൧൪൨. ഥുല്ലച്ചയവത്ഥുകാദി

൨൩൮. ഇധ പന, ഭിക്ഖവേ, ഭിക്ഖു തദഹു പവാരണായ ഥുല്ലച്ചയം അജ്ഝാപന്നോ ഹോതി. ഏകച്ചേ ഭിക്ഖൂ ഥുല്ലച്ചയദിട്ഠിനോ ഹോന്തി, ഏകച്ചേ ഭിക്ഖൂ സങ്ഘാദിസേസദിട്ഠിനോ ഹോന്തി. യേ തേ, ഭിക്ഖവേ, ഭിക്ഖൂ ഥുല്ലച്ചയദിട്ഠിനോ, തേഹി സോ, ഭിക്ഖവേ, ഭിക്ഖു ഏകമന്തം അപനേത്വാ യഥാധമ്മം കാരാപേത്വാ സങ്ഘം ഉപസങ്കമിത്വാ ഏവമസ്സ വചനീയോ – ‘‘യം ഖോ സോ, ആവുസോ, ഭിക്ഖു ആപത്തിം ആപന്നോ, സാസ്സ യഥാധമ്മം പടികതാ. യദി സങ്ഘസ്സ പത്തകല്ലം, സങ്ഘോ പവാരേയ്യാ’’തി.

ഇധ പന, ഭിക്ഖവേ, ഭിക്ഖു തദഹു പവാരണായ ഥുല്ലച്ചയം അജ്ഝാപന്നോ ഹോതി. ഏകച്ചേ ഭിക്ഖൂ ഥുല്ലച്ചയദിട്ഠിനോ ഹോന്തി, ഏകച്ചേ ഭിക്ഖൂ പാചിത്തിയദിട്ഠിനോ ഹോന്തി…പേ… ഏകച്ചേ ഭിക്ഖൂ ഥുല്ലച്ചയദിട്ഠിനോ ഹോന്തി, ഏകച്ചേ ഭിക്ഖൂ പാടിദേസനീയദിട്ഠിനോ ഹോന്തി… ഏകച്ചേ ഭിക്ഖൂ ഥുല്ലച്ചയദിട്ഠിനോ ഹോന്തി, ഏകച്ചേ ഭിക്ഖൂ ദുക്കടദിട്ഠിനോ ഹോന്തി… ഏകച്ചേ ഭിക്ഖൂ ഥുല്ലച്ചയദിട്ഠിനോ ഹോന്തി, ഏകച്ചേ ഭിക്ഖൂ ദുബ്ഭാസിതദിട്ഠിനോ ഹോന്തി. യേ തേ, ഭിക്ഖവേ, ഭിക്ഖൂ ഥുല്ലച്ചയദിട്ഠിനോ, തേഹി സോ, ഭിക്ഖവേ, ഭിക്ഖു ഏകമന്തം അപനേത്വാ യഥാധമ്മം കാരാപേത്വാ സങ്ഘം ഉപസങ്കമിത്വാ ഏവമസ്സ വചനീയോ – ‘‘യം ഖോ സോ, ആവുസോ, ഭിക്ഖു ആപത്തിം ആപന്നോ, സാസ്സ യഥാധമ്മം പടികതാ. യദി സങ്ഘസ്സ പത്തകല്ലം, സങ്ഘോ പവാരേയ്യാ’’തി.

ഇധ പന, ഭിക്ഖവേ, ഭിക്ഖു തദഹു പവാരണായ പാചിത്തിയം അജ്ഝാപന്നോ ഹോതി…പേ… പാടിദേസനീയം അജ്ഝാപന്നോ ഹോതി… ദുക്കടം അജ്ഝാപന്നോ ഹോതി… ദുബ്ഭാസിതം അജ്ഝാപന്നോ ഹോതി. ഏകച്ചേ ഭിക്ഖൂ ദുബ്ഭാസിതദിട്ഠിനോ ഹോന്തി, ഏകച്ചേ ഭിക്ഖൂ സങ്ഘാദിസേസദിട്ഠിനോ ഹോന്തി. യേ തേ, ഭിക്ഖവേ, ഭിക്ഖൂ ദുബ്ഭാസിതദിട്ഠിനോ, തേഹി സോ, ഭിക്ഖവേ, ഭിക്ഖു ഏകമന്തം അപനേത്വാ യഥാധമ്മം കാരാപേത്വാ സങ്ഘം ഉപസങ്കമിത്വാ ഏവമസ്സ വചനീയോ – ‘‘യം ഖോ സോ, ആവുസോ, ഭിക്ഖു ആപത്തിം ആപന്നോ, സാസ്സ യഥാധമ്മം പടികതാ. യദി സങ്ഘസ്സ പത്തകല്ലം, സങ്ഘോ പവാരേയ്യാ’’തി.

ഇധ പന, ഭിക്ഖവേ, ഭിക്ഖു തദഹു പവാരണായ ദുബ്ഭാസിതം അജ്ഝാപന്നോ ഹോതി. ഏകച്ചേ ഭിക്ഖൂ ദുബ്ഭാസിതദിട്ഠിനോ ഹോന്തി, ഏകച്ചേ ഭിക്ഖൂ ഥുല്ലച്ചയദിട്ഠിനോ ഹോന്തി…പേ… ഏകച്ചേ ഭിക്ഖൂ ദുബ്ഭാസിതദിട്ഠിനോ ഹോന്തി, ഏകച്ചേ ഭിക്ഖൂ പാചിത്തിയദിട്ഠിനോ ഹോന്തി… ഏകച്ചേ ഭിക്ഖൂ ദുബ്ഭാസിതദിട്ഠിനോ ഹോന്തി, ഏകച്ചേ ഭിക്ഖൂ പാടിദേസനീയദിട്ഠിനോ ഹോന്തി… ഏകച്ചേ ഭിക്ഖൂ ദുബ്ഭാസിതദിട്ഠിനോ ഹോന്തി, ഏകച്ചേ ഭിക്ഖൂ ദുക്കടദിട്ഠിനോ ഹോന്തി. യേ തേ, ഭിക്ഖവേ, ഭിക്ഖൂ ദുബ്ഭാസിതദിട്ഠിനോ, തേഹി സോ, ഭിക്ഖവേ, ഭിക്ഖു ഏകമന്തം അപനേത്വാ യഥാധമ്മം കാരാപേത്വാ സങ്ഘം ഉപസങ്കമിത്വാ ഏവമസ്സ വചനീയോ – ‘‘യം ഖോ സോ, ആവുസോ, ഭിക്ഖു ആപത്തിം ആപന്നോ, സാസ്സ യഥാധമ്മം പടികതാ. യദി സങ്ഘസ്സ പത്തകല്ലം, സങ്ഘോ പവാരേയ്യാ’’തി.

ഥുല്ലച്ചയവത്ഥുകാദി നിട്ഠിതാ.