൧൪൬. തസ്സുദ്ദാനം

വസ്സംവുട്ഠാ കോസലേസു, അഗമും സത്ഥു ദസ്സനം;

അഫാസും പസുസംവാസം, അഞ്ഞമഞ്ഞാനുലോമതാ.

പവാരേന്താ പണാമഞ്ച [പവാരേന്താസനേ ദ്വേ ച (സീ. സ്യാ.)], കമ്മം ഗിലാനഞാതകാ;

രാജാ ചോരാ ച ധുത്താ ച, ഭിക്ഖുപച്ചത്ഥികാ തഥാ.

പഞ്ച ചതുതയോ ദ്വേകോ, ആപന്നോ വേമതീ സരി;

സബ്ബോ സങ്ഘോ വേമതികോ, ബഹൂ സമാ ച ഥോകികാ.

ആവാസികാ ചാതുദ്ദസ, ലിങ്ഗസംവാസകാ ഉഭോ;

ഗന്തബ്ബം ന നിസിന്നായ, ഛന്ദദാനേ പവാരണാ [ഛന്ദദാനപവാരണാ (ക.)].

സവരേഹി ഖേപിതാ മേഘോ, അന്തരാ ച പവാരണാ;

ന ഇച്ഛന്തി പുരമ്ഹാകം, അട്ഠപിതാ ച ഭിക്ഖുനോ.

കിമ്ഹി വാതി കതമഞ്ച, ദിട്ഠേന സുതസങ്കായ;

ചോദകോ ചുദിതകോ ച, ഥുല്ലച്ചയം വത്ഥു ഭണ്ഡനം;

പവാരണാസങ്ഗഹോ ച, അനിസ്സരോ പവാരയേതി.

ഇമമ്ഹി ഖന്ധകേ വത്ഥൂനി ഛചത്താരീസാതി.

പവാരണാക്ഖന്ധകോ നിട്ഠിതോ.