൧൩൯. വജ്ജനീയപുഗ്ഗലസന്ദസ്സനാ

൨൩൩. ന, ഭിക്ഖവേ, ഭിക്ഖുനിയാ നിസിന്നപരിസായ പവാരേതബ്ബം. യോ പവാരേയ്യ, ആപത്തി ദുക്കടസ്സ. ന, ഭിക്ഖവേ, സിക്ഖമാനായ…പേ… ന സാമണേരസ്സ…പേ… ന സാമണേരിയാ…പേ… ന സിക്ഖം പച്ചക്ഖാതകസ്സ…പേ… ന അന്തിമവത്ഥും അജ്ഝാപന്നകസ്സ നിസിന്നപരിസായ പവാരേതബ്ബം. യോ പവാരേയ്യ, ആപത്തി ദുക്കടസ്സ.

ന ആപത്തിയാ അദസ്സനേ ഉക്ഖിത്തകസ്സ നിസിന്നപരിസായ പവാരേതബ്ബം. യോ പവാരേയ്യ, യഥാധമ്മോ കാരേതബ്ബോ. ന ആപത്തിയാ അപ്പടികമ്മേ ഉക്ഖിത്തകസ്സ…പേ… ന പാപികായ ദിട്ഠിയാ അപ്പടിനിസ്സഗ്ഗേ ഉക്ഖിത്തകസ്സ നിസിന്നപരിസായ പവാരേതബ്ബം. യോ പവാരേയ്യ, യഥാധമ്മോ കാരേതബ്ബോ.

ന പണ്ഡകസ്സ നിസിന്നപരിസായ പവാരേതബ്ബം. യോ പവാരേയ്യ, ആപത്തി ദുക്കടസ്സ. ന ഥേയ്യസംവാസകസ്സ…പേ… ന തിത്ഥിയപക്കന്തകസ്സ…പേ… ന തിരച്ഛാനഗതസ്സ…പേ… ന മാതുഘാതകസ്സ…പേ… ന പിതുഘാതകസ്സ…പേ… ന അരഹന്തഘാതകസ്സ…പേ… ന ഭിക്ഖുനിദൂസകസ്സ …പേ… ന സങ്ഘഭേദകസ്സ…പേ… ന ലോഹിതുപ്പാദകസ്സ …പേ… ന ഉഭതോബ്യഞ്ജനകസ്സ നിസിന്നപരിസായ പവാരേതബ്ബം. യോ പവാരേയ്യ, ആപത്തി ദുക്കടസ്സ.

ന, ഭിക്ഖവേ, പാരിവാസികപവാരണാദാനേന പവാരേതബ്ബം, അഞ്ഞത്ര അവുട്ഠിതായ പരിസായ. ന ച, ഭിക്ഖവേ, അപ്പവാരണായ പവാരേതബ്ബം, അഞ്ഞത്ര സങ്ഘസാമഗ്ഗിയാതി.

വജ്ജനീയപുഗ്ഗലസന്ദസ്സനാ നിട്ഠിതാ.

ദുതിയഭാണവാരോ നിട്ഠിതോ.