൪. പവാരണാക്ഖന്ധകോ

൧൨൦. അഫാസുകവിഹാരോ

൨൦൯. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന സമ്ബഹുലാ സന്ദിട്ഠാ സമ്ഭത്താ ഭിക്ഖൂ കോസലേസു ജനപദേ അഞ്ഞതരസ്മിം ആവാസേ വസ്സം ഉപഗച്ഛിംസു. അഥ ഖോ തേസം ഭിക്ഖൂനം ഏതദഹോസി – ‘‘കേന നു ഖോ മയം ഉപായേന സമഗ്ഗാ സമ്മോദമാനാ അവിവദമാനാ ഫാസുകം വസ്സം വസേയ്യാമ, ന ച പിണ്ഡകേന കിലമേയ്യാമാ’’തി. അഥ ഖോ തേസം ഭിക്ഖൂനം ഏതദഹോസി – ‘‘സചേ ഖോ മയം അഞ്ഞമഞ്ഞം നേവ ആലപേയ്യാമ ന സല്ലപേയ്യാമ – യോ പഠമം ഗാമതോ പിണ്ഡായ പടിക്കമേയ്യ സോ ആസനം പഞ്ഞപേയ്യ, പാദോദകം പാദപീഠം പാദകഥലികം ഉപനിക്ഖിപേയ്യ, അവക്കാരപാതിം ധോവിത്വാ ഉപട്ഠാപേയ്യ, പാനീയം പരിഭോജനീയം ഉപട്ഠാപേയ്യ; യോ പച്ഛാ ഗാമതോ പിണ്ഡായ പടിക്കമേയ്യ, സചസ്സ ഭുത്താവസേസോ, സചേ ആകങ്ഖേയ്യ ഭുഞ്ജേയ്യ, നോ ചേ ആകങ്ഖേയ്യ അപ്പഹരിതേ വാ ഛഡ്ഡേയ്യ, അപ്പാണകേ വാ ഉദകേ ഓപിലാപേയ്യ; സോ ആസനം ഉദ്ധരേയ്യ, പാദോദകം പാദപീഠം പാദകഥലികം പടിസാമേയ്യ, അവക്കാരപാതിം ധോവിത്വാ പടിസാമേയ്യ, പാനീയം പരിഭോജനീയം പടിസാമേയ്യ, ഭത്തഗ്ഗം സമ്മജ്ജേയ്യ; യോ പസ്സേയ്യ പാനീയഘടം വാ പരിഭോജനീയഘടം വാ വച്ചഘടം വാ രിത്തം തുച്ഛം സോ ഉപട്ഠാപേയ്യ; സചസ്സ ഹോതി അവിസയ്ഹം, ഹത്ഥവികാരേന ദുതിയം ആമന്തേത്വാ ഹത്ഥവിലങ്ഘകേന ഉപട്ഠാപേയ്യ; ന ത്വേവ തപ്പച്ചയാ വാചം ഭിന്ദേയ്യ – ഏവം ഖോ മയം സമഗ്ഗാ സമ്മോദമാനാ അവിവദമാനാ ഫാസുകം വസ്സം വസേയ്യാമ, ന ച പിണ്ഡകേന കിലമേയ്യാമാ’’തി. അഥ ഖോ തേ ഭിക്ഖൂ അഞ്ഞമഞ്ഞം നേവ ആലപിംസു, ന സല്ലപിംസു. യോ പഠമം ഗാമതോ പിണ്ഡായ പടിക്കമതി, സോ ആസനം പഞ്ഞപേതി, പാദോദകം പാദപീഠം പാദകഥലികം ഉപനിക്ഖിപതി, അവക്കാരപാതിം ധോവിത്വാ ഉപട്ഠാപേതി, പാനീയം പരിഭോജനീയം ഉപട്ഠാപേതി. യോ പച്ഛാ ഗാമതോ പിണ്ഡായ പടിക്കമതി, സചേ ഹോതി ഭുത്താവസേസോ, സചേ ആകങ്ഖതി ഭുഞ്ജതി, നോ ചേ ആകങ്ഖതി അപ്പഹരിതേ വാ ഛഡ്ഡേതി, അപ്പാണകേ വാ ഉദകേ ഓപിലാപേതി; സോ ആസനം ഉദ്ധരതി, പാദോദകം പാദപീഠം പാദകഥലികം പടിസാമേതി, അവക്കാരപാതിം ധോവിത്വാ പടിസാമേതി, പാനീയം പരിഭോജനീയം പടിസാമേതി, ഭത്തഗ്ഗം സമ്മജ്ജതി. യോ പസ്സതി പാനീയഘടം വാ പരിഭോജനീയഘടം വാ വച്ചഘടം വാ രിത്തം തുച്ഛം സോ ഉപട്ഠാപേതി. സചസ്സ ഹോതി അവിസയ്ഹം, ഹത്ഥവികാരേന ദുതിയം ആമന്തേത്വാ ഹത്ഥവിലങ്ഘകേന ഉപട്ഠാപേതി, ന ത്വേവ തപ്പച്ചയാ വാചം ഭിന്ദതി.

ആചിണ്ണം ഖോ പനേതം വസ്സംവുട്ഠാനം ഭിക്ഖൂനം ഭഗവന്തം ദസ്സനായ ഉപസങ്കമിതും. അഥ ഖോ തേ ഭിക്ഖൂ വസ്സംവുട്ഠാ തേമാസച്ചയേന സേനാസനം സംസാമേത്വാ പത്തചീവരമാദായ യേന സാവത്ഥി തേന പക്കമിംസു. അനുപുബ്ബേന യേന സാവത്ഥി ജേതവനം അനാഥപിണ്ഡികസ്സ ആരാമോ യേന ഭഗവാ തേനുപസങ്കമിംസു, ഉപസങ്കമിത്വാ ഭഗവന്തം അഭിവാദേത്വാ ഏകമന്തം നിസീദിംസു. ആചിണ്ണം ഖോ പനേതം ബുദ്ധാനം ഭഗവന്താനം ആഗന്തുകേഹി ഭിക്ഖൂഹി സദ്ധിം പടിസമ്മോദിതും. അഥ ഖോ ഭഗവാ തേ ഭിക്ഖൂ ഏതദവോച – ‘‘കച്ചി, ഭിക്ഖവേ, ഖമനീയം, കച്ചി യാപനീയം, കച്ചി സമഗ്ഗാ സമ്മോദമാനാ അവിവദമാനാ ഫാസുകം വസ്സം വസിത്ഥ, ന ച പിണ്ഡകേന കിലമിത്ഥാ’’തി? ‘‘ഖമനീയം ഭഗവാ, യാപനീയം ഭഗവാ. സമഗ്ഗാ ച മയം, ഭന്തേ, സമ്മോദമാനാ അവിവദമാനാ ഫാസുകം വസ്സം വസിമ്ഹാ, ന ച പിണ്ഡകേന കിലമിമ്ഹാ’’തി. ജാനന്താപി തഥാഗതാ പുച്ഛന്തി, ജാനന്താപി ന പുച്ഛന്തി. കാലം വിദിത്വാ പുച്ഛന്തി, കാലം വിദിത്വാ ന പുച്ഛന്തി. അത്ഥസംഹിതം തഥാഗതാ പുച്ഛന്തി, നോ അനത്ഥസംഹിതം. അനത്ഥസംഹിതേ സേതുഘാതോ തഥാഗതാനം. ദ്വീഹാകാരേഹി ബുദ്ധാ ഭഗവന്തോ ഭിക്ഖൂ പടിപുച്ഛന്തി – ധമ്മം വാ ദേസേസ്സാമ, സാവകാനം വാ സിക്ഖാപദം പഞ്ഞപേസ്സാമാതി. അഥ ഖോ ഭഗവാ തേ ഭിക്ഖൂ ഏതദവോച – ‘‘യഥാകഥം പന തുമ്ഹേ, ഭിക്ഖവേ, സമഗ്ഗാ സമ്മോദമാനാ അവിവദമാനാ ഫാസുകം വസ്സം വസിത്ഥ, ന ച പിണ്ഡകേന കിലമിത്ഥാ’’തി.

ഇധ മയം, ഭന്തേ, സമ്ബഹുലാ സന്ദിട്ഠാ സമ്ഭത്താ ഭിക്ഖൂ കോസലേസു ജനപദേ അഞ്ഞതരസ്മിം ആവാസേ വസ്സം ഉപഗച്ഛിമ്ഹാ. തേസം നോ, ഭന്തേ, അമ്ഹാകം ഏതദഹോസി – ‘‘കേന നു ഖോ മയം ഉപായേന സമഗ്ഗാ സമ്മോദമാനാ അവിവദമാനാ ഫാസുകം വസ്സം വസേയ്യാമ, ന ച പിണ്ഡകേന കിലമേയ്യാമാ’’തി. തേസം നോ, ഭന്തേ, അമ്ഹാകം ഏതദഹോസി – ‘‘സചേ ഖോ മയം അഞ്ഞമഞ്ഞം നേവ ആലപേയ്യാമ ന സല്ലപേയ്യാമ – യോ പഠമം ഗാമതോ പിണ്ഡായ പടിക്കമേയ്യ സോ ആസനം പഞ്ഞപേയ്യ, പാദോദകം പാദപീഠം പാദകഥലികം ഉപനിക്ഖിപേയ്യ, അവക്കാരപാതിം ധോവിത്വാ ഉപട്ഠാപേയ്യ, പാനീയം പരിഭോജനീയം ഉപട്ഠാപേയ്യ; യോ പച്ഛാ ഗാമതോ പിണ്ഡായ പടിക്കമേയ്യ, സചസ്സ ഭുത്താവസേസോ, സചേ ആകങ്ഖേയ്യ ഭുഞ്ജേയ്യ, നോ ചേ ആകങ്ഖേയ്യ അപ്പഹരിതേ വാ ഛഡ്ഡേയ്യ, അപ്പാണകേ വാ ഉദകേ ഓപിലാപേയ്യ; സോ ആസനം ഉദ്ധരേയ്യ, പാദോദകം പാദപീഠം പാദകഥലികം പടിസാമേയ്യ, അവക്കാരപാതിം ധോവിത്വാ പടിസാമേയ്യ, പാനീയം പരിഭോജനീയം പടിസാമേയ്യ, ഭത്തഗ്ഗം സമ്മജ്ജേയ്യ; യോ പസ്സേയ്യ പാനീയഘടം വാ പരിഭോജനീയഘടം വാ വച്ചഘടം വാ രിത്തം തുച്ഛം സോ ഉപട്ഠാപേയ്യ; സചസ്സ ഹോതി അവിസയ്ഹം, ഹത്ഥവികാരേന ദുതിയം ആമന്തേത്വാ ഹത്ഥവിലങ്ഘകേന ഉപട്ഠാപേയ്യ; ന ത്വേവ തപ്പച്ചയാ വാചം ഭിന്ദേയ്യ – ഏവം ഖോ മയം സമഗ്ഗാ സമ്മോദമാനാ അവിവദമാനാ ഫാസുകം വസ്സം വസേയ്യാമ, ന ച പിണ്ഡകേന കിലമേയ്യാമാ’’തി. അഥ ഖോ മയം, ഭന്തേ, അഞ്ഞമഞ്ഞം നേവ ആലപിമ്ഹാ ന സല്ലവിമ്ഹാ. യോ പഠമം ഗാമതോ പിണ്ഡായ പടിക്കമതി സോ ആസനം പഞ്ഞപേതി, പാദോദകം പാദപീഠം പാദകഥലികം ഉപനിക്ഖിപതി, അവക്കാരപാതിം ധോവിത്വാ ഉപട്ഠാപേതി, പാനീയം പരിഭോജനീയം ഉപട്ഠാപേതി. യോ പച്ഛാ ഗാമതോ പിണ്ഡായ പടിക്കമതി, സചേ ഹോതി ഭുത്താവസേസോ, സചേ ആകങ്ഖതി ഭുഞ്ജതി, നോ ചേ ആകങ്ഖതി അപ്പഹരിതേ വാ ഛഡ്ഡേതി, അപ്പാണകേ വാ ഉദകേ ഓപിലാപേതി, സോ ആസനം ഉദ്ധരതി, പാദോദകം പാദപീഠം പാദകഥലികം പടിസാമേതി, അവക്കാരപാതിം ധോവിത്വാ പടിസാമേതി, പാനീയം പരിഭോജനീയം പടിസാമേതി, ഭത്തഗ്ഗം സമ്മജ്ജതി. യോ പസ്സതി പാനീയഘടം വാ പരിഭോജനീയഘടം വാ വച്ചഘടം വാ രിത്തം തുച്ഛം സോ ഉപട്ഠാപേതി. സചസ്സ ഹോതി അവിസയ്ഹം, ഹത്ഥവികാരേന ദുതിയം ആമന്തേത്വാ ഹത്ഥവിലങ്ഘകേന ഉപട്ഠാപേതി, ന ത്വേവ തപ്പച്ചയാ വാചം ഭിന്ദതി. ഏവം ഖോ മയം, ഭന്തേ, സമഗ്ഗാ സമ്മോദമാനാ അവിവദമാനാ ഫാസുകം വസ്സം വസിമ്ഹാ, ന ച പിണ്ഡകേന കിലമിമ്ഹാതി.

