൭൬. ഗാമസീമാദി

൧൪൭. അസമ്മതായ, ഭിക്ഖവേ, സീമായ അട്ഠപിതായ, യം ഗാമം വാ നിഗമം വാ ഉപനിസ്സായ വിഹരതി, യാ തസ്സ വാ ഗാമസ്സ ഗാമസീമാ, നിഗമസ്സ വാ നിഗമസീമാ, അയം തത്ഥ സമാനസംവാസാ ഏകുപോസഥാ. അഗാമകേ ചേ, ഭിക്ഖവേ, അരഞ്ഞേ സമന്താ സത്തബ്ഭന്തരാ, അയം തത്ഥ സമാനസംവാസാ ഏകുപോസഥാ. സബ്ബാ, ഭിക്ഖവേ, നദീ അസീമാ; സബ്ബോ സമുദ്ദോ അസീമോ; സബ്ബോ ജാതസ്സരോ അസീമോ. നദിയാ വാ, ഭിക്ഖവേ, സമുദ്ദേ വാ ജാതസ്സരേ വാ യം മജ്ഝിമസ്സ പുരിസസ്സ സമന്താ ഉദകുക്ഖേപാ, അയം തത്ഥ സമാനസംവാസാ ഏകുപോസഥാതി.

൧൪൮. തേന ഖോ പന സമയേന ഛബ്ബഗ്ഗിയാ ഭിക്ഖൂ സീമായ സീമം സമ്ഭിന്ദന്തി. ഭഗവതോ ഏതമത്ഥം ആരോചേസും. യേസം, ഭിക്ഖവേ, സീമാ പഠമം സമ്മതാ തേസം തം കമ്മം ധമ്മികം അകുപ്പം ഠാനാരഹം. യേസം, ഭിക്ഖവേ, സീമാ പച്ഛാ സമ്മതാ തേസം തം കമ്മം അധമ്മികം കുപ്പം അട്ഠാനാരഹം. ന, ഭിക്ഖവേ, സീമായ സീമാ സമ്ഭിന്ദിതബ്ബാ. യോ സമ്ഭിന്ദേയ്യ, ആപത്തി ദുക്കടസ്സാതി.

തേന ഖോ പന സമയേന ഛബ്ബഗ്ഗിയാ ഭിക്ഖൂ സീമായ സീമം അജ്ഝോത്ഥരന്തി. ഭഗവതോ ഏതമത്ഥം ആരോചേസും. യേസം, ഭിക്ഖവേ, സീമാ പഠമം സമ്മതാ തേസം തം കമ്മം ധമ്മികം അകുപ്പം ഠാനാരഹം. യേസം, ഭിക്ഖവേ, സീമാ പച്ഛാ സമ്മതാ തേസം തം കമ്മം അധമ്മികം കുപ്പം അട്ഠാനാരഹം. ന, ഭിക്ഖവേ, സീമായ സീമാ അജ്ഝോത്ഥരിതബ്ബാ. യോ അജ്ഝോത്ഥരേയ്യ, ആപത്തി ദുക്കടസ്സാതി. അനുജാനാമി, ഭിക്ഖവേ, സീമം സമ്മന്നന്തേന സീമന്തരികം ഠപേത്വാ സീമം സമ്മന്നിതുന്തി.