉക്ഖിപിസ്സഥ. നേതം, മോഘപുരിസാ, അപ്പസന്നാനം വാ പസാദായ…പേ…’’ വിഗരഹിത്വാ ധമ്മിം കഥം കത്വാ ഭിക്ഖൂ ആമന്തേസി – ‘‘ന, ഭിക്ഖവേ, സുദ്ധോ ഭിക്ഖു അനാപത്തികോ അവത്ഥുസ്മിം അകാരണേ ഉക്ഖിപിതബ്ബോ. യോ ഉക്ഖിപേയ്യ, ആപത്തി ദുക്കടസ്സാ’’തി.

അഥ ഖോ തേ ഭിക്ഖൂ ഉട്ഠായാസനാ ഏകംസം ഉത്തരാസങ്ഗം കരിത്വാ ഭഗവതോ പാദേസു സിരസാ നിപതിത്വാ ഭഗവന്തം ഏതദവോചും – ‘‘അച്ചയോ നോ, ഭന്തേ, അച്ചഗമാ യഥാബാലേ യഥാമൂള്ഹേ യഥാഅകുസലേ, യേ മയം സുദ്ധം ഭിക്ഖും അനാപത്തികം അവത്ഥുസ്മിം അകാരണേ ഉക്ഖിപിമ്ഹാ. തേസം നോ, ഭന്തേ, ഭഗവാ അച്ചയം അച്ചയതോ പടിഗ്ഗണ്ഹാതു ആയതിം സംവരായാ’’തി. ‘‘തഗ്ഘ, തുമ്ഹേ, ഭിക്ഖവേ, അച്ചയോ അച്ചഗമാ യഥാബാലേ യഥാമൂള്ഹേ യഥാഅകുസലേ, യേ തുമ്ഹേ സുദ്ധം ഭിക്ഖും അനാപത്തികം അവത്ഥുസ്മിം അകാരണേ ഉക്ഖിപിത്ഥ. യതോ ച ഖോ തുമ്ഹേ, ഭിക്ഖവേ, അച്ചയം അച്ചയതോ ദിസ്വാ യഥാധമ്മം പടികരോഥ, തം വോ മയം പടിഗ്ഗണ്ഹാമ. വുദ്ധിഹേസാ, ഭിക്ഖവേ, അരിയസ്സ വിനയേ യോ അച്ചയം അച്ചയതോ ദിസ്വാ യഥാധമ്മം പടികരോതി, ആയതിം [ആയതിം ച (സീ.)] സംവരം ആപജ്ജതീ’’തി.

കസ്സപഗോത്തഭിക്ഖുവത്ഥു നിട്ഠിതം.

൨൩൫. അധമ്മേന വഗ്ഗാദികമ്മകഥാ

൩൮൨. തേന ഖോ പന സമയേന ചമ്പായം ഭിക്ഖൂ ഏവരൂപാനി കമ്മാനി കരോന്തി – അധമ്മേന വഗ്ഗകമ്മം കരോന്തി, അധമ്മേന സമഗ്ഗകമ്മം കരോന്തി; ധമ്മേന വഗ്ഗകമ്മം കരോന്തി, ധമ്മപതിരൂപകേന വഗ്ഗകമ്മം കരോന്തി; ധമ്മപതിരൂപകേന സമഗ്ഗകമ്മം കരോന്തി; ഏകോപി ഏകം ഉക്ഖിപതി, ഏകോപി ദ്വേ ഉക്ഖിപതി, ഏകോപി സമ്ബഹുലേ ഉക്ഖിപതി, ഏകോപി സങ്ഘം ഉക്ഖിപതി; ദ്വേപി ഏകം ഉക്ഖിപന്തി, ദ്വേപി ദ്വേ ഉക്ഖിപന്തി, ദ്വേപി സമ്ബഹുലേ ഉക്ഖിപന്തി, ദ്വേപി സങ്ഘം ഉക്ഖിപന്തി; സമ്ബഹുലാപി ഏകം ഉക്ഖിപന്തി; സമ്ബഹുലാപി ദ്വേ ഉക്ഖിപന്തി, സമ്ബഹുലാപി സമ്ബഹുലേ ഉക്ഖിപന്തി, സമ്ബഹുലാപി സങ്ഘം ഉക്ഖിപന്തി; സങ്ഘോപി സങ്ഘം ഉക്ഖിപതി. യേ തേ ഭിക്ഖൂ അപ്പിച്ഛാ…പേ… തേ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ചമ്പായം ഭിക്ഖൂ ഏവരൂപാനി കമ്മാനി കരിസ്സന്തി – അധമ്മേന വഗ്ഗകമ്മം കരിസ്സന്തി, അധമ്മേന സമഗ്ഗകമ്മം കരിസ്സന്തി, ധമ്മേന വഗ്ഗകമ്മം കരിസ്സന്തി, ധമ്മപതിരൂപകേന വഗ്ഗകമ്മം കരിസ്സന്തി, ധമ്മപതിരൂപകേന സമഗ്ഗകമ്മം കരിസ്സന്തി, ഏകോപി ഏകം ഉക്ഖിപിസ്സതി, ഏകോപി ദ്വേ ഉക്ഖിപിസ്സതി, ഏകോപി സമ്ബഹുലേ ഉക്ഖിപിസ്സതി, ഏകോപി സങ്ഘം ഉക്ഖിപിസ്സതി, ദ്വേപി ഏകം ഉക്ഖിപിസ്സന്തി, ദ്വേപി ദ്വേ ഉക്ഖിപിസ്സന്തി, ദ്വേപി സമ്ബഹുലേ ഉക്ഖിപിസ്സന്തി, ദ്വേപി സങ്ഘം ഉക്ഖിപിസ്സന്തി, സമ്ബഹുലാപി ഏകം ഉക്ഖിപിസ്സന്തി, സമ്ബഹുലാപി ദ്വേ ഉക്ഖിപിസ്സന്തി, സമ്ബഹുലാപി സമ്ബഹുലേ ഉക്ഖിപിസ്സന്തി, സമ്ബഹുലാപി സങ്ഘം ഉക്ഖിപിസ്സന്തി, സങ്ഘോപി സങ്ഘം ഉക്ഖിപിസ്സതീ’’തി. അഥ ഖോ തേ ഭിക്ഖൂ ഭഗവതോ ഏതമത്ഥം ആരോചേസും…പേ… ‘‘സച്ചം കിര, ഭിക്ഖവേ, ചമ്പായം ഭിക്ഖൂ ഏവരൂപാനി കമ്മാനി കരോന്തി – അധമ്മേന വഗ്ഗകമ്മം കരോന്തി…പേ… സങ്ഘോപി സങ്ഘം ഉക്ഖിപതീ’’തി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ – ‘‘അനനുച്ഛവികം, ഭിക്ഖവേ, തേസം മോഘപുരിസാനം അനനുലോമികം അപ്പതിരൂപം അസ്സാമണകം അകപ്പിയം അകരണീയം. കഥഞ്ഹി നാമ തേ, ഭിക്ഖവേ, മോഘപുരിസാ ഏവരൂപാനി കമ്മാനി കരിസ്സന്തി – അധമ്മേന വഗ്ഗകമ്മം കരിസ്സന്തി…പേ… സങ്ഘോപി സങ്ഘം ഉക്ഖിപിസ്സതി. നേതം, ഭിക്ഖവേ, അപ്പസന്നാനം വാ പസാദായ…പേ… വിഗരഹിത്വാ…പേ… ധമ്മിം കഥം കത്വാ ഭിക്ഖൂ ആമന്തേസി –

൩൮൩. ‘‘അധമ്മേന ചേ, ഭിക്ഖവേ, വഗ്ഗകമ്മം അകമ്മം ന ച കരണീയം, അധമ്മേന [അധമ്മേന ചേ ഭിക്ഖവേ (സ്യാ.)] സമഗ്ഗകമ്മം അകമ്മം ന ച കരണീയം, ധമ്മേന വഗ്ഗകമ്മം അകമ്മം ന ച കരണീയം; ധമ്മപതിരൂപകേന വഗ്ഗകമ്മം അകമ്മം ന ച കരണീയം, ധമ്മപതിരൂപകേന സമഗ്ഗകമ്മം അകമ്മം ന ച കരണീയം; ഏകോപി ഏകം ഉക്ഖിപതി അകമ്മം ന ച കരണീയം, ഏകോപി ദ്വേ ഉക്ഖിപതി അകമ്മം ന ച കരണീയം, ഏകോപി സമ്ബഹുലേ ഉക്ഖിപതി അകമ്മം ന ച കരണീയം, ഏകോപി സങ്ഘം ഉക്ഖിപതി അകമ്മം ന ച കരണീയം; ദ്വേപി ഏകം ഉക്ഖിപന്തി അകമ്മം ന ച കരണീയം, ദ്വേപി ദ്വേ ഉക്ഖിപന്തി അകമ്മം ന ച കരണീയം, ദ്വേപി സമ്ബഹുലേ ഉക്ഖിപന്തി അകമ്മം ന ച കരണീയം, ദ്വേപി സങ്ഘം ഉക്ഖിപന്തി അകമ്മം ന ച കരണീയം; സമ്ബഹുലാപി ഏകം ഉക്ഖിപന്തി അകമ്മം ന ച കരണീയം, സമ്ബഹുലാപി ദ്വേ ഉക്ഖിപന്തി അകമ്മം ന ച കരണീയം, സമ്ബഹുലാപി സമ്ബഹുലേ ഉക്ഖിപന്തി അകമ്മം ന ച കരണീയം, സമ്ബഹുലാപി സങ്ഘം ഉക്ഖിപന്തി അകമ്മം ന ച കരണീയം; സങ്ഘോപി സങ്ഘം ഉക്ഖിപതി അകമ്മം ന ച കരണീയം.

൩൮൪. ‘‘ചത്താരിമാനി, ഭിക്ഖവേ, കമ്മാനി – അധമ്മേന വഗ്ഗകമ്മം, അധമ്മേന സമഗ്ഗകമ്മം, ധമ്മേന വഗ്ഗകമ്മം, ധമ്മേന സമഗ്ഗകമ്മം. തത്ര, ഭിക്ഖവേ, യദിദം അധമ്മേന വഗ്ഗകമ്മം, ഇദം, ഭിക്ഖവേ, കമ്മം അധമ്മത്താ വഗ്ഗത്താ കുപ്പം അട്ഠാനാരഹം; ന, ഭിക്ഖവേ, ഏവരൂപം കമ്മം കാതബ്ബം, ന ച മയാ ഏവരൂപം കമ്മം അനുഞ്ഞാതം. തത്ര, ഭിക്ഖവേ, യദിദം അധമ്മേന സമഗ്ഗകമ്മം, ഇദം, ഭിക്ഖവേ, കമ്മം അധമ്മത്താ കുപ്പം അട്ഠാനാരഹം; ന, ഭിക്ഖവേ, ഏവരൂപം കമ്മം കാതബ്ബം, ന ച മയാ ഏവരൂപം കമ്മം അനുഞ്ഞാതം. തത്ര, ഭിക്ഖവേ, യദിദം ധമ്മേന വഗ്ഗകമ്മം, ഇദം, ഭിക്ഖവേ, കമ്മം വഗ്ഗത്താ കുപ്പം അട്ഠാനാരഹം; ന, ഭിക്ഖവേ, ഏവരൂപം കമ്മം കാതബ്ബം, ന ച മയാ ഏവരൂപം കമ്മം അനുഞ്ഞാതം. തത്ര, ഭിക്ഖവേ, യദിദം ധമ്മേന സമഗ്ഗകമ്മം, ഇദം, ഭിക്ഖവേ, കമ്മം ധമ്മത്താ സമഗ്ഗത്താ അകുപ്പം ഠാനാരഹം; ഏവരൂപം, ഭിക്ഖവേ, കമ്മം കാതബ്ബം, ഏവരൂപഞ്ച മയാ കമ്മം അനുഞ്ഞാതം. തസ്മാതിഹ, ഭിക്ഖവേ, ഏവരൂപം കമ്മം കരിസ്സാമ യദിദം ധമ്മേന സമഗ്ഗന്തി – ഏവഞ്ഹി വോ, ഭിക്ഖവേ, സിക്ഖിതബ്ബ’’ന്തി.

അധമ്മേന വഗ്ഗാദികമ്മകഥാ നിട്ഠിതാ.

൨൩൬. ഞത്തിവിപന്നകമ്മാദികഥാ

൩൮൫. തേന ഖോ പന സമയേന ഛബ്ബഗ്ഗിയാ ഭിക്ഖൂ ഏവരൂപാനി കമ്മാനി കരോന്തി – അധമ്മേന വഗ്ഗകമ്മം കരോന്തി, അധമ്മേന സമഗ്ഗകമ്മം കരോന്തി; ധമ്മേന വഗ്ഗകമ്മം കരോന്തി, ധമ്മപതിരൂപകേന വഗ്ഗകമ്മം കരോന്തി, ധമ്മപതിരൂപകേന സമഗ്ഗകമ്മം കരോന്തി; ഞത്തിവിപന്നമ്പി കമ്മം കരോന്തി അനുസ്സാവനസമ്പന്നം, അനുസ്സാവനവിപന്നമ്പി കമ്മം കരോന്തി ഞത്തിസമ്പന്നം, ഞത്തിവിപന്നമ്പി അനുസ്സാവനവിപന്നമ്പി കമ്മം കരോന്തി; അഞ്ഞത്രാപി ധമ്മാ കമ്മം കരോന്തി, അഞ്ഞത്രാപി വിനയാ കമ്മം കരോന്തി, അഞ്ഞത്രാപി സത്ഥുസാസനാ കമ്മം കരോന്തി; പടികുട്ഠകതമ്പി കമ്മം കരോന്തി അധമ്മികം കുപ്പം അട്ഠാനാരഹം. യേ തേ ഭിക്ഖൂ അപ്പിച്ഛാ…പേ… തേ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ഛബ്ബഗ്ഗിയാ ഭിക്ഖൂ ഏവരൂപാനി കമ്മാനി കരിസ്സന്തി – അധമ്മേന വഗ്ഗകമ്മം കരിസ്സന്തി, അധമ്മേന സമഗ്ഗകമ്മം കരിസ്സന്തി; ധമ്മേന വഗ്ഗകമ്മം കരിസ്സന്തി, ധമ്മപതിരൂപകേന വഗ്ഗകമ്മം കരിസ്സന്തി, ധമ്മപതിരൂപകേന സമഗ്ഗകമ്മം കരിസ്സന്തി; ഞത്തിവിപന്നമ്പി കമ്മം കരിസ്സന്തി അനുസ്സാവനസമ്പന്നം, അനുസ്സാവനവിപന്നമ്പി കമ്മം കരിസ്സന്തി ഞത്തിസമ്പന്നം, ഞത്തിവിപന്നമ്പി അനുസ്സാവനവിപന്നമ്പി കമ്മം കരിസ്സന്തി; അഞ്ഞത്രാപി ധമ്മാ കമ്മം കരിസ്സന്തി, അഞ്ഞത്രാപി വിനയാ കമ്മം കരിസ്സന്തി, അഞ്ഞത്രാപി സത്ഥുസാസനാ കമ്മം കരിസ്സന്തി; പടികുട്ഠകതമ്പി കമ്മം കരിസ്സന്തി അധമ്മികം കുപ്പം അട്ഠാനാരഹ’’ന്തി. അഥ ഖോ തേ ഭിക്ഖൂ ഭഗവതോ ഏതമത്ഥം ആരോചേസും…പേ… ‘‘സച്ചം കിര, ഭിക്ഖവേ, ഛബ്ബഗ്ഗിയാ ഭിക്ഖൂ ഏവരൂപാനി കമ്മാനി കരോന്തി – അധമ്മേന വഗ്ഗകമ്മം കരോന്തി…പേ… പടികുട്ഠകതമ്പി കമ്മം കരോന്തി അധമ്മികം കുപ്പം അട്ഠാനാരഹ’’ന്തി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… വിഗരഹിത്വാ ധമ്മിം കഥം കത്വാ ഭിക്ഖൂ ആമന്തേസി –

൩൮൬. ‘‘അധമ്മേന ചേ, ഭിക്ഖവേ, വഗ്ഗകമ്മം അകമ്മം ന ച കരണീയം; അധമ്മേന സമഗ്ഗകമ്മം അകമ്മം ന ച കരണീയം; ധമ്മേന വഗ്ഗകമ്മം അകമ്മം ന ച കരണീയം; ധമ്മപതിരൂപകേന വഗ്ഗകമ്മം അകമ്മം ന ച കരണീയം; ധമ്മപതിരൂപകേന സമഗ്ഗകമ്മം അകമ്മം ന ച കരണീയം. ഞത്തിവിപന്നഞ്ചേ, ഭിക്ഖവേ, കമ്മം അനുസ്സാവനസമ്പന്നം അകമ്മം ന ച കരണീയം; അനുസ്സാവനവിപന്നഞ്ചേ, ഭിക്ഖവേ, കമ്മം ഞത്തിസമ്പന്നം അകമ്മം ന ച കരണീയം; ഞത്തിവിപന്നഞ്ചേ, ഭിക്ഖവേ, കമ്മം അനുസ്സാവനവിപന്നം അകമ്മം ന ച കരണീയം; അഞ്ഞത്രാപി ധമ്മാ കമ്മം അകമ്മം ന ച കരണീയം; അഞ്ഞത്രാപി വിനയാ കമ്മം അകമ്മം ന ച കരണീയം; അഞ്ഞത്രാപി സത്ഥുസാസനാ കമ്മം അകമ്മം ന ച കരണീയം; പടികുട്ഠകതഞ്ചേ, ഭിക്ഖവേ, കമ്മം അധമ്മികം കുപ്പം അട്ഠാനാരഹം അകമ്മം ന ച കരണീയം.

൩൮൭. ഛയിമാനി, ഭിക്ഖവേ, കമ്മാനി – അധമ്മകമ്മം, വഗ്ഗകമ്മം, സമഗ്ഗകമ്മം, ധമ്മപതിരൂപകേന വഗ്ഗകമ്മം, ധമ്മപതിരൂപകേന സമഗ്ഗകമ്മം, ധമ്മേന സമഗ്ഗകമ്മം.

കതമഞ്ച, ഭിക്ഖവേ, അധമ്മകമ്മം? ഞത്തിദുതിയേ ചേ, ഭിക്ഖവേ, കമ്മേ ഏകായ ഞത്തിയാ കമ്മം കരോതി, ന ച കമ്മവാചം അനുസ്സാവേതി – അധമ്മകമ്മം. ഞത്തിദുതിയേ ചേ, ഭിക്ഖവേ, കമ്മേ ദ്വീഹി ഞത്തീഹി കമ്മം കരോതി, ന ച കമ്മവാചം അനുസ്സാവേതി – അധമ്മകമ്മം. ഞത്തിദുതിയേ ചേ, ഭിക്ഖവേ, കമ്മേ ഏകായ കമ്മവാചായ കമ്മം കരോതി, ന ച ഞത്തിം ഠപേതി – അധമ്മകമ്മം. ഞത്തിദുതിയേ ചേ, ഭിക്ഖവേ, കമ്മേ ദ്വീഹി കമ്മവാചാഹി കമ്മം കരോതി, ന ച ഞത്തിം ഠപേതി – അധമ്മകമ്മം. ഞത്തിചതുത്ഥേ ചേ, ഭിക്ഖവേ, കമ്മേ ഏകായ ഞത്തിയാ കമ്മം കരോതി, ന ച കമ്മവാചം അനുസ്സാവേതി – അധമ്മകമ്മം. ഞത്തിചതുത്ഥേ ചേ, ഭിക്ഖവേ, കമ്മേ ദ്വീഹി ഞത്തീഹി കമ്മം കരോതി, ന ച കമ്മവാചം അനുസ്സാവേതി – അധമ്മകമ്മം. ഞത്തിചതുത്ഥേ ചേ, ഭിക്ഖവേ, കമ്മേ തീഹി ഞത്തീഹി കമ്മം കരോതി, ന ച കമ്മവാചം അനുസ്സാവേതി – അധമ്മകമ്മം. ഞത്തിചതുത്ഥേ ചേ, ഭിക്ഖവേ, കമ്മേ ചതൂഹി ഞത്തീഹി കമ്മം കരോതി, ന ച കമ്മവാചം അനുസ്സാവേതി – അധമ്മകമ്മം. ഞത്തിചതുത്ഥേ ചേ, ഭിക്ഖവേ, കമ്മേ ഏകായ കമ്മവാചായ കമ്മം കരോതി, ന ച ഞത്തിം ഠപേതി – അധമ്മകമ്മം. ഞത്തിചതുത്ഥേ ചേ, ഭിക്ഖവേ, കമ്മേ ദ്വീഹി കമ്മവാചാഹി കമ്മം കരോതി, ന ച ഞത്തിം ഠപേതി – അധമ്മകമ്മം. ഞത്തിചതുത്ഥേ ചേ, ഭിക്ഖവേ, കമ്മേ തീഹി കമ്മവാചാഹി കമ്മം കരോതി, ന ച ഞത്തിം ഠപേതി – അധമ്മകമ്മം. ഞത്തിചതുത്ഥേ ചേ, ഭിക്ഖവേ, കമ്മേ ചതൂഹി കമ്മവാചാഹി കമ്മം കരോതി, ന ച ഞത്തിം ഠപേതി – അധമ്മകമ്മം. ഇദം വുച്ചതി, ഭിക്ഖവേ, അധമ്മകമ്മം.