അഥ ഖോ ഭഗവാ ഭിക്ഖൂ ആമന്തേസി – ‘‘അഫാസുഞ്ഞേവ [അഫാസുകഞ്ഞേവ (സീ.)] കിരമേ [കിരിമേ (ക.)], ഭിക്ഖവേ, മോഘപുരിസാ വുട്ഠാ [വുത്ഥാ (ക.)] സമാനാ ഫാസുമ്ഹാ [ഫാസുകമ്ഹാ (സീ.)] വുട്ഠാതി പടിജാനന്തി. പസുസംവാസഞ്ഞേവ കിരമേ, ഭിക്ഖവേ, മോഘപുരിസാ വുട്ഠാ സമാനാ ഫാസുമ്ഹാ വുട്ഠാതി പടിജാനന്തി. ഏളകസംവാസഞ്ഞേവ കിരമേ, ഭിക്ഖവേ, മോഘപുരിസാ വുട്ഠാ സമാനാ ഫാസുമ്ഹാ വുട്ഠാതി പടിജാനന്തി. സപത്തസംവാസഞ്ഞേവ കിരമേ, ഭിക്ഖവേ, മോഘപുരിസാ വുട്ഠാ സമാനാ ഫാസുമ്ഹാ വുട്ഠാതി പടിജാനന്തി. കഥഞ്ഹി നാമിമേ, ഭിക്ഖവേ, മോഘപുരിസാ മൂഗബ്ബതം തിത്ഥിയസമാദാനം സമാദിയിസ്സ’’ന്തി. നേതം, ഭിക്ഖവേ, അപ്പസന്നാനം വാ പസാദായ…പേ… വിഗരഹിത്വാ ധമ്മിം കഥം കത്വാ ഭിക്ഖൂ ആമന്തേസി – ന, ഭിക്ഖവേ, മൂഗബ്ബതം തിത്ഥിയസമാദാനം സമാദിയിതബ്ബം. യോ സമാദിയേയ്യ, ആപത്തി ദുക്കടസ്സ. അനുജാനാമി, ഭിക്ഖവേ, വസ്സംവുട്ഠാനം ഭിക്ഖൂനം തീഹി ഠാനേഹി പവാരേതും – ദിട്ഠേന വാ സുതേന വാ പരിസങ്കായ വാ. സാ വോ ഭവിസ്സതി അഞ്ഞമഞ്ഞാനുലോമതാ ആപത്തിവുട്ഠാനതാ വിനയപുരേക്ഖാരതാ. ഏവഞ്ച പന, ഭിക്ഖവേ, പവാരേതബ്ബം. ബ്യത്തേന ഭിക്ഖുനാ പടിബലേന സങ്ഘോ ഞാപേതബ്ബോ –

൨൧൦. ‘‘സുണാതു മേ, ഭന്തേ, സങ്ഘോ. അജ്ജ പവാരണാ. യദി സങ്ഘസ്സ പത്തകല്ലം, സങ്ഘോ പവാരേയ്യാ’’തി.

ഥേരേന ഭിക്ഖുനാ ഏകംസം ഉത്തരാസങ്ഗം കരിത്വാ ഉക്കുടികം നിസീദിത്വാ അഞ്ജലിം പഗ്ഗഹേത്വാ ഏവമസ്സ വചനീയോ – ‘‘സങ്ഘം, ആവുസോ, പവാരേമി ദിട്ഠേന വാ സുതേന വാ പരിസങ്കായ വാ. വദന്തു മം ആയസ്മന്തോ അനുകമ്പം ഉപാദായ. പസ്സന്തോ പടികരിസ്സാമി. ദുതിയമ്പി, ആവുസോ, സങ്ഘം പവാരേമി ദിട്ഠേന വാ സുതേന വാ പരിസങ്കായ വാ. വദന്തു മം ആയസ്മന്തോ അനുകമ്പം ഉപാദായ. പസ്സന്തോ പടികരിസ്സാമി. തതിയമ്പി, ആവുസോ, സങ്ഘം പവാരേമി ദിട്ഠേന വാ സുതേന വാ പരിസങ്കായ വാ. വദന്തു മം ആയസ്മന്തോ അനുകമ്പം ഉപാദായ. പസ്സന്തോ പടികരിസ്സാമീ’’തി.

നവകേന ഭിക്ഖുനാ ഏകംസം ഉത്തരാസങ്ഗം കരിത്വാ ഉക്കുടികം നിസീദിത്വാ അഞ്ജലിം പഗ്ഗഹേത്വാ ഏവമസ്സ വചനീയോ – ‘‘സങ്ഘം, ഭന്തേ, പവാരേമി ദിട്ഠേന വാ സുതേന വാ പരിസങ്കായ വാ. വദന്തു മം ആയസ്മന്തോ അനുകമ്പം ഉപാദായ. പസ്സന്തോ പടികരിസ്സാമി. ദുതിയമ്പി, ഭന്തേ, സങ്ഘം…പേ… തതിയമ്പി, ഭന്തേ, സങ്ഘം പവാരേമി ദിട്ഠേന വാ സുതേന വാ പരിസങ്കായ വാ. വദന്തു മം ആയസ്മന്തോ അനുകമ്പം ഉപാദായ. പസ്സന്തോ പടികരിസ്സാമീ’’തി.

൨൧൧. തേന ഖോ പന സമയേന ഛബ്ബഗ്ഗിയാ ഭിക്ഖൂ ഥേരേസു ഭിക്ഖൂസു ഉക്കുടികം നിസിന്നേസു പവാരയമാനേസു ആസനേസു അച്ഛന്തി. യേ തേ ഭിക്ഖൂ അപ്പിച്ഛാ…പേ… തേ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ഛബ്ബഗ്ഗിയാ ഭിക്ഖൂ ഥേരേസു ഭിക്ഖൂസു ഉക്കുടികം നിസിന്നേസു പവാരയമാനേസു ആസനേസു അച്ഛിസ്സന്തീ’’തി. അഥ ഖോ തേ ഭിക്ഖൂ ഭഗവതോ ഏതമത്ഥം ആരോചേസും…പേ… ‘‘സച്ചം കിര, ഭിക്ഖവേ, ഛബ്ബഗ്ഗിയാ ഭിക്ഖൂ ഥേരേസു ഭിക്ഖൂസു ഉക്കുടികം നിസിന്നേസു പവാരയമാനേസു ആസനേസു അച്ഛന്തീ’’തി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… ‘‘കഥഞ്ഹി നാമ തേ, ഭിക്ഖവേ, മോഘപുരിസാ ഥേരേസു ഭിക്ഖൂസു ഉക്കുടികം നിസിന്നേസു പവാരയമാനേസു ആസനേസു അച്ഛിസ്സ’’ന്തി. നേതം, ഭിക്ഖവേ, അപ്പസന്നാനം വാ പസാദായ, പസന്നാനം വാ ഭിയ്യോഭാവായ…പേ… വിഗരഹിത്വാ ധമ്മിം കഥം കത്വാ ഭിക്ഖൂ ആമന്തേസി – ‘‘ന, ഭിക്ഖവേ, ഥേരേസു ഭിക്ഖൂസു ഉക്കുടികം നിസിന്നേസു പവാരയമാനേസു ആസനേസു അച്ഛിതബ്ബം. യോ അച്ഛേയ്യ, ആപത്തി ദുക്കടസ്സ. അനുജാനാമി, ഭിക്ഖവേ, സബ്ബേഹേവ ഉക്കുടികം നിസിന്നേഹി പവാരേതു’’ന്തി.

തേന ഖോ പന സമയേന അഞ്ഞതരോ ഥേരോ ജരാദുബ്ബലോ യാവ സബ്ബേ പവാരേന്തീതി [യാവ സബ്ബേ പവാരേന്തി (സ്യാ.)] ഉക്കുടികം നിസിന്നോ ആഗമയമാനോ മുച്ഛിതോ പപതി. ഭഗവതോ ഏതമത്ഥം ആരോചേസും. അനുജാനാമി, ഭിക്ഖവേ, തദമന്തരാ ഉക്കുടികം നിസീദിതും യാവ പവാരേതി, പവാരേത്വാ ആസനേ നിസീദിതുന്തി.

അഫാസുകവിഹാരോ നിട്ഠിതോ.

൧൨൧. പവാരണാഭേദാ

൨൧൨. അഥ ഖോ ഭിക്ഖൂനം ഏതദഹോസി – ‘‘കതി നു ഖോ പവാരണാ’’തി? ഭഗവതോ ഏതമത്ഥം ആരോചേസും. ദ്വേമാ, ഭിക്ഖവേ, പവാരണാ – ചാതുദ്ദസികാ ച പന്നരസികാ ച. ഇമാ ഖോ, ഭിക്ഖവേ, ദ്വേ പവാരണാതി.

അഥ ഖോ ഭിക്ഖൂനം ഏതദഹോസി – ‘‘കതി നു ഖോ പവാരണകമ്മാനീ’’തി? [പവാരണാകമ്മാനീതി (സ്യാ.)] ഭഗവതോ ഏതമത്ഥം ആരോചേസും. ചത്താരിമാനി, ഭിക്ഖവേ, പവാരണകമ്മാനി – അധമ്മേന വഗ്ഗം പവാരണകമ്മം, അധമ്മേന സമഗ്ഗം പവാരണകമ്മം, ധമ്മേന വഗ്ഗം പവാരണകമ്മം, ധമ്മേന സമഗ്ഗം പവാരണകമ്മം. തത്ര, ഭിക്ഖവേ, യദിദം അധമ്മേന വഗ്ഗം പവാരണകമ്മം, ന, ഭിക്ഖവേ, ഏവരൂപം പവാരണകമ്മം കാതബ്ബം; ന ച മയാ ഏവരൂപം പവാരണകമ്മം അനുഞ്ഞാതം. തത്ര, ഭിക്ഖവേ, യദിദം അധമ്മേന സമഗ്ഗം പവാരണകമ്മം, ന, ഭിക്ഖവേ, ഏവരൂപം പവാരണകമ്മം കാതബ്ബം; ന ച മയാ ഏവരൂപം പവാരണകമ്മം അനുഞ്ഞാതം. തത്ര, ഭിക്ഖവേ, യദിദം ധമ്മേന വഗ്ഗം പവാരണകമ്മം, ന, ഭിക്ഖവേ, ഏവരൂപം പവാരണകമ്മം കാതബ്ബം; ന ച മയാ ഏവരൂപം പവാരണകമ്മം അനുഞ്ഞാതം. തത്ര, ഭിക്ഖവേ, യദിദം ധമ്മേന സമഗ്ഗം പവാരണകമ്മം, ഏവരൂപം, ഭിക്ഖവേ, പവാരണകമ്മം കാതബ്ബം; ഏവരൂപഞ്ച മയാ പവാരണകമ്മം അനുഞ്ഞാതം. തസ്മാതിഹ, ഭിക്ഖവേ, ഏവരൂപം പവാരണകമ്മം കരിസ്സാമ യദിദം ധമ്മേന സമഗ്ഗന്തി, ഏവഞ്ഹി വോ, ഭിക്ഖവേ, സിക്ഖിതബ്ബന്തി.

പവാരണാഭേദാ നിട്ഠിതാ.

൧൨൨. പവാരണാദാനാനുജാനനാ

൨൧൩. അഥ ഖോ ഭഗവാ ഭിക്ഖൂ ആമന്തേസി – ‘‘സന്നിപതഥ, ഭിക്ഖവേ. സങ്ഘോ പവാരേസ്സതീ’’തി. ഏവം വുത്തേ അഞ്ഞതരോ ഭിക്ഖു ഭഗവന്തം ഏതദവോച – ‘‘അത്ഥി, ഭന്തേ, ഭിക്ഖു ഗിലാനോ, സോ അനാഗതോ’’തി. അനുജാനാമി, ഭിക്ഖവേ, ഗിലാനേന ഭിക്ഖുനാ പവാരണം ദാതും. ഏവഞ്ച പന, ഭിക്ഖവേ, ദാതബ്ബാ – തേന ഗിലാനേന ഭിക്ഖുനാ ഏകം ഭിക്ഖും ഉപസങ്കമിത്വാ ഏകംസം ഉത്തരാസങ്ഗം കരിത്വാ ഉക്കുടികം നിസീദിത്വാ അഞ്ജലിം പഗ്ഗഹേത്വാ ഏവമസ്സ വചനീയോ – ‘‘പവാരണം ദമ്മി, പവാരണം മേ ഹര, പവാരണം മേ ആരോചേഹി, മമത്ഥായ പവാരേഹീ’’തി കായേന വിഞ്ഞാപേതി, വാചായ വിഞ്ഞാപേതി, കായേന വാചായ വിഞ്ഞാപേതി, ദിന്നാ ഹോതി പവാരണാ; ന കായേന വിഞ്ഞാപേതി, ന വാചായ വിഞ്ഞാപേതി, ന കായേന വാചായ വിഞ്ഞാപേതി, ന ദിന്നാ ഹോതി പവാരണാ. ഏവഞ്ചേതം ലഭേഥ, ഇച്ചേതം കുസലം. നോ ചേ ലഭേഥ, സോ, ഭിക്ഖവേ, ഗിലാനോ ഭിക്ഖു മഞ്ചേന വാ പീഠേന വാ സങ്ഘമജ്ഝേ ആനേത്വാ പവാരേതബ്ബം. സചേ, ഭിക്ഖവേ, ഗിലാനുപട്ഠാകാനം ഭിക്ഖൂനം ഏതദഹോസി – ‘‘സചേ ഖോ മയം ഗിലാനം ഠാനാ ചാവേസ്സാമ, ആബാധോ വാ അഭിവഡ്ഢിസ്സതി, കാലംകിരിയാ വാ ഭവിസ്സതീ’’തി ന, ഭിക്ഖവേ, ഗിലാനോ ഭിക്ഖു ഠാനാ ചാവേതബ്ബോ. സങ്ഘേന തത്ഥ ഗന്ത്വാ പവാരേതബ്ബം; ന ത്വേവ വഗ്ഗേന സങ്ഘേന പവാരേതബ്ബം. പവാരേയ്യ ചേ, ആപത്തി ദുക്കടസ്സ.

