൧൪൩. വത്ഥുഠപനാദി

൨൩൯. ഇധ പന, ഭിക്ഖവേ, ഭിക്ഖു തദഹു പവാരണായ സങ്ഘമജ്ഝേ ഉദാഹരേയ്യ – ‘‘സുണാതു മേ, ഭന്തേ, സങ്ഘോ. ഇദം വത്ഥു പഞ്ഞായതി, ന പുഗ്ഗലോ. യദി സങ്ഘസ്സ പത്തകല്ലം, വത്ഥും ഠപേത്വാ സങ്ഘോ പവാരേയ്യാ’’തി. സോ ഏവമസ്സ വചനീയോ – ‘‘ഭഗവതാ ഖോ, ആവുസോ, വിസുദ്ധാനം പവാരണാ പഞ്ഞത്താ. സചേ വത്ഥു പഞ്ഞായതി, ന പുഗ്ഗലോ, ഇദാനേവ നം വദേഹീ’’തി.

ഇധ പന, ഭിക്ഖവേ, ഭിക്ഖു തദഹു പവാരണായ സങ്ഘമജ്ഝേ ഉദാഹരേയ്യ – ‘‘സുണാതു മേ, ഭന്തേ, സങ്ഘോ. അയം പുഗ്ഗലോ പഞ്ഞായതി, ന വത്ഥു. യദി സങ്ഘസ്സ പത്തകല്ലം, പുഗ്ഗലം ഠപേത്വാ സങ്ഘോ പവാരേയ്യാ’’തി. സോ ഏവമസ്സ വചനീയോ – ‘‘ഭഗവതാ ഖോ, ആവുസോ, സമഗ്ഗാനം പവാരണാ പഞ്ഞത്താ. സചേ പുഗ്ഗലോ പഞ്ഞായതി, ന വത്ഥു, ഇദാനേവ നം വദേഹീ’’തി.

ഇധ പന, ഭിക്ഖവേ, ഭിക്ഖു തദഹു പവാരണായ സങ്ഘമജ്ഝേ ഉദാഹരേയ്യ – ‘‘സുണാതു മേ, ഭന്തേ, സങ്ഘോ. ഇദം വത്ഥു ച പുഗ്ഗലോ ച പഞ്ഞായതി. യദി സങ്ഘസ്സ പത്തകല്ലം, വത്ഥുഞ്ച പുഗ്ഗലഞ്ച ഠപേത്വാ സങ്ഘോ പവാരേയ്യാ’’തി. സോ ഏവമസ്സ വചനീയോ – ‘‘ഭഗവതാ ഖോ, ആവുസോ, വിസുദ്ധാനഞ്ച സമഗ്ഗാനഞ്ച പവാരണാ പഞ്ഞത്താ. സചേ വത്ഥു ച പുഗ്ഗലോ ച പഞ്ഞായതി, ഇദാനേവ നം വദേഹീ’’തി.

പുബ്ബേ ചേ, ഭിക്ഖവേ, പവാരണായ വത്ഥു പഞ്ഞായതി, പച്ഛാ പുഗ്ഗലോ, കല്ലം വചനായ. പുബ്ബേ ചേ, ഭിക്ഖവേ, പവാരണായ പുഗ്ഗലോ പഞ്ഞായതി, പച്ഛാ വത്ഥു, കല്ലം വചനായ. പുബ്ബേ ചേ, ഭിക്ഖവേ, പവാരണായ വത്ഥു ച പുഗ്ഗലോ ച പഞ്ഞായതി, തം ചേ കതായ പവാരണായ ഉക്കോടേതി, ഉക്കോടനകം പാചിത്തിയന്തി.

വത്ഥുഠപനാദി നിട്ഠിതാ.