കതമഞ്ച, ഭിക്ഖവേ, വഗ്ഗകമ്മം? ഞത്തിദുതിയേ ചേ, ഭിക്ഖവേ, കമ്മേ യാവതികാ ഭിക്ഖൂ കമ്മപ്പത്താ തേ അനാഗതാ ഹോന്തി, ഛന്ദാരഹാനം ഛന്ദോ അനാഹടോ ഹോതി, സമ്മുഖീഭൂതാ പടിക്കോസന്തി – വഗ്ഗകമ്മം. ഞത്തിദുതിയേ ചേ, ഭിക്ഖവേ, കമ്മേ യാവതികാ ഭിക്ഖൂ കമ്മപ്പത്താ തേ ആഗതാ ഹോന്തി, ഛന്ദാരഹാനം ഛന്ദോ അനാഹടോ ഹോതി, സമ്മുഖീഭൂതാ പടിക്കോസന്തി – വഗ്ഗകമ്മം. ഞത്തിദുതിയേ ചേ, ഭിക്ഖവേ, കമ്മേ യാവതികാ ഭിക്ഖൂ കമ്മപ്പത്താ തേ ആഗതാ ഹോന്തി, ഛന്ദാരഹാനം ഛന്ദോ ആഹടോ ഹോതി, സമ്മുഖീഭൂതാ പടിക്കോസന്തി – വഗ്ഗകമ്മം. ഞത്തിചതുത്ഥേ ചേ, ഭിക്ഖവേ, കമ്മേ യാവതികാ ഭിക്ഖൂ കമ്മപ്പത്താ തേ അനാഗതാ ഹോന്തി, ഛന്ദാരഹാനം ഛന്ദോ അനാഹടോ ഹോതി, സമ്മുഖീഭൂതാ പടിക്കോസന്തി – വഗ്ഗകമ്മം. ഞത്തിചതുത്ഥേ ചേ, ഭിക്ഖവേ, കമ്മേ യാവതികാ ഭിക്ഖൂ കമ്മപ്പത്താ തേ ആഗതാ ഹോന്തി, ഛന്ദാരഹാനം ഛന്ദോ അനാഹടോ ഹോതി, സമ്മുഖീഭൂതാ പടിക്കോസന്തി – വഗ്ഗകമ്മം. ഞത്തിചതുത്ഥേ ചേ, ഭിക്ഖവേ, കമ്മേ യാവതികാ ഭിക്ഖൂ കമ്മപ്പത്താ തേ ആഗതാ ഹോന്തി, ഛന്ദാരഹാനം ഛന്ദോ ആഹടോ ഹോതി, സമ്മുഖീഭൂതാ പടിക്കോസന്തി – വഗ്ഗകമ്മം. ഇദം വുച്ചതി, ഭിക്ഖവേ, വഗ്ഗകമ്മം.

കതമഞ്ച, ഭിക്ഖവേ, സമഗ്ഗകമ്മം? ഞത്തിദുതിയേ ചേ, ഭിക്ഖവേ, കമ്മേ യാവതികാ ഭിക്ഖൂ കമ്മപ്പത്താ, തേ ആഗതാ ഹോന്തി, ഛന്ദാരഹാനം ഛന്ദോ ആഹടോ ഹോതി, സമ്മുഖീഭൂതാ ന പടിക്കോസന്തി – സമഗ്ഗകമ്മം. ഞത്തിചതുത്ഥേ ചേ, ഭിക്ഖവേ, കമ്മേ യാവതികാ ഭിക്ഖൂ കമ്മപ്പത്താ, തേ ആഗതാ ഹോന്തി, ഛന്ദാരഹാനം ഛന്ദോ ആഹടോ ഹോതി, സമ്മുഖീഭൂതാ ന പടിക്കോസന്തി – സമഗ്ഗകമ്മം. ഇദം വുച്ചതി, ഭിക്ഖവേ, സമഗ്ഗകമ്മം.

കതമഞ്ച, ഭിക്ഖവേ, ധമ്മപതിരൂപകേന വഗ്ഗകമ്മം? ഞത്തിദുതിയേ ചേ, ഭിക്ഖവേ, കമ്മേ പഠമം കമ്മവാചം അനുസ്സാവേതി, പച്ഛാ ഞത്തിം ഠപേതി, യാവതികാ ഭിക്ഖൂ കമ്മപ്പത്താ തേ അനാഗതാ ഹോന്തി, ഛന്ദാരഹാനം ഛന്ദോ അനാഹടോ ഹോതി, സമ്മുഖീഭൂതാ പടിക്കോസന്തി – ധമ്മപതിരൂപകേന വഗ്ഗകമ്മം. ഞത്തിദുതിയേ ചേ, ഭിക്ഖവേ, കമ്മേ പഠമം കമ്മവാചം അനുസ്സാവേതി, പച്ഛാ ഞത്തിം ഠപേതി, യാവതികാ ഭിക്ഖൂ കമ്മപ്പത്താ തേ ആഗതാ ഹോന്തി, ഛന്ദാരഹാനം ഛന്ദോ അനാഹടോ ഹോതി, സമ്മുഖീഭൂതാ പടിക്കോസന്തി – ധമ്മപതിരൂപകേന വഗ്ഗകമ്മം. ഞത്തിദുതിയേ ചേ, ഭിക്ഖവേ, കമ്മേ പഠമം കമ്മവാചം അനുസ്സാവേതി, പച്ഛാ ഞത്തിം ഠപേതി, യാവതികാ ഭിക്ഖൂ കമ്മപ്പത്താ തേ ആഗതാ ഹോന്തി, ഛന്ദാരഹാനം ഛന്ദോ ആഹടോ ഹോതി, സമ്മുഖീഭൂതാ പടിക്കോസന്തി – ധമ്മപതിരൂപകേന വഗ്ഗകമ്മം. ഞത്തിചതുത്ഥേ ചേ, ഭിക്ഖവേ, കമ്മേ പഠമം കമ്മവാചം അനുസ്സാവേതി, പച്ഛാ ഞത്തിം ഠപേതി, യാവതികാ ഭിക്ഖൂ കമ്മപ്പത്താ തേ അനാഗതാ ഹോന്തി, ഛന്ദാരഹാനം ഛന്ദോ അനാഹടോ ഹോതി, സമ്മുഖീഭൂതാ പടിക്കോസന്തി – ധമ്മപതിരൂപകേന വഗ്ഗകമ്മം. ഞത്തിചതുത്ഥേ ചേ, ഭിക്ഖവേ, കമ്മേ പഠമം കമ്മവാചം അനുസ്സാവേതി, പച്ഛാ ഞത്തിം ഠപേതി, യാവതികാ ഭിക്ഖൂ കമ്മപ്പത്താ തേ ആഗതാ ഹോന്തി, ഛന്ദാരഹാനം ഛന്ദോ അനാഹടോ ഹോതി, സമ്മുഖീഭൂതാ പടിക്കോസന്തി – ധമ്മപതിരൂപകേന വഗ്ഗകമ്മം. ഞത്തിചതുത്ഥേ ചേ, ഭിക്ഖവേ, കമ്മേ പഠമം കമ്മവാചം അനുസ്സാവേതി, പച്ഛാ ഞത്തിം ഠപേതി, യാവതികാ ഭിക്ഖൂ കമ്മപ്പത്താ തേ ആഗതാ ഹോന്തി, ഛന്ദാരഹാനം ഛന്ദോ ആഹടോ ഹോതി, സമ്മുഖീഭൂതാ പടിക്കോസന്തി – ധമ്മപതിരൂപകേന വഗ്ഗകമ്മം. ഇദം വുച്ചതി, ഭിക്ഖവേ, ധമ്മപതിരൂപകേന വഗ്ഗകമ്മം.

കതമഞ്ച, ഭിക്ഖവേ, ധമ്മപതിരൂപകേന സമഗ്ഗകമ്മം? ഞത്തിദുതിയേ ചേ, ഭിക്ഖവേ, കമ്മേ പഠമം കമ്മവാചം അനുസ്സാവേതി, പച്ഛാ ഞത്തിം ഠപേതി, യാവതികാ ഭിക്ഖൂ കമ്മപ്പത്താ, തേ ആഗതാ ഹോന്തി, ഛന്ദാരഹാനം ഛന്ദോ ആഹടോ ഹോതി, സമ്മുഖീഭൂതാ ന പടിക്കോസന്തി – ധമ്മപതിരൂപകേന സമഗ്ഗകമ്മം. ഞത്തിചതുത്ഥേ ചേ, ഭിക്ഖവേ, കമ്മേ പഠമം കമ്മവാചം അനുസ്സാവേതി, പച്ഛാ ഞത്തിം ഠപേതി, യാവതികാ ഭിക്ഖൂ കമ്മപ്പത്താ തേ ആഗതാ ഹോന്തി, ഛന്ദാരഹാനം ഛന്ദോ ആഹടോ ഹോതി, സമ്മുഖീഭൂതാ ന പടിക്കോസന്തി – ധമ്മപതിരൂപകേന സമഗ്ഗകമ്മം. ഇദം വുച്ചതി, ഭിക്ഖവേ, ധമ്മപതിരൂപകേന സമഗ്ഗകമ്മം.

കതമഞ്ച, ഭിക്ഖവേ, ധമ്മേന സമഗ്ഗകമ്മം? ഞത്തിദുതിയേ ചേ, ഭിക്ഖവേ, കമ്മേ പഠമം ഞത്തിം ഠപേതി, പച്ഛാ ഏകായ കമ്മവാചായ കമ്മം കരോതി, യാവതികാ ഭിക്ഖൂ കമ്മപ്പത്താ തേ ആഗതാ ഹോന്തി, ഛന്ദാരഹാനം ഛന്ദോ ആഹടോ ഹോതി, സമ്മുഖീഭൂതാ ന പടിക്കോസന്തി – ധമ്മേന സമഗ്ഗകമ്മം. ഞത്തിചതുത്ഥേ ചേ, ഭിക്ഖവേ, കമ്മേ പഠമം ഞത്തിം ഠപേതി, പച്ഛാ തീഹി കമ്മവാചാഹി കമ്മം കരോതി, യാവതികാ ഭിക്ഖൂ കമ്മപ്പത്താ, തേ ആഗതാ ഹോന്തി, ഛന്ദാരഹാനം ഛന്ദോ ആഹടോ ഹോതി, സമ്മുഖീഭൂതാ ന പടിക്കോസന്തി, ധമ്മേന സമഗ്ഗകമ്മം. ഇദം വുച്ചതി, ഭിക്ഖവേ, ധമ്മേന സമഗ്ഗകമ്മം.

ഞത്തിവിപന്നകമ്മാദികഥാ നിട്ഠിതാ.

൨൩൭. ചതുവഗ്ഗകരണാദികഥാ

൩൮൮. പഞ്ച സങ്ഘാ – ചതുവഗ്ഗോ ഭിക്ഖുസങ്ഘോ പഞ്ചവഗ്ഗോ ഭിക്ഖുസങ്ഘോ, ദസവഗ്ഗോ ഭിക്ഖുസങ്ഘോ, വീസതിവഗ്ഗോ ഭിക്ഖുസങ്ഘോ, അതിരേകവീസതിവഗ്ഗോ ഭിക്ഖുസങ്ഘോ. തത്ര, ഭിക്ഖവേ, യ്വായം ചതുവഗ്ഗോ ഭിക്ഖുസങ്ഘോ, ഠപേത്വാ തീണി കമ്മാനി – ഉപസമ്പദം പവാരണം അബ്ഭാനം, ധമ്മേന സമഗ്ഗോ സബ്ബകമ്മേസു കമ്മപ്പത്തോ. തത്ര, ഭിക്ഖവേ, യ്വായം പഞ്ചവഗ്ഗോ ഭിക്ഖുസങ്ഘോ, ഠപേത്വാ ദ്വേ കമ്മാനി – മജ്ഝിമേസു ജനപദേസു ഉപസമ്പദം അബ്ഭാനം, ധമ്മേന സമഗ്ഗോ സബ്ബകമ്മേസു കമ്മപ്പത്തോ. തത്ര, ഭിക്ഖവേ, യ്വായം ദസവഗ്ഗോ ഭിക്ഖുസങ്ഘോ, ഠപേത്വാ ഏകം കമ്മം – അബ്ഭാനം, ധമ്മേന സമഗ്ഗോ സബ്ബകമ്മേസു കമ്മപ്പത്തോ. തത്ര, ഭിക്ഖവേ, യ്വായം വീസതിവഗ്ഗോ ഭിക്ഖുസങ്ഘോ ധമ്മേന സമഗ്ഗോ സബ്ബകമ്മേസു കമ്മപ്പത്തോ. തത്ര, ഭിക്ഖവേ, യ്വായം അതിരേകവീസതിവഗ്ഗോ ഭിക്ഖുസങ്ഘോ ധമ്മേന സമഗ്ഗോ സബ്ബകമ്മേസു കമ്മപ്പത്തോ.

൩൮൯. ചതുവഗ്ഗകരണഞ്ചേ, ഭിക്ഖവേ, കമ്മം ഭിക്ഖുനിചതുത്ഥോ കമ്മം കരേയ്യ – അകമ്മം ന ച കരണീയം. ചതുവഗ്ഗകരണഞ്ചേ, ഭിക്ഖവേ, കമ്മം സിക്ഖമാനചതുത്ഥോ കമ്മം കരേയ്യ… അകമ്മം ന ച കരണീയം…പേ…. സാമണേരചതുത്ഥോ കമ്മം കരേയ്യ… അകമ്മം ന ച കരണീയം. സാമണേരിചതുത്ഥോ കമ്മം കരേയ്യ… അകമ്മം ന ച കരണീയം. സിക്ഖം പച്ചക്ഖാതകചതുത്ഥോ കമ്മം കരേയ്യ… അകമ്മം ന ച കരണീയം. അന്തിമവത്ഥും അജ്ഝാപന്നകചതുത്ഥോ കമ്മം കരേയ്യ… അകമ്മം ന ച കരണീയം. ആപത്തിയാ അദസ്സനേ ഉക്ഖിത്തകചതുത്ഥോ കമ്മം കരേയ്യ… അകമ്മം ന ച കരണീയം. ആപത്തിയാ അപ്പടികമ്മേ ഉക്ഖിത്തകചതുത്ഥോ കമ്മം കരേയ്യ… അകമ്മം ന ച കരണീയം. പാപികായ ദിട്ഠിയാ അപ്പടിനിസ്സഗ്ഗേ ഉക്ഖിത്തകചതുത്ഥോ കമ്മം കരേയ്യ… അകമ്മം ന ച കരണീയം. പണ്ഡകചതുത്ഥോ കമ്മം കരേയ്യ… അകമ്മം ന ച കരണീയം. ഥേയ്യസംവാസകചതുത്ഥോ കമ്മം കരേയ്യ… അകമ്മം ന ച കരണീയം. തിത്ഥിയപക്കന്തകചതുത്ഥോ കമ്മം കരേയ്യ… അകമ്മം ന ച കരണീയം. തിരച്ഛാനഗതചതുത്ഥോ കമ്മം കരേയ്യ… അകമ്മം ന ച കരണീയം. മാതുഘാതകചതുത്ഥോ കമ്മം കരേയ്യ… അകമ്മം ന ച കരണീയം. പിതുഘാതകചതുത്ഥോ കമ്മം കരേയ്യ… അകമ്മം ന ച കരണീയം. അരഹന്തഘാതകചതുത്ഥോ കമ്മം കരേയ്യ… അകമ്മം ന ച കരണീയം. ഭിക്ഖുനിദൂസകചതുത്ഥോ കമ്മം കരേയ്യ… അകമ്മം ന ച കരണീയം. സങ്ഘഭേദകചതുത്ഥോ കമ്മം കരേയ്യ… അകമ്മം ന ച കരണീയം. ലോഹിതുപ്പാദകചതുത്ഥോ കമ്മം കരേയ്യ… അകമ്മം ന ച കരണീയം. ഉഭതോബ്യഞ്ജനകചതുത്ഥോ കമ്മം കരേയ്യ… അകമ്മം ന ച കരണീയം. നാനാസംവാസകചതുത്ഥോ കമ്മം കരേയ്യ… അകമ്മം ന ച കരണീയം. നാനാസീമായ ഠിതചതുത്ഥോ കമ്മം കരേയ്യ… അകമ്മം ന ച കരണീയം. ഇദ്ധിയാ വേഹാസേ ഠിതചതുത്ഥോ കമ്മം കരേയ്യ… അകമ്മം ന ച കരണീയം. യസ്സ സങ്ഘോ കമ്മം കരോതി, തംചതുത്ഥോ കമ്മം കരേയ്യ … അകമ്മം ന ച കരണീയം.

ചതുവരണം.

൩൯൦. പഞ്ചവഗ്ഗകരണഞ്ചേ, ഭിക്ഖവേ, കമ്മം ഭിക്ഖുനിപഞ്ചമോ കമ്മം കരേയ്യ… അകമ്മം ന ച കരണീയം. പഞ്ചവഗ്ഗകരണഞ്ചേ, ഭിക്ഖവേ, കമ്മം സിക്ഖമാനപഞ്ചമോ കമ്മം കരേയ്യ…പേ…. സാമണേരപഞ്ചമോ കമ്മം കരേയ്യ… സാമണേരിപഞ്ചമോ കമ്മം കരേയ്യ … സിക്ഖം പച്ചക്ഖാതകപഞ്ചമോ കമ്മം കരേയ്യ… അന്തിമവത്ഥും അജ്ഝാപന്നകപഞ്ചമോ കമ്മം കരേയ്യ… ആപത്തിയാ അദസ്സനേ ഉക്ഖിത്തകപഞ്ചമോ കമ്മം കരേയ്യ… ആപത്തിയാ അപ്പടികമ്മേ ഉക്ഖിത്തകപഞ്ചമോ കമ്മം കരേയ്യ… പാപികായ ദിട്ഠിയാ അപ്പടിനിസ്സഗ്ഗേ ഉക്ഖിത്തകപഞ്ചമോ കമ്മം കരേയ്യ… പണ്ഡകപഞ്ചമോ കമ്മം കരേയ്യ… ഥേയ്യസംവാസകപഞ്ചമോ കമ്മം കരേയ്യ… തിത്ഥിയപക്കന്തകപഞ്ചമോ കമ്മം കരേയ്യ… തിരച്ഛാനഗതപഞ്ചമോ കമ്മം കരേയ്യ… മാതുഘാതകപഞ്ചമോ കമ്മം കരേയ്യ… പിതുഘാതകപഞ്ചമോ കമ്മം കരേയ്യ… അരഹന്തഘാതകപഞ്ചമോ കമ്മം കരേയ്യ… ഭിക്ഖുനിദൂസകപഞ്ചമോ കമ്മം കരേയ്യ… സങ്ഘഭേദകപഞ്ചമോ കമ്മം കരേയ്യ… ലോഹിതുപ്പാദകപഞ്ചമോ കമ്മം കരേയ്യ… ഉഭതോബ്യഞ്ജനകപഞ്ചമോ കമ്മം കരേയ്യ… നാനാസംവാസകപഞ്ചമോ കമ്മം കരേയ്യ… നാനാസീമായ ഠിതപഞ്ചമോ കമ്മം കരേയ്യ… ഇദ്ധിയാ വേഹാസേ ഠിതപഞ്ചമോ കമ്മം കരേയ്യ… യസ്സ സങ്ഘോ കമ്മം കരോതി, തംപഞ്ചമോ കമ്മം കരേയ്യ – അകമ്മം ന ച കരണീയം.