പവാരണഹാരകോ [പവാരണാഹാരകോ (സ്യാ.)] ചേ, ഭിക്ഖവേ, ദിന്നായ പവാരണായ തത്ഥേവ പക്കമതി, അഞ്ഞസ്സ ദാതബ്ബാ പവാരണാ. പവാരണഹാരകോ ചേ, ഭിക്ഖവേ, ദിന്നായ പവാരണായ തത്ഥേവ വിബ്ഭമതി…പേ… കാലംകരോതി… സാമണേരോ പടിജാനാതി… സിക്ഖം പച്ചക്ഖാതകോ പടിജാനാതി… അന്തിമവത്ഥും അജ്ഝാപന്നകോ പടിജാനാതി… ഉമ്മത്തകോ പടിജാനാതി… ഖിത്തചിത്തോ പടിജാനാതി… വേദനാട്ടോ പടിജാനാതി… ആപത്തിയാ അദസ്സനേ ഉക്ഖിത്തകോ പടിജാനാതി… ആപത്തിയാ അപ്പടികമ്മേ ഉക്ഖിത്തകോ പടിജാനാതി… പാപികായ ദിട്ഠിയാ അപ്പടിനിസ്സഗ്ഗേ ഉക്ഖിത്തകോ പടിജാനാതി… പണ്ഡകോ പടിജാനാതി… ഥേയ്യസംവാസകോ പടിജാനാതി… തിത്ഥിയപക്കന്തകോ പടിജാനാതി… തിരച്ഛാനഗതോ പടിജാനാതി… മാതുഘാതകോ പടിജാനാതി… പിതുഘാതകോ പടിജാനാതി… അരഹന്തഘാതകോ പടിജാനാതി… ഭിക്ഖുനിദൂസകോ പടിജാനാതി… സങ്ഘഭേദകോ പടിജാനാതി … ലോഹിതുപ്പാദകോ പടിജാനാതി… ഉഭതോബ്യഞ്ജനകോ പടിജാനാതി, അഞ്ഞസ്സ ദാതബ്ബാ പവാരണാ.

പവാരണഹാരകോ ചേ, ഭിക്ഖവേ, ദിന്നായ പവാരണായ അന്തരാമഗ്ഗേ പക്കമതി, അനാഹടാ ഹോതി പവാരണാ. പവാരണഹാരകോ ചേ, ഭിക്ഖവേ, ദിന്നായ പവാരണായ അന്തരാമഗ്ഗേ വിബ്ഭമതി…പേ… കാലംകരോതി… സാമണേരോ പടിജാനാതി… സിക്ഖം പച്ചക്ഖാതകോ പടിജാനാതി… അന്തിമവത്ഥും അജ്ഝാപന്നകോ പടിജാനാതി… ഉമ്മത്തകോ പടിജാനാതി… ഖിത്തചിത്തോ പടിജാനാതി… വേദനാട്ടോ പടിജാനാതി… ആപത്തിയാ അദസ്സനേ ഉക്ഖിത്തകോ പടിജാനാതി… ആപത്തിയാ അപ്പടികമ്മേ ഉക്ഖിത്തകോ പടിജാനാതി… പാപികായ ദിട്ഠിയാ അപ്പടിനിസ്സഗ്ഗേ ഉക്ഖിത്തകോ പടിജാനാതി… പണ്ഡകോ പടിജാനാതി… ഥേയ്യസംവാസകോ പടിജാനാതി… തിത്ഥിയപക്കന്തകോ പടിജാനാതി… തിരച്ഛാനഗതോ പടിജാനാതി… മാതുഘാതകോ പടിജാനാതി… പിതുഘാതകോ പടിജാനാതി… അരഹന്തഘാതകോ പടിജാനാതി… ഭിക്ഖുനിദൂസകോ പടിജാനാതി… സങ്ഘഭേദകോ പടിജാനാതി… ലോഹിതുപ്പാദകോ പടിജാനാതി… ഉഭതോബ്യഞ്ജനകോ പടിജാനാതി, അനാഹടാ ഹോതി പവാരണാ.

പവാരണഹാരകോ ചേ, ഭിക്ഖവേ, ദിന്നായ പവാരണായ സങ്ഘപ്പത്തോ പക്കമതി, ആഹടാ ഹോതി പവാരണാ. പവാരണഹാരകോ ചേ, ഭിക്ഖവേ, ദിന്നായ പവാരണായ സങ്ഘപ്പത്തോ വിബ്ഭമതി…പേ… കാലംകരോതി… സാമണേരോ പടിജാനാതി… സിക്ഖം പച്ചക്ഖാതകോ പടിജാനാതി… അന്തിമവത്ഥും അജ്ഝാപന്നകോ പടിജാനാതി… ഉമ്മത്തകോ പടിജാനാതി… ഖിത്തചിത്തോ പടിജാനാതി… വേദനാട്ടോ പടിജാനാതി… ആപത്തിയാ അദസ്സനേ ഉക്ഖിത്തകോ പടിജാനാതി… ആപത്തിയാ അപ്പടികമ്മേ ഉക്ഖിത്തകോ പടിജാനാതി… പാപികായ ദിട്ഠിയാ അപ്പടിനിസ്സഗ്ഗേ ഉക്ഖിത്തകോ പടിജാനാതി… പണ്ഡകോ പടിജാനാതി… ഥേയ്യസംവാസകോ പടിജാനാതി… തിത്ഥിയപക്കന്തകോ പടിജാനാതി… തിരച്ഛാനഗതോ പടിജാനാതി… മാതുഘാതകോ പടിജാനാതി… പിതുഘാതകോ പടിജാനാതി… അരഹന്തഘാതകോ പടിജാനാതി… ഭിക്ഖുനിദൂസകോ പടിജാനാതി… സങ്ഘഭേദകോ പടിജാനാതി… ലോഹിതുപ്പാദകോ പടിജാനാതി… ഉഭതോബ്യഞ്ജനകോ പടിജാനാതി, ആഹടാ ഹോതി പവാരണാ.

പവാരണഹാരകോ ചേ, ഭിക്ഖവേ, ദിന്നായ പവാരണായ സങ്ഘപ്പത്തോ സുത്തോ നാരോചേതി, ആഹടാ ഹോതി പവാരണാ. പവാരണഹാരകസ്സ അനാപത്തി. പവാരണഹാരകോ ചേ, ഭിക്ഖവേ, ദിന്നായ പവാരണായ സങ്ഘപ്പത്തോ പമത്തോ നാരോചേതി…പേ… സമാപന്നോ നാരോചേതി, ആഹടാ ഹോതി പവാരണാ. പവാരണഹാരകസ്സ അനാപത്തി.

പവാരണഹാരകോ ചേ, ഭിക്ഖവേ, ദിന്നായ പവാരണായ സങ്ഘപ്പത്തോ സഞ്ചിച്ച നാരോചേതി, ആഹടാ ഹോതി പവാരണാ. പവാരണഹാരകസ്സ ആപത്തി ദുക്കടസ്സ. അനുജാനാമി, ഭിക്ഖവേ, തദഹു പവാരണായ പവാരണം ദേന്തേന ഛന്ദമ്പി ദാതും, സന്തി സങ്ഘസ്സ കരണീയന്തി.

പവാരണാദാനാനുജാനനാ നിട്ഠിതാ.

൧൨൩. ഞാതകാദിഗ്ഗഹണകഥാ

൨൧൪. തേന ഖോ പന സമയേന അഞ്ഞതരം ഭിക്ഖും തദഹു പവാരണായ ഞാതകാ ഗണ്ഹിംസു. ഭഗവതോ ഏതമത്ഥം ആരോചേസും. ഇധ പന, ഭിക്ഖവേ, ഭിക്ഖും തദഹു പവാരണായ ഞാതകാ ഗണ്ഹന്തി. തേ ഞാതകാ ഭിക്ഖൂഹി ഏവമസ്സു വചനീയാ – ‘‘ഇങ്ഘ, തുമ്ഹേ ആയസ്മന്തോ ഇമം ഭിക്ഖും മുഹുത്തം മുഞ്ചഥ, യാവായം ഭിക്ഖു പവാരേതീ’’തി. ഏവഞ്ചേതം ലഭേഥ, ഇച്ചേതം കുസലം. നോ ചേ ലഭേഥ, തേ ഞാതകാ ഭിക്ഖൂഹി ഏവമസ്സു വചനീയാ – ‘‘ഇങ്ഘ, തുമ്ഹേ ആയസ്മന്തോ മുഹുത്തം ഏകമന്തം ഹോഥ, യാവായം ഭിക്ഖു പവാരണം ദേതീ’’തി. ഏവഞ്ചേതം ലഭേഥ, ഇച്ചേതം കുസലം. നോ ചേ ലഭേഥ, തേ ഞാതകാ ഭിക്ഖൂഹി ഏവമസ്സു വചനീയാ – ‘‘ഇങ്ഘ, തുമ്ഹേ ആയസ്മന്തോ ഇമം ഭിക്ഖും മുഹുത്തം നിസ്സീമം നേഥ, യാവ സങ്ഘോ പവാരേതീ’’തി. ഏവഞ്ചേതം ലഭേഥ, ഇച്ചേതം കുസലം. നോ ചേ ലഭേഥ, ന ത്വേവ വഗ്ഗേന സങ്ഘേന പവാരേതബ്ബം. പവാരേയ്യ ചേ, ആപത്തി ദുക്കടസ്സ.

ഇധ പന, ഭിക്ഖവേ, ഭിക്ഖും തദഹു പവാരണായ രാജാനോ ഗണ്ഹന്തി…പേ… ചോരാ ഗണ്ഹന്തി … ധുത്താ ഗണ്ഹന്തി… ഭിക്ഖുപച്ചത്ഥികാ ഗണ്ഹന്തി. തേ ഭിക്ഖുപച്ചത്ഥികാ ഭിക്ഖൂഹി ഏവമസ്സു വചനീയാ – ‘‘ഇങ്ഘ, തുമ്ഹേ ആയസ്മന്തോ ഇമം ഭിക്ഖും മുഹുത്തം മുഞ്ചഥ, യാവായം ഭിക്ഖു പവാരേതീ’’തി. ഏവഞ്ചേതം ലഭേഥ, ഇച്ചേതം കുസലം. നോ ചേ ലഭേഥ, തേ ഭിക്ഖുപച്ചത്ഥികാ ഭിക്ഖൂഹി ഏവമസ്സു വചനീയാ – ‘‘ഇങ്ഘ, തുമ്ഹേ ആയസ്മന്തോ മുഹുത്തം ഏകമന്തം ഹോഥ, യാവായം ഭിക്ഖു പവാരണം ദേതീ’’തി. ഏവഞ്ചേതം ലഭേഥ, ഇച്ചേതം കുസലം. നോ ചേ ലഭേഥ, തേ ഭിക്ഖുപച്ചത്ഥികാ ഭിക്ഖൂഹി ഏവമസ്സു വചനീയാ – ‘‘ഇങ്ഘ, തുമ്ഹേ ആയസ്മന്തോ ഇമം ഭിക്ഖും മുഹുത്തം നിസ്സീമം നേഥ, യാവ സങ്ഘോ പവാരേതീ’’തി. ഏവഞ്ചേതം ലഭേഥ, ഇച്ചേതം കുസലം. നോ ചേ ലഭേഥ, ന ത്വേവ വഗ്ഗേന സങ്ഘേന പവാരേതബ്ബം. പവാരേയ്യ ചേ, ആപത്തി ദുക്കടസ്സാതി.

ഞാതകാദിഗ്ഗഹണകഥാ നിട്ഠിതാ.

൧൨൪. സങ്ഘപവാരണാദിപ്പഭേദാ

൨൧൫. തേന ഖോ പന സമയേന അഞ്ഞതരസ്മിം ആവാസേ തദഹു പവാരണായ പഞ്ച ഭിക്ഖൂ വിഹരന്തി. അഥ ഖോ തേസം ഭിക്ഖൂനം ഏതദഹോസി – ‘‘ഭഗവതാ പഞ്ഞത്തം ‘സങ്ഘേന പവാരേതബ്ബ’ന്തി. മയഞ്ചമ്ഹാ പഞ്ച ജനാ. കഥം നു ഖോ അമ്ഹേഹി പവാരേതബ്ബ’’ന്തി? ഭഗവതോ ഏതമത്ഥം ആരോചേസും. അനുജാനാമി, ഭിക്ഖവേ, പഞ്ചന്നം സങ്ഘേ പവാരേതുന്തി.

൨൧൬. തേന ഖോ പന സമയേന അഞ്ഞതരസ്മിം ആവാസേ തദഹു പവാരണായ ചത്താരോ ഭിക്ഖൂ വിഹരന്തി. അഥ ഖോ തേസം ഭിക്ഖൂനം ഏതദഹോസി – ‘‘ഭഗവതാ അനുഞ്ഞാതം പഞ്ചന്നം സങ്ഘേ പവാരേതുന്തി. മയഞ്ചമ്ഹാ ചത്താരോ ജനാ. കഥം നു ഖോ അമ്ഹേഹി പവാരേതബ്ബ’’ന്തി? ഭഗവതോ ഏതമത്ഥം ആരോചേസും. അനുജാനാമി, ഭിക്ഖവേ, ചതുന്നം അഞ്ഞമഞ്ഞം പവാരേതും. ഏവഞ്ച പന, ഭിക്ഖവേ, പവാരേതബ്ബം. ബ്യത്തേന ഭിക്ഖുനാ പടിബലേന തേ ഭിക്ഖൂ ഞാപേതബ്ബാ –

‘‘സുണന്തു മേ ആയസ്മന്തോ. അജ്ജ പവാരണാ. യദായസ്മന്താനം പത്തകല്ലം, മയം അഞ്ഞമഞ്ഞം പവാരേയ്യാമാ’’തി.

ഥേരേന ഭിക്ഖുനാ ഏകംസം ഉത്തരാസങ്ഗം കരിത്വാ ഉക്കുടികം നിസീദിത്വാ അഞ്ജലിം പഗ്ഗഹേത്വാ തേ ഭിക്ഖൂ ഏവമസ്സു വചനീയാ – ‘‘അഹം, ആവുസോ, ആയസ്മന്തേ പവാരേമി ദിട്ഠേന വാ സുതേന വാ പരിസങ്കായ വാ. വദന്തു മം ആയസ്മന്തോ അനുകമ്പം ഉപാദായ. പസ്സന്തോ പടികരിസ്സാമി. ദുതിയമ്പി…പേ… തതിയമ്പി അഹം, ആവുസോ, ആയസ്മന്തേ പവാരേമി ദിട്ഠേന വാ സുതേന വാ പരിസങ്കായ വാ. വദന്തു മം ആയസ്മന്തോ അനുകമ്പം ഉപാദായ. പസ്സന്തോ പടികരിസ്സാമീ’’തി.

