൧൧൨. പഹിതേയേവ അനുജാനനാ

൧൯൯. ഇധ പന, ഭിക്ഖവേ, ഭിക്ഖുസ്സ ഭാതാ ഗിലാനോ ഹോതി. സോ ചേ ഭാതുനോ സന്തികേ ദൂതം പഹിണേയ്യ – ‘‘അഹഞ്ഹി ഗിലാനോ, ആഗച്ഛതു മേ ഭാതാ, ഇച്ഛാമി ഭാതുനോ ആഗത’’ന്തി, ഗന്തബ്ബം, ഭിക്ഖവേ, സത്താഹകരണീയേന, പഹിതേ, ന ത്വേവ അപ്പഹിതേ. സത്താഹം സന്നിവത്തോ കാതബ്ബോ.

ഇധ പന, ഭിക്ഖവേ, ഭിക്ഖുസ്സ ഭഗിനീ ഗിലാനാ ഹോതി. സാ ചേ ഭാതുനോ സന്തികേ ദൂതം പഹിണേയ്യ – ‘‘അഹഞ്ഹി ഗിലാനാ, ആഗച്ഛതു മേ ഭാതാ, ഇച്ഛാമി ഭാതുനോ ആഗത’’ന്തി, ഗന്തബ്ബം, ഭിക്ഖവേ, സത്താഹകരണീയേന, പഹിതേ, ന ത്വേവ അപ്പഹിതേ. സത്താഹം സന്നിവത്തോ കാതബ്ബോ.

ഇധ പന, ഭിക്ഖവേ, ഭിക്ഖുസ്സ ഞാതകോ ഗിലാനോ ഹോതി. സോ ചേ ഭിക്ഖുസ്സ സന്തികേ ദൂതം പഹിണേയ്യ – ‘‘അഹഞ്ഹി ഗിലാനോ, ആഗച്ഛതു ഭദന്തോ, ഇച്ഛാമി ഭദന്തസ്സ ആഗത’’ന്തി, ഗന്തബ്ബം, ഭിക്ഖവേ, സത്താഹകരണീയേന, പഹിതേ, ന ത്വേവ അപ്പഹിതേ. സത്താഹം സന്നിവത്തോ കാതബ്ബോ.

ഇധ പന, ഭിക്ഖവേ, ഭിക്ഖുഗതികോ ഗിലാനോ ഹോതി. സോ ചേ ഭിക്ഖൂനം സന്തികേ ദൂതം പഹിണേയ്യ – ‘‘അഹഞ്ഹി ഗിലാനോ, ആഗച്ഛന്തു ഭദന്താ, ഇച്ഛാമി ഭദന്താനം ആഗത’’ന്തി, ഗന്തബ്ബം, ഭിക്ഖവേ, സത്താഹകരണീയേന, പഹിതേ, ന ത്വേവ അപ്പഹിതേ. സത്താഹം സന്നിവത്തോ കാതബ്ബോ.

തേന ഖോ പന സമയേന സങ്ഘസ്സ വിഹാരോ ഉന്ദ്രിയതി. അഞ്ഞതരേന ഉപാസകേന അരഞ്ഞേ ഭണ്ഡം ഛേദാപിതം ഹോതി. സോ ഭിക്ഖൂനം സന്തികേ ദൂതം പാഹേസി – ‘‘സചേ ഭദന്താ തം ഭണ്ഡം ആവഹാപേയ്യും, ദജ്ജാഹം തം ഭണ്ഡ’’ന്തി. ഭഗവതോ ഏതമത്ഥം ആരോചേസും. അനുജാനാമി, ഭിക്ഖവേ, സങ്ഘകരണീയേന ഗന്തും. സത്താഹം സന്നിവത്തോ കാതബ്ബോതി.

പഹിതേയേവ അനുജാനനാ നിട്ഠിതാ.

വസ്സാവാസഭാണവാരോ നിട്ഠിതോ.