പഞ്ചവഗ്ഗകരണം.

൩൯൧. ദസവഗ്ഗകരണഞ്ചേ, ഭിക്ഖവേ, കമ്മം ഭിക്ഖുനിദസമോ കമ്മം കരേയ്യ, അകമ്മം ന ച കരണീയം. ദസവഗ്ഗകരണഞ്ചേ, ഭിക്ഖവേ, കമ്മം സിക്ഖമാനദസമോ കമ്മം കരേയ്യ, അകമ്മം ന ച കരണീയം…പേ…. ദസവഗ്ഗകരണഞ്ചേ, ഭിക്ഖവേ, കമ്മം യസ്സ സങ്ഘോ കമ്മം കരോതി, തംദസമോ കമ്മം കരേയ്യ – അകമ്മം ന ച കരണീയം.

ദസവഗ്ഗകരണം.

൩൯൨. വീസതിവഗ്ഗകരണഞ്ചേ, ഭിക്ഖവേ, കമ്മം ഭിക്ഖുനിവീസോ കമ്മം കരേയ്യ – അകമ്മം ന ച കരണീയം. വീസതിവഗ്ഗകരണഞ്ചേ, ഭിക്ഖവേ, കമ്മം സിക്ഖമാനവീസോ കമ്മം കരേയ്യ …പേ… സാമണേരവീസോ കമ്മം കരേയ്യ… സാമണേരിവീസോ കമ്മം കരേയ്യ… സിക്ഖം പച്ചക്ഖാതകവീസോ കമ്മം കരേയ്യ… അന്തിമവത്ഥും അജ്ഝാപന്നകവീസോ കമ്മം കരേയ്യ… ആപത്തിയാ അദസ്സനേ ഉക്ഖിത്തകവീസോ കമ്മം കരേയ്യ… ആപത്തിയാ അപ്പടികമ്മേ ഉക്ഖിത്തകവീസോ കമ്മം കരേയ്യ… പാപികായ ദിട്ഠിയാ അപ്പടിനിസ്സഗ്ഗേ ഉക്ഖിത്തകവീസോ കമ്മം കരേയ്യ… പണ്ഡകവീസോ കമ്മം കരേയ്യ… ഥേയ്യസംവാസകവീസോ കമ്മം കരേയ്യ… തിത്ഥിയപക്കന്തകവീസോ കമ്മം കരേയ്യ… തിരച്ഛാനഗതവീസോ കമ്മം കരേയ്യ… മാതുഘാതകവീസോ കമ്മം കരേയ്യ… പിതുഘാതകവീസോ കമ്മം കരേയ്യ… അരഹന്തഘാതകവീസോ കമ്മം കരേയ്യ… ഭിക്ഖുനിദൂസകവീസോ കമ്മം കരേയ്യ… സങ്ഘഭേദകവീസോ കമ്മം കരേയ്യ… ലോഹിതുപ്പാദകവീസോ കമ്മം കരേയ്യ… ഉഭതോബ്യഞ്ജനകവീസോ കമ്മം കരേയ്യ… നാനാസംവാസകവീസോ കമ്മം കരേയ്യ… നാനാസീമായ ഠിതവീസോ കമ്മം കരേയ്യ… ഇദ്ധിയാ വേഹാസേ ഠിതവീസോ കമ്മം കരേയ്യ… യസ്സ സങ്ഘോ കമ്മം കരോതി, തംവീസോ കമ്മം കരേയ്യ – അകമ്മം ന ച കരണീയം.

വീസതിവഗ്ഗകരണം.

ചതുവഗ്ഗകരണാദികഥാ നിട്ഠിതാ.

൨൩൮. പാരിവാസികാദികഥാ

൩൯൩. പാരിവാസികചതുത്ഥോ ചേ, ഭിക്ഖവേ, പരിവാസം ദദേയ്യ, മൂലായ പടികസ്സേയ്യ, മാനത്തം ദദേയ്യ, തംവീസോ അബ്ഭേയ്യ – അകമ്മം ന ച കരണീയം. മൂലായ പടികസ്സനാരഹചതുത്ഥോ ചേ, ഭിക്ഖവേ, പരിവാസം ദദേയ്യ, മൂലായ പടികസ്സേയ്യ, മാനത്തം ദദേയ്യ, തംവീസോ അബ്ഭേയ്യ – അകമ്മം ന ച കരണീയം. മാനത്താരഹചതുത്ഥോ ചേ, ഭിക്ഖവേ, പരിവാസം ദദേയ്യ, മൂലായ പടികസ്സേയ്യ, മാനത്തം ദദേയ്യ, തംവീസോ അബ്ഭേയ്യ – അകമ്മം ന ച കരണീയം. മാനത്തചാരികചതുത്ഥോ ചേ, ഭിക്ഖവേ, പരിവാസം ദദേയ്യ, മൂലായ പടികസ്സേയ്യ, മാനത്തം ദദേയ്യ, തംവീസോ അബ്ഭേയ്യ – അകമ്മം ന ച കരണീയം. അബ്ഭാനാരഹചതുത്ഥോ ചേ, ഭിക്ഖവേ, പരിവാസം ദദേയ്യ, മൂലായ പടികസ്സേയ്യ, മാനത്തം ദദേയ്യ, തംവീസോ അബ്ഭേയ്യ – അകമ്മം ന ച കരണീയം.

൩൯൪. ഏകച്ചസ്സ, ഭിക്ഖവേ, സങ്ഘമജ്ഝേ പടിക്കോസനാ രുഹതി, ഏകച്ചസ്സ ന രുഹതി. കസ്സ ച, ഭിക്ഖവേ, സങ്ഘമജ്ഝേ പടിക്കോസനാ ന രുഹതി? ഭിക്ഖുനിയാ, ഭിക്ഖവേ, സങ്ഘമജ്ഝേ പടിക്കോസനാ ന രുഹതി. സിക്ഖമാനായ, ഭിക്ഖവേ…പേ… സാമണേരസ്സ, ഭിക്ഖവേ… സാമണേരിയാ, ഭിക്ഖവേ… സിക്ഖാപച്ചക്ഖാതകസ്സ ഭിക്ഖവേ… അന്തിമവത്ഥും അജ്ഝാപന്നകസ്സ, ഭിക്ഖവേ … ഉമ്മത്തകസ്സ, ഭിക്ഖവേ… ഖിത്തചിത്തസ്സ, ഭിക്ഖവേ… വേദനാട്ടസ്സ, ഭിക്ഖവേ… ആപത്തിയാ അദസ്സനേ ഉക്ഖിത്തകസ്സ, ഭിക്ഖവേ… ആപത്തിയാ അപ്പടികമ്മേ ഉക്ഖിത്തകസ്സ, ഭിക്ഖവേ… പാപികായ ദിട്ഠിയാ അപ്പടിനിസ്സഗ്ഗേ ഉക്ഖിത്തകസ്സ, ഭിക്ഖവേ… പണ്ഡകസ്സ, ഭിക്ഖവേ… ഥേയ്യസംവാസകസ്സ, ഭിക്ഖവേ… തിത്ഥിയപക്കന്തകസ്സ, ഭിക്ഖവേ … തിരച്ഛാനഗതസ്സ ഭിക്ഖവേ… മാതുഘാതകസ്സ, ഭിക്ഖവേ… പിതുഘാതകസ്സ, ഭിക്ഖവേ… അരഹന്തഘാതകസ്സ, ഭിക്ഖവേ… ഭിക്ഖുനിദൂസകസ്സ, ഭിക്ഖവേ… സങ്ഘഭേദകസ്സ, ഭിക്ഖവേ… ലോഹിതുപ്പാദകസ്സ, ഭിക്ഖവേ… ഉഭതോബ്യഞ്ജനകസ്സ, ഭിക്ഖവേ… നാനാസംവാസകസ്സ, ഭിക്ഖവേ… നാനാസീമായ ഠിതസ്സ, ഭിക്ഖവേ… ഇദ്ധിയാ വേഹാസേ ഠിതസ്സ, ഭിക്ഖവേ, യസ്സ സങ്ഘോ കമ്മം കരോതി, തസ്സ ച [തസ്സ (സ്യാ.)], ഭിക്ഖവേ, സങ്ഘമജ്ഝേ പടിക്കോസനാ ന രുഹതി. ഇമേസം ഖോ, ഭിക്ഖവേ, സങ്ഘമജ്ഝേ പടിക്കോസനാ ന രുഹതി.

കസ്സ ച, ഭിക്ഖവേ, സങ്ഘമജ്ഝേ പടിക്കോസനാ രുഹതി? ഭിക്ഖുസ്സ, ഭിക്ഖവേ, പകതത്തസ്സ

സമാനസംവാസകസ്സ സമാനസീമായ ഠിതസ്സ അന്തമസോ ആനന്തരികസ്സാപി [അനന്തരികസ്സാപി (സ്യാ.)] ഭിക്ഖുനോ വിഞ്ഞാപേന്തസ്സ സങ്ഘമജ്ഝേ പടിക്കോസനാ രുഹതി. ഇമസ്സ ഖോ, ഭിക്ഖവേ, സങ്ഘമജ്ഝേ പടിക്കോസനാ രുഹതി.

പാരിവാസികാദികഥാ നിട്ഠിതാ.

൨൩൯. ദ്വേനിസ്സാരണാദികഥാ

൩൯൫. ദ്വേമാ, ഭിക്ഖവേ, നിസ്സാരണാ. അത്ഥി, ഭിക്ഖവേ, പുഗ്ഗലോ അപ്പത്തോ നിസ്സാരണം. തഞ്ചേ സങ്ഘോ നിസ്സാരേതി, ഏകച്ചോ സുനിസ്സാരിതോ, ഏകച്ചോ ദുന്നിസ്സാരിതോ. കതമോ ച, ഭിക്ഖവേ, പുഗ്ഗലോ അപ്പത്തോ നിസ്സാരണം, തഞ്ചേ സങ്ഘോ നിസ്സാരേതി – ദുന്നിസ്സാരിതോ? ഇധ പന, ഭിക്ഖവേ, ഭിക്ഖു സുദ്ധോ ഹോതി അനാപത്തികോ. തഞ്ചേ സങ്ഘോ നിസ്സാരേതി – ദുന്നിസ്സാരിതോ. അയം വുച്ചതി, ഭിക്ഖവേ, പുഗ്ഗലോ അപ്പത്തോ നിസ്സാരണം, തഞ്ചേ സങ്ഘോ നിസ്സാരേതി – ദുന്നിസ്സാരിതോ.

കതമോ ച, ഭിക്ഖവേ, പുഗ്ഗലോ അപ്പത്തോ നിസ്സാരണം, തഞ്ചേ സങ്ഘോ നിസ്സാരേതി – സുനിസ്സാരിതോ? ഇധ പന, ഭിക്ഖവേ, ഭിക്ഖു ബാലോ ഹോതി അബ്യത്തോ ആപത്തിബഹുലോ അനപദാനോ, ഗിഹിസംസട്ഠോ വിഹരതി അനനുലോമികേഹി ഗിഹിസംസഗ്ഗേഹി, തഞ്ചേ സങ്ഘോ നിസ്സാരേതി – സുനിസ്സാരിതോ. അയം വുച്ചതി, ഭിക്ഖവേ, പുഗ്ഗലോ അപ്പത്തോ നിസ്സാരണം, തഞ്ചേ സങ്ഘോ നിസ്സാരേതി – സുനിസ്സാരിതോ.

൩൯൬. ദ്വേമാ, ഭിക്ഖവേ, ഓസാരണാ. അത്ഥി, ഭിക്ഖവേ, പുഗ്ഗലോ അപ്പത്തോ ഓസാരണം തഞ്ചേ സങ്ഘോ ഓസാരേതി, ഏകച്ചോ സോസാരിതോ, ഏകച്ചോ ദോസാരിതോ. കതമോ ച, ഭിക്ഖവേ, പുഗ്ഗലോ അപ്പത്തോ ഓസാരണം, തഞ്ചേ സങ്ഘോ ഓസാരേതി – ദോസാരിതോ? പണ്ഡകോ, ഭിക്ഖവേ, അപ്പത്തോ ഓസാരണം, തഞ്ചേ സങ്ഘോ ഓസാരേതി – ദോസാരിതോ. ഥേയ്യസംവാസകോ, ഭിക്ഖവേ, അപ്പത്തോ ഓസാരണം, തഞ്ചേ സങ്ഘോ ഓസാരേതി – ദോസാരിതോ. തിത്ഥിയപക്കന്തകോ, ഭിക്ഖവേ…പേ… തിരച്ഛാനഗതോ, ഭിക്ഖവേ… മാതുഘാതകോ, ഭിക്ഖവേ… പിതുഘാതകോ, ഭിക്ഖവേ… അരഹന്തഘാതകോ, ഭിക്ഖവേ… ഭിക്ഖുനിദൂസകോ, ഭിക്ഖവേ… സങ്ഘഭേദകോ, ഭിക്ഖവേ… ലോഹിതുപ്പാദകോ, ഭിക്ഖവേ… ഉഭതോബ്യഞ്ജനകോ, ഭിക്ഖവേ, അപ്പത്തോ, ഓസാരണം, തഞ്ചേ സങ്ഘോ ഓസാരേതി – ദോസാരിതോ. അയം വുച്ചതി, ഭിക്ഖവേ, പുഗ്ഗലോ അപ്പത്തോ ഓസാരണം, തഞ്ചേ സങ്ഘോ ഓസാരേതി – ദോസാരിതോ. ഇമേ വുച്ചന്തി, ഭിക്ഖവേ, പുഗ്ഗലാ അപ്പത്താ ഓസാരണം, തേ ചേ സങ്ഘോ ഓസാരേതി – ദോസാരിതാ.

കതമോ ച, ഭിക്ഖവേ, പുഗ്ഗലോ അപ്പത്തോ ഓസാരണം, തഞ്ചേ സങ്ഘോ ഓസാരേതി – സോസാരിതോ? ഹത്ഥച്ഛിന്നോ, ഭിക്ഖവേ, അപ്പത്തോ ഓസാരണം, തഞ്ചേ സങ്ഘോ ഓസാരേതി, സോസാരിതോ. പാദച്ഛിന്നോ, ഭിക്ഖവേ…പേ… ഹത്ഥപാദച്ഛിന്നോ, ഭിക്ഖവേ… കണ്ണച്ഛിന്നോ, ഭിക്ഖവേ… നാസച്ഛിന്നോ, ഭിക്ഖവേ… കണ്ണനാസച്ഛിന്നോ, ഭിക്ഖവേ… അങ്ഗുലിച്ഛിന്നോ, ഭിക്ഖവേ… അളച്ഛിന്നോ, ഭിക്ഖവേ… കണ്ഡരച്ഛിന്നോ, ഭിക്ഖവേ… ഫണഹത്ഥകോ, ഭിക്ഖവേ… ഖുജ്ജോ, ഭിക്ഖവേ… വാമനോ, ഭിക്ഖവേ… ഗലഗണ്ഡീ, ഭിക്ഖവേ… ലക്ഖണാഹതോ, ഭിക്ഖവേ… കസാഹതോ, ഭിക്ഖവേ… ലിഖിതകോ, ഭിക്ഖവേ… സീപദികോ, ഭിക്ഖവേ… പാപരോഗീ, ഭിക്ഖവേ… പരിസദൂസകോ, ഭിക്ഖവേ… കാണോ, ഭിക്ഖവേ… കുണീ, ഭിക്ഖവേ… ഖഞ്ജോ, ഭിക്ഖവേ… പക്ഖഹതോ, ഭിക്ഖവേ… ഛിന്നിരിയാപഥോ, ഭിക്ഖവേ… ജരാദുബ്ബലോ, ഭിക്ഖവേ… അന്ധോ, ഭിക്ഖവേ… മൂഗോ, ഭിക്ഖവേ… ബധിരോ, ഭിക്ഖവേ… അന്ധമൂഗോ, ഭിക്ഖവേ… അന്ധബധിരോ, ഭിക്ഖവേ… മൂഗബധിരോ, ഭിക്ഖവേ… അന്ധമൂഗബധിരോ, ഭിക്ഖവേ, അപ്പത്തോ ഓസാരണം, തഞ്ചേ സങ്ഘോ ഓസാരേതി – സോസാരിതോ. അയം വുച്ചതി, ഭിക്ഖവേ, പുഗ്ഗലോ അപ്പത്തോ ഓസാരണം, തഞ്ചേ സങ്ഘോ ഓസാരേതി – സോസാരിതോ. ഇമേ വുച്ചന്തി, ഭിക്ഖവേ, പുഗ്ഗലാ അപ്പത്താ ഓസാരണം, തേ ചേ സങ്ഘോ ഓസാരേതി – സോസാരിതാ.

ദ്വേനിസ്സാരണാദികഥാ നിട്ഠിതാ.

വാസഭഗാമഭാണവാരോ നിട്ഠിതോ പഠമോ.

൨൪൦. അധമ്മകമ്മാദികഥാ

൩൯൭. ഇധ പന, ഭിക്ഖവേ, ഭിക്ഖുസ്സ ന ഹോതി ആപത്തി ദട്ഠബ്ബാ. തമേനം ചോദേതി സങ്ഘോ വാ സമ്ബഹുലാ വാ ഏകപുഗ്ഗലോ വാ – ‘‘ആപത്തിം ത്വം, ആവുസോ, ആപന്നോ, പസ്സസേതം ആപത്തി’’ന്തി? സോ ഏവം വദേതി – ‘‘നത്ഥി മേ, ആവുസോ, ആപത്തി, യമഹം പസ്സേയ്യ’’ന്തി. തം സങ്ഘോ ആപത്തിയാ അദസ്സനേ ഉക്ഖിപതി – അധമ്മകമ്മം.

ഇധ പന, ഭിക്ഖവേ, ഭിക്ഖുസ്സ ന ഹോതി ആപത്തി പടികാതബ്ബാ. തമേനം ചോദേതി സങ്ഘോ വാ സമ്ബഹുലാ വാ ഏകപുഗ്ഗലോ വാ – ‘‘ആപത്തിം ത്വം, ആവുസോ, ആപന്നോ, പടികരോഹി തം ആപത്തി’’ന്തി. സോ ഏവം വദേതി – ‘‘നത്ഥി മേ, ആവുസോ, ആപത്തി, യമയം പടികരേയ്യ’’ന്തി. തം സങ്ഘോ ആപത്തിയാ അപ്പടികമ്മേ ഉക്ഖിപതി – അധമ്മകമ്മം.

