൧൪൪. ഭണ്ഡനകാരകവത്ഥു

൨൪൦. തേന ഖോ പന സമയേന സമ്ബഹുലാ സന്ദിട്ഠാ സമ്ഭത്താ ഭിക്ഖൂ കോസലേസു ജനപദേ അഞ്ഞതരസ്മിം ആവാസേ വസ്സം ഉപഗച്ഛിംസു. തേസം സാമന്താ അഞ്ഞേ ഭിക്ഖൂ ഭണ്ഡനകാരകാ കലഹകാരകാ വിവാദകാരകാ ഭസ്സകാരകാ സങ്ഘേ അധികരണകാരകാ വസ്സം ഉപഗച്ഛിംസു – മയം തേസം ഭിക്ഖൂനം വസ്സംവുട്ഠാനം പവാരണായ പവാരണം ഠപേസ്സാമാതി. അസ്സോസും ഖോ തേ ഭിക്ഖൂ – ‘‘അമ്ഹാകം കിര സാമന്താ അഞ്ഞേ ഭിക്ഖൂ ഭണ്ഡനകാരകാ കലഹകാരകാ വിവാദകാരകാ ഭസ്സകാരകാ സങ്ഘേ അധികരണകാരകാ വസ്സം ഉപഗതാ – മയം തേസം ഭിക്ഖൂനം വസ്സംവുട്ഠാനം പവാരണായ പവാരണം ഠപേസ്സാമാ’’തി. കഥം നു ഖോ അമ്ഹേഹി പടിപജ്ജിതബ്ബന്തി? ഭഗവതോ ഏതമത്ഥം ആരോചേസും.

ഇധ പന, ഭിക്ഖവേ, സമ്ബഹുലാ സന്ദിട്ഠാ സമ്ഭത്താ ഭിക്ഖൂ അഞ്ഞതരസ്മിം ആവാസേ വസ്സം ഉപഗച്ഛന്തി. തേസം സാമന്താ അഞ്ഞേ ഭിക്ഖൂ ഭണ്ഡനകാരകാ കലഹകാരകാ വിവാദകാരകാ ഭസ്സകാരകാ സങ്ഘേ അധികരണകാരകാ വസ്സം ഉപഗച്ഛന്തി – മയം തേസം ഭിക്ഖൂനം വസ്സംവുട്ഠാനം പവാരണായ പവാരണം ഠപേസ്സാമാതി. അനുജാനാമി, ഭിക്ഖവേ, തേഹി ഭിക്ഖൂഹി ദ്വേ തയോ ഉപോസഥേ ചാതുദ്ദസികേ കാതും – കഥം മയം തേഹി ഭിക്ഖൂഹി പഠമതരം പവാരേയ്യാമാതി. തേ ചേ, ഭിക്ഖവേ, ഭിക്ഖൂ ഭണ്ഡനകാരകാ കലഹകാരകാ വിവാദകാരകാ ഭസ്സകാരകാ സങ്ഘേ അധികരണകാരകാ തം ആവാസം ആഗച്ഛന്തി, തേഹി, ഭിക്ഖവേ, ആവാസികേഹി ഭിക്ഖൂഹി ലഹും ലഹും സന്നിപതിത്വാ പവാരേതബ്ബം, പവാരേത്വാ വത്തബ്ബാ – ‘‘പവാരിതാ ഖോ മയം, ആവുസോ; യഥായസ്മന്താ മഞ്ഞന്തി തഥാ കരോന്തൂ’’തി. തേ ചേ, ഭിക്ഖവേ, ഭിക്ഖൂ ഭണ്ഡനകാരകാ കലഹകാരകാ വിവാദകാരകാ ഭസ്സകാരകാ സങ്ഘേ അധികരണകാരകാ അസംവിഹിതാ തം ആവാസം ആഗച്ഛന്തി, തേഹി, ഭിക്ഖവേ, ആവാസികേഹി ഭിക്ഖൂഹി ആസനം പഞ്ഞപേതബ്ബം, പാദോദകം പാദപീഠം പാദകഥലികം ഉപനിക്ഖിപിതബ്ബം, പച്ചുഗ്ഗന്ത്വാ പത്തചീവരം പടിഗ്ഗഹേതബ്ബം, പാനീയേന പരിപുച്ഛിതബ്ബാ; തേസം വിക്ഖിത്വാ [വിക്ഖിപാപേത്വാ (പടിവിസോധകാനം മതി), ആചിക്ഖിത്വാ (ക.)] നിസ്സീമം ഗന്ത്വാ പവാരേതബ്ബം, പവാരേത്വാ വത്തബ്ബാ – ‘‘പവാരിതാ ഖോ മയം, ആവുസോ; യഥായസ്മന്താ മഞ്ഞന്തി തഥാ കരോന്തൂ’’തി. ഏവഞ്ചേതം ലഭേഥ, ഇച്ചേതം കുസലം. നോ ചേ ലഭേഥ, ആവാസികേന ഭിക്ഖുനാ ബ്യത്തേന പടിബലേന ആവാസികാ ഭിക്ഖൂ ഞാപേതബ്ബാ –

