൧൪൦. ദ്വേവാചികാദിപവാരണാ

൨൩൪. തേന ഖോ പന സമയേന കോസലേസു ജനപദേ അഞ്ഞതരസ്മിം ആവാസേ തദഹു പവാരണായ സവരഭയം അഹോസി. ഭിക്ഖൂ നാസക്ഖിംസു തേവാചികം പവാരേതും. ഭഗവതോ ഏതമത്ഥം ആരോചേസും. അനുജാനാമി, ഭിക്ഖവേ, ദ്വേവാചികം പവാരേതുന്തി.

ബാള്ഹതരം സവരഭയം അഹോസി. ഭിക്ഖൂ നാസക്ഖിംസു ദ്വേവാചികം പവാരേതും. ഭഗവതോ ഏതമത്ഥം ആരോചേസും. അനുജാനാമി, ഭിക്ഖവേ, ഏകവാചികം പവാരേതുന്തി.

ബാള്ഹതരം സവരഭയം അഹോസി. ഭിക്ഖൂ നാസക്ഖിംസു ഏകവാചികം പവാരേതും. ഭഗവതോ ഏതമത്ഥം ആരോചേസും. അനുജാനാമി, ഭിക്ഖവേ, സമാനവസ്സികം പവാരേതുന്തി.

തേന ഖോ പന സമയേന അഞ്ഞതരസ്മിം ആവാസേ തദഹു പവാരണായ മനുസ്സേഹി ദാനം ദേന്തേഹി യേഭുയ്യേന രത്തി ഖേപിതാ ഹോതി. അഥ ഖോ തേസം ഭിക്ഖൂനം ഏതദഹോസി – ‘‘മനുസ്സേഹി ദാനം ദേന്തേഹി യേഭുയ്യേന രത്തി ഖേപിതാ. സചേ സങ്ഘോ തേവാചികം പവാരേസ്സതി, അപ്പവാരിതോവ സങ്ഘോ ഭവിസ്സതി, അഥായം രത്തി വിഭായിസ്സതി. കഥം നു ഖോ അമ്ഹേഹി പടിപജ്ജിതബ്ബ’’ന്തി? ഭഗവതോ ഏതമത്ഥം ആരോചേസും. ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ മനുസ്സേഹി ദാനം ദേന്തേഹി യേഭുയ്യേന രത്തി ഖേപിതാ ഹോതി. തത്ര ചേ, ഭിക്ഖവേ, ഭിക്ഖൂനം ഏവം ഹോതി – ‘‘മനുസ്സേഹി ദാനം ദേന്തേഹി യേഭുയ്യേന രത്തി ഖേപിതാ. സചേ സങ്ഘോ തേവാചികം പവാരേസ്സതി, അപ്പവാരിതോവ സങ്ഘോ ഭവിസ്സതി, അഥായം രത്തി വിഭായിസ്സതീ’’തി, ബ്യത്തേന ഭിക്ഖുനാ പടിബലേന സങ്ഘോ ഞാപേതബ്ബോ –

‘‘സുണാതു മേ, ഭന്തേ, സങ്ഘോ. മനുസ്സേഹി ദാനം ദേന്തേഹി യേഭുയ്യേന രത്തി ഖേപിതാ. സചേ സങ്ഘോ തേവാചികം പവാരേസ്സതി, അപ്പവാരിതോവ സങ്ഘോ ഭവിസ്സതി, അഥായം രത്തി വിഭായിസ്സതി. യദി സങ്ഘസ്സ പത്തകല്ലം, സങ്ഘോ ദ്വേവാചികം, ഏകവാചികം, സമാനവസ്സികം പവാരേയ്യാ’’തി.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ ഭിക്ഖൂഹി ധമ്മം ഭണന്തേഹി…പേ… സുത്തന്തികേഹി സുത്തന്തം സങ്ഗായന്തേഹി… വിനയധരേഹി വിനയം വിനിച്ഛിനന്തേഹി… ധമ്മകഥികേഹി ധമ്മം സാകച്ഛന്തേഹി… ഭിക്ഖൂഹി കലഹം കരോന്തേഹി യേഭുയ്യേന രത്തി ഖേപിതാ ഹോതി. തത്ര ചേ ഭിക്ഖൂനം ഏവം ഹോതി – ‘‘ഭിക്ഖൂഹി കലഹം കരോന്തേഹി യേഭുയ്യേന രത്തി ഖേപിതാ. സചേ സങ്ഘോ തേവാചികം പവാരേസ്സതി, അപ്പവാരിതോവ സങ്ഘോ ഭവിസ്സതി, അഥായം രത്തി വിഭായിസ്സതീ’’തി, ബ്യത്തേന ഭിക്ഖുനാ പടിബലേന സങ്ഘോ ഞാപേതബ്ബോ –

‘‘സുണാതു മേ, ഭന്തേ, സങ്ഘോ. ഭിക്ഖൂഹി കലഹം കരോന്തേഹി യേഭുയ്യേന രത്തി ഖേപിതാ. സചേ സങ്ഘോ തേവാചികം പവാരേസ്സതി, അപ്പവാരിതോവ സങ്ഘോ ഭവിസ്സതി, അഥായം രത്തി വിഭായിസ്സതി. യദി സങ്ഘസ്സ പത്തകല്ലം, സങ്ഘോ ദ്വേവാചികം, ഏകവാചികം, സമാനവസ്സികം പവാരേയ്യാ’’തി.