ഇധ പന, ഭിക്ഖവേ, ഭിക്ഖുസ്സ ന ഹോതി പാപികാ ദിട്ഠി പടിനിസ്സജ്ജേതാ. തമേനം ചോദേതി സങ്ഘോ വാ സമ്ബഹുലാ വാ ഏകപുഗ്ഗലോ വാ – ‘‘പാപികാ തേ, ആവുസോ, ദിട്ഠി, പടിനിസ്സജ്ജേതം പാപികം ദിട്ഠി’’ന്തി. സോ ഏവം വദേതി – ‘‘നത്ഥി മേ, ആവുസോ, പാപികാ ദിട്ഠി, യമഹം പടിനിസ്സജ്ജേയ്യ’’ന്തി. തം സങ്ഘോ പാപികായ ദിട്ഠിയാ അപ്പടിനിസ്സഗ്ഗേ ഉക്ഖിപതി – അധമ്മകമ്മം.

ഇധ പന, ഭിക്ഖവേ, ഭിക്ഖുസ്സ ന ഹോതി ആപത്തി ദട്ഠബ്ബാ, ന ഹോതി ആപത്തി പടികാതബ്ബാ. തമേനം ചോദേതി സങ്ഘോ വാ സമ്ബഹുലാ വാ ഏകപുഗ്ഗലോ വാ – ‘‘ആപത്തിം ത്വം, ആവുസോ, ആപന്നോ, പസ്സസേതം ആപത്തി? പടികരോഹി തം ആപത്തി’’ന്തി. സോ ഏവം വദേതി – ‘‘നത്ഥി മേ, ആവുസോ, ആപത്തി, യമഹം പസ്സേയ്യം. നത്ഥി മേ, ആവുസോ, ആപത്തി, യമഹം പടികരേയ്യ’’ന്തി. തം സങ്ഘോ അദസ്സനേ വാ അപ്പടികമ്മേ വാ ഉക്ഖിപതി – അധമ്മകമ്മം.

ഇധ പന, ഭിക്ഖവേ, ഭിക്ഖുസ്സ ന ഹോതി ആപത്തി ദട്ഠബ്ബാ, ന ഹോതി പാപികാ ദിട്ഠി പടിനിസ്സജ്ജേതാ. തമേനം ചോദേതി സങ്ഘോ വാ സമ്ബഹുലാ വാ ഏകപുഗ്ഗലോ വാ – ‘‘ആപത്തിം ത്വം, ആവുസോ, ആപന്നോ, പസ്സസേതം ആപത്തിം? പാപികാ തേ ദിട്ഠി, പടിനിസ്സജ്ജേതം പാപികം ദിട്ഠി’’ന്തി. സോ ഏവം വദേതി – ‘‘നത്ഥി മേ, ആവുസോ, ആപത്തി, യമഹം പസ്സേയ്യം; നത്ഥി മേ, ആവുസോ, പാപികാ ദിട്ഠി, യമഹം പടിനിസ്സജ്ജേയ്യ’’ന്തി. തം സങ്ഘോ അദസ്സനേ വാ അപ്പടിനിസ്സഗ്ഗേ വാ ഉക്ഖിപതി – അധമ്മകമ്മം.

ഇധ പന, ഭിക്ഖവേ, ഭിക്ഖുസ്സ ന ഹോതി ആപത്തി പടികാതബ്ബാ, ന ഹോതി പാപികാ ദിട്ഠി പടിനിസ്സജ്ജേതാ. തമേനം ചോദേതി സങ്ഘോ വാ സമ്ബഹുലാ വാ ഏകപുഗ്ഗലോ വാ – ‘‘ആപത്തിം ത്വം, ആവുസോ, ആപന്നോ, പടികരോഹി തം ആപത്തിം; പാപികാ തേ ദിട്ഠി, പടിനിസ്സജ്ജേതം പാപികം ദിട്ഠി’’ന്തി. സോ ഏവം വദേതി – ‘‘നത്ഥി മേ, ആവുസോ, ആപത്തി, യമഹം പടികരേയ്യം. നത്ഥി മേ, ആവുസോ, പാപികാ ദിട്ഠി, യമഹം പടിനിസ്സജ്ജേയ്യ’’ന്തി. തം സങ്ഘോ അപ്പടികമ്മേ വാ അപ്പടിനിസ്സഗ്ഗേ വാ ഉക്ഖിപതി – അധമ്മകമ്മം.

ഇധ പന, ഭിക്ഖവേ, ഭിക്ഖുസ്സ ന ഹോതി ആപത്തി ദട്ഠബ്ബാ, ന ഹോതി ആപത്തി പടികാതബ്ബാ, ന ഹോതി പാപികാ ദിട്ഠി പടിനിസ്സജ്ജേതാ. തമേനം ചോദേതി സങ്ഘോ വാ സമ്ബഹുലാ വാ ഏകപുഗ്ഗലോ വാ – ‘‘ആപത്തിം ത്വം, ആവുസോ, ആപന്നോ, പസ്സസേതം ആപത്തിം? പടികരോഹി തം ആപത്തിം; പാപികാ തേ ദിട്ഠി, പടിനിസ്സജ്ജേതം പാപികം ദിട്ഠി’’ന്തി. സോ ഏവം വദേതി – ‘‘നത്ഥി മേ, ആവുസോ, ആപത്തി, യമഹം പസ്സേയ്യം. നത്ഥി മേ, ആവുസോ, ആപത്തി, യമഹം പടികരേയ്യം. നത്ഥി മേ, ആവുസോ, പാപികാ ദിട്ഠി, യമഹം പടിനിസ്സജ്ജേയ്യ’’ന്തി. തം സങ്ഘോ അദസ്സനേ വാ അപ്പടികമ്മേ വാ അപ്പടിനിസ്സഗ്ഗേ വാ ഉക്ഖിപതി – അധമ്മകമ്മം.

൩൯൮. ഇധ പന, ഭിക്ഖവേ, ഭിക്ഖുസ്സ ഹോതി ആപത്തി ദട്ഠബ്ബാ. തമേനം ചോദേതി. സങ്ഘോ വാ സമ്ബഹുലാ വാ ഏകപുഗ്ഗലോ വാ – ‘‘ആപത്തിം ത്വം, ആവുസോ, ആപന്നോ, പസ്സസേതം ആപത്തി’’ന്തി? സോ ഏവം വദേതി – ‘‘ആമാവുസോ, പസ്സാമീ’’തി. തം സങ്ഘോ ആപത്തിയാ അദസ്സനേ ഉക്ഖിപതി – അധമ്മകമ്മം.

ഇധ പന, ഭിക്ഖവേ, ഭിക്ഖുസ്സ ഹോതി ആപത്തി പടികാതബ്ബാ. തമേനം ചോദേതി സങ്ഘോ വാ സമ്ബഹുലാ വാ ഏകപുഗ്ഗലോ വാ – ‘‘ആപത്തിം ത്വം, ആവുസോ, ആപന്നോ, പടികരോഹി തം ആപത്തി’’ന്തി. സോ ഏവം വദേതി – ‘‘ആമാവുസോ, പടികരിസ്സാമീ’’തി. തം സങ്ഘോ ആപത്തിയാ അപ്പടികമ്മേ ഉക്ഖിപതി – അധമ്മകമ്മം.

ഇധ പന, ഭിക്ഖവേ, ഭിക്ഖുസ്സ ഹോതി പാപികാ ദിട്ഠി പടിനിസ്സജ്ജേതാ. തമേനം ചോദേതി സങ്ഘോ വാ സമ്ബഹുലാ വാ ഏകപുഗ്ഗലോ വാ – ‘‘പാപികാ തേ, ആവുസോ, ദിട്ഠി; പടിനിസ്സജ്ജേതം പാപികം ദിട്ഠി’’ന്തി. സോ ഏവം വദേതി – ‘‘ആമാവുസോ, പടിനിസ്സജ്ജിസ്സാമീ’’തി. തം സങ്ഘോ പാപികായ ദിട്ഠിയാ അപ്പടിനിസ്സഗ്ഗേ ഉക്ഖിപതി – അധമ്മകമ്മം.

ഇധ പന, ഭിക്ഖവേ, ഭിക്ഖുസ്സ ഹോതി ആപത്തി ദട്ഠബ്ബാ, ഹോതി ആപത്തി പടികാതബ്ബാ…പേ… ഹോതി ആപത്തി ദട്ഠബ്ബാ, ഹോതി പാപികാ ദിട്ഠി പടിനിസ്സജ്ജേതാ…പേ… ഹോതി ആപത്തി പടികാതബ്ബാ, ഹോതി പാപികാ ദിട്ഠി പടിനിസ്സജ്ജേതാ…പേ… ഹോതി ആപത്തി ദട്ഠബ്ബാ, ഹോതി ആപത്തി പടികാതബ്ബാ, ഹോതി പാപികാ ദിട്ഠി പടിനിസ്സജ്ജേതാ. തമേനം ചോദേതി സങ്ഘോ വാ സമ്ബഹുലാ വാ ഏകപുഗ്ഗലോ വാ – ‘‘ആപത്തിം ത്വം, ആവുസോ, ആപന്നോ, പസ്സസേതം ആപത്തിം? പടികരോഹി തം ആപത്തിം; പാപികാ തേ ദിട്ഠി, പടിനിസ്സജ്ജേതം പാപികം ദിട്ഠി’’ന്തി. സോ ഏവം വദേതി – ‘‘ആമാവുസോ, പസ്സാമി, ആമ പടികരിസ്സാമി, ആമ പടിനിസ്സജ്ജിസ്സാമീ’’തി. തം സങ്ഘോ അദസ്സനേ വാ അപ്പടികമ്മേ വാ അപ്പടിനിസ്സഗ്ഗേ വാ ഉക്ഖിപതി – അധമ്മകമ്മം.

൩൯൯. ഇധ പന, ഭിക്ഖവേ, ഭിക്ഖുസ്സ ഹോതി ആപത്തി ദട്ഠബ്ബാ. തമേനം ചോദേതി സങ്ഘോ വാ സമ്ബഹുലാ വാ ഏകപുഗ്ഗലോ വാ – ‘‘ആപത്തിം ത്വം, ആവുസോ, ആപന്നോ, പസ്സസേതം ആപത്തി’’ന്തി? സോ ഏവം വദേതി – ‘‘നത്ഥി മേ, ആവുസോ, ആപത്തി, യമഹം പസ്സേയ്യ’’ന്തി. തം സങ്ഘോ ആപത്തിയാ അദസ്സനേ ഉക്ഖിപതി – ധമ്മകമ്മം.

ഇധ പന, ഭിക്ഖവേ, ഭിക്ഖുസ്സ ഹോതി ആപത്തി പടികാതബ്ബാ. തമേനം ചോദേതി സങ്ഘോ വാ സമ്ബഹുലാ വാ ഏകപുഗ്ഗലോ വാ – ‘‘ആപത്തിം ത്വം, ആവുസോ, ആപന്നോ, പടികരോഹി തം ആപത്തി’’ന്തി. സോ ഏവം വദേതി – ‘‘നത്ഥി മേ, ആവുസോ, ആപത്തി, യമഹം പടികരേയ്യ’’ന്തി. തം സങ്ഘോ ആപത്തിയാ അപ്പടികമ്മേ ഉക്ഖിപതി – ധമ്മകമ്മം.

ഇധ പന, ഭിക്ഖവേ, ഭിക്ഖുസ്സ ഹോതി പാപികാ ദിട്ഠി പടിനിസ്സജ്ജേതാ. തമേനം ചോദേതി സങ്ഘോ വാ സമ്ബഹുലാ വാ ഏകപുഗ്ഗലോ വാ – ‘‘പാപികാ തേ, ആവുസോ, ദിട്ഠി, പടിനിസ്സജ്ജേതം പാപികം ദിട്ഠി’’ന്തി. സോ ഏവം വദേതി – ‘‘നത്ഥി മേ, ആവുസോ, പാപികാ ദിട്ഠി, യമഹം പടിനിസ്സജ്ജേയ്യ’’ന്തി. തം സങ്ഘോ പാപികായ ദിട്ഠിയാ അപ്പടിനിസ്സഗ്ഗേ ഉക്ഖിപതി – ധമ്മകമ്മം.

ഇധ പന, ഭിക്ഖവേ, ഭിക്ഖുസ്സ ഹോതി ആപത്തി ദട്ഠബ്ബാ, ഹോതി ആപത്തി പടികാതബ്ബാ…പേ…

ഹോതി ആപത്തി ദട്ഠബ്ബാ, ഹോതി പാപികാ ദിട്ഠി പടിനിസ്സജ്ജേതാ…പേ… ഹോതി ആപത്തി പടികാതബ്ബാ, ഹോതി പാപികാ ദിട്ഠി പടിനിസ്സജ്ജേതാ …പേ… ഹോതി ആപത്തി ദട്ഠബ്ബാ, ഹോതി ആപത്തി പടികാതബ്ബാ, ഹോതി പാപികാ ദിട്ഠി പടിനിസ്സജ്ജേതാ. തമേനം ചോദേതി സങ്ഘോ വാ സമ്ബഹുലാ വാ ഏകപുഗ്ഗലോ വാ – ‘‘ആപത്തിം ത്വം, ആവുസോ, ആപന്നോ, പസ്സസേതം ആപത്തിം? പടികരോഹി തം ആപത്തിം. പാപികാ തേ ദിട്ഠി, പടിനിസ്സജ്ജേതം പാപികം ദിട്ഠി’’ന്തി. സോ ഏവം വദേതി – ‘‘നത്ഥി മേ, ആവുസോ, ആപത്തി, യമഹം പസ്സേയ്യം. നത്ഥി മേ, ആവുസോ, ആപത്തി യമഹം പടികരേയ്യം. നത്ഥി മേ, ആവുസോ, പാപികാ ദിട്ഠി, യമഹം പടിനിസ്സജ്ജേയ്യ’’ന്തി. തം സങ്ഘോ അദസ്സനേ വാ അപ്പടികമ്മേ വാ അപ്പടിനിസ്സഗ്ഗേ വാ ഉക്ഖിപതി – ധമ്മകമ്മന്തി.

അധമ്മകമ്മാദികഥാ നിട്ഠിതാ.

൨൪൧. ഉപാലിപുച്ഛാകഥാ

൪൦൦. അഥ ഖോ ആയസ്മാ ഉപാലി യേന ഭഗവാ തേനുപസങ്കമി, ഉപസങ്കമിത്വാ ഭഗവന്തം അഭിവാദേത്വാ ഏകമന്തം നിസീദി. ഏകമന്തം നിസിന്നോ ഖോ ആയസ്മാ ഉപാലി ഭഗവന്തം ഏതദവോച – ‘‘യോ നു ഖോ, ഭന്തേ, സമഗ്ഗോ സങ്ഘോ സമ്മുഖാകരണീയം കമ്മം അസമ്മുഖാ കരോതി, ധമ്മകമ്മം നു ഖോ തം, ഭന്തേ, വിനയകമ്മ’’ന്തി? ‘‘അധമ്മകമ്മം തം, ഉപാലി, അവിനയകമ്മ’’ന്തി. ‘‘യോ നു ഖോ, ഭന്തേ, സമഗ്ഗോ സങ്ഘോ പടിപുച്ഛാകരണീയം കമ്മം അപ്പടിപുച്ഛാ കരോതി…പേ… പടിഞ്ഞായകരണീയം കമ്മം അപടിഞ്ഞായ കരോതി… സതിവിനയാരഹസ്സ അമൂള്ഹവിനയം ദേതി… അമൂള്ഹവിനയാരഹസ്സ തസ്സപാപിയസികാകമ്മം കരോതി… തസ്സപാപിയസികാകമ്മാരഹസ്സ തജ്ജനീയകമ്മം കരോതി… തജ്ജനീയകമ്മാരഹസ്സ നിയസ്സകമ്മം കരോതി … നിയസ്സകമ്മാരഹസ്സ പബ്ബാജനീയകമ്മം കരോതി… പബ്ബാജനീയകമ്മാരഹസ്സ പടിസാരണീയകമ്മം കരോതി… പടിസാരണീയകമ്മാരഹസ്സ ഉക്ഖേപനീയകമ്മം കരോതി… ഉക്ഖേപനീയകമ്മാരഹസ്സ പരിവാസം ദേതി… പരിവാസാരഹം മൂലായ പടികസ്സതി… മൂലായപടികസ്സനാരഹസ്സ മാനത്തം ദേതി… മാനത്താരഹം അബ്ഭേതി… അബ്ഭാനാരഹം ഉപസമ്പാദേതി, ധമ്മകമ്മം നു ഖോ തം, ഭന്തേ, വിനയകമ്മ’’ന്തി? ‘‘അധമ്മകമ്മം തം, ഉപാലി, അവിനയകമ്മം’’.

‘‘യോ ഖോ, ഉപാലി, സമഗ്ഗോ സങ്ഘോ സമ്മുഖാകരണീയം കമ്മം അസമ്മുഖാ കരോതി, ഏവം ഖോ, ഉപാലി, അധമ്മകമ്മം ഹോതി അവിനയകമ്മം, ഏവഞ്ച പന സങ്ഘോ സാതിസാരോ ഹോതി. യോ ഖോ, ഉപാലി, സമഗ്ഗോ സങ്ഘോ പടിപുച്ഛാകരണീയം കമ്മം അപ്പടിപുച്ഛാ കരോതി…പേ… പടിഞ്ഞായകരണീയം കമ്മം അപടിഞ്ഞായ കരോതി… സതിവിനയാരഹസ്സ അമൂള്ഹവിനയം ദേതി… അമൂള്ഹവിനയാരഹസ്സ തസ്സപാപിയസികാകമ്മം കരോതി… തസ്സപാപിയസികാകമ്മാരഹസ്സ തജ്ജനീയകമ്മം കരോതി… തജ്ജനീയകമ്മാരഹസ്സ നിയസ്സകമ്മം കരോതി… നിയസ്സകമ്മാരഹസ്സ പബ്ബാജനീയകമ്മം കരോതി… പബ്ബാജനീയകമ്മാരഹസ്സ പടിസാരണീയകമ്മം കരോതി… പടിസാരണീയകമ്മാരഹസ്സ ഉക്ഖേപനീയകമ്മം കരോതി… ഉക്ഖേപനീയകമ്മാരഹസ്സ പരിവാസം ദേതി… പരിവാസാരഹം മൂലായ പടികസ്സതി… മൂലായപടികസ്സനാരഹസ്സ മാനത്തം ദേതി… മാനത്താരഹം അബ്ഭേതി… അബ്ഭാനാരഹം ഉപസമ്പാദേതി, ഏവം ഖോ, ഉപാലി, അധമ്മകമ്മം ഹോതി അവിനയകമ്മം. ഏവഞ്ച പന സങ്ഘോ സാതിസാരോ ഹോതീ’’തി.

൪൦൧. ‘‘യോ നു ഖോ, ഭന്തേ, സമഗ്ഗോ സങ്ഘോ സമ്മുഖാകരണീയം കമ്മം സമ്മുഖാ കരോതി, ധമ്മകമ്മം നു ഖോ തം, ഭന്തേ, വിനയകമ്മ’’ന്തി? ‘‘ധമ്മകമ്മം തം, ഉപാലി, വിനയകമ്മ’’ന്തി. ‘‘യോ നു ഖോ, ഭന്തേ, സമഗ്ഗോ സങ്ഘോ പടിപുച്ഛാകരണീയം കമ്മം പടിപുച്ഛാ കരോതി…പേ… പടിഞ്ഞായകരണീയം കമ്മം പടിഞ്ഞായ കരോതി… സതിവിനയാരഹസ്സ സതിവിനയം ദേതി… അമൂള്ഹവിനയാരഹസ്സ അമൂള്ഹവിനയം ദേതി… തസ്സപാപിയസികാകമ്മാരഹസ്സ തസ്സപാപിയസികാകമ്മം കരോതി… തജ്ജനീയകമ്മാരഹസ്സ തജ്ജനീയകമ്മം കരോതി… നിയസ്സകമ്മാരഹസ്സ നിയസ്സകമ്മം കരോതി… പബ്ബാജനീയകമ്മാരഹസ്സ പബ്ബാജനീയകമ്മം കരോതി… പടിസാരണീയകമ്മാരഹസ്സ പടിസാരണീയകമ്മം കരോതി… ഉക്ഖേപനീയകമ്മാരഹസ്സ ഉക്ഖേപനീയകമ്മം കരോതി… പരിവാസാരഹസ്സ പരിവാസം ദേതി മൂലായപടികസ്സനാരഹം മൂലായ പടികസ്സതി… മാനത്താരഹസ്സ മാനത്തം ദേതി… അബ്ഭാനാരഹം അബ്ഭേതി… ഉപസമ്പദാരഹം ഉപസമ്പാദേതി, ധമ്മകമ്മം നു ഖോ തം, ഭന്തേ, വിനയകമ്മ’’ന്തി? ‘‘ധമ്മകമ്മം തം, ഉപാലി, വിനയകമ്മം.

