൧൧൩. അന്തരായേ അനാപത്തിവസ്സച്ഛേദവാരോ

൨൦൦. തേന ഖോ പന സമയേന കോസലേസു ജനപദേ അഞ്ഞതരസ്മിം ആവാസേ വസ്സൂപഗതാ ഭിക്ഖൂ വാളേഹി ഉബ്ബാള്ഹാ ഹോന്തി. ഗണ്ഹിംസുപി പരിപാതിംസുപി. ഭഗവതോ ഏതമത്ഥം ആരോചേസും.

ഇധ പന, ഭിക്ഖവേ, വസ്സൂപഗതാ ഭിക്ഖൂ വാളേഹി ഉബ്ബാള്ഹാ ഹോന്തി. ഗണ്ഹന്തിപി പരിപാതേന്തിപി. ഏസേവ അന്തരായോതി പക്കമിതബ്ബം. അനാപത്തി വസ്സച്ഛേദസ്സ.

ഇധ പന, ഭിക്ഖവേ, വസ്സൂപഗതാ ഭിക്ഖൂ സരീസപേഹി ഉബ്ബാള്ഹാ ഹോന്തി. ഡംസന്തിപി പരിപാതേന്തിപി. ഏസേവ അന്തരായോതി പക്കമിതബ്ബം. അനാപത്തി വസ്സച്ഛേദസ്സ.

ഇധ പന, ഭിക്ഖവേ, വസ്സൂപഗതാ ഭിക്ഖൂ ചോരേഹി ഉബ്ബാള്ഹാ ഹോന്തി. വിലുമ്പന്തിപി ആകോടേന്തിപി. ഏസേവ അന്തരായോതി പക്കമിതബ്ബം. അനാപത്തി വസ്സച്ഛേദസ്സ.

ഇധ പന, ഭിക്ഖവേ, വസ്സൂപഗതാ ഭിക്ഖൂ പിസാചേഹി ഉബ്ബാള്ഹാ ഹോന്തി. ആവിസന്തിപി ഹനന്തിപി [ഓജമ്പി ഹരന്തി (സീ.), ഹരന്തിപി (സ്യാ.)]. ഏസേവ അന്തരായോതി പക്കമിതബ്ബം. അനാപത്തി വസ്സച്ഛേദസ്സ.

ഇധ പന, ഭിക്ഖവേ, വസ്സൂപഗതാനം ഭിക്ഖൂനം ഗാമോ അഗ്ഗിനാ ദഡ്ഢോ ഹോതി. ഭിക്ഖൂ പിണ്ഡകേന കിലമന്തി. ഏസേവ അന്തരായോതി പക്കമിതബ്ബം. അനാപത്തി വസ്സച്ഛേദസ്സ.

ഇധ പന, ഭിക്ഖവേ, വസ്സൂപഗതാനം ഭിക്ഖൂനം സേനാസനം അഗ്ഗിനാ ദഡ്ഢം ഹോതി. ഭിക്ഖൂ സേനാസനേന കിലമന്തി. ഏസേവ അന്തരായോതി പക്കമിതബ്ബം. അനാപത്തി വസ്സച്ഛേദസ്സ.

ഇധ പന, ഭിക്ഖവേ, വസ്സൂപഗതാനം ഭിക്ഖൂനം ഗാമോ ഉദകേന വൂള്ഹോ ഹോതി. ഭിക്ഖൂ പിണ്ഡകേന കിലമന്തി. ഏസേവ അന്തരായോതി പക്കമിതബ്ബം. അനാപത്തി വസ്സച്ഛേദസ്സ.

ഇധ പന, ഭിക്ഖവേ, വസ്സൂപഗതാനം ഭിക്ഖൂനം സേനാസനം ഉദകേന വൂള്ഹം ഹോതി. ഭിക്ഖൂ സേനാസനേന കിലമന്തി. ഏസേവ അന്തരായോതി പക്കമിതബ്ബം. അനാപത്തി വസ്സച്ഛേദസ്സാതി.

൨൦൧. തേന ഖോ പന സമയേന അഞ്ഞതരസ്മിം ആവാസേ വസ്സൂപഗതാനം ഭിക്ഖൂനം ഗാമോ ചോരേഹി വുട്ഠാസി. ഭഗവതോ ഏതമത്ഥം ആരോചേസും. അനുജാനാമി, ഭിക്ഖവേ, യേന ഗാമോ തേന ഗന്തുന്തി.

ഗാമോ ദ്വേധാ ഭിജ്ജിത്ഥ. ഭഗവതോ ഏതമത്ഥം ആരോചേസും. അനുജാനാമി, ഭിക്ഖവേ, യേന ബഹുതരാ തേന ഗന്തുന്തി.

ബഹുതരാ അസ്സദ്ധാ ഹോന്തി അപ്പസന്നാ. ഭഗവതോ ഏതമത്ഥം ആരോചേസും. അനുജാനാമി, ഭിക്ഖവേ, യേന സദ്ധാ പസന്നാ തേന ഗന്തുന്തി.

തേന ഖോ പന സമയേന കോസലേസു ജനപദേ അഞ്ഞതരസ്മിം ആവാസേ വസ്സൂപഗതാ ഭിക്ഖൂ ന ലഭിംസു ലൂഖസ്സ വാ പണീതസ്സ വാ ഭോജനസ്സ യാവദത്ഥം പാരിപൂരിം. ഭഗവതോ ഏതമത്ഥം ആരോചേസും.

