൨൩൦. സങ്ഘേ ഭിന്നേ ചീവരുപ്പാദകഥാ

൩൭൬. ഇധ പന, ഭിക്ഖവേ, വസ്സംവുട്ഠാനം ഭിക്ഖൂനം അനുപ്പന്നേ ചീവരേ സങ്ഘോ ഭിജ്ജതി. തത്ഥ മനുസ്സാ ഏകസ്മിം പക്ഖേ ഉദകം ദേന്തി, ഏകസ്മിം പക്ഖേ ചീവരം ദേന്തി – സങ്ഘസ്സ ദേമാതി. സങ്ഘസ്സേവേതം.

ഇധ പന, ഭിക്ഖവേ, വസ്സംവുട്ഠാനം ഭിക്ഖൂനം അനുപ്പന്നേ ചീവരേ സങ്ഘോ ഭിജ്ജതി. തത്ഥ മനുസ്സാ ഏകസ്മിം പക്ഖേ ഉദകം ദേന്തി, തസ്മിംയേവ പക്ഖേ ചീവരം ദേന്തി – സങ്ഘസ്സ ദേമാതി. സങ്ഘസ്സേവേതം.

ഇധ പന, ഭിക്ഖവേ, വസ്സംവുട്ഠാനം ഭിക്ഖൂനം അനുപ്പന്നേ ചീവരേ സങ്ഘോ ഭിജ്ജതി. തത്ഥ മനുസ്സാ ഏകസ്മിം പക്ഖേ ഉദകം ദേന്തി, ഏകസ്മിം പക്ഖേ ചീവരം ദേന്തി – പക്ഖസ്സ ദേമാതി. പക്ഖസ്സേവേതം.

ഇധ പന, ഭിക്ഖവേ, വസ്സംവുട്ഠാനം ഭിക്ഖൂനം അനുപ്പന്നേ ചീവരേ സങ്ഘോ ഭിജ്ജതി. തത്ഥ മനുസ്സാ ഏകസ്മിം പക്ഖേ ഉദകം ദേന്തി, തസ്മിംയേവ പക്ഖേ ചീവരം ദേന്തി – പക്ഖസ്സ ദേമാതി. പക്ഖസ്സേവേതം.

ഇധ പന, ഭിക്ഖവേ, വസ്സംവുട്ഠാനം ഭിക്ഖൂനം ഉപ്പന്നേ ചീവരേ അഭാജിതേ സങ്ഘോ ഭിജ്ജതി. സബ്ബേസം സമകം ഭാജേതബ്ബന്തി.

സങ്ഘേ ഭിന്നേ ചീവരുപ്പാദകഥാ നിട്ഠിതാ.