‘‘യോ ഖോ, ഉപാലി, സമഗ്ഗോ സങ്ഘോ സമ്മുഖാകരണീയം കമ്മം സമ്മുഖാ കരോതി, ഏവം ഖോ, ഉപാലി, ധമ്മകമ്മം ഹോതി വിനയകമ്മം. ഏവഞ്ച പന സങ്ഘോ അനതിസാരോ ഹോതി. യോ ഖോ, ഉപാലി, സമഗ്ഗോ സങ്ഘോ പടിപുച്ഛാകരണീയം കമ്മം പടിപുച്ഛാ കരോതി… പടിഞ്ഞായകരണീയം കമ്മം പടിഞ്ഞായ കരോതി… സതിവിനയാരഹസ്സ സതിവിനയം ദേതി… അമൂള്ഹവിനയാരഹസ്സ അമൂള്ഹവിനയം ദേതി… തസ്സപാപിയസികാകമ്മാരഹസ്സ തസ്സപാപിയസികാകമ്മം കരോതി… തജ്ജനീയകമ്മാരഹസ്സ തജ്ജനീയകമ്മം കരോതി… നിയസ്സകമ്മാരഹസ്സ നിയസ്സകമ്മം കരോതി… പബ്ബാജനീയകമ്മാരഹസ്സ പബ്ബാജനീയകമ്മം കരോതി … പടിസാരണീയകമ്മാരഹസ്സ പടിസാരണീയകമ്മം കരോതി… ഉക്ഖേപനീയകമ്മാരഹസ്സ ഉക്ഖേപനീയകമ്മം കരോതി… പരിവാസാരഹസ്സ പരിവാസം ദേതി… മൂലായപടികസ്സനാരഹം മൂലായ പടികസ്സതി… മാനത്താരഹസ്സ മാനത്തം ദേതി… അബ്ഭാനാരഹം അബ്ഭേതി… ഉപസമ്പദാരഹം ഉപസമ്പാദേതി, ഏവം ഖോ, ഉപാലി, ധമ്മകമ്മം ഹോതി വിനയകമ്മം. ഏവഞ്ച പന സങ്ഘോ അനതിസാരോ ഹോതീ’’തി.

൪൦൨. ‘‘യോ നു ഖോ, ഭന്തേ, സമഗ്ഗോ സങ്ഘോ സതിവിനയാരഹസ്സ അമൂള്ഹവിനയം ദേതി, അമൂള്ഹവിനയാരഹസ്സ സതിവിനയം ദേതി, ധമ്മകമ്മം നു ഖോ തം, ഭന്തേ, വിനയകമ്മ’’ന്തി? ‘‘അധമ്മകമ്മം തം, ഉപാലി, അവിനയകമ്മ’’ന്തി. ‘‘യോ നു ഖോ, ഭന്തേ, സമഗ്ഗോ സങ്ഘോ അമൂള്ഹവിനയാരഹസ്സ തസ്സപാപിയസികാകമ്മം കരോതി, തസ്സപാപിയസികാകമ്മാരഹസ്സ അമൂള്ഹവിനയം ദേതി…പേ… തസ്സപാപിയസികാകമ്മാരഹസ്സ തജ്ജനീയകമ്മം കരോതി, തജ്ജനീയകമ്മാരഹസ്സ തസ്സപാപിയസികാകമ്മം കരോതി… തജ്ജനീയകമ്മാരഹസ്സ നിയസ്സകമ്മം കരോതി, നിയസ്സകമ്മാരഹസ്സ തജ്ജനീയകമ്മം കരോതി… നിയസ്സകമ്മാരഹസ്സ പബ്ബാജനീയകമ്മം കരോതി, പബ്ബാജനീയകമ്മാരഹസ്സ നിയസ്സകമ്മം കരോതി… പബ്ബാജനീയകമ്മാരഹസ്സ പടിസാരണീയകമ്മം കരോതി, പടിസാരണീയകമ്മാരഹസ്സ പബ്ബാജനീയകമ്മം കരോതി… പടിസാരണീയകമ്മാരഹസ്സ ഉക്ഖേപനീയകമ്മം കരോതി, ഉക്ഖേപനീയകമ്മാരഹസ്സ പടിസാരണീയകമ്മം കരോതി… ഉക്ഖേപനീയകമ്മാരഹസ്സ പരിവാസം ദേതി, പരിവാസാരഹസ്സ ഉക്ഖേപനീയകമ്മം കരോതി… പരിവാസാരഹം മൂലായ പടികസ്സതി, മൂലായപടികസ്സനാരഹസ്സ പരിവാസം ദേതി… മൂലായപടികസ്സനാരഹസ്സ മാനത്തം ദേതി, മാനത്താരഹം മൂലായ പടികസ്സതി… മാനത്താരഹം അബ്ഭേതി, അബ്ഭാനാരഹസ്സ മാനത്തം ദേതി… അബ്ഭാനാരഹം ഉപസമ്പാദേതി, ഉപസമ്പദാരഹം അബ്ഭേതി, ധമ്മകമ്മം നു ഖോ തം, ഭന്തേ, വിനയകമ്മ’’ന്തി? ‘‘അധമ്മകമ്മം തം, ഉപാലി, അവിനയകമ്മ’’ന്തി.

‘‘യോ ഖോ, ഉപാലി, സമഗ്ഗോ സങ്ഘോ സതിവിനയാരഹസ്സ അമൂള്ഹവിനയം ദേതി, അമൂള്ഹവിനയാരഹസ്സ സതിവിനയം ദേതി, ഏവം ഖോ, ഉപാലി, അധമ്മകമ്മം ഹോതി അവിനയകമ്മം. ഏവഞ്ച പന സങ്ഘോ സാതിസാരോ ഹോതി. യോ ഖോ, ഉപാലി, സമഗ്ഗോ സങ്ഘോ അമൂള്ഹവിനയാരഹസ്സ തസ്സപാപിയസികാകമ്മം കരോതി, തസ്സപാപിയസികാകമ്മാരഹസ്സ അമൂള്ഹവിനയം ദേതി…പേ… തസ്സപാപിയസികാകമ്മാരഹസ്സ തജ്ജനീയകമ്മം കരോതി, തജ്ജനീയകമ്മാരഹസ്സ തസ്സപാപിയസികാകമ്മം കരോതി… തജ്ജനീയകമ്മാരഹസ്സ നിയസ്സകമ്മം കരോതി, നിയസ്സകമ്മാരഹസ്സ തജ്ജനീയകമ്മം കരോതി… നിയസ്സകമ്മാരഹസ്സ പബ്ബാജനീയകമ്മം കരോതി, പബ്ബാജനീയകമ്മാരഹസ്സ നിയസ്സകമ്മം കരോതി… പബ്ബാജനീയകമ്മാരഹസ്സ പടിസാരണീയകമ്മം കരോതി, പടിസാരണീയകമ്മാരഹസ്സ പബ്ബാജനീയകമ്മം കരോതി… പടിസാരണീയകമ്മാരഹസ്സ ഉക്ഖേപനീയകമ്മം കരോതി, ഉക്ഖേപനീയകമ്മാരഹസ്സ പടിസാരണീയകമ്മം കരോതി… ഉക്ഖേപനീയകമ്മാരഹസ്സ പരിവാസം ദേതി, പരിവാസാരഹസ്സ ഉക്ഖേപനീയകമ്മം കരോതി… പരിവാസാരഹം മൂലായ പടികസ്സതി, മൂലായപടികസ്സനാരഹസ്സ പരിവാസം ദേതി… മൂലായപടികസ്സനാരഹസ്സ മാനത്തം ദേതി, മാനത്താരഹം മൂലായ പടികസ്സതി – മാനത്താരഹം അബ്ഭേതി, അബ്ഭാനാരഹസ്സ മാനത്തം ദേതി… അബ്ഭാനാരഹം ഉപസമ്പാദേതി, ഉപസമ്പദാരഹം അബ്ഭേതി, ഏവം ഖോ, ഉപാലി, അധമ്മകമ്മം ഹോതി അവിനയകമ്മം. ഏവഞ്ച പന സങ്ഘോ സാതിസാരോ ഹോതീ’’തി.

൪൦൩. ‘‘യോ നു ഖോ, ഭന്തേ, സമഗ്ഗോ സങ്ഘോ സതിവിനയാരഹസ്സ സതിവിനയം ദേതി, അമൂള്ഹവിനയാരഹസ്സ അമൂള്ഹവിനയം ദേതി, ധമ്മകമ്മം നു ഖോ തം, ഭന്തേ, വിനയകമ്മ’’ന്തി? ‘‘ധമ്മകമ്മം തം, ഉപാലി, വിനയകമ്മ’’ന്തി. ‘‘യോ നു ഖോ, ഭന്തേ, സമഗ്ഗോ സങ്ഘോ അമൂള്ഹവിനയാരഹസ്സ അമൂള്ഹവിനയം ദേതി…പേ… തസ്സപാപിയസികാകമ്മാരഹസ്സ തസ്സപാപിയസികാകമ്മം കരോതി…പേ… തജ്ജനീയകമ്മാരഹസ്സ തജ്ജനീയകമ്മം കരോതി…പേ… നിയസ്സകമ്മാരഹസ്സ നിയസ്സകമ്മം കരോതി…പേ… പബ്ബാജനീയകമ്മാരഹസ്സ പബ്ബാജനീയകമ്മം കരോതി…പേ… പടിസാരണീയകമ്മാരഹസ്സ പടിസാരണീയകമ്മം കരോതി…പേ… ഉക്ഖേപനീയകമ്മാരഹസ്സ ഉക്ഖേപനീയകമ്മം കരോതി…പേ… പരിവാസാരഹസ്സ പരിവാസം ദേതി…പേ… മൂലായപടികസ്സനാരഹം മൂലായ പടികസ്സതി…പേ… മാനത്താരഹസ്സ മാനത്തം ദേതി…പേ… അബ്ഭാനാരഹം അബ്ഭേതി, ഉപസമ്പദാരഹം ഉപസമ്പാദേതി, ധമ്മകമ്മം നു ഖോ തം, ഭന്തേ, വിനയകമ്മ’’ന്തി? ‘‘ധമ്മകമ്മം തം, ഉപാലി, വിനയകമ്മം’’.

‘‘യോ ഖോ, ഉപാലി, സമഗ്ഗോ സങ്ഘോ സതിവിനയാരഹസ്സ സതിവിനയം ദേതി, അമൂള്ഹവിനയാരഹസ്സ അമൂള്ഹവിനയം ദേതി, ഏവം ഖോ, ഉപാലി, ധമ്മകമ്മം ഹോതി വിനയകമ്മം. ഏവഞ്ച പന സങ്ഘോ അനതിസാരോ ഹോതി. യോ ഖോ, ഉപാലി, സമഗ്ഗോ സങ്ഘോ അമൂള്ഹവിനയാരഹസ്സ അമൂള്ഹവിനയം ദേതി …പേ… തസ്സപാപിയസികാകമ്മാരഹസ്സ തസ്സപാപിയസികാകമ്മം കരോതി…പേ… തജ്ജനീയകമ്മാരഹസ്സ തജ്ജനീയകമ്മം കരോതി…പേ… നിയസ്സകമ്മാരഹസ്സ നിയസ്സകമ്മം കരോതി…പേ… പബ്ബാജനീയകമ്മാരഹസ്സ പബ്ബാജനീയകമ്മം കരോതി…പേ… പടിസാരണീയകമ്മാരഹസ്സ പടിസാരണീയകമ്മം കരോതി…പേ… ഉക്ഖേപനീയകമ്മാരഹസ്സ ഉക്ഖേപനീയകമ്മം കരോതി…പേ… പരിവാസാരഹസ്സ പരിവാസം ദേതി…പേ… മൂലായ പടികസ്സനാരഹം മൂലായ പടികസ്സതി…പേ… മാനത്താരഹസ്സ മാനത്തം ദേതി…പേ… അബ്ഭാനാരഹം അബ്ഭേതി, ഉപസമ്പദാരഹം ഉപസമ്പാദേതി, ഏവം ഖോ, ഉപാലി, ധമ്മകമ്മം ഹോതി വിനയകമ്മം. ഏവഞ്ച പന സങ്ഘോ അനതിസാരോ ഹോതീ’’തി.

൪൦൪. അഥ ഖോ ഭഗവാ ഭിക്ഖൂ ആമന്തേസി – യോ ഖോ, ഭിക്ഖവേ, സമഗ്ഗോ സങ്ഘോ സതിവിനയാരഹസ്സ അമൂള്ഹവിനയം ദേതി, ഏവം ഖോ, ഭിക്ഖവേ, അധമ്മകമ്മം ഹോതി അവിനയകമ്മം. ഏവഞ്ച പന സങ്ഘോ സാതിസാരോ ഹോതി. യോ ഖോ, ഭിക്ഖവേ, സമഗ്ഗോ സങ്ഘോ സതിവിനയാരഹസ്സ തസ്സപാപിയസികാകമ്മം കരോതി…പേ… സതിവിനയാരഹസ്സ തജ്ജനീയകമ്മം കരോതി… സതിവിനയാരഹസ്സ നിയസ്സകമ്മം കരോതി… സതിവിനയാരഹസ്സ പബ്ബാജനീയകമ്മം കരോതി… സതിവിനയാരഹസ്സ പടിസാരണീയകമ്മം കരോതി… സതിവിനയാരഹസ്സ ഉക്ഖേപനീയകമ്മം കരോതി … സതിവിനയാരഹസ്സ പരിവാസം ദേതി… സതിവിനയാരഹം മൂലായ പടികസ്സതി… സതിവിനയാരഹസ്സ മാനത്തം ദേതി… സതിവിനയാരഹം അബ്ഭേതി… സതിവിനയാരഹം ഉപസമ്പാദേതി, ഏവം ഖോ, ഭിക്ഖവേ, അധമ്മകമ്മം ഹോതി അവിനയകമ്മം. ഏവഞ്ച പന സങ്ഘോ സാതിസാരോ ഹോതി.

൪൦൫. യോ ഖോ, ഭിക്ഖവേ, സമഗ്ഗോ സങ്ഘോ അമൂള്ഹവിനയാരഹസ്സ തസ്സപാപിയസികാകമ്മം കരോതി, ഏവം ഖോ, ഭിക്ഖവേ, അധമ്മകമ്മം ഹോതി അവിനയകമ്മം. ഏവഞ്ച പന സങ്ഘോ സാതിസാരോ ഹോതി. യോ ഖോ, ഭിക്ഖവേ, സമഗ്ഗോ സങ്ഘോ അമൂള്ഹവിനയാരഹസ്സ തജ്ജനീയകമ്മം കരോതി…പേ… അമൂള്ഹവിനയാരഹസ്സ നിയസ്സകമ്മം കരോതി… അമൂള്ഹവിനയാരഹസ്സ പബ്ബാജനീയകമ്മം കരോതി… അമൂള്ഹവിനയാരഹസ്സ പടിസാരണീയകമ്മം കരോതി… അമൂള്ഹവിനയാരഹസ്സ ഉക്ഖേപനീയകമ്മം കരോതി… അമൂള്ഹവിനയാരഹസ്സ പരിവാസം ദേതി… അമൂള്ഹവിനയാരഹം മൂലായ പടികസ്സതി… അമൂള്ഹവിനയാരഹസ്സ മാനത്തം ദേതി… അമൂള്ഹവിനയാരഹം അബ്ഭേതി… അമൂള്ഹവിനയാരഹം ഉപസമ്പാദേതി… അമൂള്ഹവിനയാരഹസ്സ സതിവിനയം ദേതി, ഏവം ഖോ, ഭിക്ഖവേ, അധമ്മകമ്മം ഹോതി അവിനയകമ്മം. ഏവഞ്ച പന സങ്ഘോ സാതിസാരോ ഹോതി.

൪൦൬. യോ ഖോ, ഭിക്ഖവേ, സമഗ്ഗോ സങ്ഘോ തസ്സപാപിയസികാകമ്മാരഹസ്സ തജ്ജനീയകമ്മം കരോതി…പേ… തജ്ജനീയകമ്മാരഹസ്സ… നിയസ്സകമ്മാരഹസ്സ… പബ്ബാജനീയകമ്മാരഹസ്സ… പടിസാരണീയകമ്മാരഹസ്സ… ഉക്ഖേപനീയകമ്മാരഹസ്സ… പരിവാസാരഹം… മൂലായപടികസ്സനാരഹസ്സ… മാനത്താരഹം… അബ്ഭാനാരഹം… ഉപസമ്പദാരഹസ്സ സതിവിനയം ദേതി, ഏവം ഖോ, ഭിക്ഖവേ, അധമ്മകമ്മം ഹോതി അവിനയകമ്മം. ഏവഞ്ച പന സങ്ഘോ സാതിസാരോ ഹോതി. യോ ഖോ, ഭിക്ഖവേ, സമഗ്ഗോ സങ്ഘോ ഉപസമ്പദാരഹസ്സ അമൂള്ഹവിനയം ദേതി…പേ… ഉപസമ്പദാരഹസ്സ തസ്സപാപിയസികാകമ്മം കരോതി… ഉപസമ്പദാരഹസ്സ തജ്ജനീയകമ്മം കരോതി… ഉപസമ്പദാരഹസ്സ നിയസ്സകമ്മം കരോതി… ഉപസമ്പദാരഹസ്സ പബ്ബാജനീയകമ്മം കരോതി… ഉപസമ്പദാരഹസ്സ പടിസാരണീയകമ്മം കരോതി… ഉപസമ്പദാരഹസ്സ ഉക്ഖേപനീയകമ്മം കരോതി… ഉപസമ്പദാരഹസ്സ പരിവാസം ദേതി… ഉപസമ്പദാരഹം മൂലായ പടികസ്സതി… ഉപസമ്പദാരഹസ്സ മാനത്തം ദേതി… ഉപസമ്പദാരഹം അബ്ഭേതി, ഏവം ഖോ, ഭിക്ഖവേ, അധമ്മകമ്മം ഹോതി അവിനയകമ്മം. ഏവഞ്ച പന സങ്ഘോ സാതിസാരോ ഹോതീതി.

ഉപാലിപുച്ഛാകഥാ നിട്ഠിതാ.

ഉപാലിപുച്ഛാഭാണവാരോ നിട്ഠിതോ ദുതിയോ.

