൨൨൭. കുസചീരാദിപടിക്ഖേപകഥാ

൩൭൧. തേന ഖോ പന സമയേന അഞ്ഞതരോ ഭിക്ഖു കുസചീരം നിവാസേത്വാ…പേ… വാകചീരം നിവാസേത്വാ…പേ… ഫലകചീരം നിവാസേത്വാ…പേ… കേസകമ്ബലം നിവാസേത്വാ…പേ… വാളകമ്ബലം നിവാസേത്വാ…പേ… ഉലൂകപക്ഖം നിവാസേത്വാ…പേ… അജിനക്ഖിപം നിവാസേത്വാ യേന ഭഗവാ തേനുപസങ്കമി; ഉപസങ്കമിത്വാ ഭഗവന്തം ഏതദവോച – ‘‘ഭഗവാ, ഭന്തേ, അനേകപരിയായേന അപ്പിച്ഛസ്സ സന്തുട്ഠസ്സ സല്ലേഖസ്സ ധുതസ്സ പാസാദികസ്സ അപചയസ്സ വീരിയാരമ്ഭസ്സ വണ്ണവാദീ. ഇദം, ഭന്തേ, അജിനക്ഖിപം അനേകപരിയായേന അപ്പിച്ഛതായ സന്തുട്ഠിതായ സല്ലേഖായ ധുതതായ പാസാദികതായ അപചയായ വീരിയാരമ്ഭായ സംവത്തതി. സാധു, ഭന്തേ, ഭഗവാ ഭിക്ഖൂനം അജിനക്ഖിപം അനുജാനാതൂ’’തി. വിഗരഹി ബുദ്ധോ ഭഗവാ – ‘‘അനനുച്ഛവികം, മോഘപുരിസ, അനനുലോമികം അപ്പതിരൂപം അസ്സാമണകം അകപ്പിയം അകരണീയം. കഥഞ്ഹി നാമ ത്വം, മോഘപുരിസ, അജിനക്ഖിപം തിത്ഥിയധജം ധാരേസ്സസി. നേതം, മോഘപുരിസ, അപ്പസന്നാനം വാ പസാദായ…പേ… വിഗരഹിത്വാ…പേ… ധമ്മിം കഥം കത്വാ ഭിക്ഖൂ ആമന്തേസി – ‘‘ന, ഭിക്ഖവേ, അജിനക്ഖിപം തിത്ഥിയധജം ധാരേതബ്ബം. യോ ധാരേയ്യ, ആപത്തി ഥുല്ലച്ചയസ്സാ’’തി.

തേന ഖോ പന സമയേന അഞ്ഞതരോ ഭിക്ഖു അക്കനാളം നിവാസേത്വാ…പേ… പോത്ഥകം നിവാസേത്വാ യേന ഭഗവാ തേനുപസങ്കമി, ഉപസങ്കമിത്വാ ഭഗവന്തം ഏതദവോച – ‘‘ഭഗവാ, ഭന്തേ, അനേകപരിയായേന അപ്പിച്ഛസ്സ സന്തുട്ഠസ്സ സല്ലേഖസ്സ ധുതസ്സ പാസാദികസ്സ അപചയസ്സ വീരിയാരമ്ഭസ്സ, വണ്ണവാദീ. അയം, ഭന്തേ, പോത്ഥകോ അനേകപരിയായേന അപ്പിച്ഛതായ സന്തുട്ഠിതായ സല്ലേഖായ ധുതതായ പാസാദികതായ അപചയായ വീരിയാരമ്ഭായ സംവത്തതി. സാധു, ഭന്തേ, ഭഗവാ ഭിക്ഖൂനം പോത്ഥകം അനുജാനാതൂ’’തി. വിഗരഹി ബുദ്ധോ ഭഗവാ – ‘‘അനനുച്ഛവികം, മോഘപുരിസ, അനനുലോമികം അപ്പതിരൂപം അസ്സാമണകം അകപ്പിയം അകരണീയം. കഥഞ്ഹി നാമ ത്വം, മോഘപുരിസ, പോത്ഥകം നിവാസേസ്സസി. നേതം, മോഘപുരിസ, അപ്പസന്നാനം വാ പസാദായ…പേ… വിഗരഹിത്വാ…പേ… ധമ്മിം കഥം കത്വാ ഭിക്ഖൂ ആമന്തേസി – ‘‘ന, ഭിക്ഖവേ, പോത്ഥകോ നിവാസേതബ്ബോ. യോ നിവാസേയ്യ, ആപത്തി ദുക്കടസ്സാ’’തി.

കുസചീരാദിപടിക്ഖേപകഥാ നിട്ഠിതാ.