നവകേന ഭിക്ഖുനാ ഏകംസം ഉത്തരാസങ്ഗം കരിത്വാ ഉക്കുടികം നിസീദിത്വാ അഞ്ജലിം പഗ്ഗഹേത്വാ തേ ഭിക്ഖൂ ഏവമസ്സു വചനീയാ – ‘‘അഹം, ഭന്തേ, ആയസ്മന്തേ പവാരേമി ദിട്ഠേന വാ സുതേന വാ പരിസങ്കായ വാ. വദന്തു മം ആയസ്മന്തോ അനുകമ്പം ഉപാദായ. പസ്സന്തോ പടികരിസ്സാമി. ദുതിയമ്പി…പേ… തതിയമ്പി അഹം, ഭന്തേ, ആയസ്മന്തേ പവാരേമി ദിട്ഠേന വാ സുതേന വാ പരിസങ്കായ വാ. വദന്തു മം ആയസ്മന്തോ അനുകമ്പം ഉപാദായ. പസ്സന്തോ പടികരിസ്സാമീ’’തി.

തേന ഖോ പന സമയേന അഞ്ഞതരസ്മിം ആവാസേ തദഹു പവാരണായ തയോ ഭിക്ഖൂ വിഹരന്തി. അഥ ഖോ തേസം ഭിക്ഖൂനം ഏതദഹോസി – ‘‘ഭഗവതാ അനുഞ്ഞാതം പഞ്ചന്നം സങ്ഘേ പവാരേതും, ചതുന്നം അഞ്ഞമഞ്ഞം പവാരേതും. മയഞ്ചമ്ഹാ തയോ ജനാ. കഥം നു ഖോ അമ്ഹേഹി പവാരേതബ്ബ’’ന്തി? ഭഗവതോ ഏതമത്ഥം ആരോചേസും. അനുജാനാമി, ഭിക്ഖവേ, തിണ്ണം അഞ്ഞമഞ്ഞം പവാരേതും. ഏവഞ്ച പന, ഭിക്ഖവേ, പവാരേതബ്ബം. ബ്യത്തേന ഭിക്ഖുനാ പടിബലേന തേ ഭിക്ഖൂ ഞാപേതബ്ബാ –

‘‘സുണന്തു മേ ആയസ്മന്താ. അജ്ജ പവാരണാ. യദായസ്മന്താനം പത്തകല്ലം, മയം അഞ്ഞമഞ്ഞം പവാരേയ്യാമാ’’തി.

ഥേരേന ഭിക്ഖുനാ ഏകംസം ഉത്തരാസങ്ഗം കരിത്വാ ഉക്കുടികം നിസീദിത്വാ അഞ്ജലിം പഗ്ഗഹേത്വാ തേ ഭിക്ഖൂ ഏവമസ്സു വചനീയാ – ‘‘അഹം, ആവുസോ, ആയസ്മന്തേ പവാരേമി ദിട്ഠേന വാ സുതേന വാ പരിസങ്കായ വാ. വദന്തു മം ആയസ്മന്താ അനുകമ്പം ഉപാദായ. പസ്സന്തോ പടികരിസ്സാമി. ദുതിയമ്പി…പേ… തതിയമ്പി അഹം, ആവുസോ, ആയസ്മന്തേ പവാരേമി ദിട്ഠേന വാ സുതേന വാ പരിസങ്കായ വാ. വദന്തു മം ആയസ്മന്താ അനുകമ്പം ഉപാദായ. പസ്സന്തോ പടികരിസ്സാമീ’’തി.

നവകേന ഭിക്ഖുനാ ഏകംസം ഉത്തരാസങ്ഗം കരിത്വാ ഉക്കുടികം നിസീദിത്വാ അഞ്ജലിം പഗ്ഗഹേത്വാ തേ ഭിക്ഖൂ ഏവമസ്സു വചനീയാ – ‘‘അഹം, ഭന്തേ, ആയസ്മന്തേ പവാരേമി ദിട്ഠേന വാ സുതേന വാ പരിസങ്കായ വാ. വദന്തു മം ആയസ്മന്താ അനുകമ്പം ഉപാദായ. പസ്സന്തോ പടികരിസ്സാമി. ദുതിയമ്പി…പേ… തതിയമ്പി അഹം, ഭന്തേ, ആയസ്മന്തേ പവാരേമി ദിട്ഠേന വാ സുതേന വാ പരിസങ്കായ വാ. വദന്തു മം ആയസ്മന്താ അനുകമ്പം ഉപാദായ. പസ്സന്തോ പടികരിസ്സാമീ’’തി.

൨൧൭. തേന ഖോ പന സമയേന അഞ്ഞതരസ്മിം ആവാസേ തദഹു പവാരണായ ദ്വേ ഭിക്ഖൂ വിഹരന്തി. അഥ ഖോ തേസം ഭിക്ഖൂനം ഏതദഹോസി – ‘‘ഭഗവതാ അനുഞ്ഞാതം പഞ്ചന്നം സങ്ഘേ പവാരേതും, ചതുന്നം അഞ്ഞമഞ്ഞം പവാരേതും, തിണ്ണം അഞ്ഞമഞ്ഞം പവാരേതും. മയഞ്ചമ്ഹാ ദ്വേ ജനാ. കഥം നു ഖോ അമ്ഹേഹി പവാരേതബ്ബ’’ന്തി. ഭഗവതോ ഏതമത്ഥം ആരോചേസും. അനുജാനാമി, ഭിക്ഖവേ, ദ്വിന്നം അഞ്ഞമഞ്ഞം പവാരേതും. ഏവഞ്ച പന, ഭിക്ഖവേ, പവാരേതബ്ബം. ഥേരേന ഭിക്ഖുനാ ഏകംസം ഉത്തരാസങ്ഗം കരിത്വാ ഉക്കുടികം നിസീദിത്വാ അഞ്ജലിം പഗ്ഗഹേത്വാ നവോ ഭിക്ഖു ഏവമസ്സ വചനീയോ – ‘‘അഹം, ആവുസോ, ആയസ്മന്തം പവാരേമി ദിട്ഠേന വാ സുതേന വാ പരിസങ്കായ വാ. വദതു മം ആയസ്മാ അനുകമ്പം ഉപാദായ. പസ്സന്തോ പടികരിസ്സാമി. ദുതിയമ്പി…പേ… തതിയമ്പി അഹം, ആവുസോ, ആയസ്മന്തം പവാരേമി ദിട്ഠേന വാ സുതേന വാ പരിസങ്കായ വാ. വദതു മം ആയസ്മാ അനുകമ്പം ഉപാദായ. പസ്സന്തോ പടികരിസ്സാമീ’’തി.

നവകേന ഭിക്ഖുനാ ഏകംസം ഉത്തരാസങ്ഗം കരിത്വാ ഉക്കുടികം നിസീദിത്വാ അഞ്ജലിം പഗ്ഗഹേത്വാ ഥേരോ ഭിക്ഖു ഏവമസ്സ വചനീയോ – ‘‘അഹം, ഭന്തേ, ആയസ്മന്തം പവാരേമി ദിട്ഠേന വാ സുതേന വാ പരിസങ്കായ വാ. വദതു മം ആയസ്മാ അനുകമ്പം ഉപാദായ. പസ്സന്തോ പടികരിസ്സാമി. ദുതിയമ്പി…പേ… തതിയമ്പി അഹം, ഭന്തേ, ആയസ്മന്തം പവാരേമി ദിട്ഠേന വാ സുതേന വാ പരിസങ്കായ വാ. വദതു മം ആയസ്മാ അനുകമ്പം ഉപാദായ. പസ്സന്തോ പടികരിസ്സാമീ’’തി.

൨൧൮. തേന ഖോ പന സമയേന അഞ്ഞതരസ്മിം ആവാസേ തദഹു പവാരണായ ഏകോ ഭിക്ഖു വിഹരതി. അഥ ഖോ തസ്സ ഭിക്ഖുനോ ഏതദഹോസി – ‘‘ഭഗവതാ അനുഞ്ഞാതം പഞ്ചന്നം സങ്ഘേ പവാരേതും, ചതുന്നം അഞ്ഞമഞ്ഞം പവാരേതും, തിണ്ണം അഞ്ഞമഞ്ഞം പവാരേതും, ദ്വിന്നം അഞ്ഞമഞ്ഞം പവാരേതും. അഹഞ്ചമ്ഹി ഏകകോ. കഥം നു ഖോ മയാ പവാരേതബ്ബ’’ന്തി? ഭഗവതോ ഏതമത്ഥം ആരോചേസും.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ ഏകോ ഭിക്ഖു വിഹരതി. തേന, ഭിക്ഖവേ, ഭിക്ഖുനാ യത്ഥ ഭിക്ഖൂ പടിക്കമന്തി ഉപട്ഠാനസാലായ വാ മണ്ഡപേ വാ രുക്ഖമൂലേ വാ, സോ ദേസോ സമ്മജ്ജിത്വാ പാനീയം പരിഭോജനീയം ഉപട്ഠാപേത്വാ ആസനം പഞ്ഞപേത്വാ പദീപം കത്വാ നിസീദിതബ്ബം. സചേ അഞ്ഞേ ഭിക്ഖൂ ആഗച്ഛന്തി, തേഹി സദ്ധിം പവാരേതബ്ബം; നോ ചേ ആഗച്ഛന്തി, ‘അജ്ജ മേ പവാരണാ’തി അധിട്ഠാതബ്ബം. നോ ചേ അധിട്ഠേയ്യ, ആപത്തി ദുക്കടസ്സ.

തത്ര, ഭിക്ഖവേ, യത്ഥ പഞ്ച ഭിക്ഖൂ വിഹരന്തി, ന ഏകസ്സ പവാരണം ആഹരിത്വാ

ചതൂഹി സങ്ഘേ പവാരേതബ്ബം. പവാരേയ്യും ചേ, ആപത്തി ദുക്കടസ്സ. തത്ര, ഭിക്ഖവേ, യത്ഥ ചത്താരോ ഭിക്ഖൂ വിഹരന്തി, ന ഏകസ്സ പവാരണം ആഹരിത്വാ തീഹി അഞ്ഞമഞ്ഞം പവാരേതബ്ബം. പവാരേയ്യും ചേ, ആപത്തി ദുക്കടസ്സ. തത്ര, ഭിക്ഖവേ, യത്ഥ തയോ ഭിക്ഖൂ വിഹരന്തി, ന ഏകസ്സ പവാരണം ആഹരിത്വാ ദ്വീഹി അഞ്ഞമഞ്ഞം പവാരേതബ്ബം. പവാരേയ്യും ചേ, ആപത്തി ദുക്കടസ്സ. തത്ര, ഭിക്ഖവേ, യത്ഥ ദ്വേ ഭിക്ഖൂ വിഹരന്തി, ന ഏകസ്സ പവാരണം ആഹരിത്വാ ഏകേന അധിട്ഠാതബ്ബം. അധിട്ഠേയ്യ ചേ, ആപത്തി ദുക്കടസ്സാതി.

സങ്ഘപവാരണാദിപ്പഭേദാ നിട്ഠിതാ.

൧൨൫. ആപത്തിപടികമ്മവിധി

൨൧൯. തേന ഖോ പന സമയേന അഞ്ഞതരോ ഭിക്ഖു തദഹു പവാരണായ ആപത്തിം ആപന്നോ ഹോതി. അഥ ഖോ തസ്സ ഭിക്ഖുനോ ഏതദഹോസി – ‘‘ഭഗവതാ പഞ്ഞത്തം ‘ന സാപത്തികേന പവാരേതബ്ബ’ന്തി. അഹഞ്ചമ്ഹി ആപത്തിം ആപന്നോ. കഥം നു ഖോ മയാ പടിപജ്ജിതബ്ബ’’ന്തി? ഭഗവതോ ഏതമത്ഥം ആരോചേസും [ആരോചേസി (ക.)].

ഇധ പന, ഭിക്ഖവേ, ഭിക്ഖു തദഹു പവാരണായ ആപത്തിം ആപന്നോ ഹോതി. തേന, ഭിക്ഖവേ, ഭിക്ഖുനാ ഏകം ഭിക്ഖും ഉപസങ്കമിത്വാ ഏകംസം ഉത്തരാസങ്ഗം കരിത്വാ ഉക്കുടികം നിസീദിത്വാ അഞ്ജലിം പഗ്ഗഹേത്വാ ഏവമസ്സ വചനീയോ – ‘‘അഹം, ആവുസോ, ഇത്ഥന്നാമം ആപത്തിം ആപന്നോ, തം പടിദേസേമീ’’തി. തേന വത്തബ്ബോ – ‘‘പസ്സസീ’’തി. ആമ പസ്സാമീതി. ആയതിം സംവരേയ്യാസീതി.

ഇധ പന, ഭിക്ഖവേ, ഭിക്ഖു തദഹു പവാരണായ ആപത്തിയാ വേമതികോ ഹോതി. തേന, ഭിക്ഖവേ, ഭിക്ഖുനാ ഏകം ഭിക്ഖും ഉപസങ്കമിത്വാ ഏകംസം ഉത്തരാസങ്ഗം കരിത്വാ ഉക്കുടികം നിസീദിത്വാ അഞ്ജലിം പഗ്ഗഹേത്വാ ഏവമസ്സ വചനീയോ – ‘‘അഹം, ആവുസോ, ഇത്ഥന്നാമായ ആപത്തിയാ വേമതികോ; യദാ നിബ്ബേമതികോ ഭവിസ്സാമി തദാ തം ആപത്തിം പടികരിസ്സാമീ’’തി വത്വാ പവാരേതബ്ബം; ന ത്വേവ തപ്പച്ചയാ പവാരണായ അന്തരായോ കാതബ്ബോതി.

ആപത്തിപടികമ്മവിധി നിട്ഠിതാ.