൨൪൨. തജ്ജനീയകമ്മകഥാ

൪൦൭. ഇധ പന, ഭിക്ഖവേ, ഭിക്ഖു ഭണ്ഡനകാരകോ ഹോതി കലഹകാരകോ വിവാദകാരകോ ഭസ്സകാരകോ സങ്ഘേ അധികരണകാരകോ. തത്ര ചേ ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു ഭണ്ഡനകാരകോ കലഹകാരകോ വിവാദകാരകോ ഭസ്സകാരകോ സങ്ഘേ അധികരണകാരകോ. ഹന്ദസ്സ മയം തജ്ജനീയകമ്മം കരോമാ’’തി. തേ തസ്സ തജ്ജനീയകമ്മം കരോന്തി – അധമ്മേന വഗ്ഗാ. സോ തമ്ഹാ ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന തജ്ജനീയകമ്മകതോ അധമ്മേന വഗ്ഗേഹി. ഹന്ദസ്സ മയം തജ്ജനീയകമ്മം കരോമാ’’തി. തേ തസ്സ തജ്ജനീയകമ്മം കരോന്തി – അധമ്മേന സമഗ്ഗാ. സോ തമ്ഹാപി ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന തജ്ജനീയകമ്മകതോ അധമ്മേന സമഗ്ഗേഹി. ഹന്ദസ്സ മയം തജ്ജനീയകമ്മം കരോമാ’’തി. തേ തസ്സ തജ്ജനീയകമ്മം കരോന്തി – ധമ്മേന വഗ്ഗാ. സോ തമ്ഹാപി ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന തജ്ജനീയകമ്മകതോ ധമ്മേന വഗ്ഗേഹി. ഹന്ദസ്സ മയം തജ്ജനീയകമ്മം കരോമാ’’തി. തേ തസ്സ തജ്ജനീയകമ്മം കരോന്തി – ധമ്മപതിരൂപകേന വഗ്ഗാ. സോ തമ്ഹാപി ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന തജ്ജനീയകമ്മകതോ ധമ്മപതിരൂപകേന വഗ്ഗേഹി. ഹന്ദസ്സ മയം തജ്ജനീയകമ്മം കരോമാ’’തി. തേ തസ്സ തജ്ജനീയകമ്മം കരോന്തി – ധമ്മപതിരൂപകേന സമഗ്ഗാ.

൪൦൮. ഇധ പന, ഭിക്ഖവേ, ഭിക്ഖു ഭണ്ഡനകാരകോ ഹോതി കലഹകാരകോ വിവാദകാരകോ ഭസ്സകാരകോ സങ്ഘേ അധികരണകാരകോ. തത്ര ചേ ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു ഭണ്ഡനകാരകോ കലഹകാരകോ വിവാദകാരകോ ഭസ്സകാരകോ സങ്ഘേ അധികരണകാരകോ. ഹന്ദസ്സ മയം തജ്ജനീയകമ്മം കരോമാ’’തി. തേ തസ്സ തജ്ജനീയകമ്മം കരോന്തി – അധമ്മേന സമഗ്ഗാ. സോ തമ്ഹാ ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന തജ്ജനീയകമ്മകതോ അധമ്മേന സമഗ്ഗേഹി. ഹന്ദസ്സ മയം തജ്ജനീയകമ്മം കരോമാ’’തി. തേ തസ്സ തജ്ജനീയകമ്മം കരോന്തി – ധമ്മേന വഗ്ഗാ. സോ തമ്ഹാപി ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന തജ്ജനീയകമ്മകതോ ധമ്മേന വഗ്ഗേഹി. ഹന്ദസ്സ മയം തജ്ജനീയകമ്മം കരോമാ’’തി. തേ തസ്സ തജ്ജനീയകമ്മം കരോന്തി – ധമ്മപതിരൂപകേന വഗ്ഗാ. സോ തമ്ഹാപി ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന തജ്ജനീയകമ്മകതോ ധമ്മപതിരൂപകേന വഗ്ഗേഹി. ഹന്ദസ്സ മയം തജ്ജനീയകമ്മം കരോമാ’’തി. തേ തസ്സ തജ്ജനീയകമ്മം കരോന്തി – ധമ്മപതിരൂപകേന സമഗ്ഗാ. സോ തമ്ഹാപി ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന തജ്ജനീയകമ്മകതോ ധമ്മപതിരൂപകേന സമഗ്ഗേഹി. ഹന്ദസ്സ മയം തജ്ജനീയകമ്മം കരോമാ’തി. തേ തസ്സ തജ്ജനീയകമ്മം കരോന്തി – അധമ്മേന വഗ്ഗാ.

൪൦൯. ഇധ പന, ഭിക്ഖവേ, ഭിക്ഖു ഭണ്ഡനകാരകോ ഹോതി കലഹകാരകോ വിവാദകാരകോ ഭസ്സകാരകോ സങ്ഘേ അധികരണകാരകോ. തത്ര ചേ ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു ഭണ്ഡനകാരകോ കലഹകാരകോ വിവാദകാരകോ ഭസ്സകാരകോ സങ്ഘേ അധികരണകാരകോ. ഹന്ദസ്സ മയം തജ്ജനീയകമ്മം കരോമാ’’തി. തേ തസ്സ തജ്ജനീയകമ്മം കരോന്തി – ധമ്മേന വഗ്ഗാ. സോ തമ്ഹാ ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന തജ്ജനീയകമ്മകതോ ധമ്മേന വഗ്ഗേഹി. ഹന്ദസ്സ മയം തജ്ജനീയകമ്മം കരോമാ’’തി. തേ തസ്സ തജ്ജനീയകമ്മം കരോന്തി – ധമ്മപതിരൂപകേന വഗ്ഗാ. സോ തമ്ഹാപി ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന തജ്ജനീയകമ്മകതോ ധമ്മപതിരൂപകേന വഗ്ഗേഹി. ഹന്ദസ്സ മയം തജ്ജനീയകമ്മം കരോമാ’’തി. തേ തസ്സ തജ്ജനീയകമ്മം കരോന്തി – ധമ്മപതിരൂപകേന സമഗ്ഗാ. സോ തമ്ഹാപി ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന തജ്ജനീയകമ്മകതോ ധമ്മപതിരൂപകേന സമഗ്ഗേഹി. ഹന്ദസ്സ മയം തജ്ജനീയകമ്മം കരോമാ’’തി. തേ തസ്സ തജ്ജനീയകമ്മം കരോന്തി – അധമ്മേന വഗ്ഗാ. സോ തമ്ഹാപി ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന തജ്ജനീയകമ്മകതോ അധമ്മേന വഗ്ഗേഹി. ഹന്ദസ്സ മയം തജ്ജനീയകമ്മം കരോമാ’’തി. തേ തസ്സ തജ്ജനീയകമ്മം കരോന്തി – അധമ്മേന സമഗ്ഗാ.

൪൧൦. ഇധ പന, ഭിക്ഖവേ, ഭിക്ഖു ഭണ്ഡനകാരകോ ഹോതി കലഹകാരകോ വിവാദകാരകോ ഭസ്സകാരകോ സങ്ഘേ അധികരണകാരകോ. തത്ര ചേ ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു ഭണ്ഡനകാരകോ കലഹകാരകോ വിവാദകാരകോ ഭസ്സകാരകോ സങ്ഘേ അധികരണകാരകോ. ഹന്ദസ്സ മയം തജ്ജനീയകമ്മം കരോമാ’’തി. തേ തസ്സ തജ്ജനീയകമ്മം കരോന്തി – ധമ്മപതിരൂപകേന വഗ്ഗാ. സോ തമ്ഹാ ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന തജ്ജനീയകമ്മകതോ ധമ്മപതിരൂപകേന വഗ്ഗേഹി. ഹന്ദസ്സ മയം തജ്ജനീയകമ്മം കരോമാ’’തി. തേ തസ്സ തജ്ജനീയകമ്മം കരോന്തി – ധമ്മപതിരൂപകേന സമഗ്ഗാ. സോ തമ്ഹാപി ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന തജ്ജനീയകമ്മകതോ ധമ്മപതിരൂപകേന സമഗ്ഗേഹി. ഹന്ദസ്സ മയം തജ്ജനീയകമ്മം കരോമാ’’തി. തേ തസ്സ തജ്ജനീയകമ്മം കരോന്തി – അധമ്മേന വഗ്ഗാ. സോ തമ്ഹാപി ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന തജ്ജനീയകമ്മകതോ അധമ്മേന വഗ്ഗേഹി. ഹന്ദസ്സ മയം തജ്ജനീയകമ്മം കരോമാ’’തി. തേ തസ്സ തജ്ജനീയകമ്മം കരോന്തി – അധമ്മേന സമഗ്ഗാ. സോ തമ്ഹാപി ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന തജ്ജനീയകമ്മകതോ അധമ്മേന സമഗ്ഗേഹി. ഹന്ദസ്സ മയം തജ്ജനീയകമ്മം കരോമാ’’തി. തേ തസ്സ തജ്ജനീയകമ്മം കരോന്തി – ധമ്മേന വഗ്ഗാ.

൪൧൧. ഇധ പന, ഭിക്ഖവേ, ഭിക്ഖു ഭണ്ഡനകാരകോ ഹോതി കലഹകാരകോ വിവാദകാരകോ ഭസ്സകാരകോ സങ്ഘേ അധികരണകാരകോ. തത്ര ചേ ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു ഭണ്ഡനകാരകോ കലഹകാരകോ വിവാദകാരകോ ഭസ്സകാരകോ സങ്ഘേ അധികരണകാരകോ. ഹന്ദസ്സ മയം തജ്ജനീയകമ്മം കരോമാ’’തി. തേ തസ്സ തജ്ജനീയകമ്മം കരോന്തി – ധമ്മപതിരൂപകേന സമഗ്ഗാ. സോ തമ്ഹാ ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന തജ്ജനീയകമ്മകതോ ധമ്മപതിരൂപകേന സമഗ്ഗേഹി. ഹന്ദസ്സ മയം തജ്ജനീയകമ്മം കരോമാ’’തി. തേ തസ്സ തജ്ജനീയകമ്മം കരോന്തി – അധമ്മേന വഗ്ഗാ. സോ തമ്ഹാപി ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന തജ്ജനീയകമ്മകതോ അധമ്മേന വഗ്ഗേഹി. ഹന്ദസ്സ മയം തജ്ജനീയകമ്മം കരോമാ’’തി. തേ തസ്സ തജ്ജനീയകമ്മം കരോന്തി – അധമ്മേന സമഗ്ഗാ. സോ തമ്ഹാപി ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന തജ്ജനീയകമ്മകതോ അധമ്മേന സമഗ്ഗേഹി. ഹന്ദസ്സ മയം തജ്ജനീയകമ്മം കരോമാ’’തി. തേ തസ്സ തജ്ജനീയകമ്മം കരോന്തി – ധമ്മേന വഗ്ഗാ. സോ തമ്ഹാപി ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന തജ്ജനീയകമ്മകതോ ധമ്മേന വഗ്ഗേഹി. ഹന്ദസ്സ മയം തജ്ജനീയകമ്മം കരോമാ’’തി. തേ തസ്സ തജ്ജനീയകമ്മം കരോന്തി – ധമ്മപതിരൂപകേന വഗ്ഗാ.

തജ്ജനീയകമ്മകഥാ നിട്ഠിതാ.

൨൪൩. നിയസ്സകമ്മകഥാ

൪൧൨. ഇധ പന, ഭിക്ഖവേ, ഭിക്ഖു ബാലോ ഹോതി അബ്യത്തോ ആപത്തിബഹുലോ അനപദാനോ, ഗിഹിസംസട്ഠോ വിഹരതി അനനുലോമികേഹി ഗിഹിസംസഗ്ഗേഹി. തത്ര ചേ ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു ബാലോ അബ്യത്തോ ആപത്തിബഹുലോ അനപദാനോ, ഗിഹിസംസട്ഠോ വിഹരതി അനനുലോമികേഹി ഗിഹിസംസഗ്ഗേഹി. ഹന്ദസ്സ മയം നിയസ്സകമ്മം കരോമാ’’തി. തേ തസ്സ നിയസ്സകമ്മം കരോന്തി – അധമ്മേന വഗ്ഗാ. സോ തമ്ഹാ ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന നിയസ്സകമ്മകതോ അധമ്മേന വഗ്ഗേഹി. ഹന്ദസ്സ മയം നിയസ്സകമ്മം കരോമാ’’തി. തേ തസ്സ നിയസ്സകമ്മം കരോന്തി – അധമ്മേന സമഗ്ഗാ…പേ… ധമ്മേന വഗ്ഗാ… ധമ്മപതിരൂപകേന വഗ്ഗാ… ധമ്മപതിരൂപകേന സമഗ്ഗാ…പേ….

യഥാ ഹേട്ഠാ, തഥാ ചക്കം കാതബ്ബം.

നിയസ്സകമ്മകഥാ നിട്ഠിതാ.

൨൪൪. പബ്ബാജനീയകമ്മകഥാ

൪൧൩. ഇധ പന, ഭിക്ഖവേ, ഭിക്ഖു കുലദൂസകോ ഹോതി പാപസമാചാരോ. തത്ര ചേ ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു കുലദൂസകോ പാപസമാചാരോ. ഹന്ദസ്സ മയം പബ്ബാജനീയകമ്മം കരോമാ’’തി. തേ തസ്സ പബ്ബാജനീയകമ്മം കരോന്തി – അധമ്മേന വഗ്ഗാ. സോ തമ്ഹാ ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന പബ്ബാജനീയകമ്മകതോ അധമ്മേന വഗ്ഗേഹി. ഹന്ദസ്സ മയം പബ്ബാജനീയകമ്മം കരോമാ’’തി. തേ തസ്സ പബ്ബാജനീയകമ്മം കരോന്തി – അധമ്മേന സമഗ്ഗാ…പേ… ധമ്മേന വഗ്ഗാ… ധമ്മപതിരൂപകേന വഗ്ഗാ… ധമ്മപതിരൂപകേന സമഗ്ഗാ…പേ….

ചക്കം കാതബ്ബം.

പബ്ബാജനീയകമ്മകതാ നിട്ഠിതാ.

൨൪൫. പടിസാരണീയകമ്മകഥാ

൪൧൪. ഇധ പന, ഭിക്ഖവേ, ഭിക്ഖു ഗിഹീ അക്കോസതി പരിഭാസതി. തത്ര ചേ ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു ഗിഹീ അക്കോസതി പരിഭാസതി. ഹന്ദസ്സ മയം പടിസാരണീയകമ്മം കരോമാ’’തി. തേ തസ്സ പടിസാരണീയകമ്മം കരോന്തി – അധമ്മേന വഗ്ഗാ. സോ തമ്ഹാ ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന പടിസാരണീയകമ്മകതോ അധമ്മേന വഗ്ഗേഹി. ഹന്ദസ്സ മയം പടിസാരണീയകമ്മം കരോമാ’’തി. തേ തസ്സ പടിസാരണീയകമ്മം കരോന്തി – അധമ്മേന സമഗ്ഗാ…പേ… ധമ്മേന വഗ്ഗാ… ധമ്മപതിരൂപകേന വഗ്ഗാ… ധമ്മപതിരൂപകേന സമഗ്ഗാ…പേ….

ചക്കം കാതബ്ബം.

പടിസാരണീയകമ്മകഥാ നിട്ഠിതാ.

൨൪൬. അദസ്സനേ ഉക്ഖേപനീയകമ്മകഥാ

൪൧൫. ഇധ പന, ഭിക്ഖവേ, ഭിക്ഖു ആപത്തിം ആപജ്ജിത്വാ ന ഇച്ഛതി ആപത്തിം പസ്സിതും. തത്ര ചേ ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു ആപത്തിം ആപജ്ജിത്വാ ന ഇച്ഛതി ആപത്തിം പസ്സിതും. ഹന്ദസ്സ മയം ആപത്തിയാ അദസ്സനേ ഉക്ഖേപനീയകമ്മം കരോമാ’’തി. തേ തസ്സ ആപത്തിയാ അദസ്സനേ ഉക്ഖേപനീയകമ്മം കരോന്തി – അധമ്മേന വഗ്ഗാ. സോ തമ്ഹാ ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന ആപത്തിയാ അദസ്സനേ ഉക്ഖേപനീയകമ്മകതോ അധമ്മേന വഗ്ഗേഹി. ഹന്ദസ്സ മയം ആപത്തിയാ അദസ്സനേ ഉക്ഖേപനീയകമ്മം കരോമാ’’തി. തേ തസ്സ ആപത്തിയാ അദസ്സനേ ഉക്ഖേപനീയകമ്മം കരോന്തി – അധമ്മേന സമഗ്ഗാ…പേ… ധമ്മേന വഗ്ഗാ… ധമ്മപതിരൂപകേന വഗ്ഗാ… ധമ്മപതിരൂപകേന സമഗ്ഗാ…പേ….

ചക്കം കാതബ്ബം.

അദസ്സനേ ഉക്ഖേപനീയകമ്മകഥാ നിട്ഠിതാ.

൨൪൭. അപ്പടികമ്മേ ഉക്ഖേപനീയകമ്മകഥാ

൪൧൬. ഇധ പന, ഭിക്ഖവേ, ഭിക്ഖു ആപത്തിം ആപജ്ജിത്വാ ന ഇച്ഛതി ആപത്തിം പടികാതും. തത്ര ചേ ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു ആപത്തിം ആപജ്ജിത്വാ ന ഇച്ഛതി ആപത്തിം പടികാതും. ഹന്ദസ്സ മയം ആപത്തിയാ അപ്പടികമ്മേ ഉക്ഖേപനീയകമ്മം കരോമാ’’തി. തേ തസ്സ ആപത്തിയാ അപ്പടികമ്മേ ഉക്ഖേപനീയകമ്മം കരോന്തി – അധമ്മേന വഗ്ഗാ. സോ തമ്ഹാ ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന ആപത്തിയാ അപ്പടികമ്മേ ഉക്ഖേപനീയകമ്മകതോ അധമ്മേന വഗ്ഗേഹി. ഹന്ദസ്സ മയം ആപത്തിയാ അപ്പടികമ്മേ ഉക്ഖേപനീയകമ്മം കരോമാ’’തി. തേ തസ്സ ആപത്തിയാ അപ്പടികമ്മേ ഉക്ഖേപനീയകമ്മം കരോന്തി – അധമ്മേന സമഗ്ഗാ…പേ… ധമ്മേന വഗ്ഗാ… ധമ്മപതിരൂപകേന വഗ്ഗാ… ധമ്മപതിരൂപകേന സമഗ്ഗാ…പേ….

ചക്കം കാതബ്ബം.

അപ്പടികമ്മേ ഉക്ഖേപനീയകമ്മകഥാ നിട്ഠിതാ.

൨൪൮. അപ്പടിനിസ്സഗ്ഗേ ഉക്ഖേപനീയകമ്മകഥാ

൪൧൭. ഇധ പന, ഭിക്ഖവേ, ഭിക്ഖു ന ഇച്ഛതി പാപികം ദിട്ഠിം പടിനിസ്സജ്ജിതും. തത്ര ചേ ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു ന ഇച്ഛതി പാപികം ദിട്ഠിം പടിനിസ്സജ്ജിതും. ഹന്ദസ്സ മയം പാപികായ ദിട്ഠിയാ അപ്പടിനിസ്സഗ്ഗേ ഉക്ഖേപനീയകമ്മം കരോമാ’’തി. തേ തസ്സ പാപികായ ദിട്ഠിയാ അപ്പടിനിസ്സഗ്ഗേ ഉക്ഖേപനീയകമ്മം കരോന്തി – അധമ്മേന വഗ്ഗാ. സോ തമ്ഹാ ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന പാപികായ ദിട്ഠിയാ അപ്പടിനിസ്സഗ്ഗേ ഉക്ഖേപനീയകമ്മകതോ അധമ്മേന വഗ്ഗേഹി. ഹന്ദസ്സ മയം പാപികായ ദിട്ഠിയാ അപ്പടിനിസ്സഗ്ഗേ ഉക്ഖേപനീയകമ്മം കരോമാ’’തി. തേ തസ്സ പാപികായ ദിട്ഠിയാ അപ്പടിനിസ്സഗ്ഗേ ഉക്ഖേപനീയകമ്മം കരോന്തി – അധമ്മേന സമഗ്ഗാ…പേ… ധമ്മേന വഗ്ഗാ… ധമ്മപതിരൂപകേന വഗ്ഗാ… ധമ്മപതിരൂപകേന സമഗ്ഗാ…പേ….

ചക്കം കാതബ്ബം.

അപ്പടിനിസ്സഗ്ഗേ ഉക്ഖേപനീയകമ്മകഥാ നിട്ഠിതാ.