‘‘സുണന്തു മേ, ആയസ്മന്തോ [ആയസ്മന്താ (ക.)], ആവാസികാ. യദായസ്മന്താനം പത്തകല്ലം, ഇദാനി ഉപോസഥം കരേയ്യാമ, പാതിമോക്ഖം ഉദ്ദിസേയ്യാമ, ആഗമേ കാളേ പവാരേയ്യാമാ’’തി. തേ ചേ, ഭിക്ഖവേ, ഭിക്ഖൂ ഭണ്ഡനകാരകാ കലഹകാരകാ വിവാദകാരകാ ഭസ്സകാരകാ സങ്ഘേ അധികരണകാരകാ തേ ഭിക്ഖൂ ഏവം വദേയ്യും – ‘‘സാധാവുസോ, ഇദാനേവ നോ പവാരേഥാ’’തി, തേ ഏവമസ്സു വചനീയാ – ‘‘അനിസ്സരാ ഖോ തുമ്ഹേ, ആവുസോ, അമ്ഹാകം പവാരണായ; ന താവ മയം പവാരേയ്യാമാ’’തി. തേ ചേ, ഭിക്ഖവേ, ഭിക്ഖൂ ഭണ്ഡനകാരകാ കലഹകാരകാ വിവാദകാരകാ ഭസ്സകാരകാ സങ്ഘേ അധികരണകാരകാ തം കാളം അനുവസേയ്യും, ആവാസികേന, ഭിക്ഖവേ, ഭിക്ഖുനാ ബ്യത്തേന പടിബലേന ആവാസികാ ഭിക്ഖൂ ഞാപേതബ്ബാ –

‘‘സുണന്തു മേ, ആയസ്മന്തോ, ആവാസികാ. യദായസ്മന്താനം പത്തകല്ലം, ഇദാനി ഉപോസഥം കരേയ്യാമ, പാതിമോക്ഖം ഉദ്ദിസേയ്യാമ, ആഗമേ ജുണ്ഹേ പവാരേയ്യാമാ’’തി. തേ ചേ, ഭിക്ഖവേ, ഭിക്ഖൂ ഭണ്ഡനകാരകാ കലഹകാരകാ വിവാദകാരകാ ഭസ്സകാരകാ സങ്ഘേ അധികരണകാരകാ തേ ഭിക്ഖൂ ഏവം വദേയ്യും – ‘‘സാധാവുസോ, ഇദാനേവ നോ പവാരേയ്യാഥാ’’തി, തേ ഏവമസ്സു വചനീയാ – ‘‘അനിസ്സരാ ഖോ തുമ്ഹേ, ആവുസോ, അമ്ഹാകം പവാരണായ, ന താവ മയം പവാരേയ്യാമാ’’തി. തേ ചേ, ഭിക്ഖവേ, ഭിക്ഖൂ ഭണ്ഡനകാരകാ കലഹകാരകാ വിവാദകാരകാ ഭസ്സകാരകാ സങ്ഘേ അധികരണകാരകാ തമ്പി ജുണ്ഹം അനുവസേയ്യും, തേഹി, ഭിക്ഖവേ, ഭിക്ഖൂഹി സബ്ബേഹേവ ആഗമേ ജുണ്ഹേ കോമുദിയാ ചാതുമാസിനിയാ അകാമാ പവാരേതബ്ബം.

തേഹി ചേ, ഭിക്ഖവേ, ഭിക്ഖൂഹി പവാരിയമാനേ ഗിലാനോ അഗിലാനസ്സ പവാരണം ഠപേതി, സോ ഏവമസ്സ വചനീയോ – ‘‘ആയസ്മാ ഖോ ഗിലാനോ. ഗിലാനോ ച അനനുയോഗക്ഖമോ വുത്തോ ഭഗവതാ. ആഗമേഹി, ആവുസോ, യാവ അരോഗോ ഹോസി. അരോഗോ ആകങ്ഖമാനോ ചോദേസ്സസീ’’തി. ഏവഞ്ചേ വുച്ചമാനോ ചോദേതി, അനാദരിയേ പാചിത്തിയം. തേഹി ചേ, ഭിക്ഖവേ, ഭിക്ഖൂഹി പവാരിയമാനേ അഗിലാനോ ഗിലാനസ്സ പവാരണം ഠപേതി, സോ ഏവമസ്സ വചനീയോ – ‘‘അയം ഖോ, ആവുസോ, ഭിക്ഖു ഗിലാനോ. ഗിലാനോ ച അനനുയോഗക്ഖമോ വുത്തോ ഭഗവതാ. ആഗമേഹി, ആവുസോ, യാവായം ഭിക്ഖു അരോഗോ ഹോതി. അരോഗം ആകങ്ഖമാനോ ചോദേസ്സസീ’’തി. ഏവഞ്ചേ വുച്ചമാനോ ചോദേതി, അനാദരിയേ പാചിത്തിയം. തേഹി ചേ, ഭിക്ഖവേ, ഭിക്ഖൂഹി പവാരിയമാനേ ഗിലാനോ ഗിലാനസ്സ പവാരണം ഠപേതി, സോ ഏവമസ്സ വചനീയോ – ‘‘ആയസ്മന്താ ഖോ ഗിലാനാ. ഗിലാനോ ച അനനുയോഗക്ഖമോ വുത്തോ ഭഗവതാ. ആഗമേഹി, ആവുസോ, യാവ അരോഗാ ഹോഥ. അരോഗോ അരോഗം ആകങ്ഖമാനോ ചോദേസ്സസീ’’തി [യാവ അരോഗോ ഹോതി, അരോഗം ആകങ്ഖമാനോ ചോദേസ്സസീതി (ക.)]. ഏവഞ്ചേ വുച്ചമാനോ ചോദേതി, അനാദരിയേ പാചിത്തിയം. തേഹി ചേ, ഭിക്ഖവേ, ഭിക്ഖൂഹി പവാരിയമാനേ അഗിലാനോ അഗിലാനസ്സ പവാരണം ഠപേതി, ഉഭോ സങ്ഘേന സമനുയുഞ്ജിത്വാ സമനുഗാഹിത്വാ [സമനുഭാസിത്വാ (സീ.)] യഥാധമ്മം കാരാപേത്വാ സങ്ഘേന പവാരേതബ്ബന്തി.

ഭണ്ഡനകാരകവത്ഥു നിട്ഠിതം.