൧൨൬. ആപത്തിആവികരണവിധി

൨൨൦. തേന ഖോ പന സമയേന അഞ്ഞതരോ ഭിക്ഖു പവാരയമാനോ ആപത്തിം സരതി. അഥ ഖോ തസ്സ ഭിക്ഖുനോ ഏതദഹോസി – ‘‘ഭഗവതാ പഞ്ഞത്തം ‘ന സാപത്തികേന പവാരേതബ്ബ’ന്തി. അഹഞ്ചമ്ഹി ആപത്തിം ആപന്നോ. കഥം നു ഖോ മയാ പടിപജ്ജിതബ്ബ’’ന്തി? ഭഗവതോ ഏതമത്ഥം ആരോചേസും.

ഇധ പന, ഭിക്ഖവേ, ഭിക്ഖു പവാരയമാനോ ആപത്തിം സരതി. തേന, ഭിക്ഖവേ, ഭിക്ഖുനാ സാമന്തോ ഭിക്ഖു ഏവമസ്സ വചനീയോ – ‘‘അഹം, ആവുസോ, ഇത്ഥന്നാമം ആപത്തിം ആപന്നോ. ഇതോ വുട്ഠഹിത്വാ തം ആപത്തിം പടികരിസ്സാമീ’’തി വത്വാ പവാരേതബ്ബം; ന ത്വേവ തപ്പച്ചയാ പവാരണായ അന്തരായോ കാതബ്ബോ.

ഇധ പന, ഭിക്ഖവേ, ഭിക്ഖു പവാരയമാനോ ആപത്തിയാ വേമതികോ ഹോതി. തേന, ഭിക്ഖവേ,

ഭിക്ഖുനാ സാമന്തോ ഭിക്ഖു ഏവമസ്സ വചനീയോ – ‘‘അഹം, ആവുസോ, ഇത്ഥന്നാമായ ആപത്തിയാ വേമതികോ; യദാ നിബ്ബേമതികോ ഭവിസ്സാമി തദാ തം ആപത്തിം പടികരിസ്സാമീ’’തി വത്വാ പവാരേതബ്ബം; ന ത്വേവ തപ്പച്ചയാ പവാരണായ അന്തരായോ കാതബ്ബോതി.

ആപത്തി ആവികരണവിധി നിട്ഠിതാ.

൧൨൭. സഭാഗാപത്തിപടികമ്മവിധി

൨൨൧. തേന ഖോ പന സമയേന അഞ്ഞതരസ്മിം ആവാസേ തദഹു പവാരണായ സബ്ബോ സങ്ഘോ സഭാഗം ആപത്തിം ആപന്നോ ഹോതി. അഥ ഖോ തേസം ഭിക്ഖൂനം ഏതദഹോസി – ‘‘ഭഗവതാ പഞ്ഞത്തം ‘ന സഭാഗാ ആപത്തി ദേസേതബ്ബാ, ന സഭാഗാ ആപത്തി പടിഗ്ഗഹേതബ്ബാ’തി. അയഞ്ച സബ്ബോ സങ്ഘോ സഭാഗം ആപത്തിം ആപന്നോ. കഥം നു ഖോ അമ്ഹേഹി പടിപജ്ജിതബ്ബ’’ന്തി? ഭഗവതോ ഏതമത്ഥം ആരോചേസും.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സബ്ബോ സങ്ഘോ സഭാഗം ആപത്തിം ആപന്നോ ഹോതി. തേഹി, ഭിക്ഖവേ, ഭിക്ഖൂഹി ഏകോ ഭിക്ഖു സാമന്താ ആവാസാ സജ്ജുകം പാഹേതബ്ബോ – ഗച്ഛാവുസോ, തം ആപത്തിം പടികരിത്വാ ആഗച്ഛ, മയം തേ സന്തികേ തം ആപത്തിം പടികരിസ്സാമാതി. ഏവഞ്ചേതം ലഭേഥ, ഇച്ചേതം കുസലം. നോ ചേ ലഭേഥ, ബ്യത്തേന ഭിക്ഖുനാ പടിബലേന സങ്ഘോ ഞാപേതബ്ബോ –

‘‘സുണാതു മേ, ഭന്തേ, സങ്ഘോ. അയം സബ്ബോ സങ്ഘോ സഭാഗം ആപത്തിം ആപന്നോ. യദാ അഞ്ഞം ഭിക്ഖും സുദ്ധം അനാപത്തികം പസ്സിസ്സതി തദാ തസ്സ സന്തികേ തം ആപത്തിം പടികരിസ്സതീ’’തി വത്വാ പവാരേതബ്ബം; ന ത്വേവ തപ്പച്ചയാ പവാരണായ അന്തരായോ കാതബ്ബോ.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സബ്ബോ സങ്ഘോ സഭാഗായ ആപത്തിയാ വേമതികോ ഹോതി. ബ്യത്തേന ഭിക്ഖുനാ പടിബലേന സങ്ഘോ ഞാപേതബ്ബോ –

‘‘സുണാതു മേ, ഭന്തേ, സങ്ഘോ. അയം സബ്ബോ സങ്ഘോ സഭാഗായ ആപത്തിയാ വേമതികോ. യദാ നിബ്ബേമതികോ ഭവിസ്സതി തദാ തം ആപത്തിം പടികരിസ്സതീ’’തി വത്വാ, പവാരേതബ്ബം, ന ത്വേവ തപ്പച്ചയാ പവാരണായ അന്തരായോ കാതബ്ബോതി.

സഭാഗാപത്തിപടികമ്മവിധി നിട്ഠിതാ.

പഠമഭാണവാരോ നിട്ഠിതോ.

൧൨൮. അനാപത്തിപന്നരസകം

൨൨൨. തേന ഖോ പന സമയേന അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതിംസു, പഞ്ച വാ അതിരേകാ വാ. തേ ന ജാനിംസു ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ധമ്മസഞ്ഞിനോ വിനയസഞ്ഞിനോ വഗ്ഗാ സമഗ്ഗസഞ്ഞിനോ പവാരേസും. തേഹി പവാരിയമാനേ അഥഞ്ഞേ ആവാസികാ ഭിക്ഖൂ ആഗച്ഛിംസു ബഹുതരാ. ഭഗവതോ ഏതമത്ഥം ആരോചേസും.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ന ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ധമ്മസഞ്ഞിനോ വിനയസഞ്ഞിനോ വഗ്ഗാ സമഗ്ഗസഞ്ഞിനോ പവാരേന്തി. തേഹി പവാരിയമാനേ അഥഞ്ഞേ ആവാസികാ ഭിക്ഖൂ ആഗച്ഛന്തി ബഹുതരാ. തേഹി, ഭിക്ഖവേ, ഭിക്ഖൂഹി പുന പവാരേതബ്ബം. പവാരിതാനം അനാപത്തി.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ന ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ധമ്മസഞ്ഞിനോ വിനയസഞ്ഞിനോ വഗ്ഗാ സമഗ്ഗസഞ്ഞിനോ പവാരേന്തി. തേഹി പവാരിയമാനേ അഥഞ്ഞേ ആവാസികാ ഭിക്ഖൂ ആഗച്ഛന്തി സമസമാ. പവാരിതാ സുപ്പവാരിതാ, അവസേസേഹി പവാരേതബ്ബം. പവാരിതാനം അനാപത്തി.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ന ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ധമ്മസഞ്ഞിനോ വിനയസഞ്ഞിനോ വഗ്ഗാ സമഗ്ഗസഞ്ഞിനോ പവാരേന്തി. തേഹി പവാരിയമാനേ അഥഞ്ഞേ ആവാസികാ ഭിക്ഖൂ ആഗച്ഛന്തി ഥോകതരാ. പവാരിതാ സുപ്പവാരിതാ, അവസേസേഹി പവാരേതബ്ബം. പവാരിതാനം അനാപത്തി.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ന ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ധമ്മസഞ്ഞിനോ വിനയസഞ്ഞിനോ വഗ്ഗാ സമഗ്ഗസഞ്ഞിനോ പവാരേന്തി. തേഹി പവാരിതമത്തേ അഥഞ്ഞേ ആവാസികാ ഭിക്ഖൂ ആഗച്ഛന്തി ബഹുതരാ. തേഹി, ഭിക്ഖവേ, ഭിക്ഖൂഹി പുന പവാരേതബ്ബം. പവാരിതാനം അനാപത്തി.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ന ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ധമ്മസഞ്ഞിനോ വിനയസഞ്ഞിനോ വഗ്ഗാ സമഗ്ഗസഞ്ഞിനോ പവാരേന്തി. തേഹി പവാരിതമത്തേ അഥഞ്ഞേ ആവാസികാ ഭിക്ഖൂ ആഗച്ഛന്തി സമസമാ. പവാരിതാ സുപ്പവാരിതാ, തേസം സന്തികേ പവാരേതബ്ബം. പവാരിതാനം അനാപത്തി.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ന ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ധമ്മസഞ്ഞിനോ വിനയസഞ്ഞിനോ വഗ്ഗാ സമഗ്ഗസഞ്ഞിനോ പവാരേന്തി. തേഹി പവാരിതമത്തേ അഥഞ്ഞേ ആവാസികാ ഭിക്ഖൂ ആഗച്ഛന്തി ഥോകതരാ. പവാരിതാ സുപ്പവാരിതാ, തേസം സന്തികേ പവാരേതബ്ബം. പവാരിതാനം അനാപത്തി.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ന ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ധമ്മസഞ്ഞിനോ വിനയസഞ്ഞിനോ വഗ്ഗാ സമഗ്ഗസഞ്ഞിനോ പവാരേന്തി. തേഹി പവാരിതമത്തേ, അവുട്ഠിതായ പരിസായ, അഥഞ്ഞേ ആവാസികാ ഭിക്ഖൂ ആഗച്ഛന്തി ബഹുതരാ. തേഹി, ഭിക്ഖവേ, ഭിക്ഖൂഹി പുന പവാരേതബ്ബം. പവാരിതാനം അനാപത്തി.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ന ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ധമ്മസഞ്ഞിനോ വിനയസഞ്ഞിനോ വഗ്ഗാ സമഗ്ഗസഞ്ഞിനോ പവാരേന്തി. തേഹി പവാരിതമത്തേ, അവുട്ഠിതായ പരിസായ, അഥഞ്ഞേ ആവാസികാ ഭിക്ഖൂ ആഗച്ഛന്തി സമസമാ. പവാരിതാ സുപ്പവാരിതാ, തേസം സന്തികേ പവാരേതബ്ബം. പവാരിതാനം അനാപത്തി.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ന ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ധമ്മസഞ്ഞിനോ വിനയസഞ്ഞിനോ വഗ്ഗാ സമഗ്ഗസഞ്ഞിനോ പവാരേന്തി. തേഹി പവാരിതമത്തേ, അവുട്ഠിതായ പരിസായ, അഥഞ്ഞേ ആവാസികാ ഭിക്ഖൂ ആഗച്ഛന്തി ഥോകതരാ. പവാരിതാ സുപ്പവാരിതാ, തേസം സന്തികേ പവാരേതബ്ബം. പവാരിതാനം അനാപത്തി.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ന ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ധമ്മസഞ്ഞിനോ വിനയസഞ്ഞിനോ വഗ്ഗാ സമഗ്ഗസഞ്ഞിനോ പവാരേന്തി. തേഹി പവാരിതമത്തേ, ഏകച്ചായ വുട്ഠിതായ പരിസായ, അഥഞ്ഞേ ആവാസികാ ഭിക്ഖൂ ആഗച്ഛന്തി ബഹുതരാ. തേഹി, ഭിക്ഖവേ, ഭിക്ഖൂഹി പുന പവാരേതബ്ബം. പവാരിതാനം അനാപത്തി.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ന ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ധമ്മസഞ്ഞിനോ വിനയസഞ്ഞിനോ വഗ്ഗാ സമഗ്ഗസഞ്ഞിനോ പവാരേന്തി. തേഹി പവാരിതമത്തേ, ഏകച്ചായ വുട്ഠിതായ പരിസായ, അഥഞ്ഞേ ആവാസികാ ഭിക്ഖൂ ആഗച്ഛന്തി സമസമാ. പവാരിതാ സുപ്പവാരിതാ, തേസം സന്തികേ പവാരേതബ്ബം. പവാരിതാനം അനാപത്തി.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ന ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ധമ്മസഞ്ഞിനോ വിനയസഞ്ഞിനോ വഗ്ഗാ സമഗ്ഗസഞ്ഞിനോ പവാരേന്തി. തേഹി പവാരിതമത്തേ, ഏകച്ചായ വുട്ഠിതായ പരിസായ, അഥഞ്ഞേ ആവാസികാ ഭിക്ഖൂ ആഗച്ഛന്തി ഥോകതരാ. പവാരിതാ സുപ്പവാരിതാ, തേസം സന്തികേ പവാരേതബ്ബം. പവാരിതാനം അനാപത്തി.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ന ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ധമ്മസഞ്ഞിനോ വിനയസഞ്ഞിനോ വഗ്ഗാ സമഗ്ഗസഞ്ഞിനോ പവാരേന്തി. തേഹി പവാരിതമത്തേ, സബ്ബായ വുട്ഠിതായ പരിസായ, അഥഞ്ഞേ ആവാസികാ ഭിക്ഖൂ ആഗച്ഛന്തി ബഹുതരാ. തേഹി, ഭിക്ഖവേ, ഭിക്ഖൂഹി പുന പവാരേതബ്ബം. പവാരിതാനം അനാപത്തി.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ന ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ധമ്മസഞ്ഞിനോ വിനയസഞ്ഞിനോ വഗ്ഗാ സമഗ്ഗസഞ്ഞിനോ പവാരേന്തി. തേഹി പവാരിതമത്തേ, സബ്ബായ വുട്ഠിതായ പരിസായ, അഥഞ്ഞേ ആവാസികാ ഭിക്ഖൂ ആഗച്ഛന്തി സമസമാ. പവാരിതാ സുപ്പവാരിതാ, തേസം സന്തികേ പവാരേതബ്ബം. പവാരിതാനം അനാപത്തി.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ന ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ധമ്മസഞ്ഞിനോ വിനയസഞ്ഞിനോ വഗ്ഗാ സമഗ്ഗസഞ്ഞിനോ പവാരേന്തി. തേഹി പവാരിതമത്തേ, സബ്ബായ വുട്ഠിതായ പരിസായ, അഥഞ്ഞേ ആവാസികാ ഭിക്ഖൂ ആഗച്ഛന്തി ഥോകതരാ. പവാരിതാ സുപ്പവാരിതാ, തേസം സന്തികേ പവാരേതബ്ബം. പവാരിതാനം അനാപത്തി.

