൨൫൮. പബ്ബാജനീയകമ്മവിവാദകഥാ

൪൩൫. ഇധ പന, ഭിക്ഖവേ, ഭിക്ഖു കുലദൂസകോ ഹോതി പാപസമാചാരോ. തത്ര ചേ ഭിക്ഖൂനം ഏവം ഹോതി – ‘‘അയം ഖോ, ആവുസോ, ഭിക്ഖു കുലദൂസകോ പാപസമാചാരോ. ഹന്ദസ്സ മയം പബ്ബാജനീയകമ്മം കരോമാ’’തി. തേ തസ്സ പബ്ബാജനീയകമ്മം കരോന്തി – അധമ്മേന വഗ്ഗാ…പേ… അധമ്മേന സമഗ്ഗാ… ധമ്മേന വഗ്ഗാ… ധമ്മപതിരൂപകേന വഗ്ഗാ… ധമ്മപതിരൂപകേന സമഗ്ഗാ. തത്രട്ഠോ സങ്ഘോ വിവദതി – ‘‘അധമ്മേന വഗ്ഗകമ്മം, അധമ്മേന സമഗ്ഗകമ്മം, ധമ്മേന വഗ്ഗകമ്മം, ധമ്മപതിരൂപകേന വഗ്ഗകമ്മം, ധമ്മപതിരൂപകേന സമഗ്ഗകമ്മം, അകതം കമ്മം ദുക്കടം കമ്മം പുന കാതബ്ബം കമ്മ’’ന്തി. തത്ര, ഭിക്ഖവേ, യേ തേ ഭിക്ഖൂ ഏവമാഹംസു – ‘‘ധമ്മപതിരൂപകേന സമഗ്ഗകമ്മ’’ന്തി യേ ച തേ ഭിക്ഖൂ ഏവമാഹംസു – ‘‘അകതം കമ്മം ദുക്കടം കമ്മം പുന കാതബ്ബം കമ്മ’’ന്തി, ഇമേ തത്ഥ ഭിക്ഖൂ ധമ്മവാദിനോ. ഇമേ പഞ്ച വാരാ സംഖിത്താ.

പബ്ബാജനീയകമ്മവിവാദകഥാ നിട്ഠിതാ.