൧൧൯. തസ്സുദ്ദാനം

ഉപഗന്തും കദാ ചേവ, കതി അന്തരാവസ്സ ച;

ന ഇച്ഛന്തി ച സഞ്ചിച്ച, ഉക്കഡ്ഢിതും ഉപാസകോ.

ഗിലാനോ മാതാ ച പിതാ, ഭാതാ ച അഥ ഞാതകോ;

ഭിക്ഖുഗതികോ വിഹാരോ, വാളാ ചാപി സരീസപാ.

ചോരോ ചേവ പിസാചാ ച, ദഡ്ഢാ തദുഭയേന ച;

വൂള്ഹോദകേന വുട്ഠാസി, ബഹുതരാ ച ദായകാ.

ലൂഖപ്പണീതസപ്പായ, ഭേസജ്ജുപട്ഠകേന ച;

ഇത്ഥീ വേസീ കുമാരീ ച, പണ്ഡകോ ഞാതകേന ച.

രാജാ ചോരാ ധുത്താ നിധി, ഭേദഅട്ഠവിധേന [ഭേദാ അട്ഠവിധേന (സീ. സ്യാ.)] ച;

വജസത്ഥാ ച നാവാ ച, സുസിരേ വിടഭിയാ ച.

അജ്ഝോകാസേ വസ്സാവാസോ, അസേനാസനികേന ച;

ഛവകുടികാ ഛത്തേ ച, ചാടിയാ ച ഉപേന്തി തേ.

കതികാ പടിസ്സുണിത്വാ, ബഹിദ്ധാ ച ഉപോസഥാ;

പുരിമികാ പച്ഛിമികാ, യഥാഞായേന യോജയേ.

അകരണീ പക്കമതി, സകരണീ തഥേവ ച;

ദ്വീഹതീഹാ ച പുന ച [ദ്വീഹതീഹം വസിത്വാന (സീ.)], സത്താഹകരണീയേന ച.

സത്താഹനാഗതാ ചേവ, ആഗച്ഛേയ്യ ന ഏയ്യ വാ;

വത്ഥുദ്ദാനേ അന്തരികാ, തന്തിമഗ്ഗം നിസാമയേതി.

ഇമമ്ഹി ഖന്ധകേ വത്ഥൂനി ദ്വേപണ്ണാസ.

വസ്സൂപനായികക്ഖന്ധകോ നിട്ഠിതോ.