അനാപത്തിപന്നരസകം നിട്ഠിതം.

൧൨൯. വഗ്ഗാവഗ്ഗസഞ്ഞീപന്നരസകം

൨൨൩. ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ധമ്മസഞ്ഞിനോ വിനയസഞ്ഞിനോ വഗ്ഗാ വഗ്ഗസഞ്ഞിനോ പവാരേന്തി. തേഹി പവാരിയമാനേ അഥഞ്ഞേ ആവാസികാ ഭിക്ഖൂ ആഗച്ഛന്തി ബഹുതരാ. തേഹി, ഭിക്ഖവേ, ഭിക്ഖൂഹി പുന പവാരേതബ്ബം. പവാരിതാനം ആപത്തി ദുക്കടസ്സ.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ധമ്മസഞ്ഞിനോ വിനയസഞ്ഞിനോ വഗ്ഗാ വഗ്ഗസഞ്ഞിനോ പവാരേന്തി. തേഹി പവാരിയമാനേ അഥഞ്ഞേ ആവാസികാ ഭിക്ഖൂ ആഗച്ഛന്തി സമസമാ. പവാരിതാ സുപ്പവാരിതാ, അവസേസേഹി പവാരേതബ്ബം. പവാരിതാനം ആപത്തി ദുക്കടസ്സ.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ധമ്മസഞ്ഞിനോ വിനയസഞ്ഞിനോ വഗ്ഗാ വഗ്ഗസഞ്ഞിനോ പവാരേന്തി. തേഹി പവാരിയമാനേ അഥഞ്ഞേ ആവാസികാ ഭിക്ഖൂ ആഗച്ഛന്തി ഥോകതരാ. പവാരിതാ സുപ്പവാരിതാ, അവസേസേഹി പവാരേതബ്ബം. പവാരിതാനം ആപത്തി ദുക്കടസ്സ.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ധമ്മസഞ്ഞിനോ വിനയസഞ്ഞിനോ വഗ്ഗാ വഗ്ഗസഞ്ഞിനോ പവാരേന്തി. തേഹി പവാരിതമത്തേ,…പേ… അവുട്ഠിതായ പരിസായ…പേ… ഏകച്ചായ വുട്ഠിതായ പരിസായ…പേ… സബ്ബായ വുട്ഠിതായ പരിസായ, അഥഞ്ഞേ ആവാസികാ ഭിക്ഖൂ ആഗച്ഛന്തി ബഹുതരാ…പേ… സമസമാ…പേ… ഥോകതരാ. പവാരിതാ സുപ്പവാരിതാ, തേസം സന്തികേ പവാരേതബ്ബം. പവാരിതാനം ആപത്തി ദുക്കടസ്സ.

വഗ്ഗാവഗ്ഗസഞ്ഞീപന്നരസകം നിട്ഠിതം.

൧൩൦. വേമതികപന്നരസകം

൨൨൪. ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ‘‘കപ്പതി നു ഖോ അമ്ഹാകം പവാരേതും, ന നു ഖോ കപ്പതീ’’തി വേമതികാ പവാരേന്തി. തേഹി പവാരിയമാനേ അഥഞ്ഞേ ആവാസികാ ഭിക്ഖൂ ആഗച്ഛന്തി ബഹുതരാ. തേഹി, ഭിക്ഖവേ, ഭിക്ഖൂഹി പുന പവാരേതബ്ബം. പവാരിതാനം ആപത്തി ദുക്കടസ്സ.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ‘‘കപ്പതി നു ഖോ അമ്ഹാകം പവാരേതും, ന നു ഖോ കപ്പതീ’’തി വേമതികാ പവാരേന്തി. തേഹി പവാരിയമാനേ അഥഞ്ഞേ ആവാസികാ ഭിക്ഖൂ ആഗച്ഛന്തി സമസമാ. പവാരിതാ സുപ്പവാരിതാ, അവസേസേഹി പവാരേതബ്ബം. പവാരിതാനം ആപത്തി ദുക്കടസ്സ.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ‘‘കപ്പതി നു ഖോ അമ്ഹാകം പവാരേതും, ന നു ഖോ കപ്പതീ’’തി വേമതികാ പവാരേന്തി. തേഹി പവാരിയമാനേ അഥഞ്ഞേ ആവാസികാ ഭിക്ഖൂ ആഗച്ഛന്തി ഥോകതരാ. പവാരിതാ സുപ്പവാരിതാ, അവസേസേഹി പവാരേതബ്ബം. പവാരിതാനം ആപത്തി ദുക്കടസ്സ.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ‘‘കപ്പതി നു ഖോ അമ്ഹാകം പവാരേതും, ന നു ഖോ കപ്പതീ’’തി വേമതികാ പവാരേന്തി. തേഹി പവാരിതമത്തേ…പേ… അവുട്ഠിതായ പരിസായ…പേ… ഏകച്ചായ വുട്ഠിതായ പരിസായ…പേ… സബ്ബായ വുട്ഠിതായ പരിസായ, അഥഞ്ഞേ ആവാസികാ ഭിക്ഖൂ ആഗച്ഛന്തി ബഹുതരാ…പേ… സമസമാ…പേ… ഥോകതരാ. പവാരിതാ സുപ്പവാരിതാ, തേസം സന്തികേ പവാരേതബ്ബം. പവാരിതാനം ആപത്തി ദുക്കടസ്സ.

വേമതികപന്നരസകം നിട്ഠിതം.

൧൩൧. കുക്കുച്ചപകതപന്നരസകം

൨൨൫. ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ‘‘കപ്പതേവ അമ്ഹാകം പവാരേതും, നാമ്ഹാകം ന കപ്പതീ’’തി കുക്കുച്ചപകതാ പവാരേന്തി. തേഹി പവാരിയമാനേ അഥഞ്ഞേ ആവാസികാ ഭിക്ഖൂ ആഗച്ഛന്തി ബഹുതരാ. തേഹി, ഭിക്ഖവേ, ഭിക്ഖൂഹി പുന പവാരേതബ്ബം. പവാരിതാനം ആപത്തി ദുക്കടസ്സ.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ‘‘കപ്പതേവ അമ്ഹാകം പവാരേതും, നാമ്ഹാകം ന കപ്പതീ’’തി കുക്കുച്ചപകതാ പവാരേന്തി. തേഹി പവാരിയമാനേ അഥഞ്ഞേ ആവാസികാ ഭിക്ഖൂ ആഗച്ഛന്തി സമസമാ. പവാരിതാ സുപ്പവാരിതാ, അവസേസേഹി പവാരേതബ്ബം. പവാരിതാനം ആപത്തി ദുക്കടസ്സ.

ഇധ പന, ഭിക്ഖവേ, അഞ്ഞരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ‘‘കപ്പതേവ അമ്ഹാകം പവാരേതും, നാമ്ഹാകം ന കപ്പതീ’’തി കുക്കുച്ചപകതാ പവാരേന്തി. തേഹി പവാരിയമാനേ അഥഞ്ഞേ ആവാസികാ ഭിക്ഖൂ ആഗച്ഛന്തി ഥോകതരാ. പവാരിതാ സുപ്പവാരിതാ, അവസേസേഹി [അവസേസേഹി തേസം സന്തികേ (ക.)] പവാരേതബ്ബം. പവാരിതാനം ആപത്തി ദുക്കടസ്സ.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ‘‘കപ്പതേവ അമ്ഹാകം പവാരേതും, നാമ്ഹാകം ന കപ്പതീ’’തി കുക്കുച്ചപകതാ പവാരേന്തി. തേഹി പവാരിതമത്തേ,…പേ… അവുട്ഠിതായ പരിസായ…പേ… ഏകച്ചായ വുട്ഠിതായ പരിസായ…പേ… സബ്ബായ വുട്ഠിതായ പരിസായ, അഥഞ്ഞേ ആവാസികാ ഭിക്ഖൂ ആഗച്ഛന്തി ബഹുതരാ…പേ… സമസമാ…പേ… ഥോകതരാ. പവാരിതാ സുപ്പവാരിതാ, തേസം സന്തികേ പവാരേതബ്ബം. പവാരിതാനം ആപത്തി ദുക്കടസ്സ.

കുക്കുച്ചപകതപന്നരസകം നിട്ഠിതം.

൧൩൨. ഭേദപുരേക്ഖാരപന്നരസകം

൨൨൬. ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ‘‘നസ്സന്തേതേ, വിനസ്സന്തേതേ, കോ തേഹി അത്ഥോ’’തി ഭേദപുരേക്ഖാരാ പവാരേന്തി. തേഹി പവാരിയമാനേ അഥഞ്ഞേ ആവാസികാ ഭിക്ഖൂ ആഗച്ഛന്തി ബഹുതരാ. തേഹി, ഭിക്ഖവേ, ഭിക്ഖൂഹി പുന പവാരേതബ്ബം. പവാരിതാനം ആപത്തി ഥുല്ലച്ചയസ്സ.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ‘‘നസ്സന്തേതേ, വിനസ്സന്തേതേ, കോ തേഹി അത്ഥോ’’തി ഭേദപുരേക്ഖാരാ പവാരേന്തി. തേഹി പവാരിയമാനേ അഥഞ്ഞേ ആവാസികാ ഭിക്ഖൂ ആഗച്ഛന്തി സമസമാ. പവാരിതാ സുപ്പവാരിതാ, അവസേസേഹി പവാരേതബ്ബം. പവാരിതാനം ആപത്തി ഥുല്ലച്ചയസ്സ.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ‘‘നസ്സന്തേതേ, വിനസ്സന്തേതേ, കോ തേഹി അത്ഥോ’’തി – ഭേദപുരേക്ഖാരാ പവാരേന്തി. തേഹി പവാരിയമാനേ അഥഞ്ഞേ ആവാസികാ ഭിക്ഖൂ ആഗച്ഛന്തി ഥോകതരാ. പവാരിതാ സുപ്പവാരിതാ, അവസേസേഹി പവാരേതബ്ബം. പവാരിതാനം ആപത്തി ഥുല്ലച്ചയസ്സ.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ‘‘നസ്സന്തേതേ, വിനസ്സന്തേതേ, കോ തേഹി അത്ഥോ’’തി – ഭേദപുരേക്ഖാരാ പവാരേന്തി. തേഹി പവാരിതമത്തേ അഥഞ്ഞേ ആവാസികാ ഭിക്ഖൂ ആഗച്ഛന്തി ബഹുതരാ, തേഹി ഭിക്ഖവേ ഭിക്ഖൂഹി പുന പവാരേതബ്ബം, പവാരിതാനം ആപത്തി ഥുല്ലച്ചയസ്സ.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ‘‘നസ്സന്തേതേ, വിനസ്സന്തേതേ, കോ തേഹി അത്ഥോ’’തി ഭേദപുരേക്ഖാരാ പവാരേന്തി. തേഹി പവാരിതമത്തേ അഥഞ്ഞേ ആവാസികാ ഭിക്ഖൂ ആഗച്ഛന്തി സമസമാ. പവാരിതാ സുപ്പവാരിതാ, തേസം സന്തികേ പവാരേതബ്ബം. പവാരിതാനം ആപത്തി ഥുല്ലച്ചയസ്സ.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ‘‘നസ്സന്തേതേ, വിനസ്സന്തേതേ, കോ തേഹി അത്ഥോ’’തി ഭേദപുരേക്ഖാരാ പവാരേന്തി. തേഹി പവാരിതമത്തേ അഥഞ്ഞേ ആവാസികാ ഭിക്ഖൂ ആഗച്ഛന്തി ഥോകതരാ. പവാരിതാ സുപ്പവാരിതാ, തേസം സന്തികേ പവാരേതബ്ബം. പവാരിതാനം ആപത്തി ഥുല്ലച്ചയസ്സ.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ‘‘നസ്സന്തേതേ, വിനസ്സന്തേതേ, കോ തേഹി അത്ഥോ’’തി ഭേദപുരേക്ഖാരാ പവാരേന്തി. തേഹി പവാരിതമത്തേ, അവുട്ഠിതായ പരിസായ, അഥഞ്ഞേ ആവാസികാ ഭിക്ഖൂ ആഗച്ഛന്തി ബഹുതരാ. തേഹി, ഭിക്ഖവേ, ഭിക്ഖൂഹി പുന പവാരേതബ്ബം. പവാരിതാനം ആപത്തി ഥുല്ലച്ചയസ്സ.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ‘‘നസ്സന്തേതേ, വിനസ്സന്തേതേ, കോ തേഹി അത്ഥോ’’തി ഭേദപുരേക്ഖാരാ പവാരേന്തി. തേഹി പവാരിതമത്തേ, അവുട്ഠിതായ പരിസായ, അഥഞ്ഞേ ആവാസികാ ഭിക്ഖൂ ആഗച്ഛന്തി സമസമാ. പവാരിതാ സുപ്പവാരിതാ, തേസം സന്തികേ പവാരേതബ്ബം. പവാരിതാനം ആപത്തി ഥുല്ലച്ചയസ്സ.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ‘‘നസ്സന്തേതേ, വിനസ്സന്തേതേ, കോ തേഹി അത്ഥോ’’തി ഭേദപുരേക്ഖാരാ പവാരേന്തി. തേഹി പവാരിതമത്തേ, അവുട്ഠിതായ പരിസായ, അഥഞ്ഞേ ആവാസികാ ഭിക്ഖൂ ആഗച്ഛന്തി ഥോകതരാ. പവാരിതാ സുപ്പവാരിതാ, തേസം സന്തികേ പവാരേതബ്ബം. പവാരിതാനം ആപത്തി ഥുല്ലച്ചയസ്സ.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ‘‘നസ്സന്തേതേ, വിനസ്സന്തേതേ, കോ തേഹി അത്ഥോ’’തി ഭേദപുരേക്ഖാരാ പവാരേന്തി. തേഹി പവാരിതമത്തേ, ഏകച്ചായ വുട്ഠിതായ പരിസായ, അഥഞ്ഞേ ആവാസികാ ഭിക്ഖൂ ആഗച്ഛന്തി ബഹുതരാ. തേഹി, ഭിക്ഖവേ, ഭിക്ഖൂഹി പുന പവാരേതബ്ബം. പവാരിതാനം ആപത്തി ഥുല്ലച്ചയസ്സ.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ‘‘നസ്സന്തേതേ, വിനസ്സന്തേതേ, കോ തേഹി അത്ഥോ’’തി ഭേദപുരേക്ഖാരാ പവാരേന്തി. തേഹി പവാരിതമത്തേ, ഏകച്ചായ വുട്ഠിതായ പരിസായ, അഥഞ്ഞേ ആവാസികാ ഭിക്ഖൂ ആഗച്ഛന്തി സമസമാ. പവാരിതാ സുപ്പവാരിതാ, തേസം സന്തികേ പവാരേതബ്ബം. പവാരിതാനം ആപത്തി ഥുല്ലച്ചയസ്സ.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ‘‘നസ്സന്തേതേ, വിനസ്സന്തേതേ, കോ തേഹി അത്ഥോ’’തി ഭേദപുരേക്ഖാരാ പവാരേന്തി. തേഹി പവാരിതമത്തേ, ഏകച്ചായ വുട്ഠിതായ പരിസായ, അഥഞ്ഞേ ആവാസികാ ഭിക്ഖൂ ആഗച്ഛന്തി ഥോകതരാ. പവാരിതാ സുപ്പവാരിതാ, തേസം സന്തികേ പവാരേതബ്ബം. പവാരിതാനം ആപത്തി ഥുല്ലച്ചയസ്സ.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ‘‘നസ്സന്തേതേ, വിനസ്സന്തേതേ, കോ തേഹി അത്ഥോ’’തി ഭേദപുരേക്ഖാരാ പവാരേന്തി. തേഹി പവാരിതമത്തേ, സബ്ബായ വുട്ഠിതായ പരിസായ, അഥഞ്ഞേ ആവാസികാ ഭിക്ഖൂ ആഗച്ഛന്തി ബഹുതരാ. തേഹി, ഭിക്ഖവേ, ഭിക്ഖൂഹി പുന പവാരേതബ്ബം. പവാരിതാനം ആപത്തി ഥുല്ലച്ചയസ്സ.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ‘‘നസ്സന്തേതേ, വിനസ്സന്തേതേ, കോ തേഹി അത്ഥോ’’തി ഭേദപുരേക്ഖാരാ പവാരേന്തി. തേഹി പവാരിതമത്തേ, സബ്ബായ വുട്ഠിതായ പരിസായ, അഥഞ്ഞേ ആവാസികാ ഭിക്ഖൂ ആഗച്ഛന്തി സമസമാ. പവാരിതാ സുപ്പവാരിതാ, തേസം സന്തികേ പവാരേതബ്ബം. പവാരിതാനം ആപത്തി ഥുല്ലച്ചയസ്സ.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ

ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ജാനന്തി ‘‘അത്ഥഞ്ഞേ ആവാസികാ ഭിക്ഖൂ അനാഗതാ’’തി. തേ ‘‘നസ്സന്തേതേ, വിനസ്സന്തേതേ, കോ തേഹി അത്ഥോ’’തി ഭേദപുരേക്ഖാരാ പവാരേന്തി. തേഹി പവാരിതമത്തേ, സബ്ബായ വുട്ഠിതായ പരിസായ, അഥഞ്ഞേ ആവാസികാ ഭിക്ഖൂ ആഗച്ഛന്തി ഥോകതരാ. പവാരിതാ സുപ്പവാരിതാ, തേസം സന്തികേ പവാരേതബ്ബം. പവാരിതാനം ആപത്തി ഥുല്ലച്ചയസ്സ.

ഭേദപുരേക്ഖാരപന്നരസകം നിട്ഠിതം.

പഞ്ചവീസത്തികാ നിട്ഠിതാ.

൧൩൩. സീമോത്തന്തികപേയ്യാലം

൨൨൭. ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ സമ്ബഹുലാ ആവാസികാ ഭിക്ഖൂ സന്നിപതന്തി, പഞ്ച വാ അതിരേകാ വാ. തേ ന ജാനന്തി ‘‘അഞ്ഞേ ആവാസികാ ഭിക്ഖൂ അന്തോസീമം ഓക്കമന്തീ’’തി…പേ… തേ ന ജാനന്തി ‘‘അഞ്ഞേ ആവാസികാ ഭിക്ഖൂ അന്തോസീമം ഓക്കന്താ’’തി…പേ… തേ ന പസ്സന്തി അഞ്ഞേ ആവാസികേ ഭിക്ഖൂ അന്തോസീമം ഓക്കമന്തേ…പേ… തേ ന പസ്സന്തി അഞ്ഞേ ആവാസികേ ഭിക്ഖൂ അന്തോസീമം ഓക്കന്തേ…പേ… തേ ന സുണന്തി ‘‘അഞ്ഞേ ആവാസികാ ഭിക്ഖൂ അന്തോസീമം ഓക്കമന്തീ’’തി…പേ… തേ ന സുണന്തി ‘‘അഞ്ഞേ ആവാസികാ ഭിക്ഖൂ അന്തോസീമം ഓക്കന്താ’’തി…പേ….

ആവാസികേന ആവാസികാ ഏകസതപഞ്ചസത്തതി തികനയതോ, ആവാസികേന ആഗന്തുകാ, ആഗന്തുകേന ആവാസികാ, ആഗന്തുകേന ആഗന്തുകാ, പേയ്യാലമുഖേന സത്ത തികസതാനി ഹോന്തി.

സീമോക്കന്തികപേയ്യാലം നിട്ഠിതം.

൧൩൪. ദിവസനാനത്തം

൨൨൮. ഇധ പന, ഭിക്ഖവേ, ആവാസികാനം ഭിക്ഖൂനം ചാതുദ്ദസോ ഹോതി, ആഗന്തുകാനം പന്നരസോ. സചേ ആവാസികാ ബഹുതരാ ഹോന്തി, ആഗന്തുകേഹി ആവാസികാനം അനുവത്തിതബ്ബം. സചേ സമസമാ ഹോന്തി, ആഗന്തുകേഹി ആവാസികാനം അനുവത്തിതബ്ബം. സചേ ആഗന്തുകാ ബഹുതരാ ഹോന്തി, ആവാസികേഹി ആഗന്തുകാനം അനുവത്തിതബ്ബം.

ഇധ പന, ഭിക്ഖവേ, ആവാസികാനം ഭിക്ഖൂനം പന്നരസോ ഹോതി, ആഗന്തുകാനം ചാതുദ്ദസോ. സചേ ആവാസികാ ബഹുതരാ ഹോന്തി, ആഗന്തുകേഹി ആവാസികാനം അനുവത്തിതബ്ബം. സചേ സമസമാ ഹോന്തി, ആഗന്തുകേഹി ആവാസികാനം അനുവത്തിതബ്ബം. സചേ ആഗന്തുകാ ബഹുതരാ ഹോന്തി, ആവാസികേഹി ആഗന്തുകാനം അനുവത്തിതബ്ബം.

ഇധ പന, ഭിക്ഖവേ, ആവാസികാനം ഭിക്ഖൂനം പാടിപദോ ഹോതി, ആഗന്തുകാനം പന്നരസോ. സചേ ആവാസികാ ബഹുതരാ ഹോന്തി, ആവാസികേഹി ആഗന്തുകാനം നാകാമാ ദാതബ്ബാ സാമഗ്ഗീ; ആഗന്തുകേഹി നിസ്സീമം ഗന്ത്വാ പവാരേതബ്ബം. സചേ സമസമാ ഹോന്തി, ആവാസികേഹി ആഗന്തുകാനം നാകാമാ ദാതബ്ബാ സാമഗ്ഗീ; ആഗന്തുകേഹി നിസ്സീമം ഗന്ത്വാ പവാരേതബ്ബം. സചേ ആഗന്തുകാ ബഹുതരാ ഹോന്തി, ആവാസികേഹി ആഗന്തുകാനം സാമഗ്ഗീ വാ ദാതബ്ബാ, നിസ്സീമം വാ ഗന്തബ്ബം.

ഇധ പന, ഭിക്ഖവേ, ആവാസികാനം ഭിക്ഖൂനം പന്നരസോ ഹോതി, ആഗന്തുകാനം പാടിപദോ. സചേ ആവാസികാ ബഹുതരാ ഹോന്തി, ആഗന്തുകേഹി ആവാസികാനം സാമഗ്ഗീ വാ ദാതബ്ബാ, നിസ്സീമം വാ ഗന്തബ്ബം. സചേ സമസമാ ഹോന്തി, ആഗന്തുകേഹി ആവാസികാനം സാമഗ്ഗീ വാ ദാതബ്ബാ, നിസ്സീമം വാ ഗന്തബ്ബം. സചേ ആഗന്തുകാ ബഹുതരാ ഹോന്തി, ആഗന്തുകേഹി ആവാസികാനം നാകാമാ ദാതബ്ബാ സാമഗ്ഗീ; ആവാസികേഹി നിസ്സീമം ഗന്ത്വാ പവാരേതബ്ബം.

ദിവസനാനത്തം നിട്ഠിതം.

൧൩൫. ലിങ്ഗാദിദസ്സനം

൨൨൯. ഇധ പന, ഭിക്ഖവേ, ആഗന്തുകാ ഭിക്ഖൂ പസ്സന്തി ആവാസികാനം ഭിക്ഖൂനം ആവാസികാകാരം, ആവാസികലിങ്ഗം, ആവാസികനിമിത്തം, ആവാസികുദ്ദേസം, സുപ്പഞ്ഞത്തം മഞ്ചപീഠം ഭിസിബിബ്ബോഹനം, പാനീയം പരിഭോജനീയം സപട്ഠിതം, പരിവേണം സുസമ്മട്ഠം; പസ്സിത്വാ വേമതികാ ഹോന്തി – ‘‘അത്ഥി നു ഖോ ആവാസികാ ഭിക്ഖൂ, നത്ഥി നു ഖോ’’തി. തേ വേമതികാ ന വിചിനന്തി, അവിചിനിത്വാ പവാരേന്തി. ആപത്തി ദുക്കടസ്സ…പേ… തേ വേമതികാ വിചിനന്തി, വിചിനിത്വാ ന പസ്സന്തി, അപസ്സിത്വാ പവാരേന്തി. അനാപത്തി. തേ വേമതികാ വിചിനന്തി, വിചിനിത്വാ പസ്സന്തി, പസ്സിത്വാ ഏകതോ പവാരേന്തി. അനാപത്തി. തേ വേമതികാ വിചിനന്തി, വിചിനിത്വാ പസ്സന്തി, പസ്സിത്വാ പാടേക്കം പവാരേന്തി. ആപത്തി ദുക്കടസ്സ. തേ വേമതികാ വിചിനന്തി, വിചിനിത്വാ പസ്സന്തി, പസ്സിത്വാ – ‘‘നസ്സന്തേതേ, വിനസ്സന്തേതേ, കോ തേഹി അത്ഥോ’’തി – ഭേദപുരേക്ഖാരാ പവാരേന്തി. ആപത്തി ഥുല്ലച്ചയസ്സ.

ഇധ പന, ഭിക്ഖവേ, ആഗന്തുകാ ഭിക്ഖൂ സുണന്തി ആവാസികാനം ഭിക്ഖൂനം ആവാസികാകാരം, ആവാസികലിങ്ഗം, ആവാസികനിമിത്തം, ആവാസികുദ്ദേസം, ചങ്കമന്താനം പദസദ്ദം, സജ്ഝായസദ്ദം, ഉക്കാസിതസദ്ദം, ഖിപിതസദ്ദം; സുത്വാ വേമതികാ ഹോന്തി – ‘‘അത്ഥി നു ഖോ ആവാസികാ ഭിക്ഖൂ, നത്ഥി നു ഖോ’’തി. തേ വേമതികാ ന വിചിനന്തി, അവിചിനിത്വാ പവാരേന്തി. ആപത്തി ദുക്കടസ്സ. തേ വേമതികാ വിചിനന്തി, വിചിനിത്വാ ന പസ്സന്തി, അപസ്സിത്വാ പവാരേന്തി. അനാപത്തി. തേ വേമതികാ വിചിനന്തി, വിചിനിത്വാ പസ്സന്തി, പസ്സിത്വാ ഏകതോ പവാരേന്തി. അനാപത്തി. തേ വേമതികാ വിചിനന്തി, വിചിനിത്വാ പസ്സന്തി, പസ്സിത്വാ പാടേക്കം പവാരേന്തി. ആപത്തി ദുക്കടസ്സ. തേ വേമതികാ വിചിനന്തി, വിചിനിത്വാ പസ്സന്തി, പസ്സിത്വാ ‘‘നസ്സന്തേതേ, വിനസ്സന്തേതേ, കോ തേഹി അത്ഥോ’’തി ഭേദപുരേക്ഖാരാ പവാരേന്തി. ആപത്തി ഥുല്ലച്ചയസ്സ.

