൨൩൨. അട്ഠചീവരമാതികാ

൩൭൯. അട്ഠിമാ, ഭിക്ഖവേ, മാതികാ ചീവരസ്സ ഉപ്പാദായ – സീമായ ദേതി, കതികായ ദേതി, ഭിക്ഖാപഞ്ഞത്തിയാ ദേതി, സങ്ഘസ്സ ദേതി, ഉഭതോസങ്ഘസ്സ ദേതി, വസ്സംവുട്ഠസങ്ഘസ്സ ദേതി, ആദിസ്സ ദേതി, പുഗ്ഗലസ്സ ദേതി.

സീമായ ദേതി – യാവതികാ ഭിക്ഖൂ അന്തോസീമഗതാ തേഹി ഭാജേതബ്ബം. കതികായ ദേതി – സമ്ബഹുലാ ആവാസാ സമാനലാഭാ ഹോന്തി ഏകസ്മിം ആവാസേ ദിന്നേ സബ്ബത്ഥ ദിന്നം ഹോതി. ഭിക്ഖാപഞ്ഞത്തിയാ ദേതി, യത്ഥ സങ്ഘസ്സ ധുവകാരാ കരിയ്യന്തി, തത്ഥ ദേതി. സങ്ഘസ്സ ദേതി, സമ്മുഖീഭൂതേന സങ്ഘേന ഭാജേതബ്ബം. ഉഭതോസങ്ഘസ്സ ദേതി, ബഹുകാപി ഭിക്ഖൂ ഹോന്തി, ഏകാ ഭിക്ഖുനീ ഹോതി, ഉപഡ്ഢം ദാതബ്ബം, ബഹുകാപി ഭിക്ഖുനിയോ ഹോന്തി, ഏകോ ഭിക്ഖു ഹോതി, ഉപഡ്ഢം ദാതബ്ബം. വസ്സംവുട്ഠസങ്ഘസ്സ ദേതി, യാവതികാ ഭിക്ഖൂ തസ്മിം ആവാസേ വസ്സംവുട്ഠാ, തേഹി ഭാജേതബ്ബം. ആദിസ്സ ദേതി, യാഗുയാ വാ ഭത്തേ വാ ഖാദനീയേ വാ ചീവരേ വാ സേനാസനേ വാ ഭേസജ്ജേ വാ. പുഗ്ഗലസ്സ ദേതി, ‘‘ഇമം ചീവരം ഇത്ഥന്നാമസ്സ ദമ്മീ’’തി.

അട്ഠചീവരമാതികാ നിട്ഠിതാ.

ചീവരക്ഖന്ധകോ അട്ഠമോ.