൨൨൯. വസ്സംവുട്ഠാനം അനുപ്പന്നചീവരകഥാ

൩൭൩. തേന ഖോ പന സമയേന വസ്സംവുട്ഠാ ഭിക്ഖൂ അനുപ്പന്നേ ചീവരേ പക്കമന്തിപി, വിബ്ഭമന്തിപി, കാലമ്പി കരോന്തി, സാമണേരാപി പടിജാനന്തി, സിക്ഖം പച്ചക്ഖാതകാപി പടിജാനന്തി, അന്തിമവത്ഥും അജ്ഝാപന്നകാപി പടിജാനന്തി, ഉമ്മത്തകാപി പടിജാനന്തി, ഖിത്തചിത്താപി പടിജാനന്തി, വേദനാട്ടാപി പടിജാനന്തി, ആപത്തിയാ അദസ്സനേ ഉക്ഖിത്തകാപി പടിജാനന്തി, ആപത്തിയാ അപ്പടികമ്മേ ഉക്ഖിത്തകാപി പടിജാനന്തി, പാപികായ ദിട്ഠിയാ അപ്പടിനിസ്സഗ്ഗേ ഉക്ഖിത്തകാപി പടിജാനന്തി, പണ്ഡകാപി പടിജാനന്തി, ഥേയ്യസംവാസകാപി പടിജാനന്തി, തിത്ഥിയപക്കന്തകാപി പടിജാനന്തി, തിരച്ഛാനഗതാപി പടിജാനന്തി, മാതുഘാതകാപി പടിജാനന്തി, പിതുഘാതകാപി പടിജാനന്തി, അരഹന്തഘാതകാപി പടിജാനന്തി, ഭിക്ഖുനിദൂസകാപി പടിജാനന്തി, സങ്ഘഭേദകാപി പടിജാനന്തി, ലോഹിതുപ്പാദകാപി പടിജാനന്തി, ഉഭതോബ്യഞ്ജനകാപി പടിജാനന്തി. ഭഗവതോ ഏതമത്ഥം ആരോചേസും.

൩൭൪. ഇധ പന, ഭിക്ഖവേ, വസ്സംവുട്ഠോ ഭിക്ഖു അനുപ്പന്നേ ചീവരേ പക്കമതി, സന്തേ പതിരൂപേ ഗാഹകേ ദാതബ്ബം.

ഇധ പന, ഭിക്ഖവേ, വസ്സംവുട്ഠോ ഭിക്ഖു അനുപ്പന്നേ ചീവരേ വിബ്ഭമതി, കാലം കരോതി, സാമണേരോ പടിജാനാതി, സിക്ഖം പച്ചക്ഖാതകോ പടിജാനാതി, അന്തിമവത്ഥും അജ്ഝാപന്നകോ പടിജാനാതി, സങ്ഘോ സാമീ.

ഇധ പന, ഭിക്ഖവേ, വസ്സംവുട്ഠോ ഭിക്ഖു അനുപ്പന്നേ ചീവരേ ഉമ്മത്തകോ പടിജാനാതി, ഖിത്തചിത്തോ പടിജാനാതി, വേദനാട്ടോ പടിജാനാതി, ആപത്തിയാ അദസ്സനേ ഉക്ഖിത്തകോ പടിജാനാതി, ആപത്തിയാ അപ്പടികമ്മേ ഉക്ഖിത്തകോ പടിജാനാതി, പാപികായ ദിട്ഠിയാ അപ്പടിനിസ്സഗ്ഗേ ഉക്ഖിത്തകോ പടിജാനാതി, സന്തേ പതിരൂപേ ഗാഹകേ ദാതബ്ബം.

ഇധ പന, ഭിക്ഖവേ, വസ്സംവുട്ഠോ ഭിക്ഖു അനുപ്പന്നേ ചീവരേ പണ്ഡകോ പടിജാനാതി, ഥേയ്യസംവാസകോ പടിജാനാതി, തിത്ഥിയപക്കന്തകോ പടിജാനാതി, തിരച്ഛാനഗതോ പടിജാനാതി, മാതുഘാതകോ പടിജാനാതി, പിതുഘാതകോ പടിജാനാതി, അരഹന്തഘാതകോ പടിജാനാതി, ഭിക്ഖുനിദൂസകോ പടിജാനാതി, സങ്ഘഭേദകോ പടിജാനാതി, ലോഹിതുപ്പാദകോ പടിജാനാതി, ഉഭതോബ്യഞ്ജനകോ പടിജാനാതി, സങ്ഘോ സാമീ.

൩൭൫. ഇധ പന, ഭിക്ഖവേ, വസ്സംവുട്ഠോ ഭിക്ഖു ഉപ്പന്നേ ചീവരേ അഭാജിതേ പക്കമതി, സന്തേ പതിരൂപേ ഗാഹകേ ദാതബ്ബം.

ഇധ പന, ഭിക്ഖവേ, വസ്സംവുട്ഠോ ഭിക്ഖു ഉപ്പന്നേ ചീവരേ അഭാജിതേ വിബ്ഭമതി, കാലം കരോതി, സാമണേരോ പടിജാനാതി, സിക്ഖം പച്ചക്ഖാതകോ പടിജാനാതി, അന്തിമവത്ഥും അജ്ഝാപന്നകോ പടിജാനാതി, സങ്ഘോ സാമീ.

ഇധ പന, ഭിക്ഖവേ, വസ്സംവുട്ഠോ ഭിക്ഖു ഉപ്പന്നേ ചീവരേ അഭാജിതേ ഉമ്മത്തകോ പടിജാനാതി. ഖിത്തചിത്തോ പടിജാനാതി, വേദനാട്ടോ പടിജാനാതി, ആപത്തിയാ അദസ്സനേ ഉക്ഖിത്തകോ പടിജാനാതി, ആപത്തിയാ അപ്പടികമ്മേ ഉക്ഖിത്തകോ പടിജാനാതി, പാപികായ ദിട്ഠിയാ അപ്പടിനിസ്സഗ്ഗേ ഉക്ഖിത്തകോ പടിജാനാതി, സന്തേ പതിരൂപേ ഗാഹകേ ദാതബ്ബം.

ഇധ പന, ഭിക്ഖവേ, വസ്സംവുട്ഠോ ഭിക്ഖു ഉപ്പന്നേ ചീവരേ അഭാജിതേ പണ്ഡകോ പടിജാനാതി, ഥേയ്യസംവാസകോ പടിജാനാതി, തിത്ഥിയപക്കന്തകോ പടിജാനാതി, തിരച്ഛാനഗതോ പടിജാനാതി, മാതുഘാതകോ പടിജാനാതി, പിതുഘാതകോ പടിജാനാതി, അരഹന്തഘാതകോ പടിജാനാതി, ഭിക്ഖുനിദൂസകോ പടിജാനാതി, സങ്ഘഭേദകോ പടിജാനാതി, ലോഹിതുപ്പാദകോ പടിജാനാതി, ഉഭതോബ്യഞ്ജനകോ പടിജാനാതി, സങ്ഘോ സാമീ.

വസ്സം വുട്ഠാനം അനുപ്പന്നചീവരകഥാ നിട്ഠിതാ.