ഇധ പന, ഭിക്ഖവേ, ആവാസികാ ഭിക്ഖൂ പസ്സന്തി ആഗന്തുകാനം ഭിക്ഖൂനം ആഗന്തുകാകാരം, ആഗന്തുകലിങ്ഗം, ആഗന്തുകനിമിത്തം, ആഗന്തുകുദ്ദേസം, അഞ്ഞാതകം പത്തം, അഞ്ഞാതകം ചീവരം, അഞ്ഞാതകം നിസീദനം, പാദാനം ധോതം, ഉദകനിസ്സേകം; പസ്സിത്വാ വേമതികാ ഹോന്തി – ‘‘അത്ഥി നു ഖോ ആഗന്തുകാ ഭിക്ഖൂ, നത്ഥി നു ഖോ’’തി. തേ വേമതികാ ന വിചിനന്തി, അവിചിനിത്വാ പവാരേന്തി. ആപത്തി ദുക്കടസ്സ. തേ വേമതികാ വിചിനന്തി, വിചിനിത്വാ ന പസ്സന്തി, അപസ്സിത്വാ പവാരേന്തി. അനാപത്തി. തേ വേമതികാ വിചിനന്തി, വിചിനിത്വാ പസ്സന്തി, പസ്സിത്വാ ഏകതോ പവാരേന്തി. അനാപത്തി. തേ വേമതികാ വിചിനന്തി, വിചിനിത്വാ പസ്സന്തി, പസ്സിത്വാ പാടേക്കം പവാരേന്തി. ആപത്തി ദുക്കടസ്സ. തേ വേമതികാ വിചിനന്തി, വിചിനിത്വാ പസ്സന്തി, പസ്സിത്വാ – നസ്സന്തേതേ, വിനസ്സന്തേതേ, കോ തേഹി അത്ഥോതി – ഭേദപുരേക്ഖാരാ പവാരേന്തി. ആപത്തി ഥുല്ലച്ചയസ്സ.

ഇധ പന, ഭിക്ഖവേ, ആവാസികാ ഭിക്ഖൂ സുണന്തി ആഗന്തുകാനം ഭിക്ഖൂനം ആഗന്തുകാകാരം,

ആഗന്തുകലിങ്ഗം, ആഗന്തുകനിമിത്തം, ആഗന്തുകുദ്ദേസം, ആഗച്ഛന്താനം പദസദ്ദം, ഉപാഹനപപ്ഫോടനസദ്ദം, ഉക്കാസിതസദ്ദം, ഖിപിതസദ്ദം; സുത്വാ വേമതികാ ഹോന്തി – ‘‘അത്ഥി നു ഖോ ആഗന്തുകാ ഭിക്ഖൂ, നത്ഥി നു ഖോ’’തി. തേ വേമതികാ ന വിചിനന്തി, അവിചിനിത്വാ പവാരേന്തി. ആപത്തി ദുക്കടസ്സ. തേ വേമതികാ വിചിനന്തി, വിചിനിത്വാ ന പസ്സന്തി, അപസ്സിത്വാ പവാരേന്തി. അനാപത്തി. തേ വേമതികാ വിചിനന്തി, വിചിനിത്വാ പസ്സന്തി, പസ്സിത്വാ ഏകതോ പവാരേന്തി. അനാപത്തി. തേ വേമതികാ വിചിനന്തി, വിചിനിത്വാ പസ്സന്തി, പസ്സിത്വാ പാടേക്കം പവാരേന്തി. ആപത്തി ദുക്കടസ്സ. തേ വേമതികാ വിചിനന്തി, വിചിനിത്വാ പസ്സന്തി, പസ്സിത്വാ – നസ്സന്തേതേ, വിനസ്സന്തേതേ, കോ തേഹി അത്ഥോതി – ഭേദപുരേക്ഖാരാ പവാരേന്തി. ആപത്തി ഥുല്ലച്ചയസ്സ.

ലിങ്ഗാദിദസ്സനം നിട്ഠിതം.

൧൩൬. നാനാസംവാസകാദീഹി പവാരണാ

൨൩൦. ഇധ പന, ഭിക്ഖവേ, ആഗന്തുകാ ഭിക്ഖൂ പസ്സന്തി ആവാസികേ ഭിക്ഖൂ നാനാസംവാസകേ. തേ സമാനസംവാസകദിട്ഠിം പടിലഭന്തി, സമാനസംവാസകദിട്ഠിം പടിലഭിത്വാ ന പുച്ഛന്തി, അപുച്ഛിത്വാ ഏകതോ പവാരേന്തി. അനാപത്തി. തേ പുച്ഛന്തി, പുച്ഛിത്വാ നാഭിവിതരന്തി, അനഭിവിതരിത്വാ ഏകതോ പവാരേന്തി. ആപത്തി ദുക്കടസ്സ. തേ പുച്ഛന്തി, പുച്ഛിത്വാ നാഭിവിതരന്തി, അനഭിവിതരിത്വാ പാടേക്കം പവാരേന്തി. അനാപത്തി.

ഇധ പന, ഭിക്ഖവേ, ആഗന്തുകാ ഭിക്ഖൂ പസ്സന്തി ആവാസികേ ഭിക്ഖൂ സമാനസംവാസകേ. തേ നാനാസംവാസകദിട്ഠിം പടിലഭന്തി, നാനാസംവാസകദിട്ഠിം പടിലഭിത്വാ ന പുച്ഛന്തി, അപുച്ഛിത്വാ ഏകതോ പവാരേന്തി. ആപത്തി ദുക്കടസ്സ. തേ പുച്ഛന്തി, പുച്ഛിത്വാ അഭിവിതരന്തി, അഭിവിതരിത്വാ പാടേക്കം പവാരേന്തി. ആപത്തി ദുക്കടസ്സ. തേ പുച്ഛന്തി, പുച്ഛിത്വാ അഭിവിതരന്തി, അഭിവിതരിത്വാ ഏകതോ പവാരേന്തി. അനാപത്തി.

ഇധ പന, ഭിക്ഖവേ, ആവാസികാ ഭിക്ഖൂ പസ്സന്തി ആഗന്തുകേ ഭിക്ഖൂ നാനാസംവാസകേ. തേ സമാനസംവാസകദിട്ഠിം പടിലഭന്തി, സമാനസംവാസകദിട്ഠിം പടിലഭിത്വാ ന പുച്ഛന്തി, അപുച്ഛിത്വാ ഏകതോ പവാരേന്തി. അനാപത്തി. തേ പുച്ഛന്തി, പുച്ഛിത്വാ നാഭിവിതരന്തി, അനഭിവിതരിത്വാ ഏകതോ പവാരേന്തി. ആപത്തി ദുക്കടസ്സ. തേ പുച്ഛന്തി, പുച്ഛിത്വാ നാഭിവിതരന്തി, അനഭിവിതരിത്വാ പാടേക്കം പവാരേന്തി. അനാപത്തി.

ഇധ പന, ഭിക്ഖവേ, ആവാസികാ ഭിക്ഖൂ പസ്സന്തി ആഗന്തുകേ ഭിക്ഖൂ സമാനസംവാസകേ. തേ നാനാസംവാസകദിട്ഠിം പടിലഭന്തി, നാനാസംവാസകദിട്ഠിം പടിലഭിത്വാ ന പുച്ഛന്തി, അപുച്ഛിത്വാ ഏകതോ പവാരേന്തി. ആപത്തി ദുക്കടസ്സ. തേ പുച്ഛന്തി, പുച്ഛിത്വാ അഭിവിതരന്തി, അഭിവിതരിത്വാ പാടേക്കം പവാരേന്തി. ആപത്തി ദുക്കടസ്സ. തേ പുച്ഛന്തി, പുച്ഛിത്വാ അഭിവിതരന്തി, അഭിവിതരിത്വാ ഏകതോ പവാരേന്തി. അനാപത്തി.

നാനാസംവാസകാദീഹി പവാരണാ നിട്ഠിതാ.

൧൩൭. ന ഗന്തബ്ബവാരോ

൨൩൧. ന, ഭിക്ഖവേ, തദഹു പവാരണായ സഭിക്ഖുകാ ആവാസാ അഭിക്ഖുകോ ആവാസോ ഗന്തബ്ബോ, അഞ്ഞത്ര സങ്ഘേന, അഞ്ഞത്ര അന്തരായാ. ന, ഭിക്ഖവേ, തദഹു പവാരണായ സഭിക്ഖുകാ ആവാസാ അഭിക്ഖുകോ അനാവാസോ ഗന്തബ്ബോ, അഞ്ഞത്ര സങ്ഘേന, അഞ്ഞത്ര അന്തരായാ. ന, ഭിക്ഖവേ, തദഹു പവാരണായ സഭിക്ഖുകാ ആവാസാ അഭിക്ഖുകോ ആവാസോ വാ അനാവാസോ വാ ഗന്തബ്ബോ, അഞ്ഞത്ര സങ്ഘേന, അഞ്ഞത്ര അന്തരായാ.

ന, ഭിക്ഖവേ, തദഹു പവാരണായ സഭിക്ഖുകാ അനാവാസാ അഭിക്ഖുകോ ആവാസോ ഗന്തബ്ബോ, അഞ്ഞത്ര സങ്ഘേന, അഞ്ഞത്ര അന്തരായാ. ന, ഭിക്ഖവേ, തദഹു പവാരണായ സഭിക്ഖുകാ അനാവാസാ അഭിക്ഖുകോ അനാവാസോ ഗന്തബ്ബോ, അഞ്ഞത്ര സങ്ഘേന, അഞ്ഞത്ര അന്തരായാ. ന, ഭിക്ഖവേ, തദഹു പവാരണായ സഭിക്ഖുകാ അനാവാസാ അഭിക്ഖുകോ ആവാസോ വാ അനാവാസോ വാ ഗന്തബ്ബോ, അഞ്ഞത്ര സങ്ഘേന, അഞ്ഞത്ര അന്തരായാ.

ന, ഭിക്ഖവേ, തദഹു പവാരണായ സഭിക്ഖുകാ ആവാസാ വാ അനാവാസാ വാ അഭിക്ഖുകോ ആവാസോ ഗന്തബ്ബോ, അഞ്ഞത്ര സങ്ഘേന, അഞ്ഞത്ര അന്തരായാ. ന, ഭിക്ഖവേ, തദഹു പവാരണായ സഭിക്ഖുകാ ആവാസാ വാ അനാവാസാ വാ അഭിക്ഖുകോ അനാവാസോ ഗന്തബ്ബോ, അഞ്ഞത്ര സങ്ഘേന, അഞ്ഞത്ര അന്തരായാ. ന, ഭിക്ഖവേ, തദഹു പവാരണായ സഭിക്ഖുകാ ആവാസാ വാ അനാവാസാ വാ അഭിക്ഖുകോ ആവാസോ വാ അനാവാസോ വാ ഗന്തബ്ബോ, അഞ്ഞത്ര സങ്ഘേന, അഞ്ഞത്ര അന്തരായാ.

ന, ഭിക്ഖവേ, തദഹു പവാരണായ സഭിക്ഖുകാ ആവാസാ സഭിക്ഖുകോ ആവാസോ ഗന്തബ്ബോ, യത്ഥസ്സു ഭിക്ഖൂ നാനാസംവാസകാ, അഞ്ഞത്ര സങ്ഘേന, അഞ്ഞത്ര അന്തരായാ. ന, ഭിക്ഖവേ, തദഹു പവാരണായ സഭിക്ഖുകാ ആവാസാ സഭിക്ഖുകോ അനാവാസോ ഗന്തബ്ബോ, യത്ഥസ്സു ഭിക്ഖൂ നാനാസംവാസകാ, അഞ്ഞത്ര സങ്ഘേന, അഞ്ഞത്ര അന്തരായാ. ന, ഭിക്ഖവേ, തദഹു പവാരണായ സഭിക്ഖുകാ ആവാസാ സഭിക്ഖുകോ ആവാസോ വാ അനാവാസോ വാ ഗന്തബ്ബോ, യത്ഥസ്സു ഭിക്ഖൂ നാനാസംവാസകാ, അഞ്ഞത്ര സങ്ഘേന, അഞ്ഞത്ര അന്തരായാ.

ന, ഭിക്ഖവേ, തദഹു പവാരണായ സഭിക്ഖുകാ അനാവാസാ സഭിക്ഖുകോ ആവാസോ ഗന്തബ്ബോ, യത്ഥസ്സു ഭിക്ഖൂ നാനാസംവാസകാ, അഞ്ഞത്ര സങ്ഘേന, അഞ്ഞത്ര അന്തരായാ. ന, ഭിക്ഖവേ, തദഹു പവാരണായ സഭിക്ഖുകാ അനാവാസാ സഭിക്ഖുകോ അനാവാസോ ഗന്തബ്ബോ, യത്ഥസ്സു ഭിക്ഖൂ നാനാസംവാസകാ, അഞ്ഞത്ര സങ്ഘേന, അഞ്ഞത്ര അന്തരായാ. ന, ഭിക്ഖവേ, തദഹു പവാരണായ സഭിക്ഖുകാ അനാവാസാ സഭിക്ഖുകോ ആവാസോ വാ അനാവാസോ വാ ഗന്തബ്ബോ, യത്ഥസ്സു ഭിക്ഖൂ നാനാസംവാസകാ, അഞ്ഞത്ര സങ്ഘേന, അഞ്ഞത്ര അന്തരായാ.

ന, ഭിക്ഖവേ, തദഹു പവാരണായ സഭിക്ഖുകാ ആവാസാ വാ അനാവാസാ

വാ സഭിക്ഖുകോ ആവാസോ ഗന്തബ്ബോ, യത്ഥസ്സു ഭിക്ഖൂ നാനാസംവാസകാ, അഞ്ഞത്ര സങ്ഘേന, അഞ്ഞത്ര അന്തരായാ. ന, ഭിക്ഖവേ, തദഹു പവാരണായ സഭിക്ഖുകാ ആവാസാ വാ അനാവാസാ വാ സഭിക്ഖുകോ അനാവാസോ ഗന്തബ്ബോ, യത്ഥസ്സു ഭിക്ഖൂ നാനാസംവാസകാ, അഞ്ഞത്ര സങ്ഘേന, അഞ്ഞത്ര അന്തരായാ. ന, ഭിക്ഖവേ, തദഹു പവാരണായ സഭിക്ഖുകാ ആവാസാ വാ അനാവാസാ വാ സഭിക്ഖുകോ ആവാസോ വാ അനാവാസോ വാ ഗന്തബ്ബോ, യത്ഥസ്സു ഭിക്ഖൂ നാനാസംവാസകാ, അഞ്ഞത്ര സങ്ഘേന, അഞ്ഞത്ര അന്തരായാ.