൨൪൯. തജ്ജനീയകമ്മപടിപ്പസ്സദ്ധികഥാ

൪൧൮. ഇധ പന, ഭിക്ഖവേ, ഭിക്ഖു സങ്ഘേന തജ്ജനീയകമ്മകതോ സമ്മാ വത്തതി, ലോമം പാതേതി, നേത്ഥാരം വത്തതി, തജ്ജനീയസ്സ കമ്മസ്സ പടിപ്പസ്സദ്ധിം യാചതി. തത്ര ചേ ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന തജ്ജനീയകമ്മകതോ സമ്മാ വത്തതി, ലോമം പാതേതി, നേത്ഥാരം വത്തതി, തജ്ജനീയസ്സ കമ്മസ്സ പടിപ്പസ്സദ്ധിം യാചതി. ഹന്ദസ്സ മയം തജ്ജനീയകമ്മം പടിപ്പസ്സമ്ഭേമാ’’തി. തേ തസ്സ തജ്ജനീയകമ്മം പടിപ്പസ്സമ്ഭേന്തി – അധമ്മേന വഗ്ഗാ. സോ തമ്ഹാ ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘ഇമസ്സ ഖോ, ആവുസോ, ഭിക്ഖുനോ സങ്ഘേന തജ്ജനീയകമ്മം പടിപ്പസ്സദ്ധം അധമ്മേന സമഗ്ഗേഹി. ഹന്ദസ്സ മയം തജ്ജനീയകമ്മം പടിപ്പസ്സമ്ഭേമാ’’തി. തേ തസ്സ തജ്ജനീയകമ്മം പടിപ്പസ്സമ്ഭേന്തി – അധമ്മേന സമഗ്ഗാ. സോ തമ്ഹാപി ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘ഇമസ്സ ഖോ, ആവുസോ, ഭിക്ഖുനോ സങ്ഘേന തജ്ജനീയകമ്മം പടിപ്പസ്സദ്ധം അധമ്മേന വഗ്ഗേഹി. ഹന്ദസ്സ മയം തജ്ജനീയകമ്മം പടിപ്പസ്സമ്ഭേമാ’’തി. തേ തസ്സ തജ്ജനീയകമ്മം പടിപ്പസ്സമ്ഭേന്തി – ധമ്മേന വഗ്ഗാ. സോ തമ്ഹാപി ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘ഇമസ്സ ഖോ, ആവുസോ, ഭിക്ഖുനോ സങ്ഘേന തജ്ജനീയകമ്മം പടിപ്പസ്സദ്ധം ധമ്മേന വഗ്ഗേഹി. ഹന്ദസ്സ മയം തജ്ജനീയകമ്മം പടിപ്പസ്സമ്ഭേമാ’’തി. തേ തസ്സ തജ്ജനീയകമ്മം പടിപ്പസ്സമ്ഭേന്തി – ധമ്മപതിരൂപകേന വഗ്ഗാ. സോ തമ്ഹാപി ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘ഇമസ്സ ഖോ, ആവുസോ, ഭിക്ഖുനോ സങ്ഘേന തജ്ജനീയകമ്മം പടിപ്പസ്സദ്ധം ധമ്മപതിരൂപകേന വഗ്ഗേഹി. ഹന്ദസ്സ മയം തജ്ജനീയകമ്മം പടിപ്പസ്സമ്ഭേമാ’’തി. തേ തസ്സ തജ്ജനീയകമ്മം പടിപ്പസ്സമ്ഭേന്തി – ധമ്മപതിരൂപകേന സമഗ്ഗാ.

൪൧൯. ഇധ പന, ഭിക്ഖവേ, ഭിക്ഖു സങ്ഘേന തജ്ജനീയകമ്മകതോ സമ്മാ വത്തതി, ലോമം പാതേതി, നേത്ഥാരം വത്തതി, തജ്ജനീയസ്സ കമ്മസ്സ പടിപ്പസ്സദ്ധിം യാചതി. തത്ര ചേ ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന തജ്ജനീയകമ്മകതോ സമ്മാ വത്തതി, ലോമം പാതേതി, നേത്ഥാരം വത്തതി, തജ്ജനീയസ്സ കമ്മസ്സ പടിപ്പസ്സദ്ധിം യാചതി. ഹന്ദസ്സ മയം തജ്ജനീയകമ്മം പടിപ്പസ്സമ്ഭേമാ’’തി. തേ തസ്സ തജ്ജനീയകമ്മം പടിപ്പസ്സമ്ഭേന്തി – അധമ്മേന സമഗ്ഗാ. സോ തമ്ഹാ ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘ഇമസ്സ ഖോ, ആവുസോ, ഭിക്ഖുനോ സങ്ഘേന തജ്ജനീയകമ്മം പടിപ്പസ്സദ്ധം അധമ്മേന സമഗ്ഗേഹി. ഹന്ദസ്സ മയം തജ്ജനീയകമ്മം പടിപ്പസ്സമ്ഭേമാ’’തി. തേ തസ്സ തജ്ജനീയകമ്മം പടിപ്പസ്സമ്ഭേന്തി – ധമ്മേന വഗ്ഗാ. സോ തമ്ഹാപി ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘ഇമസ്സ ഖോ, ആവുസോ, ഭിക്ഖുനോ സങ്ഘേന തജ്ജനീയകമ്മം പടിപ്പസ്സദ്ധം ധമ്മേന വഗ്ഗേഹി. ഹന്ദസ്സ മയം തജ്ജനീയകമ്മം പടിപ്പസ്സമ്ഭേമാ’’തി. തേ തസ്സ തജ്ജനീയകമ്മം പടിപ്പസ്സമ്ഭേന്തി – ധമ്മപതിരൂപകേന വഗ്ഗാ. സോ തമ്ഹാപി ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘ഇമസ്സ ഖോ, ആവുസോ, ഭിക്ഖുനോ സങ്ഘേന തജ്ജനീയകമ്മം പടിപ്പസ്സദ്ധം ധമ്മപതിരൂപകേന വഗ്ഗേഹി. ഹന്ദസ്സ മയം തജ്ജനീയകമ്മം പടിപ്പസ്സമ്ഭേമാ’’തി. തേ തസ്സ തജ്ജനീയകമ്മം പടിപ്പസ്സമ്ഭേന്തി – ധമ്മപതിരൂപകേന സമഗ്ഗാ. സോ തമ്ഹാപി ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘ഇമസ്സ ഖോ, ആവുസോ, ഭിക്ഖുനോ സങ്ഘേന തജ്ജനീയകമ്മം പടിപ്പസ്സദ്ധം ധമ്മപതിരൂപകേന സമഗ്ഗേഹി. ഹന്ദസ്സ മയം തജ്ജനീയകമ്മം പടിപ്പസ്സമ്ഭേമാ’’തി. തേ തസ്സ തജ്ജനീയകമ്മം പടിപ്പസ്സമ്ഭേന്തി – അധമ്മേന വഗ്ഗാ.

൪൨൦. ഇധ പന, ഭിക്ഖവേ, ഭിക്ഖു സങ്ഘേന തജ്ജനീയകമ്മകതോ സമ്മാ വത്തതി, ലോമം പാതേതി, നേത്ഥാരം വത്തതി, തജ്ജനീയസ്സ കമ്മസ്സ പടിപ്പസ്സദ്ധിം യാചതി. തത്ര ചേ ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന തജ്ജനീയകമ്മകതോ സമ്മാ വത്തതി, ലോമം പാതേതി, നേത്ഥാരം വത്തതി, തജ്ജനീയസ്സ കമ്മസ്സ പടിപ്പസ്സദ്ധിം യാചതി. ഹന്ദസ്സ മയം തജ്ജനീയകമ്മം പടിപ്പസ്സമ്ഭേമാ’’തി. തേ തസ്സ തജ്ജനീയകമ്മം പടിപ്പസ്സമ്ഭേന്തി – ധമ്മേന വഗ്ഗാ. സോ തമ്ഹാ ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘ഇമസ്സ ഖോ, ആവുസോ, ഭിക്ഖുനോ സങ്ഘേന തജ്ജനീയകമ്മം പടിപ്പസ്സദ്ധം ധമ്മേന വഗ്ഗേഹി. ഹന്ദസ്സ മയം തജ്ജനീയകമ്മം പടിപ്പസ്സമ്ഭേമാ’’തി. തേ തസ്സ തജ്ജനീയകമ്മം പടിപ്പസ്സമ്ഭേന്തി – ധമ്മപതിരൂപകേന വഗ്ഗാ. സോ തമ്ഹാപി ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘ഇമസ്സ ഖോ, ആവുസോ, ഭിക്ഖുനോ സങ്ഘേന തജ്ജനീയകമ്മം പടിപ്പസ്സദ്ധം ധമ്മപതിരൂപകേന വഗ്ഗേഹി. ഹന്ദസ്സ മയം തജ്ജനീയകമ്മം പടിപ്പസ്സമ്ഭേമാ’’തി. തേ തസ്സ തജ്ജനീയകമ്മം പടിപ്പസ്സമ്ഭേന്തി – ധമ്മപതിരൂപകേന സമഗ്ഗാ. സോ തമ്ഹാപി ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘ഇമസ്സ ഖോ, ആവുസോ, ഭിക്ഖുനോ സങ്ഘേന തജ്ജനീയകമ്മം പടിപ്പസ്സദ്ധം ധമ്മപതിരൂപകേന സമഗ്ഗേഹി. ഹന്ദസ്സ മയം തജ്ജനീയകമ്മം പടിപ്പസ്സമ്ഭേമാ’’തി. തേ തസ്സ തജ്ജനീയകമ്മം പടിപ്പസ്സമ്ഭേന്തി – അധമ്മേന വഗ്ഗാ. സോ തമ്ഹാപി ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘ഇമസ്സ ഖോ, ആവുസോ, ഭിക്ഖുനോ സങ്ഘേന തജ്ജനീയകമ്മം പടിപ്പസ്സദ്ധം അധമ്മേന വഗ്ഗേഹി. ഹന്ദസ്സ മയം തജ്ജനീയകമ്മം പടിപ്പസ്സമ്ഭേമാ’’തി. തേ തസ്സ തജ്ജനീയകമ്മം പടിപ്പസ്സമ്ഭേന്തി – അധമ്മേന സമഗ്ഗാ.

൪൨൧. ഇധ പന, ഭിക്ഖവേ, ഭിക്ഖു സങ്ഘേന തജ്ജനീയകമ്മകതോ സമ്മാ വത്തതി, ലോമം പാതേതി, നേത്ഥാരം വത്തതി, തജ്ജനീയസ്സ കമ്മസ്സ പടിപ്പസ്സദ്ധിം യാചതി. തത്ര ചേ ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന തജ്ജനീയകമ്മകതോ സമ്മാ വത്തതി, ലോമം പാതേതി, നേത്ഥാരം വത്തതി, തജ്ജനീയസ്സ കമ്മസ്സ പടിപ്പസ്സദ്ധിം യാചതി. ഹന്ദസ്സ മയം തജ്ജനീയകമ്മം പടിപ്പസ്സമ്ഭേമാ’’തി. തേ തസ്സ തജ്ജനീയകമ്മം പടിപ്പസ്സമ്ഭേന്തി – ധമ്മപതിരൂപകേന വഗ്ഗാ. സോ തമ്ഹാ ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘ഇമസ്സ ഖോ, ആവുസോ, ഭിക്ഖുനോ സങ്ഘേന തജ്ജനീയകമ്മം പടിപ്പസ്സദ്ധം ധമ്മപതിരൂപകേന വഗ്ഗേഹി. ഹന്ദസ്സ മയം തജ്ജനീയകമ്മം പടിപ്പസ്സമ്ഭേമാ’’തി. തേ തസ്സ തജ്ജനീയകമ്മം പടിപ്പസ്സമ്ഭേന്തി – ധമ്മപതിരൂപകേന സമഗ്ഗാ. സോ തമ്ഹാപി ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘ഇമസ്സ ഖോ, ആവുസോ, ഭിക്ഖുനോ സങ്ഘേന തജ്ജനീയകമ്മം പടിപ്പസ്സദ്ധം ധമ്മപതിരൂപകേന സമഗ്ഗേഹി. ഹന്ദസ്സ മയം തജ്ജനീയകമ്മം പടിപ്പസ്സമ്ഭേമാ’’തി. തേ തസ്സ തജ്ജനീയകമ്മം പടിപ്പസ്സമ്ഭേന്തി – അധമ്മേന വഗ്ഗാ. സോ തമ്ഹാപി ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘ഇമസ്സ ഖോ, ആവുസോ, ഭിക്ഖുനോ സങ്ഘേന തജ്ജനീയകമ്മം പടിപ്പസ്സദ്ധം അധമ്മേന വഗ്ഗേഹി. ഹന്ദസ്സ മയം തജ്ജനീയകമ്മം പടിപ്പസ്സമ്ഭേമാ’’തി. തേ തസ്സ തജ്ജനീയകമ്മം പടിപ്പസ്സമ്ഭേന്തി – അധമ്മേന സമഗ്ഗാ. സോ തമ്ഹാപി ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘ഇമസ്സ ഖോ, ആവുസോ, ഭിക്ഖുനോ സങ്ഘേന തജ്ജനീയകമ്മം പടിപ്പസ്സദ്ധം അധമ്മേന സമഗ്ഗേഹി. ഹന്ദസ്സ മയം തജ്ജനീയകമ്മം പടിപ്പസ്സമ്ഭേമാ’’തി. തേ തസ്സ തജ്ജനീയകമ്മം പടിപ്പസ്സമ്ഭേന്തി – ധമ്മേന വഗ്ഗാ.

൪൨൨. ഇധ പന, ഭിക്ഖവേ, ഭിക്ഖു സങ്ഘേന തജ്ജനീയകമ്മകതോ സമ്മാ വത്തതി, ലോമം പാതേതി, നേത്ഥാരം വത്തതി, തജ്ജനീയസ്സ കമ്മസ്സ പടിപ്പസ്സദ്ധിം യാചതി. തത്ര ചേ ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന തജ്ജനീയകമ്മകതോ സമ്മാ വത്തതി, ലോമം പാതേതി, നേത്ഥാരം വത്തതി, തജ്ജനീയസ്സ കമ്മസ്സ പടിപ്പസ്സദ്ധിം യാചതി. ഹന്ദസ്സ മയം തജ്ജനീയകമ്മം പടിപ്പസ്സമ്ഭേമാ’’തി. തേ തസ്സ തജ്ജനീയകമ്മം പടിപ്പസ്സമ്ഭേന്തി – ധമ്മപതിരൂപകേന സമഗ്ഗാ. സോ തമ്ഹാ ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘ഇമസ്സ ഖോ, ആവുസോ, ഭിക്ഖുനോ സങ്ഘേന തജ്ജനീയകമ്മം പടിപ്പസ്സദ്ധം ധമ്മപതിരൂപകേന സമഗ്ഗേഹി. ഹന്ദസ്സ മയം തജ്ജനീയകമ്മം പടിപ്പസ്സമ്ഭേമാ’’തി. തേ തസ്സ തജ്ജനീയകമ്മം പടിപ്പസ്സമ്ഭേന്തി – അധമ്മേന വഗ്ഗാ. സോ തമ്ഹാപി ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘ഇമസ്സ ഖോ, ആവുസോ, ഭിക്ഖുനോ സങ്ഘേന തജ്ജനീയകമ്മം പടിപ്പസ്സദ്ധം അധമ്മേന വഗ്ഗേഹി. ഹന്ദസ്സ മയം തജ്ജനീയകമ്മം പടിപ്പസ്സമ്ഭേമാ’’തി. തേ തസ്സ തജ്ജനീയകമ്മം പടിപ്പസ്സമ്ഭേന്തി – അധമ്മേന സമഗ്ഗാ. സോ തമ്ഹാപി ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘ഇമസ്സ ഖോ, ആവുസോ, ഭിക്ഖുനോ സങ്ഘേന തജ്ജനീയകമ്മം പടിപ്പസ്സദ്ധം അധമ്മേന സമഗ്ഗേഹി. ഹന്ദസ്സ മയം തജ്ജനീയകമ്മം പടിപ്പസ്സമ്ഭേമാ’’തി. തേ തസ്സ തജ്ജനീയകമ്മം പടിപ്പസ്സമ്ഭേന്തി – ധമ്മേന വഗ്ഗാ. സോ തമ്ഹാപി ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘ഇമസ്സ ഖോ, ആവുസോ, ഭിക്ഖുനോ സങ്ഘേന തജ്ജനീയകമ്മം പടിപ്പസ്സദ്ധം ധമ്മേന വഗ്ഗേഹി. ഹന്ദസ്സ മയം തജ്ജനീയകമ്മം പടിപ്പസ്സമ്ഭേമാ’’തി. തേ തസ്സ തജ്ജനീയകമ്മം പടിപ്പസ്സമ്ഭേന്തി – ധമ്മപതിരൂപകേന വഗ്ഗാ.

തജ്ജനീയകമ്മപടിപ്പസ്സദ്ധികഥാ നിട്ഠിതാ.

൨൫൦. നിയസ്സകമ്മപടിപ്പസ്സദ്ധികഥാ

൪൨൩. ഇധ പന, ഭിക്ഖവേ, ഭിക്ഖു സങ്ഘേന നിയസ്സകമ്മകതോ സമ്മാ വത്തതി, ലോമം പാതേതി, നേത്ഥാരം വത്തതി, നിയസ്സസ്സ കമ്മസ്സ പടിപ്പസ്സദ്ധിം യാചതി. തത്ര ചേ ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന നിയസ്സകമ്മകതോ സമ്മാ വത്തതി, ലോമം പാതേതി, നേത്ഥാരം വത്തതി, നിയസ്സസ്സ കമ്മസ്സ പടിപ്പസ്സദ്ധിം യാചതി. ഹന്ദസ്സ മയം നിയസ്സകമ്മം പടിപ്പസ്സമ്ഭേമാ’’തി. തേ തസ്സ നിയസ്സകമ്മം പടിപ്പസ്സമ്ഭേന്തി – അധമ്മേന വഗ്ഗാ. സോ തമ്ഹാ ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘ഇമസ്സ ഖോ, ആവുസോ, ഭിക്ഖുനോ സങ്ഘേന നിയസ്സകമ്മം പടിപ്പസ്സദ്ധം അധമ്മേന വഗ്ഗേഹി. ഹന്ദസ്സ മയം നിയസ്സകമ്മം പടിപ്പസ്സമ്ഭേമാ’’തി. തേ തസ്സ നിയസ്സകമ്മം പടിപ്പസ്സമ്ഭേന്തി – അധമ്മേന സമഗ്ഗാ…പേ… ധമ്മേന വഗ്ഗാ… ധമ്മപതിരൂപകേന വഗ്ഗാ… ധമ്മപതിരൂപകേന സമഗ്ഗാ…പേ….

ചക്കം കാതബ്ബം.

നിയസ്സകമ്മപടിപ്പസ്സദ്ധികഥാ നിട്ഠിതാ.

൨൫൧. പബ്ബാജനീയകമ്മപടിപ്പസ്സദ്ധികഥാ

൪൨൪. ഇധ പന, ഭിക്ഖവേ, ഭിക്ഖു സങ്ഘേന പബ്ബാജനീയകമ്മകതോ സമ്മാ വത്തതി, ലോമം പാതേതി, നേത്ഥാരം വത്തതി, പബ്ബാജനീയസ്സ കമ്മസ്സ പടിപ്പസ്സദ്ധിം യാചതി. തത്ര ചേ ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന പബ്ബാജനീയകമ്മകതോ സമ്മാ വത്തതി, ലോമം പാതേതി, നേത്ഥാരം വത്തതി, പബ്ബാജനീയസ്സ കമ്മസ്സ പടിപ്പസ്സദ്ധിം യാചതി. ഹന്ദസ്സ മയം പബ്ബാജനീയകമ്മം പടിപ്പസ്സമ്ഭേമാ’’തി. തേ തസ്സ പബ്ബാജനീയകമ്മം പടിപ്പസ്സമ്ഭേന്തി – അധമ്മേന വഗ്ഗാ. സോ തമ്ഹാ ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘ഇമസ്സ ഖോ, ആവുസോ, ഭിക്ഖുനോ സങ്ഘേന പബ്ബാജനീയകമ്മം പടിപ്പസ്സദ്ധം അധമ്മേന വഗ്ഗേഹി. ഹന്ദസ്സ മയം പബ്ബാജനീയകമ്മം പടിപ്പസ്സമ്ഭേമാ’’തി. തേ തസ്സ പബ്ബാജനീയകമ്മം പടിപ്പസ്സമ്ഭേന്തി – അധമ്മേന സമഗ്ഗാ…പേ… ധമ്മേന വഗ്ഗാ… ധമ്മപതിരൂപകേന വഗ്ഗാ… ധമ്മപതിരൂപകേന സമഗ്ഗാ…പേ….

