൨൨൮. സബ്ബനീലകാദിപടിക്ഖേപകഥാ

൩൭൨. തേന ഖോ പന സമയേന ഛബ്ബഗ്ഗിയാ ഭിക്ഖൂ സബ്ബനീലകാനി ചീവരാനി ധാരേന്തി…പേ… സബ്ബപീതകാനി ചീവരാനി ധാരേന്തി…പേ… സബ്ബലോഹിതകാനി ചീവരാനി ധാരേന്തി…പേ… സബ്ബമഞ്ജിട്ഠകാനി [സബ്ബമഞ്ജേട്ഠകാനി (സീ. സ്യാ.)] ചീവരാനി ധാരേന്തി…പേ… സബ്ബകണ്ഹാനി ചീവരാനി ധാരേന്തി …പേ… സബ്ബമഹാരങ്ഗരത്താനി ചീവരാനി ധാരേന്തി…പേ… സബ്ബമഹാനാമരത്താനി ചീവരാനി ധാരേന്തി…പേ… അച്ഛിന്നദസാനി ചീവരാനി ധാരേന്തി…പേ… ദീഘദസാനി ചീവരാനി ധാരേന്തി…പേ… പുപ്ഫദസാനി ചീവരാനി ധാരേന്തി…പേ… ഫണദസാനി [ഫലദസാനി (ക.)] ചീവരാനി ധാരേന്തി…പേ… കഞ്ചുകം ധാരേന്തി…പേ… തിരീടകം ധാരേന്തി…പേ… വേഠനം ധാരേന്തി. മനുസ്സാ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ സമണാ സക്യപുത്തിയാ വേഠനം ധാരേസ്സന്തി, സേയ്യഥാപി ഗിഹീ കാമഭോഗിനോ’’തി. ഭഗവതോ ഏതമത്ഥം ആരോചേസും. ന, ഭിക്ഖവേ, സബ്ബനീലകാനി ചീവരാനി ധാരേതബ്ബാനി, ന സബ്ബപീതകാനി ചീവരാനി ധാരേതബ്ബാനി, ന സബ്ബലോഹിതകാനി ചീവരാനി ധാരേതബ്ബാനി, ന സബ്ബമഞ്ജിട്ഠകാനി ചീവരാനി ധാരേതബ്ബാനി, ന സബ്ബകണ്ഹാനി ചീവരാനി ധാരേതബ്ബാനി, ന സബ്ബമഹാരങ്ഗരത്താനി ചീവരാനി ധാരേതബ്ബാനി, ന സബ്ബമഹാനാമരത്താനി ചീവരാനി ധാരേതബ്ബാനി, ന അച്ഛിന്നദസാനി ചീവരാനി ധാരേതബ്ബാനി, ന ദീഘദസാനി ചീവരാനി ധാരേതബ്ബാനി, ന പുപ്ഫദസാനി ചീവരാനി ധാരേതബ്ബാനി, ന ഫണദസാനി ചീവരാനി ധാരേതബ്ബാനി, ന കഞ്ചുകം ധാരേതബ്ബം, ന തിരീടകം ധാരേതബ്ബം, ന വേഠനം ധാരേതബ്ബം. യോ ധാരേയ്യ, ആപത്തി ദുക്കടസ്സാതി.

സബ്ബനീലകാദിപടിക്ഖേപകഥാ നിട്ഠിതാ.