ഇധ പന, ഭിക്ഖവേ, വസ്സൂപഗതാ ഭിക്ഖൂ ന ലഭന്തി ലൂഖസ്സ വാ പണീതസ്സ വാ ഭോജനസ്സ യാവദത്ഥം പാരിപൂരിം. ഏസേവ അന്തരായോതി പക്കമിതബ്ബം. അനാപത്തി വസ്സച്ഛേദസ്സ.

ഇധ പന, ഭിക്ഖവേ, വസ്സൂപഗതാ ഭിക്ഖൂ ലഭന്തി ലൂഖസ്സ വാ പണീതസ്സ വാ ഭോജനസ്സ യാവദത്ഥം പാരിപൂരിം, ന ലഭന്തി സപ്പായാനി ഭോജനാനി. ഏസേവ അന്തരായോതി പക്കമിതബ്ബം. അനാപത്തി വസ്സച്ഛേദസ്സ.

ഇധ പന, ഭിക്ഖവേ, വസ്സൂപഗതാ ഭിക്ഖൂ ലഭന്തി ലൂഖസ്സ വാ പണീതസ്സ വാ ഭോജനസ്സ യാവദത്ഥം പാരിപൂരിം, ലഭന്തി സപ്പായാനി ഭോജനാനി, ന ലഭന്തി സപ്പായാനി ഭേസജ്ജാനി. ഏസേവ അന്തരായോതി പക്കമിതബ്ബം. അനാപത്തി വസ്സച്ഛേദസ്സ.

ഇധ പന, ഭിക്ഖവേ, വസ്സൂപഗതാ ഭിക്ഖൂ ലഭന്തി ലൂഖസ്സ വാ പണീതസ്സ വാ ഭോജനസ്സ യാവദത്ഥം പാരിപൂരിം, ലഭന്തി സപ്പായാനി ഭോജനാനി, ലഭന്തി സപ്പായാനി ഭേസജ്ജാനി, ന ലഭന്തി പതിരൂപം ഉപട്ഠാകം. ഏസേവ അന്തരായോതി പക്കമിതബ്ബം. അനാപത്തി വസ്സച്ഛേദസ്സ.

ഇധ പന, ഭിക്ഖവേ, വസ്സൂപഗതം ഭിക്ഖും ഇത്ഥീ നിമന്തേതി – ‘‘ഏഹി, ഭന്തേ, ഹിരഞ്ഞം വാ തേ ദേമി, സുവണ്ണം വാ തേ ദേമി, ഖേത്തം വാ തേ ദേമി, വത്ഥും വാ തേ ദേമി, ഗാവും വാ തേ ദേമി, ഗാവിം വാ തേ ദേമി, ദാസം വാ തേ ദേമി, ദാസിം വാ തേ ദേമി, ധീതരം വാ തേ ദേമി ഭരിയത്ഥായ, അഹം വാ തേ ഭരിയാ ഹോമി, അഞ്ഞം വാ തേ ഭരിയം ആനേമീ’’തി. തത്ര ചേ ഭിക്ഖുനോ ഏവം ഹോതി, ‘ലഹുപരിവത്തം ഖോ ചിത്തം വുത്തം ഭഗവതാ, സിയാപി മേ ബ്രഹ്മചരിയസ്സ അന്തരായോ’തി, പക്കമിതബ്ബം. അനാപത്തി വസ്സച്ഛേദസ്സ.

ഇധ പന, ഭിക്ഖവേ, വസ്സൂപഗതം ഭിക്ഖും വേസീ നിമന്തേതി…പേ… ഥുല്ലകുമാരീ നിമന്തേതി… പണ്ഡകോ നിമന്തേതി… ഞാതകാ നിമന്തേന്തി… രാജാനോ നിമന്തേന്തി… ചോരാ നിമന്തേന്തി… ധുത്താ നിമന്തേന്തി – ‘‘ഏഹി, ഭന്തേ, ഹിരഞ്ഞം വാ തേ ദേമ, സുവണ്ണം വാ തേ ദേമ, ഖേത്തം വാ തേ ദേമ, വത്ഥും വാ തേ ദേമ, ഗാവും വാ തേ ദേമ, ഗാവിം വാ തേ ദേമ, ദാസം വാ തേ ദേമ, ദാസിം വാ തേ ദേമ, ധീതരം വാ തേ ദേമ ഭരിയത്ഥായ, അഞ്ഞം വാ തേ ഭരിയം ആനേമാ’’തി. തത്ര ചേ ഭിക്ഖുനോ ഏവം ഹോതി, ‘ലഹുപരിവത്തം ഖോ ചിത്തം വുത്തം ഭഗവതാ, സിയാപി മേ ബ്രഹ്മചരിയസ്സ അന്തരായോ’തി, പക്കമിതബ്ബം. അനാപത്തി വസ്സച്ഛേദസ്സ.

ഇധ പന, ഭിക്ഖവേ, വസ്സൂപഗതോ ഭിക്ഖു അസ്സാമികം നിധിം പസ്സതി. തത്ര ചേ ഭിക്ഖുനോ ഏവം ഹോതി, ‘ലഹുപരിവത്തം ഖോ ചിത്തം വുത്തം ഭഗവതാ, സിയാപി മേ ബ്രഹ്മചരിയസ്സ അന്തരായോ’തി, പക്കമിതബ്ബം. അനാപത്തി വസ്സച്ഛേദസ്സ.

അന്തരായേ അനാപത്തിവസ്സച്ഛേദവാരോ നിട്ഠിതോ.