ചക്കം കാതബ്ബം.

പബ്ബാജനീയകമ്മപടിപ്പസ്സദ്ധികഥാ നിട്ഠിതാ.

൨൫൨. പടിസാരണീയകമ്മപടിപ്പസ്സദ്ധികഥാ

൪൨൫. ഇധ പന, ഭിക്ഖവേ, ഭിക്ഖു സങ്ഘേന പടിസാരണീയകമ്മകതോ സമ്മാ വത്തതി, ലോമം പാതേതി, നേത്ഥാരം വത്തതി, പടിസാരണീയസ്സ കമ്മസ്സ പടിപ്പസ്സദ്ധിം യാചതി. തത്ര ചേ ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന പടിസാരണീയകമ്മകതോ സമ്മാ വത്തതി, ലോമം പാതേതി, നേത്ഥാരം വത്തതി, പടിസാരണീയസ്സ കമ്മസ്സ പടിപ്പസ്സദ്ധിം യാചതി. ഹന്ദസ്സ മയം പടിസാരണീയകമ്മം പടിപ്പസ്സമ്ഭേമാ’’തി. തേ തസ്സ പടിസാരണീയകമ്മം പടിപ്പസ്സമ്ഭേന്തി – അധമ്മേന വഗ്ഗാ. സോ തമ്ഹാ ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘ഇമസ്സ ഖോ, ആവുസോ, ഭിക്ഖുനോ സങ്ഘേന പടിസാരണീയകമ്മം പടിപ്പസ്സദ്ധം അധമ്മേന വഗ്ഗേഹി. ഹന്ദസ്സ മയം പടിസാരണീയകമ്മം പടിപ്പസ്സമ്ഭേമാ’’തി. തേ തസ്സ പടിസാരണീയകമ്മം പടിപ്പസ്സമ്ഭേന്തി – അധമ്മേന സമഗ്ഗാ…പേ… ധമ്മേന വഗ്ഗാ… ധമ്മപതിരൂപകേന വഗ്ഗാ… ധമ്മപതിരൂപകേന സമഗ്ഗാ…പേ….

ചക്കം കാതബ്ബം.

പടിസാരണീയകമ്മപടിപ്പസ്സദ്ധികഥാ നിട്ഠിതാ.

൨൫൩. അദസ്സനേ ഉക്ഖേപനീയകമ്മപടിപ്പസ്സദ്ധികഥാ

൪൨൬. ഇധ പന, ഭിക്ഖവേ, ഭിക്ഖു സങ്ഘേന ആപത്തിയാ അദസ്സനേ ഉക്ഖേപനീയകമ്മകതോ സമ്മാ വത്തതി, ലോമം പാതേതി, നേത്ഥാരം വത്തതി, ആപത്തിയാ അദസ്സനേ ഉക്ഖേപനീയസ്സ കമ്മസ്സ പടിപ്പസ്സദ്ധിം യാചതി. തത്ര ചേ ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന ആപത്തിയാ അദസ്സനേ ഉക്ഖേപനീയകമ്മകതോ സമ്മാ വത്തതി, ലോമം പാതേതി, നേത്ഥാരം വത്തതി, ആപത്തിയാ അദസ്സനേ ഉക്ഖേപനീയസ്സ കമ്മസ്സ പടിപ്പസ്സദ്ധിം യാചതി. ഹന്ദസ്സ മയം ആപത്തിയാ അദസ്സനേ ഉക്ഖേപനീയകമ്മം പടിപ്പസ്സമ്ഭേമാ’’തി. തേ തസ്സ ആപത്തിയാ അദസ്സനേ ഉക്ഖേപനീയകമ്മം പടിപ്പസ്സമ്ഭേന്തി – അധമ്മേന വഗ്ഗാ. സോ തമ്ഹാ ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘ഇമസ്സ ഖോ, ആവുസോ, ഭിക്ഖുനോ സങ്ഘേന ആപത്തിയാ അദസ്സനേ ഉക്ഖേപനീയകമ്മം പടിപ്പസ്സദ്ധം അധമ്മേന വഗ്ഗേഹി. ഹന്ദസ്സ മയം ആപത്തിയാ അദസ്സനേ ഉക്ഖേപനീയകമ്മം പടിപ്പസ്സമ്ഭേമാ’’തി. തേ തസ്സ ആപത്തിയാ അദസ്സനേ ഉക്ഖേപനീയകമ്മം പടിപ്പസ്സമ്ഭേന്തി – അധമ്മേന സമഗ്ഗാ…പേ… ധമ്മേന വഗ്ഗാ… ധമ്മപതിരൂപകേന വഗ്ഗാ… ധമ്മപതിരൂപകേന സമഗ്ഗാ…പേ….

ചക്കം കാതബ്ബം.

അദസ്സനേ ഉക്ഖേപനീയകമ്മപടിപ്പസ്സദ്ധികഥാ നിട്ഠിതാ.

൨൫൪. അപ്പടികമ്മേ ഉക്ഖേപനീയകമ്മപടിപ്പസ്സദ്ധികഥാ

൪൨൭. ഇധ പന, ഭിക്ഖവേ, ഭിക്ഖു സങ്ഘേന ആപത്തിയാ അപ്പടികമ്മേ ഉക്ഖേപനീയകമ്മകതോ സമ്മാ വത്തതി, ലോമം പാതേതി, നേത്ഥാരം വത്തതി, ആപത്തിയാ അപ്പടികമ്മേ ഉക്ഖേപനീയസ്സ കമ്മസ്സ പടിപ്പസ്സദ്ധിം യാചതി. തത്ര ചേ ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന ആപത്തിയാ അപ്പടികമ്മേ ഉക്ഖേപനീയകമ്മകതോ സമ്മാ വത്തതി, ലോമം പാതേതി, നേത്ഥാരം വത്തതി, ആപത്തിയാ അപ്പടികമ്മേ ഉക്ഖേപനീയസ്സ കമ്മസ്സ പടിപ്പസ്സദ്ധിം യാചതി. ഹന്ദസ്സ മയം ആപത്തിയാ അപ്പടികമ്മേ ഉക്ഖേപനീയകമ്മം പടിപ്പസ്സമ്ഭേമാ’’തി. തേ തസ്സ ആപത്തിയാ അപ്പടികമ്മേ ഉക്ഖേപനീയകമ്മം പടിപ്പസ്സമ്ഭേന്തി – അധമ്മേന വഗ്ഗാ. സോ തമ്ഹാ ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘ഇമസ്സ ഖോ, ആവുസോ, ഭിക്ഖുനോ സങ്ഘേന ആപത്തിയാ അപ്പടികമ്മേ ഉക്ഖേപനീയകമ്മം പടിപ്പസ്സദ്ധം – അധമ്മേന വഗ്ഗേഹി. ഹന്ദസ്സ മയം ആപത്തിയാ അപ്പടികമ്മേ ഉക്ഖേപനീയകമ്മം പടിപ്പസ്സമ്ഭേമാ’’തി. തേ തസ്സ ആപത്തിയാ അപ്പടികമ്മേ ഉക്ഖേപനീയകമ്മം പടിപ്പസ്സമ്ഭേന്തി – അധമ്മേന സമഗ്ഗാ…പേ… ധമ്മേന വഗ്ഗാ… ധമ്മപതിരൂപകേന വഗ്ഗാ… ധമ്മപതിരൂപകേന സമഗ്ഗാ…പേ….

ചക്കം കാതബ്ബം.

അപ്പടികമ്മേ ഉക്ഖേപനീയകമ്മപടിപ്പസ്സദ്ധികഥാ നിട്ഠിതാ.

൨൫൫. അപ്പടിനിസ്സഗ്ഗേ ഉക്ഖേപനീയകമ്മപടിപ്പസ്സദ്ധികഥാ

൪൨൮. ഇധ പന, ഭിക്ഖവേ, ഭിക്ഖു സങ്ഘേന പാപികായ ദിട്ഠിയാ അപ്പടിനിസ്സഗ്ഗേ ഉക്ഖേപനീയകമ്മകതോ സമ്മാ വത്തതി, ലോമം പാതേതി, നേത്ഥാരം വത്തതി, പാപികായ ദിട്ഠിയാ അപ്പടിനിസ്സഗ്ഗേ ഉക്ഖേപനീയസ്സ കമ്മസ്സ പടിപ്പസ്സദ്ധിം യാചതി. തത്ര ചേ ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു സങ്ഘേന പാപികായ ദിട്ഠിയാ അപ്പടിനിസ്സഗ്ഗേ ഉക്ഖേപനീയകമ്മകതോ സമ്മാ വത്തതി, ലോമം പാതേതി, നേത്ഥാരം വത്തതി, പാപികായ ദിട്ഠിയാ അപ്പടിനിസ്സഗ്ഗേ ഉക്ഖേപനീയസ്സ കമ്മസ്സ പടിപ്പസ്സദ്ധിം യാചതി. ഹന്ദസ്സ മയം പാപികായ ദിട്ഠിയാ അപ്പടിനിസ്സഗ്ഗേ ഉക്ഖേപനീയകമ്മം പടിപ്പസ്സമ്ഭേമാ’’തി. തേ തസ്സ പാപികായ ദിട്ഠിയാ അപ്പടിനിസ്സഗ്ഗേ ഉക്ഖേപനീയകമ്മം പടിപ്പസ്സമ്ഭേന്തി – അധമ്മേന വഗ്ഗാ. സോ തമ്ഹാ ആവാസാ അഞ്ഞം ആവാസം ഗച്ഛതി. തത്ഥപി ഭിക്ഖൂനം ഏവം ഹോതി – ‘‘ഇമസ്സ ഖോ, ആവുസോ, ഭിക്ഖുനോ സങ്ഘേന പാപികായ ദിട്ഠിയാ അപ്പടിനിസ്സഗ്ഗേ ഉക്ഖേപനീയകമ്മം പടിപ്പസ്സദ്ധം – അധമ്മേന വഗ്ഗേഹി. ഹന്ദസ്സ മയം പാപികായ ദിട്ഠിയാ അപ്പടിനിസ്സഗ്ഗേ ഉക്ഖേപനീയകമ്മം പടിപ്പസ്സമ്ഭേമാ’’തി. തേ തസ്സ പാപികായ ദിട്ഠിയാ അപ്പടിനിസ്സഗ്ഗേ ഉക്ഖേപനീയകമ്മം പടിപ്പസ്സമ്ഭേന്തി… അധമ്മേന സമഗ്ഗാ…പേ… ധമ്മേന വഗ്ഗാ… ധമ്മപതിരൂപകേന വഗ്ഗാ… ധമ്മപതിരൂപകേന സമഗ്ഗാ…പേ….

ചക്കം കാതബ്ബം.

അപ്പടിനിസ്സഗ്ഗേ ഉക്ഖേപനീയകമ്മപടിപ്പസ്സദ്ധികഥാ നിട്ഠിതാ.

൨൫൬. തജ്ജനീയകമ്മവിവാദകഥാ

൪൨൯. ഇധ പന, ഭിക്ഖവേ, ഭിക്ഖു ഭണ്ഡനകാരകോ ഹോതി കലഹകാരകോ വിവാദകാരകോ ഭസ്സകാരകോ സങ്ഘേ അധികരണകാരകോ. തത്ര ചേ ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു ഭണ്ഡനകാരകോ…പേ… സങ്ഘേ അധികരണകാരകോ. ഹന്ദസ്സ മയം തജ്ജനീയകമ്മം കരോമാ’’തി. തേ തസ്സ തജ്ജനീയകമ്മം കരോന്തി – അധമ്മേന വഗ്ഗാ. തത്രട്ഠോ സങ്ഘോ വിവദതി – ‘‘അധമ്മേന വഗ്ഗകമ്മം, അധമ്മേന സമഗ്ഗകമ്മം, ധമ്മേന വഗ്ഗകമ്മം, ധമ്മപതിരൂപകേന വഗ്ഗകമ്മം, ധമ്മപതിരൂപകേന സമഗ്ഗകമ്മം, അകതം കമ്മം ദുക്കടം കമ്മം പുന കാതബ്ബം കമ്മ’’ന്തി. തത്ര, ഭിക്ഖവേ, യേ തേ ഭിക്ഖൂ ഏവമാഹംസു – ‘‘അധമ്മേന വഗ്ഗകമ്മ’’ന്തി, യേ ച തേ ഭിക്ഖൂ ഏവമാഹംസു – ‘‘അകതം കമ്മം ദുക്കടം കമ്മം പുന കാതബ്ബം കമ്മ’’ന്തി, ഇമേ തത്ഥ ഭിക്ഖൂ ധമ്മവാദിനോ.

൪൩൦. ഇധ പന, ഭിക്ഖവേ, ഭിക്ഖു ഭണ്ഡനകാരകോ ഹോതി…പേ… സങ്ഘേ അധികരണകാരകോ. തത്ര ചേ ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു ഭണ്ഡനകാരകോ…പേ… സങ്ഘേ അധികരണകാരകോ. ഹന്ദസ്സ മയം തജ്ജനീയകമ്മം കരോമാ’’തി. തേ തസ്സ തജ്ജനീയകമ്മം കരോന്തി – അധമ്മേന സമഗ്ഗാ. തത്രട്ഠോ സങ്ഘോ വിവദതി – ‘‘അധമ്മേന വഗ്ഗകമ്മം, അധമ്മേന സമഗ്ഗകമ്മം, ധമ്മേന വഗ്ഗകമ്മം, ധമ്മപതിരൂപകേന വഗ്ഗകമ്മം, ധമ്മപതിരൂപകേന സമഗ്ഗകമ്മം, അകതം കമ്മം ദുക്കടം കമ്മം പുന കാതബ്ബം കമ്മ’’ന്തി. തത്ര, ഭിക്ഖവേ, യേ തേ ഭിക്ഖൂ ഏവമാഹംസു – ‘‘അധമ്മേന സമഗ്ഗകമ്മ’’ന്തി, യേ ച തേ ഭിക്ഖൂ ഏവമാഹംസു – ‘‘അകതം കമ്മം ദുക്കടം കമ്മം പുന കാതബ്ബം കമ്മ’’ന്തി, ഇമേ തത്ഥ ഭിക്ഖൂ ധമ്മവാദിനോ.

൪൩൧. ഇധ പന, ഭിക്ഖവേ, ഭിക്ഖു ഭണ്ഡനകാരകോ ഹോതി…പേ… സങ്ഘേ അധികരണകാരകോ. തത്ര ചേ ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു ഭണ്ഡനകാരകോ…പേ… സങ്ഘേ അധികരണകാരകോ ഹന്ദസ്സ മയം തജ്ജനീയകമ്മം കരോമാ’’തി. തേ തസ്സ തജ്ജനീയകമ്മം കരോന്തി – ധമ്മേന വഗ്ഗാ. തത്രട്ഠോ സങ്ഘോ വിവദതി – ‘‘അധമ്മേന വഗ്ഗകമ്മം, അധമ്മേന സമഗ്ഗകമ്മം, ധമ്മേന വഗ്ഗകമ്മം, ധമ്മപതിരൂപകേന വഗ്ഗകമ്മം, ധമ്മപതിരൂപകേന സമഗ്ഗകമ്മം, അകതം കമ്മം ദുക്കടം കമ്മം പുന കാതബ്ബം കമ്മ’’ന്തി. തത്ര, ഭിക്ഖവേ, യേ തേ ഭിക്ഖൂ ഏവമാഹംസു – ‘‘ധമ്മേന വഗ്ഗകമ്മ’’ന്തി, യേ ച തേ ഭിക്ഖൂ ഏവമാഹംസു – ‘‘അകതം കമ്മം ദുക്കടം കമ്മം പുന കാതബ്ബം കമ്മ’’ന്തി, ഇമേ തത്ഥ ഭിക്ഖൂ ധമ്മവാദിനോ.

൪൩൨. ഇധ പന, ഭിക്ഖവേ, ഭിക്ഖു ഭണ്ഡനകാരകോ ഹോതി…പേ… സങ്ഘേ അധികരണകാരകോ. തത്ര ചേ ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു ഭണ്ഡനകാരകോ…പേ… സങ്ഘേ അധികരണകാരകോ. ഹന്ദസ്സ മയം തജ്ജനീയകമ്മം കരോമാ’’തി. തേ തസ്സ തജ്ജനീയകമ്മം കരോന്തി – ധമ്മപതിരൂപകേന വഗ്ഗാ. തത്രട്ഠോ സങ്ഘോ വിവദതി – ‘‘അധമ്മേന വഗ്ഗകമ്മം, അധമ്മേന സമഗ്ഗകമ്മം, ധമ്മേന വഗ്ഗകമ്മം, ധമ്മപതിരൂപകേന വഗ്ഗകമ്മം, ധമ്മപതിരൂപകേന സമഗ്ഗകമ്മം, അകതം കമ്മം ദുക്കടം കമ്മം പുന കാതബ്ബം കമ്മ’’ന്തി. തത്ര, ഭിക്ഖവേ, യേ തേ ഭിക്ഖൂ ഏവമാഹംസു – ‘‘ധമ്മപതിരൂപകേന സമഗ്ഗകമ്മ’’ന്തി, യേ ച തേ ഭിക്ഖൂ ഏവമാഹംസു – ‘‘അകതം കമ്മം ദുക്കടം കമ്മം പുന കാതബ്ബം കമ്മ’’ന്തി, ഇമേ തത്ഥ ഭിക്ഖൂ ധമ്മവാദിനോ.

൪൩൩. ഇധ പന, ഭിക്ഖവേ, ഭിക്ഖു ഭണ്ഡനകാരകോ ഹോതി…പേ… സങ്ഘേ അധികരണകാരകോ. തത്ര ചേ ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു ഭണ്ഡനകാരകോ ഹോതി…പേ… സങ്ഘേ അധികരണകാരകോ. ഹന്ദസ്സ മയം തജ്ജനീയകമ്മം കരോമാ’’തി. തേ തസ്സ തജ്ജനീയകമ്മം കരോന്തി – ധമ്മപതിരൂപകേന സമഗ്ഗാ. തത്രട്ഠോ സങ്ഘോ വിവദതി – ‘‘അധമ്മേന വഗ്ഗകമ്മം, അധമ്മേന സമഗ്ഗകമ്മം, ധമ്മേന വഗ്ഗകമ്മം, ധമ്മപതിരൂപകേന വഗ്ഗകമ്മം, ധമ്മപതിരൂപകേന സമഗ്ഗകമ്മം, അകതം കമ്മം ദുക്കടം കമ്മം പുന കാതബ്ബം കമ്മ’’ന്തി. തത്ര, ഭിക്ഖവേ, യേ തേ ഭിക്ഖൂ ഏവമാഹംസു – ‘‘ധമ്മപതിരൂപകേന സമഗ്ഗകമ്മ’’ന്തി, യേ ച തേ ഭിക്ഖൂ ഏവമാഹംസു – ‘‘അകതം കമ്മം ദുക്കടം കമ്മം പുന കാതബ്ബം കമ്മ’’ന്തി, ഇമേ തത്ഥ ഭിക്ഖൂ ധമ്മവാദിനോ.

തജ്ജനീയകമ്മവിവാദകഥാ നിട്ഠിതാ.

൨൫൭. നിയസ്സകമ്മവിവാദകഥാ