൨൫൭. നിയസ്സകമ്മവിവാദകഥാ

൪൩൪. ഇധ പന, ഭിക്ഖവേ, ഭിക്ഖു ബാലോ ഹോതി അബ്യത്തോ ആപത്തിബഹുലോ അനപദാനോ, ഗിഹിസംസട്ഠോ വിഹരതി അനനുലോമികേഹി ഗിഹിസംസഗ്ഗേഹി. തത്ര ചേ ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു ബാലോ അബ്യത്തോ ആപത്തിബഹുലോ അനപദാനോ, ഗിഹിസംസട്ഠോ വിഹരതി അനനുലോമികേഹി ഗിഹിസംസഗ്ഗേഹി. ഹന്ദസ്സ മയം നിയസ്സകമ്മം കരോമാ’’തി. തേ തസ്സ നിയസ്സകമ്മം കരോന്തി – അധമ്മേന വഗ്ഗാ…പേ… അധമ്മേന സമഗ്ഗാ… ധമ്മേന വഗ്ഗാ… ധമ്മപതിരൂപകേന വഗ്ഗാ… ധമ്മപതിരൂപകേന സമഗ്ഗാ. തത്രട്ഠോ സങ്ഘോ വിവദതി – ‘‘അധമ്മേന വഗ്ഗകമ്മം, അധമ്മേന സമഗ്ഗകമ്മം, ധമ്മേന വഗ്ഗകമ്മം, ധമ്മപതിരൂപകേന വഗ്ഗകമ്മം, ധമ്മപതിരൂപകേന സമഗ്ഗകമ്മം, അകതം കമ്മം ദുക്കടം കമ്മം പുന കാതബ്ബം കമ്മ’’ന്തി. തത്ര, ഭിക്ഖവേ, യേ തേ ഭിക്ഖൂ ഏവമാഹംസു – ‘‘ധമ്മപതിരൂപകേന സമഗ്ഗകമ്മ’’ന്തി, യേ ച തേ ഭിക്ഖൂ ഏവമാഹംസു – ‘‘അകതം കമ്മം ദുക്കടം കമ്മം പുന കാതബ്ബം കമ്മ’’ന്തി, ഇമേ തത്ഥ ഭിക്ഖൂ ധമ്മവാദിനോ. ഇമേ പഞ്ച വാരാ സംഖിത്താ.

നിയസ്സകമ്മവിവാദകഥാ നിട്ഠിതാ.