൨൨൧. പച്ഛിമവികപ്പനുപഗചീവരാദികഥാ

൩൫൮. അഥ ഖോ ഭിക്ഖൂനം ഏതദഹോസി – ‘‘യാനി താനി ഭഗവതാ അനുഞ്ഞാതാനി തിചീവരന്തി വാ വസ്സികസാടികാതി വാ നിസീദനന്തി വാ പച്ചത്ഥരണന്തി വാ കണ്ഡുപ്പടിച്ഛാദീതി വാ മുഖപുഞ്ഛനചോളന്തി വാ പരിക്ഖാരചോളന്തി വാ, സബ്ബാനി താനി അധിട്ഠാതബ്ബാനി നു ഖോ, ഉദാഹു, വികപ്പേതബ്ബാനീ’’തി? ഭഗവതോ ഏതമത്ഥം ആരോചേസും. അനുജാനാമി, ഭിക്ഖവേ, തിചീവരം അധിട്ഠാതും ന വികപ്പേതും; വസ്സികസാടികം വസ്സാനം ചാതുമാസം അധിട്ഠാതും, തതോ പരം വികപ്പേതും; നിസീദനം അധിട്ഠാതും ന വികപ്പേതും; പച്ചത്ഥരണം അധിട്ഠാതും ന വികപ്പേതും; കണ്ഡുപ്പടിച്ഛാദിം യാവആബാധാ അധിട്ഠാതും തതോ പരം വികപ്പേതും; മുഖപുഞ്ഛനചോളം അധിട്ഠാതും ന വികപ്പേതും; പരിക്ഖാരചോളം അധിട്ഠാതും ന വികപ്പേതുന്തി.

അഥ ഖോ ഭിക്ഖൂനം ഏതദഹോസി – ‘‘കിത്തകം പച്ഛിമം നു ഖോ ചീവരം വികപ്പേതബ്ബ’’ന്തി? ഭഗവതോ ഏതമത്ഥം ആരോചേസും. അനുജാനാമി, ഭിക്ഖവേ, ആയാമേന അട്ഠങ്ഗുലം സുഗതങ്ഗുലേന ചതുരങ്ഗുലവിത്ഥതം പച്ഛിമം ചീവരം വികപ്പേതുന്തി.

൩൫൯. തേന ഖോ പന സമയേന ആയസ്മതോ മഹാകസ്സപസ്സ പംസുകൂലകതോ ഗരുകോ ഹോതി. ഭഗവതോ ഏതമത്ഥം ആരോചേസും. അനുജാനാമി, ഭിക്ഖവേ, സുത്തലൂഖം കാതുന്തി. വികണ്ണോ ഹോതി. ഭഗവതോ ഏതമത്ഥം ആരോചേസും. അനുജാനാമി, ഭിക്ഖവേ, വികണ്ണം ഉദ്ധരിതുന്തി. സുത്താ ഓകിരിയന്തി. ഭഗവതോ ഏതമത്ഥം ആരോചേസും. അനുജാനാമി, ഭിക്ഖവേ, അനുവാതം പരിഭണ്ഡം ആരോപേതുന്തി.

തേന ഖോ പന സമയേന സങ്ഘാടിയാ പത്താ ലുജ്ജന്തി. ഭഗവതോ ഏതമത്ഥം ആരോചേസും. അനുജാനാമി, ഭിക്ഖവേ, അട്ഠപദകം കാതുന്തി.

൩൬൦. തേന ഖോ പന സമയേന അഞ്ഞതരസ്സ ഭിക്ഖുനോ തിചീവരേ കയിരമാനേ സബ്ബം ഛിന്നകം നപ്പഹോതി. ഭഗവതോ ഏതമത്ഥം ആരോചേസും. അനുജാനാമി, ഭിക്ഖവേ, ദ്വേ ഛിന്നകാനി ഏകം അച്ഛിന്നകന്തി.

ദ്വേ ഛിന്നകാനി ഏകം അച്ഛിന്നകം നപ്പഹോതി. ഭഗവതോ ഏതമത്ഥം ആരോചേസും. അനുജാനാമി, ഭിക്ഖവേ, ദ്വേ അച്ഛിന്നകാനി ഏകം ഛിന്നകന്തി.

ദ്വേ അച്ഛിന്നകാനി ഏകം ഛിന്നകം നപ്പഹോതി. ഭഗവതോ ഏതമത്ഥം ആരോചേസും. അനുജാനാമി, ഭിക്ഖവേ, അന്വാധികമ്പി ആരോപേതും, ന ച, ഭിക്ഖവേ, സബ്ബം അച്ഛിന്നകം ധാരേതബ്ബം. യോ ധാരേയ്യ, ആപത്തി ദുക്കടസ്സാതി.