തേന ഖോ പന സമയേന കോസലേസു ജനപദേ അഞ്ഞതരസ്മിം ആവാസേ തദഹു പവാരണായ മഹാഭിക്ഖുസങ്ഘോ സന്നിപതിതോ ഹോതി, പരിത്തഞ്ച അനോവസ്സികം [അനോവസ്സകം (ക.)] ഹോതി, മഹാ ച മേഘോ ഉഗ്ഗതോ ഹോതി. അഥ ഖോ തേസം ഭിക്ഖൂനം ഏതദഹോസി – ‘‘അയം ഖോ മഹാഭിക്ഖുസങ്ഘോ സന്നിപതിതോ, പരിത്തഞ്ച അനോവസ്സികം, മഹാ ച മേഘോ ഉഗ്ഗതോ. സചേ സങ്ഘോ തേവാചികം പവാരേസ്സതി, അപ്പവാരിതോവ സങ്ഘോ ഭവിസ്സതി, അഥായം മേഘോ പവസ്സിസ്സതി. കഥം നു ഖോ അമ്ഹേഹി പടിപജ്ജിതബ്ബ’’ന്തി? ഭഗവതോ ഏതമത്ഥം ആരോചേസും. ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ മഹാഭിക്ഖുസങ്ഘോ സന്നിപതിതോ ഹോതി, പരിത്തഞ്ച അനോവസ്സികം ഹോതി, മഹാ ച മേഘോ ഉഗ്ഗതോ ഹോതി. തത്ര ചേ ഭിക്ഖൂനം ഏവം ഹോതി – ‘‘അയം ഖോ മഹാഭിക്ഖുസങ്ഘോ സന്നിപതിതോ, പരിത്തഞ്ച അനോവസ്സികം, മഹാ ച മേഘോ ഉഗ്ഗതോ. സചേ സങ്ഘോ തേവാചികം പവാരേസ്സതി, അപ്പവാരിതോവ സങ്ഘോ ഭവിസ്സതി, അഥായം മേഘോ പവസ്സിസ്സതീ’’തി. ബ്യത്തേന ഭിക്ഖുനാ പടിബലേന സങ്ഘോ ഞാപേതബ്ബോ –

‘‘സുണാതു മേ, ഭന്തേ, സങ്ഘോ. അയം മഹാഭിക്ഖുസങ്ഘോ സന്നിപതിതോ, പരിത്തഞ്ച അനോവസ്സികം, മഹാ ച മേഘോ ഉഗ്ഗതോ. സചേ സങ്ഘോ തേവാചികം പവാരേസ്സതി, അപ്പവാരിതോവ സങ്ഘോ ഭവിസ്സതി, അഥായം മേഘോ പവസ്സിസ്സതി. യദി സങ്ഘസ്സ പത്തകല്ലം, സങ്ഘോ ദ്വേവാചികം, ഏകവാചികം, സമാനവസ്സികം പവാരേയ്യാ’’തി.

ഇധ പന, ഭിക്ഖവേ, അഞ്ഞതരസ്മിം ആവാസേ തദഹു പവാരണായ രാജന്തരായോ ഹോതി…പേ… ചോരന്തരായോ ഹോതി… അഗ്യന്തരായോ ഹോതി… ഉദകന്തരായോ ഹോതി… മനുസ്സന്തരായോ ഹോതി… അമനുസ്സന്തരായോ ഹോതി… വാളന്തരായോ ഹോതി… സരീസപന്തരായോ ഹോതി… ജീവിതന്തരായോ ഹോതി… ബ്രഹ്മചരിയന്തരായോ ഹോതി. തത്ര ചേ ഭിക്ഖൂനം ഏവം ഹോതി – ‘‘അയം ഖോ, ബ്രഹ്മചരിയന്തരായോ. സചേ സങ്ഘോ തേവാചികം പവാരേസ്സതി, അപ്പവാരിതോവ സങ്ഘോ ഭവിസ്സതി, അഥായം ബ്രഹ്മചരിയന്തരായോ ഭവിസ്സതീ’’തി, ബ്യത്തേന ഭിക്ഖുനാ പടിബലേന സങ്ഘോ ഞാപേതബ്ബോ –

‘‘സുണാതു മേ, ഭന്തേ, സങ്ഘോ. അയം ബ്രഹ്മചരിയന്തരായോ. സചേ സങ്ഘോ തേവാചികം പവാരേസ്സതി, അപ്പവാരിതോവ സങ്ഘോ ഭവിസ്സതി, അഥായം ബ്രഹ്മചരിയന്തരായോ ഭവിസ്സതി. യദി സങ്ഘസ്സ പത്തകല്ലം, സങ്ഘോ ദ്വേവാചികം, ഏകവാചികം, സമാനവസ്സികം പവാരേയ്യാ’’തി.

ദ്വേവാചികാദിപവാരണാ നിട്ഠിതാ.