൨൩൧. ദുഗ്ഗഹിതസുഗ്ഗഹിതാദികഥാ

൩൭൭. തേന ഖോ പന സമയേന ആയസ്മാ രേവതോ അഞ്ഞതരസ്സ ഭിക്ഖുനോ ഹത്ഥേ ആയസ്മതോ സാരിപുത്തസ്സ ചീവരം പാഹേസി – ‘‘ഇമം ചീവരം ഥേരസ്സ ദേഹീ’’തി. അഥ ഖോ സോ ഭിക്ഖു അന്തരാമഗ്ഗേ ആയസ്മതോ രേവതസ്സ വിസ്സാസാ തം ചീവരം അഗ്ഗഹേസി. അഥ ഖോ ആയസ്മാ രേവതോ ആയസ്മതാ സാരിപുത്തേന സമാഗന്ത്വാ പുച്ഛി – ‘‘അഹം, ഭന്തേ, ഥേരസ്സ ചീവരം പാഹേസിം. സമ്പത്തം തം ചീവര’’ന്തി? ‘‘നാഹം തം, ആവുസോ, ചീവരം പസ്സാമീ’’തി. അഥ ഖോ ആയസ്മാ രേവതോ തം ഭിക്ഖും ഏതദവോച – ‘‘അഹം, ആവുസോ, ആയസ്മതോ ഹത്ഥേ ഥേരസ്സ ചീവരം പാഹേസിം. കഹം തം ചീവര’’ന്തി? ‘‘അഹം, ഭന്തേ, ആയസ്മതോ വിസ്സാസാ തം ചീവരം അഗ്ഗഹേസി’’ന്തി. ഭഗവതോ ഏതമത്ഥം ആരോചേസും.

൩൭൮. ഇധ പന, ഭിക്ഖവേ, ഭിക്ഖു ഭിക്ഖുസ്സ ഹത്ഥേ ചീവരം പഹിണതി – ‘‘ഇമം ചീവരം ഇത്ഥന്നാമസ്സ ദേഹീ’’തി. സോ അന്തരാമഗ്ഗേ യോ പഹിണതി തസ്സ വിസ്സാസാ ഗണ്ഹാതി. സുഗ്ഗഹിതം. യസ്സ പഹിയ്യതി തസ്സ വിസ്സാസാ ഗണ്ഹാതി. ദുഗ്ഗഹിതം.

ഇധ പന, ഭിക്ഖവേ, ഭിക്ഖു ഭിക്ഖുസ്സ ഹത്ഥേ ചീവരം പഹിണതി – ‘‘ഇമം ചീവരം ഇത്ഥന്നാമസ്സ ദേഹീ’’തി. സോ അന്തരാമഗ്ഗേ യസ്സ പഹിയ്യതി തസ്സ വിസ്സാസാ ഗണ്ഹാതി. ദുഗ്ഗഹിതം. യോ പഹിണതി തസ്സ വിസ്സാസാ ഗണ്ഹാതി. സുഗ്ഗഹിതം.

ഇധ പന, ഭിക്ഖവേ, ഭിക്ഖു ഭിക്ഖുസ്സ ഹത്ഥേ ചീവരം പഹിണതി – ‘‘ഇമം ചീവരം ഇത്ഥന്നാമസ്സ ദേഹീ’’തി. സോ അന്തരാമഗ്ഗേ സുണാതി – യോ പഹിണതി സോ കാലങ്കതോതി. തസ്സ മതകചീവരം അധിട്ഠാതി. സ്വാധിട്ഠിതം. യസ്സ പഹിയ്യതി തസ്സ വിസ്സാസാ ഗണ്ഹാതി. ദുഗ്ഗഹിതം.

ഇധ പന, ഭിക്ഖവേ, ഭിക്ഖു ഭിക്ഖുസ്സ ഹത്ഥേ ചീവരം പഹിണതി – ‘‘ഇമം ചീവരം ഇത്ഥന്നാമസ്സ ദേഹീ’’തി. സോ അന്തരാമഗ്ഗേ സുണാതി – യസ്സ പഹിയ്യതി സോ കാലങ്കതോതി. തസ്സ മതകചീവരം അധിട്ഠാതി. ദ്വാധിട്ഠിതം. യോ പഹിണതി തസ്സ വിസ്സാസാ ഗണ്ഹാതി. സുഗ്ഗഹിതം.

