൨൨൨. സങ്ഘികചീവരുപ്പാദകഥാ

൩൬൩. തേന ഖോ പന സമയേന അഞ്ഞതരോ ഭിക്ഖു ഏകോ വസ്സം വസി. തത്ഥ മനുസ്സാ സങ്ഘസ്സ ദേമാതി ചീവരാനി അദംസു. അഥ ഖോ തസ്സ ഭിക്ഖുനോ ഏതദഹോസി – ‘‘ഭഗവതാ പഞ്ഞത്തം ‘ചതുവഗ്ഗോ പച്ഛിമോ സങ്ഘോ’തി. അഹഞ്ചമ്ഹി ഏകകോ. ഇമേ ച മനുസ്സാ സങ്ഘസ്സ ദേമാതി ചീവരാനി അദംസു. യംനൂനാഹം ഇമാനി സങ്ഘികാനി ചീവരാനി സാവത്ഥിം ഹരേയ്യ’’ന്തി. അഥ ഖോ സോ ഭിക്ഖു താനി ചീവരാനി ആദായ സാവത്ഥിം ഗന്ത്വാ ഭഗവതോ ഏതമത്ഥം ആരോചേസി. ‘‘തുയ്ഹേവ, ഭിക്ഖു, താനി ചീവരാനി യാവ കഥിനസ്സ ഉബ്ഭാരായാ’’തി. ഇധ പന, ഭിക്ഖവേ, ഭിക്ഖു ഏകോ വസ്സം വസതി. തത്ഥ മനുസ്സാ സങ്ഘസ്സ ദേമാതി ചീവരാനി ദേന്തി. അനുജാനാമി, ഭിക്ഖവേ, തസ്സേവ താനി ചീവരാനി യാവ കഥിനസ്സ ഉബ്ഭാരായാതി.

തേന ഖോ പന സമയേന അഞ്ഞതരോ ഭിക്ഖു ഉതുകാലം ഏകോ വസി. തത്ഥ മനുസ്സാ സങ്ഘസ്സ ദേമാതി ചീവരാനി അദംസു. അഥ ഖോ തസ്സ ഭിക്ഖുനോ ഏതദഹോസി – ‘‘ഭഗവതാ പഞ്ഞത്തം ‘ചതുവഗ്ഗോ പച്ഛിമോ സങ്ഘോ’തി. അഹഞ്ചമ്ഹി ഏകകോ. ഇമേ ച മനുസ്സാ സങ്ഘസ്സ ദേമാതി ചീവരാനി അദംസു. യംനൂനാഹം ഇമാനി സങ്ഘികാനി ചീവരാനി സാവത്ഥിം ഹരേയ്യ’’ന്തി. അഥ ഖോ സോ ഭിക്ഖു താനി ചീവരാനി ആദായ സാവത്ഥിം ഗന്ത്വാ ഭിക്ഖൂനം ഏതമത്ഥം ആരോചേസി. ഭിക്ഖൂ ഭഗവതോ ഏതമത്ഥം ആരോചേസും. അനുജാനാമി, ഭിക്ഖവേ, സമ്മുഖീഭൂതേന സങ്ഘേന ഭാജേതും. ഇധ പന, ഭിക്ഖവേ, ഭിക്ഖു ഉതുകാലം ഏകോ വസതി. തത്ഥ മനുസ്സാ സങ്ഘസ്സ ദേമാതി ചീവരാനി ദേന്തി. അനുജാനാമി, ഭിക്ഖവേ, തേന ഭിക്ഖുനാ താനി ചീവരാനി അധിട്ഠാതും – ‘‘മയ്ഹിമാനി ചീവരാനീ’’തി. തസ്സ ചേ, ഭിക്ഖവേ, ഭിക്ഖുനോ തം ചീവരം അനധിട്ഠിതേ അഞ്ഞോ ഭിക്ഖു ആഗച്ഛതി, സമകോ ദാതബ്ബോ ഭാഗോ. തേഹി ചേ, ഭിക്ഖവേ, ഭിക്ഖൂഹി തം ചീവരം ഭാജിയമാനേ, അപാതിതേ കുസേ, അഞ്ഞോ ഭിക്ഖു ആഗച്ഛതി, സമകോ ദാതബ്ബോ ഭാഗോ. തേഹി ചേ, ഭിക്ഖവേ, ഭിക്ഖൂഹി തം ചീവരം ഭാജിയമാനേ, പാതിതേ കുസേ, അഞ്ഞോ ഭിക്ഖു ആഗച്ഛതി, നാകാമാ ദാതബ്ബോ ഭാഗോതി.

തേന ഖോ പന സമയേന ദ്വേ ഭാതികാ ഥേരാ, ആയസ്മാ ച ഇസിദാസോ ആയസ്മാ ച ഇസിഭടോ, സാവത്ഥിയം വസ്സംവുട്ഠാ അഞ്ഞതരം ഗാമകാവാസം അഗമംസു. മനുസ്സാ ചിരസ്സാപി ഥേരാ ആഗതാതി സചീവരാനി ഭത്താനി അദംസു. ആവാസികാ ഭിക്ഖൂ ഥേരേ പുച്ഛിംസു – ‘‘ഇമാനി, ഭന്തേ, സങ്ഘികാനി ചീവരാനി ഥേരേ ആഗമ്മ ഉപ്പന്നാനി, സാദിയിസ്സന്തി ഥേരാ ഭാഗ’’ന്തി. ഥേരാ ഏവമാഹംസു – ‘‘യഥാ ഖോ മയം, ആവുസോ, ഭഗവതാ ധമ്മം ദേസിതം ആജാനാമ, തുമ്ഹാകംയേവ താനി ചീവരാനി യാവ കഥിനസ്സ ഉബ്ഭാരായാ’’തി.

തേന ഖോ പന സമയേന തയോ ഭിക്ഖൂ രാജഗഹേ വസ്സം വസന്തി. തത്ഥ മനുസ്സാ സങ്ഘസ്സ

ദേമാതി ചീവരാനി ദേന്തി. അഥ ഖോ തേസം ഭിക്ഖൂനം ഏതദഹോസി – ‘‘ഭഗവതാ പഞ്ഞത്തം ‘ചതുവഗ്ഗോ പച്ഛിമോ സങ്ഘോ’തി. മയഞ്ചമ്ഹാ തയോ ജനാ. ഇമേ ച മനുസ്സാ സങ്ഘസ്സ ദേമാതി ചീവരാനി ദേന്തി. കഥം നു ഖോ അമ്ഹേഹി പടിപജ്ജിതബ്ബ’’ന്തി? തേന ഖോ പന സമയേന സമ്ബഹുലാ ഥേരാ, ആയസ്മാ ച നിലവാസീ ആയസ്മാ ച സാണവാസീ ആയസ്മാ ച ഗോതകോ ആയസ്മാ ച ഭഗു ആയസ്മാ ച ഫളികസന്താനോ, പാടലിപുത്തേ വിഹരന്തി കുക്കുടാരാമേ. അഥ ഖോ തേ ഭിക്ഖൂ പാടലിപുത്തം ഗന്ത്വാ ഥേരേ പുച്ഛിംസു. ഥേരാ ഏവമാഹംസു – ‘‘യഥാ ഖോ മയം ആവുസോ ഭഗവതാ ധമ്മം ദേസിതം ആജാനാമ, തുമ്ഹാകംയേവ താനി ചീവരാനി യാവ കഥിനസ്സ ഉബ്ഭാരായാ’’തി.

സങ്ഘികചീവരുപ്പാദകഥാ നിട്ഠിതാ.