൩൬൧. തേന ഖോ പന സമയേന അഞ്ഞതരസ്സ ഭിക്ഖുനോ ബഹും ചീവരം ഉപ്പന്നം ഹോതി. സോ ച തം ചീവരം മാതാപിതൂനം ദാതുകാമോ ഹോതി. ഭഗവതോ ഏതമത്ഥം ആരോചേസും. മാതാപിതരോതി [മാതാപിതൂനം ഖോ (സീ.)] ഖോ, ഭിക്ഖവേ, ദദമാനേ [വദമാനോ (ക.), വദമാനേ (?)] കിം വദേയ്യാമ? അനുജാനാമി, ഭിക്ഖവേ, മാതാപിതൂനം ദാതും. ന ച, ഭിക്ഖവേ, സദ്ധാദേയ്യം വിനിപാതേതബ്ബം. യോ വിനിപാതേയ്യ, ആപത്തി ദുക്കടസ്സാതി.

൩൬൨. തേന ഖോ പന സമയേന അഞ്ഞതരോ ഭിക്ഖു അന്ധവനേ ചീവരം നിക്ഖിപിത്വാ സന്തരുത്തരേന ഗാമം പിണ്ഡായ പാവിസി. ചോരാ തം ചീവരം അവഹരിംസു. സോ ഭിക്ഖു ദുച്ചോളോ ഹോതി ലൂഖചീവരോ. ഭിക്ഖൂ ഏവമാഹംസു – ‘‘കിസ്സ ത്വം, ആവുസോ, ദുച്ചോളോ ലൂഖചീവരോസീ’’തി? ‘‘ഇധാഹം [സോ അഹം (കത്ഥചി)], ആവുസോ, അന്ധവനേ ചീവരം നിക്ഖിപിത്വാ സന്തരുത്തരേന ഗാമം പിണ്ഡായ പാവിസിം. ചോരാ തം ചീവരം അവഹരിംസു. തേനാഹം ദുച്ചോളോ ലൂഖചീവരോ’’തി. ഭഗവതോ ഏതമത്ഥം ആരോചേസും. ന, ഭിക്ഖവേ, സന്തരുത്തരേന ഗാമോ പവിസിതബ്ബോ. യോ പവിസേയ്യ, ആപത്തി ദുക്കടസ്സാതി.

തേന ഖോ പന സമയേന ആയസ്മാ ആനന്ദോ അസ്സതിയാ സന്തരുത്തരേന ഗാമം പിണ്ഡായ പാവിസി. ഭിക്ഖൂ ആയസ്മന്തം ആനന്ദം ഏതദവോചും – ‘‘നനു, ആവുസോ ആനന്ദ, ഭഗവതാ പഞ്ഞത്തം – ‘ന സന്തരുത്തരേന ഗാമോ പവിസിതബ്ബോ’തി? കിസ്സ ത്വം, ആവുസോ ആനന്ദ, സന്തരുത്തരേന ഗാമം പവിട്ഠോ’’തി? ‘‘സച്ചം, ആവുസോ, ഭഗവതാ പഞ്ഞത്തം – ‘ന സന്തരുത്തരേന ഗാമോ പവിസിതബ്ബോ’തി. അപി ചാഹം അസ്സതിയാ പവിട്ഠോ’’തി. ഭഗവതോ ഏതമത്ഥം ആരോചേസും.

പഞ്ചിമേ, ഭിക്ഖവേ, പച്ചയാ സങ്ഘാടിയാ നിക്ഖേപായ – ഗിലാനോ വാ ഹോതി, വസ്സികസങ്കേതം വാ ഹോതി, നദീപാരം ഗന്തും വാ ഹോതി, അഗ്ഗളഗുത്തിവിഹാരോ വാ ഹോതി, അത്ഥതകഥിനം വാ ഹോതി. ഇമേ ഖോ, ഭിക്ഖവേ, പഞ്ച പച്ചയാ സങ്ഘാടിയാ നിക്ഖേപായ.

പഞ്ചിമേ, ഭിക്ഖവേ, പച്ചയാ ഉത്തരാസങ്ഗസ്സ നിക്ഖേപായ…പേ… അന്തരവാസകസ്സ നിക്ഖേപായ – ഗിലാനോ വാ ഹോതി, വസ്സികസങ്കേതം വാ ഹോതി, നദീപാരം ഗന്തും വാ ഹോതി, അഗ്ഗളഗുത്തിവിഹാരോ വാ ഹോതി, അത്ഥതകഥിനം വാ ഹോതി. ഇമേ ഖോ, ഭിക്ഖവേ, പഞ്ച പച്ചയാ ഉത്തരാസങ്ഗസ്സ അന്തരവാസകസ്സ നിക്ഖേപായ.

പഞ്ചിമേ, ഭിക്ഖവേ, പച്ചയാ വസ്സികസാടികായ നിക്ഖേപായ – ഗിലാനോ വാ ഹോതി, നിസ്സീമം ഗന്തും വാ ഹോതി, നദീപാരം ഗന്തും വാ ഹോതി, അഗ്ഗളഗുത്തിവിഹാരോ വാ ഹോതി, വസ്സികസാടികാ അകതാ വാ ഹോതി വിപ്പകതാ വാ. ഇമേ ഖോ, ഭിക്ഖവേ, പഞ്ച പച്ചയാ വസ്സികസാടികായ നിക്ഖേപായാതി.

പച്ഛിമവികപ്പനുപഗചീവരാദികഥാ നിട്ഠിതാ.