ഇധ പന, ഭിക്ഖവേ, ഭിക്ഖു ഭിക്ഖുസ്സ ഹത്ഥേ ചീവരം പഹിണതി – ‘‘ഇമം ചീവരം ഇത്ഥന്നാമസ്സ ദേഹീ’’തി. സോ അന്തരാമഗ്ഗേ സുണാതി – ഉഭോ കാലങ്കതാതി. യോ പഹിണതി തസ്സ മതകചീവരം അധിട്ഠാതി. സ്വാധിട്ഠിതം. യസ്സ പഹിയ്യതി തസ്സ മതകചീവരം അധിട്ഠാതി. ദ്വാധിട്ഠിതം.

ഇധ പന, ഭിക്ഖവേ, ഭിക്ഖു ഭിക്ഖുസ്സ ഹത്ഥേ ചീവരം പഹിണതി – ‘‘ഇമം ചീവരം ഇത്ഥന്നാമസ്സ ദമ്മീ’’തി. സോ അന്തരാമഗ്ഗേ യോ പഹിണതി തസ്സ വിസ്സാസാ ഗണ്ഹാതി. ദുഗ്ഗഹിതം. യസ്സ പഹിയ്യതി തസ്സ വിസ്സാസാ ഗണ്ഹാതി. സുഗ്ഗഹിതം.

ഇധ പന, ഭിക്ഖവേ, ഭിക്ഖു ഭിക്ഖുസ്സ ഹത്ഥേ ചീവരം പഹിണതി – ‘‘ഇമം ചീവരം ഇത്ഥന്നാമസ്സ ദമ്മീ’’തി. സോ അന്തരാമഗ്ഗേ യസ്സ പഹിയ്യതി തസ്സ വിസ്സാസാ ഗണ്ഹാതി. സുഗ്ഗഹിതം. യോ പഹിണതി തസ്സ വിസ്സാസാ ഗണ്ഹാതി. ദുഗ്ഗഹിതം.

ഇധ പന, ഭിക്ഖവേ, ഭിക്ഖു ഭിക്ഖുസ്സ ഹത്ഥേ ചീവരം പഹിണതി – ‘‘ഇമം ചീവരം ഇത്ഥന്നാമസ്സ ദമ്മീ’’തി. സോ അന്തരാമഗ്ഗേ സുണാതി – ‘‘യോ പഹിണതി സോ കാലങ്കതോ’’തി. തസ്സ മതകചീവരം അധിട്ഠാതി. ദ്വാധിട്ഠിതം. യസ്സ പഹിയ്യതി തസ്സ വിസ്സാസാ ഗണ്ഹാതി. സുഗ്ഗഹിതം.

ഇധ പന, ഭിക്ഖവേ, ഭിക്ഖു ഭിക്ഖുസ്സ ഹത്ഥേ ചീവരം പഹിണതി – ‘‘ഇമം ചീവരം ഇത്ഥന്നാമസ്സ ദമ്മീ’’തി. സോ അന്തരാമഗ്ഗേ സുണാതി – ‘‘യസ്സ പഹിയ്യതി സോ കാലങ്കതോ’’തി. തസ്സ മതകചീവരം അധിട്ഠാതി. സ്വാധിട്ഠിതം. യോ പഹിണതി തസ്സ വിസ്സാസാ ഗണ്ഹാതി. ദുഗ്ഗഹിതം.

ഇധ പന, ഭിക്ഖവേ, ഭിക്ഖു ഭിക്ഖുസ്സ ഹത്ഥേ ചീവരം പഹിണതി – ‘‘ഇമം ചീവരം ഇത്ഥന്നാമസ്സ ദമ്മീ’’തി. സോ അന്തരാമഗ്ഗേ സുണാതി ‘‘ഉഭോ കാലങ്കതാ’’തി. യോ പഹിണതി തസ്സ മതകചീവരം അധിട്ഠാതി. ദ്വാധിട്ഠിതം. യസ്സ പഹിയ്യതി തസ്സ മതകചീവരം അധിട്ഠാതി. സ്വാധിട്ഠിതം.

ദുഗ്ഗഹിതസുഗ്ഗഹിതാദികഥാ നിട്ഠിതാ.